تازيون خبرون

Monthly Archives: August 2015

ميرپورخاص ويجهو روڊ حادثو، هڪ ئي ڪٽنب جا 4 ڄڻا فوت ، 3 زخمي

ميرپورخاص (اي پي پي)ميرپورخاص ويجهو خوفناڪ روڊ حادثي ۾ هڪ ئي ڪٽنب جا 4 ڄڻا فوت ۽ 3 ڄڻا زخمي ٿي پيا آهن . خبر موجب گذريل ڏينهن ميرپورخاص – نئون ڪوٽ روڊ لڳ ڳوٺ سمن وٽ ٻن تيز رفتار ڪارن ۾ آمهون سامهون ٽڪر جي نتيجي ۾ تعلقه ڪنري جي ڳوٺ ٽالهي کان ڪراچي علاج لاءِ ويندڙ هڪ ئي ڪٽنب جا مصدق حسين آرائين ۽ محمد شفيق آرائين ٿڏي تي فوت ٿي ويا جڏهن ته 2 ڄڻا اشفاق آرائين ۽ عمران آرائين اسپتال ويندي رستي ۾ زخمن جا سور نهسهندي فوت ٿي ويا. جڏهن ته ڪنري جو رهواسي ڊاڪٽر ڀڳوانداس سندس زال ڪانتا ٻائي ۽ سندن پٽ لوڪيش ڪمار سخت زخمي ٿي پيا جن کي علاج لاءِ سول اسپتال ميرپورخاص آندو ويو جتي ڊاڪٽر ڀڳوانداس کي ڳڻتي جوڳي حالت ۾ سول اسپتال ميرپورخاص کان ڪراچي نيو ويو جڏهن ته ڪانتا ٻائي ۽ سندس پٽ لوڪيش ڪمار کي علاج لاءِ سول اسپتال ميرپورخاص ۾ داخل ڪيو ويو آهي . خوفناڪ ٽڪر ۾ فوت ٿي ويل هڪ ئي خاندان جي 4 ڄڻن جا لاش سول اسپتال ميرپورخاص مان قانوني ڪاروائي بعد وارثن حوالي ڪيا ويا. لاش کڻڻ لاءِ پهتل فوتين جي وارثن زاهد حسين آرائين ۽ حاجي ياسين آرائين موجب اسان جا مائٽ شفيق آرائين جو ڊائلاسس ڪرائڻ لاءِ ٽالهي کان ڪراچي کڻي وڃي رهيا هئا ته رستي ۾ ايڪسيڊنٽ ٿيڻ جي نتيجي ۾ چارئي ڄڻا فوت ٿي ويا. حد جي پوليس ٻنهي ڪارن کي تحويل ۾ وٺي جاچ شروع ڪري ڏني آهي.

 

فيشن ۽ سينگار بابت بالي ووڊ ۾ جيڪڏهن سڀ کان وڌيڪ ڄاڻ آهي ته اها ڪترينا ئي آهي: رنبير ڪپور

ممبئي (شوبز نيوز) بالي ووڊ جي چاڪليٽي هيرو ۽ ڪپور خاندان جي ڳڀرو اداڪار رنيبر ڪپور پنهنجي گرل فرينڊ ڪترينا ڪيف بابت چيو آهي ته کيس سونهن ۽ سينگار جي ايتري ته زبردست ڄاڻ آهي جو هو حيرت ۾ پئجي ويندو آهي، کيس لڳي ٿو ته سندس ان  ڄاڻ ڪري پنهنجو پاڻ کي فٽ ۽ بهتر رکي سگهي ٿي، پهريون ڀيرو ماڻهن وچ ۾ ڪترينا بابت ويچار ونڊيندي رنيبر چيو ته فيشن ۽ سينگار بابت بالي ووڊ ۾ جيڪڏهن سڀ کان وڌيڪ ڄاڻ آهي ته اها ڪترينا ئي آهي، بالي ووڊ ذريعن موجب ٻئي اداڪار هڪ ٻئي بابت گهٽ ڳالهائيندي ڏٺا ويا آهن، پر جڏهن به ڳالهائيندا آهن ته بالي ووڊ نگريءَ ۾ هر وات تي سندن ڳالهه اچي ويندي آهي، هن چيو ته ڪترينا سان گڏ ڪرينا، پريانڪا ۽ ٻين اداڪارائن کي به فيشن جي چڱي ڄاڻ آهي، رنبير چيو ته بگ بي اميتاڀ بچن جي اسٽائيل ۽ شخصيت تمام گهڻو متاثر ڪيو ۽ هو ان جو هڪ قسم جو ديوانو پڻ آهي.

 

ورن سان ڪم دوران تمام گهڻو مزو آيو جيڪو هميشه ياد رهندو: ڪرتي سينن

ممبئي (شوبز نيوز) بالي ووڊ اداڪارا ڪرتي سينن چيو آهي ته شاهه رخ ۽ ڪاجل سان گڏ ”دل والي“ ۾ جيڪڏهن مان سٺي اداڪاري ڪئي آهي ته ان ۾ ساٿي اداڪار ورن ڌون جي مدد شامل آهي، ڪرتي سنن پنهنجي سٺي ڪم جو سڄو ڪريڊٽ ورن کي ڏيندي چيو ته ورن ڌون ۾ اداڪاري جي ڀرپور توانائي موجود آهي، جيڪڏهن اهڙو ساٿي اداڪار گڏ هجي ته نئين اداڪار لاءِ سٺو سنئوڻ ثابت ٿيندو، ڪرتي موجب ورن ڌون هڪ سنجيده اداڪار آهي، جيڪو پنهنجي جونيئرن کي سيکارڻ فرض سمجهي ٿو، ورن نه رڳو اداڪاري پر فلم ٺهڻ واري سموري عمل کي اک ۾ رکي ان مان پرائڻ جي ڪوشش ڪندو آهي، سندس بهترين ذهنيت سبب هن سان گڏ ڪم ڪندي تمام گھڻو مزو پڻ ماڻيو، جنهن کي ڪنهن به صورت ۾ وساري نه ٿو سگهجي، ڪرتي سينن موجب کيس شاهه رخ ۽ ڪاجول سان گڏ فلم جا سين فلم بند ڪرائڻ جو بي صبري سان انتظار پڻ آهي.

 

فلم جذبا کي هلندڙ سال 9 آڪٽوبر تي عام نمائش لاءِ پيش ڪيو ويندو

ممبئي (شوبز نيوز) بالي ووڊ ۾ پنهنجي نرالي اداڪاريءَ جي ڪري نالو ڪمائيندڙ اداڪار عرفان خان ايڪشن ٿرلر فلم ”جذبه“ ۾ ايشوريا راءِ بچن سان گڏ اداڪاريءَ جا جلوا ڏيکاري رهيو آهي. گذريل ڏينهن هڪ تقريب ۾ صحافي پاران سوال ته فلم ۾ ايشوريا جي هوندي اوهان کي گھٽ اهميت ڏني وئي هوندي جي جواب ۾ هن چيو ته کيس ان جي ڪا پرواهه ناهي، ڇو ته مون ان فلم ۾ ڪم ئي ايشوريا جي ڪري ڪيو آهي. فلم ۾ ايشوريا راءِ مرڪزي ڪردار ادا ڪري رهي آهي، جڏهن ته عرفان خان کان سواءِ شبانه اعظمي ۽ جيڪي شروف به فلم ۾ اهم رول ادا ڪندي نظر ايندا. ايڪشن سان ڀرپور بالي ووڊ فلم سائوٿ ڪوريا جي سال 2007ع ۾ رليز ٿيل فلم ”سيون ڊيز“ جو ريميڪ آهي، جنهن کي هلندڙ سال 9 آڪٽوبر تي عام نمائش لاءِ پيش ڪيو ويندو.

 

ٽوئينڪل کنا جي ڪتاب جي مشهوريءَ تي تمام گهڻي خوشي ٿي آهي: اڪشي ڪمار

ممبئي (شوبز نيوز) بالي ووڊ جي کلاڙي اڪشي ڪمار جو چوڻ آهي ته کيس سندس زال ٽوئينڪل کنا جي ڪتاب جي مشهوريءَ تي تمام گهڻي خوشي ٿي آهي. اڪشي چيو ته هڪ هفتي اندر ٽوئينڪل کنا جي ڪتاب ”مسٽريس فني بونز“  کي بهترين موٽ ملڻ تي تمام گهڻي خوشي ٿي آهي. بالي ووڊ ذريعن موجب ٽوئينڪل کنا جي مشهور ڪالمن ”فني بونز“ کي ڪتابي صورت ۾ 18 آگسٽ تي لانچ ڪيو ويو هو. اڪشي ڪمار سماجي رابطن واري ويب سائيٽ ٽويئٽر تي به ٽوئينڪل کنا جي ساراهه ڪئي، ياد رهي ته انڊسٽري ۾ اچڻ بعد اڪشي ۽ ٽوئينڪل کنا جي شادي ٿي هئي، جنهن کي لڳ ڀڳ 14 سال گذري ويا آهن، جڏهن ته کين ٻن ٻارن جو اولاد پڻ آهي.

 

پاڪستان هاڪي ٽيم جي چيف ڪوچ شهناز شيخ پنهنجي عهدي تان استعيفيٰ ڏئي ڇڏي

اسلام آباد (اسپورٽس نيوز) پاڪستان هاڪي ٽيم جي چيف ڪوچ شهناز شيخ پنهنجي عهدي تان استعيفيٰ ڏئي ڇڏي آهي. نئين صدر خالد سجاد کوکر جي مقرريءَ کي پي ايڇ ايف جي ڪانگريس جي گڏجاڻيءَ ۾ منظوري ڏني وئي. ذريعن جو چوڻ آهي ته نئين سيڪريٽريءَ جي لاءِ شهباز سينيئر مضبوط ترين اميدوار آهي. هاڪي ٽيم جي چيف ڪوچ شهناز شيخ اسلام آباد ۾ پي ايڇ ايف ڪانگريس جي گڏجاڻيءَ ۾ پنهنجي استعيفيٰ پيش ڪئي، خابرو اداري سان ڳالهائيندي شهناز شيخ چيو ته کيس هاڪي ته هٿ ۾ ڏني وئي پر بال نه ڏنو ويو ۽ پڻ سڀني خواهش ڏيکاري ته گول ڪيو وڃي. شهناز شيخ جو چوڻ هو ته سندس ڪوچنگ ۾ پاڪستان چئن مان ٽِن ايوينٽن ۾ ٻين پوزيشن ماڻي، رڳو اولمپڪ ڪوليفائنگ ۾ شڪست ملي. پي ايڇ ايف جي ڪانگريس گڏجاڻيءَ ۾ فيڊريشن جي نئين صدر خالد سجاد کوکر جي مقرريءَ جي به يڪراءِ منظوري ڏني وئي. ٻئي طرف ذريعن جو چوڻ هو ته فيڊريشن جي سيڪريٽري رانا مجاهد جي جاءِ تي ذميواري اولمپيئن شهباز سينيئر کي ملڻ جا امڪان پڻ آهن.

 

ڏکڻ آفريڪا ڪرڪيٽ ٽيم جي ڪپتان گنگولي جو ريڪارڊ ٽوڙي ڇڏيو

ڊربن (اسپورٽس نيوز) ڏکڻ آفريڪا ڪرڪيٽ ٽيم جي ڪپتان ۽ جارحاڻي بيٽنگ ڪندڙ اي بي ڊي وليئرز ون ڊي ڪرڪيٽ ۾ تيز ترين 8 هزار رنسون مڪمل ڪرڻ جو نئون عالمي رڪارڊ قائم ڪري ورتو. هن نيوزيليند خلاف آخري ون ڊي ۾ اهو سنگِ ميل پار ڪيو. ان کان اڳ تيز ترين 8 هزار رنسون مڪمل ڪرڻ جو عالمي اعزاز ڀارت جي سارو گنگوليءَ کي هو، جنهن 200 اننگن ۾ اهڙو ڪارنامو انجام ڏنو هو، جڏهن ته ابراهام ڊي وليئرز 182 اننگز ۾ اهڙو اعزاز حاصل ڪيو

 

انگلش ڪائونٽي وورسسٽر شائر پاڪستان جي آف اسپنر سعيد اجمل کي پنهنجي جٿي مان ڊراپ ڪري ڇڏيو

لنڊن (اسپورٽس نيوز) انگلش ڪائونٽي وورسسٽر شائر پاڪستان جي آف اسپنر سعيد اجمل کي پنهنجي جٿي مان ڊراپ ڪري ويسٽ انڊينبالر شينن گيبريئل کي سڏائي ورتو آهي، جنهن سان اسپنر کي انٽرنيشنل ڪرڪيٽ جي واپسيءَ واري ڪوششن کي سخت ڌڪ رسيو آهي. آف اسپنر آءِ سي سيءَ طرفافن شڪي بالنگ ايڪشن کان پوءِ پنهنجي ايڪشن تي ٻيهر ڪم ڪيو، جنهن کان پوءِ هلندڙ سال سندس ايڪشن کي ڪليئر قرار ڏنو ويو، پر نئين ايڪشن سان هو پنهنجي اڳوڻي اهميت برقرار رکي نه سگھيو. پهريان کيس ملڪي ٽيم مان ڊراپ ڪيو ويو، هاڻي انگلش ڪائونٽيءَ مان به ڊراپ ڪيو ويو آهي. هلندڙ سيزن دوران اجمل وورسسٽر شائر طرفان ڪا خاص ڪارڪردگي نه ڏيکاري سگھيو هو ۽ 48.5 اوورن ۾ صرف 6 وڪيٽون ورتيون هئائين، جنهن ڪري وڪيٽون وٺڻ جو سڄو بار ٻين بالرن تي پيو هو.

 

پاڪستان جي نيوزيلينڊ واري دوري جو شيڊول جاري

آڪلينڊ (اسپورٽس نيوز) پاڪستان جي نيوزيلينڊ واري دوري جو شيڊول جاري ڪيو ويو آهي، جنهن دوران 3 ون ڊي ۽ 3 ٽي ٽوئنٽي ميچون کيڏيون وينديون، نيوزيلينڊ ڪرڪيٽ بورڊ جي چيف ايگزيڪيوٽو ڊيوڊ وائٽ موجب پاڪستاني ڪرڪيٽ ٽيم ايندڙ سال نيوزيلينڊ جو دورو ڪندي، نيوزيلينڊ ڪرڪيٽ بورڊ پاران جاري ڪيل شيڊول موجب ٻنهي ٽيمن وچ ۾ دوري جي شروعات 15 جنوري تي ٽي ٽوئنٽي ميچ سان ٿيندي، ٻي ٽي ٽوئنٽي ميچ 17 ۽ ٽين 22 جنوري تي کيڏي ويندي، شيڊول موجب پاڪستان ۽ نيوزيلينڊ وچ ۾ ون ڊي ميچن جي سيريز 25 جنوري کان ويلنگٽن ۾ شروع ٿيندي، ٻي ون ڊي ميچ 28 جنوري تي نيپيئر ۽ ٽين 31 جنوري تي آڪلينڊ ۾ کيڏي ويندي. اهڙي ريت نيوزيلينڊ ڪرڪيٽ بورڊ آسٽريليا ۽ سريلنڪا خلاف به پنهجي فيوچر ٽوئر جو شيڊول جاري ڪري ڇڏيو آهي.

 

ڪرپشن خلاف ٿيندڙ احتجاج…!

 

حيدرآباد ۾مختلف اسڪولن جي ماسترياڻين، توڙي متاثر عورتن شاهده پروين، شاهين، گلشن، نرگس، خاتون، شهنيلا ۽ ٻين ڪالهه پريس ڪلب ۾ پريس ڪانفرنس ڪندي الزام هنيو آهي ته پ ٽ الف جي اڳواڻن تعليم کاتي ۾ ماستري، ڪلارڪي ۽ پٽيوالي جون نوڪريون ڏيارڻ عيوض ڪروڙين رپيا ورتا، جڏهن ته هنن مختلف عورتن کي ڪوڙا آرڊر ڏنا.هنن چيو ته اسان شڪايت ڪئي جنهن تي هو  ڌمڪيون ڏئي رهيا آهن. ان موقعي تي تفصيل ٻڌائيندي پٺاڻ ڪالوني پرائمري اسڪول جي ماسترياڻي شاهده پروين ٻڌايو ته پ ٽ الف جو اڳواڻ (م ک) پاڻ کي وزيرن جو دوست سڏرائيندو آهي ۽ هن پڪ ڏني هئي ته هو پئسن عيوض کين نوڪريون وٺي ڏيندو. هن چيو ته اسان م ک کي 17 نوڪرين لاءِ ڏيڍ ڪروڙ رپيا ڏنا. بئراج ڪالوني گرلس پرائمري اسڪول جي هيڊ ماسترياڻي مسمات خاتون ٻڌايو ته هن م ک کي نوڪرين جي11 آرڊرن لاءِ 11 لک رپيا ڏنا. مريم چيو ته هن 25 لک رپيا ڏنا آهن، پر کيس هڪ به آرڊر ناهي ڏنو ويو، سميرا 14 لک رپيا، شهنيلا ڏيڍ لک، نرگس 80 هزار، گلشن ڏيڍ لک ڏنا، متاثر عورتن پريس ڪانفرنس ڪندي وڌيڪ چيو ته ڄاڻايل فراڊي ٽولي خلاف ايس ايس پي سميت تعليم کاتي جي اعليٰ آفيسرن کي درخواستون ڏنيون آهن پر ڪو به تدارڪ نه ٿو ٿئي، جڏهن ته ڄاڻايل جوابدار ڌمڪيون ڏئي رهيا آهن. هنن اعليٰ اختيارين کي اپيل ڪندي چتاءُ ڏنو ته فوري طور تي فراڊ ڪندر پ ٽ الف اڳواڻن خلاف ڪارروائي ڪري سندن رقم واپس ڪرائي وڃي ٻي صورت ۾ احتجاج جو دائرو وڌايو ويندو،

ضرورت ان ڳالهه آهي ته جتي ڪرپشن ڪندڙ ٽولا پنهنجون سرگرميون جاري رکيون پيا اچن اتي عوام به انهن هٿان شڪار پيو ٿئي پر سوال اهيو آهي ته ڇا ڪرپشن ڪندڙ ٽولا پاڻ اهي سرگرميون جاري رکيون پيا اچن يا عوام پاڻ انهن وٽ وڃي ڪرپشن جي ور چڙهي وڃي ٿو. ان ڪري ڪرپشن خلاف آواز اٿارڻ سان گڏوگڏ پنهنجي اندر مان به ڪرپشن جو خاتمو ڪرڻو پوندو. ڪنهن به لالچ ۾ اچي نوڪريون حاصل ڪرڻ لاءِ پئسه ڏيڻ بدران ميرٽ جو احترام ڪندي ٽيسٽ ڏئي نوڪري ماڻجي ته ڪرپشن جو تمام جلد خاتمو اچي ويندو.