تازيون خبرون

Daily Archives: September 16, 2015

سني ليون پروڊڪشن جي منصوبه بندي شروع ڪري ڇڏي

ممبئي (شوبز نيوز) بالي ووڊ اداڪاره سني ليون پروڊڪشن جي ميدان ۾ قدم رکڻ جي منصوبه بندي شروع ڪري ڇڏي آهي، پنهنجي انٽرويو ۾ سني ليون چيو ته سندس زندگي کليل ڪتاب وانگر آهي، اداڪاره چيو ته هن پروڊيوسر بڻجڻ جيمنصوبه بندي شروع ڪري ڇڏي آهي، هن چيو ته سندس پهرين فلم ”سپر پاور“ جي ڪردار تي ٻڌل هوندي، هن چيو ته هو سپر عورٽ جو ڪردار نه نڀائيندي، پر هي هڪ سپر هيرو جو ڪردار ادا ڪندي، هن چيو ته ان تي ڪم جاري آهي ۽ ڪارٽونسٽس ۽ گرافڪ ڊيزائينر سان ملي ڪم ڪري رهي آهي، هن چيو ته ان فلم ۾ اسان گهڻا چهرا متعارف ڪرائينداسين، پر ان حوالي سان اڃا ڪجهه فائنل ناهي ڪيو.

 

جوهي چاولا پنهنجي نئين فلم ۾ استادن کي درپيش مسئلا ظاهر ڪندي

ممبئي (شوبز نيوز) بالي ووڊ اداڪاره جوهي چاولا پنهنجي نئين ”چاڪ اينڊ ڊسٽر“ ۾ استادن کي پيش ايندڙ مسئلا ظاهر ڪندي. ڀارتي سڌ سماءَ جي ذريعن مطابق اداڪاره چيو آهي ته فلم جي شوٽنگ اپريل ۾ شروع ٿي جيڪا

هاڻي پڄاڻي جي مرحلن ۾ آهي. هن چيو ته اها هڪ تعليمي فلم آهي، جيڪا استادن بابت آهي، ان فلم ۾ استاد ڪهڙي طرح شاگردن تي اثر انداز ٿين ٿا. جوهي چيو ته جڏهن توهان فلم ڏسندا ته توهان روئيندا ۽ کلندا. فلم جي هدايت جيانت گلا تر ڏني آهي جڏهن ته امين سراني ان کي پروڊيوس ڪيو آهي. فلم جي ڪاسٽ ۾ جوهي چاولا، شبانه اعظمي، جيڪي شيروف، دوياتا ۽ سمير سوني شامل آهن.

 

زمبابوي طرفان پاڪستان خلاف ٽي ٽوئنٽي ۽ ون ڊي سيريز لاءِ ٽيم جو اعلان

هراري (اسپورٽس نيوز) زمبابوي ڪرڪيت بورڊ جي سليڪشن ڪميٽي هلندڙ مهيني پاڪستان خلاف شيڊول هوم سيريز ٽي ٽوئنٽي ۽ ون ڊي لاءِ ٽيم جو اعلان ڪيو آهي. وڪيٽ ڪيپر ۽ بيٽسمين رچمونڊ موتمبامي ۽ توري موز راباني جي ٻيهر ٽيم ۾ واپسي ٿي وئي آهي. ريجس چيڪبوا کي ناقص ڪارڪردگي سبب ٽيم مان ڊراپ ڪيو ويو آهي. يوسي اسيبانڊا به سليڪٽرن جو اعتماد حاصل ڪرڻ ۾ ناڪام رهيو. پاڪستان ۽ زمبابوي وچ ۾ 2 ٽوئنٽي-20 ۽ ٽين هڪ ڏينهن واريون بين الاقوامي ميچن جي سيريز کيڏي ويندي. اعلان ڪيو اسڪواڊ ۾ ڪپتان ايلٽن چيگمبرا، سڪندر رضا، چامو چيڀاڀا ، گريم ڪريمر، ڪريگ ايرون، ليوڪ جونگوي، نيولي ميڊزيوا، هملٽن مسکڊزا، ڪرس موفو، رچمونڊ، توري، جان نيمبو، تناشي، پراسپرا وتيا، ميلکم والر ۽ سين وليمز شامل آهن .

 

آسٽريلوي ڪرڪيٽ ٽيم بنگلاديش جي دوري جي شروعات ٽن ڏينهن واري ٽوئر ميچ سان ڪندي

سڊني (اسپورٽس نيوز) آسٽريليا جي ڪرڪيٽ ٽيم ايندڙ مهيني بنگلاديش جو مختصر دورو ڪندي. جنهن ۾ هوءَ ميزبان ٽيم خلاف 2 ٽيسٽ ميچن جي سيريز کيڏندي. آسٽريلوي ٽيم دوري جي شروعات بنگلاديش ڪرڪيٽبورڊ اليون خلاف ٽن ڏينهن واري ٽوئر ميچ سان ڪندي اها ميچ 3 کان 5 آڪٽوبر تائين خان صاحب عثمان علي اسٽيديم فتح الله ۾ کيڏي ويندي. بنگلاديش ۽ آسٽريليا وچ ۾ 2 ٽيسٽ ميچن جي سيريز جي پهرين ميچ 9 کان 13 آڪٽوبر تائين ظهور احمد چوڌري اسٽيديم چٽا گانگ جڏهن ته ٻي ۽ آخري ٽيسٽ 17 کان 21 آڪٽوبر تائين شير بنگلا نيشنل اسٽيڊيم ميرپور ۾ کيڏي ويندي.

 

سنڌ جي وسيلن جي ڦرلٽ، پ پ ۽ ن ليگ جي ڏنڊا پٽ:مظهر خاصخيلي

دنيا جي نقشي تي سنڌ اهڙو خطو آهي جيڪو صدين کان وٺي آباد آهي هن ڌرتيءَ تي ايترا معدني وسيلا موجود آهن جو ڌرتيءَ ڌڻين مٿان خرچ ڪيا وڃن ته سنڌ اندر بيروزگاري، بک بدحالي، نوجوانن جي روز خودڪشين ڪرڻ وارو عمل جو نالو نشان ئي نه هجي ها ۽ نه ئي وري سنڌ جا روڊ رستا ائين ڀڳل ٽٽل هجن ها ۽ نه ئي وري اسڪولن جي بلڊنگن ۽ اسپتالن سميت سرڪاري عمارتن جي زبوني حال هجي ها. ان حوالي سان اصل سچ ڇا آهي اهو سنڌ ڌرتيءَ جي رهواسين کي ٻڌائڻ گهرجي ڇو ته دنيا اندر ناڻي جي ورهاست جو ڪٿي به اهڙو عمل ناهي جهڙو موجوده پاڪستان اندر هلي رهيو آهي ۽ هونئن به 1940 جي قرارداد ۾ اهڙي ڪنهن عمل جو ذڪر ئي ٿيل ناهي جيڪو اڄ ورجايو ٿو وڃي. سنڌ ڌرتي جا رهواسي اربين روپين جو ساليانو ٽيڪس وفاق کي ڏين ٿا ۽ وفاق موٽ ۾ سنڌ کي ڇا ڏئي ٿو اها به سوچڻ ۽ سمجهڻ جهڙي ڳالهه آهي. دنيا اندر ڪٿي به آدمشماري جي بنياد تي ناڻي جي ورهاست ناهي ٿيندي پر افسوس ۽ ڏک جهڙي ڳالهه اها آهي ته اسان جي هن ملڪ اندر ناڻي جي ورهاست آدمشماري جي بنياد تي ڪئي ٿي وڃي ۽ سنڌ جو سڀ کان گهڻو ناڻو پنجاب جي مٿان خرچ ٿي رهيو آهي اها ڳالهه انهن سياسي ڌرين کي ڇو نه ٿي سمجهه ۾ اچي ڇا سالن کان وٺي سنڌ سان ناڻي جي ورهاست تي جيڪا ناانصافي ڪئي ٿي وڃي اها برداشت ڪرڻ جوڳي آهي؟ ڏک ته ان ڳالهه جو به آهي جيڪا سنڌ ڌرتي 75 سيڪڙو گئس پئداوار ڏئي ٿي ۽ 70 سيڪڙو ملڪ کي روينيو ڏئي ٿي ان سنڌ جا نوجوان اڄ تيزي سان ذهني مريض بڻجي رهيا آهن جن جي هٿن ۾ ڊگريون آهن ۽ نوڪرين لاءِ ڀٽڪي رهيا آهن پر وفاقي ادارن اندر خاص ڪري سنڌي نوجوانن کي نوڪريون ملڻ محال آهي جيڪڏهن ڪن اٽي ۾ لوڻ برابر سنڌ جي رهواسين کي وفاقي ادارن ۾ نوڪريون مليل آهن ته به انهن کي شڪ جي بنياد تي ڏٺو وڃي ٿو ڄڻ هو هن ملڪ جا شهري نه هجن. اهڙو ماحول هن ملڪ اندر سالن کان وٺي جڙيل آهي ڇو ته جيڪا هن وقت موجوده قومي اسيمبلي چونڊجي آئي آهي ان ۾ سڀ کان وڌيڪ سيٽون صرف هڪ صوبي پنجاب جون آهن جيڪي 170 جي لڳ ڀڳ آهن باقي ٽن صوبن جون ٽوٽل سيٽون ملائجن ته 139 جي لڳ ڀڳ ٿين ٿيون. اهڙي صورتحال ۾ هن ملڪ مٿان صرف پنجاب ئي حاڪم رهي سگهي ٿو ۽ جنهن کي پنجاب چاهي اهو وزير اعظم ٿي سگهي ٿو ۽ اهڙي صورتحال هن وقت موجوده وفاقي حڪومت جي آهي جنهن کي اسان مسلم ليگ ن جي حڪومت سڏيون ٿا. ڇا هيءَ ڳالهه پختونن، بلوچن، سنڌين، جي لاءِ تڪليف ڏيندڙ ناهي ته ملڪ جو وزيراعظم، ناڻي وارو وفاقي وزير، گهرو وزير، پاڻي ۽ بجلي جو وزير، ريلوي جو وزير، دفاع جي وزير سميت موجوده وفاقي ڪابينا ۾ چار پنج ماڻهن کان سواءِ سڀ جا سڀ پنجاب صوبي جا آهن اهي جيڪو عمل ورجائي رهيا آهن اهو سنڌ ڌرتيءَ جي سمورين رهواسين اڳيان کليل ڪتاب جيان آهي.

پيپلزپارٽي ڀلي وفاق جي پارٽي آهي هن کي سنڌ جي وسيلن سان ايتري دلچسپي ڀلي نه هجي پر اهو به ته سچ آهي ته پ پ کي اليڪشن واري ماحول ۾ وري به سنڌ ۽ سنڌي ماڻهن ڏي موٽي اچڻو آهي ۽ ان جي ڪري اڳوڻي پ پ جي وفاقي حڪومت جيڪڏهن سنڌ مان ننڍي سطح تي بجلي پئدا ڪندڙ شگر ملن ۽ خانگي ڪمپنين کان بجلي خريد ڪرڻ وارو جيڪو عمل شروع ڪيو هو اهو عمل موجوده مسلم ليگ ن وفاقي حڪومت بند ڪري ڇڏيو آهي ۽ هو هاڻي لڪي سيمينٽ فيڪٽري، دادو انرجي، شڪارپور پاور، ٺٽو پاور ۽ ٻين ڪمپنين طرفان وفاق کي وڪرو ٿيندڙ بجلي خريد نه ڪندي. ڇا هيءَ ڏک ۽ تڪليف جهڙي ڳالهه ناهي ۽ هن مسئلي تي ڏندين آڱريون نه اچڻ گهرجن. سنڌ سان هي ماٽيلي ماءُ وارو سلوڪ ڪيو ٿو وڃي اهڙي سلوڪ تي به جيڪڏهن سياست ڪرڻي آهي ته پوءِ انهن ڌرين کي ڌرتي ماءُ ڪڏهن به معاف نه ڪندي. پنهنجو پاڻ کي ساڃاهه وند سڏائيندڙ ڌرين کي ضمير اندر جهاتي پائي سوچڻ گهرجي ته هڪ صوبو ٻئي صوبي سان جيڪو ورتاءَ ورجائي رهيو آهي ڇا اهو هن ملڪ جي سلامتي لاءِ ٺيڪ آهي ۽ اهو ڪٿان جو دستور آهي ته پنجاب جو جيڪڏهن موجوده وفاقي وزير احسن اقبال جڏهن بگڙي تڏهن سنڌي ماڻهن کي ڪچيون گاريون ڏئي اڃا سنڌي ماڻهن کان اها ڳالهه وسري ناهي جڏهن اڳوڻي چيف جسٽس چوڌري افتخار لاءِ جي لاءِ لاهور مان لانگ مارچ نڪتو هو ته احسن اقبال جيڪو ڪجهه سنڌي قوم لاءِ ڳالهايو هو اهو اڄ به رڪارڊ تي آهي. باقي جيڪو عمل وفاقي حڪومت سنڌ جي مختلف ڪارخانن ۽ ڪمپنين کان بجلي نه خريد ڪرڻ وارو عمل ورجايو آهي اهو ٿورو ناهي جيڪڏهن پنجاب جي مختلف فيڪٽرين ۽ ڪمپنين کان في يونٽ بجلي 21 روپين ۾ خريد ڪيو وڃي ٿو ته پوءِ 8 روپيا 48 پئسن ۾ خريد ٿيندڙ سنڌ جي مختلف ڪمپنين ۽ ڪارخانن جي قيمت هاڻي گهٽائي في يونٽ 6 روپيا ۽ ڪجهه ڪرڻ جي ڪهڙي ضرورت هئي ان حوالي سان ننڍن پاور پروڊيوسرن جو چوڻ آهي ته هنن جو في بجلي يونٽ پيدا ڪرڻ تي خرچ 7 روپيا ۽ ڪجهه پئسا ٿئي ٿو ته هو وفاق کي 6 روپيا ۽ ڪجهه پئسا في يونٽ ڪيئن ڏيندا ۽ هنن جا اڳ ئي وفاق ڏانهن 3 ارب رهت آهي جيڪا رقم هن وقت تائين ناهي ملي سگهي. اصل ۾ حيسڪو ۽ سيپڪو کي سنڌ جا خانگي ادارا هڪ سئو 25 ميگا واٽ بجلي پيدا ڪري وڪرو ڪري ڏيندا هئا جنهن ۾ لڪي سيمينٽ فيڪٽري پاران 20 ميگا واٽ دادو انرجي پاران 19 شڪارپور ميگاواٽ پاران 16،ٺٽو پاور پاران 13 ميگا واٽ، ميڪو ٽيڪسٽائل مل پاران 9 ميگا واٽ، آءِ ٽيڪ ڪمپني پاران 10 ميگا واٽ، النور شگل مل پاران 10 ميگا واٽ، اومني ڪمپني پاران 10 ميگا واٽ، فيمڪو ٽيڪس ڪمپني پاران 16 ميگا واٽ، اگر ٽيڪسٽائيل پاران 14 ميگا واٽ بجلي پئدا ڪئي ويندي هئي ۽ اها ئي بجلي في يونٽ 8 روپيا 48 پئسا جي حساب سان حيسڪو ۽ سيپڪو کي ڏني ويندي هئي پر جنوري 2013 کان نيپرا ان بجلي جي اگهه بابت تبديليون آڻيندي گهٽتائي ڪئي ۽ انهن سمال پاور پروڊيوسرن جي بجلي جو اگهه 8 روپيا 48 پئسن مان گهٽ 6 روپيا 48 پئسا مقرر ڪيو ويو جنهن کي پاور پروڊيوسرن رد ڪري ڇڏيو اهڙي ريت انهن پاور پروڊيوسرن پاران پيدا ٿيندڙ 125 ميگا واٽ بجلي جي پيداوار بند ڪئي وئي آهي ۽ ان حوالي سان جيڪو پاور پروڊيوسرن جو موقف سامهون آيو آهي ته هنن جو في يونٽ بجلي 7 روپيا 48 پئسا خرچ کائي ٿو ته هو حڪومت کي 6 روپيا 48 پئسا اگهه تي في يونٽ ڪهڙي حساب سان ڏين. سندن چوڻ آهي ته پنجاب مان ساڳي ملن ۽ ڪمپنين کان في يونٽ 21 روپين ۾ خريد ڪيو وڃي ٿو ته پوءِ سنڌ جي ڪمپنين ۽ ڪارخانن کان سستو يونٽ ڇو خريد ڪيو وڃي ٿو ڇا اها ظلم زيادتي ۽ ناانصافي ناهي.جيڪڏهن پنجاب ۽ ان جي حڪمرانن کي سنڌ مان نڪرندڙ صرف 125 ميگا واٽ بجلي نه ٿي گهرجي ته پوءِ سنڌ جي گئس ڇو ٿا کڻن؟ اها ڳالهه به سوچڻ ۽ سمجهڻ جهڙي آهي ته جنهن سنڌ اندر 75 سيڪڙو گئس جي پيداوار آهي ان سنڌ اندر هفتي ۾ ٻه کان ٽي ڏينهن گئس بند ڪري هتان جي رهواسين کي جنهن مشڪلاتن جي ور چاڙهيو ٿو وڃي ڇا اهي هنن جي نصيب ۾ آهن يا هتان جي سياسي ڌرين جي نااهلي جي ڪري پنجاب سدائين پنهنجي هڪ هٽي وارا فيصلا سنڌ مٿان مڙهيندي ٿو اچي جيڪڏهن سنڌ مان چونڊيل موجوده پ پ جي حڪومت پنهنجون اکيون پٽيون آهن ۽ سنڌ جي وسيلن تي لڳندڙ ڌاڙن جي حوالي سان پنهنجو موقف بيان ڪيو آهي ته اسان سنڌ جا ماڻهو انهن کي اها اپيل ڪنداسين ته هو پنهنجي موقف ته ڄمي بيهي ۽ جيڪڏهن سنڌ جي ناڻي واري صوبائي وزير مراد علي شاهه، نثار کهڙو ۽ سڪندر مينڌري جي موقف موجب اها ڳالهه صحيح آهي ته نواز حڪومت افغانستان، تاجڪستان ۽ ڀارت کان بجلي ته خريد ڪري رهي آهي پر سنڌ جي بجلي خريد ڪرڻ لاءِ تيار ناهي. شهباز شريف سنڌ جا ونڊ ۽ سولر پاور منصوبا بند ڪرائي ڇڏيا آهن ۽ شريف ڀائرن کي دنيا جا مهانگا منصوبا ٺاهڻ جو شوق آهي ميٽرو بس کان پوءِ مهانگو ترين منصوبو آهي سنڌ کي پاڪستان جو حصو نه پيو سمجهيو وڃي. سنڌ ۾ 185 ارب ٽن ڪوئلو موجود آهي سنڌ 70 سيڪڙو گئس ڏئي ٿي ۽ ونڊ سولر منصوبا به آهن جن مان 50 هزار ميگا واٽ بجلي پيدا ڪري سگهجي ٿي. پنجاب ۾ شريف ڀائرن جي ڪمپني زونرجي ونڊ سان سولر منصوبي جا 25 معاهدا ڪيا ويا آهن ادارن کي شريف ڀائرن جي ڪرپشن ڇو نه ٿي نظر اچي انهن ته ڪرپشن جا رڪارڊ ٽوڙي ڇڏيا آهن آئين موجب 90 ڏينهن ۾ سي سي آءِ جو اجلاس ڪوٺائڻو آهي وزير اعظم اجلاس نه گهرائي آئين ٽوڙيو آهي وفاق سنڌ جي اجازت کان سواءِ سنڌ جي گئس پنجاب کي ڏئي سنڌ کي ايل اين جي ڏئي رهيو آهي. ٻئي طرف مسلم ليگ ن جي وفاقي وزير احسن اقبال ۽ شاهد خاڪان عباسي پاران جيڪو موقف آيو آهي ان ۾ چيو ويو آهي ته سنڌ حڪومت جا الزام شرمناڪ آهن ڪرپشن تي اکيون بند ڪري نه ويهنداسين مراد علي شاهه ساڳيا ئي معاملا ڇيڙيا آهن جيڪي آصف زرداري وٽ طئي ٿي چڪا آهن پر جيڪڏهن اهي مطمئن ناهن ته ٻيهر ڳالهيون ڪرڻ لاءِ تيار آهيون ارڙهين ترميم وقت ملڪ ۾ روزاني گئس جي پيداوار 2 هزار 900 ميڪا ملين ڪيوبڪ فٽ هئي پر هاڻي گئس پيداوار ۾ روزاني 550 ايم ايم سي ايف ڪمي اچي وئي آهي. اصل ۾ هاڻي سوچڻ ۽ سمجهڻ جي ڳالهه اها آهي ته سنڌ جي وسيلن جي ڦرلٽ جيڪا سالن کان وٺي ڪئي ٿي وڃي اها ڳالهه ظاهر پڌري پٽ پئي آهي ۽ مسلم ليگ ن يا پ پ جي پاڻ ۾ ڏنڊا پٽ واري راند جيڪا شروع ڪئي وئي آهي اها پنهنجو انت ڪٿي آڻيندي اها ڳالهه وقت تي ڇڏجي ٿي پر سچ اهو آهي ته 65 سالن کان وٺي سنڌ سان ناڻي، پاڻي ۽ معدني وسيلن جي حوالي سان جيڪا ناانصافي ڪئي وئي آهي ان جو حساب ڪتاب سنڌ جي رهواسين کي ڪير ڏيندو. ڇا سنڌ جا ڀڳل ٽٽل روڊ رستا ۽ هتان جا اسڪول اسپتالون هن ملڪ جا ناهن جو انهن جي ترقياتي ڪمن وارو پئسو ڪراچيءَ جي آپريشن تي خرچ ڪيو وڃي ۽ سنڌ اندر سمورا ترقياتي منصوبا بند هجن.

 

 

 

سينيٽ ۾ متحده جي حمايت ۾ ٿيل تقريرون ۽ حقيقتن کان ڪن لاٽار : اعجاز ممنائي

گذريل ڏينهن سينيٽ ۾ مخالف ڌر جي اڳواڻ بئريسٽر اعتزاز احسن پنهنجي مخصوص انداز ۾ تقرير ڪندي چيو ته وفاق پاران هڪ ڊگهي عرصي کان سنڌ سان زيادتين وارو سلسلو لاڳيتو جاري آهي، جڏهن ته سياسي شخصيتن کي دهشتگردي جي دائري ۾ آڻي انهن کي انتقام جو نشانو بڻايو پيو وڃي. هن وڌيڪ چيو ته هو احتساب خلاف ناهن پر سياسي انتقامي ڪارروايون نه ڪيون وڃن. ڊاڪٽر عاصم حسين ۽ سيد علي نواز شاهه  کي ڪوڙن الزامن هيٺ حراست ۾ ورتو ويو. بئريسٽر اعتزاز احسن چيو ته ڪراچي ۾ متحده قومي مومينٽ ۽ سنڌ حڪومت کي نشانو بڻايو پيو وڃي. اسان ڪنهن جي به ڪرپشن جي صفائي پيش نه ڪري رهيا آهيون. دهشتگردي جو الزام لڳائي 90 ڏينهن جو رمانڊ وٺڻ امتيازي سلوڪ آهي. پيپلز پارٽي جي اڳواڻ چيو ته ايم ڪيو ايم تي لڳايل الزامن ۾ به ڪا سچائي ناهي. جنهن وقت متحده مشرف جي اتحادي هئي ته ان وقت هن خلاف ڪارروائي ڇو نه ڪئي وئي.سينيٽر سعيد غني چيو ته ڪراچي ۾ خبر ناهي ڪنهن جي چوڻ تي رينجرز اختيار اورانگھي رهي آهي. نيب ثبوتن باوجود ميان منشا خلاف ڪارروائيون نٿي ڪري.جنهن مان ثابت آهي ته ان پٺيان ڪو ٻيو هٿ آهي ائين رحمان ملڪ ۽ ٻين پڻ سينيٽ ۾ متحده جي حمايت ڪري مظلوم ثابر ڪرڻ جي ڪوشش ڪئي جڏهن ته پاڪستان پيپلز پارٽي جي ڪو چيئرمئن آصف علي زراري ۽ الطاف حسين هڪ ٻئي جي صفائي پيش ڪري قوم کي ٻڌائي چڪا آهن ته اسان هڪ ٻئي سان ڪهڙو سلوڪ ڪري چڪا آهيون هڪ پارٽي اڳواڻ اهو ٿو چوي ته پيپلز پارٽي اسان سان دوڇو ڪيو آهي ۽ منافقت کي مفاهمت جو نالو ڏيئي اسان کي بيوقوف بڻايو ويو جڏهن ته موٽ ۾ سندس بيان تي تبصرو اهو ٿيو ته متحده دهشتگرد تنظيم آهي جنهن ڪراچيء جي هر علائقي کي يرغمال بڻائي رکيو آهي ان کان سواءِ متحده وتان هن مهل تائين جيڪي دهشتگرديءَ جا ثبوت مليا آهن سي ڪنهن جي کاتي هڻجن 90 کان وٺي لنڊن تائين جيڪو ڪجهه دنيا متحده جي ڪرتوتن کي ڏٺو سو سڀ ڪجهه ڪاڏي ڪجي اعتزاز احسن هڪ قانون جو رکوالو پڻ آهي جنهن متحده کي ويجهي کان به ڏٺو آهي پوءِ به سندس واتان متحده لاء تعريف ڀريون تقريرون ڪرڻ ضرور ڪا معنيٰ رکي ٿي يا ته ائين آهي ته متحده جي ناڪام ٿيل سياست کان پوءِ هاڻي پاڪستان پيپلز پارٽي اڪيلي بڻجي ويئي آهي ۽ سندن کي اهو خوف آهي ته اهو ساڳيو حشر اسان سان به نه ٿئي تنهن ڪري سڀ ٺڳ گڏجي هڪ سگهه جو مقابلو ڪريون ڇو جو هن وقت پاڪستان پيپلز پارٽي جيڪا جنگي صورتحال ٺاهي آهي تنهن ۾ سڀ وزير ڪرپشن جي ڪٽهري ۾ قيد ٿي چڪا آهن ائين واري واري سان سڀني جو احتساب ٿي رهيو آهي سٺا حڪمران ته هر وقت پاڻ کي عوام آڏو احتساب لاءِ پيش ڪندا آهن پوءِ خبر ناهي هي ڪهڙا حاڪم آهن جيڪي احتساب واري عمل کان پاسيرا ٿي الزام تراشيءَ تي لهي اچن ٿا جيڪڏهن متحده جي سياست دهشتگرديء ۽ ڪرپشن کان پاڪ آهي ته پوءِ ٻڌايو وڃي ته سنڌ سميت ملڪ ۾ ڪرپشن ڪنهن ڪئي آهي جڏهن ته حڪمراني پويان پنج سال متحده ۽  پي پي پي جي رهي آهي اڃان به جيڪر انهن جي حاڪميت عوام لاءِ هئي ته ڪنهن کين چيو ته اسيمبلين مان آئوٽ ٿي وڃو جيڪڏهن سندن ڪارڪنن کي اجايو گرفتار ڪيو ٿي ويو يا انهن تي اجايا الزام لڳي رهيا هئا ته اهي عدالتن ۾ پنهنجا ثبوت پيش ڪري پنهنجي ڪارڪنن جي حفاظت ڇو نه ٿي ڪري سگهيا ڇا انهن لاءِ به حڪومت سندن در بند ڪري ڇڏيا هئا جيڪڏهن ائين به هو ته پوءِ اهي عوامي ريفرنڊم ڪرائي پاڻ کي بي ڏوهي ثابت ڪرائي ٿي سگهيا  سندن سياسي مقبوليت جو اندازو ان مان لڳائي سگهجي ٿو ته سندن هڙتال واري ڪال تي ڪوبه دڪاندار پنهنجو دڪان بند نه ٿو ڪري ائين کين عوامي موٽ جو نه ملڻ ان ڳالهه جو چٽو ثبوت آهي ته متحده عوامي نه پر دهشت جي بنياد تي سياست پئي ڪئي آهي  جنهن کي پنهنجي ڪئي جي هاڻي سزا ملي رهي آهي ان سڄي صورتحال کان پوءِ به سينيٽ جهڙي اهم ۽ قانون ساز اداري مان دهشتگردن جي حمايت ۾ تقريرون ڪرڻ نهايت افسوس ناڪ عمل آهي ان کان به وڌيڪ ڏکائيندڙ اها ڳالهه آهي ته هڪ قانون جو ماهر پاڻ قانون جي لتاڙ ڪندڙن کي دوست ۽ بي ڏوهي چئي رهيو آهي جيڪا قوم سان گڏ پنهنجي پارٽي پاليسيءَ سان به وڏي مذاق آهي جيڪڏهن پيپلز پارٽي به ان ساڳي صف ۾ بيٺل آهي ته پوءِ احتساب واري عمل کان نه گهٻرائڻ گهرجي ۽ جلد رينجرز يا نيب ، اينٽثي ڪرپشن يا ايف آئي اي سميت ٻيا عملدار وزيرن جو واٽون جهلڻ لاءِ سندن اڳيان هوندا پوءِ خورشيد شاه جنگ جا اعلکان ڪري يا سيد مراد علي شاه وسيلن جي پوئواري ڪرڻ لاءِ بيان بازي ڪري نتيجو کين ڪجهه به نه ملندو ڇوته عوام توهان جي دليري ۽ پهلواني اڳواٽ ئي ڏسي چڪو آهي ته ٿوري اسٽينڊ وٺڻ سان توهان رينجرز کي لاکون ايڪڙ زمين به ڏيئي ڇڏي ، توهان ڪپتاني جي زميواري کڻي سک سان سمهي پيو ۽ ڪراچي سميت سڄي سنڌ ۾ ڪرپشن خلاف اهڙا ادارا ڪارروائيون ڪرن لڳا جن جي توهان کي خبر ئي نه پئي باقي هاڻي اپيڪس ڪاميتي يا وفاق جي مخالفت ڪرڻ سان ماحول نه سڏرندو ۽ نه  ئي وري متحده جي حمايت ڪرڻ سان سنڏ سورن مان نڪرندي ان ڪري بهتر اهو آهي ته عوام جي ڀلائي لاءِ ڪي قدم کڻي پنهنجي ساک کي بهتر ڪيو وڃي ڪرپشن ڪندڙن کي ڪيفر ڪردار تائين پهچائڻو آهي ته دهشتگردن جو ساٿ ناهي ڏيڻو ،حڪومت توڙي عسڪري قوتون بار بار چئي رهيون آهن ته  ڪراچي آپريشن ڪنهن فرد، اڳواڻ يا پارٽي خلاف نه آهي پر دهشتگردن خلاف آهي، دهشتگردن ۽ ڏوهارين جي مالي مدد ڪندڙن خلاف ڪارروائي ٿيڻ گهرجي ، جنهن به پارٽي اندر ڪاريون رڍون آهن انهن جي خلاف ڪارروائي جي ضرورت آهي اهو سڄي قوم جو مطالبو آهي هاڻي پيپلز پارٽي کي پنهنجي وزيرن ۽ سينيٽرن خلاف قدم کڻڻ گهرجي ۽ دهشتگردن جي ساٿ ڏيڻ وارين شخصيتن کي عدالتن يا قانون نافذ ڪرڻ وارن ادارن جي حوالي ڪرڻ گهرجي ان ۾ ئي پيپلز پارٽي جو ڀلو آهي.

 

 

اليڪشني دور ۽ سياستدانن جا طوفاني بيان…..

گذريل آچر ڏينهن سنڌ جي ناڻي ۽ توانائي واري وزير مراد علي شاهه ۽ سينئر وزير نثار احمد کهڙي گڏيل پريس ڪانفرنس ڪندي جيڪي ڳالهيون ڪيون آهن، انهن سان جيتوڻيڪ هر سنڌ واسيءَ جي دل جي ترجماني ٿئي ٿي، پر ڳالهين لاءِ جنهن وقت جي چونڊ ڪئي وئي آهي، تنهن ۾ اُهي ڳالهيون پنهنجو اثر ڇڏي نه سگهنديون؛ جو عام ماڻهوءَ جي ذهن ۾ اِهائي ڳالهه ويٺل آهي ته پيپلز پارٽي پنهنجن ماڻهن کي ڪرپشن ڪيسن کان بچائڻ لاءِ سنڌ جي انهن اشوز کي اُٿاريو آهي. جيتوڻيڪ انهيءَ دليل ۾ وزن به آهي ته، گذريل ستن سالن کان سنڌ ۾حڪمراني ڪندڙ پيپلز پارٽيءَ کي آخر اڳ ۾ اِهي سڀ مامرا نظر ڇو ڪونه آيا؟ گذريل ٻن سالن کان وفاقي سرڪار سان کير کنڊ رهندڙ سنڌ سرڪار اڳ ۾ اهڙا مطالبا ڇو ڪونه ٿي ڪيا ۽ هينئر آخر انهن جي اکين ۾ سنڌ جي دردن جو پاڻي ڇو لهي آيو آهي؟ ڪٿي سنڌ لاءِ جاڳي پيل اهو احساس مڪاني چونڊن واري مهم جو حصو ته ناهي؟ ڇو ته پيپلز پارٽيءَ جي ٻنهي دؤرن ۾ سنڌ جي ماڻهن اِهوئي ڏٺو ۽ محسوس ڪيو ته سنڌ سرڪار پنهنجي مفاد خاطر هر اُن قدم کي جائز سمجهندي رهي آهي، جنهن سان سندن اقتدار کي تقويت ملندي هُجي. اُن جو سڀ کان وڏو دليل گذريل دؤر حڪومت ۾ سنڌ کي انتظامي حوالي سان ٻه ڀاڱا ڪرڻ هو. اُن کان علاوه سوات آپريشن جي متاثرن لاءِ ڪئمپون قائم ڪري آڌر ڀاءُ ڪرڻ کان وٺي ڌارين آبادين کي جيءَ ۾ جايون ڏئي اُنهن جا انگل آرا سهڻ ۾ هُنن وسان نه گهٽايو، جڏهن سنڌ واسين تي هٿرادو مصيبتون مڙهيون ويون، لکين ڪروڙين ماڻهن کي پاڻيءَ ۾ ٻوڙيو ويو، تڏهن حڪمرانن متاثرن لاءِ ڪراچيءَ جهڙي اهم شهر ۾ ڪئمپون قائم ڪرڻ ته ٺهيو، پر ڌڪا ٿاٻا کائي ڪراچيءَ پهتل ٻوڏ متاثرن مٿان جڏهن گوليون وسايون ويون ته حڪمرانن ٻڙڪ ڪونه ٻاڦي، جو ان سان کين پنهنجي مفاهمتي سياست کي خطري جا انديشا هُئا ۽ اڄ اُهي ساڳيا حڪمران جڏهن حالتن هٿان سوڙها ٿيا آهن، تڏهن اُهي سنڌ جي دردن جون ڳالهيون ڪيو رت رُئڻ جو ڏيک ڏين ٿا. اِهوئي ڪجهه آچر ڏينهن واري پريس ڪانفرنس ۾ نظر آيو. سندن چوڻ هو ته نواز حڪومت افغانستان ۽ تاجڪستان سميت ڀارت سان ته بجلي خريد ڪرڻ لاءِ ڳالهيون ڪري رهي آهي پر سنڌ جي بجلي خريد ڪرڻ لاءِ تيار ناهي، سندن چوڻ آهي ته پاڻي ۽ بجلي واري وزارت شهباز شريف هلائي رهيو آهي، جنهن سنڌ جا ونڊ ۽ سولر پاور منصوبا بند ڪرائي ڇڏيا آهن، جڏهن ته پنجاب ۾ شريف ڀائرن جي ڪمپني زونرجي کي ونڊ ۽ سولر پاور منصوبن جا 25 معاهدا جاري ڪيا ويا آهن. پريس ڪانفرنس دوران ناڻي واري وزير جو چوڻ هو ته ننديپور بجلي منصوبي ۾ وڏي ڪرپشن ٿي آهي، نواز شريف ۽ شهباز شريف کي دنيا جا مهانگا ترين منصوبا ٺاهڻ جو شوق آهي، ميٽرو بس کان پوءِ ننديپور منصوبو مهانگو ترين منصوبو آهي، جنهن مان پيدا ٿيندڙ بجلي 35 رپين کان وڌيڪ في يونٽ واري مهانگي ترين بجلي هوندي پر وفاق اهو اضافي خرچ پاڻ ڀريندو ۽ معاملي کي لڪايو ويندو. سندس چوڻ هو ته ٿر ۾ 185 ارب ٽن ڪوئلو موجود هجڻ باوجود پنجاب ۾ امپورٽيڊ ڪوئلي تي بجلي منصوبا هنيا پيا وڃن. سنڌ کي پاڪستان جو حصو نه پيو سمجهيو وڃي، وزيراعظم نواز شريف رڳو پنجاب نه پر سڄي مُلڪ جو وزيراعظم ٿئي. اُن کان علاوه ساڳي پريس ڪانفرنس ۾ سنڌ جي گئس واري حق جي ڳالهه پڻ ڪئي وئي، جنهن لاءِ چيو ويو ته جيڪڏهن سنڌ کي گئس جو حق نه ڏنو ويو ته ٻين صوبن کي گئس جي فراهمي بند ڪئي ويندي. ڪاش اِهي ڳالهيون سنڌ سرڪار کي اڳ ۾ ياد اچن ها، جڏهن وفاقي سرڪار سان سندن مفاهمتي پاليسي هلي رهي هُئي، تڏهن نه رُڳو سندن ڳالهين ۾ اثر هجي ها، پر عام ماڻهو پڻ اِهو تسليم ڪري ها ته سنڌ سرڪار مفاهمت تي اصولن کي ترجيح ڏئي پئي. جيتوڻيڪ سنڌ سان زيادتين جا طويل داستان آهن، اُنهن جي ازالي لاءِ سنڌ جي هر ساڃاهه وند ماڻهوءَ کي ڪردار ادا ڪرڻ گهرجي، پر اِهو قطع مناسب ناهي ته فقط پنهنجا پانڌ آجا ڪرائڻ لاءِ سنڌ کي استعمال ڪيو وڃي. جيڪڏهن پيپلز پارٽيءَ جي قيادت کي سچ به سنڌ جي دردن جو احساس آهي ۽ اُها درمان ٿيڻ چاهي ٿي ته پوءِ اُن کي سچائيءَ جي بنياد تي سنڌ جا معاملا اُٿارڻا پوندا. جيڪڏهن اِئين نه ڪيو ويو ته پوءِ اُن سان به اُهائي ڪار ٿيندي، جيڪا جعفر ٻڪرار سان ٿي هُئي. تنهنڪري اسين ڄاڻايل پريس ڪانفرنس ۾ ڪيل ڳالهين جي تائيد ڪرڻ سان گڏوگڏ سنڌ سرڪار ۾ اِها اُميد پڻ رکون ٿا ته اُها انهن معاملن کي محض اشو بڻائڻ جي حد تائين ئي نه پر اُنهن جي حل لاءِ به تحرڪ وٺندي ته جيئن سنڌ کي پنهنجن وسيلن جو جائز حصو ملي سگهي.