تازيون خبرون

Daily Archives: October 9, 2015

مناسب منصوبا بندي ڪئي وڃي ته ڪابه فلم فلاپ نه ٿيندي: ايشوريه راءِ

ممبئي(شوبز نيوز) بالي ووڊ اداڪاره ايشوريا چيو آهي ته جيڪڏهن مناسب رٿابندي ڪئي وڃي ته ڪابه فلم فلاپ نه ٿيندي. ڀارتي سڌ سماءَ جي ذريعن مطابق ايشوريا چيو آهي ته فلمسازيءَ جي شعبي ۾ بزنس ڪرڻ جو هي بهترين وقت آهي، سيڙپڪاريءَ جا موقعا وڌي ويا آهن. هن چيو ته ماضيءَ ۾ اسان سمجهندا هئاسين ته فلم هٽ ٿي آهي پر پوءِ اها خبر پوندي آهي ته فلم کي پنهنجا پئسا پورا ڪرڻ ۾ 2 سال لڳندا آهن. هن چيو ته جيڪڏهن مناسب منصوبا بندي ڪئي وڃي ته فلم جي فلاپ ٿيڻ جو خدشو تمام گهٽ ٿيندو آهي. ايشوريا چيو ته مختلف عنوانن تي فلمون ٺهي رهيون آهن، ان سان مسئلن کي اجاگر ڪرڻ سان گڏوگڏ اداڪارن جي صلاحيتن ۾ اضافو ٿيندو آهي. واضح رهي ته ايشوريا جي نئين فلم ”جذبه“ جمعي ڏينهن رليز ٿيندي.

 

سلمان خان ۽ شاهه رُخ خان کي اسٽار نه ساٿي اداڪار سمجهان ٿو: نواز الدين صديقي

ممبئي(شوبز نيوز) بالي ووڊ اداڪار نواز الدين صديقي چيو آهي ته هو سلمان خان ۽ شاهه رُخ خان کي اسٽار نه ساٿي اداڪار سمجهان ٿو. ڀارتي سڌ سماءَ وارن ذريعن موجب 49 سالن جي اداڪار سلمان خان سان ”بجرنگي ڀائيجان“ ۾ ڪم ڪري چڪو آهي، جڏهن ته هن پنهنجي نئين فلم ”رئيس“ ۾ شاهه رُخ خان سان فلم جي پهرين شيڊول جي شوٽنگ ڪئي آهي. ٻنهي خانز سان ڪم ڪرڻ جي تجربي جي حوالي سان هن چيو ته جڏهن هو سيٽ تي خانز سان هوندو آهي ته هو انهن کي ساٿي اداڪار سمجهان ٿو. نواز الدين چيو آهي ته جيڪڏهن هو اهو سوچڻ شروع ڪري ڇڏي ته هو هنن سان اداڪار طور ڪم ڪري رهيو آهي ته هو پنهنجي ڪردار کي بهتر طريقي سان ادا نه ڪري سگهندو. هن چيو ته هو شوٽنگ دوران اهو ناهي سوچيندو ته هن سان گڏ ڪير ڪم ڪري رهيو آهي، هو پنهنجو ڌيان رڳو پنهنجي اداڪاريءَ تي رکندو آهي.

 

ڪيون پيٽرسن پي ايس ايل ۾ شرڪت نه ڪرڻ جي افواهن کي بي بنياد قرار ڏئي ڇڏيو

لنڊن (اسپورٽس نيوز) انگلينڊ ڪرڪيٽ ٽيم جي اڳوڻي ڪپتان ۽ بيٽسمين ڪيون پيٽرسن پاڪستان سپر ليگ (پي ايس ايل) ۾ شرڪت نه ڪرڻ وارين خبرن کي بي بنياد قرار ڏئي ڇڏيو، سندس چوڻ هو ته ان قسم جي افواهن ۾ ڪا به حقيقت نه آهي، تفصيل موجب ڪجهه ڏينهن اهي خبرون گردش ڪري رهيون هيون ته پيٽرسن معاوضي جي تڪرار تي پاڪستان سپر ليگ کيڏڻ کان انڪار ڪيو آهي، انگلش بيٽسمين گذريل ڏينهن ٽوئيٽر تي پنهنجي هڪ ٽوئٽ ۾ اهڙين خبرن کي غلط قرار ڏنو آهي.

 

بنگلاديش ايندڙ مهيني زمبابوي خلاف ٽيسٽ ڪرڪيٽ سيريز جي ميزباني ڪندو

ڍاڪا(اسپورٽس نيوز) آسٽريليا خلاف سيريز ملتوي ٿيڻ کانپوءِ بنگلاديش ايندڙ مهيني زمبابوي خلاف ٻن ٽيسٽ ڪرڪيٽ ميچن جي سيريز جي ميزباني ڪندو. بنگلاديش ڪرڪرٽ بورڊ (بي سي بي) جي صدر نظم الحسن مطابق ٻنهي ٽيمن وچ ۾ اها سيريز ايندڙ سال جنوريءَ ۾ شيڊول هئي ۽ ٻنهي ٽيمن وچ ۾ 2 ٽيسٽ، 3 ون ڊي ۽ 2 ٽي 20 ميچن جي سيريز کيڏڻي هئي. جڏهن ته اسان جي درخواست تي زمبابوي ڪرڪيٽ اصولي طور تي نومبر ۾ سيريز کيڏڻ تي اتفاق ڪري ورتو آهي. شيڊول جو اعلان بعد ۾ ڪيو ويندو. هن چيو ته ٽيسٽ سيريز کانپوءِ ٻنهي ٽيمن وچ ۾ ون ڊي ۽ ٽي 20 سيريز ايندڙ سال جنوريءَ ۾ کيڏي ويندي.

 

ڪراچي آپريشن تڪرار ڇو؟: مدد علي سنڌي

سنڌ جي وڏي وزير سيد قائم علي شاهه جو بيان آيل آهي ته رينجرز جي خلاف آيل اشتهارن وارو معاملو سازش آهي، هن چيو ته سنڌ ۾ برابر ڪرپشن آهي، پر ڪرپشن خلاف ڪارروائي نيب ۽ ايف آءِ جو ڪم ناهي، ڇاڪاڻ ته ڪرپشن فقط سنڌ جو معاملو نه آهي پر سموري ملڪ ۾ ڪرپشن موجود آهي.

وڏي وزير جي هن بيان ۾ ڪيترا معاملا آهن، سڀ کان اول ته اها ڳالهه صاف ٿيڻ گهرجي ته سنڌ ۾ دهشت گردي ۽ ڪرپشن خوفناڪ مسئلي جي صورت اختيار ڪري ويا هيا ۽ اها ڳالهه هر ماڻهو برملا چئي رهيو آهي ته سنڌ ۾ خاص طور تي ڪراچي شهر ۾ ڀتا مافيا، ٽارگيٽ ڪلرز، دهشت گردي خلاف رينجرز جي ڪارروائين بهتر نتيجو ظاهر ڪيو آهي. مثال طور ڪراچيءَ ۾ هڪ فيڪٽري ۾ محض ڪروڙين رپيا ڀتو نه ڏيڻ تي فيڪٽري کي باهه ڏني ويئي، نتيجي ۾ اڍائي سئو کان وڌيڪ بي گناهه پورهيت سڙي رک ٿي ويا، پر بعد ۾ خبر ناهي ڪهڙن سببن جي ڪري ڏوهارين خلاف ڪارروائي نه ٿي.

يا وري ٽارگيٽ ڪلنگس يا وري شدت پسندن جي ڪاررواين، سڄي ڪراچيءَ کي جهڙوڪر تباهه ڪري ڇڏيو هو، يا وري جيڪڏهن ڪرپشن جو ذڪر ڪجي ته ماڻهن جي ڏندين آڱريون ٿيون اچيو وڃن، اهو سڀ ڪجهه ٿي رهيو هو، هاڻي خود سنڌ حڪومت، محض  هڪ ضلعي شهدادڪوٽ ۾ جعلي استادن جي ڀرتي جو اشتهار شايع ڪرايو، جنهن ۾ 400 کان به مٿي جعلي استادن جي ڀرتي جو ذڪر هيو.

اهڙي صورتحال ۾ رينجرز جي ڪارروائي وقتائتي هئي ۽ آهي ان قدم جي افاديت کان انڪار ممڪن ڪونهي. اهڙين حالتن ۾ اهي اشتهار شايع ٿين، جيڪڏهن بقول وزيراعليٰ جي ته سازش آهي ته پوءِ اها سازش ڪنهن ڪئي ؟ يا انهن اشتهارن شايع ڪرڻ جو مقصد ڇا هو ؟ ڇا محض فقط ايس پي، ۽ ڊي ايس پي انهيءَ ڪم ۾ شامل ٿي سگهن ٿا، يا وري آئي جي پوليس موصوف جي مرضيءَ سان اهو ڪم ٿي سگهي ٿو، رينجرز به سنڌ حڪومت جي ماتحت آهي، آپريشن به سنڌ حڪومت جي مرضيءَ سان هلي رهيو آهي ته پوءِ اهو ڪم ڇو ٿيو ؟ ته ان ڳالهه تي سوال ضرور اٿندا ۽ خود وزيراعليٰ سنڌ به اها ڳالهه مڃي، تڏهن ته ايس پي ۽ ڊي ايس پي کي معطل ڪيو ويو آهي.

سڀ کان اول ته ڏوهاري پوءِ اهي دهشت گردي ڪندا هجن يا بدعنواني ۾ ملوث هجن ته اهو ڏوهه آهي ۽ ڏوهارين جي خلاف ڪارروائي يا ته سنڌ حڪومت کي اڳئي ڪرڻ کپندي هئي، پر جيڪڏهن نيب يا ايف آءِ ڪري ٿي ته پوءِ ان تي وزيراعليٰ سنڌ جي وفاقي حڪومت سان ڳالهيون ڪرڻ گهرجن، اهو ڪو وڏو معاملو ڪونهي، پر وڏو معاملو ڪرپشن آهي، اها ڪرپشن جيڪا سنڌ کي تباهه ڪري رهي آهي، سنڌ تباهه ٿي رهي آهي ته سنڌي ماڻهو تباهه ٿي رهيو آهي ۽ تباهي نه رڳو اڄ جي دور جي پر ايندڙ دور جي به آهي.

تعليم کاتو، سنڌ جو اهم کاتو آهي، اتي جيڪو حال ڪيو ويو، اهو پاڻ سيڪريٽري ايجوڪيشن مسٽر فضل الله پيچوهو، ڪيترا ڀيرا بيان ڪري چڪو آهي، ايريگيشن،صحت، روينيو ۽ ٻين کاتن جا معاملا اوهين پاڻ ڏسي رهيا آهيو، ته پوءِ ڇا ٿئي ؟ ڇا نه ٿيڻ گهرجي ؟ ڇا ڪيو وڃي، اهي سوال پنهنجي جاءِ تي اٿي رهيا آهن.

باقي ملڪ جي ٻين ڀاڱن ۾ ڪرپشن آهي ته پوءِ اهو مقصد ڪونهي ته ٻيا به گندو ڪم ڪري رهيا آهن ۽ جيڪڏهن اسان ڪيون پوءِ ڇا ٿيو ؟ اها ڳالهه غير منطقي ۽ غير سائنسي آهي. جيڪڏهن اسانجي پنهنجي صوبي ۾ ڪرپشن آهي ته پوءِ اسانکي اول اها درست ڪرڻ گهرجي جيڪڏهن اسان اها ڳالهه ڪنداسين ته ٻين هنڌن تي ڪرپشن آهي، ته پوءِ ماڻهو اهو به سوال ڪندا ته پنجاب ۾ جيڪا ترقي ٿي آهي اها سنڌ ۾ به ٿيڻ گهرجي، يا پنجاب ۾ ڪرپشن جو ريٽ اسان کان گهٽ آهي ته اها ڳالهه اسان وٽ به ٿيڻ گهرجي، ڪرپشن هڪ خوفناڪ بيماري آهي، اها سنڌ جهڙي پوئتي پيل، صوبي کي تباهه ڪري سگهي ٿي، ٻيا صوبا خوش قسمت آهن، جو وٽن ڪراچي جهڙو بنا ڌڻيءَ وارو شهر ڪونهي. ماضيءَ ۾ ڪراچي جي آباديءَ کي هڪ هٿرادو طريقي سان برباد ڪيو ويو آهي،

اڄ اتي مسئلا وڌي ويا آهن، مصلحتن تحت ماضيءَ جي حڪومتن ڪوبه وقتي ۽ عملي قدم نه کنيا. هتي دهشت گردي به هلندي رهي، هتي ڀتا مافيا به قائم ۽ دائم رهي هئي، هر قسم جي ڪرپشن ٿي مقصد اهو ته سموريون سماجي اوڻايون، اسان وٽ رهيون، اهي معاملا پنجاب، خيبرپختونخواه يا بلوچستان ۾ موجود نه هئا، جيڪڏهن اتي ڪرپشن آهي، اهو انهن جو معاملو آهي، اسان کي پنهنجو گهر ٺيڪ ڪرڻو آهي ۽ گهر ٺيڪ ڪري، اهو ايندڙ نسلن جي حوالي ڪري وڃڻو آهي، اڄ ڀلي ڪو ڪنهن کان سوال نه ڪري، پر ايندڙ دور ڏاڍو سجاڳ ۽ ڏاڍو ڏکيو اچي رهيو آهي، اهي سوال به ڪندا پڇاڻو به ڪندا ۽ حساب به ضرور وٺندا، ان ڪري معروضي حالتن کي بهتر ڪيو وڃي، اهو حڪومت جو اولين فرض هئڻ گهرجي.

اهي سمورا معاملا  ۽ مسئلا اسان سڀني جي آڏو آهن، ملڪ ۾ مجموعي طرح خوفناڪ دهشت گردي برپا آهي. دهشت گردي جو نيٽ ورڪ سموري ملڪ تائين پکڙيل آهي، سنڌ جو اهم شهر ڪراچي، به انهيءَ ڄار ۾ ڦاٿل آهي، روزانو ڪراچيءَ ۾ رينجرز شدت پسندن کي گرفتار ڪري رهي آهي ۽ اهو معاملو ملڪ جي مفاد ۾ آهي، دهشت گردي ٻين ملڪن ۾ جيڪا حالت ڪئي آهي،

ان جا مثال اسين سڀ ڏسي رهيا آهن، شام جو ئي مثال وٺو، لکين ماڻهو اتي ٿيندڙ گهرو لڙائي ۽ دهشت گردي سبب دربدر ٿي يورپ وڃي پهتا آهن، اڃا حالت ڪهڙي ٿيندي، تنهن بابت سموري دنيا ڳڻتي ۾ آهي جو ٻي مهاڀاري لڙائيءَ کانپوءِ وڏي ۾ وڏو مثال لڏپلاڻ آهي، وري به شابس هجي، جرمنيءَ کي جنهن هزارين شامي پناهگيرن کي پناهه ڏني آهي، جتي لڏي ويندڙ شامين جو تعداد لکن تائين پهچي ويو آهي.

هن مثال ڏيڻ جو مقصد، اهو آهي ته اسان کي معروضي حالتن جو اکيون کولي، سچائي سان جائزو وٺڻ گهرجي ۽ جيڪڏهن اهڙي صورتحال ۾ فوج پنهنجو ڪردار نڀائي رهي آهي ته ان تحت ڪنهن کي به ناخوش نه ٿيڻ گهرجي اهڙي حالتن ۾ شدت پسندن کي پوءِ اهي ڪٿي به هجن، ملڪ ۾ ڪنهن به شڪل ۾ ڪم ڪرڻ جي اجازت حاصل نه هئڻ گهرجي. جيڪي به انتهاپسند مذهبي تنظيمون آهن، انهن جي سرگرمين جي صوبائي توڙي وفاقي حڪومتي ادارن کي چوڪسي رکڻ گهرجي. اهڙين حالتن ۾ تي الزام هڻڻ، يا سازش جو ٿيڻ ان ڳالهه جي نشاني آهي ته صحيح معاملن کي متنازعا بڻايو پيو وڃي، يا متنازعا ڪرڻ جي ڪوشش، اصلي مسئلي کي سبوتاز ڪرڻ آهي.

 

استاد بخاريءَ جي 23 هين ورسي جي مناسبت سان…ملان کي مسلمان ڪري ڏي ته مڃان: دلشاد ڀٽو

اڄ منهنجي فڪري ۽ روحاني مرشد ۽ استاد جي 23هين ورسي آهي، ورهيه ويهامي ويا ڪل ئي نه پئي، هي ان زماني جي ڳالهه آهي جڏهن استاد بخاري تي ڪينسر جهڙي ازدها بيماري وار ڪيو هو،  استاد بخاري نه رڳو ارڏو، سرڪش، مهاديو، هيٺلو، انقلابي فڪري شاعر هو پر هو وڏو فلسفي به هو، ان زماني ۾ استاد بخاريءَ جي علاج لاءِ مون هڪڙو مضمون لکيو هو ته”استاد بخاريءَ جي نجهرندڙ طبيعت ۽ سرڪار جي سرد مهري“ توڙي جو هن بيباڪ ۽ خود دار شاعر هو. مونکي هن روڪيو هو ته منهنجي علاج لاءِ سرڪار کي اپيلون نه ڪيون وڃن، هن مضمون ۾ مون پهرئين دعويٰ ڪئي هئي ته استاد بخاري شاهه لطيف کان پوءِ سنڌ جو وڏو شاعر آهي، هي سيڪنڊ لطيف آهي، ان زماني ۾ شاعرن جي برميچڻ، قد ڪاٺ، مهانتا ۽ وڏائي جي هڪ ڊوڙ هلندي هئي ۽ ان وقت انهن شاعرن پنهنجي مداحن ۽ همنوائن جا ٽولا ٺاهي رکيا هئا، گروپ بندي هوندي هئي، سنڌ جي انهن مهان شاعرن جي مداحن تنقيد جي بندوقن جا سڌا فائر مون تي ڪيا ته شيخ اياز، تنوير عباسي، شمشير حيدري، تاجل بيوس، ڦلاڻو ڦلاڻو اوهان کان وسري ويا جو استاد بخاري هن صدي جو وڏو شاعر ٿي ويو ، تخليق، ڏات ۽ ڏانءُ جي ماپ لاءِ ڪي به پيرا ميٽر مقرر ٿيل نه آهن ٻيو شخصيت ڪيترو عوامي مقبوليت حاصل ڪري سگھن ٿيون انهن جو فيصلو وقت جون حالتون ۽ عوام ڪندو آهي، سنڌ جي شاعرن، اديبن، دانشورن ۽ ڏات ڏڻين کي گھٽ يا وڌ عوامي موٽ ملندي رهي آهي، سرد جنگ واري زماني دوران جڏهن دنيا اندر طبقاتي جنگ شروع هئي ۽ برصغير ۾ ادب  واضح طور کاٻي ڌر ۾ساڄي ڌر جي رخن ۾ تخليق ٿيندو هو، جيڪي پنهنجي شاعري، نشر ڪهاڻي ۾ مظلوم، پيڙهيل طبقي، هاري ۽ مزدور جي ڳالهه ڪندا هئا، اهي باغي، مزاحمتي، انقلابي ۽ مظلوم طبقي جا حامي سمجھا ويندا هئا، ٻيا جيڪي درباري، سرڪاري مراعتون،  لٺ ۽ چَٺ، عهدا ۽ اعزاز ماڻيندا هئا ۽ سرڪار جي ظلم ۽ بربريت تي پرده پوشي، ادب مِر سرڪار جاڳڻ ۽ گيت ڳائيندا هئا، انهن کي ساڄي ڌر جو تخليقار سڃاتو ويندو هو، هي تمام ڊگھو بحث آهي پر اسان وٽ جيڪي به شاعر، اديب، دانشور تخليق ڪار ۽ ڏات ڌڻي سرڪار جي ٺٺ ٺانگر ۽ ڳاڙهو ٻوڙ ڇڏي مظلوم جي طرف ٿي بيٺا اهي هميشه ظلم، زيادتي، جيل، سختين ۽ ڪاٺ ۾ رهيا آهن ۽ استاد بخاري انهن مان هو، ڪنهن به سياسي، ادبي، ثقافتي جلسي، پروگرام، تقريب استاد بخاري جي شاعريءَ جي محتاج هوندي آهي، اسٽيج استاد بخاري جي شاعري ۾ عام سادي سنڌي ٻولي استعمال ٿيل آهي، هن پنهنجي شاعري ۾ اعليٰ ڪمال جي حرفت وارن لفظن جو استعمال ڪيو آهي پر سندس شاعري ٻڌندڙ ن جي روح ۾ ٻيو ست ٿيو وڃي، ستل جذبن کي جاڳائي وجھي ٿي، استاد بخاري جي شاعري ۾ ردر، تڙپ، ڌرتي ۽ ڌرتي واسين سان عشق، انقلابي سوچ، فڪر، مستقبل جاگس ڏسيل آهن، هو سنڌ جو عظيم باغي شاعر آهي ۽ نه رڳو هن وقت جو پر ايندڙ وقت جو به شاعر آهي، سندس شاعري ۾ لازواليت، دائميت ۽ آفاقيت آهي، اهوئي سبب آهي جو استاد حڪمرانن جي اک جو ڪنڊو رهيو نه کيس وائيس چانسلر، ڪنهن بورڊ جو چيئرمين، حسن ڪارڪردگي جي صدارتي ايوارڊ جي خواهش رهي، هو چوندو هو نالو ٺاهڻ به ڏکيو آهي پر ان کي بچائڻ انتهائي ڏکيو آهي جڏهن استاد بخاري جي ڪتاب” لهر لهر درياءَ “جي مهوورت ٿي رهي هئي دادو جيم خانه حال ۾ ته ڪيترن ئي ايڪڙن تي مشتمل هن گرائونڊ ۾ پير رکڻ جي جاءِ نه هئي، خبر نه آهي ڪٿان اچي خلق گڏ ٿي، گرائونڊ تي لڳل وڻن تي ماڻهو چڙهي ويا، گرائونڊ جي ديوار ماڻهن ٽوڙي وڌي ڪنهن به شاعر کي ايڏي عوامي موٽ ۽ مهانتا مون زندگي ۾ نه ڏٺي آهي، ان وقت ضياءُ الحق جي قهري مارشلا هئي ۽ دادو جي ويٺنام ضلعي ۾ استاد بخاري پنهنجو مشهور نظم ”اهي ڪير آهن اهي ڪچي، ڪاڇي پليا شير آهن“ پڙهيو، مون کي ياد آهي ته اسٽيج تي بيهي ضياءُ جي اگهاڙي آمريت کي للڪاريو هو ۽ چيو هو ته آءُ قومپرست آهيان، سنڌپرست آهيان، ضياءُ کي همت آهي ته مونکي گرفتار ڪري، بخاري هڪ ئي وقت نه رڳو علمي ۽ قلمي جنگ پئي وڙهيو پر عملي ميدان ۾ هڪ ڌرتي جو سپاهي وارو فرض ادا ڪري رهيو هو، هو غير متنازعه شاعر هو ، سرڪار کان سواءِ سڀني قومپرستن ۽ ترقي پسندن جي جلسن ۾ ويندو هو ۽ بخاري جي شرڪت سان انهن جلسن کي چار چنڊ لڳي ويندا هئا، جڏهن مون استاد بخاري جي سيڪنڊ لطيف جي دعويٰ ڪئي ۽ ان مٿان تنقيد ٿي، هو جڏهن لاڏاڻو ڪري ويو سندس ورسي ٿي ته محترم رسول بخش پليجو صاحب سندس ورسي جي صدارت ڪندي اعتراف ڪيو ته ڀٽائي کان پوءِ استاد بخاري هن دؤر جو وڏو شاعر آهي، استاد بخاري جو آءُ وڏو نقاد رهيو آهي ۽ سندس جيئري مون سندس مٿان بي انتها تنقيد ڪئي، ان وقت آءُ ننڍڙي عمر وارو وات ڳاڙهو لکاري هئس، بخاريءَ صاحب جڏهن علاج ڪرائي واپس آيو ته مونگي گھرايائين ۽ سائين مونگي چيو ته آءُ تنهنجو  Wounded Soldier (زخمي سپاهي) آهيان، مون سندس نٻل ۽ ڪمزور هٿ چميا، سندس جذبن ۾ ڪٿي به بيماري ۽ موت جو منظر نه آيو، هو ڏاڍو بهادر ۽ حوصله مند هو، استاد بخاري نه رڳو فڪري، انقلابي ۽ آدرشي شاعر آهي پر هو سونهن ۽ حسن پرست شاعر هو، سندس شاعري جڏهن ٻڌو تڏهن تازي، نڪور ۽ حالتن سان ٽهڪندڙ هوندي.

حقيقت بياني گلا ٿي پوي ٿي

حقيقت پسند ثنا ٿي پوي ٿي،

ڪجي ڪيئن ”استاد“ ڪيڏانهن وڃجي،

حقيقت لڪائڻ خطا ٿي پوي ٿي،

مون چيو ته استاد بخاري هر دؤر  جو شاعر آهي، اڄ کان ڏهائيون پوئتي سندس شاعري ورهيه گذري وڃڻ کان پوءِ جڏهن پڙهو تڏهن سمجھيو ته ڄڻ اڄ جي حالتن تي ٺهڪي ٿي،

ڀٽڪي عوام۾ آ، پويان لڳڻ جي عادت،

عيار رهبري ۾ ماڻهن ٺڳڻ جي عادت،

اغيار تيز آهن، تنظيم سان وڌن پيا

يارن ۾ پئجي وئي آهي، نعرن هئڻ جي عادت.

مٿئين چؤسٽي ۾ استاد بخاري سنڌ جي سياسي قيادت جو جائزو ورتو آهي، سنڌ جي سياسي، قيادت جي مڪاري، عياري، نااهلي ۽ ٺڳي جو جائزو ورتو آهي، حقيقت هي آهي ته ڪيترا ڏهاڪا گذري ويا آهن پر سنڌ جي سياسي پارٽين ۽ انهن جي قيادت وچم ڪنهن به قسم جي تبديلي نه آئي آهي، استاد بخاري هن قوم ۽ قيادت کي هڪڙو آئينو ڏيکاريو آهي پر استاد بخاري نه رڳو حالتن تي افسوس جو اظهار ڪندي نشاندهي ڪري ٿو پر ساڳئي وقت هو ان مان نڪرڻ جا گس به ڏسي ٿو،

مرڻ کان ڊڄي، زندگي ٿا گھرو،

ٻرڻ کان ڀڄي، روشني ٿا گھرو،

بنا ڪاوش جي ڪرشمو ٿئي ڇو؟

ڏکن کان لڪي پوءِ خوشي ٿا گھرو.

استاد جي شاعري سنڌين لاءِ مشتعل راه آهي توڙي جو هو تمام پڙهيو ڳڙهيو يا وڏي گھراڻي سان تعلق رکندڙ ماڻهو نه هو پر سندس ڏات، ڏانءُ ۽ سادي ٻولي جي جڙاوت کيس تمام وڏو ڪري ڇڏيو.

استاد توڙي جو عالمي ادب يا ملڪي سياسي حالتن کي ڪتابن ۾ گھٽ پڙهيو هو پر هن ايندڙ وقت تي تمام گھري نظر رکي پئي، کيس حالتن جو ادراڪ هو، مون چيو ته برصغير ۾ کاٻي ڌر ۽ ساڄي ڌر جون نه رڳو سياسي پارٽيون هيون پر انهن لاڙن ۽ خيالن جا وڏي تعداد ۾ اديب، شاعر، دانشور ۽ ساهتڪار به هئا، کاٻي ڌر يا پورهيت طبقي، مظلوم ۽ محڪوم جو آواز اٿارڻ وارن باغي شاعرن، اديبن،سياسي اڳواڻن ۽ متحرڪ قوتن کي ملحد، ڪافر، دهريو ۽ ماديت پسند چيو ويندو هو ۽ انهن لاءِ فتويٰ نڪرندي هئي، پر ائين نه ٿيندو هو ته کيس واجب القتل قرار ڏنو ويو هجي پر جيڪڏهن اهڙي فتويٰ آئي به هوندي ته گھٽ واقعا ٿيا هوندا، باقي جيل، روپوشي، ڪيس داخل ٿيڻ، ڪتابن تي پابندي يا تڙي پار معمول هو، پر سرد جنگ دوران ۽ ان کان پوءِ ۽ جيئن هن وقت مذهبي، انتهاپسندي، جنون، تنگ نظري، مذهبي اڻ سهپ ملڪ ۽ دنيا ۾ ڪاهي پئي آهي، هر طرف فرقه واريت ۽ هڪٻئي کي ڪافر قرار ڏيڻ عام رواج ٿي ويو آهي، مسجدن، امام بارگاهن، عبادت گاهن ۽ مزارن تي حملا ٿي رهيا آهن، هر طرف مذهب جي نالي ۾ رتوڇاڻ آهي، فتويٰ بازي ۽ جنت جون ٽڪيٽون ورهائجن پيون ان صورتحال کي استاد بخاري ڪيترائي سال پهرئين پرکي ورتو هو، استاد بخاري کي خبر هئي ته ايندڙ وقت ۾ مذهبي جنونيت وڌندي، هن چيو ته

موتين جو ٿالهه ڀري ڏي ته مڃان،

ظالم جي سيني تي مُنڱَ ڏري ڏي ته مڃان،

ڪافر کي مسلمان ڪرڻ ڪهڙو ڏکيو ڪم آهي،

ملان کي مسلمان ڪري ڏي ته مڃان.

سو استاد بخاري کي گھڻو وقت اڳ ۾ ئي خبر هئي ته دنيا فتني ۽ فساد طرف وڌندي ۽ ان سڄي جنگ و جدل جو اصل محرڪ ملان ئي بنجندو، استاد بخاري نه رڳو هن صدئي جو وڏو آفاقي شاعر آهي پر استاد بخاري جي شاعري جيستائين ملڪ، سنڌ ۽ دنيا جون حالتون اهڙيون رهنديون تيستائين سندس شاعري انهن حالتن سان ٺهڪندي ايندي.

 

پوليس رينجرز جي ڇڪتاڻ

هيءَ اُهائي ڪراچي آهي، جتي ڪجهه وقت اڳ ۾ ٽارگيٽ ڪلرز جو راڄ هوندو هو، جتي ڀتاخور آزاد ۽ خودمختيار ڦرندا هُئا، جن ڪراچيءَ جي عام ماڻهن توڻي واپارين کي نَڪ ۾ دم ڪري رکيو هو. ڏهاڙي درجنن جي حساب ۾ ماڻهن جو مارجڻ معمول بڻيل هو ۽ اُتي جو ماڻهو هڪ اڄاتي خوف ۾ مبتلا هو. اُهو پنهنجن ٻارڙن کي اسڪول اُماڻڻ کان وٺي سندن واپسيءَ تائين عذاب واري ڪيفيت مان گذرندو هو، اُنهن جا سفر سلامت نه هُئا، وچ بازارن ۾ ڦُرن جون وارداتون عام جام هونديون هيون. مطلب ته ڪراچيءَ جو امن مافيائن جي رحم ڪرم تي ڇڏيل هُو، اُهي ٿوري ٿوري ڳالهه تي ڪراچيءَ کي شعلن جي ور چاڙهي ڇڏيندا هُئا، ڦيٿو جام ٿي ويندو ۽ ماڻهو ساهه مُٺ ۾ ڪري ماٺ ٿي ويندا هُئا. پر گذريل ڪجهه وقت کان دهشتگرديءَ خلاف جيڪا آپريشن شروع ٿي آهي، تنهن ڪراچيءَ جي زندگيءَ ۾ گهڻي حد تائين استحڪام واري فضا قائم ڪئي آهي، ماڻهن سُڪون جو ساهه کنيو آهي. جيتوڻيڪ اڃا مڪمل بحاليءَ جي لاءِ ڪيترو ئي وقت درڪار آهي ۽ هلندڙ آپريشن کي وڌيڪ موثر ڪرڻ جي ضرورت آهي، پر گذريل ٻن ڏينهن کان پوليس ۽ رينجرز وچ ۾ جيڪا ڇڪتاڻ واري صورتحال پيدا ٿي آهي، تنهن ڪراچيءَ جي عوام کي ٻيهر خوف ۾ مبتلا ڪري ورتو آهي، اُهي انهيءَ ڊپ ۾ آهن ته ڪٿي امن لاءِ ٿيندڙ ڪوششن ۾ ڪا رُڪاوٽ وجهڻ جي اٽڪل ته نه پئي ڪئي وڃي؟ ڇو ته هلندڙ آپريشن دؤران ٻنهي محڪمن رينجرز توڙي پوليس جو انتهائي اهم ڪردار رهيو آهي، ڪٿي سندن گڏيل ڪاررواين مثبت نتيجا ڏنا آهن ته ڪٿي رينجرز توڙي پوليس الڳ الڳ ڪارروايون ڪري ڪيترن ئي ٽارگيٽ ڪلرز، ڀتاخورن توڙي دهشتگردن کي سوگهو ڪيو آهي، جنهن سبب ڏوهاري ذهنيت رکندڙ ماڻهو يا ته انڊر گرائونڊ ٿي ويا آهن يا انهن پرڏيهه جا وڃي وڻ وسايا آهن، اُنهن جي غير موجودگيءَ ۾ زندگيءَ جون رونقون بحال ٿيون آهن، ڪاروبار توڻي تفريح لاءِ نڪرندڙ ماڻهن کي اطمينان مليو آهي ۽ اُهي سلامتيءَ واري احساس ۾ انتهائي خوش نظر اچي رهيا آهن، پر تازو هنن ٻنهي محڪمن وچ ۾ عدم اعتماد واري ماحول ڳڻتيءَ جهڙي صورتحال پيدا ڪري ڇڏي آهي. ڇو ته ٻنهي محڪمن جي هڪٻئي سان ٽڪراءُ واري صورتحال جو فائدو اُنهن ئي ڌرين کي رسڻو آهي، جن ڪراچيءَ ۾ خوف جو راڄ قائم ڪيو هو. تنهن ڪري اسين انهيءَ ڇڪتاڻ کي ڪراچيءَ جي امن خلاف ڀيانڪ سازش سمجهون ٿا ۽ ٻنهي محڪمن جي ذميوار آفيسرن کي اِها صلاح ڏيڻ گهرون ٿا ته اهڙي ڪنهن به صورتحال کان بچڻ جي ڪوشش ڪئي وڃي، جنهن سان پوليس توڻي رينجرز وچ ۾ عدم اعتماد واري فضا پيدا ٿيڻ جو انديشو هجي. انهيءَ سلسلي ۾ سنڌ سرڪار فوري قدم کڻي هڪ سٺو عمل ڪيو آهي، پر انهيءَ معاملي جي ڇنڊڇاڻ لاءِ پڻ قدم کڻڻ جي ضرورت آهي ته جيئن مستقبل ۾ عدم اعتماد واري فضا قائم ڪرڻ وارن بهانن جو هميشه لاءِ خاتمو ڪري سگهجي.

 

بلوچستان اندر امن امان جي صورتحال ۾ بهتري آئي آهي: نواز شريف

اسلام آباد (بيورو) وزيراعظم نواز شريف چيو آهي ته بلوچستان ۾ امن امان جي صورتحال ۾ بهتري آئي آهي. بلوچستان جي وڏي وزير عبدالمالڪ بلوچ پي ايم هائوس اسلام آباد ۾ وزيراعظم نواز شريف سان ملاقات ڪئي. ملاقات دوران بلوچستان جي صورتحال سميت ٻين معاملن تي خيالن جي ڏي وٺ ڪئي وئي. ان موقعي تي ڳالهائيندي وزيراعظم نواز شريف چيو ته بلوچستان جي ترقي وفاقي حڪومت جي پهرين ترجيح آهي. هن چيو ته هاري رليف پيڪيج تي عملدرآمد لاءِ هو بلوچستان جو دورو ڪندو. وزيراعظم نواز شريف چيو ته بلوچستان حڪومت جي پاليسين جا هاڪاري نتيجا اچي رهيا آهن، ملاقات دوران بلوچستان جي وڏي وزير عبدالمالڪ بلوچ چيو ته بلوچستان حڪومت سان سهڪار ڪرڻ تي هو وفاق جو ٿورائتو آهي

 

ڊي جي رينجرز جي وڏي وزير سان ملاقات، ادارن ۾ غلط فهميون پيدا ٿيڻ نه ڏبيون: قائم علي شاهه

ڪراچي (اسٽاف رپورٽر) ڊي جي رينجز  سنڌ ميجر جنرل بلال اڪبر سي ايم هائوس ۾ وڏي وزير سيد قائم علي شاهه سان ملاقات ڪئي، جنهن ۾ رينجرز خلاف شايع ٿيندڙ اشتهارن  بابت خيالن جي ڏي وٺ ڪئي وئي،ڊي جي رينجرز ميجر جنرل بلال اڪبر ڪراچي ۾ هلندڙ ٽارگيٽيڊ  آپريشن  جي تفصيلن بابت وڏي وزير کي ٻڌايو، ملاقات ۾ امن امان جي صورتحال ۽ ٻين معاملن تي به ڳالهه ٻولهه ڪئي وئي ،ذريعن مطابق ڊي جي رينجرز  ، وڏي وزير سان رينجرز  خلاف شايع ٿيندڙ اشتهارن  تي به تفصيلي  ڳالهه ٻولهه ڪئي، ان موقعي تي وڏي وزير سيد قائم علي شاهه جو چوڻ هو ته  شهر ۾ امن لاءِ رينجرز  ۽ پوليس جو ڪردار ساراهه جوڳو آهي، ٻنهي ادارن  ۾ غلط فهميون  پيدا  ٿيڻ نه ڏينداسين ، ڪراچي ۾ امن امان جي بحالي  ۾ رينجرز  جي ڪردار کي وڏي وزير ساراهيو  ۽ چيو ته رينجرز  سنڌ حڪومت جو حصو آهي، ذريعن جو چوڻ آهي ته  اشتهارن جي معاملي تي سنڌ پوليس  ملوث اهلڪارن  خلاف سخت ڪارروائي جو اشارو پڻ ڏنو، سنڌ پوليس جو چوڻ هو ته اشتهار ڪجهه اهلڪارن پنهنجن مفادن کي نظر ۾ رکي شايع ڪرايا ،گهرو وزير  ۽ قانون لاڳو ڪندڙ ادارن به انهي اشتهار جو نوٽيس ورتو آهي ۽ فيصلو ڪيو آهي ته ذميوار پوليس آفيسر خلاف  سخت ڪارروائي ڪئي ويندي.

 

آرمي چيف جي صدارت هيٺ ڪور ڪمانڊرز ڪانفرنس، سيڪيورٽي صورتحال جو جائزو ورتو ويو

راولپنڊي(م.ڊ) پاڪ فوج جي سربراهه جنرل راحيل شريف جي صدارت هيٺ ڪور ڪمانڊرز ڪانفرنس ۾ ملڪ جي اندروني سيڪيورٽي جو جائزو ورتو ويو، پاڪ فوج جي عام رابطن واري اداري آئي ايس پي آر مطابق جنرل هيڊڪوارٽرز راولپنڊِي ۾ آرمي چيف جنرل راحيل شريف جي صدارت هيٺ ڪور ڪمانڊرز ڪانفرنس ٿي، جنهن ۾ پاڪ فوج جي پيشيور معاملن ۽ ملڪ جي اندروني سيڪيورٽي واري صورتحال جو جائزو ورتو ويو، آئي ايس پي آر مطابق اجلاس ۾ سيڪيورٽي جي ٻاهرين صورتحال جو به تفصيلي جائزو ورتو ويو، ڪانفرنس ۾ افغانستان جي صورتحال ۽ پاڪ – افغان سرحد سان لاڳاپيل مسئلن تي به غُور ڪيو ويو.