تازيون خبرون

Daily Archives: September 17, 2015

نيب جون پشاور ۾ ڪارروائيون،ڳوڻي سيڪريٽري ۽ 4 حاضر سروس آفيسر گرفتار

پشاور (بيورو) قومي احتساب بيورو نيب، پشاور ۾ ڪارروائي ڪري ڪرپشن جي الزام هيٺ اڳوڻي سيڪريٽري ۽ 4 حاضر سروس آفيسرن کي گرفتار ڪري ورتو آهي، جن تي قومي خزاني کي اربين رپيا نقصان پهچائڻ جو الزام آهي. نيب ڪي پي ڪي پاران جاري ڪيل پڌرائي موجب، پشاور ۾ ڪارروائي ڪري پورهئي کاتي جي اڳوڻي سيڪريٽري اعزاز الرحمان ۽ حاضر سروس چئن آفيسرن کي گرفتار ڪيو ويو. نيب ترجمان موجب، گرفتار جوابدارن ۾ 20 هين گريڊ جو آفيسر ۽ پورهي کاتي جو اڳوڻو سيڪريٽري اعزاز الرحمان به شامل آهي، جيڪو ورڪر ويلفيئر بورڊ جو چيئرمين به رهي چڪو آهي. نيب ترجمان موجب ڊائريڪٽر فنانس ورڪر ويلفيئر بورڊ ابرار حسين، ڊائريڪٽر فنانس پراونشل هائوسنگ سوسائٽي اٿارٽي عمران خان وزيرن کي به گرفتار ڪيو ويو آهي، عمران وزير فنانس ڊائريڪٽر به رهي چڪو آهي. نيب ترجمان جو چوڻ آهي ته ڪانٽريڪٽر محمد اڪبر، اڳوڻي ڊائريڪٽر ورڪر ويلفيئر بورڊ عرفان قريشي کي به حراست ۾ ورتو ويو آهي، سمورن آفيسرن تي ورڪر ويلفيئر بورڊ جي سامان جي خريداري ۾ ساڍا 3 ارب رپين جي ڪرپشن جو الزام آهي. نيب ترجمان موجب، سمورن آفيسرن کي پيش ڪري احتساب عدالت مان رمانڊ به وٺي ڇڏيو آهي.

 

تنيشا مکرجي ايندڙ فلم ۾ مسلمان عورت جو ڪردار ادا ڪندي

ممبئي (شوبز نيوز)بالي ووڊ اداڪاره تنيشا مکرجي پنهنجي ايندڙ فلم ۾ مسلمان عورت جو ڪردار ادا ڪندي. ڀارتي سڌ سماءَ جي ذريعن مطابق هدايتڪار ايشور گونتورو جي نئين فلم ايڪشن ٿرلر آهي جنهن ۾ تنيشا هڪ مسلمان عورت جو ڪردار ادا ڪندي. هوءَ فلم جي شوٽنگ لاءِ 18 سيپٽمبر تي آمريڪا رواني ٿيندي. هن خبرن جي تصديق ڪندي چيو آهي ته ان فلم ۾ هوءَ مسلمان عورت جو مرڪزي ڪردار ادا ڪري رهي آهي. هن چيو ته فلم جي ڪاسٽ ۾ آمريڪا جا اداڪار به شامل آهن. واضح رهي ته تنيشا سماجي ڪارڪن انا هزاري جي زندگي تي ٺهندڙ فلم جي شوٽنگ ۾ مصروف آهي جنهن ۾ هوءَ صحافڻ جو ڪردار نڀائيندي. ا

 

سلمان خان جي فلم ”هيرو“ جا ٽوئٽر تي چرچا

ممبئي (شوبز نيوز) بالي ووڊ جي نئين فلم ”هيرو“ جي ڪاميابي جي سماجي رابطن واري ويب سائيٽ ٽوئٽر تي تمام گهڻي ساراهه ڪئي پئي وڃي. ڀارتي سڌ سماءَ وارن ذريعن موجب سلمان خان جي پروڊڪشن ۾ ٺهندڙ فلم ”هيرو“ گذريل جمعي تي رليز ٿي جنهن ۾ ٻن نوجوان فنڪارن سورج پنچولي ۽ اٿيا شيٺي فلم نگري ۾ قدم رکيو. ان نئين جوڙي جي فلم رليز جي افتتاحي ڏينهن ۾ باڪس آفيس تي سٺو بزنس ڪيو، جيڪو توقع کان وڌيڪ هو. فلم جي سماجي رابطن واري ويب سائيٽ تي هدايتڪارن، پروڊيوسرن، اداڪارن ۽ وڏي انگ ۾ مداحن ساراهه ڪئي ۽ اهو سلسلو جاري آهي.

 

زمبابوي ۽ انگلينڊ خلاف قومي ٽيم ۽ انگلينڊ خلاف ٻن پريڪٽس ميچن لاءِ قومي اي ٽيم جو اعلان

لاهور(اسپورٽس نيوز)قومي سليڪشن ڪميٽي زمبابوي ۽ انگلينڊ خلاف قومي ڪرڪيٽ ٽيم ۽ انگلينڊ خلاف ٻن پريڪٽس ميچن لاءِ قومي اي ڪرڪيٽ ٽيم جو اعلان ڪري ڇڏيو. مصباح الحق کي ٽيسٽ ٽيم، اظهر علي کي ون ڊي ٽيم ۽ شاهد آفريدي کي ٽي-20 جو ڪپتان برقرا رکيو ويو آهي. سليڪشن ڪميٽي چيف سليڪٽر هارون الرشيد جي سربراهي ۾ ٽنهي فارميٽ جي ڪپتانن سان مشاورت ۽ پاڪستان ڪرڪيٽ بورڊ جي چيئرمين جي منظوري بعد زمبابوي خلاف 15 رڪني ون ڊي ۽ 15 رڪني ٽي-20، انگلينڊ خلاف 15 رڪني ٽيسٽ ٽيم ۽ 14 رڪني اي ٽيم جو اعلان ڪيو. ٽي-20 اسڪواڊ ۾ عامر يامين ۽ عمران جونيئر پهريون ڀيرو پاڪستان جي نمائندگي ڪندو جڏهن ته وڪيٽ ڪيپر سرفراز احمد حج جي ادائيگي ۽ انور علي ان فٽ هئڻ سبب ٽي-20 اسڪواڊ جو حصو نه بڻجي سگهيو . زمبابوي خلاف اعلانيل 15 رڪني ٽي-20 ٽيم ۾ محمد حفيظ، احمد شهزاد، مختار احمد، عمر اڪمل، صهيب مقصود، شعيب ملڪ، ڪپتان شآهد آفريدي، عامر يامين، محمد عرفان، بلال آصف، وهاب رياض، عماد وسيم، سهيل تنوير، محمد رضوان(وڪيٽ ڪيپر)، عمران خان جونيئر، زمبابوي خلاف 15 رڪني ون ڊي اسڪواڊ ۾ محمد حفيظ، احمد شهزاد، اظهر علي(ڪپتان)، صهيب مقصود، شعيب ملڪ، بابر اعظم، سرفراز احمد(وڪيٽ ڪيپر)، محمد رضوان، عماد وسيم، انور علي، وهاب رياض، ياسر شاهه، راحت علي، محمد عرفان، اسد شفيق شامل آهن. زمبابوي جي دوري لاءِ اعلانيل ٽيم مينيجمنٽ ۾ مينيجر نويد اڪرم چيمه، هيڊ ڪوچ، وقار يونس، اسپين بولنگ ڪوچ مشتاق احمد، بيٽنگ ڪوچ گرانٽ فلاور، فيلڊنگ ڪوچ ڪم ٽرينر گرانٽ لوڊن، فزيو ٿراپسٽ ڊاڪٽر سهيل سليم، اسسٽنٽ مينيجر ڪم ڪوچ شاهد اسلم، سيڪيورٽي مينيجر اظهار عارف، ڪرڪيٽ اينالسٽ طلحه بٽ ۽ مساجر ملنگ علي شامل آهن. انگلينڊ خلاف يو اي اي ۾ ٿيندڙ هوم سيريز لاءِ اعلانيل 15 رڪني ٽيسٽ ٽيم ۾ احمد شهزاد،شان مسعود، اظهر علي، محمد حفيظ، فواد عالم، اسد شفيق، ڪپتان مصباح الحق، يونس خان، وڪيٽ ڪيپر سرفراز احمد، ياسر شاهه، ذوالفقار بابر، وهاب رياض، عمران خان، راحت علي ۽ جنيد خان شامل آهن. انگلينڊ خلاف ٻن پريڪٽس ميچن لاءِ اعلانيل 14 رڪني اي ٽيم ۾ سميع اسلم، خرم منظور، فواد عالم، عمر امين، علي اسد، افتخار احمد، عثمان صلاح الدين، وڪيٽ ڪيپر عدنان اڪمل، محد اصفر، ظفر گوهر، ڪپتان جنيد خان، احسان عادل، ضياءُ الحق ۽ امير حمزه شامل آهن.ا

 

 

پاڪستان خلاف سيريز ۽ ٽي ٽوئنٽي ورلڊڪپ، جئه ورڌني ۽ ڪالنگ ووڊ جي انگلينڊ ڪوچنگ اسٽاف ۾ شموليت

لنڊن (اسپورٽس نيوز) انگلينڊ پاڪستان خلاف شيڊول ٽيسٽ، ون ڊي ۽ ٽي ٽوئنٽي سيريز ۽ آءِ سي سي ٽي ٽوئنٽي ورلڊڪپ جي تيارين جي سلسلي ۾ مهيلا جئه ورڌني ۽ پال ڪالنگ ووڊ جون ڪوچنگ اسٽاف ۾ خدمتون حاصل ڪري ورتيونآهن. ٻنهي پليئرن جي تقرري سان انگلينڊ ڪوچنگ اسٽاف کي تقويت ملي آهي. جئه ورڌني ٽيسٽ جڏهن ته ڪالنگ ووڊ ون ڊي سيريز لاءِ انگلش پليئرز جي رهنمائي ڪندا. 2012ع ۾ متحده عرب امارات ۾ پاڪستان ۽ انگلينڊ وچ ۾ کيڏيل سيريز م انگلش بيٽسمين کي اسپنرز کي کيڏڻ ۾ مشڪلاتن کي منهن ڏسڻو پئجي ويو هو. انگلش ٽيم 6 اننگز ۾ رڳو هڪ ڀيرو 300 رنسن تان ڪاميابي حاصل ڪئي هئي. جڏهن ته هڪ ميچ ۾ 145 رنسن جي هدف ڏنو ۽ انگليش ٽيم 72 رنسن تي ڍير ٿي وئي هئي.

 

اميدن جي ڏارن تي ٽهڪ ٽڙن ٿا!:خالد ٻانڀڻ

ڪيترائي ڏينهن گذري ويا آهن، دل جي ڳالهه ڪرڻ ئي ڇڏي ڏني آهي، حالت ڪجهه اهڙي آهي جو پنهنجو پاڻ کان به وسري ويا آهيون. زمانو ڀلي وساري ڇڏي پر هڪ تون نه وسارين ته بهتر ٿيندو. اهڙيون ڳالهيون اهڙا جملا ٻڌي ٻڌي ڪڏهن دل کٽي ٿي ويندي آهي. کٽا ته پاڻ اڳ ئي هن سماج ۾ آهيون، ڇو ته جيڪو وهي واپري ۽ اکين جي اڳيان کوڙ اهڙيون اڻ برابريءَ واريون حالتون ڏسي طبيعت ۾کٽاڻ ڀرجي ويندي آهي. شڪارپور واري کٽاڻ نه پر اندر جي ڪيفيت بيچينيءَ جي موسم، اڄڪلهه ڏاڍي رهي ٿي. هونئن به سيپٽمبر جو مهينو موسم جي تبديليءَ وارو ۽ ڏاڍو اداس ڪندڙ هوندو آهي. ٿڌڙين جي موسم اچي پئي، ڪسر سر نسري ويو آهي پر سچو سر جڏهن نسرندو، تڏهن وڃي ساهه جي گهيري ۾ڪي سُڪون گهڙيون اينديون! لطيف سرڪار جو شعر آهي ته،

سر لوهيڙا ڳڀيا، ڪسر نِسريا،

تو ڪيئن وسريا، ڍوليا ڏينهن اچڻ جا.

اسان وٽ هاڻي موسم ۾ جيڪي تبديليون اچن ٿيون يا جن ڪيفيتن سان اونهاري سياري جو فرق محسوس ٿيندو آهي، اسان تن کي ياد رکڻ ڇڏي ڏنو آهي. جُون مهيني ۾ڪنهن انب جي  ڏار تي ويهي ڪوئل ڪوڪ ڪندي هئي ته اسان کي مينهَن جي مند اچڻ جي سڌ پئجي ويندي هئي. سيپٽمبر مهيني ۾جڏهن ڪسر نسرندا آهن ته سچن سرن جي نسرڻ جو اوسيئڙو ٿي پوندو آهي. ڇو ته ڪسر نسرڻ جي ڏهاڙن ۾ گهُٽ واري گرمي وڌي ويندي آهي پر جڏهن سچو سر نِسرندو آهي ته سياري جي آمد ٿي ويندي آهي. هونئن به سيپٽمبر پاڻ کي الاءِ ڇو اداس ڪري ڇڏيندو آهي. من جي بت خاني ۾ پاڻ سان مخاطب ٿيندي به زمانا گذري ويندا آهن. حال جون حقيقتون ڪرڻ لاءِ وقت ئي ڄڻ موڪلائي ويو آهي. هر ڪو ماضي ياد ڪندي ٿڌو شوڪارو ڀريندو آهي. مون سوشل ويب سائيڊ تي هڪ ڦٽل اسڪول جي حالت واري فوٽوءَ مٿان سٽون  پڙهيون ته شاندار ماضي رکندڙ حال ۾ اجڙي ويل. تڏهن اهو محسوس ٿيو ته جتي دنيا روزانو ترقي ڏانهن وڃي ٿي، اتي اسان کنڊرات ڏانهن ڄڻ موٽ پيا کائون!

هن سنڌ جون کوڙ اهڙيون ڳجهڙيون ڳالهيون آهن، جيڪي دل جي ڳالهين وانگر سلي به نٿا سگهون. پنهنجو پاڻ کان خفا ٿي ويل هي جهان، جنهن جو انگ انگ رليءَ وانگر اڊڙي ويو آهي. هر حصي مان غربت، بُک، بدحالي، بيروزگاري، بي حسي ليئا ٿي پائي. هاڻي ته پوپٽن به مکڙين تي ويهڻ ڇڏي ڏنو آهي! ڪوئل به ڄڻ ڏارن کان ڪوڪو ڪرڻ وساري ڇڏيو هجي! تترن جا تکا تيز آواز نٿا اچن، منظرن ۾ رتوڇاڻ ڀرجي وئي آهي! وقت جي گاڏي هڪ طرفي رفتار سان ڊڪندي پئي وڃي ۽ پوئتي ڪيترائي خالي منظر رهجندا پيا وڃن. سُڪون امن واري زيتون جي ٽاري ٿوهر بڻجي ويو آهي. مان مايوس ناهيان، نه وري نااُميد آهيان. هڪ ڏينهن سمورين روشن خيال سوچن تان پردا کڄندا. اميدن جي انڊلٺ ضرور اڀرڻي آهي. قيد جون تنهائيون ختم ٿي وينديون پر اسان پنهنجي حصي جو اهڙي تبديلي لاءِ ڪهڙو ڪردار ادا  ٿا ڪيون؟

ڪڏهن پاڻ تي تنقيد به ٿيڻ گهرجي. کٽ تي آرامي ٿي سمهڻ سان اهو ويهي سوچجي ته سڀ ڪجهه پاڻهي ٺيڪ ٿي ويندو. اهو ڪڏهن ناهي ٿيڻو. ان لاءِ جدوجهد، همت، حوصلي، سهڪار ۽ ساٿ جي ضرورت آهي. ائين جيئن ٻن اکين جي اشارن ۾ هڪ جهڙو قرب گهرجي، نه ته هڪ طرفي اکين جي محبت کوڙ اکيون اجاڙي ڇڏي ٿي. ڇا ڪجي پاڻ سان ڌوڪا نٿا ڪري سگهجن. وقت جي وٿين مان جهاتي پائي ڏسون ٿا ته ڄڻ مڪليءَ جو قبرستان آهي، جتي ڪوئي دعا گهرڻ لاءِ نه پر تفريح لاءِ اچي ٿو. ڌارين حڪمرانن جي اجاڙ، حالتن تي ٽهڪ ڏيون ٿا. ڇو ته ظالم جي قبر تي خير جي دعا ناهي گهربي، ائين جيئن ڪجهه عرصو اڳ اسان جو اسلام آباد وڃڻ ٿيو هو ته فيصل مسجد گهمڻ کانپوءِ جڏهن ضياءَ جي قبر ڏٺي سون ته اتي ڪو ماڻهو ڪونه هو، پر هڪڙو جانور قبر اندر ستو پيو هو، تڏهن ڪا گهڻي حيرت ته ڪونه ٿي پر جنهن ظالم سنڌ جو سماج، ڪلچر تباهه ڪيو، ان جي قبر تي اڄ رڳو جانور آهن، ته اهو سوچڻ، سکڻ ۽ سمجهڻ جو مقام آهي. ماڻهو زماني جو بادشاهه آهي پر جڏهن مٽيءَ ۾ وڃي ملي ٿو، فخر جا سڀ در بند ٿي وڃن ٿا. سائين اياز گل جي غزل جون سٽون آهن ته،

مون کي ماري پناهه ۾ رکجانءِ

ڪا ته نيڪي گناهه ۾ رکجاءِ!

ها بس پٺتي رهجي وڃن ته اهي ڪي نيڪيون، چڱايون هجن، جن جي خوشبوء سان سارو عالم اداسين مان نڪري اچي، روئيندڙ اکين مان ٽهڪن جا ٽانڊاڻ جيڪر ٽمڪن. پروين شاڪر چيو آهي ته،

بهت رويا وه هم کو ياد ڪر ڪي

هماري زندگي برياد ڪر ڪي،

بدن ميرا ڇوا ٿا اس ني ليڪن

گيا روح ڪو آباد ڪر ڪي.

ها ڪڏهن نرم هٿن جا لمس گلابن جي پتين جهڙا لڳندا آهن. رابيلن جي مهڪ کڻي ايندڙ سوچ جي دروازي تي ڪاميابين جي ٺڪ ٺڪ جا آواز ٻڌندا آهيون، تڏهن کوڙ ساريون ڪهاڻيون جنم وٺنديون آهن. بس وقت جي هن وشال آسمان هيٺان ۽ دلين واري ڌرتي جي مٿان سدائين نڪور تجربن ۽ ترقين جا انگور ڦٽندا رهن. سياري جي آمد، ان جي آجيان ۾ اسان اتاولا ٿيندا هون، دکين دلين تي، چهرن تي زماني جي گرمين جا زور ٽُٽڻ شروع ٿي ويا آهن. ڇو ته سيارو سفر ۾ آهي باقي ڪجهه پهچڻ لاءِ پنڌ اٿس، تيستائين مان به قلم بند ڪري ان جو اوهان سان گڏ انتظار ڪيان ٿو.

 

دهشت گرديءَ جي تاريخ:ايف اي گهانگهرو

دهشتگردي ۽ تخريب ڪاري جنهن به ملڪ ۾ بنياد پڪڙي وٺندي آهي اتي وڻ ويڙهي جيان وڌندي ويندي آهي،سالن تائين ڪجهه حالتن ۾ نسلن کي ان جي اثرن جو مقابلوڪرڻوپوندو آهي.ٻي عالمي جنگ جي ختم ٿيڻ بعد اڀرڻ وارين ٻن سپر پاور سڏجندڙ طاقتن سويت يونين ۽ آمريڪا جي مفادن ۽ نظرياتي ٽڪرائن جي نتيجي ۾ شروع ٿيل سرد جنگ جي بهاني ٻنهي طاقتن پنهنجي پنهنجي خفيه ايجنسين کي هر طرح جا هٿيار ڏئي کين تابي مچائڻ جي کلي ڇوٽ ڏئي ڇڏي.آمريڪي سي آءِ اي 1950ع ۾ هڪ نئين شڪل جي صورت ۾ سامهون آئي،جنهن کي عالمي سطح تي آمريڪي مفادن جي تحفظ لاءِ سڀ حدون پار ڪرڻ جو اختيار ملي ويو.سي آئي اي آمريڪي مفادن جو تحفظ ڪرڻ،ضرورت جي وقت جمهوري حڪومتن جو تختو اونڌو ڪرڻ،عوامي اڳواڻن کي قتل ڪرڻ،ترقي ۾ اڳڀرو ٿيندڙ ملڪن ۾ نشي ۽ هٿيارن کي عام ڪرڻ ۾ اهم ڪردار ادا ڪيو ۽ دنيا ۾ رياستي دهشت گردي سان گڏو گڏ مذهبي،نسلي ۽ لساني يا گروهي دهشت گردي ۽ تخريب ڪاري جو ڪڏهن به ختم نه ٿيندڙ هڪ سلسلو شروع ٿي ويو.

جي جاچ ڪندڙ ايجنسي ڪي بي جي(KBJ) جو نيٽ ورڪ وڌ کان وڌ يورپ تائين محدود هيو،ان تي روسي ڪميونسٽ پارٽي جي طرف کان ڪجهه حدون لاڳو هيون جنهن جي ڪري هو عالمي سطح تي سي آئي اي وانگي مڪمل آزاد هجڻ کان مجبور هئي.اوڀر ملڪن ۾ تيل جي ملڻ سان گڏ ئي ان دور جي سپر پاور طاقت سڏجندڙ برطانيه ۽ ان جي ساٿي طاقت آمريڪا ان خطي ۾ سازشن جو ڄار وڇائڻ شروع ڪري ڇڏيو.ان حوالي سان برطانيه اڳيان اڳيان هيو ڇو ته انگريزن کي عالمي حالتن ۽ دنيا جي مختلف خطن جي سياسي،سماجي.مذهبي ۽ جاگرافي ڪيفيتن جو بخوبي اندازو ۽ تجربو هيو جڏهن ته آمريڪي ٻين لفظن ۾ سيکڙاٽ هيا.اهائي وجه هئي جو برطانيه ڊگهي جدوجهد بعد 1948ع ۾ فلسطيني سرزمين جي سيني تي اسرائيل جو جهنڊو لڳايو ۽ ان خطي جي تيل جي حفاظت لاءِ اسرائيل کي چوڪيداريءَ جي ذميواري ڏني وئي تنهن بعد دنيا ڄاڻي ٿي ته ان خطي ۾ بي گناهه فلسطينين ۽ ان جي هر طرف جي علائقن ۾ اسرائيل جي مذهبي جنونيت ۽ دهشت گرديءَ ڪيترا نقصان ڏنا ۽ اهو سلسلو اڄ به جاري آهي.پاڪستان ۾ دهشت گردي ۽ فرقي واريت جي لهر 1980ع جي ڏهاڪي ۾ افغانستان اندر روسي مداخلت سان گڏ شروع ٿي هئي.ان ۾ صدر ضياءُ الحق جي حڪومت آمريڪين جي گهرج کان وڌيڪ جوش ۽ سرگرمي ڏيکاري.جهادي تنظيمن ۾ شامل ٿيڻ جي خواهشمندن کي تربيت ڏئي افغانستان موڪلڻ جي سلسلي جي ابتدا ٿي.ان سان گڏ تيل پيدا ڪندڙ خليجي ملڪن جي امداد سان پاڪستان ۾ نوجوانن کي جهاد سيکارڻ جي تر غيب ڏيڻ جو سلسلو پڻ شروع ٿيو.

حقيقت ۾ افغانستان ۾ سياسي ڪمزوري،روسي مداخلت ۽ ان جا اصل ٻيا مقصد ڪهڙا هئا ان تي گهٽ ڳالهايو وڃي ٿو،جڏهن ته واقعو اهو آهي ته 1973ع ۾ عربن پاران اسرائيل جي خلاف احتجاج جي جواز ۾ آمريڪا ۽ يورپي ملڪن کي تيل جي فراهمي تي پابندي ۽ ان کان پوءِ ايران ۾ شاهه رضا شاهه پهلوي جي حڪومت خلاف عوام ۾ انتشار پيدا ڪيو پئي ويو مگر شاهه رضا شاهه ايران ۽ آمريڪي حمايت سان پنهنجي طاقت تي پراميد هيو پر ان جي باوجود ايران ۾ شاهه رضا شاهه جي حڪومت خلاف مشڪلات ۾ اضافو پئي ٿيندو ويو.فڪر واري سچائي اها آهي ته 1970 ع جي ڏهاڪي ۾ تيل جي فراهمي تي پابندي جي جهٽڪي کان پوءِ آمريڪا ۽ يورپ عرب ملڪن ۽ ان سان گڏو گڏ جنوبي اولهه ايشيا ۾ نئين جارحيت واري حڪمت عملي اپنائڻ شروع ڪري ورتي ته جيئن آئندهه تيل جي سپلائي ۾ ڪابه رڪاوٽ نه اچي.ان حوالي سان سعودي عرب جي حڪم جاري ڪندڙ شاهه فيصل کي به شهيد ڪيو ويو.1977ع ۾ هڪ طرف گاندهي جي ڪانگريس کي هارايو ويو ۽ ٻئي طرف ان ئي سال پاڪستان جي چونڊيل ذوالفقار علي ڀٽو جي حڪومت جو تختو اونڌو ڪيو ويو.ان ئي سال ايران ۾ عوامي اجتماعن ۽ مظاهرن زور پڪڙڻ شروع ڪيو ۽ ايران جي صورتحال ۽ ان جا اثر خطي ۾ ظاهر ٿيڻ شروع ٿيا.افغانستان ۾ سياسي ڪمزوري عروج تي پهتي ۽ 1978ع ۾ اتي انقلاب اچي ويو جڏهن ته جنوري 1979 ۾ ايران ۾ شاهه جو تختو اونڌو ڪيو ويو ۽ اتي امام خميني جا حامي ڪامياب ٿي ويا.

 

سنڌ جي مرداڻي معاشري جي غيرت جا ٻٽا معيار:ڊاڪٽر عظميٰ جوکيو

عورت هن ڪائنات جي عظيم ۽ قابل احترام تخليق آهي. هي ڪائنات ۾ جيڪڏهن ڪا مقدس جڳهه آهي ته اها جنت آهي. چوندا آهن ته ڪنهن جنت کان پڇيو ته تون اهڙي مقدس جڳهه آهين جنهن کي حاصل ڪرڻ لاءِ سوا لک پيغبرن ۽ دنيا جي هر ماڻهون جي خواهش آهي جنهن تي جنت جواب ڏنو ته آئون اها جنت آهيان جنهن کي الله پاڪ هڪ عورت يعني ”ماءُ“ جي پيرن ۾ رکيو آهي. جنهن سان ظاهر ٿئي ٿو. هي ڪائنات ۽ جنت ماءُ جي نالي تي هڪ عورت جي پيرن ۾ رکي وئي آهي. ان کان وڌيڪ هن دنيا ۾ عورت جي عزت، مان مرتبي ۽ عظمت جو ڪهڙو مثال ڏجي. نياڻي کي رحمت جو درجو مليل آهي. حضور صلي الله عليه وسلم کان اڳ عرب عورت نياڻين کي زحمت سمجهي زنده دفن ڪندا هئا. مگر آقا حضرت محمد صلعم جي اچڻ کانپوءِ صحيح معنيٰ ۾ عورت کي اهو مقام مليو. جيڪو عورت کي خدا پاڪ عطا ڪيو آهي سنڌ جي مرداڻي معاشري ۾ هن وقت به غيرت جا ٻٽا معيار ڏسڻ ۾ اچن ٿا. سنڌ ۾ عورت کي ست قرآنن جو درجو به مليل اهي. سنڌ ۾ عورت لاءِ ايتري عزت ۽ احترام ڏسڻ ۾ ايندو اگر چار پنج خون ٿيل به هجن ته انهن جي بخشرائڻ ۾ اگر عورتون ميڙ جي صورت ۾ متاثر ڌر ڏانهن لنگهي وڃن ٿيون ته غيرت مند سنڌي نياڻين جي ميڙ اچڻ تي انهن کي مان ڏيئي خون به معاف ڪري ڇڏيندا آهن. ٻئي طرف سنڌي مرداڻي معاشري جي غيرت جو ٻٽو معيار هي به آهي ته زمين ۽ ملڪيت حاصل ڪرڻ يا ذات دشمني ۾ سوڀ حاصل ڪرڻ لاءِ سنڌ ۾ عورت جي بلي چڙهائي ويندي آهي. پوءِ اها عورت ڇونه نيڪ نمازي هجي ان تي ڪارنهن جا الزام مڙهي مرد پنهنجي ضرورت ۽ خواهش پوري ڪندو آهي. عجيب ڳالهه مرداڻي معاشري جي غيرت جي به هي آهي ته هو پنهنجي خسيس مفادن جي پورائي لاءِ ۽ ذاتي پلاند طور عورت کي ڪاري ڪري ماري پوءِ معاشري ۾ مڙس ۽ غيرتمند مرد هجڻ جو ثبوت ڏيندو آهي. مرد صرف افواهه، تعاني، ۽ ڪنن ڳالهين ٻڌڻ جي پنهنجي ڀيڻ، ماءُ، ڌيءَ، ڀاڄائي کي بغيرڪنهن تصديق جي بيدردي سان ماري ڪاري ڪندو آهي اهوئي غيرت مند مرد ٻئي ڪنهن جي عزت سان کيڏي پاڻ کي مڙس ماڻهون سمجهندو آهي قرآن پاڪ جي تعليم ۽ حضور پاڪ جي حڪم موجب ته ڌيءَ ۽ ڀيڻ جي شادي ڪرائڻ وقت انهن جي خواهش پڇي وڃي. حديث پاڪ آهي ته هڪ عورت حضور صلعم جي خدمت ۾ پيش ٿي ۽ عرض ڪيو ته منهنجي والدين منهنجي شادي زبردستي منهنجي رضا خوشي کان بغير ڪرائي آهي جنهن تي آقا فرمايو ته توهان چاهيون ته آئون ڪجهه گهڙين ۾ توهان جي شادي ختم ڪرايان ٿو ان تي عورت جواب ڏنو ته بس سائين آئون پنهنجو حق معلوم ڪرڻ آئي آهيان، سنڌ ۾ عورت کي سندس مرضي موجب جيون ساٿي چونڊڻ لاءِ ان جي راءِ به ناهي ورتي ويندي جڏهن ته هن وقت سنڌ ۾ عام طور تي مرد کي حق حاصل آهي ته هو پنهنجي پسند سان شادي ڪري. هاڻي ته سنڌ ۾ هڪ اهڙو ٽرينڊ ٿي ويو آهي جو مذهب مٽرائي زبردستي شادي ڪرائي پوءِ ان شادي کي اسلام جي سوڀ قرار ڏنو پيو وڃي. آئون اهڙن نام نهاد ملن کان سوال ٿي ڪريان ته عورتن جو مذهب صرف شادي لاءِ ڇو مٽرايو پيو وڃي. يعني نفس جي سوڀ لاءِ توهان جشن ملهايو پيا..؟ عملي طور ان وقت مسلمان جشن ملهائڻ جنهن وقت ڪا عورت يا غير مذهب مرد دين اسلام مان مطمئن ٿي مذهب تبديل ڪري ۽ اسلام حاصل ڪري. باقي هندو نياڻين کي اسلام جي آڙ ۾ زبردستي شاديون ڪرائڻ به نه صرف اسلامي تعليمات خلاف بلڪه اسلامي طور تي گناهه به اهي.

سنڌ ۾ هميشه عورتن سان امتياز سلوڪ ڪيو ويندو آهي. اتر سنڌ ۾ زميني پورهيو عورتن کان ورتو ويندو آهي جڏهن ته مرد سڄو سڄو ڏينهن هوٽلن ۾ ويهي پنهنجي مردانگي جا قصا هڪ ٻئي کي ٻڌائيندا آهن.

سنڌ جنهن جي سڃاڻپ عورتن کي عزت ڏيڻ واري آهي. عورتن جي عزت بچائڻ ۽ انهن کي سام طور پناهه ڏيڻ لاءِ سنڌي پنهنجي جان به جوکي ۾ وجهندا آهن پر هن وقت ان صورتحال جي ابتڙ سنڌ ۾ ڪارين جا قبرستان قائم ڪيا ويا آهن. وڏيرن جي محلن ۽ پيرن جي حويلين ۾ ڪارين کي رکيو پيو وڃي. جتي انهن کان غيرانساني ڪم ورتو پيو وڃي، انا ۽ چڱ مڙسي خاطر سنڌ ۾ عورتن جي تذليل ڪئي پئي وڃي. جيڪو عمل حوا جي نياڻين سان هن مرداڻي معاشري ۾ بدنام ڪرڻ برابر آهي. اچو ته سنڌ جي عورت کي جاهلپ ۽ پٿر واري دور مان ٻاهر ڪڍون قرآني تعليمات مطابق ۽ حضور صلعم جي روايات کي برقرار رکندي عورت کي اهو مڪان عزت ۽ اهميت ڏيون جيڪو ٻنهي جهانن جي سردار امان عائشه ۽ بيبي فاطمه جن کي ڏيندا هئا.

 

 

 

اسٽيٽ بئنڪ جي مانيٽرنگ پالسي جو اعلان

پاڪستان جي اسٽيٽ بئنڪ ايندڙ ٻن مهينن لاءِ جنهن مانيٽري پاليسي جو اعلان ڪيو آهي، ان ۾ بنيادي وياج جي شرح 6 سيڪڙو مقرر ڪئي وئي آهي، گذريل 4 ڏهاڪن ۾ هي پهريون ڀيرو آهي ته وياج جي شرح ان گهٽ ترين سطح تي پهتي آهي، اها اميد به ڪئي وئي آهي ته امن امان جي صورتحال ۾ بهتري سميت پاڪ چين اقتصادي لنگهه ٺهڻ سان سيڙپڪاري جو ماحول بهتر ٿيندو، اسٽيٽ بئنڪ اهو به واضح ڪيو آهي ته برآمدات ۽ سيڙپڪاري ۾ اضافو ڪرڻ معيشت لاءِ انتهائي ضروري آهي. رپورٽ ۾ اها پڻ دعويٰ ڪئي وئي آهي ته ملڪ ۾ مهانگائي ۾ گهٽتائي آئي آهي ۽ ان جي شرح گهٽجي ست ڏهائي هڪ تائين پهتي آهي، تنهن هوندي به اهو خدشو آهي ته بجلي تي عوام کي ملندڙ سبسڊي ختم ڪرڻ سان مهانگائي ۾ اضافو ٿيندو ۽ عام واهپي جي شين تي پڻ اثر پوندا، مانيٽري پاليسي ۾ معيشت جا جيڪي ٻيا مثبت پهلو سامهون آيا آهن، تن ۾ چيو ويو آهي ته پرڏيهي ناڻي جي ذخيرن ۾ اضافي وارو رجحان برقرار رهندو، گذريل مهينن ۾ وڏين صنعتن جي پيداوار ۾ ٽي ڏهائي ٽي سيڪڙو اضافو رهيو، ان سان گڏوگڏ اها اميد به ڪئي پئي وڃي ته بجلي ۽ گئس جي فراهمي سان پيداوار ۾ اڃا واڌ ايندي، جڏهن ته وياج جي بنيادي شرح ۾ صنعتڪارن جي توقع کان به گهٽتائي آئي آهي، وياج جي شرح گهٽجڻ سان اسٽاڪ ايڪسچينج ۾ سيڙپڪارن کي فائدو ملندو، صنعتن ۽ عام ماڻهن کي سستي وياج تي قرض ملي سگهندو، ساڳئي وقت بئنڪن جي کاتيدارن جو منافعو به گهٽجي ويندو. هاڻي جيڪڏهن اسٽيٽ بئنڪ پاران وياج جي شرح تمام گهٽ سطح تي پهچائي وئي آهي ته صنعتڪارن لاءِ اهو سنهري موقعو آهي ته هو سيڙپڪاري لاءِ ڀرپور انداز ۾ ميدان تي لهن، ان سان نه رڳو ملڪ ۾ روزگار جا وسيع پئماني تي موقعا فراهم ٿيندا پر علائقائي سطح تي به خوشحالي ايندي ۽ سرڪاري نوڪرين جي حوالي سان حڪومت تي پيل بار به گهٽجندو. سيڙپڪار جيڪڏهن پنهنجون رقمون مختلف قسمن جي صنعتن تي لڳائيندا ته ضرور ان مان آمدني به وافر مقدار ۾ حاصل ڪري سگهبي. اسٽيٽ بئنڪ جي نئين مانيٽري پاليسي پڌري ٿيڻ بعد هاڻي ته بئنڪن ۾ پيل رقمن مان گهٽ نفعو فراهم ٿي سگهندو. ان ڪري هن وقت سيڙپڪاري ڪرڻ جو بهترين موقعو آهي، جيڪڏهن ملڪ جا مالياتي ادارا صنعتڪارن ۽ سيڙپڪارن جو حوصلو وڌائين ته ان جا مثبت نتيجا نڪري سگهن ٿا. حڪومتي سطح تي قرض به گهٽ وياج تي ملندا ۽ پراڻن قرضن جو وياج به گهٽجي ويندو. ڏٺو وڃي ته عالمي مارڪيٽ ۾ تيل جي اگهن ۾ گهٽتائي سان قومي معيشت کي وڏو سهارو مليو آهي اڃا به اها اُميد ظاهر ڪئي پئي ته عالمي سطح تي تيل جي اگهن ۾ واڌ نه ٿيندي. عالمي مارڪيٽ ۾ هڪ سال اڳ جڏهن تيل جا اگهه گهٽ ٿيڻ جو سلسلو شروع ٿيو هو ته پاڪستان کي تيل جي برآمد تي وڏو ناڻو خرچ ڪرڻو پئجي ويو هو پر پوءِ قيمتن ۾ ڪمي ٿيڻ سان بجيٽ خسارو به گهٽجڻ لڳو، قرض ادائيگين جي توازن ۾ پڻ بهتري آئي. اها به حقيقت آهي ته موجوده حڪومت عام ماڻهن کي مڪمل رليف ناهي ڏنو، ويتر ٽئڪس لڳائي پاڻ نفعو ڪمايو آهي، اهو ئي سبب آهي جو غريب طبقي سان تعلق رکندڙ عوام جي زندگيءَ جو معيار اڃا بهتر ناهي ٿي سگهيو، رڳو پبلڪ ٽرانسپورٽ جي ڀاڙن جو ئي جائزو وٺنداسين ته هڪ عام ماڻهو چٽي طرح صورتحال سمجهي سگهي ٿو. جڏهن به عالمي سطح تي تيل جي اگهن ۾ واڌ ٿيندي آهي ته ملڪ ۾ هڪدم ڀاڙا وڌائڻ جو رجحان پيدا ٿيندو آهي پر ان جي ابتڙ جڏهن تيل جا اگهه گهٽ ٿيندا آهن ته نه رڳو ٽرانسپورٽر پر حڪومت به ڀاڙا گهٽائڻ جي عمل ۾ متحرڪ نظر نه ايندي آهي. ڪجهه ڏهاڙا اڳ واپارين جو هڪ مطالبو به سامهون آيو هو، جنهن ۾ سندن چوڻ هو ته روپئي جي ملهه ۾ گهٽتائي آندي وڃي ته جيئن برآمدات ۾ اضافو ٿي سگهي پر اهو ڪيئن ممڪن آهي ته حڪومت روپئي جو اگهه گهٽ ڪري پاڻ مٿان قرض جو بار وڌائي ڇڏي!؟ جيڪڏهن برآمدات ۾ واڌ ڪرڻي آهي ته ان لاءِ ضرورت ان ڳالهه جي آهي ته صنعتي شعبي ۾ توانائي جو بحران حل ڪرڻ گهرجي، ان سان پرڏيهه ۾ ملڪي صنعتي شعبي جي مصنوعات جي گهُرجن ۾ اضافو ٿيندو ۽ روانگي واپار ۾ بهتري اچي سگهي ٿي، ان شعبي ۾ پيش ايندڙ رڪاوٽون ختم ڪرڻيون پونديون، هن وقت مقامي سطح تي دفاعي شعبي ۾ به پاڪستان ترقي ڪري رهيو آهي، مهينو اڳ فرانس ايئر شو ۾ پاڪستان جي جهازن به حصو ورتو هو، جن ۾ مختلف ملڪن دلچسپي ظاهر ڪئي هئي، ان ڪري پاڪستان هٿيارن ۽ جنگي سامان جي شعبي ۾ پڻ واپار ڪري وڏو ناڻو ڪمائي سگهي ٿو.