تازيون خبرون

Daily Archives: September 29, 2015

ڊاڪٽر عاصم حسين اسپتال مان فارغ، رينجرز ٻيهر تحويل ۾ وٺي ڇڏيو

ڪراچي (اسٽاف رپورٽر) ڪراچي جي دل واري اسپتال مان ڊاڪٽر عاصم کي فارغ ڪيو ويو آهي، جنهن کي رينجرز پاڻ سان گڏ وٺي وئي آهي. 90 ڏينهن لاءِ رينجرز جي تحويل هيٺ ڊاڪٽر عاصم کي ڪجهه ڏينهن اڳ دل جي تڪليف سبب دل واري اسپتال منتقل ڪيو ويو، جتي سندس اي سي جي ۽ ٻيون ٽيسٽون ڪيون ويون. دل واري اسپتال جي ڊاڪٽرن پاران ڊاڪٽر عاصم حسين طبيعت بابت تسلي بخش رپورٽ ڏيڻ بعد کيس اسپتال مان فارغ ڪيو ويو، جنهن کي رينجرز پاڻ سان گڏ وٺي وئي آهي. ڊاڪٽر عاصم کي دهشتگردن جي مالي مدد ۽ بدعنوانين جي الزام هيٺ گرفتار ڪيو ويو هو.

 

  ڊالر گرل ايان علي تي فرد جرم لاڳو نه ٿي سگهيو

راولپنڊي(م.ڊ) ڊالر گرل ايان علي تي ڪسٽم عدالت جو جج موڪل تي هجڻ ڪري اڄ 24هين پيشي تي به فرد جرم لاڳو نه ٿي سگهيو، ماڊل جو چوڻ آهي ته ڪرنسي اسمگلنگ جو ڪيس ڪوڙو آهي، جيڪو ختم ٿيڻ بعد هوءَ ميڊيا سان ضرور ڳالهائيندي. ڪرنسي اسمگلنگ ڪيس ۾ گرفتار سپر ماڊ ايان علي کي راولپنڊي جي ڪسٽم عدالت ۾ پيش ڪيو ويو. ڪسٽم عدالت جو جج موڪل تي هجڻ ڪري ماڊل تي هڪ ڀيرو ٻيهر فرد جرم لاڳو نه ٿي سگهيو، جڏهن ته ڪيس جي ٻڌڻي پڻ 8 آڪٽوبر تائين ملتوي ڪئي وئي آهي. ٻڌڻي ملتوي ٿيڻ کانپوءِ عدالت ٻاهران ميڊيا سان ڳالهائيندي سپر گرل ايان علي چيو ته ڪرنسي اسمگلنگ ڪيس ڪوڙو ۽ بي بنياد آهي. ايان علي چيو ته ڪيس ختم ٿيڻ بعد هوءَ ميڊيا سان هڪ ڀيرو ضرور ڳالهائيندي

 

اداڪار شان ۽ ريما فلمي ڪيريئر جي سلور جوبلي مڪمل ڪري ورتي

لاهور(شوبز نيوز) اداڪار شان ۽ ريما جي فلمي ڪيريئر کي 21 سيپٽمبر تي 25 سال مڪمل ٿي ويا. ٻنهي اداڪارن جي پهرين فلم ”بلندي” 21 سيپٽمبر 1990ع تي رليز ٿي هئي جنهن ٻني فنڪارن کي شهرت جي اوچاين تي پهچايو هو. ان فلم جو فلمساز اسلام بٽ جڏهن ته هدايتڪار محمد جاويد فاضل مرحوم هو. ان فلم ۾ نديم شان جي والد ۽ ثمينه پيرزاده والده جو ڪردار ادا ڪيو هو جڏهن ته ٻين اداڪارن ۾ افضال احمد، طالش، همايون قريشي ۽ ٻيا شامل هئا.

 

پاڪستان ۽ زمبابوي وچ ۾ ٻي ۽ آخري ٽي ٽوئنٽي انٽرنيشنل مئچ (اڄ) کيڏي ويندي

هراري (اسپورٽس نيوز) پاڪستان ۽ زمبابوي جي ڪرڪيٽ ٽيمن وچ ۾ سيريز جي ٻي ۽ اخري ٽي ٽوئنٽي انٽر نيشنل (اڄ) اڱاري تي هراري اسپورٽس ڪلب ۾ کيڏي ويندي. پاڪساني وقت موجب مئچ شام جو 4 وڳي شروع ٿيندي. پاڪستان کي ٻن ميچن جي سيريز ۾ 0-1 جي سرسي حاصل آهي. سيريز جي پهرين مئچ ۾ گرين شرٽس 13 رنسن تان ڪاميابي حاصل ڪئي، ٽي ٽوئنٽي کان پوءِ ٻنهي ٽيمن وچ ۾ ٽن ون ڊي ميچن جي سيريز کيڏي ويندي ۽ پهرين ون ڊي پهرين آڪٽوبر ٻي 3 ۽ ٽين ۽ آخري ون ڊي مئچ 5 آڪٽوبر تي کيڏي ويندي.

 

چائنا اوپن ٽينس ٽورنامينٽ 3 آڪٽوبر کان شروع ٿيندي

بيجنگ (اسپورٽس نيوز) چائنا اوپن ٽينس ٽورنامينٽ 3 آڪٽوبر کان بيجنگ ۾ شروع ٿيندي. ٽورنامينٽ جي وومينز سنگلز مقابلن ۾ روسي ٽينس اسٽار ماريا شراپوا جڏهن ته مردن جي سنگلز مقابلن ۾ سربيا جو نوويڪ جوڪووچ اعزاز جو دفاع ڪندا. ماريا شراپوا انجري سبب يو ايس اوپن ۾ حصو نه ورتو هو پر هن صحتياب ٿيڻ کان پوءِ چائنا اوپن ۾ ڀرپور طريقي سان شرڪت ڪرڻ جو اعلان ڪيو آهي.

 

نواز سرڪا پاران هاري پئڪيج جو اعلان ۽ اٿندڙ سوال: تاج مري

پ پ پ، تحريڪ انصاف ۽ ٻين پارٽين جي اعتراض کانپوءِ وزير اعظم ميان نواز شريف جي اعلانيل هاري پئڪيج تي اليڪشن ڪميشن پڻ سوال اٿاريا آهن. اليڪشن ڪميشن حڪومت کان پڇاڻو ڪيو آهي ته هاري پئڪيج ايندڙ مڪاني ادارن جي چونڊن تي ته اثرانداز نه ٿيندو. وزير اعظم نواز شريف جي اعلانيل 341 ارب روپين جي هاري پئڪيج جو جائزو وٺنداسين ته خبر پوندي ته انهي پئڪيج جا ٻه پهلو آهن، هڪڙو سياسي پهلو جنهن تي اليڪشن ڪميشن حڪومت کان پڇاڻو ڪيو آهي ۽ ٻيو پهلو آهي، انهي جو معاشي پاسو. وزير اعظم نواز شريف هاري پئڪيج جو اعلان انهي وقت ڪيو آهي، جڏهن ملڪ ۾ خاص طور تي سنڌ ۽ پنجاب ۾ مڪاني ادارن جي چونڊن جو اعلان ٿيو هو. هيل تائين ائين ٿيندو رهندو آهي ته چونڊن کان اڳ حڪمران پارٽي کي فائدو رسائڻ لاءِ سرڪار اهڙا اعلان ڪندي آهي. هن هاري پئڪيج جو پڻ اعلان ان وقت ڪيو ويو، جڏهن چونڊن جو شيڊول پڌرو ٿي چڪو هو. ٻئي طرف پنجاب ۾ آبادگارن جون تحريڪون زور وٺڻ لڳيون هيو. روڊن تي ڌرڻا ۽ اسيمبلي آڏو احتجاج فصلن کي روڊن تي هارڻ ۽ باهيون ڏيڻ جهڙا واقعا به ان وقت ٿيا هئا، جڏهن مڪاني ادارن جي چونڊن جي اعلان جون تياريون ٿي رهيون هيون. ان وقت پ پ پ ۽ تحريڪ انصاف کي به هاري ياد اچڻ لڳا هئا ۽ انهن هاري ڪانفرنسون ڪيون ۽ جلوس ڪڍيا هئا ته ان وقت نواز ليگ سرڪار کي به اهو خيال آيو ته اسين پوئتي رهجي نه وڃون سو کڻي بنا سوچڻ سمجهڻ ۽ تياري جي هاري پئڪيج جو اعلان ڪيائون. بدقسمتي سان هيل تائين هاري پئڪيج تي جيڪي بحث ٿيا آهن، اهي گهڻو تڻو اليڪشن تي اثرانداز ٿيڻ جي حوالي سان ٿيا آهن، انهي جي ٻئي پهلوءَ تي گهڻو ڌيان نه ڏنو ويو.

پهريون سوال اهو آهي ته ڇا اهو هاري پئڪيج آهي به يا نه؟ ڇو ته هاري پئڪيج ۾ هاري جي لاءِ ته ڪنهن به رليف جو اعلان نه ڪيو ويو. مثال طور تي هن پئڪيج جا جنهن لاءِ 341 ارب روپيا رکيا ويا آهن، انهي جا 3 حصا آهن. پهريون حصو هارين کي سڌي ريت مالي مدد فراهم ڪرڻ. ٻيون پيداواري لاڳت گهٽ ڪرڻ. ٽيون زرعي قرض ڏيڻ. پهرين حصي ۾ سارين ۽ ڪپهه جي پوک ڪندڙ هارين کي 5 هزار روپيا في ايڪڙ جي حساب سان مالي سهائتا فراهم ڪرڻ جنهن لاءِ 20، 20 ارب روپيا رکيا ويا آهن. جنهن ۾ هاري کي ڇا ملندو انهي جو ڪو به ذڪر ناهي اهو واضغ ڪيو ويو آهي 12.5 ايڪڙ زمين رکندڙ آبادگارن کي اهو پئڪيج ڏنو ويندو، ڪپهه توڙي سارين جي اگهه نه ملڻ ۽ ٻين سبب ڪري نقصان ۾ ته هاري اڌ حصيدار آهي، پر امدادي پئڪيج رڳو زميندار کي ملندو. جهڙي طرح ٻوڏ واري زماني ۾ اعلانيل رليف مان هارين کي ڪو به فائدو نه پهتو هاري ٻوڏ سبب نقصان ۾ 50 سيڪڙو ڀرپو، پر سرڪار پاران ڏنل رعايت رڳو زميندار حاصل ڪئي.

هن پئڪيج مان پڻ هاري کي ڪو به فائدو ڪونه ٿيندو، پهرين ڳالهه هي آهي ته هاري جو رڳو نالو استعمال ٿيو آهي، پر هاري ڪو به پئڪيج ڪونهي جيڪڏهن انهن 5 هزار روپيا في ايڪڙ جي اعلان ۾ اهو واضح ڪيو وڃي ها ته انهي رقم جو 50 سيڪڙو يعني 2500 روپيا هاري کي 2500 زميندار کي ملندا تڏهن به هاري کي گهٽ ۾ گهٽ 14 ايڪڙن تي 10 هزار روپيا ملي وڃن ٿا. پئڪيج ۾ اهڙو ڪو به ذڪر ڪونهي. پئڪيج زرعي سڌارا ته پري جي ڳالهه پر ٽيننسي ايڪٽ (هاري وارو قانون) ۾ ڪو هارين جي هارپ جو تحفظ ڪيو وڃي ته جيئن هاري بيدخلي کان ته بچي پون ها. هتي ته زميندار جڏهن چاهي هاري کي بنا ڪنهن نوٽيس ڏيڻ جي هارپي کان جواب ڏئي بيدخل ڪريو ڇڏي، هاري انهي لاءِ رڳو ٽيننسي ٽربيونل ۾ وڃي سگهي ٿو، جيڪو پڻ زميندار جي اثر هيٺ آهي. هونئن ته ملڪ ۾ عدليه ۽ انتظاميا کي ڌار ڪري عدالتي اختيار عدالتن جي حوالي ڪيا ويا، پر ٽيننسي ٽربيونل جو سربراهه اي سي آهي، يعني روينيو انتظاميا جو ڪامورو هارين کي اهو حق به حاصل ناهي ته هو پنهنجي بيدخل يا حساب ڪتاب نه ٿيڻ جو ڪيس ڪنهن سول عدالت ۾ کڻي وڃي سگهي. انهي لاءِ ڪنهن  قانونسازي جو ذڪر به پئڪيج ۾ ناهي، انهي لاءِ اهي 5 هزار روپيا في ايڪڙ جي حساب سان رقم سياسي رشوت طور ئي ورهائي سگهبي، جيڪڏهن سرڪار کي اهو احساس هيو ته هارين ۽ ننڍن آبادگارن کي فصلن جون صحيح قيمتون نه ملڻ سبب نقصان رسيو آهي ته پوءِ سرڪار کي فصلن جي امدادي قيمت ۾ مهانگائي جي حساب سان اضافو ڪرڻ ۽ انهي کي يقيني بنائڻ جي ضرورت هئي ته هارين ۽ آبادگارن خاص طور تي ننڍن آبادگارن کان فصلن جي خريداري امدادي قيمت مطابق ٿيڻ گهرجي. امدادي قيمت مطابق خريداري نه ٿيڻ جي صورت ۾ رياست جي ذميواري هجي ته انهي جا ادارا هارين کان پاڻ فصل خريد ڪن.

پئڪيج ۾ انشورنس جو ذڪر به ڀوڳ جهڙو آهي، زرعي قرضن جي انشورنس جو ذڪر آهي، جنهن مان بينڪن کي فائدو ٿيندو هارين ۽ آبادگارن کي تڏهن فائدو ٿئي ها جڏهن انهن جي فصلن جي انشورنس ڪئي وڃي ها، جنهن فصلن کي نقصان ٿيڻ ۽ صحيح قيمت نه ملڻ سبب آبادگارن ۽ هارين جي نقصان جو پورائو انشورنس مان ٿئي ها. هاري جيڪي لنڊيون لتاڙي زمين آباد ڪن ٿا، انهن جي صحت جي انشورنس ٿئي ها، جنهن مان کين لاڀ حاصل ٿئي ها.

هارين کي ته ان صورت ۾ فائدو حاصل ٿي سگهي ٿو، جڏهن زرعي سڌارا ڪري وڏيون زمينداريون ختم ڪيون وڃن ۽ هارين کي پوکي لاءِ ۽ گهر اڏڻ لاءِ مفت زمين ڏئي انهي لاءِ زرعي قرض ۽ مشينري فراهم ڪئي وڃي. باقي زرعي قرضن توڙي مشينري ٽئڪس ڇوٽ مان هارين کي ڪوبه لاڀ حاصل نه ٿيندو. انهيءَ پئڪيج کي ڏٺو وڃي ته اهو پئڪيج ننڍن آبادگارن، خاص طور سنڌ جي ننڍن آبادگارن کي به گهٽ فائدو ڏيندو. سنڌ جو آبادگار ته ڪمند جي صحيح قيمت نه ملڻ ۽ پوءِ هاڻ وري ڦٽين ۽ سارين جي پڻ صحيح قيمت نه ملڻ سبب ڪنگال بڻجي ويو آهي. انهيءِ لاءِ ضروري آهي ته اهڙي پئڪيج جي شروع ڪرڻ کان اڳ هاري ۽ آبادگارن جي نمائندن سان گڏجاڻيون ڪري انهيءَ لاءِ انهن کان تجويزون ورتيون وڃن. سولر ٽيوب ويلن لاءِ قرض سٺو عمل آهي، پر سنڌ ۾ جر جو پاڻي مٺو ناهي، انهي لاءِ پڇڙي تائين پاڻي پهچائڻ ۽ پاڻي جي زيان کي روڪڻ جي ضرورت آهي. پ پ پ ۽ تحريڪ انصاف تنقيد ڪرڻ بجاءِ بهتر ٿيندو ته پنهنجن پنهنجن صوبن ۾ زرعي پاليسي جوڙين، سنڌ حڪومت بينظير پئڪيج تحت هاري ۽ هارياڻين ۾ زمين ورهائڻ واري ٽئين مرحلي جي شروعات ڪري ۽ ٽيننسي ايڪٽ ۾ 2013ع ۾ ڪيل هاري دشمن ترميمن جنهن ۾ ڇيڙبيگار کي قانون بنايو ويو ۽ زرعي مشينري ذريعي پوکي راهي ۾ هارين تي جيڪو اڌ خرچ رکيل هيو، اهو سڄو خرچ هاري تي وڌو ويو، اهو واپس ورتو وڃي ۽ ٽيننسي ايڪٽ ۾ هاري دوست ترميمون ڪري ٽيننسي ٽربيونل سول عدالت جي نگراني ۾ جوڙي وڃي. هارين جا نالا 6 فارم ۾ داخل نه ڪندڙ روينيو کاتي جي اهلڪارن کي انهي جو ذميوار بڻايو وڃي.

ڪچي جي زمين وڏن زميندارن کان خالي ڪرائي اتي رهندڙ هارين کي ٻيلا پوکڻ جي شرط تي زمين فراهم ڪئي وڃي، پاڻي جي شيئرلسٽ ۾ هارين جا نالا شامل ڪيا وڃن. پڇڙي تائين پاڻي نه پهچائڻ کي سزا جوڳو ڏوهه قرار ڏئي اهڙن آبپاشي عملدارن کي سزا ڏني وڃي، جيڪي پڇڙي تائين پاڻي پهچائڻ ۾ ناڪام ٿين ٿا. هارين ۽ هارياڻين کي ننڍا قرض ڏئي کين زميندارن جو ڳيجهو ٿيڻ کان بچايو وڃي ۽ هارين ۽ هارياڻين کي مال خريد ڪرڻ ۽ پالڻ لاءِ ننڍا قرض ڏنا وڃن. هارين جي ٻارن کي تعليم حاصل ڪرڻ لاءِ خاص اسڪالرشپس ڏنيون وڃن. گهٽ ۾ گهٽ ذوالفقار علي ڀٽي جي 1977ع جي زرعي سڌارن تي عمل ڪيو وڃي. زرعي فصلن ۽ هارين جي انشورنس ڪئي وڃي.باقي اجائي تنقيد مان ڪجهه ڪين ورندو. 18 ترميم کان پوءِ زرعي پاليسي ڏيڻ وفاقي حڪومت جو نه پر صوبائي حڪومت جو ڪم آهي.

 

شام جا پناهگ:Syrian Refugees! : وينگ

انسانن انسانيت کي وساري ڇڏيو يا وري انسانيت ڪيڏانهن هلي وئي آهي جو ڪنهن جي دل ۾ شام جي عوام لاءِ تڪليف ناهي. عيد ڏهاڙن دوران مان مسلسل ميڊيا ۽ خاص طور تي مسلم ملڪن کي ڏسندي رهيس ته ڪير ٿو شام جي بي گهر ٿيندڙ عوام لاءِ آواز اُٿاري.

ائين بلڪل ناهي جو ڪنهن آواز نه اُٿاريو، ها! پوپ فرانسس شام جي عوام لاءِ آواز به اُٿاريو ته انهن کي شيلٽر ڏيڻ جي ڳالهه به ڪئي. پوپ فرانسس جو آواز شام جي عوام لاءِ ٻڌندي خوشي ٿي ته دنيا جي سيني تي اڄ به همدرداڻو آواز موجود آهي.

پوپ فرانسس شام جي عوام لاءِ هر وقت آواز اُٿاريندو رهيو آهي، هڪ ڏکئي ۽ مشڪل گهڙين ۾ پوپ فرانسس همدردي جو هٿ اڳيان ڪندي انسانيت کي زنده رکيو آهي. پوپ فرانسس جي هتي ڳالهه ان ڪري ڪئي پئي وڃي ته پوپ فرانسس مذهبي اڳواڻ آهي، ان جي باوجود به فرانسس شام جي عوام لاءِ آواز اُٿاريو ۽ دنيا جي ستل دلين کي جهنجهوڙيو.

جيتوڻيڪ شام کي ڇڏي ايندڙ عوام کي يورپ جا ڪجهه ملڪ ۽ خاص طور تي آمريڪا پنهنجي ملڪ ۾ خوش آمديد ڪري رهيا آهن.

شام جا زخم ڪنهن ٻاهرين قوت طرفان لڳل ناهن، پر شام کي درد ڏيندڙ پنهنجا ئي حڪمران آهن، يقينن شام جي خلاف اهي ملڪ جيڪي مسلم ملڪن ۾ سني اڪثريت رکن ٿا، انهن جي اڻ سڌي يا سڌي مداخلت ضرور آهي ته جيئن هو پنهنجي حڪمراني مڊل ايسٽ تي قائم رکن، پر اهو ڪٿان جو انصاف آهي ته جڏهن شام جو عوام بشار الاسد کي حڪمراني ڪندي نه ٿو ڏسڻ چاهي، پوءِ ڪهڙي سبب بشار الاسد ڪرسي تي ويٺل آهي؟ ايترو ئي نه پر بشار الاسد جي جنهن انداز سان روس ۽ ايران مدد ڪن پيا، ان کي ڪنهن به حوالي سان نظرانداز نٿو ڪري سگهجي. بشار الاسد، ضد ڪري حڪمراني ڪري رهيو آهي، جيڪڏهن ان کي آمريت چئجي ته گهٽ ناهي، ڇاڪاڻ جو شام پوري طرح تباهه ٿئي پيو نه صرف ايترو پر ان سان گڏوگڏ عوام جي وڌندڙ لڏپلاڻ جو عمل ڳڻتي جوڳو آهي.

پنهنجو ملڪ هوندي جلاوطن ٿيڻو پيو، پنهنجو گهر هوندي بي گهر ٿي، ڌاري سرحد آڏو گذارشون ڪرڻيون پون ٿيون ته انهن کي شيلٽر ڏنو وڃي. حيرت ان ڳالهه جي آهي ته جڏهن فلسطين ۽ اسرائيل مسئلو ڪجهه ڏينهن لاءِ اُٿندو آهي ته پوري دنيا خاص طور تي مسلم ملڪن ۾ انسانيت جو ڊرم وڄڻ لڳندا آهن ۽ لانگ مارچ ڪري انسانيت جا سبق پڙهڻ کان وٺي لوڪل پريس ڪلب آڏو احتجاج ڪرڻ سان گڏ فنڊز جمع ڪيا ويندا آهن.

پر شام جي مسئلي تي مسلم ملڪن جا انسانيت جي حوالي سان ٺيڪدار ۽ حڪمران خاموش ڇو آهن؟

ڇا خاموشي ان ڪري ئي آهي جو خود سني اڪثريت رکندڙ مسلم ملڪ ۽ ان سان گڏ بشار الاسد کي ساٿ ڏيندڙ مسلم ملڪ ان سڄي تباهي ۾ شامل آهن؟ شام ۾ دهشتگرد گروپ داعش جي دهشتگردي تي به خاموشي آهي.

داعش جي خلاف آمريڪا ۽ ان جا اتحادي ڪردار ادا ڪن پيا، هتي شام جو هڪ ڀيرو ٻيهر ذڪر ڪرڻ جو مقصد آهي ته شام جي مسئلي تي ٻٽا معيار ڇو آهن؟

شام جي عوام کي مدد جي ضرورت ناهي، جڏهن عيد تي قيمتي جانور خريد ڪري قربانيون ڪيون ويون ۽ انهن جانورن سان فوٽو ڪڍرايا ويا. ان وقت جڏهن شام مان بي گهر ٿيندڙ معصوم زندگين کي مدد جي ضرورت هئي.

انهن جي لاءِ فنڊز گڏ ڪري شام جي ريفيوجيز جي مدد ڪئي وڃي ها ته ڇا اها بهترين قرباني نه هجي ها؟

ايترو ئي نه پر ميڊيا به شام جي عوام کي نه ڏيکاريو ها! هتي اسرائيل ۽ فلسطين جي ويڙهه هجي ها، جنهن جا ڪيترائي سبب هوندا آهن، اتي ميڊيا جي اک مسلسل فلسطين جي هڪ خبر کي هلائيندي رهندي آهي ۽ شام تباهه ٿي رهيو آهي، شامي گهر جي ڇانوَ لاءِ دربدر ٿيندا پيا وڃن ته اتي سڀني جي اکين تي پٽيون ٻڌل آهن، ڄڻ شام ۾ ڪجهه ٿئي ئي نه پيو، وري به شام جي ريفيوجيز لاءِ پوپ فرانسس، آمريڪا ۽ يورپ جا ڪجهه ملڪ مدد جي لاءِ هٿ اڳيان ڪن پيا. انسانيت انهن وٽ زنده آهي پر عيد جي ڏهاڙي تي پنهنجن خوشين کي ملهايو ويو ۽ شام جي عوام جي درد ۽ دانهن کي ڪنهن به نه ٻڌو…..!

شام جي عوام هن ڀيري ڪيئن عيد ڪئي هوندي؟ ان جي لاءِ لکڻ جي ڪا به گنجائش ناهي، ڇاڪاڻ جو جتي غم ۽ ماتم هجي، اتي خوشيون رُسي وينديون آهن.

هڪ ڳالهه واضح ٿي وئي ته مسلم ملڪن ۾ جتي حڪمران انسانيت جي لاءِ وڏي دعويٰ ڪندا رهن ٿا، انهن طرفان شام جي عوام لاءِ رتي برابر به مدد نه ڪئي وئي، گهٽ ۾ گهٽ ايترو واضح ٿي ويو ته انسانيت تي به اهي حڪمران سياست کيڏيندا آهن، جڏهن پنهنجا مفاد هجن ۽ عوام کي گمراهه ڪرڻو هجي ته لانگ مارچ ڪڍي ويندي ۽ جڏهن پنهنجا مفاد پورا نه ٿين پر حقيقت ۾ ڪنهن جي مدد ڪرڻي هجي، ان وقت چپ جو روزو رکيو ويندو، ائين محسوس ڪرايو ويندو جو انهن جو ڪو واسطو ئي ناهي.

شام ۾ تباهي ۽ عوام جي درد تي ڪيترائي چهرا وائکا ٿي آيا آهن، تڪليف ۽ ڏک ۾ ڪير توهان کي ياد ڪري پنهنجو هٿ اڳيان ڪندي توهان کي پنهنجي ڀر ۾ ويهاري ته اهو عمل انسانيت جو عظيم يا کڻي اهو لکڻ ڏيو ان کي ئي انسانيت چئبو آهي. ها! پوپ فرانسس، اهو ثابت ڪري ڏيکاريو ته جن ملڪن شام جي عوام کي پناهه ڏني آهي، انهن کي خود شام جو عوام ڪيئن ٿو وساري سگهي! يقينن انهن جون اکيون شاهد آهن ته انهن جي ڏکئي وقت مدد ڪرڻ ۽ آواز ڪنهن اُٿاريو.

مسلم ملڪن جن شام جي بي گهر ٿيندڙ عوام جي مدد نه ڪئي ۽ نه ئي ان کي جهٽ گهڙيءَ لاءِ ياد ڪيو اهو به سڀ دنيا جي اکين ڏسي ورتو ته ڪير ڪيترو انسانيت جو رکوالو آهي!

عيد ۽ مشڪل ڏينهن گذري ويندا، ڪڏهن به سڀ ڪجهه هڪ جهڙو رهندو ناهي پر رويا ۽ عمل پنهنجي ڇاپ ڇڏي ويندا آهن، اهو توهان تي منحصر آهي ته توهان ڪهڙا ڇاپ ڇڏيو ٿا.

شامين جي دل ۽ روح تي هينئر ڪيترن ئي ڇاپ ڇڏيا آهن، انهن کي اهي ڪيئن وساري سگهن ٿا؟

شامين کي روڪڻ لاءِ هنگري حڪومت لوهي سيخن سان سرحد کي بند ڪري ڇڏيو آهي ڇا هنگري حڪومت جي ان عمل کي شام جو عوام ڪڏهن به وساري سگهندو؟ شايد ان جي حڪومت جو ڏنل اهو گهاءُ شام جي هر پيڙهي ياد رکندي.

ڳالهه زخم جي هجي ته ان تي مرهم رکجي پر هتي روح ۽ دل تي لڳل ڇاپ جي آهي، جنهن کي وسارجي به ته ڪيئن؟

شام جي ريفيوجيز کي جتي مسلم ملڪن وساري ڇڏيو، اتي پوپ فرانسس پنهنجي همدرداڻي آواز ذريعي ياد ڪري انسانيت کي زنده رکيو. شام جو عوام جيڪي هر سرحد کان ٻئي سرحد تائين پيڙاهه سان سفر ڪري رهيا آهن، انهن جي لاءِ پوپ فرانسس جو آواز درد تي مرهم جو ڪم ڪندو. آخر ۾ مون کي صرف هڪ سٽ ياد اچي ٿي ته ”اسان جي درد تي ڪنهن مرهم رکيو اهو به ياد رکجو!“

 

قرباني جي کلن جو معاملو ۽ حڪومتي قدم…..

هن ڀيري وفاقي توڙي صوبائي سطح تي قرباني جي کلن کي گڏ ڪرڻ واري سنگين مسئلي جو نوٽيس ورتو ويو ۽ انهن تنظيمن تي ڪڙي نظر رکي وئي، جن زبردستي قربانيءَ جون کلون گڏ ڪيون يا ماضيءَ ۾ هُو ان سلسلي ۾ ڌمڪين ۽ دهمانن وسيلي قرباني ڪندڙ ماڻهن کي يرغمال بڻائينديون رهيون. هن ڀيري عيدالاضحيٰ جي موقعي تي انهن تنظيمن تي پابندي لڳائي وئي، جيڪي قرباني جي کلن جي عطيي کي دهشتگردي ۽ فرقيواريت لاءِ استعمال ڪنديون رهيون آهن، سڄي ملڪ ۾ قومي ايڪشن پلان تحت اهو فيصلو ڪيو ويو ته ڪنهن به تنظيم کي زبردستي قربانيءَ جون کلون گڏ ڪرڻ نه ڏنيون وينديون ۽ انهيءَ سلسلي ۾ سمورن ضلعن جي ڊي سيز ۽ ٻين عملدارن کي خاص هدايتون به جاري ڪيون ويون، جنهن بعد قلم 144 لاڳو ڪيو ويو ۽ زبردستي کلون گڏ ڪندڙ تنظيمي ماڻهن کي گرفتار به ڪيو ويو. نتيجي ۾ ايم ڪيو ايم ڪراچي ۾ رينجرز جي ڪارروائين سبب قرباني جون کلون گڏ ڪرڻ جو عمل معطل ڪرڻ جو اعلان ڪري ڇڏيو، متحده جي مرڪزي اڳواڻ ڊاڪٽر فاروق ستار جو پريس ڪانفرنس دوران چوڻ هو ته رينجرز سندس جماعت پاران گڏ ڪيل کلن جي ٽرڪن کي پنهنجي تحويل ۾ وٺي ڇڏيو، ان ڪري هو مجبور ٿي خدمت خلق فائونڊيشن لاءِ کلون گڏ ڪرڻ جو آپريشن بند ڪري رهيا آهن. هن ان ڳالهه کي به رد ڪيو ته متحده جا ڪارڪن جبري طور تي کلون گڏ ڪري رهيا هئا. هئڻ ته ائين کپي ته قرباني جون کلون مستحق ۽ غريب طبقي سان تعلق رکندڙ ماڻهن کي ڏنيون وڃن، جيڪي ان جا حقيقي حقدار آهن، ڇوته قرباني صرف گوشت جي ناهي هوندي، جانور جي وار کان وٺي هر عضوو قرباني جي عمل ۾ شمار ٿئي ٿو، ان ڪري قربان ٿيندڙ جانور جي کل به انهيءَ مستحق ماڻهوءَ کي ملڻ گهرجي، جيڪو ان جو اصل حقدار هجي. معاشري ۾ ان ڳالهه کي به اجاگر ڪرڻ گهرجي ته قرباني جون کلون غريب ۽ بي پهچ ماڻهن کي ملڻ سان ان مان ملندڙ آمدني کي دهشتگرد پنهنجو معاشي ذريعو بڻائي نه سگهندا. حج دوران حاجي سڳورا ۽ انهن سان گڏ دنيا جي مختلف ملڪن ۾ ڪروڙين مسلمان جانور قربان ڪندا آهن، اهو مسلمانن جو اهڙو مذهبي فرض آهي، جيڪو نه رڳو اسان کي روحاني طور سرشار ڪري ٿو، پر اسان جي معاشري ۾ پيار، محبت ۽ ڀائيچاري کي به جنم ڏئي ٿو، حضرت ابراهيم عليه السلام جي قرباني جو مقصد الله پاڪ جي خوشنودي حاصل ڪرڻ هو، اسان جو به اهو ئي مقصد هجڻ گهرجي. اها حقيقت آهي ته موجوده حڪومت ملڪ ۾ امن امان جي قيام لاءِ جيڪي قدم کنيا آهن، انهن جو مثبت نتيجو ملي رهيو آهي، ان سان گڏوگڏ سرڪاري ادارن ۾ بدعنوانين کي ٻُنجو ڏيڻ لاءِ به بهتر قدم کنيا پيا وڃن، پر رڳو حڪومتي سطح تي ٿيندڙ فيصلا ڪافي ناهن، پر حڪومت سان گڏوگڏ ميڊيا، سماجي تنظيمن، عالمن، مقامي سطح تي چونڊجندڙ نمائندن توڙي هر مڪتب فڪر جي ماڻهن کي سماجي سڌارن لاءِ اجتماعي ڪردار ادا ڪرڻو پوندو. قربانيءَ جون کلون اصل حقدارن تائين پهچائڻ لاءِ حڪومتي قدمن کي ڪامياب بڻائڻ جي ذميوارين ۾ شهرين جو فرض به شامل آهي ته هو ان حوالي سان اڳڀرا ٿين، ڇوته انسانيت جي فلاح لاءِ هر شخص کي پنهنجي سوچ کي مثبت بڻائڻو پوندو ۽ پنهنجي من ۾ نيڪ ارادن لاءِ اهڙي قوت پيدا ڪرڻي پوندي، جيڪا درست فيصلو ڪرڻ جي ضامن بڻجي سگهي، هر انسان کي پنهنجا ذاتي مفاد اجتماعي مفادن کي هٿي ڏيڻ لاءِ قربان ڪرڻا پوندا، انصاف جي سائميءَ کي متوازن رکڻ لاءِ پنهنجي نفس جي انهن خواهشن کي مارڻو پوندو، جيڪي انساني حقن جون قاتل بڻجن ٿيون.