تازيون خبرون

Monthly Archives: August 2015

تحريڪ انصاف جي مؤقف جي تائيد ڪندڙ حالتون؛نسيم بخاري

تحريڪ انصاف جي 2013ع وارين عام چونڊن ۾ ڌانڌلين واري موقف کي وقت ۽ حالتون تصديق جي مهر هڻي رهيون آهن. هڪ ٻئي پٺيان ن ليگ کي پهتل نقصان ۽ تيزيءَ سان تحريڪ انصاف جي موقف جي تائيد ڪندڙ حقيقت، عمران خان جي سياسي عروج واري خبر ڏئي رهي آهي. تحريڪ انصاف کي هڪ طرح سان چونڊن ۾ ڌانڌلين واري موقف جيڪو فائدو ڏنو آهي، ان فائدي تحريڪ انصاف کي نئين تقويت ته عطا ڪئي ئي آهي پر ان جي سياسي ساک ۾ به واڌ آڻي ڇڏي آهي. اهو ئي سبب آهي ته جيئن ئي مڪاني چونڊن جون تاريخون ويجهو اچي رهيون آهن، تيئن ئي تحريڪ انصاف به نه رڳو عوام پر اهم سياسي سماجي، مذهبي ۽ ڪاروباري شخصيتن سان رابطا وڌائي ڇڏيا آهن.

هي سٽون جڏهن لکي رهيو آهيان، تڏهن تحريڪ انصاف جو اهم اڳواڻ عارف علوي اتر سنڌ جي اهم سياسي شخصيت ممتاز ڀُٽي سان لاڙڪاڻي ۾ ملاقات ڪري، عمران خان جو، تحريڪ انصاف ۾ شامل ٿيڻ وارو نياپو پهچائي چڪو آهي ۽ ان ملاقات کانپوءِ شڪارپور جي سومرا هائوس تي هن جوشيلي تقرير ڪري ڪارڪنن ۽ عوام جو جوش وڌايو آهي. اهي سرگرميون ثابت ڪن ٿيون ته تحريڪ انصاف سنڌ ۾ پ پ جي متبادل طور اچڻ جون پوريون پوريون ڪوششون ڪري رهي آهي.

اين اي 154 لوڌران واري چونڊ ڪالعدم قرار ڏيڻ کانپوءِ حيرت انگيز بحث مباحثا شروع ٿي ويا آهن. تحريڪ انصاف جن چئن تڪن تي ڌانڌلين واري دانهن ڪندي پئي آئي، تن مان ٽن تڪن تي وقت ۽ حالتن سندس موقف کي درست ثابت ڪيو آهي. ملتان جي اليڪشن ٽربيونل پنهنجي فيصلي ۾ ن ليگ جي اُميدوار صديق بلوچ کي سڄي عمر لاءِ نااهل قرار ڏئي ڇڏيو آهي، جنهن جي جعلي ڊگري ثابت ٿي آهي ۽ جنهن ٻوليءَ ۾ هُن اها ڊگري ورتي هئي، ان سنڌي ٻوليءَ جو هڪ به جملو نه لکي سگهيو آهي، جنهن مان نه رڳو هڪ اُميدوار جي ٺڳي ثابت ٿي آهي پر اها ثابتي اهو سنيهو به ڏنو آهي ته جيڪڏهن ٻين اڳواڻن ۽ اُميدوارن جي به اهڙي ڇنڊڇاڻ ڪئي وڃي ته گهڻن همراهن جا اهڙا فراڊ آڏو اچي سگهن ٿا.

ملتان اليڪشن ٽربيونل نه فقط هڪڙي صديق بلوچ کي نااهل قرار ڏنو آهي پر پارليامينٽ ۾ اهڙا کوڙ ماڻهو ويٺل هوندا، جن جي حقيقت اڃا دنيا آڏو ناهي آئي ۽ جن تان نقاب هٽائڻ جي ضرورت آهي. اهي پنهنجن گناهن کي ۽ ٺڳين کي لڪايو ويٺا آهن. تحريڪ انصاف حقيقتن جي ڇنڊڇاڻ لاءِ جنهن جذبي سان ڌانڌلين جا پول کولڻ لاءِ اڳيان آئي آهي انهيءَ جذبي سان جيڪڏهن ٻيون ڌريون به سنجيده ٿين ته اهو ڏينهن پري ناهي جو پاڪستان ۾ ڌانڌلين کان پاڪ چونڊون يقيني بڻجي سگهن ٿيون.

جهانگير ترين جي درخواست تي اليڪشن ٽربيونل نادرا کي آڱوٺن جي تصديق جو 21 مئي 2013ع تي حڪم جاري ڪيو هو. صديق بلوچ هاءِ ڪورٽ ۾ اسٽي وٺي اهو معاملو لئه مٽي ڪري ڇڏيو هو، جنهن کانپوءِ جهانگير ترين سپريم ڪورٽ ويو ۽ سپريم ڪورٽ جهانگير جي حق ۾ فيصلو ڏنو. نتيجي ۾ 28 آڪٽوبر تي نادرا جيڪا رپورٽ ڏني ته ان ۾ 290 پولنگن تي 218256 ووٽ ڪاسٽ ٿيڻ جي خبر ٻڌائي وئي، جن ۾ 100022 هزار ووٽ غير مناسب مس ۽ آڱوٺن جي نامناسب نشانن وارا ثابت ٿيا. 20600 ووٽرن جي ڪائونٽر فائيلن تي سڃاڻپ ڪارڊن جا نمبر ئي نه هئا. ان رپورٽ ۾ ٻڌايو ويو هو ته 728 ماڻهن ٻه ڀيرا ووٽ ڪاسٽ ڪيو. 73700 ئي صحيح ووٽ ثابت ٿيا. 121 ووٽ اهڙا به ظاهر ٿيا، جيڪي تڪ ۾ داخل ئي نه هئا.

مٿيون مختصر وچور ان ڪري وائکو ڪيو ويو آهي ته جيئن خلق کي اها خبر پئجي سگهي ته پاڻ وٽ غير شفاف چونڊن جي ڪهڙي شڪل ٿيندي آهي؟ جيڪا شڪ کي پڪ ۾ تبديل ڪندي آهي جنهن سان حقدار متاثر ٿيندا آهن ۽ ناجائزيون عروج تي پهچنديون آهن، جن جي نتيجي ۾ نااهل ۽ ناڪاره ماڻهو اسيمبلين جي ايوانن ۾ پهچي ويندا آهن. جهانگير ترين کي جيڪا جيت هاڻ نصيب ٿي آهي، جيڪڏهن صاف شفاف چونڊون ٿين ها ته اُها اڍائي پوڻا ٽي سال اڳ هن جو مقدر بڻجي ها پر هاڻوڪي جيت جهانگير ترين لاءِ جنهن اخلاقي فتح جو سج اڀاري وئي آهي. اها هن جي سوڀ جو سج آهي. اهو هڪ تاريخي حقيقت جو عبرتناڪ اظهار آهي، جيڪو ڪڏهن به لهڻو ناهي.

ان کان اڳ قومي اسيمبليءَ جي اڳوڻي اسپيڪر اياز صادق جي سيٽ به ن ليگ کان کسجي چڪي آهي. جيتوڻيڪ اياز صادق ان فيصلي کي سپريم ڪورٽ ۾ چئلينج ڪيو آهي پر حقيقت اها آهي ته عام ماڻهو ان عمل کي به مشڪوڪ نگاهن سان ڏسي رهيو آهي ۽ سوچي ٿو ته اقتدار پرستي ۽ ڪرسيءَ جي نشي ۾ ڪيڏو نه حرص هجي ٿو، جيڪو ماڻهو ڪنهن به صورت ۾ وڃائڻ نه چاهيندو آهي ۽ اياز صادق به اهڙي ئي ڪوشش ۾ رڌل ٿو ڏسجي. ان کان اڳ ريلوي جي اڳوڻي وفاقي وزير خواجه سعد رفيق جي تڪ تي پڻ چونڊ ڪالعدم قرار ڏني وئي هئي ۽ ان به اياز صادق وارو دڳ اختيار ڪيو. مسلم ليگ (ن) جيڪڏهن اپيلن ۾ وڃڻ بدران اليڪشن جي ماحول ۾ اچي ها ته ڏاڍو چڱو ٿئي ها. کيس به خبر پوي ها ته اها ڪيتري پاڻي ۾ آهي پر هن کي شايد اهو ڊپ هو ته ڪٿي ڪجهه ملڻ بدران کسجي نه وڃي. شايد ان ئي سبب جي ڪري ن ليگ لنوايو.

مسلم ليگ (ن) متحده سان مولانا فضل الرحمان جي معرفت جيڪا مفاهمت ڪئي، اها مفاهمت به ان مقصد کي ظاهر پئي ڪري ته کين متحده جي ووٽن جي ضرورت آهي. اهو ئي سبب آهي ته ميان نواز شريف مولانا جي ٽياڪڙي کانپوءِ متحده وارن سان مليو آهي ۽ انهن جي مرضيءَ سان ڪراچي آپريشن تي اک رکڻ لاءِ مانيٽرنگ سيل قائم ڪرڻ تي راضي ٿيو آهي ۽ متحده وارن مانيٽرنگ سيل لاءِ لسٽ به جوڙي ورتي آهي. متحده سان مفاهمت ۾ مسلم ليگ جو ڀلو ٿئي يا نه پر مولانا کي هڪ تسڪين جو احساس ضرور ٿيو هوندو. مولانا لاءِ اهو ڪريڊٽ وڏي ڳالهه آهي. قدرت کيس ان عمل ۽ سرگرميءَ جو ثواب ڏئي يا نه پر مولانا جي پنهنجي حلقي ۾ ان ڪم جي ڪري واکاڻ وڌي آهي. اها ساراهه هن جي قدڪاٺ ۾ ڪيترو ٿي اضافو ڪري يا سندس شخصيت کي ڪيترو ٿي ڀڃي ڊاهي تنهن بابت پاڻ ٻه اکر به نٿا ڪُڇون. اهو فيصلو تاريخ کي ڪرڻو آهي. مولانا جيڪڏهن مفاهمت واري مڙسي نه ڪري ها ته متحده پنهنجي لاءِ نظرثاني جا وري ڪي ٻيا دڳ رستا ڳولهي ها ۽ جيڪڏهن متحده جو ڪو مددگار ثابت نه ٿئي ها ته شايد هنن جون استعيفائون قبول ٿي وڃن ها، جنهن کانپوءِ ضمني چونڊون يقيني بڻجي وڃن ها، جن ۾ تحريڪ انصاف ايم ڪيو ايم کي زبردست شڪست ڏئي ها پر اهو سڀ ڪجهه ٿيندي ٿيندي رهجي ويو، جنهن جو مولانا کي جس ڏجي يا ميار اهو فيصلو پڙهندڙ پاڻ ڪن.

هتي هڪڙي ڳالهه وڏي ويساهه سان ڪري سگهجي ٿي ته عمران خان اسلام آباد ۾ 126 ڏينهن ڌرڻو هڻي جيڪي دانهون ڪندو رهيو، اڄ وقت ۽ حالتون انهن دانهن جو جيڪو داد ڏئي رهيون آهن، تن مان سياست جي اُفق تي کيس اخلاقي پذيرائي ملي رهي آهي. تحريڪ انصاف جي ڌرڻي دروان جاويد هاشميءَ جي قلابازي ان کي وڏو ڌڪ ڏنو هو. جاويد هاشمي تحريڪ انصاف جي پويان ڳجهن هٿن جي عمل دخل واري جيڪا ڳالهه ڪئي هئي، اهڙي ئي حقيقت تان مشاهد الله خان بي بي سي کي انٽرويو ڏئي پردو کڻي وزارت وڃائي چڪو آهي. تحريڪ انصاف سان اسٽيبلشمينٽ جي قربداري آهي يا نه پر جهڙي تيزيءَ سان اهڙا اشارا ۽ شاهديون سامهون اچي رهيون آهن، سي صاف ٻڌائي رهيون آهن ته تحريڪ انصاف کي ڪا لڪل ٽيڪ ۽ سهارو ميسر آهي ۽ شايد اهو ئي سبب آهي جو هڪ دفعو وري تحريڪ انصاف ڏانهن موقعي پرست ماڻهن رجوع ڪرڻ شروع ڪري ڏنو آهي. هتي اهو سوال به وڏي اهميت وارو آهي ته مشڪوڪ چهرا تحريڪ انصاف جي پاڇي ۾ رهي پاڻ کي ڪيترو صاف سٿرو ۽ عوام دوست بڻائڻ ۾ ڪامياب ٿي سگهندا؟ وقت ۽ حالتون ماڻهو جو قبلو درست ڪري ڇڏينديون آهن. عمران خان ان ڳالهه کي چڱي ريت ڄاڻي ٿو. ان ڪري ماضيءَ جي مشڪوڪ سياسي مهانڊن کي جڏهن هو پاڻ سان گڏ کڻي هلندو ته خود اُهي پاڻ به پنهنجي اصلاح جي حوالي سان پنهنجو پاڻ کي اڳڀرو ثابت ڪرڻ جي ڪوشش ڪندا.

عمران خان اليڪشن ڪميشن کي خط لکي جيڪي کيس اوڻايون ڳڻايون آهن ۽ انهن آڌار تي جن استعيفائن جي گهُر ڪئي آهي، تن جي جواب ۾ اليڪشن ڪميشن جذباتي ردعمل ظاهر ڪيو آهي ۽ ائين به ٿي پئي سگهيو ته اهڙن اوڻاين کي قبول ڪندي، انهن جي ازالي واري عزم جو اظهار ڪيو وڃي ها پر اسان وٽ اهڙو رجحان اڃا تائين هڪ خواب بڻيل آهي. اسان وٽ ٽڪراءَ، انا جي تسڪين، ضد واري هٺ ۽ هوڏ کي ثواب جو ڪم سمجهي ڪيو ويندو آهي. پاڻ وٽ تدبيرن، حڪمت عملي، بردباري ۽ سنجيدگي فضول قسم جون شيون تصور ٿينديون آيون آهن. پنهنجي لئه وڏ ماڻهپي، مڳي ۽ ڦوشر لاءِ پنهنجي گهر کي پاڻ تيلي ڏيڻ به ننڍڙي ڳالهه تصور ٿيندي آهي. اهو ئي سبب آهي جو پنهنجي شان ۽ وقار جي بلنديءَ لاءِ گهر ٻاري ڏياري ڪئي ويندي آهي.

مسلم ليگ (ن) جو اپيلن ۾ وڃڻ وارو حق ان جذبي لاءِ ڪتب ٿيو آهي ته ٻئي کي سڪون جي ننڊ سمهڻ نه ڏجي. ڀل ته ان جي مٿي کي به ڀنواٽي اچي، ان جي به ننڊ ڦٽل هجي، متان ائين سمجهي ته ميدان خالي آهي. مخالف کي اهو مٿي ۾ سور هجي ته اڳيان به ڪو مڙس ماڻهو ملهه مارڻ لاءِ آتو آهي. سو ان سوچ ۾ جن ماڻهن کي سرور حاصل ٿئي ٿو تن جي باري ۾ ڇا چئجي يا ڇا لکجي؟

***********

 

ن ليگ جو عوام ۾ وڃڻ جو اعلان، عمران خان کي راهه فرار اختيار ڪرڻ نه ڏينداسين: پرويز رشيد

اسلام آباد (اين اين آءِ) مسلم ليگ (ن) اياز صادق ۽ صديق بلوچ جي تڪن تان ضمني اليڪشن ۾ حصو وٺڻ جو فيصلو ڪندي چيو آهي ته قومي اسيمبلي جي ٻنهي تڪن ۾ عوام جي عدالت ۾ وڃي ٻيهر مهر تصديق ڪرائينداسين ۽ 2013 جي مقابلي ۾ وڌيڪ ڪاميابي حاصل ڪنداسين عمران خان ۽ جهانگير ترين کي اليڪشن ڪميشن جو بهانو بڻائي چونڊن مان فرار نه ٿيڻ ڏينداسين ان جي ڪوڙ تي ڪوبه يقين نه ڪندو ان کي اليڪشن ڪميشن تحت تحريڪ انصاف خيبرپختونخواهه ۽ بلدياتي ۽ هريپور جي ضمني اليڪشن ۾ حصو ورتو عمران خان عوام کي منهن نٿو ڏيئي سگهي صرف ان کي گمراهه ڪري سگهي ٿو جيڪڏهن پنهنجي سچائي جو يقين آهي ته لاهور ۽ لوڌران جي تڪن ۾ اليڪشن ۾ حصو وٺي ڇو ته ان قوم جا ٻه قيمتي سال ضايع ڪيا آهن خميس تي وزيراعظم محمد نوازشريف جي صدارت هيٺ منعقد ٿيل اجلاس کان پوءِ وزير منصوبه ابادي ۽ ترقي واري احسن اقبال سان گڏ ميڊيا کي بريفنگ ڏيندي وفاقي سڌسماءُ واري وزير سينيٽر پرويز رشيد چيو ته مسلم ليگ (ن) اياز صادق ۽ صديق بلوچ جي تڪن متعلق اليڪشن ٽربيونل جي فيصلي اچڻ کان پوءِ فيصلو ڪيو آهي ته اسان پاڪستان جي عوام جي عدالت ڏانهن وينداسين عوامي عدالت ۾ حاضر ٿي ڪري ٻيهر مهر تصديق ڪرائينداسين ۽ انشاءُالله انهيءَ وانگر ڪاميابي حاصل ڪنداسين جيئن 2013 جي اليڪشن ۾ ڪامياب ٿيا هئاسين ۽ هريپور ۽ لوڌران کان پوءِ ٿيندڙ تمام ضمني چونڊن ۾ حاصل ڪئي هن چيو ته 2013 ۾ مسلم ليگ جي اميدوار عمر ايوب هريپور کان 750 ووٽن کان ڪاميابي حاصل ڪئي هئي جڏهن ته هاڻي ٿيندڙ ضمني اليڪشن ۾ عمران خان جي صوبائي حڪومت ان جي انتظاميه ۽ پوليس ۽ پٽوارن جي موجودگي ۾ 47 هزار ووٽن جي برطري سان اسان جو اميدوار ڪامياب ٿيو آهي عمران خان خود ان اليڪشن ۾ پنهنجي گهرواري سميت شامل هو. هن چيو ته اياز صادق ۽ صديق بلوچ جي تڪن ۾ عمران خان کي اهڙي طرح شڪست ڏني ويندي جهڙي طرح پهريان ڏني هئي پرويز رشيد چيو ته اسان کي معلوم ٿيو آهي ته عمران خان اياز صادق جي تڪ ۾ فراريت حاصل ڪري رهيو آهي جيڪڏهن ان کي پنهنجي سچائي جو يقين آهي ته ان کي ان تڪ مان اليڪشن ۾ حصو وٺڻ گهرجي. هن چيو ته صديق بلوچ جي تڪ ۾ اليڪشن وڙهڻ سان به جهانگير ترين ڀڄي رهيو آهي ۽ اليڪشن ڪميشن جو بهانو بڻايو پيو وڃي. حالانڪه ان اليڪشن ڪميشن جي تحت ان هريپور جو ضمني ۽ خيبرپختونخواهه جو بلدياتي اليڪشن وڙهيو ۽ بلدياتي اليڪشن ۾ پنهنجي ڪاميابي جي دعويٰ ڪندي ان کي مقبوليت جي دليل بڻايو آهي پوءِ انهيءَ اليڪشن ڪميشن تي الزام هڻي فرار ڇو ٿي رهيو آهي اطلاع واري وزير چيو ته 2008 ۾ هو اليڪشن مان ڀڄي ويو ۽ اليڪشن ۾ حصو وٺڻ جي همت نه ٿي آمريت اسان کي ٻاهر رکڻ ۽ نوازشريف ۽ شهبازشريف کي اليڪشن نه ورهڻ ڏنو ويو ۽ اسان بغير قيادت جي اليڪشن ۾ حصو ورتو اسان جي ووٽر کي خبر ئي نه هئي ته مسلم ليگ (ن) جي ڪاميابي جي صورت ۾ وزيراعظم ۽ وزيراعليٰ ڪير ٿيندو ان جي باوجود اسان سڀني کان وڏي صوبي مان ڪاميابي حاصل ڪئي پر هو اليڪشن مان ڀڄي ويا. ڇو ته هو عوام سان منهن نٿا ڏيئي سگهن صرف سازش ڪري سگهن ٿا ۽ انارڪي ڦهلائي سگهن ٿا عوام کي گمراهه ڪري سگهن ٿا ڪراچي ۾ ڏوهارين جي خلاف آپريشن جاري آهي ۽ دهشتگردي خلاف آپريشن ضرب عضب کي مسعت ڏني وڃي ٿي ته انهن اليڪشن ڪميشن جو بهانو بڻائي رڙيون ڪرڻ شروع ڪيون آهن هن چيو ته عمران خان يقين رکي ته جهڙي طرح هو ڌرڻو ڪنٽينر ۾ هنيو هو توهان جي ان احتجاج جو به هاڻي اهو ئي حشر ٿيندو اسان نه ته عمران خان ۽ نه ئي جهانگير ترين کي فرار ٿيڻ جو رستو ڏينداسين. هن چيو ته اياز صادق جي وڪيل خواجه حارث ملڪ کان ٻاهر آهن هو ست سيپٽمبر تي واپس ايندو ته رڪارڊ جي درستگي لاءِ سپريم ڪورٽ وينداسين پر حڪم انتها حاصل نه ڪنداسين. صديق بلوچ وٽ ڊگري متعلق لاهور هاءِ ڪورٽ جو فيصلو موجود آهي هو به سپريم ڪورٽ ويندو پر حڪم انتا نه وٺنداسين انموقعي تي ڳالهائيندي وفاقي ۽ ترقي ۽ منصوبه بندي واري وزير احسن اقبال چيو ته عمران خان پنهنجي هيٽ ٽرڪ جو ذڪر ڪري رهيو آهي پر انشاءُالله اياز صادق ان جي خلاف ڪاميابي جي هيٽ ٽرڪ ڪندو ڇو ته هو پهريان عمران خان کي ٻه دفعا شڪست ڏيئي چڪو آهي. عمران خان جو ايجنڊا آهي ته حڪومت جي توجهه ملڪ جي اصل ايجنڊا کان هٽائي وڃي هن چيو ته اسان 2018 تائين لوڊشيڊنگ جو خاتمو چاهيون ٿا انتهاپسندي جو خاتمو چاهيون ٿا ڪراچي ۽ بلوچستان۾ امن ۽ ترقي جا خواهشمند آهيون عمران خان جيتري ڪوشش ڪري اسان پنهنجي حدفن کان نه هٽنداسين هن چيو ته عمران خان جي ڌرڻي سان اسان جي طاقت ۾ اضافو ٿيو ۽ ضمني اليڪشن ۾ ان جو ڌرڻي جو تختو الٽي پيو جن تڪن ۾ ضمني اليڪشن ٿيڻي آهي اتي پهريان جي نسبت چئن کان پنج گناهه وڌيڪ ڪاميابي حاصل ڪنداسين هڪ سوال جي جواب ۾ پرويز رشيد ٻڌايو ته اين اي 122 ۾ مسلم ليگ (ن) جو اميدوار پهريان وارو ئي هوندو جڏهن ته اين اي 154 ۾ نااهلي جو معاملو درپيش آهي ان جي لاءِ صورتحال مطابق فيصلو ڪيو ويندو ان کان اڳ وزيراعظم محمد نوازشريف جي صدارت هيٺ اجلاس ۾ ملڪ جي گڏيل صورتحال خاص طور تي اليڪشن ٽربيونل جي فيصلن تي تفصيلي غور ڪيو ويو جڏهن ته پنجاب ۾ ايندڙ مڪاني چونڊن متعلق معاملن تي غور ڪيو ويو اجلاس ۾ سينيٽ ۾ قائد ايوان راجا ظفرالحق وفاقي وزير پنجاب جو وڏو وزير کان علاوه وزيراعظم جو معاون خصوصي ۽ پارٽي جا ڪجهه پارليمينٽ ميمبر صوبائي ۽ قومي اسيمبلي جي ميمبرن شرڪت ڪئي. اجلاس ۾ فيصلو ڪيو ويو ته اياز صادق جي تڪ اين اي 122 ۽ صديق بلوچ جي تڪ اين اي 154 ۾ مسلم ليگ (ن) ضمني اليڪشن وڙهندي ۽ عوام جي عدالت ۾ ويندي.

 

ٻارڙن ۽ عورتن کي قتل ڪرڻ جي اجازت نه ڏينداسين: آرمي چيف

راولپنڊي(اي پي پي) چيف آف آرمي اسٽاف جنرل راحيل شريف خميس ڏينهن شوال واري علائقي جو دؤرو ڪيو ۽ آپريشن ۾ حصو وٺندڙ فوجين سان ملاقات ڪري ڪجهه وقت گذاريو. سڌ سماءَ واري شعبي آءِ ايس پي آر مطابق آرمي چيف دؤري دوران چيو ته فوجين جو مورال تمام گهڻو متاثر ڪندڙ آهي، آپريشن ۾ ٿيندڙ ڪاميابين جي واکاڻ ڪئي. آرمي چيف چيو ته قبضي هيٺ آيل پهاڙين کي ڪليئر ڪيو ويو آهي، هن هدايت ڪئي ته دهشتگردن جي ٺڪاڻن جو صفايو ڪيو وڃي. هر هنڌ دهشتگردن جي ٺڪاڻن ۽ انهن جي مددگارن جو رابطو ٽوڙيو وڃي. هن چيو ته اسان ملڪ ۾ ڪنهن کي به ڪنهن جي ٻچڙن ۽ عوام کي مارڻ جي اجازت نه ڏينداسين. آرمي چيف چيو ته اسان انهن جا چهرا بي نقاب ڪنداسين جن ڪنهن به ريت ۽ ڪنهن به مرحلي تي دهشتگردن جي مدد ڪئي. پاڪ فوج جي ڪاميابين جو ذڪر ڪندي آرمي چيف چيو ته دهشتگرديءَ خلاف جنگ ۾ پاڪ فوج جي ڪاميابين جو ڪو ثاني ناهي، هن آپريشن جي غير معمولي ڪاميابين جي واکاڻ ڪئي.

 

ٽڊا ڪيس: اڳوڻي وزير اعظم گيلاني ۽ امين فهيم کي گرفتار ڪري پيش ڪرڻ جو حڪم

ڪراچي (اين اين آءِ) مقامي اينٽي ڪرپشن عدالت اڳوڻي وزيراعظم يوسف رضا گيلاني ۽ اڳوڻي تجارت واري وفاقي وزير مخدوم امين فهيم کي ٽريڊ ڊيولپمينٽ اٿارٽي آف پاڪستان ڪرپشن ڪيس ۾ گرفتار ڪري 10 سيپٽمبر تي پيش ڪرڻ جو حڪم ڏنو آهي خميس تي مقامي اينٽي ڪرپشن عدالت ۾ ٽڊاپ اسڪينڊل ڪيس جي ٻڌڻي ٿي وفاقي تحقيقاتي اداري ايف آءِ اي جي اسسٽنٽ ڊائريڪٽر بختيار چنا اڳوڻي وزيراعظم يوسف رضا گيلاني ۽ امين فهيم سميت ان جي ٻين ساٿين خلاف ٽڊاپ ۾ ڪرپشن متعلق تفتيش مڪمل ڪندي 12 ڪيسن جي حتمي چالان عدالت ۾ پيش ڪيو. ايف آءِ اي پاران پيش ڪيل حتمي چالان ۾ پيپلزپارٽي جي ٻنهي اڳواڻن سميت ٻين کي فرار قرار ڏنو. جنهن تي عدالت اڳوڻي وزيراعظم يوسف رضا گيلاني ۽ امين فهيم سميت ٻين کي 10 سيپٽمبر تائين گرفتار ڪري پيش ڪرڻ جو حڪم ڏنو ٻنهي اڳواڻن تي ٽڊاپ ۾ 50ڪروڙ رپين جي ڪرپشن جا الزام آهن. سيد يوسف رضا گيلاني تي 7 جڏهن ته مخدوم امين فهيم تي 5 ڪيس داخل آهن. واضح رهي ته پيپلزپارٽي جي ٻنهي اڳواڻن 12 مختلف ڪيسن ۾ پيش ٿي پنهنجون ضمانتون ڪرائي چڪا هئا.

 

وفاق سنڌ ۽ بلوچستان تي ظلم پيو ڪري ته صوبائي حڪومتون ڇا پيون ڪن؟ چيف جسٽس

اسلام آباد(بيورو) سپريم ڪورٽ، تيل ۽ گئس جي رائلٽي واري ڪيس ۾ سنڌ ۽ بلوچستان حڪومتن کان پراڊڪشن بونس ۽ منصوبن جا تفصيل طلب ڪري ورتا، عدالت پڇاڻو ڪيو آهي ته وفاق جيڪڏهن سنڌ ۽ بلوچستان تي ظلم ڪري رهيو آهي ته صوبائي حڪومتون ڇا پيون ڪن؟ چيف جسٽس جواد ايس خواجا جي سربراهي ۾ سپريم ڪورٽ بئنچ تيل ۽ گئس جي رائلٽي بابت ڪيس جي ٻڌڻي ڪئي. ٻڌڻيءَ دوران ريمارڪس ڏيندي چيف جسٽس چيو ته سانگهڙ جو پئسو ڪراچي ۽ سکر تي خرچ ٿي رهيو آهي، جيڪا ناانصافي آهي. جواد ايس خواجا چيو ته بلوچستان جي تيل ۽ گئس مان آمدني 34 ملين ڊالر آهي پر اها رقم ٻئي هنڌ استعمال ٿئي ٿي. جسٽس فائز عيسيٰ ريمارڪس ڏيندي چيو ته وفاق جيڪڏهن سنڌ ۽ بلوچستان تي ظلم ڪري رهيو آهي ته صوبائي حڪومتون ڇا پيو ڪن؟ ان موقعي تي بلوچستان جي ايڊووڪيٽ جنرل موقف پيش ڪندَي چيو ته پاڪستان پيٽروليم جي ليز ۾ واڌ تي صوبائي سرڪار کي ڳڻتي آهي. بلوچستان جي ايڊووڪيٽ جنرل چيو ته صوبائي سرڪار ان سلسلي ۾ وزيراعظم کي خط پڻ لکيو آهي. جسٽس فائز عيسيٰ چيو ته بلوچستان حڪومت کي آئيني رستي جو پتو ناهي، وزيراعظم کي خط لکڻ ڪهڙو ڪمال آهي!

 

پ پ کي ديوار سان لڳايو پيو وڃي، ڇا ڪرپشن رڳو ڪراچي ۾ ٿي رهي آهي؟: آصف زرداري

ڪراچي(م.ڊ) اڳوڻي صدر آصف زرداري پارٽي جي سينيئر اڳواڻن سان فون تي رابطو ڪري ڊاڪٽر عاصم جي گرفتاري تي حڪمت عملي جوڙڻ جي هدايت ڪئي آهي. ذريعن جو چوڻ آهي ته آصف زرداري خورشيد شاهه، يوسف رضا گيلاني ۽ راجا پرويز اشرف سان فون تي رابطو ڪري چيو آهي ته پ پ کي  ديوار سان لڳايو پيو وڃي ۽ هو عدالتي مارشلا کي منهن ڏئي چڪا آهن.  آصف زرداري پ پ اڳواڻن کي ڊاڪٽر عاصم جي گرفتاري تي حڪمت عملي جوڙڻ جي هدايت ڪندي چيو آهي ته ڇا ڪرپشن رڳو ڪراچي ۾ ٿي رهي آهي؟، ذريعن جو چوڻ آهي ته آصف زرداري جي رابطي کانپوءِ اسلام آباد ۾ پ پ اڳواڻن جو اجلاس جاري آهي،جنهن کانپوءِ شيري رحمان اڄ شام 6 وڳي اهم پريس ڪانفرنس ڪندي.

 

آصف علي زرداري خلاف ڪارروائي ڪئي وئي ته جنگ شروع ٿيندي:خورشيد شاهه جو چتاءُ

اسلام آباد(بيورو) قومي اسيمبلي ۾ اپوزيشن ليڊر خورشيد شاهه چيو آهي ته بندوق جي زور تي ڪجهه ناهي ٿيندو، آصف علي زرداري خلاف ڪارروائي ڪئي وئي ته جنگ شروع ڪئي ويندي. اسلام آباد ۾ ميڊيا سان ڳالهائيندي خورشيد شاهه پ پ اڳواڻن جي گرفتارين تي چڙي پيو ۽ چيو ته جيڪو ڪجهه ٿي رهيو آهي رڳو سنڌ ۾ ئي ٿئي پيو. پ پ اڳواڻ چيوته ڊاڪٽر عاصم حسين کي گرفتار ڪرڻ کان جاچ ڪرڻ گهـُرجي ها، مهذب معاشرن وارو سلوڪ هئڻ گهرجي. هن چيو ته راجا پرويز اشرف تي به گِريَ ٽريفڪنگ ڪيس ٺاهيو ويو آهي. خورشيد شاهه چيو ته مسلم ليگ نواز کي سمجهڻ گهرجي ته سياسي جماعتون ئي انهن جون ٻانهون آهن، اسان پنهنجي ئي انتشار ۾ ڦاٿل آهيون، بندوق جي زور تي ڪجهه ناهي ٿيندو. سندس چوڻ هو ته پيپلز پارٽي پارليامينٽ کي ڪمزور نه ٿي ڪرڻ چاهي، پارليامينٽ اندر رهجي جبر جو مقابلو ڪيو ويندو، گرفتاريون بند ٿيڻ گهـُرجن. اپوزيشن ليڊر جو چوڻ هو ته حڪومت کي ايترو ڪمزور نه ٿيڻ گهرجي، اليڪشن ڪميشن جي ميمبرن جي معاملي تي پارليامينٽ جو فورم استعمال ڪرڻ گهرجي. خورشيد شاهه چيو ته پ پ جي شريڪ چيئرمين آصف علي زرداري تي هٿ وڌو ويو ته جنگ جي شروعات ٿيندي.

 

هيڪ سنڌ جو چيئرمين ڊاڪٽر عاصم حسين 90 ڏينهن لاءِ رينجرز حوالي

ڪراچي (اين اين آءِ) دهشتگردي روڪٿام واري خاص عدالت سنڌ هائر ايجوڪيشن ڪميشن جي چيئرمين ۽ اڳوڻي وفاقي پيٽرول واري وزير ڊاڪٽر عاصم حسين کي 90 ڏينهن جي لاءِ رينجرز جي تحويل ۾ ڏنو ويو آهي خميس تي سخت سيڪيورٽي ۾ دهشتگردي روڪٿام جي خاص عدالت نمبر 3 ۾ پيش ڪيو ويو ڊاڪٽر عاصم حسين جي گهرواري ڊاڪٽر زرين حسين ان جي ڌيءَ ڊاڪٽر ندا ۽ ان جو ڄاٽو به ان موقعي تي موجود هو. جڏهن ته انهن جي ملاقات نه ڪرائي ويئي رينجرز جي لا آفيسر عدالت کي ٻڌايو ته ڊاڪٽر عاصم ابتدائي تفتيش ۾ ملڪي خزاني کي اربين رپين جو نقصان پهچائڻ واري گروهه جو انڪشاف ڪيو آهي ڊاڪٽر عاصم ٻڌايو ته ان جي ذريعي هڪ اهم شخصت ڪجهه بئنڪ اڪائونٽ غير ملڪي بئڪن ۾ کولرائڻ ۽ ان ۾ رقم منتقل ڪئي ويئي آهي ملزم کان وڌيڪ تفتيش اڃا باقي آهي تنهنڪري ملزم کي 90 ڏينهن جي لاءِ رينجرز جي تحويل ۾ ڏنو وڃي جنهن تي عدالت ان درخواست کي منظور ڪندي 90 ڏينهن لاءِ رينجرز جي تحويل ۾ ڏنو ويو ڊاڪٽر عاصم کي دهشتگردي جي مالي تعاون چائنا ڪٽنگ جا الزام آهن گذريل ڏينهن حساس اداري جي اهلڪار ڊاڪٽر عاصم حسين جي ڪلفٽن بلاڪ هڪ مان هائر ايجوڪيشن ڪميشن جي آفيس کان ٻاهر حراست ۾ ورتو هو ڊاڪٽر عاصم حسين ۽ اڳوني صدر آصف علي زرداري جي ويجهن ساٿين مان تصور ڪيو پيو وڃي.

 

سنڌ حڪومت سمورن کاتن ۾ نين ڀرتين تي پابندي لاڳو ڪري ڇڏي، نوٽيفڪيشن جاري

ڪراچي(اسٽاف رپورٽر) سنڌ سرڪار،سمورن صوبائي کاتن ۾ نين ڀرتين تي اڻڄاڻايل مدي تائين پابندي لاڳو ڪري ڇڏي آهي. سروسز جنرل ايڊمنسٽريشن اينڊ ڪوآرڊينيشن ڊپارٽمينٽ پاران جاري ڪيل نوٽيفڪيشن موجب صوبي جي سمورن کاتن ۾ نين ڀرتين تي مڪمل طور پابندي لاڳو ڪئي وئي آهي. ايس اينڊ جي اي ڊي کاتي پاران جاري ڪيل نوٽيفڪيشن موجب نين ڀرتين تي پابندي وڏي وزير سيد قائم علي شاهه جي هدايت تي لاڳو ڪئي وئي آهي. وڏي وزير جي حڪم تي سنڌ جي چيف سيڪريٽري صديق ميمڻ پڻ سمورن کاتن جي سربراهن کي خط لکي نين ڀرتين تي پابندي بابت پڻ آگاهه ڪري ڇڏيو آهي. ٻئي طرف ورهين کان بيروزگاريءَ جي ور چڙهيل سنڌ جا نوجوان صوبائي حڪومت جي فيصلي سان مايوسيءَ جي ور چڙهي ويا آهن. بيروزگار نوجوانن جو مطالبو آهي ته نوڪرين تي پابندي واري فيصلي تي نظرثاني ڪري کين روزگار فراهم ڪيو وڃي

 

ڪجهه ذهني معذورن کان ترقي برداشت نه ٿي رهي آهي: اسحاق ڊار

ڪراچي(اسٽاف رپورٽر) ڪراچي، لاهور ۽ اسلام آباد اسٽاڪ ايڪسچينج کي ضم ڪري پاڪستان اسٽاڪ ايڪسچينج جو نالو ڏنو ويو، ناڻي واري وفاقي وزير اسحاق ڊار چيو آهي ته ڪجهه ذهني  معذورن کان ترقي برداشت نه ٿي رهي آهي، پاڪستان جلد عالمي مارڪيٽ ۾ اڀرندڙ معيشت ملڪ بڻجي ويندو. اسلام آباد ۾ ڪراچي، لاهور ۽ اسلام آباد اسٽاڪ ايڪسچينج کي پاڪستان اسٽاڪ ايڪسچينج ۾ ضم ڪرڻ واري معاهدي تي صحيحون ٿيون، جنهن ۾ ناڻي واري وفاقي وزير اسحاق ڊار به شرڪت ڪئي. ان موقعي تي تقريب کي خطاب ڪندي ناڻي واري وفاقي وزير اسحاق ڊار چيو ته پاڪستان جون معاشي حالتون بهتر ٿي رهيون آهن، هاڻي گردشي قرض گهٽجي ويا آهن. هن چيو ته سٺن ماڻهن کان بهتر ڪم وٺڻ حڪومت جي پاليسي آهي، پاڪستان اڀرندڙ معيشت آهي، جلد سٺا نتيجا سامهون ايندا. اسحاق ڊار چيو ته ڪجهه ماڻهن کان ملڪ جي ترقي برداشت نه پئي ٿئي پر  پاڪستان جلد عالمي مارڪيٽ ۾ اڀرندڙ معيشت بڻجي ويندو