تازيون خبرون

Daily Archives: October 6, 2015

ڪراچي جي 400 نه پر 70 ڳوٺن جي ليز رد ڪئي وئي  آهي: وڏو وزير

ڪراچي (اسٽاف رپورٽر)  وڏي وزير سيد قائم علي شاهه ڪراچي جي 400ڳوٺن جي ليز رد ڪرڻ وارين خبرن جي ترديد ڪندي چيو آهي ته 400 نه پر 70 ڳوٺن جي ليز رد ڪئي وئي آهي سنڌ جي وڏي وزير پنهنجي بيان ۾ چيو آهي ته ڪراچي جي 400ڳوٺن  جي ليز رد ڪرڻ واريون خبرون غلط آهن. هن چيو ته ڪراچي جي 400ڳوٺن جي نه پر  70 ڳوٺن جي ليز رد ڪئي وئي  آهي۽ ڊي سي ملير کي ڳوٺن جي ٻيهر سروي ڪرڻ جو حڪم ڏنو آهي. وڏي وزير پنهنجي بيان ۾ چيو آهي ته هنن ڪراچي جي ڳوٺن جي ماضي ۾  حفاظت ڪئي ۽ مستقبل ۾ به  ڪندا رهندا. ڪجهه ڏينهن اڳ وڏي وزير ڪراچي جي ڀٽائي آباد ۽ غازي ڳوٺ سميت 70 ڳوٺن جي ليز رد ڪئي هئي، جنهن سبب انهن ڳوٺن جا  لکين  رهواسي  پريشان آهن.

 

پيپلز پارٽي جي چيئرمين بلاول ڀٽو زرداري سان سنڌ جي وڏي وزير سيد قائم علي شاهه ملاقات

ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري سان سنڌ جي وڏي وزير سيد قائم علي شاهه ملاقات ڪري صوبي جي سياسي صورتحال سميت مختلف معاملن تي ڳالهيون ڪيون آهن، جڏهن ته بلاول ڀٽو زرداري ٺٽي ۽ سجاول جي چونڊيل نمائندن ۽ اڳواڻن جو اجلاس طلب ڪري ورتو آهي. بلاول هائوس ڪراچي ۾ بلاول ڀٽو زرداري سان سنڌ جي وڏي وزير ملاقات ڪري سنڌ ۾ سياسي ۽ امن امان جي صورتحال تي ڳالهيون ڪيون آهن. بلاول ڀٽو زرداري سجاول ۽ ٺٽي سان واسطو رکندڙ چونڊيل نمائندن  ۽ اڳواڻن جو  اجلاس به طلب ڪري ورتو  آهي، جنهن ۾ مڪاني چونڊن جي حوالي سان غور ويچار ڪيو ويندو.

 

مني لانڊرنگ ڪيس ۾ الطاف حسين جي ضمانت واري مدي ۾ هڪ ڀيرو وري 3 مهينن تائين واڌ

لندن(مانيٽرنگ ڊيسڪ) ايم ڪيو ايم جي سربراهه الطاف حسين جي مني لانڊرنگ ڪيس ۾ ضمانت جي مدي ۾ هڪ ڀيرو وري 3 مهينن تائين واڌ ڪئي وئي، ايم ڪيو ايم سربراهه جي مني لانڊرنگ ڪيس ۾ ضمانت اڄ ختم ٿي، جنهن ڪري کيس برطانوي پوليس سامهون پيش ٿيڻو پيو، الطاف حسين پنهنجي گهر کان گاڏي ۾ پوليس اسٽيشن روانو ٿيو، جنهن دوران ايم ڪيو ايم اڳواڻ ڊاڪٽر فاروق ستار، سندس وڪيل فروغ نسيم ۽ بيرسٽر سيف به ساڻس گڏ هئا. الطاف حسين جي گاڏي پوليس اسٽيشن جي پوئين دروازي کان داخل ٿي، جنهن کانپوءِ کيس هڪ ڪمري ۾ نيو ويو، جتي سندس انٽرويو ڪيو، هن اسڪاٽ لانيڊ يارڊ جي مختلف سوالن جا ڪيتري ئي دير تائين جواب ڏنا، انٽرويو ۽ پڇا ڳاڇا مڪمل ٿيڻ کانپوءِ سندس ضمانت واري مدي ۾ ٽن مهينن جي واڌ ڪئي وئي، واضح رهي ته ان کان پهرين به الطاف حسين جي ضمانت ۾ 4 ڀيرا واڌ ٿي چڪي آهي، 26 آگسٽ تي ايم ڪيو ايم قائد عدالت ۾ حاضري لاءِ وڌيڪ مهلت گهري هئي، لنڊن جي علائقي ايجويئر ۾ اسڪاٽ لينڊ ايم ڪيو ايم قائد جي گهر تي ڇاپو هڻي لکين پائونڊ هٿ ڪيا هئا، جنهن کانپوءِ مٿس مني لانڊرنگ جو ڪيس داخل ڪيو ويو هو.

 

اليڪشن ڪميشن تازو ترقي ماڻيندڙ 23ايڊيشنل ۽ ڊپٽي سيڪريٽريز جي مقرري جي اجازت ڏئي ڇڏي

اسلام آباد (بيورو) اليڪشن ڪميشن سنڌ سرڪار جي درخواست تي تازو ترقي ماڻيندڙ 23ايڊيشنل ۽ ڊپٽي سيڪريٽريز جي مقرري جي اجازت ڏئي ڇڏي آهي. سنڌ سرڪار اليڪشن ڪميشن کي درخواست ڏني هئي ته تازو 17، 18 ۽ 19 هين گريڊ ۾ ترقي ماڻيندڙ ايڊيشنل ۽ ڊپٽي سيڪريٽريز جي مقرري جي اجازت ڏني وڃي. اليڪشن ڪميشن سنڌ سرڪار جي درخواست تي 23 آفيسرن جي مقرري جي اجازت ڏئي ڇڏي آهي، جن جي مقرري هڪ ٻن ڏينهن ۾ ٿيڻ جو امڪان آهي.

 

سنڌ روينيو بورڊ سڀني صوبن کان وڌيڪ ٽيڪس وصول ڪيو آهي: مراد علي شاهه

ڪراچي (اسٽاف رپورٽر) سنڌ جي ناڻي واري سينئر وزير سيد مراد علي شاهه چيو آهي ته بجلي جو سمورو نظام درست ناهي، پاڻي ۽ بجلي واري وزارت ناڪام ٿي چڪي آهي ۽ وزير اعظم جي ڪن تي جونءَ به نه ٿي چري ته مسئلا ڪهڙا آهن. ڪراچي ۾ ٽيڪس وصولي  بابت ورڪشاپ کي خطاب ۽ بعد ۾ ميڊيا سان ڳالهائيندي ناڻي واري وزير چيو ته ود هولڊنگ ٽيڪس پراپر ٽيڪس نه آهي ۽ انڪم ٽيڪس جو طريقه ڪار هجڻ گهرجي. هن چيو ته بجلي جو پورو نظام درست نه آهي، ڪي اليڪٽرڪ، حيسڪو ۽ ٻين ڪمپنين کي گهرائي انهن جو حساب وٺڻو پوندو، مسئلن باوجود وزير اعظم جي ڪن تي جونءَ به نه ٿي رينگي. هن چيو ته پاڻي ۽ بجلي واري وزارت به ناڪام ٿي چڪي آهي ۽ اها به مسئلا حل نه ڪري سگهي آهي. سيد مراد علي شاهه چيو ته اسان ايل اين جي گئس جي حوالي سان گڏيل مفادن واري ڪائونسل کي خط لکي چيو آهي ته قانوني طريقي سان مسئلي کي حل ڪيو وڃي. مراد علي شاهه جو وڌيڪ چوڻ هو ته جيڪڏهن اسان اسٽيل ملز کي خانگي شعبي ۾ به ڏينداسين ته ملازمن جو خيال رکڻو پوندو. هن چيو ته سنڌ ۾ تڪبندين جي حوالي سان ڪجهه مونجهارا آهن.مراد علي شاهه جو چوڻ هو ته سنڌ روينيو بورڊ سڀني صوبن کان وڌيڪ ٽيڪس وصول ڪيو آهي، شين سان گڏ تيل ۽ گيس تي به  ٽيڪس اوڳاڙي جو اختيار صوبن کي ملڻ گهرجي. ناڻي واري وزير جو چوڻ هو ته سنڌ حڪومت ٽيڪس وصولي جا سمورا ٽارگيٽ پورا ڪيا آهن ۽ هن سال 62 ارب رپيا گڏ ڪرڻا آهن. هن چيو ته 18 هين ترميم کانپوءِ ٽيڪس صوبن کي وصول ڪرڻو آهي، شين تي ٽيڪس وصولي جو اختيار به صوبن کي ملڻ گهرجي. ناڻي واري وزير چيو ته سنڌ ۾ شين تي ٽيڪس وصولي جو ٽارگيٽ پورو ٿيڻ بعد باقي وصولي جو اختيار صوبن کي ملڻ گهرجي. سيد مراد علي شاهه چيو ته تيل ۽ گيس تي ٽيڪس وفاق اوڳاڙي ٿو ۽ سندن مطالبو آهي ته اهو اختيار به صوبن کي ملڻ گهرجي.

 

جماعت اسلامي اين اي 122 ۽ پي پي 147 تي ننڍي چونڊ دوران تحريڪ انصاف جي حمايت جو اعلان ڪري ڇڏيو

لاهور (بيورو) جماعت اسلامي، اين اي هڪ سئو 22  لاهور ۽ پي پي 147 تي ننڍي چونڊ دوران تحريڪ انصاف جي حمايت جو اعلان ڪري ڇڏيو آهي، پي ٽي آءِ اڳواڻ چوڌري سرور جو چوڻ آهي ته عوام نئون پاڪستان چاهي ٿو، 11 آڪٽوبر تي پي ٽي آءِ ئي ڪاميابي ماڻيندي.منصوره لاهور ۾ چوڌري سرور جي اڳواڻ ۾ تحريڪ انصاف جي وفد جماعت اسلامي جي اڳواڻن سان ملاقات ڪئي. ملاقات کانپوءِ ميڊيا سان ڳالهائيندي جماعت اسلامي لاهور جي امير ميان مقصود چيو ته پي ٽي آءِ سان مڪاني چونڊن دوران سيٽ ايڊجسٽمينٽ تي اختلاف هئا، جيڪي ختم ٿي چڪا آهن. هن چيو ته جماعت اسلامي، اين اي هڪ سئو 22 ۽ پي پي هڪ سئو 47 تي تحريڪ انصاف جي اميدوار جي حمايت ڪندي. ميان مقصود چيو ته حڪومت عوام کي هيٺين سطح تي اختيار منتقل نٿي ڪرڻ چاهي، جماعت اسلامي جو سمورو ڌيان مڪاني چونڊن تي کـُتل آهي. ان موقعي تي ڳالهائيندي تحريڪ انصاف جي اڳواڻ چوڌري سرور چيو ته 3 سال گذرڻ باوجود حڪومت عوام جا مسئلا حل ڪرڻ ۾ ناڪام وئي آهي، عوام هاڻي نئون پاڪستان چاهي ٿو. چوڌري سرور چيو ته عوام ۽ ٻين سياسي پارٽين جي مدد سان اين اي هڪ سئو 22 ۽ پي پي هڪ سئو 47 تي ننڍي چونڊ ۾ تحريڪ انصاف ئي ڪاميابي ماڻيندي. تحريڪ انصاف جي اڳواڻ وڌيڪ چيو ته حڪومت، ريلوي ۽ ٻين سرڪاري ملازمن تي ووٽ نه ڏيڻ تي نوڪرين مان ڪڍڻ جون ڌمڪيون ڏئي رهي آهي، اهڙو ڪلچر ختم ٿيڻ گهرجي.

 

لائسنس فيس ۽ رهتون نه ڏيندڙ بجلي پيدا ڪندڙ 5 ڪمپنيون بليڪ لسٽ

اسلام آباد (بيورو) نيشنل پاور ريگيوليٽري اٿارٽي (نيپرا) لائسنس في ۽ ٻيون رهتون نه ڏيڻ تي بجلي جي 5 پيداواري ڪمپنين کي بليڪ لسٽ ڪري ڇڏيو، نيپرا جي اختيارين مطابق گرين اليڪٽرڪ، ايسٽرن پاور، عريبين سي ونڊ انرجي، سونڪ ونڊ پاور جنريشن ۽ فرسٽ ٽرائي اسٽار مضاربا بليڪ لسٽ ڪيل ڪمپنين ۾ شامل آهن. نيپرا مطابق انهن 5 ئي ڪمپنين کي اٽڪل 2 ڪروڙ 6 لک رپيا نه پيارڻ تي بليڪ لسٽ ڪيو ويو ۽ ڊسٽرڪٽ ڪليڪٽر اسلام آباد باقيدار ڪمپنين خلاف ڪارروائي شروع ڪري ڇڏي آهي. نيپرا اختيارين جو چوڻ آهي ته ڪوبه ماڻهو باقيدار ڪمپينن جي اڪائونٽن ۾ رقم جمع نه ڪرائي ۽ باقيدار ڪمپنين جا واهپيدار نيپرا جي اڪائونٽ ۾ رقم جمع ڪرائين. بليڪ لسٽ ڪيل ڪمپنين ۾ 4 سنڌ ۾ هوا مان بجلي پيدا ڪرڻ وارين رٿائن تي ڪم ڪري رهيون آهن.

 

چوھڙجمالي ڀرسان ڄاڃين جو ڪوسٽر کاھي ۾ ڪري پيو، پيءُ پٽ سوڌو 4 ڄڻا فوت

ٺٽو (ڊ.ر) چوھڙجمالي ڀرسان روڊ موري گولائي وٽ شيدي برادري جي ڄڃ کڻي ايندڙ ڪوسٽر گولائي ۾ موڙ ڪاٽيندي ڊرائيور جي ڪنٽرول مان نڪري کاھي ۾ ڪري پيو، جنھن سبب، پيءُ پٽ سوڌو 4 ڄڻا فوت ٿي ويا ۽  20  ڄڻا زخمي ٿي پيا،فوتين ۾ رفيق عرف پپو شيدي، سندس 12سالن جو پٽ رحيم بخش شيدي، 20 سالن جو عظيم شيدي ۽ 10 سالن جو باسط عرف ببلو شيدي شامل آھن، زخمين ۾ گھوٽ محمد جمن شيدي، گهوٽ خالد شيدي،  شڪيل شيدي، عباس شيدي، آچار شيدي، غلام مصطفي شيدي، سوڌو 20 جي لڳ ڀڳ عورتون ۽ ٻارڙا شامل آھن، فوتين  جا لاش۽ زخمين کي رورل ھيلٿ سينٽر چوھڙجمالي نيو ويو، لاشن ۽ زخمين کي شھرين ۽ ڳوٺاڻن پاڻي مان ڪڍي اسپتال پھچايو، لاش پوسٽ ماٽم کانپوءِ وارثن حوالي ڪيا ويا، اسپتال تي لاش پھچڻ مھل سندن وارث رڙيون ڪندا لاشن کي چنبڙي ويا، چيو پيو وڃي ته شيدي برادري جي چوھڙجمالي مان ڄڄ گذريل رات ور غلام الله ۾ ڪنوار جو ونواھ ڪرڻ لاءِ وئي هئي ۽ صبح 6 وڳي واپس چوھڙجمالي ايندي ڪوسٽر سان حادٽو پيش آيو، حادثي جي سوڳ ۾ چوھڙجمالي جي شھرين رضاڪاراڻي نموني ڪاروبار بند ڪري ڇڏيو، سوڳ ۾ شاھي بازار، ڪپڙا بازار، ريشم گلي، مدني چوڪ، ۽ ٻِا ڪاروباري مرڪز مڪمل بند رھيا، فوتي رفيق عرف پپو شيدي، ڊرائيوري  ڪري ٻچن جو پيٽ پاليندو ھو، جڏھن ته 19 سالن جي عظيم شيدي جي هڪ مهينو پهرين شادي ٿي ھئي، جيڪو پڻ مزدوري ڪري گھر ھلائيندو ھو.

 

اداڪاره آٿيه شيٽي ڪرن جوهر جو ڌيان حاصل ڪري ورتو

ممبئي (شوبز نيوز) پهرين ئي فلم سان بالي ووڊ ۾ قدم رکندڙ اداڪاره آٿيه شيٽي ڪرن جوهر جو ڌيان به پاڻ ڏانهن ڇڪرائي ورتو فلمساز کيس نئين فلم جي هيروئن بڻائي رهيا آهن سلمان خان جي پروڊڪشن ۾ ٺهندڙ فلم هيرو ۾ اداڪاري جا جوهر ڏيکاريا سنيل سيٽي جي ڌيءَ آٿيه شيٽي هيرو ۾ ان جو هيرو ٿيو سورج پنچولي ۽ ٻنهي پهرين ئي فلم ذريعي صرف پرستارن ئي نه پر وڏن فلمسازن جو توجهه حاصل ڪري ورتو آهي هي فلم ڪجهه ئي ڏينهن ۾ بهترين بزنس ڪيو آهي ۽ اهو ئي سبب آهي جو ڪرن جوهر جون نظرون به هيرو جي نئين هيروئن تي آهي ميڊيا رپورٽ مطابق آٿيه سيٽي کي ڪرن جوهر پنهنجي نئين فلم ۾ ڪاسٽ ڪري رهيو آهي جنهن تي ڪم شروع ٿي چڪو آهي.

 

هدايتڪاري جو شعبو اختيار ڪرڻ جو منهنجو ڪو به ارادو ناهي: اڪشي ڪمار

ممبئي (شوبز نيوز) بالي ووڊ اداڪار اڪشي ڪمار چيو آهي ته هدايتڪاري جي شعبي ۾ قدم رکڻ جو سندس ڪو ارادو ناهي. ڀارتي سڌ سماءَ وارن ذريعن موجب بالي ووڊ ۾ 2 ڏهاڪن کان وڌيڪ عرصي کان اداڪاري ڪندڙ اڪشي ڪمار چيو ته هو اداڪاري ۽ پروڊڪشن مان خوش آهي. هن چيو ته هدايتڪاري جي شعبي ۾ قدم رکڻ جو سندس ڪو ارادو ناهي. هن چيو ته هو مختلف ۽ سبق ڏيندڙ ڪردار ادا ڪرڻ جو خواهشمند آهي. اڪشي ڪمار چيو ته هدايتڪار ۽ ڪوريو گرافر پرڀو ديو زبردست انسان آهي ۽ هن سان فلم سنگهه از بلنگ ۾ ڪم ڪرڻ جو تجربو سٺو رهيو.