تازيون خبرون

Daily Archives: September 6, 2015

فلم ”هيٽ اسٽوري3“ يا 4 ڊسمبر تي سينيما گهرن جي زينت بڻبي

ممبئي (شوبز نيوز) بالي ووڊ فلم ”هيٽ اسٽوري 3“ چار ڊسمبر تي سينيما گهرن جي زينت بڻبي. ڀارتي ميڊيا مطابق فلم جي پروڊيوسر گهوشن ڪمار ۽ هدايتڪار وشال پانڊي چيو آهي ته ان فلم جي اهم ڪاسٽ ۾ ڪرن سنگهه، ڊيزي شاهه، زرين خان ۽ شرمين جوشي شامل آهن. اها فلم ”هيٽ اسٽوري“ جي سلسلي جي ٽين فلم آهي. فلم منفرد موضوع کڻي آئي آهي. فلم جو ٽريلر جاري ٿي چڪو آهي جنهن تي مداحن سٺو رد عمل ظاهر ڪيو آهي.

 

سرينا وليمز يو ايس اوپن وومينز سنگلز جي چوٿين رائونڊ ۾ پهچي وئي

نيويارڪ (اسپورٽس نيوز) سرينا وليمز ۽ ميڊيسن ڪيز يو ايس اوپن وومينز سنگلز جي چوٿين رائونڊ ۾ جڳهه ٺاهي ورتي. تفصيل موجب نيويارڪ ۾ جاري يو ايس اوپن وومينز سنگلز مقابلن جي ٽئين رائونڊ ۾ عالمي نمبر هڪ آمريڪا جي سرينا وليمز هم وطن هريف بيٿائن ميٽڪ سينڊز کي 1-2 تان هارايو، سرينا کي پهرين سيٽ ۾ شڪست جو منهن ڏسڻو پيو پر هن غلطين تي جلد ضابطو آندو ۽ ٻئي سيٽ کٽي ڪري چوٿين رائونڊ لاءِ ڪواليفاءِ ڪري ورتو. ا

 

20هين قومي ايج گروپ جونيئر سوئمنگ چيمپيئن شپ 16 آڪٽوبر کان ٿيندي

اسلام آباد (اسپورٽس نيوز) 20 هين قومي ايج گروپ جونيئر سوئمينگ چيميپئن شپ ايندر مهيني 16 آڪٽوبر کان عديل خان سوئمنگ پول پشاور ۾ شروع ٿيندي جنهن ۾ سڄي ملڪ مان تيراڪ مختلف ڪيٽيگرين جي مقابلن۾ پنهنجي صلاحيتن جا جوهر ڏيکاريندا. خيبر پختونخواه سوئمنگ ايسوسيئيشن جي سيڪريٽري آصف اورڪزئي پنهنجي بيان ۾ ٻڌايو آهي ته چيمپيئن شپ ۾ ميزبان خيبر پختونخواه سميت سنڌ، پنجاب، اسلام آباد، گلگت بلتستان، آزاد ڄمون ۽ ڪشمير ۽ فاٽا مان 80 جي لڳ ڀڳ تيراڪ شرڪت ڪندا.

 

جنگ صرف هٿيارن سان نه پر جذبن سان کٽي ويندي آهي: صلاح الدين عباسي

اها هڪ حقيقت آهي ته جنگ صرف هٿيارن سان نه پر جذبن سان کٽي ويندي آهي ۽ ان جو واضح مثال 1965ع واري پاڪ – ڀارت جنگ آهي. پاڪستان هڪ پر امن ملڪ آهي پر جڏهن به ان جي مٿان جنگ مڙهي وئي آهي ته پاڪستاني فوج پنهنجي پيشيور مهارت، جرئت ۽ بهادري ۽ جانين جي قربانين سان ان جو منهن ٽوڙ جواب ڏنو آهي. 6 سيپٽمبر 1965 واري جنگ ان جو واضح مثال آهي جنهن ۾ پاڪ فوج توڙي عوام پنهنجي  ملڪ جي سلامتي لاءِ وڏي ويڙهه ڪئي ۽ جانيون قربان ڪيون پر وطن جي سر زمين تي حملو ڪندڙن جا ارادا خاک ۾ ملائي ڇڏيا. ان ڪري پاڪستان ۾ 6 سيپٽمبر جو ڏهاڙو ٿيندڙ جنگ جي شهيدن کي خراج عقيدت پيش ڪرڻ لاءِ ملهايو ويندو آهي. 6 سيپٽمبر اهو ڏينهن آهي جنهن ڏينهن پاڪستان جي هٿياربند فوج ڀارت جي فوجي جارحيت جو مقابلو ڪندي نه صرف لاهور، سيالڪوٽ ۽ ٻين ڪيترن ئي علائقن جي سرزمين جو دفاع ڪيو پر دشمنن کي ڀرپور جواب ڏنو. 1965 جي پاڪ ڀارت جنگ جا واقعا پاڪ فوج جي عظيم قربانين سان ڀريل آهن. ڀارت جي فوج 6 سيپٽمبر 1965 تي لاهور ۽ قصور، سيالڪوٽ ۽ ٻين مختلف علائقن تي حملو ڪيو ته پاڪ فوج نه صرف پنهنجو دفاع ڪيو پر دشمنن کي منهن ٽوڙ جواب به ڏنو، هي اهي ڏينهن هئا جو پاڪستان جي هوائي فوج جي سپوت ايم ايم عالم پنهنجو ايف 86 جهاز اڏائيندي گهٽ کان گهٽ وقت ۾ دشمنن جا 5 ويڙهاڪ جهاز هيٺ ڪيرائي عالمي رڪارڊ قائم ڪيو. چونڊه جي هنڌ ٿيندڙ ٽينڪن جي ويڙهه کي دنيا جي وڏين جنگين ۾ شمار ڪيو وڃي ٿو، هي اها جنگ آهي  ڀارت سيالڪوٽ جي محاذ تي هڪ آرمڊ ۽ 3 ملٽري ڊويزن جي وڏي فوجي طاقت سان حملو ڪيو هو پر پاڪستاني فوج بهادري ۽ جرئت سان وڙهندي اڳتي وڌي ۽ جنگ کي ڀارتي سر زمين تائين کڻي وئي، جنهن جي نتيجي ۾ ڀارتي اڳواڻن بوکلاهٽ جو شڪار ٿي اقوام متحده ۾ سيڪيورٽي ڪائونسل جو رخ ڪيو ۽ جنگ بندي جي درخواست  ڪري ڇڏي. 10 جنوري 1966ع ۾ معاهدي تاشقند جي تحت ٻئي فوجون  جنگ کان پهرين واري پوزيشن تي واپس هليون ويون. هن 65 واري جنگ جي اهم ڳالهه اها آهي ته پوري قوم پاڪ فوج سان گڏ هئي ۽ جنگ ۾ فوج سان ڀرپور ساٿ ڏنو. ان ۾ ڪو به شڪ ناهي ته پاڪستان هڪ پر امن ملڪ آهي پر جڏهن به ان جي مٿان جنگ مڙهي وئي آهي ته هن دشمنن کي ڀرپور جواب ڏنو آهي ۽ پاڪ فوج پنهنجي پيشيور مهارت، جرئت ۽ بهادري ۽ قربانين جا نوان نوان رڪارڊ قائم ڪندي رهي آهي. قوم ۽ ملڪ جي تاريخ ۾ ڪجهه ڏينهن اهڙا هوندا آهن جيڪي ٻين ڏينهن جي ڀيٽ ۾ وڌيڪ قرباني گهرندا آهن. اهي ڏينهن مائرن کان پنهنجا جگر پٽ، پوڙهن کان آخري سهارو قربان ڪرڻ جو مطالبو ڪندا آهن. اهي تاريخي ڏينهن تمام اهم هوندا آهن ۽ قرباني گهرندا آهن ۽ جيڪڏهن قرباني نه ڏني وئي ته پوءِ وطن پنهنجو وجود وڃائي ويهندا آهن. قومون تاريخ جو حصو ٿي وينديون آهن ۽ آزادي جي بدران غلام جي زندگي قومن جو مقدر بنجي ويندي آهي. 1965ع واري پاڪ ڀارت جنگ ۾ پاڪ فوج ۽ ملڪ جي عوام گڏجي سر سان ڪفن ٻڌي جنگ ڪئي ۽ جسم سان بارود ٻڌي دشمنن جي ٽينڪن آڏو ليٽي پيا ۽ دشمنن جو مقابلو ڪيو. عوام پنهنجو سڀ ڪجهه مال ملڪيت دولت وطن جي دفاع خاطر قربان ڪيو ۽ دشمنن جا ناپاڪ ارادا مٽي ۾ ملائي ڇڏيا جيڪي پاڪستان جي نقشي کي مٽائڻ آيا هئا اهي پنهنجي سيني تي ناڪامي جو داغ هميشه لاءِ لڳائي واپس ويا، اهي شايد ان ڳالهه کان واقف نه هئا ته جيڪا سر زمين شهيدن جي رت سان سيراب ٿيندي آهي، اها وڏي زرخيز ۽ شاداب هوندي آهي، ان ڌرتي جا سپوت پنهنجي ڌرتي جي طرف اٿندڙ هر آڱر کي ڪٽي ڇڏيندا آهن ۽ ان طرف ميري اک سان ڏسندڙ جي اک کي ڪڍي ڇڏڻ جي صلاحيت رکن ٿا ۽ پنهنجي ڌرتي خاطر جان جي قرباني ڏئي سگهن ٿا پر وطن کي ڪنهن به قسم جو نقصان ٿيڻ ناهن ڏيندا. ان جو بهترين  مظاهرو 6 سيپٽمبر 1965 ع واري جنگ ۾ ڪيو ويو، انتهائي جرئت، بهادري جا مثال قائم ڪيا ويا جيڪي تاريخ ۾ سونهري اکرن سان لکيا ويندا. تاريخ لکي ٿي ته اهي ئي قومون پنهنجو وجود برقرار رکي سگهنديون آهن جيڪي پنهنجو دفاع مضبوط رکي سگهنديون آهن.

 

يوم دفاع پاڪستان……دفاع جي هڪ بي مثال تاريخ : جاويد مصطفيٰ ڪانڌڙو

اڄ ملڪي حالات ڏسي هر محب وطن پاڪستاني جي دل رت جا ڳوڙها ڳاڙي ٿي ڇو ته ڪجهه ملڪي ته ڪجهه غير ملڪي دشمن قووتون پاڪستان جون پاڙون کوکليون ڪرڻ گهرن ٿا جيڪا اسان لاءِ انتهائي فڪر مند لمحو آهي، اڄ جي اهڙي مشڪل وقت ۾ اسانجي پاڪ فوج ملڪ ۽ قوم جي دفاع لاءِ هر وقت ميدان عمل ۾ آهي ۽ دشمنن جا سڀ ڪڌا اراده مٽيءَ ۾ ملائي ڇڏيا آهن، هن وقت اسان کي وري 1965ع واري جنگ جهڙي قومي جذبي جي اشد ضرورت آهي، اڄ جو ڏينهن اسان جي ٻڌي ۽ ايڪي جو هڪ وڏو مثال آهي هن ڏينهن پنهجي سيني اندر هڪ وڏي تاريخ سانڍي رکي آهي جنهن تي ڪجهه روشني وجهڻ گُهران ٿو.

اڄ پاڪستان ۾ دفاع جو ڏينهن روايتي جوش،قومي جذبي ۽ حب الوطني جي چاه سان ملهايو پيو وڃي. اڄ جو ڏينهن هر محب وطن پاڪستاني لاءِ نوان، نوان جذبا اڀاري ٿو ۽ پنهجي وطن ۽ ديس تي سِر ڏيڻ جو سبق ڏئي ٿو، سنه 1965ع ۾ اڄ جي ڏينهن ۾ هندستان بنا ڪنهن جواز ۽ بنا ڪنهن سبب جي اسان جي پياري ملڪ تي حمله آور ٿيو ۽ اها اڳڀرائي بين الاقوامي قانون ،معاهدن ۽ اصولن جي سرا سر ڀڃڪڙي هئي جيڪا هڪ وڏي دشمني ۽ ساڙ تي مبني هئي ۽ هندستان جي انهي جارهيت کي ڪشمير جي مسئلي طور پيش ڪيو ويو، هن جنگ ۾ پاڪ فوج هندستاني فوجين کي رڪ جا چڻا چٻرائي ڇڏيا، سڄي قوم سندن بهادري تي اڄ به انتهائي گهڻو فخر ڪري ٿي. پاڪستان جي هٿيار بند فوج هندستان جي ان اڳرائي جو جيڪو منه توڙ جواب ڏنو ۽ پاڪستاني فوج جي جوانن جنهن حوصله ۽ عجاعت سان پاڪستان ۾ گهڙي ايندڙ هندستاني فوجين جو بهادري سان مقابلو ڪيو جنهن تي دشمن جون واين بتال ٿي ويون، ۽ پاڪ فوج جي جوانن ملڪ ۽ قوم جو دفاع ڪندي شهادت جو جام پيتو انهي بابت ناقابل فراموش واقعا پاڪستان جي تاريخ جا سونهري باب بڻجي ويا آهن، انهن جي مطالعي سان پاڪستاني قوم ۽ قوم جي نئي نسل کي پاڪستان جي ديرينه دشمنن جي ناپاڪ ارادن ۽ سازشن جو پتو پوندو ته اصل ۾ پاڪستان دشمنن جي اکين ۾ ڪنڊي جو مثال آهي، ڇاڪاڻ ته پاڪستان الحمد الله دنيا اسلام جي قيادت ڪرڻ جي توفيق ۽ طاقت رکي ٿو ۽ اها ڳالهه پاڪستان، اسلام ۽ مسلمانن جي دشمنن کي پسند نه آهي،

اهي يا ته پاڪستان کي ڪمزور ڏسڻ جا خواهشمند آهن يا پاڪستان کي ٽڪرا،ٽڪرا ڪري ختم ڪرڻ کي پنهجو فرض سمجهن ٿا، اهي سبب آهي جو پاڪستان جي قيام کان وٺي اڄ تائين هندستان پاڪستان تي ٽي دفعا حمله آور ٿيو آهي ، انهن ٽن جنگين ۾ سن 1965 جي جنگ کي تمام گهڻي فوقيت حاصل رهي آهي ڇاڪاڻ ته پاڪستان جي هٿيار بند فوج ۽ پاڪستان جي قوم جي متحد طاقت بڻجي هندستان جا گوڏا کوڙايا ۽ هندستان کي ٺاهه لاءِ مجبور ڪري ڇڏيو.جنهن ٺاهه جي مطابق پاڪستان جي جي بهادر فوجين هندستان ۾ داخل ٿي هندستان جي جن علائقن تي قبضو ڪيو هئو، اهي واپس هندستان جي حوالي ڪيا هئا، پاڪستان جي انهي بي مثال ڪاميابي کي هر سال اسين پاڪ فوج سان گڏجي ملڪ عزيز جي دفاع جي عزم ۽ قومي جذبي سان ملهائيندا آهيون. اسين هن دفاع جي ڏينهن تي عهد ڪريون ۽ اهو حلف کڻو ته اسين اسلام جي روشني ۽ اسلام جي بنيادي اصولن ۽ عقيدن موجب حقدار ڀائرن کي سندن حق وٺي ڏينداسين، هنن کي اسلامي عدل ۽ انصاف تحت حق وٺرائي ڏينداسين ۽ مسلمان توڙي غير مسلمان سان برابري واري اسلامي انساني اصولن تي عمل ڪنداسين ۽ اڄ اسان پنهنجي ان عزم کي ورجايون ٿا ته اسان سيپٽمبر جي جنگ جي جذبي جي روح کي برقرار رکنداسين ۽ ملڪي سلامتي ۽ سالميت جي تحفظ لاءِ ان طرف کڄندڙ ميري اک ڪڍي ڇڏينداسين.

 

سنڌ جيڪا سورن ۾ آهي………..

هڪڙي راءِ اها آهي ته سنڌ جي عوام کي يا ته آپگهات واري رستي تي هلندي ۽ ساڳئي رستي تي هلندي هلندي پاڻ کي ختم ڪرڻ جو سوچي ”رضا تي راضي“ رهڻ کان اڳتي ڪجهه به نه سوچڻ واري قوم دشمن ۽ عوام دشمن لاڙي تي سوچڻ گهرجي ۽ ڪنهن به نموني ڪابه اهڙي ڳالهه نه ڪرڻ گهرجي جنهن سان سنڌ جي ترقي ٿئي، سنڌ اڳتي وڌي سگهي ۽ سنڌ جيڪا ڌٻڻ ۾ ڦاسي پيئي آهي اتان نڪرڻ جي ڪوشش ڪجي.  ٻي راءِ اها آهي ته چنڊ تي پهچڻ جا خواب ڏسڻ کان بهتر آهي ته زمين تي ئي ڪا چانڊوڪي پيدا ڪجي. ان ڪري سڀ کان بهتر ڳالهه اها آهي ته جيڪي ڪجهه هاڪاري ۽ مثبت ڪرڻو آهي اهو هتي ڪرڻو آهي ۽ هتي ڪرڻو پوندو. جيڪي ڪجهه سنڌ ۽ عوام واسطي ڪرڻو آهي اهو سادي کان اُچي پاسي ڪرڻ گهرجي ۽ ان لاءِ وڏن خوابن جي وڏن تعبيرن لاءِ ننڍا ننڍا قدم کڻڻ سکڻ گهرجن. ان سان سنڌ جيڪا بيهي رهي آهي يا بيهاري ويئي آهي اها آهستي آهستي ئي سهي چرڻ پرڻ شروع ڪري سگهندي. سنڌ ۾ جيڪي ٽارگيٽيڊ آپريشن هلي رهيو آهي اهو مختلف قسمن کان پنهجا تاثر به ڇڏي رهيو آهي پر ان جي آڙ ۽ اوٽ ۾ سنڌ سرڪار جا ڪيئي پرت سنڌ کي هڪ هنڌ بيهارڻ جي ڪوشش ڪري رهيا آهن. ان اهم ترين ڳالهه کي سمجهڻ جي پهريان کان وڌيڪ ضرورت آهي. سنڌ ۾ گذريل ستن ورهين کان تعليم کاتو توڙي سنڌ جي تعليم نشاني تي آهن. هڪ پاسي ميڊيا ۾ ٻڌايو ويو ته ”ڪوڙيون ڀرتيون“ ٿيون آهن، جنهن ۾ گهٽ ۾ گهٽ 13 هزار ڪوڙا ملازم ڀرتي ٿيا آهن. ستن ورهين ۾ ان ڳالهه کي هڪ پاسي ڪري ان تي ئي سڄي معاملي کي بيهاري باقي ڳالهين کان ڪن لاٽار ڪئي وئي آهي. ٻئي پاسي ٻڌايو ويو آهي ته سنڌ ۾ گهوسٽ اسڪول ۽ استاد آهن، انهن گوسڙو ماسترن ۽ بند پيل اسڪولن جي باري ۾ ست ورهيه گذري ويا اڃا پيون ڪارروايون هلن. انهن ڪاررواين هلندي سنڌ جي تعليم کي جنهن تيزي جي گهرج هئي سا وري بيهاري ويئي ته پهريان انهن انڪوائرين جا نتيجا نڪرن ته پوءِ ٿا اڳتي وڌون. تعليم لاءِ اڪثر چيو ويندو آهي ته تعليم انسان جي ٽين اک آهي، اسان وٽ نه پنهنجون ڏسڻ واريون ٻه اکيون آهن نه وري اها ٽين اک موجود آهي. ڳالهه سولي ۽ سادي آهي ، جيئن دنيا ۾ عالم چوندا آهن ته  ”جيڪڏهن ڪنهن قوم کي تباهه ڪرڻو هجي ته ان قوم جي تعليم تباهه ڪيو ته اها قوم پاڻمرادو تباهه ٿي ويندي.” ان لاءِ سنڌ سرڪار کي نه ٽارگيٽيڊ آپريشن جو انتظار ڪرڻ گهرجي، نه وري انڪوائرين جو، تعليم کي تيز ڪرڻ ۽ اسڪولن کي هلائڻ لاءِ ڏينهن رات ڪم ڪيو وڃي. سنڌ جيڪي سورن ۾ آهي، جنهن جي تعليم تباهه ٿي رهي آهي ، جنهن ڪري سنڌ جو معاشرو ۽ سماج برباد ٿي رهيو آهي، ان تباهي ۽ بربادي کان بچڻ لاءِ ” ڀلي ٿورو هجي پر شروع ڪرڻ“ واري روئي تي عمل ڪرڻ گهرجي. سنڌ جو تعليم کاتو سنڌ جي سمورن ضلعن منجهان ڪجهه ضلعن کي ”ماڊل“ يا مثالي ضلعا بڻائي انهن جي تعليم تي سموريون توانايون وقف ڪري. اها ڳالهه ڪرڻ به گهرجي ته ”اين ٽي ايس“ سرشتي آهر ماستري جي نوڪرين جي حوالي سان گهڻو ڪري  ميرٽ جو خيال رکيو ويو آهي، جن کي به وڏي جدوجهد کانپوءِ مس مس وڃي آرڊر مليا آهن. ان سلسلي ۾ تعليم جي وزير جي خاص ڪوششن ۽ تعليم جي کاتي طرفان ماستري جي نوڪرين ۾ ميرٽ جي لتاڙ بلڪل نه ڪرڻ يا گھٽ کان گھٽ ڪرڻ کي ضرور ساراهڻ گھرجي. سنڌ جي تعليم کي سڌارڻ جي حوالي سان  ضروري آهي ته جاري ڪاررواين،  بند پيل اسڪولن کي کولرائي انهن ۽ ٻين هلندڙ اسڪولن ۾ مقرر استادن کي تعليم لاءِ پابند بڻائڻ واسطي تربيت جو انتظام ڪرڻ گهرجي.  تعليم جي معيار کي بهتر بڻائڻ لاءِ تعليمي نصاب تي پڻ نظرثاني  ڪري سائنسي ۽ عقلي بنيادن تي مشتمل نصاب رائج ڪرڻ ۽ استادن کي ايمانداريءَ سان نوڪري ذريعي ڪاپي ڪلچر ختم ڪرايو وڃي. جيئن پنجاب سرڪار ”دانش“ اسڪولن جي نالي سان هر تعلقي ۾ غريب ۽ امير لاءِ هڪجهڙي تعليم جو بنياد وڌو آهي، جنهن جا تمام وڏا ۽ بهترين اثر سامهون اچي رهيا آهن، ان لاءِ پڻ سنڌ سرڪار کي سوچڻ گهرجي. يونيورسٽين اندر سياست جي نالي ۾ جاري غنڊاگردي ۽ هٿياربند ڪلچر جو خاتمو آڻڻ گھرجي. سنڌ جي شاگردن ۽ شاگردياڻين کي سنڌ ۽ پاڪستان اندر توڙي ٻاهر معياري تعليم حاصل ڪرڻ لاءِ وظيفن جو جائز  بندوبست ڪرڻ لاءِ سنڌ جي شاگردن سان جيڪا انياءَ ٿيا آهن، انهن جي خاتمي واسطي پڻ خاص ڪوششون ڪيون وڃن.