تازيون خبرون

Daily Archives: September 9, 2015

موجوده حڪومت پنهنجي اڍائي سالن جي دور ۾ عوام کي ڊليور ناهي ڪري سگهي، اصل اشوز تان منهن ڦيريو پيو وڃي: سراج الحق

لاهور (اين اين آءِ) امير جماعت اسلامي سراج الحق چيو آهي ته حڪومت پنهنجي اڍائي سالن جي دور ۾ عوام کي ڊليور ناهي ڪري سگهي، اصل اشوز تان منهن ڦيريو پيو وڃي، موجوده جمهوري تماشي ۾ غريبن لاءِ ڪجهه ناهي، عام ماڻهو سياسي ۽ معاشي بحرانن کان تنگ ٿي چڪو آهي، جڏهن به ڪو بحران اچي ٿو عام ماڻهو جا اهنج وڌي وڃن ٿا، مرڪزي حڪومت کي بلوچستان جي مسئلن طرف توجهه ڏيڻ گهرجي،چائنا سان 46 ارب ڊالر جو معاهدو گوادر سبب ٿيو آهي، جيڪڏهن گوادر ترقي ڪري ٿو ته ان تي پهريون حق بلوچستان جي عوام جو آهي، جبلن تي ويندڙ ۽ احساسي محرومي جو شڪار نوجوان پاڪستان جي نه پر ظلم جي نظام خلاف آهن، مظلوم نوجان حق گهرن ٿا کين حق ملڻ گهرجن، اهڙن خيالن جو اطهار هن بلوچستان جي 3 ڏينهن واري دوري تي ڪوئيٽا پهچڻ تي ايئرپورٽ تي ميڊيا سان ڳالهائيندي ۽ تربيتي تقريب کي خطاب ڪندي ڪيو.

 

مڃيل اداڪارن سان گڏ ڪم ڪرڻ جو مزو ئي پنهنجو آهي: اين هيٿ وي

لاس اينجلس (شوبز نيوز) آسکر ايوارڊ يافته اداڪاره اين هيٿ وي چيو آهي ته انڊسٽري جي مڃيل اداڪارن سان گڏ ڪم ڪرڻ جو مزو ئي پنهنجو آهي. ميڊيا رپورٽن مطابق اداڪاره اين هيٿ وي هڪ انٽرويو ۾ چيو ته سينئر اداڪارن مان اداڪار رابرٽ ڊي نيرو سان گڏ ڪم ڪري ڏاڍو لطف آيو. 32 سالا اين هيٿ وي جيڪا فلم ”دي انٽرن“ ۾ ڪم ڪري رهي آهي مطابق انهي چيو ته جڏهن کيس رابرٽ ڊي نيرو سان گڏ ڪم ڪرڻ جي پيشڪش ٿي ته کيس يقين نه پئي آيو ته هوءَ ايتري خوش قسمت آهي. هن چيو ته مڃيل اداڪارن خاص طور تي جن کي هوءَ پسند ڪري ٿي انهن سان گڏ ڪم ڪرڻ جو مزو ئي پنهنجو آهي. هڪ سوال جي جواب ۾ هن چيو ته اداڪاراڻين صلاحيتن جو عمر سان ڪو به تعلق ناهي. اداڪاره ايملي بلنٽ سان گڏ ڪم ڪندي مان هر روز حيرت ۾ اچي ويندي هيس.

 

ويٽ لفٽر طلحا طالب ڪامن ويلٿ يوٿ گيمز ۾ چاندي جو ٻلو کٽي ورتو

اسلام آباد (اسپورٽس نيوز) پاڪستاني ويٽ لفٽر طلحا طالب ڪامن ويلٿ يوٿ گيمز ۾ چاندي جو ٻلو حاصل ڪري ورتو آهي، پاڪستان ويٽ لفٽنگ فيڊريشن جي صدر ميان محمد اسلم نوجوان رانديگر کي ٻلو کٽڻ تي م

بارڪون پيش ڪيون آهن، تفصيل موجب سمويا ۾ جاري ڪامن ويلٿ يوٿ گيمز ۾ پاڪستاني ويٽ لفٽر طلحا طالب 55 ڪلوگرام ڪيٽرگري جي مقابلن ۾ چاندي جو ٻلو حاصل ڪري ورتو، پاڪستاني جٿي جي دي چيف مشن ۽ پاڪستان ويٽ لفٽنگ فيڊريشن جي نائب صدر محمد راشد ملڪ ٻڌايو ته پاڪستاني رانديگر ڪامن ويلٿ يوٿ گيمز جي چئن مقابلن ۾ شرڪت ڪري رهيا آهن، جن ۾ اسڪوائش، ويٽ لفٽنگ، باڪسنگ ۽ ٽينس شامل آهن، اهي گيمز 12 سيپٽمبر تائين جاري رهنديون.

 

يو ايس اوپن ٽينس سيرا ايراني ۽ فلاويا پيني يٽا تي ٻڌل اٽالين جوڙي وومينز ڊبلز جي ڪوارٽر فائينل ۾ پهچي ويون

نيويارڪ (اسپورٽس نيوز) اٽلي جي سيرا ايراني ۽ سندس هم وطن جوڙي دار فلاويا پيني يٽا تي ٻڌل جوڙي پنهنجي شاندار ڪارڪردگي سبب يو ايس اوپن ٽينس ٽورنامينٽ جي وومينز ڊبلز جي ڪوارٽر فائينل ۾ پهچي ويون آهن. هن پري

ڪوارٽر فائينل ميچ ۾ آمريڪا جي فيفٿ سيڊ جوڙي کي هارائي ٽورنامينٽ جي ٽاپ ايٽ لاءِ ڪواليفاءِ ڪيو. تفصيل موجب آمريڪا ۾ هلندڙ سال جي چوٿين ۽ آخري گرينڊ سلم ٽينس ٽورنامينٽ ۾ کيڏيل وومينز ڊبلز جي پري ڪوارٽر فائينل رائونڊ ميچ م اٽلي جي سيرا ايراني ۽ سندس هم وطن فلاويا پيني يٽا شاندار راند پيش ڪندي آمريڪا جي راڪيول ڪوپس جونز ۽ ايبي گيل اسپيرس تي ٻڌل فيفٿ سيڊڊ جوڙي کي هارائي ميگا ايونٽ جي ڪوارٽر فائينل رائونڊ لاءِ ڪواليفاءِ ڪري ورتو.

 

اچو ته تاريخ جا ورق اٿلايون…:پنهل ساريو

سنڌ اندڙ رياستي ظلم ۽ بربريت جي تاريخ تمام پراڻي آهي، هتي مهذبپڻي جا قدر موڪلائي ويا آهن 70سالن کان نالي ماتر جهموريت جي شڪل هر دور ۾ مارشلا کان به وڌيڪ ڀوائتي رهي آهي، پر اڄوڪو دور انتهائي بدترين دور آهي، اڳ پاڪستان ۾ رهندڙ قومن کي محروم تصور ڪيو ويندو هو پر اڄ سنڌ ۽ بلوچستان جون وارث قومون انتهائي جبر ۽ تلسط هيٺ آهن، هنن قومن سان حاڪم طبقن جو رويو ٻڌائي ٿو ته هي قومون بدترين مظلوم قومن جي حيثيت ۾ ساهه کڻي رهيون آهن،                  سنڌ ۽ بلوچستان جو فرق هن ريت آهي ته سنڌ 1940 جي قرارداد کي اسيمبلي مان پاس ڪرائي گڏيل ملڪ جي ڳالهه سان رضاڪارانه طور تي سهمت ٿي هئي، جڏهن ته بلوچستان هن جوڙ جڪ کان صاف انڪار ڪري ڇڏيو هو، پر اڄ سنڌ ۽ بلوچستان ۾ هڪجهڙائي هي آهي ته ڌاڙيل پيا ڳوليون جي مصداق هتي سياسي ۽ قومي ڪارڪنن جي گهرن تي چڙهايون  ڪري چادر ۽ چوديواري جي تقدس کي پائمال ڪري عورتن، ٻارڙن ۽ پوڙهن تي نه فقط تشدد ڪيو وڃي ٿو پر انهن جي نيڻن جي ٺار جوڌن جوانن جا لاش اجتماعي قبرن يا وري ريگستان مان ملن ٿا، ان جو تازو مثال 6 سيپٽمبر پڙهه ڦٽي مهل صنعتي اعتبار کان سنڌ جي ٻئي نمبر وڏي شهر ڪوٽڙي مان نالي واري شاعر ۽ اديب ديدار شام جي گهر تي بکايل بگهڙن جيان وردي پوشن هلان ڪري نه رڳو گهر مان اله تلهه ٻهاري ورتو پر ابهم ٻالڪ ننڍڙي مخدوم بلاول کي وٺي سمورن گهر جي ڀاتين کي دهشت ۽ خوف کان هسايو ويو، جنهن مان محسوس ٿئي ٿو ته جيڪڏهن سنڌ جي راڄڌاني ڪراچي ۽ بلوچستان ۾ امن قائم ڪرڻ لاءِ ڍول سپاهين ساڳياهٿڪنڊا استعمال ڪيا آهن ته بخوبي سمجهي سگهي ٿو ته ٻنهين هنڌن تي سول ۽ ملٽري بيروڪريسي امن ڪئين قائم ڪيو هوندو، ديدار شام هڪ پرامن سياسي ڪارڪن آهي، هميشه رهبراعظم سائين جي ايم سيد جي عدم تشدد واري فڪر ۽ فلسفي جو پوئلڳ رهيو آهي، سدائين بشير خان قريشي جي سرواڻي ۾ سنڌ جو جهرجهنگ جهاڳيندو رهيو آهي، هن هر وقت شاعري ۾ حسين چهرن، ذلفن ۽ خوبصورت گلن جي ڳالهه ڪئي آهي، گلاب جي گل جهڙو ديدار شام وردي پوشن کي ڪئين دهشتگرد نظر آيو، انهي ڪري اسين سمجهون ٿا ته جڏهن قومون مظلوم هونديون آهن تڏهن قومي ڪارڪن ان جي وارثي لاءِ حوصلي ۽ همت سان اڳيان وڌندا آهن، ديدار شام جي حوصلي همت بردباري ۽ بيباڪي کان خوفزده هٿيار بند فورسز بنهه ڊڄي ويا، رينجرس ۽ پوليس ڪيترائي سپاهه وٺي ديدار شام کي قيد ڪيو پر کين خبر ناهي ته هو، ديدار شام توڙي اهڙن لکين ڪڙوڙين قومي ڪارڪنن جي سوچن ۽ فڪر کي قيد ڪري نٿا سگهن ، جيڪڏهن جهموريت جي نالي ۾ اسيمبليون رينجرس کي پنهنجي عمل کان تجاوز ڪرڻ جا اختيار ڏينديون يا وري خود اسيمبليون فوجي عدالتن جي لاءِ قانون سازي ڪنديون ته لازمي طور تي مظلوم قومن کي وڌيڪ جبر ۽ بربريت جو نشانو بڻائڻ لاءِ فورسز کي اختيار ملي ويندا.

جيڪڏهن ائين ٿيندو ته پوءِ هي ملڪ فلاحي رياست واري حيثيت وڃائي ويهندو، 6 سيپٽمبر 1965 کي بچاءُ طور ياد ڪندي حڪمران طبقا ڪشمير ۾ ٿيندڙ بربريت کي ياد ڪن ٿا پر وساري ٿا ويهن ته 70واري ڏهاڪي ۾ جناح جو پاڪستان ٽٽي ويو 90 هزار فوجي هندستان ۾ جنگي قيدي بڻياانهن ڪمزورين ۽ ڪوتاهين تي ڪڏهن به سنجيدگي سان ناهي سوچيو ويو نه رڳو اهو پر حڪمران وساري ويٺا آهن ته هنن 1940 واري قرارداد تي عمل ناهي ڪيو هنن رياستي معاملن ۾ مذهب کي مداخلت جي دعوت ڏني نتيجي ۾ سڄي ملڪ کي انتهاپسندي وڪوڙي وئي ۽ فرقيواريت هن ملڪ جي دنيا ۾ سڃاڻپ بڻجي وئي، ان وقت به ويانا ڪانفرنس ۾ سائين جي ايم سيد چيو هو ته هي ملڪ دنيا ۾ دهشتگردي جو مرڪز بڻجي ويندو پر ان جو نوٽيس نه ورتو اڄ وري جنگ جا طبل وڄايا ويا آهن.

چين راهداري کي اهميت ڏني پئي وڃي، جڏهن ته آمريڪا، هندستان ۽ متحده عرب امارات نئو محاذ کولي ورتو آهي.ان مان محسوس ٿئي ٿو ته هي حڪمران طبقا هن ملڪ کي ايٽمي جنگ طرف وٺي وڃي رهيا آهن جنهن بابت آمريڪا جي نالي واري ميگزين تجزيو ڪيو آهي ته جيڪڏهن هن خطي ۾ ايٽمي جنگ لڳي ته اوڀر ايشيا تباهه ٿي ويندي، اسين سمجهون ٿا ته حڪمران طبقن جا ڪشمير ڏانهن هڪڙا ۽ سنڌ، بلوچستان ڏانهن ٻيا رويا آهن

انهي ڪري سنڌ ۽ بلوچستان ۾ نوجوانن جي  چچريل لاشن ملڻ جو انگ شايد ڪنهن جنگ جي حالتن واري ملڪ کان وڌيڪ هجن، بهرحال جنرل نيازي کان جنرل ضياءَ تائين ۽ ان کان پوءِ مشرف جي ڪردار تائين خود فوج جي پوتاميل جي ضرورت آهي ڇاڪاڻ ته جنرل نيازي اوڀر بنگال ۾ لکين ماڻهن جو قتل ڪري جناح جي پاڪستان جي نقشي کي تبديل ڪري ڇڏيو، ۽ جنرل ضياءَ اميرالمومنين بڻجي حميد گل جهڙن ماڻهن کي متعارف ڪرايو جن ڳجها ادارا جوڙي سڄي دنيا ۾ دهشتگردن جون نرسريون پيدا ڪيون، مجاهدين کان طالبان تائين انتهاپسندي جو ٻج ڇٽيو مٿان وري جنرل مشرف چين جي ٽيڪنالاجي حاصل ڪري نواب اڪبر بگٽي، محترمه بينظير ڀٽو، سميت ملڪ جي قيادت جو قتل عام ڪرايو.

 

ڪرپشن ۽ منظر تان غائب ٿي ويل مافيا! :ۡجاويد ابڙو

قومي سلامتي خلاف دشمن عنصر سرگرم هجڻ باوجود پاڙيسري ملڪن سان لاڳاپا بهتر بڻائڻ، دهشتگردن خلاف مسلسل ڪارروائين، ڪراچي آپريشن ۽ بلوچستان ۾ ناراض ماڻهن جي جبلن تان واپسي جو سلسلو جاري آهي، اهڙي صورتحال ۾ سياسي پارٽين جون صفبنديون به منظر عام تي اچي رهيون آهن، خاص طور ڪرپشن خلاف ايف آءِ اي، نيب ۽ رينجرز جي ڪارروائين کانپوءِ ته اعليٰ کان اعليٰ حڪومتي عهدي تي رهندڙ ڪرپٽ شخصيتن ۽ سندن فرنٽ مين خلاف رستا سوڙها ڪيا پيا وڃن، ان جي ردعمل ۾ اسان کي ڪجهه پارٽين جو هل هنگامو ۽ احتجاج به نظر آيو، جنهن مان اهو تاثر پيدا ٿيڻ لڳو ته پڪ سان ڪرپشن، دهشتگردن جي مالي مدد ڪندڙن ۽ حڪومتي رٽ قائم ڪرڻ ۾ رنڊڪ بڻيل اهي ساڳيا همراهه آهن، جيڪي وڏي واڪي سان ڪرپشن، ٽارگيٽ ڪلنگ، ڀتاخوري، پلاٽن تي قبضن خلاف ڪارروايون ٿيڻ تي سياسي طور ٻوساٽجي چڪا آهن.

هن وقت مسلم ليگ (ن) به مطمئن نظر اچي رهي آهي ته سندس حڪومت ۽ اسٽيبلشمينٽ وچ ۾ ڪو به تڪرار ناهي، ملڪ ۾ سياسي ۽ عسڪري قيادت هڪ پيج تي آهن، سمورا اهم ترين قومي ۽ ملڪي معاملا گڏيل اتفاق راءِ سان طئي ٿي رهيا آهن، ان جو سڀ کان وڏو ڪارڻ عسڪري قيادت کي دهشتگردن خلاف هلندڙ ضرب عضب آپريشن ۾ مڪمل سياسي حمايت حاصل آهي، سياسي ۽ فوجي قيادت ۾ ڪراچي ۽ بلوچستان ۾ ٿيندڙ ڪارروائين تي به گڏيل اعتماد موجود آهي. اهڙي طرح پاڪ ڀارت ۽ افغانستان سان پاليسي جي حوالي سان به ڪي اختلاف نظر نٿا اچن، ان ڪري هاڻي اهو چوڻ غلط نه هوندو ته سڀ ڪجهه ٺيڪ هلي رهيو آهي پر گڙٻڙ رڳو اتي نظر اچي رهي آهي، جتي ڪرپشن خلاف ڪارروائين تي واويلا مچائي پئي وڃي، ان ڪري ملڪ ۾ هاڻي سياسي قوتن کي پنهنجي پنهنجي لڳل آهي، ڪي شخصيتون روپوش ٿي ويون آهن ته ڪي وري منظر عام تان غائب ٿي ويا آهن. عوام انهن چونڊيل نمائندن کي به ڳولي رهيو آهي جيڪي وزارت سنڀالڻ بعد روزانو شام جو پرائيم ٽائيم تي ٽي وي ٽاڪ شوز جي زينت بڻيل هوندا هئا.

سنڌ ۾ پيپلزپارٽي ڪرپشن جي الزامن کي منهن ڏئي رهي آهي ته ساڳئي وقت ايم ڪيو ايم امن امان واري صورتحال ۾ رڪاوٽ قرار ڏني وئي، ان جو سبب اهو آهي ته ڪرپشن خلاف ڪارروائين ۾ ملزم پڪڙجن ٿا ته نالو پيپلزپارٽي جو کنيو ٿو وڃي ۽ جڏهن ٽارگيٽ ڪلنگ، ڀتاخوري ۽ اسٽريٽ ڪرائيم خلاف آپريشن ۾ ڏوهاري پڪڙيا وڃن ٿا ته نشاندهي ايم ڪيو ايم جي اڳواڻن جي ڪئي وڃي ٿي، ان جو تعلق حقيقت سان هجي يا اهي معاملا الزامن تائين محدود هجن، پر اها ڳالهه هاڻي واضح ٿي چڪي آهي ته حڪومتي صفن ۾ به اهڙا عنصر شامل رهيا آهن جن يا ته ڪرپشن جا ٺيڪا سنڀاليا يا ڪي وري قبضا مافيا ۽ ڀتاخوري جهڙن ڏوهن ۾ سرگرم رهيا، ڀلي اهي موجوده حڪومتي سيٽ اپ ۾ موجود نه هجن پر انهن عنصرن جي سالن کان هلندڙ ڪارروائين جو اثر حڪومتي ڪاروهنوار تي به پيو آهي، ڪرپشن جي ڪري حڪومتي ادارن ۽ کاتن کي کوکلو بڻائڻ توڙي امن امان جي صورتحال ۾ بگاڙ پيدا ڪرڻ جي ذميوار ۽ جوابده پوءِ به حڪومت ئي آهي، ڇو ته هن وقت جيڪي ڪارروايون ٿي رهيون آهن ۽ مختلف انتظامي معاملن ۾ سڌاري جو سبب بڻجي رهيون آهن ته اهڙيون اثرائتيون ڪارروايون ان وقت ڇو نه ڪيون ويون، جڏهن پيپلزپارٽي وفاقي اقتدار تي ويٺل هئي، نه رڳو وفاق پر سنڌ، بلوچستان ۽ پنجاب ۾ به حڪومتون ڪيون؟ يقينن پيپلزپارٽي جي اڳوڻي دور حڪومت ۽ موجوده اقتداري ڌرين جي ڪارروائين جي واضح فرق پيپلزپارٽي جي ڪارڪردگي تي ناڪاري ۽ هاڃيڪار اثر ڇڏيا آهن، جنهن سبب اڄ پ پ ۽ عوام وچ ۾ وڏيون وڇوٽيون پيدا ٿي رهيون آهن. عجيب صورتحال آهي ته جيڪو ماضي جي حڪومت ۾ جگري يار هو، اڄ ان کي دشمن جي نگاهه سان ڏٺو پيو وڃي. پارٽي اندر پارٽيءَ جي ئي ماڻهو کان ان ڪري خوف ڪيو پيو وڃي ته کيس سندس خلاف سلطاني گواهه بڻائڻ لاءِ تيار ڪيو پيو وڃي!

ايم ڪيو ايم جڏهن ڪراچي آپريشن سبب پاڻ کي متاثر ڌر پيش ڪرڻ لڳي ته ڪيتريون ئي ڪهاڻيون بڻجڻ لڳيون، پر ان ۾ به هاڻ ڌڙابندي شروع ٿي وئي آهي، ان ڳالهه جو الطاف حسين به اعتراف ڪري چڪو آهي پر پيپلزپارٽي ته ان کان مختلف جماعت آهي، جنهن جو منشور عوام جي خدمت ڪرڻ هو، تعليم، صحت ۽ زندگي جو معيار بهتر بڻائڻ هو، سوال اهو آهي ته پارٽي اندر احتساب ڇو نه ڪيو ويو، ڇو انهن عنصرن کي ڇوٽ ڏني وئي، جن جي ڪري ڪرپشن جي الزامن جو طوفان برپا ٿيو ۽ اها پارٽي، جنهن جي خالق هن ملڪ کي آئين ڏنو، قوم ۾ ترقي ۽ خوشحالي جو جوش پيدا ڪيو ۽ پارٽي جو اهڙو منشور ڏنو، جيڪو اڄ به سمورين سياسي پارٽين کان بهترين منشور سمجهيو وڃي ٿو، پر ان ۾ ڪاميابي نه ملڻ جو ڪارڻ صرف ۽ صرف انهن نظرين تي عمل نه ڪرڻ آهي، جيڪي شهيد ڀٽو عوام لاءِ پيش ڪيا هئا.

اهو تاثر به پيدا ڪيو ويو ته جيڪي شخصيتون ڪرپشن جي الزام ۾ گرفتار ڪيون ويون، انهن دهشتگردن جي مالي مدد به ڪئي، ان ڪري منجهن هٿ وڌو ويو. آخر ان ڳالهه کي تسليم ڇو نٿو ڪيو وڃي ته غير قانوني وسيلن، پلاٽن ۽ لاقانونيت سان دهشتگردي ۽ امن امان جي صورتحال خراب ڪندڙن کي ڇوٽ ملي ٿي، پلاٽن تي قبضن، ڀتاخوري ۽ اسٽريٽ ڪرائيم سان دهشتگردن جي ئي حوصله افزائي ٿئي ٿي، ان ڪري ڪرپشن جي گهيري ۾ ڀلي ڪنهن به سياسي يا غير سياسي ڌر جو ماڻهو آيو ته هن کي احتساب جي مرحلي مان گذرڻو پوندو. جيڪڏهن هن وقت دهشتگردن سان گڏ ڪرپٽ مافيا خلاف به ڪارروايون ڪيون پيون وڃن ته پوءِ واويلا، گوڙ ۽ شور ڇا جو؟ ڇا هنگامو ۽ احتجاج ڪري ڪرپشن ۾ ملوث هجڻ جي ثابتي ڏني پئي وڃي؟ ملڪ ۾ جتي به دهشتگردي، لاقانونيت، ڪرپشن ۽ اختيارن جو ناجائز استعمال ڪرڻ جو سلسلو هلندو، اتي پوري طاقت سان ڪارروائي ڪرڻي پوندي پوءِ اتي وفاقي حڪومت سان واسطو رکندڙ اعليٰ شخصيت يا عهديدار ڇو نه هجي.

جي ايڇ ڪيو ۾ يوم دفاع جي موقعي تي آرمي چيف جنرل راحيل شريف به پنهنجي خطاب ۾ اهو واضح ڪيو ته اهي عنصر، جيڪي نه رڳو ڪرپشن ڪن ٿا، پر ان سان گڏوگڏ دهشتگردن جا مالي مددگار ۽ همدرد بڻيل آهن، انهن خلاف به ڀرپور ڪارروائي ڪئي ويندي، سندس تقرير مان اها ڳالهه به پڌري ٿي چڪي آهي ته فوج به هن وقت دهشتگردن سان گڏوگڏ ڪرپٽ ماڻهن کي انجام تائين پهچائڻ جي خواهشمند آهي، اسان جي ملڪ ۾ هي پهريون موقعو آهي ته دهشتگردن، ڪرپٽ مافيا ۽ امن امان جي صورتحال ۾ رڪاوٽ بڻيل عنصرن خلاف ڪارروائين سميت ڪيترن ئي مفادن تي پارليامينٽ، سپريم ڪورٽ، پاڪ فوج ۽ ميڊيا سميت ملڪ جا سمورا ادارا هڪ پيج تي آهن، جيڪڏهن اهو ئي سلسلو جاري رهيو ته هڪ ڏينهن ضرور ايندو جو هن ملڪ کي ترقي، خوشحالي ۽ استحڪام کان ڪير به روڪي نه سگهندو.

 

سنڌ ۾ بلدياتي چونڊن جو سرگرميون…..

مڪاني چونڊن وارو معاملو ڪيتري ئي وقت کان مونجهاري جو شڪار هو. اڳوڻي توڻي موجوده سرڪار مڪاني چونڊن کان نٽائڻ لاءِ هر قسم جو حربو هلايو، پر هن ڀيري سپريم ڪورٽ سندن سمورا حربا ناڪام بڻائيندي حڪم جاري ڪيو ته ڪنهن به صورت ۾ چونڊ عمل کي يقيني بڻايو وڃي. اهڙي حڪم تي سڀ کان پهريان شورش ۾ ڦاٿل بلوچستان صوبي عمل ڪري ڏيکاريو، تنهن بعد خيبرپختونخوا پڻ مڪاني چونڊن ڪرايون، جنهن کانپوءِ سنڌ ۽ پنجاب جي حڪومتن لاءِ ممڪن نه هو ته اُهي گهڻي وقت تائين مڪاني چونڊن کان لنوائي سگهن. تنهنڪري زور اڳيان زاريءَ جيان ٻنهي صوبن جي سرڪار مِٺي به ماٺ، مُٺي به ماٺ واري چوڻيءَ تي عمل ڪندي چونڊ عمل جون تياريون شروع ڪري ڏنيون ۽ اُن جي پهرين مرحلي لاءِ نامزدگي فارم جمع ٿيڻ جو سلسلو شروع ٿي ويو آهي، جيڪا هڪ چڱي ڳالهه آهي. هيٺين سطح تي ماڻهن جا ترت ۽ تڪڙا مسئلا حل ڪرڻ لاءِ مڪاني نظام جي تمام گهڻي اهميت سمجهي وڃي ٿي، پر بدقسمتيءَ سان اسان وٽ ان نظام کي سدائين جمهوريت مخالف قوتن پنهنجي مفاد لاءِ استعمال ڪيو آهي. ضياءَ جو ريفرنڊم هُجي يا مشرف جو، اُنهن مڪاني نظام ذريعي ئي پنهنجي اقتدار کي طول ڏنو. جنهنڪري به جمهوري پارٽيون ان نظام کي ناپسند ڪنديون آيون آهن. اُن کان علاوه مڪاني چونڊن سان جمهوري حڪومتن کي پنهنجي اختيارن ۾ پڻ ڪميءَ جو احساس ٿيندو آهي، تنهنڪري ئي هر دؤر ۾ اُنهن مڪاني نظام کان نٽائڻ جي ڪوشش ڪئي آهي. اِهو سڀ اِن ڪري به آهي جو اسان وٽ سياست جو مقصد فلاح بهبود نه پر اختيارن جي حاصلات هوندو آهي. ڪهڙي به پارٽي هجي، سندن منشور ڀلي ته عوام ۽ مُلڪ جي خدمت تي ٻڌل هُجي، پر اُهي ڪوشش فقط پاڻ ۽ پنهنجن ماڻهن کي بااختيار بڻائڻ لاءِ ڪنديون آهن. انهن مان ڪنهن کي به عوام سان ڪڏهن سروڪار ناهي رهيو، جنهن سبب ئي مُلڪ ۾ غربت جي شرح جيئن پوءِ تيئن وڌندي رهي ٿي، ۽ مسئلا آهن جن جو نه ڇيهه نه وري ڇيڙو ڏسڻ ۾ ٿو اچي! سياست اهڙو مهانگو سودو بڻايو ويو آهي، جو عام ماڻهو، صوبائي يا قومي اسيمبليءَ جي سيٽ تي اليڪشن وڙهڻ جو خواب به نٿو ڏسي سگهي، ڀلي ته هُو سياست توڻي سماجيات ۾ ڪيتري به قابليت ڇونه رکندو هُجي. اُن جي ابتڙ ڪوڙيون ڊگريون وٺي، جاگيردار، چوڌي ۽ سرمائيدار وڏي سيڙپ سان ڪامياب ٿي وڃن ٿا. هاڻ سوچڻ جي ڳالهه اِها آهي ته جيڪو ماڻهو صوبائي يا قومي اسيمبليءَ جي سيٽ کٽڻ لاءِ ڪروڙين رپيا خرچ ڪري ٿو، سو پنهنجو خرچ اوڳاڙڻ بجاءِ ويهي ماڻهن جا مسئلا حل ڪري، اِهو ڪيئن ممڪن آهي؟ بلڪه اُن ماڻهوءَ جي ته هرممڪن اِهائي ڪوشش هوندي ته هُو پنهنجي سيڙپ سان گڏوگڏ نفعو پڻ ڪمائي. اِهوئي ڪجهه گذريل ڪيتري ئي وقت کان هتي جي سياست ۾ ڏسڻ ايندو رهي ٿو. بلڪ هاڻ ته ڪيترن ئي ميمبرن جي ڏوهاري گروهن سان واسطن جون پڻ رپورٽون اچي رهيون آهن. مطلب ته اسان وٽ سياست ڪمائيءَ جو هڪ ذريعو بڻيل آهي. نتيجي ۾ اسين پنهنجي صورتحال جو جڏهن جائزو وٺون ٿا ته اُها اهڙن ملڪن کان به بدتر ڏسڻ ۾ اچي ٿي، جيڪي اسان کان به گهڻو پوءِ آزاد ٿيا هُئا. اسان وٽ سڀئي اختيار پنهنجي هٿ ۾ رکڻ جو پڻ رجحان آهي، جو پنجاب جي وڏي وزير لڳ ڀڳ سموريون وزارتون پنهنجي ئي هٿ وس ڪري رکيون هيون. هتي سنڌ ۾ پڻ گهڻي ڀاڱي ساڳي صورتحال آهي. جيڪڏهن هڪ شخص جي هٿ ۾ سڀئي وزارتون ناهن، تڏهن به ذاتي پسند ۽ ناپسند کي وزارتن جي ورڇ وقت ضرور سامهون رکيو وڃي ٿو. جنهن ڪري عوام جي فلاح وارا ڪم سدائين رولڙي جو شڪار رهن ٿا. اهڙي صورت ۾ مڪاني نظام جو هُجڻ لازمي بڻجي وڃي ٿو، جنهن سان گهٽ ۾ گهٽ عام ماڻهوءَ لاءِ اِهو ته ممڪن آهي ته هُو پنهنجي گهٽي، محلي يا پاڙي جي دانهن علائقي جي چونڊيل نمائندي تائين ته رسائي سگهي ٿو. تنهنڪري هاڻ جڏهن سنڌ، پنجاب جي حڪومتن مڪاني چونڊن جي حامي ڀري به ورتي آهي ته انهيءَ عمل کي صاف شفاف بڻائڻ ضروري آهي،