تازيون خبرون

Daily Archives: September 2, 2015

سياسي ۽ عسڪري قيادت جو ڪراچي آپريشن ۽ نيشنل ايڪشن پلان تي عملدرآمد تيز ڪرڻ تي اتفاق

اسلام آباد(بيورو) وزيراعظم نواز شريف ۽ آرمي چيف جنرل راحيل شريف ڪراچي آپريشن جاري رکڻ ۽ قومي ايڪشن پلان تي عملدرآمد وڌيڪ تيز ڪرڻ تي اتفاق ڪندي چيو آهي ته دهشتگردن جي سهولتڪارن کي ڪابه رعايت نه ڏني ويندي.آرمي چيف جنرل راحيل شريف وزيراعظم هائوس پهچي وزيراعظم نواز شريف سان ملاقات ڪئي، جنهن ۾ دهشتگردن خلاف جاري ڪارروائين، ڪراچي آپريشن، تازين گرفتارين،قومي ايڪشن پلان تي عملدرآمد، ملڪي سلامتي ۽ سيڪيورٽي صورتحال جو جائزو ورتو ويو. ملاقات ۾ آمريڪي صلاحڪار ۽ جرمني پرڏيهي وزير جي دوري بابت به خيالن جي ڏي وٺ ڪئي وئي.ملاقات دوران وزيراعظم ۽ آرمي چيف اتفاق ڪيو ته ڪراچي آپريشن ڏوهارين خلاف آهي، جيڪو سياسي مصلحت کان مٿانهون ٿي ڪري جاري رکيو ويندو ۽ دهشتگردن جي سهولتڪارن کي ڪابه رعايت نه ڏني ويندي.ملاقات ۾ قومي ايڪشن پلان تي عملدرآمد وڌيڪ تيز ڪرڻ تي اتفاق ڪيو ويو آهي.وزيراعظم نواز شريف ۽ آرمي چيف جنرل راحيل شريف اتفاق ڪيو ته پاڪستان افغانستان ۾ امن لاءِ پنهنجو ڪردار ادا ڪندو رهندو.

 

خيبر ايجنسي ۾ آپگهاتي بم حملو، 4 ڄڻا مارجي ويا، 50 زخمي

خيبر ايجنسي(م.ڊ) خيبر ايجنسيءَ ۾ آپگهاتي بم حملي جي نتيجي ۾ ٻن سڪيورٽي اهلڪارن سميت 4 ڄڻا مارجي ويا ۽ لائين آفسير سميت 50 ڄڻا زخمي ٿي پيا،جڏهن ته هڪ بم کي ناڪاره بڻايو ويو. جمرود واري علائقي ۾ لائين آفيسر تحسين الله جيئن ئي پوليٽيڪل ايجنٽ جي آفيس کان ٻاهر نڪتو ته آپگهاتي بمبار سندس گاڏيءَ ويجهو پاڻ کي ڌماڪي سان اڏئي ڇڏيو. ڌماڪي ۾ خاصدار فورس جي ٻن اهلڪارن سميت 4 ڄڻا مارجي ويا ۽ 50 کان وڌيڪ زخمي ٿي پيا. زخمين ۾ لائين آفيسر تحسين الله ۽ 15 کان وڌيڪ سڪيورٽي اهلڪار به شامل آهن،جن کي ليڊي ريڊنگ اسپتال منتقل ڪيو ويو،جتي کين طبي امداد ڏني پئي وڃي. زخمين مان ڪجهه ماڻهن جي حالت ڳڻتي جوڳي هئڻ سبب فوتين جو انگ وڌڻ جو خدشو آهي. ڌماڪي سبب گاڏي مڪمل طور تباهه ٿي وئي. واقعي بعد سڪيورٽي فورسز علائقي کي گهيري ۾ آڻي ڇڏيو جڏهن ته واقعي واري هنڌ تان ئي روڊ ڪناري نصب ٿيل هڪ ٻيو بم ناڪاره بڻايو ويو. پوليٽيڪل ايجنٽ شهاب علي شاهه موقعي تي پهچي حالتن جو جائزو ورتو. هن چيو ته دهشتگرد جمرود جي تعلقي آفيس ۾ داخل ٿيڻ چاهين پيا پر سندن ڪوشش ناڪام رهي. ان موقعي تي ميڊيا سان ڳالهائيندي پوليٽيڪل ايجنٽ چيو ته ڌماڪو آپگهاتي بم هو ۽ اهو آپريشن ضرب عضب جو ردعمل آهي. شهاب علي شاهه چيو ته دهشتگرد خيبر ايجنسي جي امن کي ناڪام ڪرڻ چاهين ٿا پر اها سازش ناڪام بڻائي ويندي.

 

وزيراعظم سياسي ڇڪتاڻ سبب ليگي اڳواڻن کي آصف زرداري جي بيان تي ردعمل کان روڪي ڇڏيو

اسلام آباد(بيورو) وزيراعظم نواز شريف سياسي صورتحال ۾ ڇڪتاڻ سبب ليگي اڳواڻن کي اڳوڻي صدر ۽ پيپلز پارٽي جي شريڪ چيئرمين آصف علي زرداري جي بيان تي ردعمل ظاهر ڪرڻ کان روڪي ڇڏيو آهي، سياسي معاملن بات وزراعظم جي صلاحڪار آصف ڪرماني هڪ نجي ٽي وي چينل کي ٻڌايو ته وزيراعظم نواز شريف سڀني سياسي پارٽينسان مفاهمت واري پاليسي تي عمل ڪري رهيو آهي. هن چيو ته مفاهمتي پاليسي کي نظر ۾ رکندي وزيراعظم نواز شريف نواز ليگ جي اڳواڻن کي آصف علي زرداري جي بيان تي ردعمل ظاهر ڪرڻ کان روڪي ڇڏيو آهي، آصف ڪرماني ٻڌايو ته وزيراعظم نواز شريف واضح ڪيو آهي ته هو سياسي ماحول ۾ ڪنهن به قسم جي ڇڪتاڻ نه ٿو چاهي. واضح رهي ته آصف علي زرداري گذريل ڏينهن وزيراعظم نواز شريف ۽ سندس حڪومت خلاف سخت بيان جاري ڪندي چيو هو ته نواز شريف 90ع واري سياسي ورجائي رهيو آهي، سنڌ حڪومت خلاف ڪاررواين جا خطرناڪ نتيجا نڪرندا.

 

وزيراعظم ٻڌائي ته ڇا ڪرپشن رڳو سنڌ ۾ آهي، آصف زرداري رڳو ان جو جواب ڏنو: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته وڏي وزير جي 4 ڀيرا احتجاج باوجود سنڌ ۾ ڪارروايون جاري آهن، وزيراعظم ٻڌائي ته ڇا ڪرپشن رڳو سنڌ ۾ آهي، نواز شريف حملو ڪيو  هو، آصف علي زرداري رڳو ان جو جواب ڏنو آهي. اسلام آباد ۾ ميڊيا سان ڳالهائيندي خورشيد شاهه چيو ته  هـُن ائين ناهي چيو ته آصف علي زرداري تي هٿ وجهڻ سان جنگ جي شروعات ٿيندي، هن رڳو لفظي ۽ قانوني جنگ جو ذڪر ڪيو هو. هن چيو ته وزيراعظم کي ڪاررواين بابت ڄاڻ آهي يا نه، اها الڳ ڳالهه آهي پر نواز شريف ملڪ جو سربراهه آهي ۽ سڀ ادارا ان جي ڪنٽرول هيٺ آهن،کيس سڀ خبر هئڻ گهرجي.  خورشيد شاهه چيو ته وزيراعظم وضاحتڪري ته ڇا ڪرپشن رڳو سنڌ ۾ ٿي رهي آهي، هي راجا رنجيت سنگهه جو دور ناهي، ڊاڪٽر عاصم کي گرفتار ڪرڻ کان اڳ نه نوٽيس موڪليو ويو ۽ نه ئي ڪو جواب گهريو ويو. هن چيو ته ڊاڪٽر عاصم تي دهشتگرد الزامن بعد ايم ڪيو ايم ته دهشتگرد ڊڪليئر ٿي وئي آهي، پوءِ ان تي به پابندي لڳائي استعيفائون منظور ڪيون وڃن. اپوزيشن ليڊر چيو ته پ پ مٿان دهشتگردن جي حمايت جا الزام لڳائيندڙن کي شرم اچڻ گهرجي. آصف علي زرداري جي بيان بابت سوال جي جواب ۾ خورشيد شاهه چيو ته  نواز شريف حملو ڪيو هو، آصف علي زرداري ان جو جواب ڏنو آهي، غير جانبدار ڪارروايون ڪيون وڃن ته ڪو اعتراض نه هوندو. هڪ سوال جي جواب ۾ خورشيد شاهه وڌيڪ چيو ته رينجرز کي اختيار وفاقي حڪومت ڏنا آهن، سنڌ حڪومت ان کي چيلينج نٿي ڪري سگهجي. خورشيد شاهه چيو ته کين وزيراعظم سان ملڻ جو ڪو به شوق ناهي، حڪومت سان نه ئي فرينڊلي اپوزيشن هئي ۽ نه ئي آهي. اليڪشن ڪميشن ميمبرز بابت سوال جي جواب ۾ خورشيد شاهه چيو ته اي سي پي ميمبرز ٻڌائين ته سندن خلاف ڇو بيان اچي رهيا آهن، جيڪڏهن اهي وضاحت نٿا ڪن ته کين قوم کان معافي وٺڻ گهرجي. خورشيد شاهه چيو ته تيل اگهن ۾ معمولي گهٽتائي کي رد ڪيون ٿا، حڪومت عوام کي رليف ڏيڻ بدران ظلم ڪري رهي آهي.

 

 ڪور ڪمانڊر ڪراچي جي سنڌ جي گورنر ۽ وڏي وزير سان ملاقات، امن امان جي صورتحال تي ڳالهيون

ڪراچي(اسٽآف رپورٽر) ڪور ڪمانڊر ڪراچي ليفٽيننٽ جنرل نويد مختار گورنر ۽ سنڌ جي وڏي وزير سان ڌار ڌار ملاقاتون ڪيون، جنهن ۾ سنڌ جي خاص طور تي ڪراچي جي امن امان جي گڏيل صورتحال ۽ ٻين معاملن تي خيالن جي ڏي وٺ ڪئي وئي.گورنر هائوس جي ترجمان مطابق ڪور ڪمانڊر ڪراچي نويد مختار سنڌ جي  گورنر عشرت العباد سان ملاقات ڪئي، ملاقات ۾ سنڌ ۽ خاص طور تي ڪراچي  ۾ امن امان جي صورتحال تي خيالن جي ڏي وٺ ڪئي، انکانسواءِ ٻين معاملن تي پڻ ڳالهه ٻولهه ڪئي.ٻئي پاسي ڪور ڪمانڊر سنڌ جي وڏي وزير سيد قائم علي شاهه سان به ملاقات ڪئي، جنهن ۾ امن امان جي صورتحال سان ۽ ايپيڪس ڪميٽي جو اجلاس گهرائڻ  جي معاملي تي ڳالهه ٻولهه ڪئي وئي، جڏهن ته ملاقات ۾ فوجي عدالتن ۾ ڪيس موڪلڻ بابت به ڳالهيون ٿيون.

 

ايف آءِ اَي حڪومت جي مرضيءَ کانسواءِ ڪارروائي نه ٿي ڪري سگهي، دهشتگردي جو الزام برادشت جوڳو ناهي: يوسف رضا گيلاني

اسلام آباد (بيورو) اسلام آباد هاءِ ڪورٽ، مبينا ڪرپشن جي 8 ڪيسن ۾ يوسف رضا گيلاني جي ستن ڏينهن لاءِ حفاظتي ضمانت منظور ڪري ورتي،اڳوڻي وزيراعظم جو چوڻ آهي ته ايف آءِ اَي حڪومت جي مرضيءَ کانس واءِ ڪارروائي نه ٿي ڪري سگهي،پ پ تي ڪو به الزام لڳي سگهي ٿو پر دهشتگردي جو الزام برادشت جوڳو ناهي، آصف زرداري برداشت جي حد ختم ٿيڻ بعد سخت بيان ڏنو آهي. يوسف رضا گيلاني اڄ صبح ٽريڊ ڊولپمينٽ اٿارٽي ۾ مبينا ڪرپشن جي 8 ڪيسن ۾ سينٽرل جج ڪراچي طرفان جاري ڪيل گرفتاري وارنٽس خلاف پنهنجي وڪيل ملڪ جاويد اقبال معرفت اسلام آباد هاءِ ڪورٽ ۾ درخواست داخل ڪرائي. اڳوڻي وزيراعظم موقف اختيار ڪيو ته مبينا ڪرپشن ڪيسن ۾ وفاقي جاچ اداري سندس گرفتاري وارنٽ حاصل ڪيا آهن،حفاظتي ضمانت منظور ڪئي وڃي ته جيئن هـُو ٽرائل ڪورٽ ۾ پيش ٿي سگهي. هاءِ ڪورٽ جي جسٽس نور الحق قريشي درخواست جي ٻڌڻي. عدالت هڪ – هڪ لک رپين جي مچلڪن عيوض 7 ڏينهن لاءِ يوسف رضا گيلاني جي حفاظتي ضمانت منظور ڪئي. عدالت ۾ پيش ٿيڻ بعد ميڊيا سان ڳالهائيندي يوسف رضا گيلاني چيو ته هـُو به حڪومت ۾ رهي چڪو آهي، ايف آءِ اي حڪومت جي مرضي کانسواءِ ڪارروائي نه ٿي ڪري سگهي. هن چيو ته پيپلز پارٽي تي ڪو به الزام لڳي سگهي ٿو پر دهشتگرديءَ جو الزام برادشت جوڳو ناهي. يوسف رضا گيلاني چيو ته پ پ جي شريڪ چيئرمين آصف زرداري برداشت جي حد ختم ٿيڻ بعد سخت بيان ڏنو آهي. اڳوڻي وزيراعظم چيو ته هن اڳ وارن ڪيسن لاءِ ضمانتي درخواست داخل ڪرائي ته ان دوران مٿس هڪ ٻيو ڪيس ٺاهيو ويو جنهن جي ضمانت لاءِ هـُو سڀاڻي درخواست ڏيندو. يوسف رضا گيلاني چيو ته پهريان به وڏا ڪيس سامهون آيا، جن 10 سال جيل ڪاٽي پر سندس حڪومتي دور ۾ ڪو به سياسي قيدي نه هو. هن چيو ته پوليس سامهون ڏنل بيان جي ڪا اهميت ناهي هوندي، اعترافي بيان اهو هوندو آهي جيڪو عدالت ۾ ڏنو وڃي. اڳوڻي وزيراعظم چيو ته پيپلز پارٽي عدالتن جو احترام ڪري ٿي،آصف زرداري سميت هزارين ڪارڪن عدالتن ۾ پيش ٿيا آهن، اميد آهي ته عدالت انصاف فراهم ڪندي. يوسف رضا گيلاني چيو ته ميثاق جمهوريت تي 85 سيڪڙو عمل هن ڪرايو ۽ نون ليگ 15 سيڪڙو ان تي عمل ڪري سگهي ٿي. ان موقعي تي فاروق ايڇ نائيڪ چيو ته اڳواڻن تي ڪوڙا ڪيس داخل ڪيا پيا وڃن، حڪومت کي اهڙا ڪيس ٺاهڻ سان ڪو فائدو نه ٿيندو. هن چيو ته يوسف رضا گيلاني قانون جو احترام ڪري ٿو، داخل 21 ڪيسن ۾ ساڳيو الزام لڳايو ويو آهي.

 

تحريڪ انصاف تيل جي اگهن ۾ معمولي گهٽائي کي مڪمل طور رد ڪري ٿي: عمران خان

اسلام آباد (بيورو) تحريڪ انصاف جي چيئرمين عمران خان تيل جي اگهن ۾ معمولي گهٽتائي کي قوم سان مذاق قرار ڏيندي چيو آهي ته جيڪڏهن حڪومت عالمي مارڪيٽ تحت تيل جي اگهن ۾ گهٽتائي نه ڪئي ته تحريڪ انصاف روڊن تي نڪرندي.عمران خان پنهنجي جاري ڪيل بيان ۾ چيو ته تحريڪ انصاف تيل جي اگهن ۾ معمولي گهٽائي کي مڪمل طور رد ڪري ٿي، عوام جي روڊن تي نڪرڻ کانپوءِ حڪومت کي هوش ايندو.عمران خان چيو ته جيڪڏهن حڪومت عالمي مارڪيٽ جي اگهن موجب تيل جي قيمتن ۾ گهٽتائي نه ڪئي ته هو روڊن تي نڪرندا، اميد آهي ته حڪومت سندن روڊن تي نڪرڻ کان اڳ ئي تيل جا اگهه گهٽ ڪري ڇڏيندي.عمران خان وڌيڪ چيو ته حڪومت آءِ ايم ايف کان وڌيڪ قرض وٺڻ لاءِ عوام کي مشڪلاتن ۾ وجهي رهي آهي.

 

ايم ڪيو ايم ڳالهه ٻولهه جي ذريعي مسئلن جي حل تي يقين رکي ٿي: الطاف حسين

لنڊن  (مانيٽرنگ ڊيسڪ) ايم ڪيو ايم جي اڳواڻ الطاف حسين چيو آهي ته ايم ڪيو ايم جي ڳالهين جي ذريعي مسئلن جي حل تي يقين رکي ٿي، ايم ڪيو ايم جي مڙني اڳواڻن ۽ زميوارن ۽ ڪارڪنن جو اهو اٽل فيصلو آهي ته جيڪڏهن وفاقي حڪومت ايم ڪيو ايم جا مطالبا منظور ڪري ٿي ته اسان اسيمبلين ۾ وينداسين، نه ته اهي اسيمبليون حڪومت کي مبارڪ هجن، هن چيو ته هڪ وقت ايندو جڏهن ايم ڪيو ايم جي بي گناهه ڪارڪنن تي ظلم ڪندڙ عوامي احتساب سان منهن ڏيڻو پوندو، قدر حق پرستي جي تعريف کي اهڙي رستي تي بيهاريو آهي جيڪي ماڻهو اسان کي مڙهيندڙ ظلم تي خوش ٿين ٿا، اڄ هو قدرت جي مقافات عمل جو شڪار ٿي ويا آهن، اها ڳالهه هن نائين زيرو ڪراچي ۽ حيدرآباد ۾ رابطا ڪميٽي جي اجلاس کي ٽيليفونڪ خطاب ڪندي ڪئي. اجلاس ۾ ايم ڪيو ايم جي استعيفيٰ ڏنل ميمبرن، سينيٽ قومي ۽ صوبائي اسيمبلي به موجود هئا، پنهنجي خطاب ۾ الطاف حسين اسلامي تعليم جي روشني ۾ ڪساس ودعيت ملڪ جي گڏيل سياسي صورتحال، ايم ڪيو ايم ۽ حڪومت وچ ۾ ڳالهيون ۽ ٻين معاملن تي تفصيلي خيالن جي ڏي وٺ ڪئي، الطاف حسين سورت بقرا جي آيت جي تلاوت ڪئي ۽ ان جو ترجمو پيش ڪندي چيو ته الله تعاليٰ پنهنجي چاهيندڙن کي آزمائش ۾ مبتلا ڪندو آهي، ايم ڪيو ايم جي تاريخ ۾ اڻ ڳڻت آزمائشي مرحلا آيا، ڪڏهن اهڙا فيصلا به ڪرڻا پيا جيڪي بظاهر عهد وفا ۽ تجديد عهد ڪرڻ وارن جي سمجهه ۾ نه آيا، جيئن مهاجر قومي موومينٽ کي متحده قومي موومينٽ ۾ تبديل ڪرڻ جو فيصلو ڪيو ويو ته ان تي اعتراض ڪيا ويا، مون چيو هو ته اسان متحده بڻائي رهيا آهيون پر لفظ مهاجر کي نٿا ڇڏيون، اسٽبلشمينٽ ماڻهن جو زهن خراب ڪيو 7 انهن کي بد دل ڪرڻ لاءِ پروپگندا ڪيو ۽ چيو ته مهاجر ازم کي فراموش ڪيو ويو آهي، اهڙي مختلف سياسي پارٽين سان اتحاد ڪرڻ جا فيصلا ٿيا ۽ تازوئي تحريڪ جي قيادت ۽ گڏيل صلاح مشورو ڪري ايم ڪيو ايم جي چونڊيل نمائندن کي چيو ته پنهنجون پنهنجون استعيفائون ڏنيون وڃن، ڪارڪنن جي وڏي اڪثريت ان فيصلي جي حمايت ڪئي، پر ٿي سگهي ٿو ته ڪجهه ساٿين اهو فيصلو عجيب لڳو هجي، هن چيو ته مان ته فوج جي ڪجهه آفيسرن جي غلط رويي تي تنقيد ڪئي پر ان پاران چيو ويو ته سر جو جواب سر سان ڏينداسين، جنگ ٿيندي، وفاق ٻڌائي ته سنڌ کي پاڪستان سان شامل رکڻ يا نه هن وڌيڪ چيو ته جن ڳالهين تي ايم ڪيو ايم ۽ مون کي برو ڀلو چيو ويو اڄ اهي ماڻهو منهنجن ڳالهين کان وڌيڪ خطرناڪ ڳالهيون ڪري رهيا آهن، هن چيو ته الله تعاليٰ جي فرمان موجب هڪ ماڻهو جو بنا سبب قتل پوري انسانيت جو قتل جي برابر آهي. ماضي ۾ بينظير ڀٽو  ايم ڪيو ايم جي ميمبرن جي عدالت قتل ۾ ملوث پوليس آفيسرن ۽ اهلڪارن کي انعام ڏنا هئا، ۽ انهن کي سلوٽ ڪندا هئا پر انهن کي اهڙي قسم جي عمل جو منهن ڏيڻو پيو، هن چيو ته حضرت علي ڪرم الله وجه جو فرمان آهي ته قفر جي حڪومت رهي سگهي ٿي پر ظلم جي حڪومت ڪڏهن به قائم نٿي رهي سگهي، الله جو شڪر آهي ته مان اڄ تائين جيڪو ڪيو آهي الله تعاليٰ ان کي منهنجي زندگي ۾ پورو ڪيو آهي، اها ڳالهه نوٽ ڪئي وڃي ته جن جن عينڪر پرسن ۽ تجزئي نگارن منهن جي بي گناهه ساٿين کي عدالت قتل کي جائز قرار ڏنو، ڪوڙا الزام لڳايا ۽ مطالبي لاءِ آرٽيڪل 6 تحت غداري جو ڪيس قائم ڪيو وڃي، انشاالله انهن کي الله تعاليٰ هن دنيا ۾ ذليل ۽ خوار ڪندو. هن چيو ته منهنجي زندگي ۾ تحريڪ کي ڪاميابي ملي ته ايم ڪيو ايم کي غلط بيان ڪندڙن ٽي وي چيلينجز کي عوامي احتساب جو منهن ڏيڻو پوندو، هن چيو ته ايم ڪيو ايم جمهوريت پسند پارٽي آهي، هن ايم ڪيو ايم جي اڳواڻن، ذميوارن ۽ ڪارڪنن تي زور ڀريو ته هو حالتن تي ڪڙي نظر رکن ۽ پنهنجن صفن ۾ اتحاد رکن ۽ حق پرستي جي جدوجهد جاري رکن.

 

ڪراچي جي پٽيل پاڙه ۾ نجي اسڪول ۾ پسند جي شادي نه ٿيڻ تان جوڙي آپگهات ڪري ڇڏيو

ڪراچي (اي پي پي) ڪراچي جي سولجر بازار واري علائقي ۾ واقع هڪ نجي اسڪول ۾ ميٽرڪ جي شاگرد نوروز حميد ۽ شاگردياڻي فاطمه مائٽن پاران پسند جي شادي نه ڪرائڻ تان مايوس ٿي اڱاري جي ڏينهن صبح جو پنهنجي ڪلاس روم ۾ پستول جا فائر ڪري خودڪشي ڪري ڇڏي. چيو وڃي ٿو ته ٻنهي ٻارن پنهنجي والدين کي چيو هو ته سندن شادي ڪرائي وڃي پر ٻنهي ٻارن جي والدين سندن شادي ڪرائڻ کان انڪار ڪري ڇڏيو هو، جنهن کانپوءِ ٻنهي هڪٻئي سان اهو اقرار ڪيو ته جيڪڏهن زندگي گڏجي نٿا گذاري سگهون ته گڏ مرڻ کان اسان کي ڪير به روڪي نه سگهندو. پوليس ذريعن موجب ته سومر جي ڏينهن صبح جو ٻئي ڄڻا اسڪول پهتا ۽ اسڪول جا ٻيا سڀ ٻار اسيمبلي ۾ وڃي بيٺا ته هنن پنهنجي ڪلاس ۾ خودڪشي ڪري ڇڏي. پوليس موجب فاطمه پنهنجي ڪتابن واري ٿيلهي ۾ پستول کڻي آئي هئي جيڪو هن نوروز کي ڏنو جنهن پهريان فاطمه کي لوندڙي ۾ گولي هڻي ماريو ۽ پوءِ پاڻ کي به لوندڙي ۾ گولي هڻي آپگهات ڪري ڇڏيو. واقعي کانپوءِ اسڪول جي سمورن شاگردن توڙي استادن ۾ ڏهڪاءِ پکڙجي ويو ۽ اسڪول ۾ موڪل ڪئي وئي. پوليس کي نوروز جي ڪتابن واري ٿيلهي مان هڪ خط پڻ مليو آهي جنهن ۾ هن لکيو آهي ته بابا امان معاف ڪجو توهان کي منهنجي جان سٺي نٿي لڳي، ان ڪري توهان منهنجي شادي ڪنهن ٻئي سان ڪرائڻ ٿا چاهيو پر امان مان فقط فاطمه کي پنهنجي زال بنائڻ چاهيان ٿو ۽ اها ڳالهه اوهان کي منظور ناهي، مان اڄ فاطمه سان گڏ پنهنجي مرضي سان خود ڪشي ڪري رهيو آهيان ڇاڪاڻ ته اسان جيستائين جيئرا آهيون اوهان اسان کي هڪ ٿيڻ نه ڏيندا پر الله وٽ اسان ٻئي گڏ وڃڻ ٿا چاهيون، خدا حافظ امان ۽ بابا آءِ لو يو پر فاطمه منهنجي جان آهي مان ان کان الڳ ٿي نٿو رهي سگهان، ان لاءِ معافي خدا حافظ الله سائين منهنجي ماءَ ۽ پيءَ جو خيال رکجان باءِ الله سائين مان اچان پيو تو وٽ باءِ . نوروز حميد وري ان جي هيٺان هن لکيو آهي ته امان منهنجي مرڻ کان پوءِ منهنجي قبر فاطمه جي قبر سان گڏ ئي ٺاهجو پليز اها منهنجي آخري خواهش آهي اوڪي باءِ باءِ آءِ لو ماءِ آل فيملي واضح رهي ته هڪ ڏينهن اڳ ۾ نوروز پنهنجي فيس بوڪ تي آخري اسٽيٽس رکيو هو جنهن ۾ به هن لکيو آهي ته سڀاڻي مان مري ويندس پر منهنجو پهريون پيار ڪڏهن به نه مرندو.

 

جيڪڏهن اهڙا بارڊر هوندا ته بوڪو حرام ۽ داعش آساني سان اچي سگهن ٿا: چيف جسٽس

اسلام آباد (بيورو) سـُپريم ڪورٽ کي آگاهي ڏني وئي آهي ته طور خم ۽ چمن بارڊرز  تي افغانستان مان ايندڙ ڪنٽينرز جي چيڪنگ وارو ڪو به نظام موجود نه آهي، جسٽس دوست محمد کوسا ريمارڪس ڏنا آهن ته جيڪڏهن اهڙا بارڊر هوندا ته بوڪو حرام ۽ داعش آساني سان اچي سگهن. چيف جسٽس جواد ايس خواجه جي سربراهي ۾ سپريم ڪورٽ جي ٽـَي رڪني بينچ انساني اسمگلنگ بابت ڪيس جي ٻڌڻي ڪئي. ٻڌڻيءَ دوران ايڊيشنل اٽارني جنرل طور خم ۽ چمن بارڊر بابت عدالتي حڪمن تي قائم ڪيل ڪميشن جي رپورٽ پيش ڪئي. رپورٽ ۾ چيو ويو ته طور خم ۽ چمن بارڊر تي ڪا به چيڪ پوسٽ ناهي، ايف سي رڳو گشت دوران چيڪنگ ڪندي آهي. رپورٽ موجب، بارڊرز تي منشيات جي خاتمي واري اداري جو وجود ناهي، افغانستان مان ايندڙ ڪنٽينرز جي چيڪنگ جي مڪينزم جو به ڪو نظام ناهي. جسٽس دوست محمدکوسا ريمارڪس ڏنا ته جيڪڏهن اهڙا بارڊر هوندا ته داعش ۽ بوڪو حرام آساني سان اچي سگهندا. چيف جسٽس جواد ايس خواجه ريمارڪس ڏنا ته چرس ۽ هٿيارن سان گڏ ٽينڪ به اسمگل ٿي رهيا آهن، 75 لک رپين جون بندوقون ڪارخانن ۽ مارڪيٽن ۾ ڊسڪائونٽ تي موجود آهن. جسٽس قاضي فائز عيسيٰ ريمارڪس سوال ڪيو ته ڇا صدر ڪڏهن بارڊرز جو دورو ڪيو آهي. ايڊيشنل اٽارني جنرل چيو ته روزانو هزار ماڻهو چمن بارڊرز ذريعي سفر ڪندا آهن، چمن بارڊر وٽ پاڪ-افغان جا 10 سرحدي رستا ۽ 7 ڳوٺ موجود آهن.