تازيون خبرون

Daily Archives: October 7, 2015

ماڊل ايان کان وصول ڪيل رقم قومي خزاني ۾ جمع ڪرائي وئي آهي: ايف بي آر چيئرمين

اسلام آباد (بيورو) قومي اسيمبلي جي پبلڪ اڪائونٽس ڪميٽي ۾ سپر ماڊل ايان علي جو ذڪر ڪيو ويو، ميمبرز جي سوالن جي جواب ۾ ايف بي آر چيئرمين ڪميٽي کي ٻڌايو ته ايان کان وصول ڪيل رقم قومي خزاني ۾ جمع ڪرائي وئي آهي. اسلام آباد ۾چيئرمين خورشيد شاهه جي صدارت هيٺ قومي اسيمبلي جي پبلڪ اڪائونٽس ڪميٽي جو اجلاس ٿيو. اجلاس ۾ تحريڪ انصاف جي ميمبر عارف علوي سوال ڪيو ته ماڊل ايان علي کان جيڪا پرڏيهي ڪرنسي هٿ ڪئي وئي هئي، اها ڪٿي آهي.؟ ايف بي آر چيئرمين چيو ته ايان علي کان مليل رقم قومي خزاني ۾ جمع ڪرائي وئي آهي، ماڊل تي ڪرنسي اسمگلنگ ڪيس ۾ اڃا تائين فرد جرم لاڳو ناهي ٿي سگهيو. عارف علوي، ايف بي آر چيئرمين کان سوال ڪيو ته ايان علي تي ڏوهه ثابت نه ڪرڻ ڇا توهان جي ڪوتاهي ناهي، ان تي فيڊل بورڊ آف روينيو جي چيئرمين چيو ته ثبوتن جو مرحلو اڃا ناهي آيو، فرد جرم لاڳو ٿيڻ بعد ئي ثبوت پيش ڪيا ويندا. ڪميٽي جي ميمبر راڻا جاويد اخلاص سوال ڪيو ته ايان علي اڳ به پرڏيهي دورا ڪري چڪي آهي، ڇا انهن جي تصديق ڪئي وئي آهي. ايف بي آر چيئرمين چيو ته ايان علي جي پراپرٽي جا تفصيل گڏ ڪري ان کان انڪم ٽيڪس وصول ڪيو پيو وڃي.

 

حڪومت وڃي ته وڃي، ڪرپشن جي خاتمي ۽ احتساب بابت بل هر صورت منظور ڪرايو ويندو: عمران خان

اسلام آباد (بيروو) تحريڪ انصاف جي سربراهه عمران خان چيو آهي ته حڪومت وڃي ته وڃي، ڪرپشن جي خاتمي ۽ احتساب بابت بل هر صورت ۾ ڪي پي ڪي اسيمبلي مان منظور ڪرايو ويندو، پنجاب جو وڏو وزير شهباز شريف سڌي ريت نندي پور پراجيڪٽ جي ڪرپشن ۾ ملوث آهي، حڪومت کي معاملو دٻائڻ نه ڏنو ويندو. سماجي رابطن واري ويب سائيٽ ٽوئيٽر تي جاري ڪيل ٽوئيٽ ۾ تحريڪ انصاف جي سربراهه عمران خان چيو ته خيبرپختونخواهه اسيمبلي ۾ هر صورت ۾ ڪرپشن جي خاتمي ۽ احتساب بابت “ ڪنفلٽ آف انٽرسٽ” بل منظور ڪرايو ويندو. هن چيو ته جنهن به ميمبر بل جي مخالفت ڪئي ان خلاف ڪارروائي ڪئي ويندي، جيڪڏهن بل منظور نه ٿيو ته اپوزيشن ۾ ويهڻ پسند ڪنداسين. عمران خان چيو ته نندي پور پاور اسڪينڊل ۾ پنجاب جو وڏو وزير شهباز شريف سڌيءَ ريت ملوث آهي، ان ڪري ماڊل ٽائون سانحي جيان ان معاملي کي به دٻائڻ جيڪوشش ڪئي پئي وڃي. تحريڪ انصاف جي سربراهه چيو ته حڪومت کي نندي پور پراجيڪٽ ۾ ڪرپشن کي دٻائڻ جي اجازت نه ڏني ويندي، هر فورم تي معاملو اٿاريو ويندو.

 

2015ع ۾ ملڪ ۾ دهشتگردي جي 821 واقعن ۾ 558 ڄڻا مارجي ويا: گهرو وزارت

اسلام آباد(بيورو) گهرو وزارت سينيٽ جي اجلاس ۾ پنهنجي لکت واري جواب ۾ چيو آهي ته 2015ع جي دوران پوري ملڪ ۾ دهشتگردي جا 821 واقعا پيش آيا،جن ۾ 558 ڄڻا مارجي ويا، جڏهن ته هڪ هزار زخمي ٿيا.ڊپٽي چيئرمين مولانا عبدالغفور حيدري جي صدارت هيٺ سينٽ جو اجلاس ٿيو، جنهن ۾ گهرو وزارت پاران لکت واري جواب ۾ ٻڌايو ويو ته 2015ع جي دوران پوري ملڪ ۾ دهشتگردي جا 821 واقعا پيش آيا،جن ۾ 558 ڄڻا مارجي ويا، جڏهن ته هڪ هزار زخمي ٿيا. هن وقت ملڪ ۾ 10 فوجي عدالتون ڪم ڪري رهيون آهن، جڏهن ته 11هين تي ڪم هلي رهيو آهي، فوجي عدالتن ۾ مقرر ججن بابت ڄاڻ ظاهر نٿي ڪري سگهجي. انساني اسمگلنگ جي حوالي سان لکت واري جواب ۾ گهرو وزارت چيو ته 2002ع کان هن وقت تائين ملڪ ۾ انساني اسمگلنگ جو شڪار ماڻهن جو انگ 4 هزار 522 آهي، انساني اسمگلنگ جي قانون مطابق اڄ تائين هڪ هزار313 ڏوهارين کي سزا ٿي چڪي آهي.