تازيون خبرون

Daily Archives: September 11, 2015

ڪنگنا رناوت جو سلمان خان سان فلم ۾ ڪم ڪرڻ کان انڪار

ممبئي (شوبز نيوز) بالي ووڊ اداڪاره ڪنگنا رناوت سلمان خان سان فلم ۾ ڪم ڪرڻ ؛ان انڪار ڪيو آهي، فلم ”ڪوئين“ ۽ ”تنو ويڊز منور“ جي ڪاميابي کان پوءِ ڪنگنا فلمن جي چونڊ ۾ محتاط ٿي وئي آهي، ذريعن مطابق ڪنگنا

کي فلم ”سلطان“ ۾ سلمان خان سان هيروئن طور اچڻ يج آڇ ٿي پر ڪنگنا بالي ووڊ جي ٻين هيروئنن جي ابتڙ پروڊيوسر کي انڪار ڪري ڇڏيو، جڏهن ته هنن ڏينهن ۾ ڪنگنا جي فلم ”ڪٽي بٽي“ هلي جي شوٽنگ هلي رهي آهي، جنهن کي پسند ڪيو پيو وڃي، ياد رهي ته ڪنگنا بالي ووڊ جي سڀ کان وڌيڪ معاوضو وٺندڙ اداڪاره آهي.

 

”سنگهه از بلنگ” جي گاني ”سينيما ديکهي ماما” جو وڊيو جاري

ممبئي(شوبز نيوز) بالي ووڊ فلم ”سنگهه از بلنگ” جي گاني ”سينيما ديکهي ماما” جو وڊيو جاري ٿي ويو. ڀارت جي سڌ سماءَ وارن ذريعن مطابق بالي ووڊ فلم ”سنگهه از بلنگ” جو اهو گانو مزاحيه نموني جو آهي جنهن ۾ فلم ۾ مرڪزي ڪردار اداڪار ڪندڙ اڪشي ڪمار ۽ ايمي جيڪسن ديسي لباس پائي بيٺا آهن. اهو گانو واجد، شان ۽ ريتو پاٽڪ ڳايو آهي. گاني جا موسيقار ساجد واجد، شان ۽ ريتو پاٽڪ آهن گاني جي شاعري واجد ۽ عرفان ڪمال لکي آهي. فلم 2 آڪٽوبر تي سينيما گهرن جي زينت بڻجندي

 

ثانيه مرزا جون ڪاميابيون برقرار، يو ايس اوپن ٽينس وومينز ڊبلز جي فائنل ۾ پهچي وئي

نيويارڪ (اسپورٽس نيوز) ڀارتي ٽينس اسٽار ثانيه مرزا ۽ سندس سوئس جوڙيدار مارٽينا هنگس پنهنجي بهترين ڪارڪردگي سبب يو ايس اوپن ٽينس ٽورنامينٽ جي وومينز ڊبلز جي فائنل ۾ پهچي ويون آهن، هن سيمي فائنل ميچ ۾1

سيرا ايراني ۽ فلاديا پيني پٽا تي ٻڌل اٽالين جوڙي کي هارائي ٽورنامينٽ جي فائنل لاءِ ڪواليفاءِ ڪيو، تفصيل مطابق آمريڪا ۾ هلندڙ سال جي چوٿين ۽ آخري گرينڊ سلام ٽينس ٽورنامينٽ ۾ کيڏيل وومينز ڊبلز جي پهرين سيمي فائنل رائونڊ ميچ ۾ ڀارتي ٽينس اسٽار ثانيا مرزا ۽ سندس جوڙيدار مارٽينا هنگس بهترين راند کيڏندي سيرا ايراني ۽ فلاويا پيني پٽا تي ٻڌل اٽالين کي اسٽريٽ ٽينس ۾ 4-6 ۽ 1-6 تان هارائي ميگا ايونٽ جي فائنل لاءِ ڪواليفاءِ ڪيو آهي.

 

انگلينڊ ۽ آسٽريليا وچ ۾ چوٿين ون ڊي انٽر نيشنل ڪرڪيٽ ميچ (اڄ ) کيڏي ويندي

ليڊز (اسپورٽس نيوز) انگلينڊ ۽ آسٽريليا جي ڪرڪيٽ ٽيمن وچ ۾ چوٿين ون ڊي انٽر نيشنل ڪرڪيٽ ميچ اڄ جمعي تي ليڊز ۾ کيڏي ويندي. مهمان ٽيم آسٽريليا کي 5 ميچن جي سيريز ۾ 1-2 جي سرسي حاصل آهي.سائوٿمپٽن ۾ کيڏيل پهرين ون ڊي ۾ ڪينگروز 59 رنسن جڏهن ته لارڊز م کيڏيل ٻين ون ڊي ۾ 64 رنسن تان ڪاميابي حاصل ڪئي پر مانچسٽر ۾ کيڏيل ٽين ميچ ۾ انگلينڊ جي ٽيم شاندار ڪم بيڪ ڪندي آسٽريلوي ٽيم کي 93 رنسن تان هارائي ڇڏيو. ٻنهي تيمن وچ ۾ چوٿين ون ڊي انٽر نيشنل 11 سيپٽمبر تي ليڊز جڏهن ته پنجين ۽ آخري ميچ 13 سيپٽمبر تي مانچسٽر ۾ کيڏي ويندي.

 

مڪاني چونڊ مهم ۽ سياسي ڳٺ جوڙ جي شروعات :خالد ٻانڀڻ

سنڌ جي مٿانهين يعني اُتر واري علائقي ۾ مڪاني چونڊن کان پهرين سياسي سرگرميون زور وٺي ويون آهن، هڪ ئي پارٽي اندر رهندي ڪيترن سالن کان اپوزيشن ليڊر سيد خورشيد شاهه ۽ سينيٽر اسلام الدين شيخ اليڪشن کان پهرين اچانڪ رات پيٽ ۾ پاڻ ۾ پرچي ويا آهن، سندن اوچتي ٺاهه سکر جي سياسي سرگرمين ۾ هلچل مچائي ڇڏي آهي. پر ڇا هي ٺاهه صرف مڪاني چونڊن تائين محدود رهندو يا اڳتي به پائيدار هوندو؟ مان سمجهان ٿو ان جي گارنٽي ٻئي سياسي حريف به مضبوط دليلن سان ڪونه ڏئي سگهندا. ڇو ته اهڙا ٺاهه ٻنهي جي وچ ۾ اڳ به ٿيندا رهيا آهن پر تازو پيپلز پارٽي چيئرمين بلاول ڀٽو زرداري پاران چونڊيل نمائندن جي ويجهن رشتيدارن کي مڪاني چونڊن ۾ پارٽي ٽڪيٽون نه ڏيڻ واري اعلان کين ان ڪري ويجهو آندو آهي ته سيد خورشيد شاهه کي پنهنجي پٽ فرخ شاهه کي ضلعي چيئرمين شپ ۽ اسلام الدين شيخ کي پنهنجي پٽ بئريسٽر ارسلان شيخ کي ميئرشپ ڏيارڻ لاءِ پارٽي ٽڪيٽون وٺڻيون آهن. ان ٺاهه سان جتي ڪجهه حلقن ۾ خوشي ٿي آهي، اتي اڪثريت کي ٻنهي جي ٺاهه سان تڪليف پڻ پهتي آهي.

هنن ٻنهي ڌرين وچ ۾ جيڪڏهن ڪو نڌڻڪو ٿيو آهي ته اهو آهي سياسي ورڪر! هن ڀيري وري به ٽڪيٽون جيڪڏهن ساڳين خاندانن ڏانهن وڃن ٿيون ته ورڪر لڏو وري به مٿي تي هٿ ڏئي ويهي رهندو. سيد خورشيد شاهه چئي ٿو جيڪڏهن هڪ سياستدان ۽ ان جو خاندان عوام جي وچ ۾ ٻارنهن ئي مهينا رهي ٿو ته اها موروثي سياست ناهي. مڃيوسين ته موروثي سياست ناهي پر ڇا پارٽي اندر باقي ڪو ٻيو سگهارو ڪارڪن، پڙهيل لکيل نوجوان سياستدان ناهي؟ اسان کي پوري لسٽ ترقياتي منصوبن جي حوالي سان ڳڻائي وڃي ٿي پر انهن مان 90 سيڪڙو منصوبا اڌ ۾ رليا پيا آهن؛ ائين جيئن غربت، ڪرپشن، بدامني پکڙي پيئي آهي. ان جو خاتمو ڪير ڪندو؟ ان لاءِ هنن وٽ ڪا سچائي ڪو بهتر منصوبو نظر ڪونه ٿو اچي.

ڳالهه رڳو خورشيد شاهه، اسلام الدين شيخ تائين محدود ناهي پر مڪاني ادارن جو صوبائي وزير سيد ناصر شاهه به هن وقت روهڙي تعلقي تان پنهنجي پٽ ڪميل حيدر شاهه کي ناظميءَ جي ٽڪيٽ ڏيارڻ لاءِ اتاولو آهي ۽ هن ٺاهه ۾ ان جو اهم ڪردار آهي. رات جي اونداهيءَ ۾ اپوزيشن اڳواڻ صوبائي وزير سکر هائوس تي پهچي ڪري ٺاهه کانپوءِ اهڙي فارمولي تي اتفاق ڪيو آهي ته هو پنهنجي اولاد خاطر ڪنهن به حد تائين وڃي سگهن ٿا. ڇو ته اقتدار جي جنگ ٻنهي ڌرين کي نقصان طرف وٺي ٿي وئي. ان لاءِ هنن ٺاهه ۾ ئي پنهنجو ڀلو سمجهيو آهي. جڏهن ته پي ٽي آءِ ۽ فنڪشنل ليگ ڪارنر گڏجاڻيون، راڄوڻي اجلاس، گهر گهر وڃڻ واري مهم صرف پ پ کي ٽف ٽائيم ڏيڻ لاءِ شروع ڪري ڇڏي آهي. جڏهن ته مسلم ليگ نواز جو سکر ۾ ڪٿي به ايڏو وڏو اثر ڪونهي ڪو، جو هو يوسي ناظمي سيٽ به کٽي سگهن. مڪاني چونڊن ۾ لاڙڪاڻي ۽ سکر ڊويزن اندر پهريون مرحلو آهي، جتي 350 سيٽون مختص ٿيل آهن. اميدوارن جي پارٽي ٽڪيٽ تي 30 سيپٽمبر تائين واڌ ٿي چڪي آهي. تڪ بندين تي سخت اعتراض ڪورٽن تائين پهچي چڪا آهن، جن تي ٻڌڻيون هلندڙ آهن. سکر سٽي ۾ وري ايم ڪيو ايم جو ووٽ بئنڪ آهي پر پارٽي عتاب هيٺ هجڻ سبب انهن  اڃا ڪا مضبوط مهم شروع ناهي ڪئي.

خورشيد شاهه- اسلام الدين جو ٺاهه خاص فوڪس سکر سٽي به آهي. شڪارپور، جيڪب آباد، گهوٽڪي ۾ وري مهر، جتوئي، سومرا، ڀيا، ڪماريا، جکراڻي، کوسا، بجاراڻي، پتافي، لنڊ سردار سرگرم آهن ته وري خيرپور ۾ سيدن، وساڻن، ٻانڀڻ، کرل جو راڄ آهي، سڀ جا سڀ ساڳيا خاندان پنهنجي اولاد لاءِ ميدان تي لهي آيا آهن ۽ هن ڀيري به هو اهڙو موقعو هٿن مان وڃڻ نه ڏيندا. جيڪڏهن موقعو هٿن مان ويندو ته اهو وري به آزاد اميدوار، عام عوام ۽ مظلوم ورڪر لڏو هوندو. پ پ، فنڪشنل ليگ، تحريڪ انصاف اميدوارن کان درخواستون وٺڻ شروع ڪري ڇڏيون آهن پر حقيقت اها آهي ته اليڪشن جا خواهشمند پارٽي ٽڪيٽن کان وڌيڪ ذاتي طور تي فارم ڀرائڻ کي ترجيح ڏئي رهيا آهن ۽ پراڻن اڳواڻن کي ورڪ ميدان ۾ منهن ٽوڙ ته جواب ڏئي رهيا آهن پر پارٽي اندر خاص ڪري پ پ اندر شديد اختلاف سامهون اچڻ شروع ٿي ويا آهن. کوڙ سارن اهڙن اڳواڻن جا نالا مليا آهن، جن اسان کي فون ڪري پنهنجا خدشا ۽ احتجاج رڪارڊ ڪرايا آهن ته هڪ دفعو ٻيهر پارٽي اندر مڪاني چونڊن ۾ ناني ويڙهو ڪيو پيو وڃي؛ جنهن جا خراب اثر نڪرندا.

هاڻي اهو اڳواڻن تي ڇڏيل آهي ته ٽڪيٽن جي ورهاست کانپوءِ جيڪا مزاحمت خاموشيءَ سان ڪَرُ کڻي رهي آهي، ان کي ڪهڙي ريت منهن ڏيندا؟ جيڪو هنن جو حق آهي، هي تبديلي جو زمانو آهي. آزمايل ۽ مدي خارج احوالن جي سياست هاڻي ختم ٿيڻ گهرجي. جيڪو عوام جو فيصلو هوندو، ان فيصلي کي ڪجهه خاندان خريد ڪري نٿا سگهن. ڏاڍ، زبردستي ۽ جبر جي سياست ختم ڪرڻي پوندي، پنهنجي گهر کان نڪري پبلڪ جو خيال رکڻو پوندو. ٻي صورت ۾ ايندڙ سونامي گهڻن کي ٻوڙي ڇڏيندي. پيرن، ميرن، سردارن، وڏيرن جي سياست کي الوداع ڪرڻو پوندو، نيزي مٿان نئون سج اڀارڻ لاءِ سول سوسائٽي جيڪڏهن پنهنجو ڪردار ادا نه ڪيو ته هي سياستدانن جا وقتي اتحاد پوري معاشري کي انارڪيءَ جي اهڙي دٻڻ ۾ ڌڪي ڇڏيندا، جتي رڳو تباهي کانسواءِ ڪجهه ڪونه هوندو.

 

عمران خان جي سنڌ ياترا :اسحاق سومرو

تحريڪ انصاف جي سربراهه عمران خان جو تازو سنڌ جو دورو اڃان سوڌو عام ماڻهن توڙي ميڊيا تي بحث هيٺ آهي. عمران خان جي سنڌ جي دوري کان اڳ سندس پارٽيءَ جي اڳواڻن, جن ۾ ڪراچيءَ مان چونڊيل قومي اسيمبليءَ جي ميمبر ڊاڪٽر عارف علوي سنڌ جي اڳوڻي گورنر/ وڏي وزير ۽ هن وقت مسلم ليگ (ن) کان پاسيرو ٿيل ممتاز ڀٽو سان سندس اباڻي ڳوٺ پير بخش ڀٽو ۾ ملاقات ڪئي. اهڙين ملاقاتن جي پسمنظر ۾ اهو چيو ويو ته پ پ پ جون ڪيترويون ئي وڪيٽون عمران جي دوري سان ڪري پونديون ۽  سنڌ جا ڪيترائي سياسي اڳواڻ تحريڪ انصاف ۾ شامل ٿيندا.

ان کان اڳ اسلام آباد ۾ رهندڙ سنڌ جي ساڃاهه وندن جي هڪ وفد پڻ عمران خان سان سندس بني گالا واري رهائش گاهه تي تفصيلي ملاقات ڪري کيس سنڌ کي وقت ڏيڻ ۽ سنڌ جي مالڪي ڪرڻ جي وينتي ڪئي. سنڌ ۾ تبديلي ۽ متبادل قوت جا خواهش مند مها لکاري ۽ غير سرڪاري تنظيمن جا ملازم سنڌ ۾ تبديلي ۽ پ پ جو متبادل آڻڻ لاءِ ڳاٽي ٽوڙ ڪوششون ڪندا رهيا آهن.

2013 جي چونڊن کان پهرئين اهي ساڳيا ماڻهو ڏهه جماعتي اتحاد جا ترجمان بڻيل هئا ۽ اهي ان اتحاد کي پ پ جو متبادل خاص طرح فنڪشنل ليگ کي سنڌ جي متبادل پارٽيءَ طور اڀري اچڻ جي خوشخبري ڏيئي چڪا هئا. ايستائين جو انهن مان ڪجهه وري انهن ڀاشڻن وارا ڪالم لکندا رهيا ته گهٽ ۾ گهٽ ڪراچيءَ ۾ سنڌين کي پنهنجا ووٽ تحريڪ انصاف کي ڏيڻ کپن. جڏهن هاڻي کين اڍائي سالن بعد سنڌ ۾ پ پ جو ڪوبه متبادل نظر نه آيو ته انهن هڪ دفعو ٻيهر عمران خان وٽ وڃي کيس سنڌ ۾ سياست ڪرڻ ۽ پنهنجو قيمتي وقت سنڌ کي ڏيڻ وارو مفت مشورو ڏنو. عمران خان به ان کان پوءِ سنڌ اچڻ جو فيصلو ڪيو ۽ اهو تاثر ڏنو ته ان دوري دوران سنڌ جا ڪيترائي سياستدان خاص طرح پ پ جون ڪجهه شخصيتون تحريڪ انصاف ۾ شامل ٿي وينديون. ڪجهه نالي وارن ڪالم نگارن ته اهو به لکيو ته سنڌ جا ڪيترائي جاگيردار ۽ پ پ اڳواڻ تحريڪ انصاف ۾ شامل ٿيڻ لاءِ آتا آهن پر عمران خان پارٽيون بدلائيندڙ اهڙن اڳواڻن کي پنهنجي پارٽيءَ ۾ شامل ڪرڻ لاءِ بنهه تيار نه آهي.

هوڏانهن عمران خان سنڌ جي ڪجهه ضلعن جي دوري توڙي اتي ڪيل خطاب ۽ ڪجهه اڳوڻن اسيمبلي ميمبرن طرفان ڏنل نيرن ۽ رات جي ماني ۾ شرڪت ڪري کين پنهنجي پارٽيءَ ۾ شموليت جي باقائده درخواست پڻ ڪئي.  دلچسپ ڳالهه اها آهي ته عمران خان شڪارپور، ڪنڌ ڪوٽ، گهوٽڪي ۽ ٻين هنڌن تي انهن سياسي اڳواڻن جي درن تي ويو جيڪي سدائين پارٽيون ۽ وفاداريون بدلائڻ ۾ اڳڀرا رهيا آهن. انهن ۾ سردار خالد احمد لنڊ، جنهن 2002 جي چونڊن ۾ پ پ جي ٽڪيٽ تي چونڊجي، پرويز مشرف جي ٺاهيل حڪومت جو ساٿ ڏيئي مملڪتي وزير ٿي مزا ماڻيان هئا. جنهن بعد هو صاحب 2008 ۽ 2013 جي اليڪشن ۾ ناڪام ٿيو هو. ساڳئي ضلعي جي هڪ مشهور پير عبدالحق المعروف ميان مٺو کي تحريڪ انصاف ۾ شموليت ڪرڻ جو پڻ سڏ ڏنو.

ميان مٺو جنهن جي سياسي عمر ۾ ڪيتريون ئي پارٽيون بدلائڻ جو رڪارڊ لکيل آهي. ميان مٺو کي 2013 ۾ پاڪستان پيپلز پارٽي ٽڪيٽ نه ڏني ۽ پير صاحب فوري طور تي وڃي مسلم ليگ فنڪشنل ۾ شموليت اختيار ڪئي. کيس مسلم ليگ (ف) ۽ ڏهه جماعتي اتحاد طرفان قومي اسيمبليءَ جي ٽڪيٽ  ڏيڻ جو فيصلو به ٿي چڪو هو پر عين وقت تي ڏهه جماعتي اتحاد جي خدا ڪارڻ حمايت ڪندڙن جي منٿ ميڙ ۽ اتحاد کي گڏيل نقصان ٿيڻ جا دليل ڏيئي سندس رڪنيت واپس ڪرائي.

هاڻي جڏهن عمران خان سنڌ جي دوري تي وڃي اهڙن عادتي پارٽيون بدلائيندڙ سياستدانن کي تحريڪ انصاف ۾ شموليت جون دعوتون ڏنيون آهن ته سڀ کان وڌيڪ مايوسي انهن پ پ جي متبادل ۽ تبديليءَ جي خواهش مند لکارين ۽ مها دانشورن کي ٿي آهي. جنهن  جو اظهار هو ميار لاهڻ لاءِ چند جملا سوشل ميڊيا ۽ فيس بڪ تي لکي ڪري چڪا آهن. جيڪڏهن انهن مها لکارين ۽ انهن اين جي اوز جي ملازمن جي ڪالمن، ٽي وي پروگرامن ۽ سوشل ميڊيا تي ڏنل ريمارڪس جو باريڪ بينيءَ سان جائزو وٺبو ته اهو ٽولو سنڌ واسين کي گذريل چند سالن کان پ پ جي متبادل جا خواب ۽ ايڊهاڪ ازم واريون صلاحون ڏيندو رهيو آهي. اهو ساڳيو ٽولو سڀ کان پهرئين پ پ جو متبادل قومپرستن کي قرار ڏيندو رهيو آهي. ايستائين جو سنڌ جي هڪ نامياري عورت ڪالم نگار 2013 جي اليڪشن دوران ته پنهنجي ڪالمن ۾ سنڌ جي قومپرست اڳواڻن جا نالا لکي قوم کي خوشخبري ڏني ته فلاڻا فلاڻا ايندڙ اسيمبليءَ ۾ موجود هوندا پر ان کان سواءِ ٻيا به ڪيترائي چونڊجي ايندا. ان کان سواءِ انهن ساڳين همراهن حيدرآباد واري جلسي کي سنڌ جي سياست ۾ اهم سنگ ميل ۽ تبديليءَ جو وڏو محرڪ ڪوٺيو هو ۽ چيو هو ته هاڻي سنڌ جو عوام پ پ سان هڪ هڪاڻي ڪندو. جڏهن ته تقريبن اڍائي سال گذرڻ کان پوءِ سنڌ ۾ پ پ جو متبادل تحريڪ انصاف کي بڻائڻ لاءِ پنهنجون توانائيون استعمال ڪري رهيا آهن ۽ پنهنجي ذاتي خواهشن تي سنڌ جي عوام کي ايڊهاڪ ازم جي ليڊرشپ ۽ پارٽيون ڏيندا رهيا آهن. سنڌ جو عوام ووٽ جي ذريعي پنهنجو فيصلو هن وقت تائين پ پ جي حق ۾ ڏيندو رهيو آهي. باوجود پ پ جي 7 سالا ڪارڪردگيءَ به ڪا آئيڊيل نه رهي آهي. سنڌ جو عوام انهن ڪالم نگارن ۽ سياستدانن کان وڌيڪ باشعور نڪتو آهي جنهن پنهنجو ووٽ نه ورهايو آهي. هر اليڪشن ۾ فيصلا ڪن ووٽ پ پ کي ڏنو آهي.

ضرورت ان ڳالهه جي آهي ته انهيءَ پ پ کي ملندڙ ووٽن جي سببن تي تحقيق ٿيڻ کپي. اها تحقيق حقيقت پسندي ۽ سائنسي بنيادن تي هئڻ کپي، نه ڪه پ پ مخالفت جي بنياد تي. عمران خان جي سنڌ جي دوري جتي سنڌ جي عام ماڻهن توڙي سندس حمايتي لڏي کي به مايوس ڪيو آهي جو عمران خان انهن عادتي پارٽيون بدلائيندڙن جو وڃي مهمان بڻيو جتان کيس صرف ڳاڙهي ٻوڙ واريون پرتڪلف دعوتون ئي نصيب ٿيون. انهن دعوتون  ڪندڙن کيس اهو چئي في الحال ٽاري ڇڏيو ته هو پنهنجي ساٿين ۽ راڄ وارن سان صلاح ڪري پوءَ تحريڪ انصاف ۾ شامل ٿيندا. جڏهن ته عمران خان جي هن دوري تي سڀ کان وڌيڪ خفگي سندس پارٽيءَ ۾ نئين شامل ٿيندڙ سنڌ جي باشعور ۽ پڙهيل ڪلاس جي انهن دوستن علي پلهه ۽ ذوالفقار هاليپوٽو جهڙن کي به ضرور ٿي هوندي. ايستائين جو امر ڪوٽ جي نند لال مالهي جيڪو تحريڪ انصاف جو اڪيلو اقليتي سيٽ تي نامزد ڪيل ميمبر آهي تنهن پڻ واضع ۽ کليل انداز ۾ تحريڪ انصاف ۾ ميان مٺي جهڙن جي شموليت جي مزاحمت ڪرڻ جو اعلان ڪيو آهي. اهڙي صورتحال ۾ اهو ظاهر ٿي ويو آهي ته تبديلي، وچولي طبقي جي ذريعي واري سياست جي پرچار ڪندڙ عمران خان گهٽ ۾ گهٽ سنڌ ۾ پنهنجي مقبوليت جي گراف کي گهٽ ڪرائي سکر کان اڏام ذريعي اسلام آباد روانو ٿي ويو ۽ سنڌ جي انهن خود ساخته لکارين، ڪالم نگارن ۽ ميڊيائي ڀوتارن کي صدمو رسائي ويو.

 

تلور جي مستقبل جو فيصلو

جيئن جيئن دؤر ۾ جدت ايندي وڃي پئي، تيئن تيئن انسان فطرت شناسيءَ کان ڏور ٿيندو پيو وڃي. جنهن جو نقصان سڀ کان وڌ خود انسان کي ئي رسندو رهي ٿو، پر پوءِ به اُهو اڳي کان اڳرو آهي. ٻي دنيا ته ٺهيو اسين جيڪڏهن پنهنجي ئي ماحول جو جائزو وٺنداسين، تڏهن به ڪيترائي فطري دشمنيءَ وارا مثال سامهون اچي ويندا. ڪي پنج سال اڳ وُٺل مينهن جيڪي راڱا ڪيا، تنهن جو سبب مينهن ته پنهنجي جاءِ تي هو ئي پر وڏو نقصان پاڻيءَ جي قدرتي وهڪرن وارا لنگهه بند ڪرڻ سبب ٿيو هو. سرنديءَ وارن پنهنجي لوڀ سبب فطرت آڏو جيڪي رُڪاوٽون وڌيون هيون، تنهن سان ڪيترن ئي مهينن تائين پاڻي شهرن اندر بيٺل رهيو هو. ائين ئي وري جيڪڏهن پکي پکڻ جو جائزو وٺبو ته اُهي بس هاڻ نانءَ جا ئي نظر ايندا، نه ته ٻه ڏهاڪا اڳ هر جاءِ پکين جون لاتيون ٻُڌڻ ۾ اينديون هيون. پر بارود جي استعمال ۽ فصلن ۾ زهريلين دوائن جي استعمال سبب ڪيترن ئي پکين جا نسل پنهنجو وجود وڃائي رهيا آهن. جڏهن ته ٻاهران مهمان ٿي ايندڙ پکين لاءِ وري شڪاري تاڙ ۾ ويٺل ڏسجن ٿا. جيتوڻيڪ انهيءَ شڪار خلاف مختلف وقتن تي آوز اُٿندو به رهيو آهي، پر اُنهيءَ آواز کي شڪار ڪندڙن پاران سدائين اڻٻُڌو ڪيو ويندو رهيو آهي. جڏهن ته تازو انهيءَ حوالي سان هڪ چڱي خبر اِها سامهون آهي آهي ته سپريم ڪورٽ تلور جي شڪار تي پابندي بابت تفصيلي فيصلو جاري ڪندي سنڌ حڪومت جي تلور جي شڪار جي اجازت نامي واري نوٽيفڪيشن کي رد ڪري ڇڏيو آهي. سپريم ڪورٽ جي ٽه-رڪني بئنچ تلور جي شڪار جي اجازت نامن کي 19 آگسٽ تي ڪالعدم ڪري مختصر فيصلو جاري ڪيو هو.گذريل اڱاري ڏينهن انهي جو تفصيلي فيصلو جاري ڪندي عدالت چيو آهي ته بدقسمتي آهي جو بلوچستان هاءِ ڪورٽ مان فيصلو اچڻ کان پوءِ به صوبائي حڪومتون انهي تي عملدرآمد نه ڪري رهيون هيون ۽ تلور جي شڪار بابت اجازت ناما جاري ڪيا پئي ويا. انهي حوالي سان سنڌ سرڪار جي 12 آڪٽوبر 2014ع جي نوٽيفڪيشن جو حوالو ڏنو ويو آهي، جنهن ۾ چيو ويو آهي ته تلور جي شڪار جي اجازت خصوصي پرمٽ ذريعي ڏني ويندي، جنهن جي حمايت پرڏيهي وزارت جي موڪليل خط ذريعي ڪئي وئي آهي، جنهن ۾ هڪ علائقو مخصوص ڪري ڏنو ويو آهي. فيصلي ۾ ڄاڻايو ويو آهي ته باعزت زندگي گذارڻ جو بنيادي حق رڳو اسان جي زندگين تائين محدود ناهي پر اهو ايندڙ نسلن وٽ به آهي. سائنسي شاهدين جي روشني ۾ اندازو لڳايو ويو آهي ته جيڪڏهن زمين جانورن، پکين، درياهن، شفاف هوا ۽ مٽي کان محروم ٿي وڃي ته ان سان وڏي تباهي ايندي. اسين سمجهون ٿا اعليٰ عدالت وقتائتو فيصلو ڏنو آهي، اُن سان تلور جي ختم ٿيندڙ نسل کي بچائي سگهبو. اُن لاءِ ضرورت اِن ڳالهه جي آهي ته حڪومت انهيءَ فيصلي تي دل ۽ من سان عمل ڪري.