تازيون خبرون

Daily Archives: October 10, 2015

95 ارب جي رٿا 55 ارب ۾ پوري ڪئي، پاڪستان کي هلائڻ سولو ڪم ناهي: نواز شريف

شيخوپورا (مانيٽرنگ ڊيسڪ)  شيخوپورا ۾ 1180 ميگاواٽ بکي پاور پلانٽ جي پيڙهه جو پٿر رکڻ جي تقريب سان خطاب ڪندي وزيراعظم نوازشريف چيو ته هاڻي تائين پاڪستان ۾ اونڌي گنگا وهندي رهي آهي ۽ اڄ ان گنگا کي سڌو ڪرڻ لاءِ اسان وڏي محنت سان ڪم ڪيو آهي. وزيراعظم پنهنجي خطاب ۾  چيو ته بجلي محنت سان ڪم ڪرڻ کانپوءِ ئي ايندي آهي پر ڪنٽينر تي چڙهندڙن ۽ بلساڙيندڙن کي سمجه ۾ اها ڳالهه نٿي اچي ته 95 ارب جي رٿا 55 ارب تي آندي آهي، رانديون ڪرڻ وارا سياستدان گارين جي سياست کان نڪري اچن. هن چيو ته نيپرا ۽ رولز مطابق بکي رٿا 95 ارب رپين جي هئي پر ان کي 55 ارب جي لاڳت سان لڳايون پيو وڃي. بهترين ڪم ڪرڻ تي پنجاب جي وڏي وزير شهباز شريف ۽ ان جي ٽيم کي مبارڪون هجن.بکي بجلي رٿا سستي بجلي پيدا ڪندي. وزيراعظم جو چوڻ هو ته 20 ،30 سالن ۾ معاملا گهڻا منجهي ويا آهن. پاڪستان کي هلائڻ سولو ڪم ناهي. ماضي ۾ ڪنهن به بجلي جي بحران تي نه سوچيو هو، ڪنٽينر تي بيهي گاريون ڏيندڙن لاءِ منهنجي دعا آهي ته هو سٺو ڳالهائين جيڪو سڀني کي وڻي ۽ ڪڏهن چيو ته مان بجلي جو بحران ڪجهه سالن ۾ ختم ڪندس هر مسئلي کي حل ڪرڻ لاءِ ڪجهه قوت ته لڳندو آهي.پنجاب جي وڏي وزير شهباز شريف تقريب سان خطاب ڪندي چيو ته  دهشتگردي ۽ بجلي بحران ملڪ جا ٻه اهم مسئئلا آهن . پاڪستاني فوج آپريشن ضرب عضب هيٺ دهشتگردي ۾ ڏار وڌو آهي. دهشتگردي جي خاتمي لاءِ پاڪستاني فوج جي جوانن پنهنجي حياتين جي قرباني ڏني آهي.وزيراعظم نوازشريف قوم سان بجلي جي بندش ختم ڪرڻ جو واعدو ڪيو هو ۽ پنهنجو واعدو پورو ڪرڻ لاءِ عملي قدم کنيا.

 

سول ۽ عسڪري قيادت پاران دهشتگردن جي مالي معاونن خلاف ڪارروايون وڌيڪ تيز ڪرڻ جو فيصلو

اسلام آباد (بيورو) وزيراعظم نواز شريف جي صدارت هيٺ سياسي ۽ عسڪري قيادت جي اعليٰ سطحي اجلاس ۾ دهشتگردن، سندن سهولتڪارن ۽ مالي معاونن خلاف ڪارروايون وڌيڪ تيز ڪرڻ ۽ ڳجهي ڄاڻ جي مٽا سٽا وارو نظام وڌيڪ مضبوط بڻائڻ جو فيصلو ڪيو ويو آهي، وزيراعظم نواز شريف چيو آهي ته امن امان ۽ عوام جي تحفظ لاءِ هـَر ممڪن قدم کنيو ويندو. اسلام آباد ۾ وزيراعظم نواز شريف جي صدارت هيٺ سڪيورٽي صورتحال بابت اعليٰ سطحي اجلاس ٿيو. اجلاس ۾ جوائنٽس چيفس آف اسٽاف ڪميٽي جي چيئرمين جنرل راشد محمود، آرمي چيف جنرل راحيل شريف، ڊِي جـِي آءِ ايس آءِ ليفٽيننٽ جنرل رضوان اختر، ڊي جي آءِ ايس پي آر ليفٽيننٽ جنرل عاصمه باجوا، وفاقي گهرو وزير چوڌري نثار، ناڻي واري وزير اسحاق ڊار ۽  وزيراعظم جي پرڏيهي معاملن بابت صلاحڪار سرتاج عزيز سميت ٻين اعليٰ عملدارن شرڪت ڪئي. اجلاس ۾ سڪيورٽي صورتحال،  آپريشن ضرب عضب ۽ ڪراچي آپريشن سميت ملڪ جي مجموعي صورتحال تي غور ڪيو ويو.  ذريعن موجب، اجلاس ۾ افغانستان جي سڪيورٽي صورتحال، ان جي پاڪستان تي پوندڙ اثرن، افغان حڪومت ۽ افغان طالبان ۾ ڳالهين وارا معاملا به غور هيٺ آيا. ذريعن موجب، عسڪري عملدارن پاران اجلاس کي آپريشن ضرب عضب ۽ پاڪ-افغان سرحد جي سڪيورٽي بابت بريفنگ پڻ ڏني وئي. ذريعن موجب، اجلاس ۾ آپريشن ضرب عضب ۽ ڪراچي آپريشن جي ڪاميابين تي اطمينان جو اظهار ڪندي ڏوهارين خلاف آپريشن جاري رکڻ جو فيصلو ڪيو ويو. ذريعن موجب، اجلاس ۾ دهشتگرد، سندن سهولتڪارن ۽ مالي معاونن خلاف ڪارروائي جاري رکڻ تي به اتفاق ڪيو ويو، جڏهن ته ڳجهن ادارن ۾ انٽيليجنس نظام کي وڌيڪ مضبوط بڻائڻ جو به فيصلو ڪيو ويو. اجلاس کي خطاب ڪندي وزيراعظم نواز شريف چيو ته امن امان ۽ عوام جي تحفظ لاءِ هر ممڪن قدم کنيا ويندا.

 

عدالت معاملي کي التويٰ هيٺ رکڻ نٿي چاهي، حڪومت جواب داخل ڪرائي: سپريم ڪورٽ

اسلام آباد (بيورو) سـُپريم ڪورٽ، ايم ڪيو ايم ۽ تحريڪ انصاف جي ميمبرز جي استعيفائن واري ڪيس ۾ سينيٽ چيئرمين جي رولنگ پيش ڪرڻ جو حڪم ڏيندي سمورن ميمبرز کي ٻيهر نوٽيس جاري ڪري ڇڏيا آهن. چيف جسٽس انور ظهير جمالي جي سربراهي ۾ سپريم ڪورٽ جي ٽـَي رڪني بينچ تحريڪ انصاف ۽ ايم ڪيو ايم ميمبرز جي استعيفائن بابت ڪيس جي ٻڌڻي ڪئي. ٻڌڻيءَ جي شروعات ۾ بينچ جي ميمبر جسٽس امير هاني مسلم سوال ڪيو ته ڇا عدالت پارليامينٽ جي ڪارروائي ۾مداخلت ڪري سگهي ٿي.؟ درخواستگذار سينيٽر ظفر علي شاهه چيو ته عدالت کي پارليامينٽ جي ڪارروائي ۾ مداخلت جو اختيار آهي. جسٽس امير هاني مسلم ريمارڪس ڏنا ته جيستائين معاملو اسپيڪر وٽ آهي، عدالت مداخلت نٿي ڪري سگهي. درخواست ۾ ڌر بڻايل سينيٽ ۾ اپوزيشن ليڊر اعتزاز احسن عدالت ۾ پيش دليل ڏيندي چيو ته ڪيس ۾ اپوزيشن ليڊر ۽ قاعد ايوان کي ڌر بڻايو ويو آهي پر هن معاملي سان سندن ڪو به واسطو ناهي. چيف جسٽس اعتزاز احسن کي هدايت ڪئي ته جيڪڏهن اوهان جو معاملي سان واسطو ناهي ته ڌار درخواست ڏني وڃي. چيف جسٽس حڪومت کي جواب داخل ڪرڻ جي هدايت ڪندي چيو ته عدالت معاملي کي التويٰ هيٺ رکڻ نٿي چاهي، حڪومت جواب داخل ڪرائي، جيئن جلد فيصلو ڪري سگهجي. عدالت، ميمبرز جي استعيفائن بابت سينيٽ چيئرمين جي رولنگ پيش ڪرڻ جو حڪم ڏيندي ايم ڪيو ايم ميمبرز کي ٻيهر نوٽيس جاري ڪري ڇڏيا. سپريم ڪورٽ، تحريڪ انصاف جي ميمبرز کي به جواب داخل ڪرڻ جي هدايت ڪندي ٻڌڻي چئن هفتن تائين ملتوي ڪري ڇڏي.

 

ايم ڪيو ايم پاران قومي اسيمبلي مان استعيفائون واپس وٺڻ جو اعلان

اسلام آباد (بيورو) متحده قومي موومينٽ سينيٽ ۽ قومي اسيمبلي مان استعيفائون واپس وٺڻ جو اعلان ڪري ڇڏيو،متحده جي شڪايتن جي ازالي لاءِ ڪميٽي جوڙڻ جو اعلان ڪيو ويو. ان موقعي تي اسحاق ڊار ۽ فاروق ستار مفاهمت جي ياداشت تي صحيحون ڪيون. ناڻي جي وفاقي وزير اسحاق ڊار ۽ ايم ڪيو ايم جي اڳواڻ ڊاڪٽر فاروق ستار گڏيل پريس ڪانفرنس ۾ استعيفائون وٺڻ جو اعلان ڪيو. اسحاق ڊار پريس ڪانفرنس دوران ٻڌايو ته ڪميٽي کي 90 ڏينهن ۾ شڪايتن تي ڪم ڪرڻو پوندو. هن چيو ته ملڪ ۾ معاشي استحڪام لاءِ سياسي استحڪام جو هجڻ ضروري آهي. هن چيو ته ڪراچي جي حوالي سان شڪايتن کي ڪميٽي ختم ڪندي. ناڻي جي وزير چيو ته ڪراچي آپريشن ايم ڪيو ايم جي مطالبي تي شروع ڪيوويو. هن چيو ته متحده استيعفائون واپس وٺڻ جو يقين ڏياريو آهي. هن چيو ته سينيٽ مان ايم ڪيو ايم سومر ڏينهن استعيفائون واپس وٺندي. ناڻي جي وزير چيو ته ايم ڪيو ايم جو سنڌ ۾ وڏو ووٽ بينڪ آهي. هن چيو ته فضل الرحمان متحده سان ڳالهين ۾ اهم ڪردار ادا ڪيو. اسحاق ڊار چيو ته اسان ڪنٽينر وارن سان به ڳالهيون ڪيون. هن چيو ته اسان مفاهمت جي سياست تي يقين رکون ٿا. هن واضح ڪيو ته چاهيون ٿا ته متحده پارليامينٽ ۾ پنهنجو فعال ڪردار ادا ڪري. پريس ڪانفرنس کي خطاب ڪندي ايم ڪيو ايم جي اڳواڻ ڊاڪٽر فاروق ستار چيو ته ايندڙ هفتي کان استعيفائون واپس وٺڻ شروع ڪنداسين. هن تصديق ڪندي چيو ته ڪراچي ۾ آپريشن اسان جي مطالبي تي شروع ٿيو. هن چيو ته ڪوشش آهي ته ڪراچي مان دهشتگردي جو خاتمو آندو وڃي. فاروق ستار چيو ته خواهش آهي ته ڪراچي مان ڏوهارين جو مڪمل خاتمو آندو وڃي. هن چيو ته ڪراچي آپريشن سان امن قائم ٿيندو. هن چيو ته مولانا فضل الرحمان جي ڪوششن جي واکاڻ ڪيون ٿا. ايم ڪيو ايم اڳواڻ چيو ته اسان آئيني جي پاسداري لاءِ حلف کنيو آهي.

 

قومي خزاني ۾ 68 ڪروڙن جو گهوٻيون: نيب سکر پنو عاقل برانچ جي 4 آفيسرن کي گرفتار ڪري ورتو

سکر (اي پي پي) نيشنل اڪائونٽيبلٽي بيورو ( نيب) سکر نيشنل بينڪ سٽي پنو عاقل جي چئن آفيسرن کي قومي خزاني کي 680 ملين روپين جو نقصان پهچائڻ تي گرفتار ڪري ورتو آهي. تفصيل مطابق  مقدمي نمبر 16.2014 تحت سيد لال شاهه ولد سيد جان محمد شاهه، بشيراحمد ولد گلاب، ڪفايت ولد عنايت شيخ ۽ نصرت حسين شاهه ولد شوڪت علي شاهه کي گرفتار ڪري جيل حوالي ڪري ڇڏيو آهي ان کان اڳ ملزمن  ڪراچي هاءِ ڪورٽ مان ضمانت ڪرائي هئي جيڪا 07 آڪٽوبر 2015 تي خارج ڪئي وئي. جنهن تي احتساب ڪورٽ  سکر چئني ملزمن کي گرفتار ڪري جيل حوالي ڪيو.

 

سنڌ حڪومت ڪراچي يونيورسٽي ۾ ڇوڪرين لاءِ هاسٽل قائم ڪندي: مراد علي شاهه

ڪراچي (اين اين آءِ) سنڌ جي ناڻي واري وزير سيد مرادعلي شاهه چيو آهي ته سنڌ حڪومت پي ايڇ ڊي شاگردياڻين لاءِ بين الاقوامي مرڪز آءِ سي سي بي ايس ڪراچي يونيورسٽِي جي هڪ الڳ هاسٽل قائم ڪرڻ ۾ مالي مدد ڪندي، پاڪستان جي تاريخ ۾ پهريون ڀيرو سنڌ حڪومت 23 ملين سان سنڌ ۾ دوائن جا ٻوٽا ۽ بيمارين ۾ انهن جي استعمال بابت معلومات کي آءِ سي سي ڊي ايس ڪراچي يونيورسٽي جي ماهرن جي مدد سان جامع ويب سائيٽ تي محفوظ ڪيو ويو آهي، صوبي جي يونيورسٽين مان مالي بحران ختم ڪرڻ لاءِ حڪومت ٺوس قدم کڻي رهي آهي، ڪراچي يونيورسٽي پهرين ترجيح ۾ شامل آهي، اها ڳالهه هن جمعي تي ڪراچي يونيورسٽي ۾ سنڌ ۾ چمڙي جي بيمارين ۾ استعمال ٿيندڙ نباتاتي علاج جي عنوان تي هڪ ڪوٺايل قومي سيمينار جي تقريب کي خطاب ڪندي ڪئي، تقريب ۾ مراد علي شاهه سميت پروفيسر ڊاڪٽر قيصر، اعجاز علي خان، آءِ سي سي بي ايس جو پروفيسر ڊاڪٽر اقبال چوڌري، محترمه سمن ۽ ٻين پڻ خطاب ڪيو، جڏهن ته ڊاڪٽر پنجواني ميموريل ٽرسٽ جي چيئرسن، جمال فائونڊيشن جي سربراهه سميت ٻين اهم شخصتين شرڪت ڪئي، مراد علي شاهه چيو ته هن سروي جو مقصد سنڌ جا اجتماعي انساني تجربا، حڪمت ۽ روايتي دوائن جي استعمال جي طريقن سان سرقي سان محفوظ ڪيو وڃي، اسان جي تاريخ ۾ ائين پهريون ڀيرو ٿيو آهي جو سائنسدان صوبي جي گهٽين ۾ ويا هجن ۽ ايتري فائديمندي معلومات گڏ ڪئي هجي، ان کان اڳ مراد علي شاهه پاڪستان جي تاريخ ۾ پهريون ڀيرو 23 ملين جي لاڳت سان هڪ جامع ويب سائيٽ جو افتتاح ڪيو جنهن ۾ سمورن دوائن جي ٻوٽن بابت معلومات کي محفوظ ڪيو ويو آهي.

 

پيپلز پارٽي جا مخالف ڇٽل ڪارتوس آهن: آغا سراج دراني

ڪراچي (اسٽاف رپورٽر) سنڌ اسيمبلي جي اسپيڪر آغا سراج دراني چيو آهي ته پيپلز پارٽي جا مخالف ڇٽل ڪارتوس آهن، اڳوڻو وڏو وزير ارباب رحيم ڊپ وچان اسيمبلي اجلاس ۾ ايندو ئي ناهي. سنڌ اسيمبلي ۾ آمريڪي وفد سانملاقات کانپوءِ ميڊيا سان ڳالهائيندي آغا سراج دراني چيو ته سنڌ ۾ پ پ جا سمورا مخالف ڇٽل ڪارتوس آهن،عوام وٽ سندن ڪابه حيثيت ناهي. هن چيو ته ارباب غلام رحيم ڊپ وچان اسيمبلي اجلاس ۾ ناهي ايندو،جيڪڏهن ڪنهن ميمبر سندس غير حاضري اعتراض واريو ته هو ڪارروائي ڪندو. هن چيو ته ايم ڪيو ايم ميمبرن جي استعيفائن جي جائزي لاءِ سنڌ اسيمبلي جي سيڪريٽري نگراني ۾ ڪاميٽي جوڙي وئي آهي،جيڪڏهن متحده استعيفائون واپس وٺڻ جو فيصلو ڪيو ته کين درخواست ڏيڻي پوندي. آغا سراج دراني چيو ته اپوزيشن درخواست جمع ڪرائي ته 14 ڏينهن اندر سنڌ اسيمبلي جو اجلاس طلب ڪيو ويندو. هڪ سوال جي جواب ۾ آغا سراج دراني چيو ته هو به حج جي ادائيگي لاءِ سعودي عرب ويو هو، منيٰ سانحي ۾ الله سائين کيس بچايو آهي،شايد کانئس چڱو ڪم ڪرايو ويندو. ان کان اڳ آمريڪي سفارتڪارن جي وفد سنڌ اسيمبلي پهچي آغا سراج دراني سان ملاقات ڪئي. ملاقات دوران سنڌ ۽ ملڪي صورتحال بابت ڳالهيون ڪيو ويون،جڏهن ته آمريڪي وفد کي جيڪب آباد جيان ٻين ضلعن ۾ به اسپتالون ۽ اسڪول قائم ڪرائڻ جي تجويز پڻ ڏني وئي .

 

هن ڀيري حڪومت کي ڪنهن به صورت ۾ ڌانڌلي ڪرڻ جي اجازت نه ڏني ويندي:عمران خان

لاهور (بيورو) تحريڪ انصاف جي سربراهه عمران خان چيو آهي ته حڪومت کي هن ڀيري ڌانڌلي ڪرڻ جي ڪنهن به صورت ۾ اجازت نه ڏني ويندي، جيڪڏهن ڌانڌلي ڪئي وئي ته شريف ڀائرن کي وڌيڪ حڪومت ڪرڻ نه ڏينداسين. لاهور ۾ ميڊيا سان ڳالهائيندي عمران خان چيو ته هن ڀيري ڌانڌلي ڪئي وئي ته رستن تي اينداسين. هن چيو ته حڪومت ڌانڌلي جي پوري ڪوشش ڪندي، پر سچ عوام جي سامهون آڻينداسين. عمران خان چيو ته 2013 جي چونڊن ۾ سندن تياري نه هئي، نه ئي هنن وٽ ايجنٽ هئا، پر هاڻ ائين ناهي. تحريڪ انصاف جي سربراهه چيو ته ننڍي چونڊ ۾ وفاقي توڙي پنجاب حڪومت جا ادارا سندن خلاف آهن. هن چيو ته اين اي 122 تي چونڊ وڙهڻ لاءِ اسان مڪمل تياري ڪئي آهي. جڏهن ته نواز ليگ هڪ تڪ جي جلسي ۾ سموري پنجاب مان ماڻهو آندا آهن. هن واضح ڪيو ته اين اي 122 تي چونڊ کٽي ڏيکارينداسين.

 

پرڏيهه ۾ ملڪيت ٺاهيندڙن خلاف جاچ شروع، ايف بي آر جا آفيسر به شامل

ڪراچي(اسٽاف رپورٽر ) ايف آئي اي گذريل ڪجهه سالن جي دوران ناجائز پئسي ذريعي پرڏيهه ۾ ملڪيت ٺاهيندڙ سوين صنعتڪارن، سياستدانن ۽ اعلايٰ سرڪاري آفيسرن جي خلاف باقائده جاچ جي شروعات ڪري ڇڏي آهي. ايف آئي اي سنڌ زون کي قومي سلامتي جي ادارن پاران پرڏيهه ۾ ملڪيت ٺاهيندڙن صنعتڪارن، سياستدانن ۽ اعلايٰ سرڪاري آفيسرن جي هڪ ڊگهي فهرست ڏني وئي هئي، جنهن۾ ڪراچي، لاهور، اسلام آباد سان لاڳاپيل سوين اهم شخصيتون شامل آهن. ذريعن مطابق ايف آئي اي کي ان سلسلي ۾ گهڻي ڄاڻ ڏني وئي آهي، جن ۾ پرڏيهه ۾ ملڪيت وٺندڙن جا نالا آهن، ورتل مليت جو پوسٽل ايڊريس، وٺڻ جي تاريخ ۽ ملڪيت جي قيمت شامل آهي. ايف آئي اي اختيارين کي ذميواري ڏني وئي هئي ته هو ان سلسلي ۾ جاچ ڪري ۽ اها ڄاڻ وٺي ته لاڳاپيل ماڻهو پنهنجي جائز اپت مان پرڏيهه ملڪيت وٺڻ جا اهل هئا يا نه ۽ ملڪيت وٺڻ لاءِ منتقل ڪيل پئسو قانوني طريقي سان پرڏيهه ويو يا ان لاءِ حوالا ۽ هنڊي يا ٻين غيرق قانوني ذريعن کي استعمال ڪيو ويو.ذريعن مطابق ملڪ جي سوين اهم شخصيتن تي ٻڌل فهرست ۾ فيڊرل بورڊ آف ريونيو جا ڪيترا ئي اعليٰ آفيسر به شامل آهن.

 

بلديا فيڪٽري سانحي منظم منصوبابندي تحت هڪ ڀتاخور گروپ فيڪٽري کي باهه لڳائي،رپورٽ ۾ انڪشاف

ڪراچي (اسٽاف رپورٽر) بلديا فيڪٽري سانحي جي جاچ ڪندڙ جي آءِ ٽي جي شروعاتي رپورٽ ۾ انڪشاف ٿيو آهي ته منظم منصوبابندي تحت هڪ ڀتاخور گروپ فيڪٽري کي باهه لڳائي، سانحي جي وڌيڪ جاچ لاءِ فرانزڪ ٽيسٽون ڪرايون وينديون. بلديا ٽائون سانحي جي جاچ لاءِ جوڙيل جي آءِ ٽي دبئي ۾ پاڪستاني سفرتخاني اندر چئن ڏينهنتائين ڀائلا ڀائرن جا بيان رڪارڊ ڪرڻ کانپوءِ شروعاتي رپورٽ تيار ڪري ورتي آهي. ذريعن موجب جاچ رپورٽ ۾ انڪشاف ٿيو آهي ته بلديا ٽائون فيڪٽري سانحو هڪ گروهه جي منظم ڪارروائي هئي، جنهن ۾ منظم منصوبابندي تحت ڀتاخور گروپ فيڪٽري کي باهه لڳائي. ذريعن جو چوڻ آهي ته جي آءِ ٽي بلديا فيڪٽري سانحي جي وڌيڪ جاچ لاءِ فرانزڪ ٽيسٽون به ڪرائڻ جو فيصلو ڪيو آهي. بلديا فيڪٽري سانحي ۾ اڍائي سئو کان وڌيڪ ملازم سڙي فوت ٿي ويا هئا.