تازيون خبرون

Daily Archives: October 3, 2015

سوزاني خان ٻيهر شادي ڪرڻ جي افواهه کي رد ڪري ڇڏيو

ممبئي(شوبز نيوز) بالي ووڊ اداڪار رٿيڪ روشن جي اڳوڻي زال سوزاني خان ٻيهر شادي ڪرڻ جي افواهه کي رد ڪري ڇڏيو آهي. ڀارتي سڌ سماءَ جي ذريعن مطابق سوزاني خان ٻيهر شادي ڪرڻ جي حوالي سان ميڊيا تي هلندڙ افواهن جي باري ۾ بيان جاري ڪندي چيو ته منهنجي باري ۾ ميڊيا تي افواهون جي بنياد ۽ ڪوڙيون آهن. هن چيو ته انهن خبرن سان سندس خاندان جي جذبن کي ڏُک پهچي ٿو. هن ميڊيا کي چيو ته غط خبرون ڇاپڻ کان پاسو ڪري ذميواريءَ جو مظاهرو ڪيو وڃي. واضح رهي ته ميڊيا تي افواهون هلي رهيون هيون ته سوزاني رٿيڪ روشن جي ويجهي دوست سان شادي ڪرڻ واري آهي، جڏهن ته رٿيڪ روشن ۽ سوزاني خان 2000ع ۾ شادي ڪئي جيڪا گذريل سال ختم ٿي وئي.

 

شروتي حاثن پاران اڀيشڪ سان فلم ۾ ڪم کان انڪار

ممبئي (شوبز نيوز) شروتي حاثن جنهن کي ڪجهه عرصو اڳ هيراڦيري ٿري ۾ اڀيشڪ بچن جي مد مقابل هيروئن جي ڪردار لاءِ سائن ڪيو هو هاڻي فلم ۾ ڪم ڪرڻکان انڪار ڪري ڇڏيو آهي ان ڏس ۾ شروتي حاثن جي ترجمان ڀارتي خابرو اداري سان ڳالايئندي چيو ته شروتي حاثڻ هن وقت ٻن هندي فلمن سان گڏوگڏ 3 تامل فلمن ۾ ڪم ڪري رهي آهي ۽ ان وٽ اڀيشڪ بچن سان فلم ڪرڻ لاءِ وقت نه آهي ان لاءِ هو هيراڦيري ٿري ۾ ڪم نٿي ڪري سگهي.

 

پاڪستان ۽ زمبابوي جي ڪرڪيٽ ٽيمن وچ ۾ 52 ون ڊي ميچن مان پاڪستان 46 ۾ ڪاميابي ماڻي

اسلام آباد (اسپورٽس نيوز) پاڪستان ۽ زمبابوي جي ڪرڪيٽ ٽيمن وچ ۾ ون ڊي ميچن ۾ ڪاميابي جي شرح جي حوالي سان پاڪستاني ٽيم کي سرسي حاصل آهي، ٻنهي ٽيمن وچ ۾ هاڻي تائين دنيا جي مختلف گرائونڊن تي ٿيل 52 ون ڊي ميچن مان پاڪستاني ٽيم 46 ميچن ۾ ڪاميابي ماڻي، جڏهن ته زمبابوي جي ٽيم صرف 3 ميچن ۾ ڪاميابي ماڻي سگهي، هڪ ميچ ڊرا ۽ 2 جو نتيجو نه نڪري سگهيو، زمبابوي جي سرزمين تي ٻنهي ٽيمن وچ ۾ کيڏيل ون ڊي ميچن ۾ به قومي ٽيم کي سرسي حاصل آهي، جتي ٻنهي ٽيمن وچ ۾ 18 ميچون کيڏيون ويون، جنهن مان پاڪستان 14 ۾ ڪاميابي ماڻي ۽ زمبابوي رڳو ٻن ميچن ۾ ڪاميابي ماڻي سگهي، جڏهن ته هڪ ميچ ڊرا رهي ۽ هڪ جو نتيجو نه نڪري سگهيو.

 

ڊيوڊ ويزي ان فٽ سبب ڀارت خلاف ٽي- 20 سيريز مان ٻاهر

نئين دهلي (اسپورٽس نيوز) ڏکڻ آفريقا جي ڪرڪيٽ ٽيم جو آل رائونڊر ڊيوڊ ويزي انجري سبب ڀارت خلاف ٽي -20 سيريز نه کيڏي سگهندو، ڏکڻ آفريقا جي ڪرڪيٽ بورڊ طرفان جاري ڪيل تفصيل مطابق ڊيوڊ ويزي وارم اپ ميچ دوران ڪيچ پڪڙيندي هٿ ۾ ڌڪ سبب سيريز نه کيڏي سگهندو، جڏهن ته انجري کان بچڻ لاءِ ان کي سرجري ڪرائڻي پوندي، جنهن کان پوءِ ان کي مڪمل فٽ ٿيڻ لاءِ 6 هفتا لڳندا، ڏکڻ آفريقا ٽي – 20 ٽيم جي ڪپتان فاف ڊوپليسي جو چوڻ آهي ته ڊيوڊ ويزي جو ان فٽ هجڻ ٽيم لاءِ نقصانڪار آهي، اميد آهي ته مورڪل ان جي ڪمي محسوس نه ٿيڻ ڏيندو، ڀارت ۽ ڏکڻ آفريقا وچ ۾ سيريز جي پهرين ٽي – 20 ميچ 2 آڪٽوبر تي کيڏي ويندي. برازيل جي حڪومت برازيليه سميت سمورن گادي وارن شهرن ۾ هر اڌ ڪلاڪ بعد هڪ شخص کي قتل ڪيو وڃي ٿو.

 

سنڌ سان پاڻي ورڇ تي ناانصافي ۽ ڪالاباغ ڊيم جو رينگٽ: مظهر خاصخيلي

هڪ دفعو ٻيهر هن ملڪ اندر ناانصافين جي تاريخ دهرائيندي سنڌ ڌرتيءَ سان وڌيڪ ناانصافي ڪرڻ جو اعلان ڪيو ويو آهي اهو اعلان ڪنهن عام ماڻهوءَ يا ڪنهن سياسي پارٽي جي اڳواڻ نه پر ارسا جي چيئرمين رقيب خان ورجائيندي چيو آهي ته سنڌ جي پاڻيءَ مان 14 سيڪڙو ڪٽوتي ڪئي ويندي ڪجهه وقت پهريان هن ئي ارسا جي گذريل اجلاس ۾ اهو پڻ مڃيو ويو هو ته سنڌ جي حصي جو پاڻي پنجاب ڏاڍ ۽ منڍ ۾ هجڻ جي بنياد تي چوري ڪري چڪو آهي اها ڳالهه ثابت ٿيڻ کان پوءِ انهيءَ اجلاس ۾ اهو فيصلو ڪيو ويو هو ته سنڌ جو پنجاب پاران کنيل پاڻي ربيع جي فصل ۾ سنڌ کي ڏنو ويندو پر ناانصافي جي انتها اها ٿي ته ارسا چيئرمين موجوده اجلاس ۾ سنڌ کي اهو ڏاڍ جي بنياد تي کنيل پاڻي ته نه ڏياريو پر موراڳي سنڌ جي پاڻي مان 14 سيڪڙو ڪٽوتي ڪرڻ جو اعلان ڪري ڇڏيو ۽ ارسا جي ايڊوائيزري ڪميٽي ربيع ۾ صوبن کي پاڻي جي ورڇ 91 واري ٺاهه بدران 13 ٽو تحت ڪرڻ جو فيصلو ڪندي تڪراري ڪالاباغ ڊيم ٺاهڻ جي سفارش ڪري ڇڏي آهي ارسا جي چئيرمين رقيب خان جو چوڻ آهي ته خريف جي مد ۾ گهڻو پاڻي ضايع ٿي چڪو آهي تنهن ڪري صوبن کي ربيع ۾ 14 سيڪڙو کوٽ جي حساب سان پاڻي ڏنو ويندو. هن اجلاس ۾ ٽن صوبن جي ميمبرن ۽ سنڌ جي ايڊيشنل سيڪريٽري شرڪت ڪئي جنهن ۾ اها ڳالهه پڻ ظاهر ڪئي وئي ته پهرين اپريل کان 20 سيپٽمبر تائين 36 ايڪڙ ملين فوٽ پاڻي سمنڊ ۾ ضايع ٿي چڪو آهي تنهن ڪري ربيع ۾ سنڌ کي 12 ملين ايڪڙ فوٽ پنجاب کي 17 ملين ايڪڙ فوٽ، بلوچستان کي 1 ملين ايڪڙ فوٽ ۽ خيبرپختون خواهه کي 0.7 ملين فوٽ ايڪڙ پاڻي فراهم ڪيو ويندو.

رائو ارشاد چيو ته هڪ ايڪڙ فوٽ جي قيمت 60 ارب روپيا آهي 36 ملين ايڪڙ فوٽ جي قيمت ڪيتري هوندي ان جو حساب لڳايو وڃي ته وڏو پاڻي ضايع ٿيو آهي. اجلاس ۾ چشما بئراج پهرين کان 15 جنوري تائين بند ڪرڻ جي منظوري ڏني وئي آهي اجلاس دوران حڪومت کي سفارش ڪئي وئي ته ڪالاباغ ڊيم، اکوڙي ۽ ڀاشاڊيم جلد ٺهرايا وڃن. پنجاب جي ميمبر چيو ته جيڪڏهن ڪالاباغ ڊيم، ڀاشا ۽ اکوڙي ڊيم ٺهن ها ته ايترو پاڻي ضايع نه ٿئي ها. ارسا چيئرمين چيو ته هو ڪالاباغ ڊيم جي ڳالهه نه ٿو ڪري پر پاڻي ذخيرو ڪرڻ لاءِ ڊيم ٺهڻ ضروري آهن. سنڌ جي ايڊيشنل سيڪريٽري پنجاب پاران چشما جهلم لنڪ ڪئنال ذريعي سنڌ جو پاڻي کڻڻ تي احتجاج رڪارڊ ڪرايو ۽ هن چيو ته اسان کي خاطري ڪرائي وڃي ته سنڌ جو پاڻي چشما جهلم لنڪ ڪئنال ذريعي نه کنيو ويندو.

مٿي ٿيل ارسا جي اجلاس ۾ جيڪي فيصلا ڪيا ويا آهن انهن کي جيڪڏهن ٿورو تاريخ جي نظر ۾ ڏسبو ته ملڪ جي اڳوڻي وزيراعظم ذوالفقار علي ڀٽو کان چشما جهلم لنڪ ڪئنال جي فزيبلٽي رپورٽ تي صحيح ان بنياد تي ورتي وئي هئي ته چشما جهلم لنڪ ڪئنال پنجاب صرف سنڌو درياهه ۾ ٻوڏ اچڻ کان پوءِ کوليندو ۽ وارياسي علائقي ۾ انهيءَ چشما جهلم لنڪ ڪئنال تي اهڙو ڊيم تعمير ڪيو ويندو جيڪو ٻوڏ واري پاڻي سان ڀريو ويندو. تاريخ اڄ به پنهنجو پاڻ دهرائي ٿي ۽ پنجاب جي ارسا جي ميمبر پاران جيڪو ڪالاباغ ڊيم ٺاهڻ لاءِ موقف رکيو ويو آهي ڇا هي ڳالهه ملڪ جي غداري ۾ نه ٿي اچي جڏهن هن ملڪ جون 3 صوبائي اسيمبليون بار بار متفقه طور تي ڪالاباغ ڊيم کي رد ڪري چڪيون آهن ۽ قومي اسيمبلي پڻ ڪالاباغ ڊيم کي رد ڪيو آهي پوءِ اهو پنجاب جو ميمبر ڪهڙي ملڪ جي ڳالهه ڪري ٿو ڇا هن ملڪ اندر صرف واحد پنجاب ئي صوبو آهي جتان جا سياستدان، اسٽيبلشمينٽ ۽ ڪامورا هن ملڪ جا سڄڻ آهن باقي ٻين صوبن جا رهواسي هن ملڪ جا گهڻ گهرا ناهن ڇا جو هنن سان بار بار ماٽيلي ماءُ وارو سلوڪ ڪيو ٿو وڃي. هاڻي ته ارسا جي اجلاس ۾ اها ڳالهه به مڃي ٿي وڃي ته چشما جهلم لنڪ ڪئنال ۾ پاڻي وهايو ويندو آهي هي ڪٿان جو انصاف آهي جيڪو چشما جهلم لنڪ ڪئنال بند هئڻ گهرجي ۽ ٻوڏ واري صورتحال ۾ کولڻو آهي اهو چشما جهلم لنڪ ڪئنال پنجاب سڄو سال وهائي ٿو ۽ ٻوڏ ايندي ئي بند ڪري ڇڏي ٿو ۽ ان جي مٿان غير قانوني بجلي گهر تعمير ڪيو ويو آهي جيڪو ڪنهن به صورت ۾ پنجاب صوبي جي حڪمرانن کي قائم نه ڪرڻ گهرجي ها.

ڇا سنڌ جيڪا صدين کان آباد ۽ دائم آهي ان ڌرتيءَ کي ختم ڪرڻ لاءِ ڪالاباغ ڊيم ٺاهڻ ضروري آهي هي هڪ اهڙو سوال آهي جيڪو هر باضمير سنڌ ڄائو ڪرڻ جو حق رکي ٿو ڇو ته سينيٽ پاران ڪالاباغ ڊيم جي حوالي سان قائم ڪيل سينيٽنگ ڪميٽي جي اڳوڻي چيئرمين لشڪر رئيساڻي جا اهي لفظ اڄ به تاريخ ۾ واضح لکيل آهن ته جڏهن هو ٺٽي، بدين جي سامونڊي پٽيءَ کي گهمڻ جي لاءِ پنهنجي ميمبرن سان گڏجي اتي آيو هو ته هن پنهنجي اکين مان لڙڪ هاريندي ان ڳالهه جو اعتراف ڪيو هو ته بلوچستان اندر ڀلي ڪيتريون به حالتون خراب هجن پر اڄ سنڌ جي هن سامونڊي پٽي کي ڏسي ۽ اتي رهندڙ ماڻهن جي حالت ڏسي مون کي اهي لفظ چوڻا ٿا پون ته ڇا هي سنڌ جا رهواسي هن ملڪ جو حصو ناهن جو هينئن خانه بدوشي واري زندگي گذاري رهيا آهن اها ئي رپورٽ جڏهن لشڪر رئيساڻي واري ڪميٽي سينيٽ ۾ پيش ڪئي هئي ته سينيٽ جي اڪثر ميمبرن منظور ڪندي حڪومت مٿان اهو شرط لاڳو ڪيو هو ته ڪوٽڙي کان هيٺ سمنڊ ۾ هر صورت ۾ پاڻي ڇڏيو وڃي جيڪو سنڌ جي جياپي جو سوال آهي ڇو ته هر روز سمنڊ جي کاري پاڻي جون لهرون هزارين ميلن تائين تيزي سان جر جي مٺي پاڻي کي پوئتي ڌڪينديون آهن ۽ جر جو پاڻي کارو ٿيندو آهي ۽ زمين ڪلراٺي ۽ لوڻياٺي بڻجي ويندي آهي جيڪا فصل ڏيڻ جي قابل نه رهندي آهي ۽ اتي رهندڙ ماڻهو مختلف بيمارين جي ور چڙهي ويندا آهن رهي ڳالهه ملڪ کي ناڻي ڏيڻ جي ته پنجاب ارسا ميمبر کي شايد اها به خبر ناهي ته تمر جا ٻيلا ڇا ٿيندا آهن. اڄ به سنڌ اندر اهي انگ اکر موجود آهن جڏهن اربين روپين جو کنئور لاک، ماکي ۽ ڪاٺ هنن ٻيلن مان حاصل ڪيو ويندو هو ۽ ان تي ٻاهرين دنيا سان واپار ڪري ملڪ جو ناڻو ڪمايو ويندو هو اڄ اهي ٻيلا سڪي برباد ٿي ويا آهن جن جا نشان اڄ به سمنڊ ۾ موجود آهن. باقي جيڪي ڪجهه ٻيلا بچيا آهن ان کي به برباد ڪرڻ جي ڪوشش ڪئي پئي وڃي. جيڪڏهن حد کان وڌيڪ سمنڊ ۾ ويندڙ پاڻيءَ کي بچائڻو آهي ته سامونڊي پٽيءَ سان سنڌ اندر اهڙا ڊيم ڇو نه ٿا ٺاهيا وڃن ڇا نوري آباد ۽ ڄامشوري ضلعي اندر جيڪي ننڍن ننڍن ڊيمن جا منصوبا شروع ڪيا ويا هئا انهن کي مڪمل ڪرڻ وفاقي حڪومت جو ڪم ناهي؟

سنڌ جي ناڻي تي مالڪي وفاق واري سگهي ٿو ۽ دنيا اندر ڪنهن به ملڪ ۾ اهو مثال نه ٿو ته ناڻي جي ورهاست آدمشماري جي بنياد تي ٿيندي هجي هي واحد ملڪ آهي جتي آدمشماري جي بنياد تي ناڻي جي ورهاست ڪئي پئي وڃي. سنڌ 65 سيڪڙو ناڻو ڏئي ٿي ان کي موٽ ۾ 25 سيڪڙو واپس ڏنا ٿا وڃن جيڪا ڳالهه به تاريخ جو حصو آهي جڏهن هڪ صوبي سان ايتريون ناانصافيون ڪيون وينديون ته اتان جا ماڻهو مجبورن اهڙي ڳالهه ڪندا جيڪا هن ملڪ لاءِ نقصانڪار هونديون. سوچڻ ۽ سمجهڻ جي ڳالهه اها به آهي ته اڳوڻي وزيراعظم مير ظفر الله جمالي جيڪي لفظ چيا آهن ته پاڪستان ٽٽڻ تي آهي عوام سجاڳ ٿئي اهي به ڪنهن عام ماڻهوءَ جا ناهن هو ملڪ جو وزيراعظم رهي چڪو آهي ان تي به سوچڻ گهرجي. ٻئي طرف وري سينيٽ جي چيئرمين رضا رباني پاران اهو مطالبو ڪرڻ ته نيب جي نگرانيءَ لاءِ ڪيمشن جوڙي وڃي سڄي ملڪ جو احتساب ڪندڙن جو احتساب ڪير ڪندو سياستدان ڪرپٽ آهن ته فوجي ۽ سول بيوروڪريسي به بچيل ناهي. مڃان ٿو ته پ پ ۾ به ڪرپٽ ماڻهو آهن ڪرپشن ۾ ملوث ڪنهن به شخص جي حمايت نه ڪندس پر احتساب سڀني جو برابر ٿيڻ گهرجي ۽ ڪيو وڃي. هي لفظ به ان ماڻهو جا آهن جنهن کي پوري دنيا ايمانداريءَ طور نه صرف مڃتا ڏني آهي پر کيس مان به بخشيو آهي جڏهن ان رضا رباني جو نالو سينيٽ جي چيئرميني لاءِ تجويز ڪيو ويو ته ملڪ جي ڪا به اهڙي سياسي پارٽي نه هئي جيڪا رضا رباني جي مخالفت ڪري ان ڳالهه جو ڪهڙو جواب آهي جيڪا رضا رباني ڪري سڄي دنيا کي ميسيج ڏنو آهي ۽ اهو به سچ آهي ته 11 سال آمر ضياءُ الحق جا ۽ 11 سال آمر مشرف جا انهن 22 سالن جو احتساب ٿيڻ گهرجي ته پاڪستان اندر سياست ۾ اهڙي تبديلي اچي ويندي جو سمورو گند صاف ٿي ويندو ۽ اهي سياسي ڌريون رهجي وينديون جيڪي کير وانگر اڇيون هونديون. وقت ۽ حالتون ان ڳالهه کي ثابت ڪنديون ته سنڌ جنهن ڌرتيءَ مٿان ناانصافين، ظلم ۽ بربريت جو جيڪو ڪارو راڄ قائم رکڻ جي بار بار ڪوشش ڪئي ٿي وڃي اهو ڪيترو وقت هلي سگهي ٿو. پاڻي سنڌي ماڻهن جي جياپي جو مسئلو آهي پاڻي بنا سنڌ جا رهواسي ائين تڙپندا جيئن مڇي پاڻيءَ بنا. هي وقت آهي سجاڳ ٿيڻ جو ۽ خاص ڪري ڌرتي ڌڻين کي انهن ماڻهن جي پرک ڪرڻ گهرجي جيڪي سنڌ کي ڪک ۾ ڇرو هڻڻ وارو عمل ورجائي رهيا آهن انهيءَ ڪالاباغ ڊيم جو بار بار رينگٽ ڇا سنڌي ماڻهن جي ڦٽن مٿان لوڻ ٻرڪڻ برابر آهي ڇو ته سنڌ ۾ جنهن نموني زمينون آباد ٿيندڙ بنجر بڻايون ويون آهن ۽ غير آباد پنجاب جون زمينون آباد ڪرڻ لاءِ هٿ سان سنڌ جو پاڻي ڏاڍ جي بنياد تي چوري ۽ زوري کنيو ويو آهي سنڌ پنهنجو ڪيس ڪنهن جي اڳيان رکي جنهن ڌرتيءَ سان ناڻي، پاڻيءَ ۽ سياست جي بنياد تي ٻٽو معيار رکيو وڃي اتي باغي ئي جنم وٺندا آهن اهي اهڙا باغي هوندا آهن جن کي دنيا جي ڪا به دولت ڌن خريد ناهي ڪري سگهندو ڇو ته انهن جي لاءِ ڌرتي ۽ ڌرتي ڌڻي سڀ ڪجهه هوندا آهن جن جي ساهه ۾ سنڌ سمايل هوندي آهي اهي سنڌ جي پاڻي ۽ ناڻي تي خاموش ڪيئن ٿا ويهي سگهن ڀلي پنجاب جي ارسا جو ميمبر گهر ويٺي ڪالاباغ ڊيم جون ڀڀڪيون ڏيندو رهي پر جنهن وقت ڪالاباغ ڊيم جي ٺهڻ جو اعلان ڪيو ويو ان وقت سنڌي ماڻهن سان پنجاب جو اعلان جنگ هوندو ۽ ان جنگ کي سنڌ جا رهواسي ڪيئن منهن ڏيندا اهو ماضيءَ ۾ موجوده ملڪ جي وزيراعظم ميان نوازشريف ڪالاباغ ڊيم ٺاهڻ جو اعلان هڪ چڪر ڪري ڏٺو آهي جڏهن ڪمون شهيد وٽ سنڌ جا لکين جوڌا جوان نياڻيون، پڪا پوڙها ۽ معصوم ٻارڙن کان ويندي شاگردن تائين سنڌ اندر رهندڙ هر برادري جا فرد هٿ ۾ هٿ ڏئي اهو نعرو هڻي رهيا هئا ته نه کپي نه کپي ڪالاباغ ڊيم نه کپي. ان وقت اسلام آباد ۾ ويٺل پنجاب جي وزيراعظم ميان نوازشريف کي مجبورن اهو اعلان ڪرڻو پيو ته ڪالاباغ ڊيم ڪنهن به صورت ۾ نه ٺاهيو ويندو ڇا هڪ دفعو ٻيهر موجوده وزيراعظم ميان نوازشريف ڪالاباغ ڊيم ٺاهڻ جو اعلان ڪري اهڙي غلطي کي ورجائيندو اهو فيصلو ايندڙ ڏينهن تي ڇڏجي ٿو باقي سنڌ ۽ ان جا رهواسي جيڪو گذريل 65 سالن کان وٺي ناڻي ۽ پاڻي تي ٿيندڙ ناانصافي تي جيڪو آواز اٿاريندا رهيا آهن اهو ان وقت تائين جاري رهندو جنهن وقت تائين انهن سان انصاف نه ٿيندو ۽ سنڌ کي پنهنجو ناڻو ۽ پاڻي واپس نه ڏنو ويندو ان تي پوءِ ڇو نه سوين سنڌ جي نوجوانن کي ڦاسين تي چاڙهيو وڃي يا انهن کي اغوا ڪري تشدد وسيلي ماري انهن جي لاشن کي روڊن تي اڇلايو وڃي.

 

 

 

وزير اعظم جون امن تجويزون ۽ ايل او سي تي ڀارتي اڳرائي

اِها حقيقت آهي ته وزيراعظم نواز شريف پنهنجي ٽئين دؤر جي مُهڙين ڏينهن کان ڀارت سان ناتا بهتر ڪرڻ جي ڪوششن ۾ رُڌل رهيو آهي. ڀارتي وزيراعظم جي حلف برداريءَ واري تقريب ۾ شرڪت جو سبب به اِهو ئي هو ته جيئن ٻنهي ملڪن ۾ ڇڪتاڻ واري صورتحال کي گهٽائي سگهجي. ايترو ئي نه پر هر عالمي فورم تي وزيراعظم نواز شريف ٻه قدم اڳتي وڌي موديءَ ڏانهن ڀائيچاري جو هٿ وڌائيندو رهيو آهي، پر موٽ ۾ ڀارت هٺ ڌرميءَ جو مظاهرو ڪندي سدائين هٿ کنؤس جي ڪوشش پئي ڪئي آهي. جيتوڻيڪ انهيءَ هٿ کنؤس جو سبب پورو عالم ڄاڻي ٿو ته پاڪ- چين اقتصادي راهداري ڀارت جي اک ۾ ڪنڊي جيان چُڀي رهي آهي ۽ هُو هر ممڪن ڪوشش ڪندي انهيءَ منصوبي کي متاثر ڪرڻ جي ڪوششن ۾ مصروف آهي. ڊگهي وقت کان ورڪنگ بائونڊريءَ تي جنگ بنديءَ جي ڀڃڪڙين جو ڪارڻ پڻ اِهو ئي آهي. اُن جي ڀيٽ ۾ پاڪستان هر معاملي کي صبر ۽ تحمل سان برداشت ڪيو آهي، باوجود ان جي ته پاڪستاني فورسز ڀارتي اڳرائين جو مُنهن ٽوڙ جواب ڏئي سگهن ٿيون. ڇو ته ڇڪتاڻ ٻنهي ملڪن جي حق ۾ ڪنهن به ريت بهتر ناهي. خاص طور ڀارت جهڙي ملڪ کي اِها ڇڪتاڻ ڪنهن به ريت نه ٿي جڳائي جو هڪ ته هو گهڻ سماجي ملڪ آهي، ٻيو جنهن شرح سان اُتي غربت وڌي رهي آهي، تنهن صورت ۾ جنگي جنون يا هٿيارن جو شوق پالڻ ڀارت جي حق ۾ بهتر نه چئبو، پر نه ڄاڻ الائي ڇو اهڙي ادراڪ کان ڀارتي قيادت وانجهيل آهي. دنيا اندر وڏي جمهوريت جي دعويٰ ڪندڙ ڀارت جيڪي ڪشميرين سان ڪلور ڪيا آهن، سي هاڻ ڪنهن کان به ڳجها ناهن، تنهن ڪري ڀارت کي هاڻ اِن خوشفهميءَ ۾ نه رهڻ گهرجي ته هُن جو طلسم وڌيڪ وقت تائين برقرار رهي سگهندو. ٻيو ته خطي جي صورتحال پنجهٺ ۽ ايڪهتر واري ناهي، جو ڀارت کي پنهنجون من مستيون ڦٻي وڃن. جيڪڏهن پاڪستان چاهي ته ڀارت جي اڳرائين جو هُن کان ست ڀيرا وڌيڪ جواب به ڏئي سگهي ٿو، پر اِهو ڪنهن مسئلي جو حل ناهي، جنهن سبب ئي پاڪستان سهپ ۽ صبر جو دامن جهلي رکيو آهي. ڇو ته پاڪستان پنهنجي طويل مشاهدي مان ڄاڻي ورتو آهي ته ڪنهن به قسم جي ڇڪتاڻ ملڪ توڙي سماج لاءِ ترقيءَ ۾ رُڪاوٽ ۽ معاشي مسئلا پيدا ڪري ٿي، جنهن سبب اُن جي هر ممڪن ڪوشش آهي ته پنهنجي پاڙيسري ملڪن سان ناتا بهتر بڻايا وڃن، جنهن جو عملي ثبوت، وزيراعظم پاران گڏيل قومن جي جنرل اسيمبليءَ ۾ پيش ڪيل تجويزون آهن، جنهن ذريعي امن جي راهه هموار ڪري سگهجي ٿي. اسين وزيراعظم جي انهن تجويزن جي تائيد ڪندي اُن کي انتهائي وقتائتو فيصلو سمجهون ٿا. انهن تجويزن کي آڏو رکندي خود دنيا کي به ويچارڻ گهرجي ته پاڪستان نه رُڳو ڏکڻ ايشيا پر پوري عالم ۾ امن جو خواهشمند آهي، ايترو ئي نه پر موجوده وقت ۾ دهشتگردي ۽ انتهاپسنديءَ خلاف جنگ ۾ اول دستي طور وڙهي رهيو آهي. انهيءَ ويڙهه ۾ نه رُڳو فورسز پر مُلڪ جي عام ماڻهن جون بي پناهه قربانيون شامل آهن، جن جو هڪڙو ئي مقصد آهي ته ڪيئن به ڪري هن خطي ۾ امن جي فضا قائم ڪئي وڃي. اهڙي صورت ۾ هڪ سٺي پاڙيسريءَ جي حيثيت ۾ ڀارت کي پڻ پنهنجي حصي جو ڪردار ادا ڪرڻ گهرجي، پر بدقسمتيءَ سان اُهو هيستائين صورتحال کي بگاڙڻ جون ڪوششون ڪندو رهيو آهي، جنهن سبب امن جون ڪوششون متاثر ٿي رهيون آهن. اسين سمجهون ٿا، وزيراعظم امن تجويزون پيش ڪري بال ڀارت جي ڪورٽ ۾ اڇلايو آهي، ڏسجي ته ڀارت اُن جو ڪو مثبت جواب ڏئي امن جي حق ۾ فيصلو ڪري ٿو يا هُو خطي کي تباهي ۽ برباديءَ طرف وٺي وڃڻ جي راهه چونڊي ٿو!