تازيون خبرون

Daily Archives: September 2, 2015

بالي ووڊ اداڪارا ڪرينا ڪپورڪلاسيڪل ڊانس سکڻ جي خواهشمند

ممبئي(شوبز نيوز) بالي ووڊ اداڪرا ڪرينا ڪپور پنهجيهڪ انٽرويو ۾ چيو آهي ته مونکي ننڍ پڻ کان ئي ڪلاسيڪل ۽ ڪٿڪ ڊانس سکڻ جو شوق هو ۽ جلد ئي مان ان لاءِ تربيت وٺنديس، ڪرينا ڪپور ٻڌايو ته منهجي ڀيڻ ڪرشما ڪپور ڪلاسيڪل ناچ ۾ مهارت رکي ٿي ۽ هوءِ ان جي صلاحيت کان ڏاڍي متاثر آهي،جواني ۾ ان کي رقص ڪندي ڏسي شيشي اڳيان انهي جي نقل ڪرن جي ڪوشش ڪندي هيس،ڪرينا  کي يقين آهي ته ڀارتي عورتون پنهجي روايتي ويسن ۾ ڏاڍيون سهڻيون ڏسڻ ۾ اينديون آهن. هڪ سوال جي جواب ۾ سندس چوڻ هو ته فيشن جي لاءِ اسان اولهه جي پيروي شروع ڪري ڏيندا آهيون پر هڪ عام ساڙهي به ڀارتي عورتن کي بنا ڪنهن ڪوشش جي خوبصورت بڻائي ٿي ڇڏي، جڏهن ته مداح به مونکي ڀارتي، ڪرينه هڪ سوال جي جواب ۾ چيو ته منهنجي تعريف ڪرڻ تي سيف علي خان ڪو به اعتراض يا ڪاوڙ نه لڳندي ڇو ته منهنجي ڀرپاسي هي سڀ تعريفون ان جي ڪري ئي آهن ۽ مان سمجهان  ٿي منهجو مڙس سيف علي خان خوشقسمت انسان آهي، ڇو ته مان سندس زندگي ۾ آهيان

 

هالي ووڊ اداڪار مينڊي مور سماجي مقصدن لاءِ ڀارت جو دؤرو ڪندي

لاس اينجلس(شوبز نيوز) هالي ووڊ اداڪاره ۽ گلوڪاره مينڊي مور سماجي مقصدن لاءِ ڀارت جو دؤرو ڪندي. آمريڪي ميڊيا مطابق مينڊي مور عورتن تي تشدد جي روڪٿام لاءِ ڪم ڪندڙ تنظيم ”وجود“ کي سپورٽ ڪرڻ لاءِ سيپٽمبرجي پهرئين هفتي ۾ ڀارت جو دؤرو ڪندي. اها تنظيم عورتن کي برابر حق ڏيارڻ ۽ زيادتي توڙي تشدد کان ڇوٽڪارو ڏيارڻ لاءِ خدمتون انجام ڏئي رهي آهي.

 

 

قومي ڊس ايبل ٽيم آءِ سي آر سي انٽر نيشنل ڪرڪيٽ ٽورنامينٽ ۾ شرڪت لاءِ ڍاڪا پهچي وئي

اسلام آباد (اسپورٽس نيوز) 24 ميمبرن تي ٻڌل قومي ڊس ايبل ٽيم 5 ملڪي آءِ سي آر سي انٽر نيشنل ڪرڪيٽ ٽورنامينٽ ۾ شرڪت لاءِ ڍاڪا پهچي وئي آهي. ملڪي آءِ سي آر سي انٽر نيشنل ڪرڪيٽ ٽورنامينٽ (اڄ) اربعکان بنگلاديش جي شهر ڍاڪا ۾ کيڏي ويندي. قومي ٽيم جي هيڊ ڪوچ ظفر اقبال ٻڌايو ته ڍاڪا جي ڪنڊيشن ڪراچي جهڙي آهي. ٽيم ۾ ايونٽ کٽڻ جي صلاحيت موجود آهي. هن چيو ته انٽر نيشنل ڪرڪيٽ ٽورنامينٽ جي تياري لاءِ ڪراچي ۾ قومي رانديگرن ڀرپور تيار ڪئي آهي. ا

 

سنڌ ڪنهن سان به ڪرپشن ۾ ڀائيوار ناهي : نسيم بخاري

ڪرپشن خلاف ڪريڪ ڊائون پيپلز پارٽي کي پَٽ سان لڳائي ڇڏيو آهي. آصف زرداريءَ جي ويجهي ساٿي ۽ متحده جي منظورِ نظر ڊاڪٽر عاصم ڇا گرفتار ٿيو آهي، پيپلز پارٽي ۾ ٽاٻڙڪو مچي ويو آهي. متحده به مٿي تي هٿ ڏئي ويسوري ۾ وٺجي وئي آهي ۽ پيپلز پارٽي تي الزام هڻي رهي آهي ته سنڌ حڪومت عاصم کي قربانيءَ جو ٻڪرو بڻايو آهي. عاصم جي گرفتاري ۽ چالان کانپوءِ آصف زرداريءَ جي امڪاني گرفتاري يا ان خلاف امڪاني ڪارروائي کي اِک ۾ رکندي پيپلز پارٽي اعلان ڪيو آهي ته جيڪڏهن آصف زرداري ۾ هٿ وڌو ويو يا ان جي خلاف ڪا ڪارروائي ٿي ته سنڌ جنگ جو ميدان بڻجي ويندي.

حيرت جهڙي ڳالهه آهي ته اها پيپلز پارٽي جيڪا جيلن، ڪوڙن، ڦاسين ۽ سزائن، گرفتارين ۽ قربانين تي سدائين ناز ڪندي آئي آهي ۽ جنهن جو پاڪستان جي جمهوري هلچل ۾ هڪڙو تاريخي ڪردار رهندو آيو آهي، جنهن پنهنجي پوري قيادت، ڀٽو خاندان جي صورت ۾ قربان ڪئي آهي، اڄ انهيءَ پارٽي کي وقت ۽ حالتن جي رجحان ۽ روين ايترو ته تبديل ڪري ڇڏي آهي، جو ان جا مزاج بدلجي ويا آهن. رنگ، ڍنگ ۽ رويو ئي مختلف ٿو ڏسڻ ۾ اچي ۽ سنڌ جو وڏو وزير قائم علي شاهه انتهائي بي وسيءَ جون دانهون ڪندي پاڻ کي لاچار محسوس ڪرائي رهيو آهي. هن جي دڙڪن، ڌمڪين ۽ احتجاج ۾ به هڪ طرح سان ميڙمنٿ، ايلاز ۽ عرض وارو احساس سمايل آهي، جيڪو واضح لفظن ۾ هڪڙو ئي مطالبو ڪري رهيو آهي ته خدا جي واسطي قيادت ۾ هٿ نه وجهجو. اِها ڳالهه به حيرانگيءَ کان خالي ناهي ته ٻن ٽن ڏينهن گذرڻ باوجود قائم علي شاهه يا خورشيد شاهه توڙي پيپلز پارٽي جي ٻين اڳواڻن پاران ڪرپشن خلاف هلندڙ ڪريڪ ڊائون جي ردعمل ۾ آيل بيانن تي ادي ۽ اديءَ پاران توڙي بلاول ڀُٽي طرفان ڪوبه تبصرو ڪابه ترديد ۽ ڪابه وضاحت يا حمايت منظرعام تي ناهي آئي، جنهن مان اهو تاثر شڪ کان وڌيڪ پڪ ۾ تبديل ٿي ويو آهي ته پ پ جي مرڪزي قيادت جي دفاع ۾ آيل بيان سندن ئي آشيرواد سان آڏو آيا آهن.

پيپلز پارٽي ۾ ڪرپشن خلاف ٿيندڙ ڪارروايون ڪيترن ئي بحث مباحثن کي جنم ڏئي ويون آهن، ٻه ڏينهن اڳ اعتزاز احسن جو جيڪو بيان آڏو آيو آهي، سو به ڪيترائي سوال پيدا ڪري ويو آهي، جنهن جو چوڻ آهي ته، سنڌ جو وڏو وزير قائم علي شاهه بي وسيءَ جو اظهار ڪرڻ بدران استعيفيٰ ڏئي گهر هليو وڃي يا ته هو پنهنجو پاڻ کي ايترو مضبوط بڻائي، جو هن جا ماتحت سندس حڪمن کي اهميت ڏين. جي هو پاڻڀرو نٿو ٿئي ته پوءِ مايوسي ۽ اداسي وارا احوال به ميڊيا کي نه ٻڌائي، قائم علي شاهه رينجرز کي اختيار ڏيڻ وارو نوٽيفڪيشن واپس وٺي، وڏي وزير جون بي وسي واريون ڳالهيون سٺيون نه ٿيون لڳن، هو صوبي جو سربراهه آهي ۽ پنهنجي عمل سان صوبي جي سربراهي ثابت به ڪري.

هڪ وڏو وزير جڏهن پاڻ کي ڪمزور محسوس ڪندو ته ان جي ماتحت ماڻهو يا ادارا ان کي ڪهڙو مانُ ڏيندا؟ بهتر اهو ناهي ته اهڙو ماڻهو پاسو وٺي ويهي. اعتزاز احسن جون مٿيون ڳالهيون جيتريون وزنائتيون آهن، اوترو ئي دليل سان ماڻهو ان خيال کي درست به سمجهن ٿا، پر سوال اهو آهي ته جن اهڙي وزيراعليٰ کي اعليٰ منصب تي ويهاريو آهي، ڇا انهن کي پنهنجي ماڻهوءَ جي ساک پت جو سُڌ سماع نه هوندو؟ سائين قائم علي شاهه چوٿون ڀيرو سنڌ جو وڏو وزير رهيو آهي، ظاهر آهي پنهنجي اعليٰ قيادت وٽ هن جي ڪا ته ڪارڪردگي هوندي، جيڪا سندس چونڊ ۾ مددگار ثابت ٿي هوندي. پاڻ ڪنهن جي دفاع يا مخالفت ۾ بحث نه ٿا ڪريون، پر ايترو ضرور سوال ڪري سگهجي ٿو ته هڪ اهڙي دؤر ۾ جڏهن سنڌ حڪومت خود پاڻ اينٽي ڪرپشن جي مدد سان ادارن جا لاهه ڪڍندڙن ۽ اربين رپين کي هضم ڪندڙن خلاف ڪارروائي ڪرڻي آهي ته پوءِ هو اهڙي ئي جذبي ۽ نيت سان وفاقي ادارن جي ڪارروائي تي ڇو گهٻرائجي وئي آهي؟ ٿيڻ ته ائين کپي ته انهن ٻنهي حوالن سان وفاق ۽ صوبن ۾ هڪٻئي سان ڀرپور سهڪار ۽ ساٿ هئڻ گهرجي. اُهي هڪٻئي جي ڪم ڪار ۾ مددگار ثابت ٿين، پر ڇا سبب آهي جو ٻئي ڌريون هڪٻئي سان ٽڪراءَ ۾ اڳريون نظر اچي رهيون آهن. ڇا سبب آهي جو ڪرپشن خلاف ڪريڪ ڊائون انائن جي ور چڙهي ويو آهي؟

ڊاڪٽر عاصم جي گرفتاري پيپلز پارٽي ۽ متحده قومي موومينٽ ۾ جيڪا بي چيني پيدا ڪئي آهي يا ان حوالي سان ٻنهي ڌرين ۾ جيڪي شڪ پيدا ٿيا آهن، اُهي وڌي وڻ ٿي اختلافن کي ڪهڙي علامت آڇيندا؟ ڪو پتو ناهي پر ٻنهي ڌرين ۾ متحده جي الزام سان هڪ ڇڪتاڻ واري صورتحال ضرور جنم ورتو آهي. ڊاڪٽر عاصم، هن جا مٽ مائٽ همدرد ۽ يار دوست متحده جي ان تهمت جو ڪيترو ٿا اثر قبول ڪن، جنهن ۾ ايم ڪيو ايم پاران پيپلز پارٽي لاءِ چيو ويو آهي ته ان پاڻ کي بچائڻ لاءِ کيس ڦاسايو آهي، ان بابت پاڻ ڪجهه به نه ٿا چئون، پر جيڪا ڳالهه وڏي ويساهه سان چئي ۽ ڪري سگهجي ٿي سا اِها آهي ته متحده وڏي چالاڪيءَ سان ڊاڪٽر عاصم ۽ پيپلز پارٽي جي قيادت وچ ۾ اختلافن پيدا ڪرڻ جي هڪ شعوري ڪوشش ڪئي آهي. متحده ان عمل سان ڊاڪٽر عاصم ۽ ان جي گهر ڀاتين جون همدرديون حاصل ڪرڻ جي به ڪوشش ڪئي آهي. ائين کڻي چئجي ته متحده هڪ تير سان ٻه شڪار ڪري ڇڏيا آهن. متحده جو مستقبل خود ڪرپشن ۽ ڪراچيءَ ۾ دهشتگرديءَ جي حوالي سان داءَ تي لڳل آهي، پر اُها ان خيال تي عمل ڪري رهي آهي ته پاڻ ته ٻڏبو ئي ٻڏبو پر ٻئي کي به ٻوڙي ڇڏبو.

پيپلز پارٽي ۽ ايم ڪيو ايم هڪٻئي جي هميشه ضرورت رهيون آهن. جيتري هنن جي پاڻ ۾ مفاهمت رهندي آئي آهي، اوترا ئي هنن جا مزاج بدليل آهن. انهن ٻنهي ۾ هڪڙي ڳالهه هڪجهڙي آهي، ڪرپشن ۾ ٻنهي جيڪا تاريخ رقم ڪئي آهي سا جڏهن جڳ جهان ٻڌي آهي ته خلق کي ڏندين آڱريون اچي ويون آهن. ماڻهن ڪڏهن سوچيو به نه هو ته ايڏي وڏي سطح تي بدعنواني جا باب رقم ٿيندا. ائين ناهي ته فقط اِهي ٻه پارٽيون ڪرپشن ۾ ملوث آهن ۽ باقي ٻيون کير سان ڌوتل آهن. حقيقت اها آهي ته جنهن جو جيترو وس هليو آهي، ان اوتري ڪرپشن ڪئي آهي. هر ڪنهن جا پنهنجي حيثيت ۽ طاقت آهر هٿ ٻڏل آهن. هاڻ جڏهن سڀني جا مهانڊا بي نقاب ٿيڻ لڳا آهن ته سڀ ڪنهن کي پنهنجي ڳڻتي ورايو آهي، هنن ڪڏهن اِهو سوچيو به نه هو ته کين ڏکيا ڏينهن به ڏسڻا پوندا.

اسان وٽ ڪرپشن خلاف وٺ پڪڙ هميشه کان هڪ خواب رهي آهي. ايترو ضرور آهي ته ايماندار ۽ فرض شناس ماڻهو وقت جي جبري وڄ هٿان جلندا آيا آهن. اهڙي ماحول ۽ سماج ۾ بدعنوانين، بي ايمانين ۽ بدمعاشين جا باب کلڻ واقعي به هڪ معجزو لڳي ٿو ۽ اهڙي معجزي جي سماج کي سخت ضرورت آهي. اڄ جيڪڏهن اها ڪارروائي پنهنجي پوري تسلسل سان ڪي صحتمند نتيجا ڏئي ٿي ته پڪ ڄاڻو اُها ڳالهه ڪا معمولي نه هوندي. اها هن سماج کي هڪڙو سڌو دڳُ مهيا ڪندي. اُها ان ڳالهه جو يقين ڪندي ته هِن سماج ۾ ادارن کي ڪيئن هلڻو آهي؟ اُها طئه ڪندي ته هن معاشري ۾ زماني سازي وارا معاملا ڪهڙي رُخ ۽ ڪهڙي طريقي سان هلڻ گهرجن؟ جيڪڏهن ائين ٿئي ٿو ته ان سان سماج ۾ صحتمند لاڙن جو رجحان وڌندو ۽ ان جي صورت سنوربي، پر سوال اهو آهي ته ڇا واقعي به اهڙو سپنو ساڀيان ٿيندو؟ ڇو ته اسان وٽ اهڙين ڪاررواين ذريعي پئسا ڪمائڻ وارو تصور هوندو آهي. ڏوهاري هر موڙ تي رشوت ڏئي پاڻ آجا ٿي ويندا آهن.

هاڻ به جيڪڏهن ائين ٿيو ته تمام گهڻي مايوسي پکڙبي ۽ مايوسي جو مطلب هڪ طرح سان موت تصور ڪيو ويندو آهي. ڪرپشن جي خاتمي لاءِ ايمانداراڻه اُپاءَ اڄ جي اهم ضرورت آهن. ماڻهو پنهنجن ڏوهن کي لڪائڻ لاءِ مختلف ڪارڊ استعمال ڪري رهيا آهن. سنڌ ۾ حڪمران پارٽي سنڌ ڪارڊ استعمال ڪري رهي آهي. اُها سنڌ، جنهن جي پيپلز پارٽي گذريل اٺن سالن کان ڀيل ڪئي آهي، تباهيءَ ۽ برباديءَ جا نِت نوان رڪارڊ قائم ڪيا آهن. سنڌ ۽ سنڌي ماڻهن جي زندگيءَ جي معيار ۾ وقت سان گڏ لاٿ آئي آهي. ان جي معاشي حالت، اٿڻي ويهڻي، وڻج واپار وڌڻ بدران گهٽيو آهي. مان دعويٰ سان چوان ٿو ته ڪرپشن جي الزام ۾ ڪيڏي به وڏي مڇي ڇو نه گرفتار ٿئي، ان جي حق ۽ حمايت ۾ سنڌ ته پنهنجي جاءِ تي پر ان جي پنهنجي برادري ۽ علائقي جا ماڻهو به احتجاج نه ڪندا. ڇو ته وڏين مڇين پنهنجي اقتداري ڏينهن ۾ جڏهن عوام لاءِ ڪجهه ڪيو ئي ناهي ته عوام ڪهڙي عقيدت واري جذبي هيٺ انهن جي بچاءَ لاءِ اٿي کڙو ٿيندو ۽ اڳيان ايندو؟

 

پاڪ ڀارت لاڳاپا ۽ آمريڪي ڊپلوميسي ۡ: جاويد ابڙو

دنيا ۾ سمورن ملڪن جي لاڳاپن جو بنياد اڪثر ڪري گڏيل مفادن تي هوندو آهي، اهڙا مثال گهٽ ملندا آهن ته ڪي ٻه ملڪ هميشه لاءِ خوشگوار لاڳاپن جي ٻنڌڻن ۾ جُڙيل رهن، هر نئين ڏينهن بدلجندڙ مفادن جي ڪري لاڳاپن ۾ لاها چاڙها به ايندا رهندا آهن. ڀارت جيڪڏهن ايراضي جي لحاظ کان پاڪستان کان وڏو ملڪ آهي ته ان جو اهو مطلب ناهي ته هو خطي جي ٻين ملڪن تي علائقائي بالادستي مڙهي رڳو پنهنجي مڃرائي، پر جيڪڏهن اهڙي قسم جا خواب هو لهي ٿو ۽ انهن جي ساڀيان نٿي ٿئي ته پاڪستان جو ان ۾ ڪو ڏوهه ناهي. پاڪستان جنهن خطي ۾ موجود آهي، ان لحاظ کان کيس وڏي اسٽريٽجڪ اهميت حاصل آهي، ان ۾ به ڪو شڪ ناهي ته پاڪستان ڀارت جي ڀيٽ ۾ آبادي، ايراضي ۽ وسيلن جي لحاظ سان ننڍو ملڪ آهي پر اهو به ياد رکڻ گهرجي ته پاڪستان دنيا جي ستين ائٽمي قوت آهي ۽ ان جو شمار دنيا جي بهترين فوج رکندڙ ملڪن ۾ ٿئي ٿو. گهٽ وسيلن ۽ ايراضي جي باوجود دنيا پاڪستان، سندس فوج ۽ دفاعي صلاحيتن کي تسليم ڪري ٿي.

آمريڪا جي اها خواهش پنهنجي جاءِ تي درست آهي ته هو پاڪستان ۽ ڀارت وچ ۾ خوشگوار لاڳاپا چاهي ٿو ۽ ان سلسلي ۾ هو ٻنهي ملڪن وچ ۾ ڇڪتاڻ جي خاتمي لاءِ ڪوشون به ڪندو رهيو آهي. ڪڏهن سندس ڪوششون کلي نموني ٿيندي نظر اينديون آهن ته ڪڏهن بيڪ ڊور ڊپلوميسي به استعمال ڪئي ويندي آهي پر بدقسمتي سان سندس ڪوششون مستقل طور ڪامياب نه ٿي سگهنديون آهن، ان جو سڀ کان وڏو ڪارڻ آمريڪا جا پنهنجا مفاد به آهن، ڇو ته آمريڪا رڳو پاڪستان سان لاڳاپا وڌائي ڀارت کي وڃائڻ نٿو چاهي، فرض ڪريو ته هن وقت آمريڪا جا ڀارت سان جيتري قدر لاڳاپا آهن، اهي ساڳيا پاڪستان سان هجن ها ته آمريڪا اهو هٿيار وڃائي چڪو هجي ها، جنهن کي هو خطي ۾ اڀرندڙ نئين طاقت چين خلاف استعمال ڪرڻ چاهي ٿو.

ڀارت ڪشمير جي ڪنٽرول لائين ۽ ورڪنگ بائونڊري تي سيز فائر جي ڪيل معاهدي جي گذريل ڪيترن ئي مهينن کان ڀڃڪڙي ڪري رهيو آهي، جنهن ۾ عورتن ۽ ٻارڙن سميت ڪيترائي پاڪستان شهيد ٿي چڪا آهن، پاڪستان پاران ڀارتي اڳرائين خلاف گڏيل قومن آڏو احتجاج به ڪيو ويو ۽ معاملي جي جاچ جو مطالبو ڪيو ويو پر ان جي باوجود عالمي اداري جي ماٺار ثابت ڪري ڇڏيو آهي ته هو جانبداري سان پنهنجي پاليسي تي عمل پيرا آهن. عالمي مبصرن ڀارتي اڳرائين سبب سرحدي علائقن ۾ ٿيل تباهي پنهنجي اکين سان ڏٺي پر ڀارت خلاف ڪو ايڪشن نه کنيو ويو ۽ پنهنجون اکيون ٻوٽي ڇڏيون.

سوال اهو آهي ته ٻنهي ملڪن وچ ۾ لاڳاپن جي بهتري لاءِ جيڪي ڪوششون ٿينديون آهن، اهي آخر نتيجي جوڳيون ۽ لاڀائتيون ثابت ڇو نٿيون ٿين؟ ٻڌايو وڃي ٿو ته ڀارت ۾ انتهاپسند گروپن کي پاڪستان جو وجود تسليم ناهي، جنهن ڪري پاڪستان ۽ ڀارت وچ ۾ جڏهن به امن لاءِ ڳالهين جي راهه هموار ٿيندي آهي ته اهي انتهاپسند گروپ متحرڪ ٿي ويندا آهن ۽ هن ڀيري به ائين ئي ٿيو آهي. ڀارت ۾ موجود انتهاپسند گروپن جي دٻاءُ سبب مودي سرڪار پاڪستان سان امن ڳالهين کان پير پوئتي ڪيا ۽ گذريل مهيني 23 ۽ 24 آگسٽ تي پاڪ ڀارت قومي سلامتي جي صلاحڪارن وچ ۾ طئي ٿيل ڳالهيون ٿي نه سگهيون. ڀارت جا ڪيترائي اهڙا حڪمران به آهن، جيڪي پاڪستان سان جنگ ڪرڻ جي سوچ ۽ نظريو رکن ٿا پر پاڪستان سرحد تي حملن ۾ ڪيتريون ئي جانيون ضايع ٿيڻ باوجود صبر، تحمل ۽ دانشمنديءَ سان ڪم وٺندو پيو اچي ۽ ڀارتي اڳرائين جي جواب ۾ جنگ جو دائرو وڌائڻ کان به پاسو ڪندو پيو اچي. گذريل سال به پرڏيهي سيڪريٽري جي سطح تي پاڪستان ۽ ڀارت وچ ۾ ڳالهيون ٿيڻ واريون هيون پر ڀارت اهي ڳالهيون رد ڪندي صرف اهو جواز پيش ڪيو ته پاڪستاني هاءِ ڪمشنر ڪشميري حريت پسند اڳواڻن سان ملاقات ڇو ڪئي ۽ اهو موقف اختيار ڪيو ته پاڪ ڀارت ڳالهين ۾ ڪنهن ٽين ڌر کي شريڪ نٿو ڪري سگهجي. هن ڀيري به ڀارت ساڳي روايت اختيار ڪري امن لاءِ ٿيندڙ ڳالهين کي نقصان پهچايو، جنهن سبب ڀارتي ميڊيا به مودي سرڪار جي انهيءَ پاليسي تي ڇوهه ڇنڊيا ۽ ان تي سخت تنقيد ڪئي، پر نڪ جي پڪائي جي ڪري مودي سرڪار تي ڪو به اثر نه پيو. ڏٺو وڃي ته ڪشمير اصولي طور تي بنيادي ڌر آهي، جنهن کانسواءِ ڳالهيون يا تڪرار حل نٿا ٿي سگهن. ڪشمير رڳو ايراضي يا زمين جو مسئلو ناهي، اهو اتي رهندڙ ڏيڍ ڪروڙ انسانن جي زندگين ۽ موت جو مسئلو آهي. سوال اهو به آهي ته جيڪڏهن ڀارت امن ڳالهين کان پرهيزگار آهي ته پوءِ ڇا ٻنهي ملڪن وچ ۾ سمورا بنيادي تڪرار جنگ سان حل ٿيندا؟ ڀارت جي چڙ ڏياريندڙ گولا باري مان لڳي ٿو ته هو ڪنهن شرارت جي موڊ ۾ آهي.

هڪ ڏينهن اڳ آمريڪي قومي سلامتي جي صلاحڪار سوزن رائس اسلام آباد پهچي وزيراعظم نوازشريف ۽ آرمي چيف جنرل راحيل شريف سان ملاقاتون ڪيون، جنهن ۾ پاڪستان ايل او سي تي ٿيندڙ ڀارتي اڳرائين ۽ حملن ۾ ٿيل جاني نقصان جا ثبوت سوزن رائس حوالي ڪيا ويا آهن، هاڻ ڏسڻو اهو آهي ته آمريڪا ڀارت تي دٻاءُ وجهي کيس سرحد تي فائربندي واري ڪيل معاهدي تي قائل ڪري سگهندو يا هو به ٺاپر اختيار ڪري رڳو بيان جاري ڪرڻ تائين محدود رهندو.

آرمي چيف جنرل راحيل شريف ته اهو واضح ۽ چٽن لفظن ۾ چئي ڇڏيو آهي ته ڀارت دهشتگردي جي ڪارروائين ۾ ملوث آهي، ان جو مطلب اهو به آهي ته ڀارت جيڪي مقصد پاڪستان ۾ دهشتگردي جون ڪارروايون ۽ پنهنجي ڳجهي ايجنسي ”را“ کان سرگرميون ڪرائي حاصل نه ڪري سگهيو، اهي هاڻ سرحد تي جنگ ڇيڙي حاصل ڪرڻ چاهي ٿو. جڏهن کان پاڪستان ۽ چين وچ ۾ اقتصادي لنگهه سميت اربين ڊالرن جي سيڙپڪاري جا معاهدا طئي ٿيا آهن ان وقت کان ڀارت پنهنجي ناڪامين ۽ نااهلين تي مڇريل آهي، پر پاڪستان ته سندس ناڪامين جو ذميوار ناهي ته پوءِ هو پاڙيسري ملڪ سان اهڙو رويو ڇو اختيار ڪندو پيو اچي؟ اصل ڳالهه اها آهي ته ڀارت پاڪ چين اقتصادي لنگهه جي منصوبن، گوادر بندرگاهه تي چيني سرگرمين ۽ ٻنهي ملڪن جي ويجهڙائي کان پريشان ٿي چڪو آهي ۽ هو سرحد تي ڇڪتاڻ پيدا ڪري پاڪ چين اقتصادي لنگهه جي منصوبن ۾ رڪاوٽ وجهڻ چاهي ٿو پر پاڪستان کي پنهنجي ساڳي پاليسي ۽ دانشمندي تي برقرار رهڻ گهرجي. ڳالهين لاءِ آمريڪي قومي سلامتي جي مشير سوزن لائس اچي يا صدر اوباما، پاڪستان کي پنهنجي بالادستي ۽ خودمختياري جو مڪمل اختيار آهي، جنهن تي ڪنهن به قسم جو ٺاهه نٿو ڪري سگهجي.

 

ڪرپشن خلاف کڄندڙ قدم ۽ سياسي وايو منڊل…..

پاڪستان اندر دهشتگردي جو مسئلو گذريل ٽن چئن ڏهاڪن کان جاري آهي ۽ اها پاليسي جنهن جي ڪري دهشتگرديءَ هن ملڪ جي اندر پاڙون پختيون ڪيون، تنهن پاليسيءَ جو ئي نتيجو آهي جو اسان جي سماج ۾ ڪرپشن جا بنياد پيا. ملڪ اندر خاص ڪري 16 ڊسمبر 2014 تي پشاور جي آرمي پبلڪ اسڪول تي دهشتگرد حملي کانپوءِ پاليسيءَ يوٽرن ورتو ۽ سياسي ۽ فوجي قيادت متفقه طور دهشتگردي جي پاڙ پٽڻ لاءِ21 نقاطي قومي ايڪشن پلان منظور ڪيو جنهن کانپوءِ قبيلائي علائقن کان وٺي ڪراچي تائين ڪارروايون نه رڳو ٿيون، پر اڃا به ٿي رهيون آهن ۽ ان ۾ به ڪو شڪ نه آهي ته انهن ڪارروائين جي نتيجي ۾ امن به ٿيو آهي ۽ اهي ڪارروايون اڃا به جاري آهن. قومي ايڪشن پلان تحت قانون لاڳو ڪندڙ ادارن کي مينڊيٽ ته دهشتگردي خلاف ڪارروائيءَ جو مليل هو، پر هاڻي اهي ڪارروايون دهشتگرديءَ خلاف ڪارروائين کان اڳتي وڌي ڪرپشن خلاف ڪارروائين ۾ تبديل ٿي رهيون آهن جن جو سڀني کان وڌيڪ تَئُه سنڌ محسوس ڪري رهي آهي. سنڌ جي حڪمران جماعت پيپلز پارٽي جي اهم اڳواڻ ۽ پيٽروليم واري اڳوڻي وفاقي وزير ڊاڪٽر عاصم حسين جي گرفتاري تي پيپلز پارٽيءَ شديد ردعمل ظاهر ڪيو آهي. سنڌ جي وڏي وزير سيد قائم علي شاهه ته ان کي سنڌ تي حملو قرار ڏنو آهي. ڏٺو وڃي ته ملڪ اندر وفاق توڙي صوبن ۾ چونڊيل حڪومتون قائم آهن ۽ سمورا ادارا به انهن چونڊيل حڪومتن جي ماتحت آهن، پر هي جيڪي ڪارروايون ٿي رهيون آهن تن ۾ ظاهر ظهور محسوس ٿي رهيو آهي ته حڪومتن کي ٻڌائڻ ۽ اعتماد ۾ وٺڻ بنائي سڀ ڪجهه رهيو آهي. جنهن مان پتو لڳائي سگهجي ٿو ته ملڪ اندر جمهوريت پنهنجا پير ڪيترا پختا ڪيا آهن ؟ دهشتگردي ۽ ڪرپشن خلاف ڪارروايون ٿيڻ کپن ۽ ان تي ڪنهن به قسم جي ٻي راءِ ٿي نه ٿي سگهي پر هن هيڏي معاملي ۾ جيڪڏهن چونڊيل حڪومتن کي بي علم رکيو ويندو ته پوءِ سوال ضرور اٿندا. ملڪ اندر جيڪو ماحول جڙيو آهي يا جڙي رهيو آهي تنهن کي ڪنهن به نموني جمهوري نظام لاءِ سازگار نٿو چئي سگهجي. گڏوگڏ سياسي جماعتن خاص ڪري اهي جماعتون جن جون مختلف صوبن ۾ حڪومتون آهن، تن تي به بنيادي ذميواري اچي ٿي ته اهي بغير ڪنهن رک رکاءَ جي ڪرپشن خلاف نه رڳو ڪارروائي ڪن پر حڪمرانيءَ جو به اهڙو مثال قائم ڪن جو لڳي ته اهي واقعي ڊليور به ڪري رهيون آهن، عوام لاءِ به ڪجهه ڪري رهيون آهن. چونڊيل حڪومتون هوندي جيڪڏهن ڪرپشن عروج تي هوندي، عوام جا صحت، تعليم، روڊ، رستي ۽ پيئڻ جي صاف پاڻيءَ جا بنيادي مسئلا به حل نه ٿيندا ته پوءِ اهي سماج ۾ بيچيني پکڙجڻ فطري آهي ۽ ان بيچينيءَ کي محسوس ڪندي ئي جيڪي ڪارروايون ٿي رهيون آهن سي به ٿينديون رهنديون. سو چوڻ جو مطلب ته دهشتگردن خلاف ڪارروايون ته بغير ڪنهن رک رکاءَ جي جاري رهڻ کپن ڇو ته ڏوهاري ۽ دهشتگرد جو ڪوبه دين مذهب ۽ جماعت نه ٿيندي آهي. تهڙي طرح ڪرپشن به اڏهيءَ وانگر اسان جي سماج کي کائي رهي آهي پر ڪرپشن خلاف ڪارروائيءَ جو مينڊيٽ آئين ۽ قانون تحت جن ادارن يا اختيارين کي آهي تن کي ئي اڳتي وڌي ان ڏس ۾ اڳڀرائي ڪرڻ کپي پر جيڪڏهن اهڙو مينڊيٽ نه رکندڙ ادارا ان ڏس ۾ اڳڀرائي ڪندا ته پوءِ ان سان ادارن ۾ ٽڪراءَ جنم وٺندو جيڪو ڪنهن به طور ملڪ ۽ سماج لاءِ فائديمند نه آهي.