تازيون خبرون

Daily Archives: October 2, 2015

25ڊسمبر 2007تي بينظير ڀٽو کي مشرف جي ڌمڪين واري ڪال آئي هئي: مارڪ سيگل

راولپنڊي(بيورو)  بينظير قتل ڪيس جي اهم شاهد ۽ محترما بينظير ڀٽو جي دوست صحافي مارڪ سيگل بيان رڪارڊ ڪرائيندي لڙڪ روڪي نه سگهيو.هن انڪشاف ڪيو ته پرويز مشرف جي ڌمڪين واري ڪال کانپوءِ محترما بنيظير ڀٽو کيس اي ميل ڪئي ته جيڪڏهن کيس قتل ڪيو ويو ته ان جو ذميوار پرويز مشرف هوندو. وڊيو لنڪ جي ذريعي ريڪارڊ ڪرايل بيان ۾ مارڪ سيگل ڄاڻايو ته محترما

بنظير ڀٽو کي مشرف جي ڪال اچڻ تي هوءَ پريشان هئي،فون جي اسڪرين تي مشرف لکيل هو ۽ محترما کيس اها ڪال ڏيکاري هئي. امريڪي صحافي مارڪ سيگل عدالت کي ٻڌايو ته هو 1984کان بينظير ڀٽو کي سڃاڻيندو هو. مارڪ سيگل چيو ته بينظير ڀٽو کيس ٻڌايو ته کيس هاڻ به مشرف پاران پريشان ڪندڙ ڪال آئي آهي. هن چيو ته بينظير ڀٽو ڪال ٻڌڻ بعد ڪافي پريشان نظر آئي. هن چيو ته ڪال بينظير ڀٽو جي پاڪستان اچڻ کان 3هفتا پهريان ڪئي وئي. هن چيو ته بينظير ڀٽو اها ڪال آمريڪي سينيٽر ٽام لينٽوز جي آفيس ۾ اٽينڊ ڪئي هئي. مارڪ سيگل چيو ته 25ڊسمبر 2007تي بينظير ڀٽو کي مشرف جي ڌمڪين واري ڪال آئي هئي. مشرف بينظير کي چيو، ته پاڪستان آئي ته سياسي سرگرمين جي ذميوار هوءَ پاڻ هوندي. امريڪي صحافي چيو ته فون جي اسڪرين تي مشرف لکيل هو، جيڪو بينظير مونکي ڏيکاريو. هن چيو ته بينظير ڀٽو اي ميل ڪئي ته مونکي قتل ڪيو ويو ته ذميوار مشرف هوندو. مارڪ سيگل چيو ته مشرف، بينظير ڀٽو کي ٻڌايو هو ته هن جي جان کي خطرو آهي. بيان ريڪارڊ ڪرائڻ وقت راولپنڊي جي ڪمشنر جي آفيس ۾ پرويز مشرف جو وڪيل الياس صديقي ،پ پ اڳواڻ سردار لطيف کوسا ۽ وڪيل نصير تنولي به موجود هئا.

 

پاڪستان ۾ صحيح ڪم ڪرڻ تمام ڏکيو ۽ غلط ڪم ڪرڻ آسان آهي: چوڌري نثار

اسلام آباد(بيورو)  وفاقي گهرو وزير چوڌري نثار علي خان عالمي اين جي اوز بابت حڪومتي پاليسي جو اعلان ڪندي چيو آهي ته رجسٽريشن رڳو آن لائين سسٽم مطابق ٿيندي، عالمي اين جي اوز کي فنڊ گڏ ڪرڻ لاءِ حڪومت کان اجازت وٺڻي پوندي ۽ غيرقانوني قدم کڻڻ جي صورت ۾ رجسٽريشن پاڻمرادو رد ٿيويندي. اسلام آباد ۾ پريس ڪانفرنس ڪندي وفاقي گهرو وزير عالمي اين جي اوز بابت حڪومتي پاليسي جاري ڪئي. هن ٻڌايو ته نئين پاليسي هيٺ مينيول رجسٽريشن ختم ڪئي وئي آهي ۽ هاڻي رجسٽريشن جو اختيار رڳو وفاقي گهرو وزارت وٽ هوندو. هن چيو ته سموريون درخواستون آن لائين ورتيون وينديون ۽ ڪم ڪرڻ جي اجازت ملڻ کانپوءِ اين جي اوز کي پاڪستان حڪومت کان 3 سالن تائين ايم او يو تي صحيح ڪرڻي پوندي. هن چيو ته اين جي اوز جي نگراني لاءِ خاص ڪميٽي به جوڙي وئي آهي. وفاقي گهرو وزير ٻڌايو ته نئين پاليسي مطابق عالمي اين جي اوز حڪومت کان اجازت وٺڻ بنا پرڏيهه مان فنڊ گڏ ڪري نه سگهنديون ۽ ٻاهران ايندڙ اين جي اوز جي ڪارڪنن جي ويزا به تبديل نه ٿيندي. نئين پاليسي مطابق عالمي اين جي اوز حڪومت جي اجازت کانسواءِ مقامي اين جي اوز جي مدد به نه ڪري سگهندي. سندس چوڻ هو ته پاڪستاني مفادن خلاف ڪو به قدم ثابت ٿيڻ تي اين جي اوز جي رجسٽريشن رد ڪئي ويندي. چوڌري نثار ٻڌايو ته نئين پاليسي جو مقصد ڪنهن تي پابندي مڙهڻ ناهي، حڪومت سٺو ڪندڙن کي سهولتون به ڏيندي. سندس چوڻ هو ته ملڪ ۾ سڀ کان وڏو مسئلو سڄو ٺانٺو ڦٽائڻ آهي، هتي صحيح ڪم ڪرڻ سڀ کان وڌيڪ ڏکيو ۽ غلط ڪم ڪرڻ سولو آهي. هن چيو ته ڪيترن ئي ملڪن پنهنجي قانونن ۾ اين جي اوز جو ڪردار مقرر ڪيو آهي پر اسان وٽ انهن کي کليل ڇوٽ مليل آهي. وڏين وڏين پرڏيهي اين جي اوز جي رجسٽريشن ناهي ٿي، هاءِ سيڪيورٽي وارن علائقن ۾ به اين جي اوز ڪم ڪن ٿيون، اسان انٽيلينجس جي بنياد تي ڪجهه اين جي اوز کي بند ڪرايو آهي. هن چيو ته هٿيارن جا لائسنس هجن يا بُلٽ پروف گاڏين جو معاملو هجي هر شئي ۾ گند لڳو پيو آهي، پاڪستان کي اڳتي وٺي وچڻو آهي ته اسان کي قومي مفاد ڏسڻا پوندا. چوڌري نثار علي خان چيو ته پاليسي جوڙڻ سان معاملن ۾ سئو سيڪڙو بهتري نٿي اچي سگهي. ان ڪري مڪمل مانيٽرنگ به ڪئي ويندي. هن چيو ته سموريون اين جي اوز ايندڙ 60 ڏينهن ۾ درخواستون ڏئي سگهن ٿيون ۽ ان دوران اهي ڪم به جاري رکي سگهن ٿيون. 60 ڏينهن کانپوءِ پاڪستان حڪومت ۽ گهرو وزارت قطعي فيصلو ڪندي. هڪ سوال جي جواب ۾ وفاقي گهرو وزير چيو ته حڪومت بهتر ڪم ڪري رهي آهي، اسان ئي ڪراچي ۾ آپريشن شروع ڪيو ۽ قومي ايڪشن پلان به اسان ئي ڏنو. هن چيو ته ماڻهو 30، 30 سالن کان اي سي ايل ۾ شامل هئا پر اسان نئين اي سي ايل پاليسي جوڙي آهي، جڏهن ته هٿيارن جي لائسنس ۽ سيڪيورٽي ايجنسين بابت پاليسي آندي پئي وڃي. وفاقي گهرو وزير چيو ته اسان جي ڪوشش آهي ته افغانستان سان ڀائري وارا لاڳاپا هجن پر افغانستان طرفان ڪنهن ٻئي ملڪ جي ٻولي ڳالهائڻ اسان لاءِ تڪليف ڏيندڙ ڳالهه آهي، هن چيو ته افغانستان ۾ ڪير ڇڪ به ڏئي ٿو ته الزام اسان تي مڙهيو وڃي ٿو، چوڌري نثار چيو ته ريڊ زون ۾ تماشو ڪرڻ قوم جي مفاد ۾ ناهي، اهو قطعي فيصلو آهي ته ريڊ زون ۾ ڪو به تماشو نه ٿيندو، جڏهن ته ڊي چوڪ ۾ نئين جلسي ۾ اتي جلسي جي اجازت ئي نه هوندي. وفاقي گهرو وزير چيو ته قانون لاڳو ڪندڙ ڪنهن به اداري وٽ احتساب جو اختيار ناهي. رينجرز پنجاب جي هجي يا سنڌ جي سڀ گهرو وزارت جي هيٺيان آهن. جڏهن ته آمراڻي دور ۾ نيب جو سڄو ڌيان مسلم ليگ (ن) تي هو.

 

پاڪستان ۾ ”را“ جي مداخلت جا ثبوت گڏيل قومن کي ڏئي ڇڏيا آهن: نواز شريف

نيويارڪ (مانيٽرنگ ڊيسڪ) وزير نواز شريف چيو آهي ته پاڪستان ۾ ”را“ جي مداخلت جا گڏيل قومن کي دستاويز ڏنا آهن، پاڪستان ۾ آئين ۽ قانون جي حڪمراني آهي. گڏيل قومن جي جنرل اسيمبلي جي اجلاس کي خطاب بعد نيويارڪ ۾ ميڊيا سان ڳالهائيندي نواز شريف چيو ته هندستان کي ڪشمير مان فوج جي نيڪالي جي تجويز ڏني آهي، ڇاڪاڻ ته فوج جي نيڪالي سان ڪشميرين سان گڏ هندستان کي به فائدو ٿيندو. سندس چوڻ هو ته گڏيل قومن جي 70هين اجلاس جي پنهنجي اهميت آهي، بان ڪي مون سان اهم معاملن تي کليل ڳالهيون ٿيون آهن. هن چيو ته عالمي اڳواڻن سان عالمي ۽ علائقائي صورتحال تي ڳالهيون ڪري پنهنجو موقف دنيا آڏو پيش ڪيو ويو. وزير اعظم چيو ته پاڪستان ۾ آئين ۽ قانون جي حڪمراني آهي. نواز شريف چيو ته اجلاس دوران جان ڪيري ۽ بل گيٽس سان پڻ ملاقاتون ڪيون. هن چيو ته سلامتي ڪائونسل جو ڪردار جمهوري هجڻ گهرجي،پاڪستان ۾ را جي مداخلت جا دستاويز گڏيل قومن کي ڏنا آهن،ڪشمير مان ڀارتي فوج جي نيڪالي ضروري آهي.

 

عمران خان کي حڪومت جا سٺا ڪم ڏٺا نٿا ٿين، انڪري هن هاري پيڪيج جي مخالفت ڪئي. پرويز رشيد

اسلام آباد (بيورو) وزيراعظم نوازشريف جي هاري پيڪيج جي رد ٿيڻ تي حڪومتي صفن ۾ ڦڙڦوٽ متل آهي.وفاقي وزير پرويز رشيد جو چوڻ آهي ته عمران خان کي حڪومت جا سٺا ڪم ڏٺا نٿا ٿين، انڪري هن هاري پيڪيج جي مخالفت ڪئي. اسلام آباد ۾ ميڊيا سان ڳالهائيندي سڌ سماءَ جي وفاقي وزير پرويز رشيد چيو آهي ته حڪومت ٻوڏ متاثرن لاءِ هاريپيڪيج جو اعلان ڪيو هو. هن چيو ته عمران خان پنجاب ۾ ٽي هاري ڪنوينشن ڪوٺايا، ان تي حڪومت ڪوبه اعتراض نه واريو پر هن کي هاري پيڪيج پسند نه آيو. وفاقي وزير چيو ته وزيراعظم واعدي موجب زرعي پيڪيج جو اعلان ڪيو. هن چيو ته عالمي مارڪيٽ ۾ زرعي جنسن چانورن ۽ ڦٽين جي اگهن ۾ گهٽتائي ٿي وئي آهي، حڪومت هارين جي مدد ڪرڻ گهري پئي. هڪ سوال جي جواب ۾ پرويز رشيد چيو ته عمران خان کي اعتراضن ڪرڻ کانسواءِ ٻيو ڪجهه به نه ايندو آهي. هن واضح ڪيو ته هاري پيڪيج هڪ تڪ لاءِ نه پر سڄي ملڪ لاءِ آهي. پرويز رشيد چيو ته عوامي مفاد جا منصوبا عمران خان کان هضم نٿا ٿين.

 

ملڪي وقار ۽ خودمختاري تي ڪا به سوديبازي نه ڪئي ويندي:آرمي چيف

لنڊن(م.ڊ) آرمي چيف جنرل راحيل شريف چيو آهي ته پاڪستان ڀارت سان لاڳاپا چاهي ٿو، پر ملڪي وقار ۽ خودمختاري تي ڪا به سوديبازي نه ڪئي ويندي. لنڊن ۾ پاڪستاني هاءِ ڪمشنر ابن عباس طرفان پنهنجي اعزاز ۾ ڏنل مانجهاندي کي خطاب ڪندي جنرل راحيل شريف جو چوڻ هو ته دهشتگردن خلاف جاري ضرب عضب آپريشن اڌ ۾ نه ڇڏيو ويندو ۽ پاڪستان مان دهشتگردي جي پاڙ کي ختم ڪري ئي سـُک جو ساهه کنيو ويندو. سندس چوڻ هو ته پاڪستان ڀارت ۽ افغانستان سميت سمورن پاڙيسري ملڪن سان بهتر لاڳاپا چاهي ٿو پر ملڪي وقار ۽ خودمختياري تي ڪا به سوديبازي نه ڪئي ويندي. آرمي چيف چيو ته پاڪستان ۾ 10 هزار کان وڌيڪ انٽيليجنس تي ٻڌلآپريشن ڪيا جن ۾ دهشتگردن ۽ انهن جي مددگارن کي به نشانو بڻايو ويو جڏهن ته ڪراچي ۾ ڏوهارين خلاف آپريشن سان شهر ۾ امن قائم ٿيو آهي. هن چيو ته دهشتگردن خلاف جنگ ۾ سڄي قوم فوج سان گڏ آهي، پنج هزار فوجي جنگ ۾ شهيد ٿيا، آءِ ڊي پيز جي منتقلي جاري آهي ۽ انهن جي آبادڪاري هڪ وڏو چيلينج آهي. جنرل راحيل شريف چيو ته پاڪ چين اقتصادي راهداري منصوبو خطي ۾ اقتصادي خوشحالي آڻيندو. هن چيو ته پاڪستان بهتري ڏانهن گامزن آهي ۽ هاڻي پرڏيهي سيڙپڪار هتي سيڙپڪاري ڪري سگهن ٿا. آرمي چيف جو چوڻ هو ته برطانيه پاڪستان جو اتحادي آهي ۽ هـُو ان سان سٺا لاڳاپا چاهي ٿو.

 

اليڪشن ڪميشن، پنجاب ۾ ننڍي چونڊ دوران پولنگ واري ڏهاڙي پاڪ فوج ۽ رينجرز جا جوان مقرر فيصلو

اسلام آباد (بيورو) اليڪشن ڪميشن، پنجاب ۾ ننڍي چونڊ دوران پولنگ واري ڏهاڙي پاڪ فوج ۽ رينجرز جا جوان پولنگ اسٽيشنز جي اندر ۽ ٻاهر مقرر ڪرڻ جو فيصلو ڪري ورتو آهي، اليڪشن ڪميشن جو چوڻ آهي ته جوانن کي فرسٽ ڪلاس مئجسٽريٽ جا اختيار حاصل هوندا. پنجاب جي قومي تڪن اين ا

ي هڪ سئو 22، اين اي هڪ سئو 44 اوڪاڙه  ۽ صوبائي تڪ پي پي 147 تي ننڍي چونڊ 11 آڪٽوبر تي ٿيندي، جڏهن ته پنجاب جي گهرو وزير شجاع خانزاده جي شهادت بعد خالي پيل سيٽ پي پي 16 اٽڪ تي تي ننڍي چونڊ لاءِ پولنگ 6 آڪٽوبر تي ٿي رهي آهي. اليڪشن ڪميشن موجب، ريٽرننگ آفيسرن جي درخواست تي ننڍي چونڊ دوران پولنگ اسٽيشنز تي اندر ۽ ٻاهر پاڪ فوج ۽ رينجرز جا جوان مقرر هوندا. اليڪشن ڪميشن موجب، پولنگ اسٽيشنز جي اندر ۽ ٻاهر رينجرز ۽ پاڪ فوج جا جوانن مقرر ڪرڻ جو فيصلو امن امان جي صورتحال سبب ڪيو ويو آهي. اليڪشن ڪميشن جو اهو به چوڻ آهي ته پاڪ آرمي ۽ رينجرز جا جوان هڪ ڏينهن اڳ چونڊن واري تڪن تي پهچي ويندا، انهن کي چونڊ ڏهاڙي فرسٽ ڪلاس مئجسٽريٽ جا اختيار هوندا ۽ اهي ضابط اخلاق جي ڀڃڪڙي تي موقعي تي ئي ڪارروائي ڪري سگهندا.

 

منيٰ سانحي ۾ شهيد پاڪستانين جو انگ وڌي 52 ٿي ويو،49 شهيدن جي سعودي عرب ۾ تدفين ڪئي وئي آهي: سردار يوسف

اسلام آباد (بيورو) منيٰ سانحي ۾ شهيد پاڪستانين جو انگ وڌي 52 ٿي ويو آهي، مذهبي معاملن واري وفاقي وزير سردار يوسف چيو آهي ته 49 شهيدن جي سعودي عرب ۾ تدفين ڪئي وئي آهي ۽ زخمين مان 37 کي علاج بعد فارغ ڪيو ويو آهي. مذهبي معاملن واري وزارت پاران منيٰ سانحي ۾ شهيد پاڪستانين بابت نوان تفصيل جاري ڪري ڇڏيا آهن. مذهبي معاملن واري وزير سردار يوسف جو چوڻ آهي ته منيٰ سانحي ۾ شهيد پاڪستانين جو انگ وڌي 52 ٿي ويو آهي، جن مان 49 شهيدن جي سعودي عرب ۾ تدفين ڪئي وئي آهي. سردار يوسف جو چوڻ آهي ته سانحي ۾ زخمي ٿيل 49 پاڪستانين مان 37 کي اسپتالن مان فارغ ڪيو ويو آهي، ٻارنهن پاڪستاني حاجي اڃا به مختلف اسپتالن ۾ علاج هيٺ آهن. مذهبي معاملن واري وزارت موجب، سانحي ۾ شهيد ٿي ويل اڳوڻي وزيراعظم يوسف رضا گيلاني جي ڀاڻيجي اسد مرتضيٰ گيلاني جو مڙهه ڏيهه آڻڻ لاءِ انتظام ڪيا پيا وڃن.

 

عمران خان جي سياست شارٽ ڪٽ تي ٻڌل آهي، 58 ٽو بي آڻڻ جي خواهش رکندر سمجهي ڇڏين هاڻي ايئن ٿو ٿي سگهي: نثار کهڙو

ڪراچي (اي پي پي) سنڌ جي اطلاعات واري سينيئر وزير نثار احمد کهڙو چيو آهي ته عمران خان جي سياست شارٽ ڪٽ تي ٻڌل آهي، هن شارٽ ڪٽ جي چڪر ۾ آمر پرويز مشرف جي حمايت ڪئي هئي ۽ هاڻي شارٽ ڪٽ ذريعي وزيراعظم بڻجڻ جو خواب ڏسي رهيو آهي، صوبائي احتساب ڪميشن جو مسودو تيار ڪيو ويو آهي، جيڪو منظوريءَ لاءِ سنڌ اسيمبليءَ جي اجلاس ۾ پيش ڪيو ويندو. اهڙن خيالن جو اظهار هن خميس ڏينهن سنڌ اسيمبليءَ ۾ ميڊيا سان ڳالهائيندي ڪيو. نثار احمد کهڙو چيو ته  عمران خان جي شارٽ ڪٽ سبب  سندس پارٽي پي ٽي آءِ پاڻ اندروني انتشار جو شڪار آهي، ان ڪري عمران خان بلاول ڀٽو زرداريءَ تي تنقيد ڪرڻ بدران پنهنجي پارٽيءَ جي اندروني انتشار تي ڏيان ڏئي. هن چيو ته آمر پرويز مشرف جي ريفرينڊم جو حامي عمران خان ڪڏهن به عوامي ليڊر نه ٿو ٿي سگهي. هو بلاول ڀٽو زرداريءَ بدران آمر پرويز مشرف کي ياد ڪري تسڪين وٺي. هن چيو ته سياست حلوائيءَ جو دڪان ناهي ان ڪري عمران خان پهريان پيپلز پارٽيءَ وانگر هڪ به قرباني ڏئي ڏيکاري پوءِ ٻين تي تنقيد ڪري. هن چيو ته عمران خان ماضيءَ وانگر 58 ٽو بي چاهي ٿو پر هاڻي اهو زمانو گذري ويو جڏهن هڪ چارج شيٽ تي جمهوري حڪومتن کي گهر موڪليو ويندو هو. نثار احمد کهڙو چيو ته ڪجهه ادارن پاران سنڌ کي نشانو ٺاهيو پيو وڃي جنهن ڪري ضروري سمجهوسين ته صوبي ۾ احتساب جو ادارو هجڻ ان ڪري صوبائي احتساب ڪميشن جوڙڻ لاءِ مسودو تيار ڪيو ويو آهي جيڪو منظوريءَ لاءِ سنڌ اسيمبليءَ جي اجلاس ۾ پيش ڪيو ويندو. هن چيو ته  ڪجهه جماعتن کي مڪاني چونڊن کان اڳ پنهنجو مستقبل نظر اچي رهيو آهي جنهن ڪري اهي جماعتون پيپلز پارٽيءَ تي چونڊن کان اڳ ڌانڌليءَ جا الزام هڻي رهيون آهن پر کين ياد رکڻ گهرجي ته چونڊون حڪومت نه پر اليڪشن ڪميشن ڪرائيندي آهي، ان ڪري جن جماعتن کي خدشا آهن ته اهي اليڪشن ڪميشن سان رجوع ڪن. هن چيو ته مخالف ڀلي زور آزمائي ڪري ڏسن پر پيپلز پارٽي عوام جي ووٽ جي طاقت سان عام چونڊن وانگر سنڌ ۾ مڪاني چونڊون به سئيپ ڪندي.

 

عمران خان پاران 4 آڪٽوبر تي ميگا ڪرپشن بي نقاب ڪرڻ جو اعلان

لاهور(بيورو) تحريڪ انصاف جي چئيرمين عمران خان ٻئي ڏينهن به چونڊ ريلي جي اڳواڻي ڪئي. ان موقعي تي 32 مسلم ليگين پي ٽي آئي ۾ شامل ٿيڻ جو اعلان ڪيو. ڪپتان 4 آڪٽوبر تي ميگا ڪرپشن تان پڙدو کڻڻ جو اعلان ڪيو آهي.عمران خان لاهور جي تڪ اين اي 122 ۾ ٻئي ڏينهن به چونڊ ريلي جي اڳواڻي ڪئي. اسلاميا پارڪ ۾ 32 ليگي اڳواڻنپارٽي ڇڏي تحريڪ انصاف ۾ شامل ٿيڻ جو اعلان ڪيو.ان موقعي تي عمران خان چيو ته نئين پاڪستان ۾ چورن ڦورن جي ڪا به جڳهه ناهي. نئين پاڪستان ۾ چورن جو پڇاڻو ٿيندو ۽ اهي اسيمبلين ۾ نه پي جيلن ۾ ويندا.محنت ڪندڙ هر ڪارڪن مٿي ايندو. تحريڪ انصاف جو هر ميمبر ان جو پڇاڻو ڪري سگهي ٿو.ڪارڪن انهن کان سندن ملڪيتن بابت به پڇي سگهن  ٿا. 18 سال ٻاهر ڪمايو، سڄو پئسو پاڪستان ۾ آهي پر ليگي ڪارڪن محمد نواز شرف کان پڇي سگهن ٿا ته انهن جي ملڪيت ڪٿي آهي ۽ انهن تي ڪو به الزام آهي ته ڪارڪن ان جو به پڇاڻو ڪري سگهن  ٿا.عمران خان چيو ته مسلم ليگ وارا 6 ڀيرو پنجاب ۾ حڪومت ڪري رهيا آهن، عوام غريب ٿيندو پيو وڃي ۽ حڪمران امير ٿيندا پيا وڃن. پنجاب ۾ صاف پاڻي ۽ اسڪولن جو ڪو بهتر نظام ناهي، اهي جيترا ڀيرا حڪومت ۾ ايندا، قوم غريب ٿيندي ويندي آهي. هارين لاءِ جيڪو پيڪيچ ڏيڻ گهرجي ها اهو ته نه ڏنو ۽ جيڪڏهن هارين کي پيڪيج ڏيڻو ئي هو ته بجيٽ ۾ ڇو نه ڏنو ويو.

 

سنڌ ۾ پ پ مرضي موجب تڪبنديون ڪيون، شهري ۽ ٻهراڙي جي علائقن کي پنهنجي سهولت لاءِ گڏايو ويو: ارباب رحيم

ميرپورخاص (اي پي پي) سنڌ ۾ پيپلزپارٽي وارن مرضي موجب تڪ بنديون ڪري شهري علائقن کي ٻهراڙين ۽ ٻهراڙين کي شهر ۾ شامل ڪيو هو جنهن کي هاءِ ڪورٽ ڪالعدم قرار ڏنو ته هاڻي وري اهي اپيلون پيا داخل ڪن. . اهڙو اظهار مسلم ليگ (ن) جي اڳواڻ ۽ اڳوڻي وڏي وزير ارباب غلام رحيم ميرپورخاص لڳ اي ڊي لاکو جي ڳوٺ ۾ ميڊيا سان ڳالهائيندي ڪيو. هن چيو ته سنڌ ۾ هينئر اڳ جي ڀيٽ ۾ ايپيڪس ڪميٽي ۽ اسٽيبلشمينٽ جي نوٽيس وٺڻ ڪري ڪجهھ قدر سٺا پوليس ۽ ضلعي آفيسر مقرر ٿيل آهن پر اڃا به اصلاح ٿيڻ گھرجي. هن چيو ته مڪاني چونڊن ۾ پ پ مخالف قوتن مسلم ليگ (ن)، مسلم ليگ (ف)، تحريڪ انصاف، ايس يو پي، قومي عوامي تحريڪ ۽ ٻين سان گڏ جي مقابلو ڪيو ويندو . هن چيو ته روينيو جا مقرر ڪيل ڪجھه آر او بهتر آهن پر تعليم کاتي ۽ سوشل ويلفيئر کاتي ۽ ٻين کاتن جا مقرر ڪيل آر اوز اڃا پ پ حڪومت جي ونگار ۾ وهندي نظر اچن ٿا. ارباب غلام رحيم چيو ته آئون وڏو وزير هئس ته مون تي ڪير 800 يا 8 رپيا به ثابت ڪري ڏيکاري. هن چيو ته مون ته ڪرپشن جا الزام ۾ پنهنجي ڪابينه جي هڪ وزير کي به برطرف ڪيو هو جنهن تي وڏو دٻاءُ آيو پر مون اسٽينڊ ورتو ۽ هينئر پ پ وارا ڪرپٽ وزيرن کي بچائڻ ۾ جتن ۾ پيا ڪن. هن چيو ته آصف زرداري دبئي ۾ ويهي ميان محمد نواز شريف جي زرعي پاليسين تي تنقيد پيو ڪري پر پاڻ ٻڌائي ته سنڌ ۾ ڪمند جي آبادگارن توڙي وونئڻن ۽ ڪڻڪ جي آبادگارن کي اگھه نه ڏيئي تباھ ڪنهن ڪيو. ارباب رحيم چيو ته بدقسمتي ۽ معذرت سان چوان ٿو ته سنڌ جي عوام ۾ شعور نه آهي، هو خدمت ۽ ڪم کي ڏسڻ بداران ٽڪي پسئي جي نوڪري کي ڏسي جيئي جيئي ۽ هو جمالو ڪندڙن جي پويان لڳي وڃن ٿا ان لاءِ پهرين سنڌ ۾ سجاڳي ۽ شعور پيدا ڪرڻو پوندو . هڪ سوال تي هن چيو ته ايم ڪيو ايم کي هاڻي اڳ وارا معامرا ڇڏي قومي سياست ۾ سنجيدگي سان پير رکڻ گھرجي. اها هاڻي دهشت گردي ڀته خوري ۽ ٽارگيٽ ڪلنگ جھڙن ڏوهن ۾ ملوث ماڻهن کي پاڻ کان ڌار ڪري. ارباب رحيم چيو ته مڪاني چونڊون شفاق ٿيڻ ۽ ووٽرن کي آزاد ڇڏي تحفظ ڏنو وڃي ته پوءِ گھڻي تبديلي نظر ايندي ۽ تبديلي شروع ٿي چڪي آهي. ان موقعي تي ن ليگ جو اي ڊي لاکو ، فنڪشنل ليگ جو جاويد جوڻيجو ، مبارڪ مهر ، ايس يو پي جو مسعود وساڻ ۽ زاهد نون ساڻس گڏ هئا.