تازيون خبرون

Daily Archives: October 9, 2015

منيٰ سانحي کانپوءِ حڪومت جي ناقص انتظامن تي سينيٽ مان اپوزيشن جو واڪ آئوٽ

اسلام آباد (بيورو) سينيٽ ۾ اپوزيشن پاران منيٰ سانحي کانپوءِ حڪومت جي ناقص  انتظامن خلاف واڪ آئوٽ ڪيو ويو، اعتزاز احسن جو چوڻ آهي ته حڪومت، نااهل، ڪرپٽ ۽ سنگدل آهي، پيمرا جي ذريعي منيٰ سانحي کي دٻائڻ جي ڪوشش ڪئي پئي وڃي پر اپوزيشن جا هٿ حڪومت جي گريبان تي هوندا. سينيٽ چيئرمين رضا رباني جي صدارت هيٺ سينيٽ جو اجلاس ٿيو، جنهن ۾ منيٰ سانحي ۽ نندي پاور پراجيڪٽ ۾ مبينا ڪرپشن سميت مختلف معاملن تي بحث ڪيو ويو. اجلاس کي خطاب ڪندي اپوزيشن ليڊر اعتزاز احسن چيو ته منيٰ سانحي کانپوءِ 300 کان وڌيڪ حاجي شهيد يا گم آهن پر حڪومت ان حوالي سان ڪي به قدم ناهن کنيا. اعتزاز احسن چيو ته منيٰ سانحي کانپوءِ گم ۽ شهيد ٿيل حاجين جون تصويرون ۽ اڱوٺن جا نشان ويب سائيٽ تي رکيا وڃن ها ته نادرا جي ذريعي سڃاڻپ ٿي سگهي ها، جديد دور هئڻ باوجود حاجين جي سڃاڻپ ۾ ڏکيائون پيش اچي رهيون آهن. سينيٽ ۾ اپوزيشن ليڊر چيو ته حڪومت، نااهل، ڪرپٽ بي حس، سنگدل آهي، حڪومت حاجين جي وارثن کي لاوارث ڇڏي ڏنو آهي. اعتزاز احسن چيو ته حڪومت هن معاملي کي پيمرا جي ذريعي دٻائڻ چاهي ٿي پر اسان ائين ٿيڻ نه ڏينداسين، اپوزيشن جا هٿ سرڪار جي گريبان تي هوندا. اجلاس ۾ پاڻي ۽ بجلي واري وزارت جي ڪارڪردگي بابت نيپرا جي رپورٽ تي به بحث ڪيو ويو. سينيٽر عثمان ڪاڪڙ چيو ته پاڻي ۽ بجلي واري وزارت جا سمورا اهلڪار چور آهن، بلوچستان جا اڪثر علائقا بجلي چوري کان محروم آهن. پاڻي ۽ بجلي واري وفاقي وزير خواجه آصف چيو ته بلوچستان جي زرعي صارفين کي بجلي جو اسپيشل پئڪيج ڏنو ويو آهي. رشيد چيو ته حاجي معاهدو ڪري ويندا آهن ته جيڪڏهن فرض جي ادائيگي ۾ سندن  شهادت ٿي وڃي ته کين سعودي عرب ۾ ئي دفنايو وڃي، منيٰ سانحي ۾ شهيد ٿي ويل حاجين جون تصويرون موجود آهن. پرويز رشيد چيو ته ماضي ۾ حاجين پاران حڪومت کي هٿي کڻي بـَد دُعا ڏني وئي پر موجوده سرڪار جي انتظامن مان حاجي مطمئن هئا. هـُن چيو ته وزيراعظم نواز شريف جي هدايت تي مذهبي معاملن وارو وفاقي وزير سعودي عرب ۾ موجود آهي، گم ٿيل حاجين جو پتو لڳايو پيو وڃي. پرويز رشيد چيو ته ڪنهن جي حاجي جا هٿ حڪومت جي گريبان تي نه ايندا. ٽيڪس معاملن تي ڳالهائيندي وفاقي وزير پرويز رشيد چيو ته هلندڙ سال وزيراعظم چاليهه لک ٽيڪس ادا ڪيو آهي. پرويز رشيد جي خطاب بعد اپوزيشن ميمبرز، منيٰ سانحي کانپوءِ حڪومت جي ناقص انتظامن تي احتجاج بعد واڪ آئوٽ ڪري ويا.

 

سپريم ڪورٽ، ماحولياتي گدلاڻ ڪيس ۾ سنڌ حڪومت جي رپورٽ رد ڪري ڇڏي

اسلام آباد (بيورو) سـُپريم ڪورٽ، ماحولياتي گدلاڻ ڪيس ۾ سنڌ حڪومت جي رپورٽ رد ڪري ڇڏي آهي، عدالت ريمارڪس ۾ چيو آهي ته جهڙي طرح سنڌ سرڪار غير فعال آهي، ان مان لڳي پيو ته صوبي ۾ ماحولياتي ٽربيونل ۾ڪڏهن فعال نه ٿيندو. چيف جسٽس انور ظهير جمالي جي سربراهي ۾ سپريم ڪورٽ جي 3 رڪني بينچ ماحولياتي گدلاڻ بابت ڪيس جي ٻڌڻي ڪئي. ٻڌڻيءَ دوران ڊي جي انوائرمينٽل سنڌ عدالت ۾ رپورٽ پيش ڪئي، جنهن کي عدالت رد ڪندي 6 هفتن اندر ٻيهر رپورٽ ڏيڻ جو حڪم ڏنو. چيف جسٽس ريمارڪس ڏنا ته سيمينٽ جي ڪارخانن جي ڪري زمين جو رنگ تبديل ٿئي پيو، سنڌحڪومت جا آفيسر ڪڏهن سپر هاءِ وي تي ويا آهن.؟ جسٽس امير هاني مسلم ريمارڪس ڏنا ته سنڌ انوائرمينٽل جو ڊي جي پيش ٿيو آهي پر کيس ڪا خبر ئي ناهي ته ماحولياتي ٽربيونل ۾ ڪيترا ڪيس داخل آهن. جسٽس امير هاني مسلم ريمارڪس ڏنا ته لڳي رهيو آهي ته سنڌ سرڪار جيان صوبائي ماحولياتي ٽربيونل به فعال نه ٿيندو. عدالت، سنڌ حڪومت کي ايندڙ ٻڌڻي تي تفصيلي رپورٽ ڏيڻ جو حڪم ڏيندي ٻڌڻي ملتوي ڪري ڇڏي.

 

طالبان کي ڀارت جي مدد جا ثبوت عالمي برادري کي پيش ڪري ڇڏيا: پاڪستان

اسلام آباد (بيورو) پاڪستان،ڀارتي شرطن تي ڳالهين کان هڪ ڀيرو وري صاف انڪار ڪري ڇڏيو، پرڏيهي کاتي جي ترجمان قاضي خليل الله چيو آهي ته سمجهوتا ايڪسپريس مان پاڪستاني مسافرن کي لاهڻ واري معاملي جا تفصيل گڏ ڪيا پيا وڃن، طالبان کي ڀارت جي مدد جا ثبوت عالمي برادري کي فراهم ڪري ڇڏيا،ڀارت ۾ ڳئون ڪهڻ کي بهانو بڻائي مسلمانن تي تشدد جا واقعا افسوس جوڳا آهن. پرڏيهي کاتي جي آفيس ۾ ميڊيا کي هفتيوار بريفنگ ڏيندي ترجمان قاضي خليل الله واضح ڪيو ته پاڪستان مسئلن جي حل لاءِ ڳالهين کان ڪڏهن به انڪار ناهي ڪيو پر ڀارت جي شرطن تي ڳالهيون نه ٿيون ڪري سگهجن. هن ٻڌايو ته پاڪستان ۾ مداخلت ۽ طالبان کي ڀارتي مدد جا ثبوت عالمي برادري حوالي ڪيا ويا آهن،سمجهوتا ايڪسپريس مان پاڪستاني مسافرن کي لاهڻ واري معاملي جا تفصيل گڏ ڪيا پيا وڃن. قاضي خليل الله ڀارت ۾ ڳئون ڪهڻ کي جواز بڻائي مسلمانن کي تشدد جو نشانو بڻائڻ وارن واقعن تي ڳڻتيءَ جو اظهار ڪندي چيو ته ڀارت دنيا ۾ ڳئونءَ جو گوشت وڪرو ڪندڙ ٻيو نمبر وڏو ملڪ آهي. هن چيو ته ڳئونءَ جو گوشت واپرائڻ جو بهانو بڻائي مسلمانن کي تشدد جو نشانو بڻائڻ درست عمل ناهي. قاضي خليل الله، هندو انتها پسندن جي ڌمڪين سبب ڀارت ۾ پاڪستاني غزل ڳائڻي غلام علي جو ڪنسرٽ ملتوي ڪرڻ تي به افسوس جو اظهار ڪيو. قاضي خليل الله، پاڪستان ۾ داعش جي موجودگي کان انڪار ڪندي چيو ته داعش جهڙي دهشتگرد تنظيم کي ڪنهن به ريت برداشت نه ڪيو ويندو. منيٰ سانحي بابت ڳالهائيندي پرڏيهي ترجمان چيو ته سعودي سرڪار حج لاءِ بهترين انتظام ڪيا هئا، پر ان باوجود منيٰ سانحو پيش آيو. سندس چوڻ هو ته منيٰ سانحو ڏکائيندڙ آهي،جنهن ۾ 89 پاڪستاني حاجي شهيد،9 زخمي ۽ 43 ڄڻا گم ٿي ويا. قاضي خليل الله ٻڌايو ته گم ٿي ويل پاڪستانين جي ڳولا جاري آهي،جڏهن ته ان سلسلي ۾ مذهبي معاملن واري وزير سردار يوسف سان سعودي عرب جي لاڳاپيل وزير جي ملاقات پڻ ٿي آهي. پرڏيهي کاتي جي ترجمان وڌيڪ چيو ته پاڪستان، افغان حڪومت ۽ طالبان وچ ۾ ڳالهين جي مڪمل حمايت ڪري ٿو، افغان سرڪار سان رابطا ۽ سهڪار به جاري آهي. پرڏيهي کاتي جي ترجمان پنهنجي بريفنگ دوران شام ۾ روس جي حملن جي مخالفت ڪئي. قاضي خليل الله جو چوڻ هو ته شام ۾ حڪومت ۽ باغين ۾ هلندڙ تڪرار جو حل ڳالهين ذريعي ڪڍيو وڃي،پاڪستان شام ۾ ڪنهن به اڳرائيءَ جي حمايت نه ڪندو

 

ڊاڪٽر عاصم کي اسپتال ۾ رکڻ جي ضرورت آهي يا نه؟: سپريم ڪورٽ ميڊيڪل بورڊ جوڙڻ جو حڪم

اسلام آباد (بيورو) سـُپريم ڪورٽ، دهشتگردن جي معاونت جي الزام هيٺ گرفتار پيپلزپارٽي اڳواڻ ۽ اڳوڻي وفاقي وزير ڊاڪٽر عاصم جي معائني لاءِ ميڊيڪل بورڊ جوڙڻ جو حڪم ڏيندي وفاقي حڪومت کان رپورٽ طلب ڪري ورتي آهي. جسٽس سرمد جلال عثماني ۽ جسٽس دوست محمد کوسا تي ٻڌل سپريم ڪورٽ جي ڊويزنل بينچ ڊاڪٽر عاصم جي گهرواري جي درخواست تي ٻڌڻي ڪئي. ٻڌڻيءَ دوران ڊاڪٽر عاصم جي گهرواري جي وڪيل عابد زبيري موقف اختيار ڪيو ته ڊاڪٽر عاصم کي دل جي تڪليف کانپوءِ ڪراچي  ۾ دل جي قومي اداري ۾ داخل ڪيو ويو هو.  وڪيل عابد زبيري دليل ڏنا ته رينجرز ڊاڪٽر عاصم کي اسپتال ۾ علاج دوران ٻيهر حراست ۾ وٺي وئي هئي، ڊاڪٽر عاصم جو صحيح نموني سان علاج ناهي ٿيو، رينجرز جي ڊاڪٽر پاران پيش ڪيل رپورٽ به تسلي جوڳي نه هئي. وڪيل عدالت کي استدعا ڪئي ته ڊاڪٽر عاصم جي معائني لاءِ ميڊيڪل بورڊ جوڙيو وڃي. عدالت، دليل ٻڌڻ کانپوءِ صحت واري وفاقي سيڪريٽري کي حڪم ڏنو ته ڊاڪٽر عاصم جي معائني لاءِ ميڊيڪل بورڊ جوڙي رپورٽ پيش ڪئي وڃي ۽ ٻڌايو وڃي ته ڊاڪٽر عاصم کي اسپتال ۾ رکڻ جي ضرورت آهي يا نه.؟ ڊاڪٽر عاصم جي گهرواري جي وڪيل چيو ته ميڊيڪل بورڊ ۾ ڪو به فوجي ڊاڪٽر شامل نه ڪيو وڃي. عدالت، رمارڪس ڏنا ته اميد آهي ته غير جانبدار ڊاڪٽرن تي ٻڌل ميڊيڪل بورڊ قائم ڪيو ويندو، جنهن بعد عدالت ٻڌڻي 28 آڪٽوبر تائين ملتوي ڪري ڇڏي.

 

تحريڪ انصاف  وزيراعظم نوازشريف  کي عمران خان سان سڌي ريت مناظري جو چئلينج ڏئي ڇڏيو

اسلام آباد (بيورو) تحريڪ انصاف  وزيراعظم  ميان نوازشريف  کي سڌي ريت مناظري جو چئلينج  ڏيندي چيو آهي ته  نوازشريف  جنهن چينل يا جاءِ تي عمران خان سان مناظرو ڪرڻ چاهي ٿو  ته پي ٽي آءِ مڪمل طور تي تيار آهي،  پرويز رشيد تحريڪ انصاف  تي تنقيد ڪرڻ بدران  پنهنجي وزارت تي ڌيان ڏئي، تحريڪ انصاف جي چيئرمين عمران خان  جي ترجمان ڊاڪٽر شيرين مزاري  وزيراعظم ميان نوازشريف کي چئليج ڪيوآهي ته نوازشريف ميڊيا  يا ڪنهن به پليٽ فارم تي عمران خان سان مناظرو ڪري ته قوم جي اڳيان حقيقتون اچي وينديون  ته ڪير ڪيتري پاڻي ۾ آهي. شيرين مزاري  وفاقي  پرويز رشيد  کي به مشورو ڏنو آهي ته هو پي ٽي آءِ  تي تنقدي ڪرڻ بدران  پنهنجي وزارت  جيڪارڪردگي  بهتر بڻائي،ڇو ته پرويز رشيد جي پي ٽي آءِ تي تنقيد  سجائي آهي، انهي سان پارٽي ته ڪو فرق نه پوندو.

 

ماڊل ايان علي تي فرد جرم لاڳو ڪرڻ بابت ڪيس جي ٻڌڻي ملتوي

راولپنڊي(اي پي پي) ڪسٽمز جي خاص عدالت جي جج آفتاب احمد خان ڪرنسي اسمگلنگ ڪيس ۾ ماڊل ايان علي تي فرد جرم لاڳو ڪرڻ لاءِ ڪيس جي ٻڌڻي 15 آڪٽوبر تائين ملتوي ڪري ڇڏي آهي. فاضل جج پنهنجي ريمارڪس ۾ چيو ته عدالت ۾ ڪو به وي آءِ پي نه هوندو آهي، سڀ برابر هوندا آهن. هن چيو ته هاڻي فقط ڪارروائي ٿيندي وڌيڪ وقت نه ملندو. خميس ڏينهن ڪسٽمز جي خاص عدالت جي جج آفتاب احمد خان ڪرنسي اسمگلنگ ڪيس جي باضابطه ٻڌڻي ڪئي. ايان علي پرائيويٽ سيڪيورٽي جي گهيري هيٺ عدالت آئي. ايان علي پنهنجي سينيئر وڪيل سردار لطيف کوسه جي غيرحاضري جو بهانو بڻائي فرد جرم لاڳو ڪرڻ واري ڪارروائي ملتوي ڪرڻ جي درخواست ڪئي. خاص عدالت جي جج پنهنجي ريمارڪس ۾ چيو ته جوابدار پاڻ عدالت ۾ موجود آهي ۽ فرد جرم لاڳو ڪرڻ لاءِ سينيئر وڪيل جو هجڻ لازمي ناهي. عدالت جوابدار ايان علي کي آخري موقعو ڏيندي ڪيس جي شنوائي 15 آڪٽوبر تائين ملتوي ڪري ڇڏيو

 

ڪراچي ۾ آپريشن اسان جي مطالبي تي شروع ڪيو ويو، ڪجهه مهينن کان آپريشن متحده کي ختم ڪرڻ لاءِ ڪيو پيو وڃي: فاروق ستار

ڪراچي (اسٽاف رپورٽر) رابطا ڪميٽي ايم ڪيو ايم اڳواڻ ڪمال ملڪ جي مبينا گرفتاري تي رد عمل ظاهر ڪندي چيو آهي ته ڪراچي ۾ آپريشن سندن مطالبي تي شروع ڪيو ويو ۽ ڪجهه مهينن کان اهو آپريشن متحده  کي ختم ڪرڻ لاءِ ڪيو پيو وڃي. نائن زيرو تي پريس ڪانفرنس ڪندي فاروق ستار چيو ته   رينجرز ڪمال ملڪ کي نارٿ ناظم آباد ۾ سندس گهر مان گرفتار ڪيو پر رينجرز وارا ان جي گرفتاري کان لاتعلقي ظاهر ڪري رهيا آهن. هن چيو ته جيڪڏهن ڪمال ملڪ کي رينجرز گرفتار ناهي ڪيو ته رينجرز جي وردي ۾ ڪهڙو گروهه آهي، ڇا حڪومت رينجرز جي نامعلوم ماڻهن جي جاچ ڪئي آهي. هن چيو ته جيڪڏهن ڪمال ملڪ جو ڪو ڏوهه آهي ته ان بابت 24 ڪلاڪن اندر ٻڌائڻ گهرجي ۽ اهي گرفتاريون ايم ڪيو ايم کي ڪمزور ڪرڻ لاءِ ڪيون پيون وڃن، جنهن جا اثر مڪاني چونڊن تي پوندا. فاروق ستار چيو ته ايم ڪيو  ايم جي وڏي انگ ۾ ڪارڪنن کي گرفتار ڪيو ويو ۽ ڪيترائي لاپتا آهن ۽ ڪجهه ڪارڪنن جو عدالت کان مٿانهون قتل ڪيو ويو آهي. فاروق ستار چيو ته ڪراچي ۾  ايم ڪيو ايم جي هوندي ٻئي ڪنهن کي مڙهڻ جون تياريون ڪيون پيون وڃن ۽ ڪارڪنن توڙي اڳواڻن جي گرفتارين جو سلسلو بند ٿيڻ گهرجي. هن چيو ته سڀني کي خبر آهي ته عامر خان، قمر منصور ۽ ڪيف الورا کي  ڪهڙي ريت عدالت ۾ پيش ڪيو ويو، اهو ڪنهن کان لڪل ناهي. فاروق ستار چيو ته ڪمال ملڪ  مڪاني چونڊن لاءِ نامزدگي فارم ڀرايو آهي، هو جگر جي بيماري ۾ مبتلا آهي جنهن جي صحت بابت کين ڳڻتي آهي.

 

سنڌ ڄائو ڊائريڪٽر راجڪمار هيراڻي ”منا بهائي ايم بي بي ايس ٿري” ٺاهيندو

ممبئي(شوبز نيوز) فلم ”منا بهائي ايم بي بي ايس ٿري” جو اسڪرپٽ پڄاڻي جي آخري مرحلي ۾ پهچي ويو آهي. فلمساز راجڪمار هيراڻي هڪ تقريب ۾ ڳالهائندي ٻڌايو ته هو منا بهائي ايم بي بي ايس جو ٽيون حصو ٺاهڻ جو منصوبو جوڙي رهيو آهي ۽ فلم لاءِ اسڪرپٽ پاڻ لکي رهيو آهي جيڪو مڪمل ٿيڻ واروآهي. هيراڻي چيو ته ان فلم ۾به منا ڀائي جو ڪردار سنجي دت ئي ادا ڪندو. منا ڀائي ايم بي بي ايس 2003ع ۾ رليز ٿي جڏهن ته ان سلسلي جي ٻئين فلم ”منا بهائي لگي رهو” 2006ع ۾ رليز ٿي. راجڪمار هيراڻي چيو ته ان سلسلي جي ٽئين فلم پهرين وارين فلمن کان بهتر هوندي.

 

سڪون ۽ سادگيءَ تي ٻَڌل موسيقي ترتيب ڏيڻ تي يقين رکندي آهيان: عروج آفتاب

ڪراچي(شوبز نيوز) ڳائڻي ۽ موسيقار عروج آفتاب هدايتڪار مهريب جبار جي ايندڙ فلم ”دوباره پهر نهين“ لاءِ گانو ترتيب ڏنو آهي ۽ ڳايو به پاڻ آهي. عروج آفتاب بالي ووڊ فلم ”تلوار“ لاءِ ڳايو آهي ۽ هن چيو آهي ته صوفي موسيقي جهڙي سڪون واري ۽ سادي موسيقي ترتيب ڏيڻ تي يقين رکان ٿا. فلم ”دوباره پهر نهين“ لاءِ هن تمام گهڻو رومانوي گانو ترتيب ڏنو آهي، جيڪو دلين ۾ لهي ويندو. عروج چيو ته نيويارڪ ۾ پنهنجي دوست جي دعوت ۾ موجود هئي جتي سندس دوست گانو ڳائڻ جي فرمائش ڪئي ۽ هن ڳايو. ان تقريب ۾ هدايتڪار فلمساز وشال ڀردواج به هو، جنهن تقريب جي پڄاڻيءَ تي تلوار لاءِ ڳائڻ جي آڇ ڪئي.

 

شاهد خان آفريدي ٽي 20 اسڪواڊ ۾ شامل ٿيڻ جو حقدار ناهي: سرفراز نواز

اسلام آباد(شوبز نيوز) ٽيسٽ ڪرڪيٽر سرفراز نواز چيو آهي ته شاهد خان آفريدي کي 2016ع ۾ شيڊول ٽي 20 ورلڊ ڪپ لاءِ ٽيم جو ڪپتان نه بڻايو وڃي ها ته کيس اسڪواڊ ۾ جڳهه ٺاهڻ لاءِ تمام گهڻي ڪوشش ڪرڻي پوي ها. انفرادي طور تي ان جي ڪارڪردگي ٻُڙي آهي، هو ٽي 20 اسڪواڊ ۾ شامل ٿيڻ جو حقدار ناهي. ڀارت خلاف سيريز کيڏڻ جي سوچ کي ختم ڪري اڳتي وڌڻ جي ضرورت آهي. ڇو ته ٻيون بهترين ٽيمون پاڪستان خلاف کيڏڻ جي انتظار ۾ آهن. پاڪستاني ٽيم زمبابوي کي ٽي 20 سيريز ۾ وائٽ واش ڪيو هو. ”اي پي پي“ سان ڳالهائيندي سرفراز نواز چيو ته آفريدي جهڙن رانديگرن تي اعتماد نٿو ڪري سگهجي جيڪو سال ۾ هڪ ڀيرو پرفارم ڪندو آهي.