تازيون خبرون

Daily Archives: October 12, 2015

اين اي 122 جي ننڍي چونڊ: ن ليگ ميدان ماري وئي، اياز صادق کي سرسي

 

 

لاهور(بيورو) قومي اسيمبلي جي تڪ اين اي 122 ۾ ننڍي چونڊ لاءِ آخري اطلاعن تائين ووٽن جي ڳڻپ جاري هئي جڏهن ته 284 مان 2015 پولنگ اسٽيشنن جي غير حتمي ۽ غير سرڪاري نتيجن موجب مسلم ليگ (ن) جي اميدوار سردار اياز صادق 68 هزار 521 ووٽن سان پهرئين نمبر تي ۽ تحريڪ انصاف جو اميدوار

عليم خان 64 هزار 510 ووٽن سان ٻئي نمبر هو. قومي اسيمبلي جي تڪ اين اي 122 ۽ 144 ۾ ننڍي چونڊ لاءِ ووٽنگ جو عمل صبح جو 8 وڳي شروع ٿيو جيڪو بنا وقفي جي شام 5 وڳي تائين جاري رهيو. لاهور جي تڪ اين اي 122 جي 215 پولنگ اسٽيشنن جي غير حتمي ۽ غير سرڪاري نتيجن موجب (ن) ليگ اميدوار اياز صادق 68 هزار 521 ووٽن سان اڳتي آهي جڏهن ته تحريڪ انصاف جي اميدوار عليم خان 64 هزار 510 ووٽن سان ٻئي نمبر تي آهي. ٻئي پاسي اوڪاڙه جي تڪ اين اي 144 جي سمورن پولنگ اسٽيشنن جي غير سرڪاري غير حتمي نتيجن موجب آزاد اميدوار رياض الحق ڪامياب ٿي ويو آهي. رياض الحق 81 هزار 240 ووٽ حاصل ڪري ڪامياب ٿيو جڏهن ته مخالف مسلم ليگ (ن) جي اميدوار کي 39 هزار 190 ووٽن سان هارايو. چونڊ جي ڊوڙ ۾ تحريڪ انصاف جي اميدوار اشرف سوهنا رڳو 7 هزار 105 ووٽ ئي حاصل ڪري سگهيو. اين اي 122 لاهور ۾ رجسٽرڊ ووٽن جو انگ 3 لک 47 هزار 762 آهي جنهن مان مرد ووٽرن جو انگ هڪ للک 90 هزار 328 آهي، تڪ ۾ 284 پولنگ اسٽيشنز قائم ڪيون ويون جن مان 80 کي حساس قرار ڏنو ويو هو. سمورين پولنگ اسٽيشنن تي فوجي اهلڪار مقرر ڪيا ويا هئا جڏهن ته 5 هزار پوليس اهلڪارن به ڊيوٽي جا فرض ادا ڪيا. اليڪشن ڊيوٽي لاءِ پوليس 38 هنڌن تي ناڪابندي ڪئي. لاهور ۾ پي پي 147 ۾ به ننڍي چونڊ لاءِ پولنگ ٿي جنهن لاءِ (ن ليگ جي مهسن لطيف ۽ تحريڪ انصاف جي شعيب صديقي وچ ۾ وڏو مقابلو آهي. اليڪشن ڪميشن سمورين پولنگ اسٽيشنن تي سي سي ٽي وي ڪيمرائون لڳايون ۽ صوبائي مرڪزي آفيس ۾ ڪنٽرول روم به قائم ڪيو جنهن جي نگراني صوبائي چيف اليڪشن ڪمشنر ڪئي جڏهن ته اسلام آباد ۾ قائم ڪيل ڪنٽرول روم جي نگراني چيف اليڪشن ڪمشنر ۽ سيڪريٽري اليڪشن ڪميشن ڪئي. مسلم ليگ (ن) جي اميدوار اياز صادق شيخ سردار هاءِ اسڪول ڳڙهي شاهو ۾ پنهنجو ووٽ ڪاسٽ ڪيو، انهيءَ کانسواءِ ڳڙهي شاهو ۾ (ن)( ليگ ۽ تحريڪ انصاف جي اميدوارن جون گاڏيون آمهون سامهون اچڻ تي ٻنهي پارٽين پاران سخت نعريبازي ڪئي وئي جڏهن ته سمن آباد جي علائقي ۾ ٻنهي پارٽين جي ڪارڪنن وچ ۾ هاٿاپائي پڻ ٿي.

 

ٿر ۾ شروع ڪيل پاور پراجيڪٽ کي مڪمل ڪرڻ ۾ رنڊڪون ختم ڪيون وڃن: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاه ٿر ڪول اينڊ انرجي بورڊ کي حڪم ڏنو آهي ته ٿر ۾ شروع ڪيل پاور پروجيڪٽس مڪمل ڪرڻ ۾ رنڊڪون جلد کان جلد هٽائي ۽ چيو آهي ته شهيد محترمه بينظير جو خواب هو اسان کي هر هال ۾ ان جو خواب سانڀيا ڪندي ٿر جي ڪوئلي مان بجلي پيدا ڪرڻي آهي، اهڙن خيالن جو اطهار هن آچر تي سي ايم هائوس ۾ ٿرل ڪول انرجي بورڊ جي 19 هين اجلاس جي صدارت ڪندي ڪيو، اجلاس ۾ مراد علي شاهه، شازيه مري، صديق ميمڻ، روبينا قائمخاني، علم الدين بلو، ٿرڪول انرجي بورڊ جو ايم ڊي اعجاز احمد ۽ ٻين شرڪت ڪئي، ان موقعي تي ايم ڊي اجلاس کي بريفنگ ڏيندي ٻڌايو ته سائنو سنڌ گلوبل مائينگ ڪمپني کي ٿرڪول فيلڊ ۾ بلاڪ هڪ ڏنو ويو آهي جتي هن 0.85 ملين ڊالر جي لاڳت سان 6.5 ٽن ساليانا ڪول مائينگ رٿا جي شروعات ڪئي آهي ۽ ان لاءِ 1.1 ملين ڊالر جي لاڳت سان 330 ميگاواٽ جا 4 پاور پلانٽ تعمير ڪنداسين، هن ٻڌايو ته ڪمپني مارچ 2012 ۾ بينڪ فزيبلٽي مڪمل ڪري ورتي آهي جنهن کانپوءِ هن شنگائي اليڪٽرڪ پاور لاءِ ڪوئلي جي سپلائي لاءِ ياداشت نامي تي صحيحون ڪيون آهن. ان حوالي سان معاهدو به طئه ٿيڻ وارو آهي، هلندڙ مهيني آڪٽومبر 2015 ۾ ان جو فناشل ڪلوز ٿي ويندو، هن چيو ته سنڌ اينگرو ڪول مائينگ ڪمپني جنهن ۾ 51 سيڪڙو سنڌ حڪومت جو حصو آهي، اينگرو پاور ٿر لميٽيڊ سان بلاڪ 2 ۾ ڪوئلي جو سپلائي جو معاهدو ڪيو آهي، جنهن جي اگهه جي بورڊ منظوري ڏني آهي، هن 5 ارب رپين جي لوڪل فنانسنگ تي صحيحون ڪيون آهن، ڪمپني اوپن پٽ ڪول مائينگ تان بار هلڪو ڪرڻ شروع ڪري ڇڏيو آهي ان جو فناشل ڪول به هلندڙ مهيني ۾ ٿي ويندو، وڏي وزير چيف سيڪريٽري کي هدايت ڪئي ته جيڪڏهن ڪي زمين حاصل ڪرڻ جا معاملا آهن ته ڏنل ٽائيم اندر اهي اڪاليا وڃن، ٿر ڪول جي ايم ڊي بلاڪ 7 جتي ڊاڪٽر ثمر مبارڪ مند انڊر گرائونڊ ڪول ٽيسيفڪيشن پروجڪيٽ اينڊ پاور پلانٽ شروع ڪيو آهي ان بابت ٻڌايو ته اتي 38 بورل ٿي چڪا آهن ۽ ڊسمبر 2011 ۾ ٽيسٽ برنگ به ڪئي وئي ۽ سائن گيس پيدا ڪئي پئي وڃي، هن پيورفڪيشن پلانٽ به لڳايو آهي ۽ في وقت 8 کان 10 ميگاواٽ پاور پلانٽ نصب ڪيا پيا وڃن، وڏي وزير مراد علي شاهه کي هدايت ڪئي ته هو ثمر مبارڪ کي پنهنجي پروجڪيٽ جي ٽينڪڪي معاملي تي بورڊ کي بريفنگ ڏيڻ جي دعوت ڏئي.

 

اين اي 122 ۾ اليڪشن ڪميشن ڪٿي نظر نه آيو، صرف نوٽيس ڏئي رهيو آهي: خورشيد شاهه

سکر (بيورو) قومي اسيمبلي ۾ مخالف ڌر اڳواڻ سيد خورشيد شاهه اليڪشن ڪميشن تي تنقيد ڪندي چيو آهي ته اين اي 122 ۾ اليڪشن ڪميشن ڪٿي نظر نه آيو، اليڪشن ڪميشن صرف نوٽيس ڏئي رهيو آهي، نوٽيس نه پر ايڪشن نظر اچڻ گهرجي، سکر ۾ ميڊيا سان ڳالهائيندي هن چيو ته اين اي 122 ۾ اليڪشن ڪميشن لاچاري جو اظهارڪيو آهي، هڪ پاسي وزير اعلان ڪندا رهيا ته ٻئي پاسي پيسي جو استعمال ٿيو، هن چيو ته اليڪشن نالو ئي رابطي ۽ ماحول بڻائڻ جو آهي، جڏهن ماحول جڙي ٿو تڏهن ماڻهو ووٽ وجهڻ لاءِ نڪرن ٿا، هن چيو ته پهرين ڏينهن کان ان جو ڪائل هيس ته ايم ڪيو ايم جي پارليامينٽ ۾ واپس اچڻ گهرجي، سنڌ حڪومت ۾ ايم ڪيو ايم جيواپسي جو فيصلو سي اي سي جي اختيار ۾ آهي.

 

بلاول ڀٽو زرداري جي سانگهڙ ضلعي جي نمائندن سان ملاقات، سنڌ جي سياسي صورتحال تي ڳالهيون

ڪراچي(اي پي پي) پاڪستان پيپلز پارٽي جي چيئرمين بلاول ڀٽو زرداري نواب شاهه زرداري هائوس ۾ سنڌ جي وڏي وزير جي پورهئي بابت صلاحڪار اصغر علي خان جوڻيجو ۽ قومي اسيمبلي جي ميمبر روشن جوڻيجو سميت سانگهڙ ضلعي جي نمائندن سان ملاقات ڪئي. آچرتي جاري ڪيل پڌرائي مطابق ملاقات ۾ سنڌ جي سياسي صورتحال ۽ مڪانيچونڊن تي خيالن جي تفصيلي مٽا سٽا ڪئي وئي. ان موقعي تي صوبائي صلاحڪار اصغر علي خان جوڻيجو ۽ روشن جوڻيجو بلاول ڀٽو زرداري کي مڪاني چونڊن تي بريفنگ ڏني. پيپلز پارٽي جي چيئرمين بلاول ڀٽو زرداري مڪاني چونڊن لاءِ روشن جوڻيجو ۽ اصغر علي خان جوڻيجو طرفان ڪيل ڪم جي واکاڻ ڪئي ۽ اطمينان جو اظهار ڪيو.

 

اتر وزيرستان ۾ هوائي حملو، 22 دهشتگرد مارجي ويا، 6 ٿاڪ تباهه

دتا خيل(مانيٽرنگ ڊيسڪ سيڪيورٽي فورسز جي اتروزيرستان ۾ دهشتگردن جي ٿاڪن تي بمباري، 22 دهشتگرد مارجي ويا.پاڪ فج جي عام رابطن واري شعبي مطابق اتر وزيرستان ۾ پاڪ افغان سرحد جي ويجهو دتا خيل جي علائقي ۾ دهشتگردن جي ٿاڪن کي نشانو بڻايو ويو آهي.هوائي ڪارروائي جي نتيجي ۾ 22 دهشتگرد مارجي ويا، وڏي انگ ۾ هٿيارن سوڌو دهشتگردن جا 6 ٿاڪ تباهه ڪيا ويا.

 

پيپلز پارٽي 2013 وانگر مڪاني چونڊن ۾ به ڌانڌلي ڪري سيٽون حاصل ڪرڻ جي ڪوشش ڪري رهي آهي: ارباب غلام رحيم

ڪراچي (اسٽاف رپورٽر) سنڌ جي اڳوڻي وڏي وزير ۽ مسلم ليگ ن جي مرڪزي اڳواڻ ارباب غلام رحيم چيو آهي ته پ پ 2013 وانگر مڪاني چونڊن ۾ به ڌانڌلي ڪري سيٽون کڻڻ جي سازش ڪري رهي آهي، اسان کيس ڪامياب ٿيڻ نه ڏينداسين، اليڪشن ڪميشن کي احتجاج رڪارڊ ڪرايو آهي ۽ اليڪشن ڪميشن به 2 ڏينهن اڳ سنڌ حڪومت کي پنهنجي خدشن کان خط ۾ آگاهه ڪيو آهي، پ پ جي دور ۾ ترقي ته ڇا ٿيندي ٻارڙا، عورتون، دوائون ۽ کاڌ خوراڪ نه هئڻ سبب تڙپي تڙپي مري

ويا، اهڙن خيالن جو اظهار هن آچر تي پنهنجي رهائشگاهه تي پريس ڪانفرنس ڪندي ڪيو، ان موقعي تي ارباب ذڪاءُ الله، اي ڊي لاکو ۽ ٻيا پڻ موجود هئا، پريس ڪانفرنس ۾  پ پ ٿرپارڪر سان تعلق رکندڙ ڪيترن نيڪ مردن پ پ ڇڏي ارباب گروپ ۾ شامل ٿيڻ جو اعلان ڪيو ۽ هنن چي ته اسان سان ٿرپارڪر ۽ عمر ڪوٽ جا هزارين خاندان آهن جيڪي هميشه پ پ جا ووٽر رهيا آهن پر پ پ مان مايوس ٿي ارباب گروپ ۾ شامل ٿيا آهيون، هنن چيو ته ارباب غلام رحيم پنهنجي دور ۾ ٿر کي ترقي ڏني پر پ پ 7 سالن ۾ موت کانسواءِ ڪجهه نه ڏنو آهي، ارباب غلام رحيم چيو ته آغا سراج دراني حج ڪري ته آيو پر هيرا ڦيري اڄ به ڪري رهيو آهي، ان جو پنهنجي علائقي ۾ ڇا ڪردار آهي ۽ هو ڪير آهي ان لاءِ ذوالفقار مرزا وٽ موجود ثبوت ڪافي آهن، هن چيو ته سنڌ جا ماڻهو پ پ مان بيزار آهن ۽ اميد آهي ته  پ پ کي مڪاني چونڊن ۾ سنڌ جو عوام رد ڪندو.

 

اوڪاڙا،هڪ ڪنوار به رخصتي کان اڳ ووٽ وجهڻ پولنگ اسٽيشن پهچي وئي

اوڪاڙا(مانيٽرنگ ڊيسڪ) اوڪاڙا ۾ سياسي گرمي پد ان حد تائين وڌي ويو آهي جو شادي جي موقعي تي هڪ ڪنوار به ووٽ وجهڻ لاءِ پولنگ اسٽيشن پهچي وئي.اوڪاڙا ۾ اين اي 144 ۾ پولنگ هلي رهي آهي، جي هڪ ڪنوار رخصتي کان اڳ ووٽ وجهڻ پهچي وئي.اوڪاڙا جي ڪنوار رخصتي کان اڳ پنهنجي حق جو استعمال ڪرڻ پنهنجو فرض سمجهيو. ڪنوار مطابق هاڻوڪي دور ۾ ووٽ جي طاقت جي وڏي اهميت ٿي وئي آهي جنهن کي ضايع نه ڪرڻ گهرجي.سندس چوڻ هو ته ووٽ ڏيڻ کان پوءِ ئي پنهنجي نئين زندگي جي شروعات ڪندي.

 

ميان چنو ۾ رستو نه ڏيڻ تي ٻن گروپن ۾ جهيڙو، 8 ڄڻا مارجي ويا

ميان چنو(مانيٽرنگ ڊيسڪ) روٽلا ۾ کيٽن ۾ ويندڙن کي رست نه ڏيڻ تي ٻن گروپن ۾ جهيڙي ۾ 2 عورتن سميت 8 ڄڻا مارجي ويا آهن . ميان چنو جي علائقي روٽلا ۾ حافظ بلال راجپوت ۽ حافظ ڪريم سکيرا وچ ۾ گهڻي عرصي کان رستي جي معاملي تي تڪرار هلير هيو هو گذريل ڏينهن ٻنهي خاندانن وچ ۾ ڇڪتاڻ ٿي جيڪا شدت اختيار ڪري وئي ۽ ٻنهي گروپن ۾ ٽڪراءُ ٿيو. فائرنگ ۾ 4 ڄڻا موقعي تي مارجي ويا جڏهن ته 4 زخمي ٿي پيا، زخمين کي ويجهي اسپتال منتقل ڪيو ويو جتي اُهيزخمن جا سور نه سگهندي فوت ٿي ويا. مارجي ويلن ۾ حافظ ڪريم سندس 3 ڀائر حافظ سعيد، غلام ۽ ماسٽر مقبول کانسواءِ سندس امڙ ۽ حافظ سعيد جي زال شامل آهي جڏهن ته مخالف گروپ جا 2 ڄڻا مارجي ويا آهن. پوليس جو چوڻ آهي ته لاشن کي وارثن حوالي ڪيو ويو آهي پر علائقي ۾ اڃا به ڇڪتاڻ آهي.

 

اين اي 122 جي پولنگ بستي سيدن شاه ۾ پي ٽي آءِ ۽ (ن) ليگ ڪرڪنن ۾ جهيڙو، هٿين پئجي ويا

لاهور (بيورو) لاهور جي قومي اسيمبلي تڪ اين اي 122 تي ننڍي چونڊ ۾ پولنگ اسٽيشن بستي سيدن شاهه اپر مال روڊ تي هڪ ٻئي خلاف نعري بازي تي پاڪستان مسلم ليگ (ن) ۽ پاڪستان تحريڪ انصاف جي ڪارڪنن وچ ۾ جهيڙو ٿي پيو جنهن دوران ٻ؟ي ڌريون هڪ ٻئي کي هٿين پئجي ويون. پي ٽي آءِ جي ڪارڪنن (ن) ليگ جي ڪيمپ پٽي ڇڏي جنهن جي ڪري ووٽر خوفزه ٿي ويا. بر موجب پولنگ بوٿ نمبر 89، 90، 91، 92 ۽ 95 ۾ ٻنهي گروپن وچ ۾ سخت جملن جي ڏي وٺ ٿي جنهن کان پوءِ ٻنهي پارٽين جا ڪارڪن هٿين پئجي ويا. ان دوران پولي معاملي کي نبيرڻ جي ڪوشش ڪئي پر ڪاميابي نه ملي سگهي جڏهن ته فوج جي جوانن ٻنهي ڌرين ۾ معاملو ختم ڪرايو. پولنگ اسٽيشنن ٻاهران موجود ووٽرن ٻڌايو ته پي ٽي آءِ جي ڪارڪنن طرفان ووٽرن کي ڊيجھاريو پيو وڃي ۽ کين ووٽ جو حق استعمال ڪرڻ کان روڪڻ جي ڪوشش ڪئي پئي وڃي پر (ن) ليگ جي ووٽرن جو عزم بلند آهي ۽ هو سردار اياز صادق کي ڪامياب ڪرائيندا. ان موقعي تي مسلم ليگ (ن) جي صوبائي اسيمبلي ميمبر وحيد گل چيو ته تحريڪ انصاف جي غنڊه گردي هلڻ نه ڏني ويندي. امن جا حامي آهيون ۽ چاهيون ٿا ته اليڪش عمل پرامن نموني مڪمل ٿئي. هن چيو ته اسان کي پوري اميد آهي ته مسلم ليگ (ن) اليڪشن کٽيندي.

 

اين اي 122 ۽ پي پي 147 ۾ عورت ووٽرن جي وڏي انگ ووٽ ڪاسٽ ڪيو

 

لاهور (بيورو) لاهور جي قومي اسيمبلي جي تڪ اين اي 122 ۽ صوبائي تڪ پي پي 147 ۾ ننڍي چونڊ لاءِ پولنگ جو عمل صبح جو اٺين وڳي شروع ٿي ويو ۽ مرد توڙي عورت ووٽرن جو وڏو انگ صبح سوير ئي ووٽ ڪاسٽ ڪرڻ لاءِ پولنگاسٽيشنن ٻاهران قطار ۾ بيهي رهيو. ان موقعي تي سيڪيورٽي جا سخت انتظام ڪيا ويا هئا ۽ فوج، رينجرز ۽ پوليس جا اهلڪار وڏي انگ ۾ مقرر ٿيل هئا. اين اي 122 ۾ رجسٽرڊ ووٽن جو ڪل تعداد 3 لک 47 هزار 762 آهي تڪ ۾ 284 پولنگ اسٽيشنون قائم ڪيون ويون.