تازيون خبرون

Daily Archives: August 27, 2015

پاڪستان ڪرڪيٽ بورڊ ڪراچي سٽي ڪرڪيٽ ايسوسئيشن کي شوڪاز نوٽيس ڏيڻ جو فيصلو ڪري ورتو

ڪراچي (اسپورٽس نيوز) پاڪستان ڪرڪيٽ بورڊ ڪراچي سٽي ڪرڪيٽ ايسوسئيشن کي شوڪاز نوٽيس ڏيڻ جو فيصلو ڪيو آهي، جنهن ۾ ان کان وضاحت گھري ويندي ته هن اسپاٽ فڪسنگ سبب سڄي ڄمار پابنديءَ سان منهن ڏيندڙ ليگ اسپنر دانش ڪنيريا کي پنهنجي ٽورنامينٽ جي افتتاحي تقريب ۾ ڇو گھرايو؟ واضح رهي ته ڪمشنر ڪراچي ڪرڪيٽ ٽورنامينٽ جي نيشنل اسٽيڊيم ۾ ٿيندڙ افتتاحي تقريب ۾ ڪراچي سٽي ڪرڪيٽ ايسوسئيشن ليگ اسپنر دانش ڪنيريا کي نه رڳو دعوت ڏني هئي پر کيس شيلڊ به پيس ڪيو ويو هو ۽ ان موقعي تي دانش ڪنيريا تقرير پڻ ڪئي هئي. خابرو اداري جي رپورٽ موجب ڪي سي سي اي جي صدر اعجاز فاروقي موجب دانش ڪنيريا کي ٽورنامينٽ جي افتتاحي تقريب ۾ گھرائڻ جو فيصلو اڻڄاڻائيءَ ۾ ٿي ويو، جنهن تي کين افسوس آهي ۽ اڳتي ان ڏس ۾ احتياط ڪيو ويندو. ذڪر لائق ڳالهه اها آهي ته ان تقريب ۾ ٽيسٽ ڪرڪيٽر سرفراز احمد، اسد شفيق ۽ انور عليءَ کان سواءِ پي سي بي چيئرمين جو صلاحڪار صلاح الدين صلو پڻ موجود هو، اهڙي واقعي پان پوءِ پاڪستان ڪرڪيٽ بورڊ جي چيئرمين سخت ڪاوڙ جو اظهار ڪندي ڪي سي سي اي کي شوڪاز نوٽيس جاري ڪرڻ جو فيصلو ڪيو آهي.

 

ڪراچي ۾ فوجي عدالتن جو انگ وڌائڻ جي منظوري…!

 

پاڪ فوج جي سربراهه جنرل راحيل شريف ڪراچي ۾ فوجي عدالتن جو انگ وڌائڻ جي منظوري ڏيندي ڪراچي ۾ دهشتگردن خلاف بنا فرق جي آپريشن جاري رکڻ جي هدايت ڪري ڇڏي،پاڪ فوج جي سربراهه سنڌ پوليس ۽ سڪيورٽي ادارن جي ڪارڪردگي جي ساراهه ڪندي چيو آهي ته آپريشن جي نتيجي ۾ امن امان جي صورتحال بهتر ٿي آهي. ڪورهيڊڪوارٽر ڪراچي ۾ اعليٰ سطحي اجلاس جي صدارت دوران ڳالهائيندي آرمي چيف ڪراچي ۾ رينجرز، پوليس ۽ انٽيليجنس ادارن جي ڪارڪردگي کي ساراهيو، جڏهن ته ڪراچي پوليس کي ساڍا ڇهه ڪروڙ رپيا ڏيڻ جي منظوري پڻ ڏني وئي. فوج جي سربراهه ڪراچي ۾ دهشتگردن خلاف آپريشن جاري رکڻ جي هدايت ڪئي آهي. جنرل راحيل شريف چيوته ڪراچي ۾ امن امان جي صورتحال ۾ بهتري آئي آهي. هن چيو ته دهشتگردن ۽ مافيا جي خاتمي تائين آپريشن جاري رهندو. آئي ايس پي آر مطابق آرمي چيف ڪراچي پوليس جي صلاحيت وڌائڻ ۽ تربيت لاءِ ڇهه ڪروڙ رپيا ڏيڻ جي منظوري ڏني. اجلاس ۾ ان ڳالهه جو عزم ورجايو ويو ته ڪراچي کي دهشتگردي کان پاڪ شهر بڻايو ويندو. ان موقعي تي جنرل راحيل شريف کي ڪراچي جي سيڪيورٽي جي صورتحال تي بريفنگ به ڏني وئي. هوڏانهن پاڪ فوج جي سربراهه جنرل راحيل شريف آرمي ايئر ڊفينس سينٽر ملير ڪينٽ جو دورو ڪيو، آئي ايس پي آر جي ڊائريڪٽر جنرل ميجر جنرل عاصم سليم باجوه جي ٽوئٽ مطابق آرمي چيف آيئر ڊفينس سينٽر ملير ڪينٽ جي دوري دوران شهيدن جي يادگار تي حاضري ڀري ۽ گلن جون چادرون چاڙهيون، جنهن کانپوءِ هن ملير ڪينٽ جي فوجي گيريزن ۾ فوجي جوانن کي خطاب پڻ ڪيو، ان موقعي تي آرمي چيف کي سينٽر جي سرگرمين بابت بريفنگ ڏني وئي، جنرل راحيل شريف ايئر ڊفينس سينٽر ۾ ليفٽيننٽ جنرل ضمير الحسن شاهه کي آرمي ايئر ڊفينس جي ڪرنل ڪمانڊنٽ جا بيج پڻ لڳايا.

 

رنجشون ۽ رسڪ!؛عديل مهر

’متحده، مُسلم ليگ ۽ مولانا صاحب ٽيئي پرچيا آهن پاڻ ۾! هو ٿورا مڃن عمران خان جا، جنهن هنن کي هڪ ٿيڻ تي مجبور ڪيو. هي جي ائين نه پيا ڪن ته تحريڪ انصاف تڪ پئي کسين! ڪراچيءَ جي ننڍين چونڊن ۾ وڏي ڳالهه ٿي وڃي ها، کوڙ ساريون سيٽون پي ٽي آءِ کٽي وڃي ها. استعيفائون ڏيڻ وارا ننڍين چونڊن ۾ ته ڪونه بيهن ها، پنهنجو نقصان ڪري بيهي رهن ها. متحده پنهنجي هاريل پاڻيءَ تان تِرڪندي ترڪندي بچي وئي. هوڏي مسلم ليگ کي پنهنجي هڪ قومي تڪ 122 تي وڏو ڌڪ لڳو آهي، هن جو اسپيڪر آئوٽ ٿي ويو آهي. اها به عمران خان جي فتح! نئين اسپيڪر جي چونڊ لاءِ ايوان ۾ به ووٽ کپن، 24 ميمبرن واري متحده ٻاهر رهي اهو به ليگ کي لوڏو!! ٻئي ڌريون تحريڪ انصاف جون تپايل! پي ٽي آءِ ٻنهي کي عام چونڊن ۾ سهڪائي چڪي آهي، ننڍين چونڊن ۾ به ٽُڪرَ لاهي سگهي ٿي! اها ڳالهه هنن جي مٿي ۾ مولانا صاحب ويهاري ته چريا نه ٿيو ٺهي وڃو، ڇنڻ ۾ ڇا رکيو آ، ڳنڍڻ جي ڳالهه ڪيو، ٺهي وڃڻ ۾ توهان جو ڀلو آ، نه ته تحريڪ انصاف ترا ڪڍي رکندوَ!! اهو ئي سوچي ٽيئي پَرتا پاڻ ۾، م- م ۽ م!!

متحده ۽ مسلم ليگ (ن) مفاهمت ڪري ڄڻ مولانا صاحب تي ٿورو ڪيو. هانءُ هن گهڻو لاٿو هو، ننڊ هن جي گهڻي ڦِٽل هئي. خط، فونون، نياپا، پنڌ، پارتون، اصل وسان نه گهٽايائين، توڙي جو هڪ ڌر دلچسپي نه پئي ڏيکاري، ٻيءَ هٿ ٻڌي چيس ته هاڻي زحمت نه ڪجو، پر هن يار هٿ نه ڪڍيو ۽ هڻي هنڌ ڪيائين. ٺهڻ وارا ٺهي وڃڻ کانپوءِ ڇا به ڪن، پر هنن کي ٺاهڻو آهي. تحريڪ انصاف هنن کي ري پليس ڪري اهو برداشت کان ٻاهر آهي. حڪومت کي هيٺيون، متحده کي مٿيون ٻُڌائي مڙئي هيٺيون، مٿيون ڏئي هنن کي ٺاهي ورتائين. مولانا جيتري محنت ڪئي، اوتري جو جس هجيس!! هي ڪم هن کان ئي پڳو آ، نه ته ڪير ٿو ڪنهن جي لاءِ ڪري، پنهنجي ڇڏي ڪير ٿو پرائيءَ ۾ پوي! ٺهي هُو ويا مٺائي مولانا صاحب ورهائي هوندي. ان خبر ۾ ڏاڍو خوش ٿيو هوندو. هاڻي هو ڪجهه گڏجي ڪن يا پنهنجي پنهنجي جاءِ تي، انهيءَ صدقي جو ثواب مولانا صاحب کي ملندو پيو!!

”سِر بچو لک ٿيو!“ اها ئي جيڪڏهن اصل ڳالهه آهي ته پوءِ متحده کي پنهنجون سيٽون بچائڻ جي مبارڪ هجي، باقي جيڪو نه ملڻ تي متحده مُٺي هئي ۽ نه ٿيڻ تي رُٺي هئي، اهو ته هاڻي به نه مليو، نه ٿيو ۽ نه اهڙي پَڪ جنهن کي دلجاءِ چئجي! ڪاوڙ ۾ اُڇليل شيءِ واپس کڻي وٺڻ کان وڌيڪ جي خبر ئي ناهي ٺهي- هيو ڇا؟ هيو هي ته 12 آگسٽ تي متحده جي 83 ميمبرن سنڌ، قومي ۽ سينيٽ ٽنهي ايوانن مان انهن شڪايتن سان استعيفائون ڏنيون ته ”ڪراچي ۾ اسان جي خلاف آپريشن ٿو ٿئي، اسان جي 200 ڪارڪنن کي رينجرز ۽ پوليس پڪڙيو آهي، ڇڏين ڪونه ٿا، عدالتن انصاف ناهي ڏنو، عسڪري قيادت وقت ناهي ڏنو، رينجرز ڪراچيءَ ۾ اسان جي خلاف ڪارروايون ڪري پي ٽي آءِ ڪاڻ راههَ هموار ٿي ڪري، انهيءَ ڪري اسان استعيفائون ٿا ڏيون. اهي تڏهن واپس وٺنداسين جڏهن ڪراچي آپريشن جي نگراني لاءِ پارلياماني ڪاميٽي ٺهندي.“ 13 آگسٽ جي اخبارن ۾ ڏسو ته اهي شڪايتون آهن يا ٻيون؟ هاڻي جڏهن هوءَ پنهنجي ڪاوڙ تان لهڻ تي راضي ٿي آهي ۽ استعيفائون واپس پئي وٺي ته انهن مان ڪهڙي شيءِ جو ازالو ٿيو آهي؟ هن گهُر ڪئي هئي آپريشن جي لاءِ پارلياماني نگران ڪاميٽيءَ جي، پر هوءَ راضي ٿي آهي صرف سنديون شڪايتون ٻڌڻ لاءِ ٻنهي پارٽين جي گڏيل ڪاميٽيءَ تي جنهن کي “Redressal and Regrevenceis committee” چيو وڃي ٿو. يعني ڏک تڪليف دور ڪرڻ واري ڪاميٽي، جنهن جي اڳواڻي وزيراعظم ڪندو. هاڻي ان لاءِ وزيراعظم کي جڏهن وقت ملي! جنهن وزيراعظم استعيفائن جي باوجود هنن کي ملڻ لاءِ ايڏو رولايو آهي، ڪراچيءَ کان ڪڍ لڳا هئس ته مولانا جي معرفت مَس وڃي اسلام آباد ملاقات ٿين، اهو وزيراعظم هاڻي ويهي هنن جون شڪايتون ٻُڌندو! سَوال هي آهي ته جڏهن سومر ڏهاڙي 3 ڪلاڪ اهي ئي شڪايتون ٿي چڪيون ته باقي ڪاميٽي ڇا لاءِ؟ هاڻي ته ڪنهن ازالي جي ڳالهه ڪجي نه، ان حوالي سان ڇا مليو؟ استعيفائون ڇا تي واپس ٿينديون!

يا ته هي پاڻ ايتري تي راضي هئا، مڙئي مولانا صاحب هنن جو نڪ ٺاهڻ ۾ مدد ڪئي، يا هنن سان هڪ جي ٻي ٿي. مولانا هنن جو مَٿو وڍائي آيو آهي. سادن لفظن ۾ اهو ئي چئبو ته متحده ان تي ماٺ ڪئي، جنهن تي شور ڪري هن استعيفيٰ ڏني هئي. هن مطالبن تان هٿ کنيو، هن سوچيو جان ڇُٽي لک ٿيو!! ڳالهه هيءَ آهي ته جيڪا دلجاءِ هو مولانا جي معرفت وٺي موٽي آيا اها ته گهر ويٺي استعيفيٰ کان اڳي ۽ استعيفيٰ کانسواءِ به ملي پئي سگهي، اسلام آباد وڃي ڇا وٺي آيا؟ هڪ ڪاميٽي ٺهندي (جڏهن ٺهي) شڪايتون ٻُڌندي (جڏهن وزيراعظم ويهي) غور ڪندي (جيترو وقت ڪري) پوءِ جيڪو ٿيو! سڀاڻي ڪنهن ڏٺي آهي!؟ تيستائين هي حڪومت سان تعاون ڪندا ۽ حڪومت وري وفاقي ڪابينا ۾ انهيءَ ڏينهن اهو طئه ڪيو آهي ته ڪراچي ۾ آپريشن تيزيءَ سان جاري رهندو، هي يار خاطريءَ تي کير کنڊ!!

وقت وقت جي ڳالهه آهي، وقت هو پي ٽي آءِ وارن استعيفائون ڏنيون هيون ته وقت جي حڪومت جو ساههُ ٿي ويو، هي به وقت آ، متحده استعيفائون ڏنيون ته پنهنجو ساهه پيو وڃيس. ٻيو مولانا صاحب کي پئي مُونجهه ٿئي، وقت جي حڪومت وتي لنوائيندي، هي هڙئي ڪڍ، ”وقت ڏي ته واپس وٺي ڇڏينداسين!“ واندڪائيءَ ۾ وقت ڏنائين ۽ ڪنڌ لوڏي هڪڙي ”ها“ ڪري ڇڏيائين! هي راضي! پريس ڪانفرنس به پاڻ ڪيائون، اعلان به پاڻ ڪيائون! هاڻي جي هي ان تي خوش ٿين ته پاڻ سنڀالي ڪري پي ٽي آءِ لاءِ موقعا وڃاياسين ته انهيءَ تي بيشڪ خوش ٿين، باقي ان حوالي سان هنن جي خوشيءَ جي ڪا ڳالهه ڪانهي ته هي رُٺا ته حڪومت مري پئي ۽ هي پنهنجي مڃائي پوءِ موٽيا. ڳالهه فقط ايتري آهي ته ماضيءَ جيان ماڻو ڪري متحده ان تان مُڙي وئي. جهرڪيءَ چيو هو وڻ کي ته ويهانءِ ٿي پاڻ جَهلجانءِ، وڻ لُڏيو ڪونه، جهرڪي ويٺي ۽ اُڏري وئي!متحده استعيفائن لاءِ چوٽيءَ تي چڙهي پاڻ ئي وري ائين پئي لهي جيئن خار ۾ ڪو خودڪشيءَ لاءِ ٽوڙهو ڳچيءَ ۾ وجهي ۽ پوءِ کولي چوي ته گهٽو پيو اچي! اهي انجام اڳ ۾ سوچبا آهن، روز چِڙ اچي روز چڙهي بيهي رهجي ٿنڀي تي، چڙهڻ وارو ڀلي نه ٿڪجي، پر کِلي کِلي خلق ٿڪجي پوندي آهي! هاڻي ته اهڙي خبر ڄڻ خبر ئي ناهي. اهڙين خبرن کي کڻڻ وارا هاڻي نيوز چئنل به تفريحي ٿا لڳن. مُلڪ جي سياسي جماعتن سان جهيڙا ۽ وقت جي حڪومتن سان رُساما متحده لاءِ نئين ڳالهه ناهي.تنهنجي نوخيز نگاهن کان بچو ڪو ڪونهي،هر تير لڳو نشاني تي گٿو ڪو ڪونهي.سڀني جيڪي سُور پِرايا آهن، تنهن جي روشنيءَ ۾ سندن اها راءِ رهي آهي ته ”تيري دشمني مجهي قبول، تيري دوستي سي ڊرتا هون.“ انهيءَ جي دوستيءَ جو دم جن به ڀريو تن کي پوءِ دانهون ڪندي به ڏٺوسين، جن کي هنن جي مرڪز جون حاضريون ڀريندي ڏٺوسين تن کي بعد ۾ انهيءَ دوستيءَ ۾ ڏٺو ٿيندي به ڏٺوسين! هڪڙي وقت ۾ جن کي هنن سان ڪو واسطو نه رکڻ جون قراردادون پاس ڪندي ۽ پڙهندي ڏٺوسين تن کي ٻئي وقت ۾ هنن ڏي ويندي ڏٺوسين! هنن وٽ به ڪي ڪاغذن جا گُل آهن، اچڻ وارن جي ڳلي ۾ وجهي ٿا ڇڏين. جهڙي سياست تهڙا استقبال. ڪڏهن حمايت ڪڏهن مذمت! ڪڏهن حمايت ۾ ريلي وري انهن جي مخالفت ۾ ريلي. هو به هنن سان هنن جهڙا، جهڙا رُوح تهڙا ختما! هنن جا ”اُصولي“ اختلاف، ”ذاتي“ مفادن تي ختم ٿي وڃن ٿا، هنن جا فرض هنن جي ضرورتن تان قربان ۽ ساک سندن ساڙ تان صدقي!سومر ڏهاڙي واري نه هي مليا آهن نه هنن جون دليون مليون آهن، اها مصلحتن پاڻ ۾ ملاقات ڪئي، هي جي نه ٿي پرچيا ته تحريڪ انصاف جي راهه هموار پئي ٿي، ٻنهي وٽ ڪا لچڪ نه هئي، پر عمران خان جي خيال ٻنهي کي رٻڙ ڪري ڇڏيو. هتي ”مقصد“ پنهنجا ايترا ڪم ناهي ڪندو جيترا ”حسد“ ڪندو آهي. خوف ماڻهوءَ کان اهي ڪم ٿو ڪرائي جيڪي لالچ به ناهي ڪرائي سگهندي. هنن جڏهن ڏٺو ته تحريڪ انصاف تاڙيون ويٺي آهي تڏهن دير ئي نه ڪيائون ۽ پرچي ويهي رهيا. ڪاوڙ ڪافور ٿي وئي، رنجشون رئي ٿي ويون، نه ڪنهن ڳالهه تي ڳنڍ ڏني نه ضرورتن تي زور، پريس ڪانفرنس ۾ ڏيکاريل سڄي ڪاوڙ ڪاميٽي ٺاهڻ جي آسري تي ختم! عمران خان لاءِ ميدان ڇڏڻ وڏي رِسڪ آهي، ان رسڪ کين رام ڪري ڇڏيو ۽ هي پرچي ويهي رهيا!!

 

مڪاني چونڊن جون تياريون ۽ تبديليءَ جي ضرورت!؛خالد ٻانڀڻ

مڪاني چونڊن جي موسم اچڻ واري آهي، سياسي شطرنج جي رانديگرن هاڻي کان سندرا ٻڌڻ شروع ڪري ڇڏيا آهن. لڳي ايئن رهيو آهي ته هن ڀيري چونڊن جي سڻڀن عهدن تي اڪثريت پوين آزمايل گهٺل پيٺل سياستدانن ۽ سردارن جا پٽ، ڀائر، ڀائٽيا، سئوٽ، ماسات اڪثريت سان ايندا، ڇو ته ڏسڻ ۾ ايندڙ تياريون ڪجهه اهڙي طرح جون شروع ٿي ويون آهن. اسان وٽ سياست هر ڀيري موروثيت جو شڪار ٿيندي پئي وڃي، نتيجن ڪا به تبديلي نه اچڻ سبب سياست ۾ به جمود واري صورتحال پيدا ٿي وئي آهي. سو هن ڀيري ان جمود کي ٽوڙڻ ۽ تبديلي واري فضا کي ڦهلائڻو پوندو. ماڻهن ۾ شعور جي مهم کي تيز ڪرڻو پوندو، ڇو ته هاڻي وقت ڪافي تبديل ٿي چڪو آهي، جيڪڏهن ان جو ڀرپور فائدو نه ورتو ويو ته وري ساڳين خاندانن جا رڳو چهرا مَٽجي، اسان جي سامهون ايندا.

هاڻي پاڻ اچون ٿا انهيءَ ڳالهه تي ته سکر ضلعي ۾ مڪاني چونڊن جو منظرنامون ڪيئن بيهندو؟ سکر ۾ ضلعي ڪائونسل ميونسپل ڪارپوريشن سان گڏ 5 ٽائون ڪميٽيون ۽ ميونسپل آهن، ان سان گڏ 5 تعلقا جنهن ۾ سکر سٽي، نئون سکر، روهڙي، صالح پٽ ۽ پنوعاقل شامل آهن، جڏهن ته ان سان گڏ 26 يونين ڪائونسلون پڻ پرويز مشرف جي دور ۾ جوڙيون ويون هيون. هن ڀيري جيڪي مڪاني چونڊون  ٿينديون، اهي انهن سيٽن تي هونديون. سکر ضلعي جون 2 ايم اين اي، 3 ايم پي اي جون سيٽون سدائين پيپلز پارٽي وٽ رهيون آهن. جڏهن ته هڪ شهر واري ايم پي اي جي سيٽ متحده وٽ آهي. اها سيٽ به گذريل اليڪشن ۾ پارٽي جي اندروني اختلافن جو شڪار ٿي متحده وٽ هلي وئي آهي. هن ڀيري مڪاني چونڊن ۾ لڳي رهيو آهي ته اپوزيشن ليڊر سيد خورشيد احمد شاهه ۽ سينيٽر اسلام الدين شيخ ٻئي هڪ پارٽي ۾ هوندي پنهنجا جدا اميدوار آڻڻ جي ڪوشش ۾ رڌل آهن. جيڪڏهن ايئن ٿيو ته فائدو متحده، (ن) ليگ، تحريڪ انصاف، فنڪشنل ليگ کي ٿيندو. ڇو ته سکر سٽي تان 2 دفعا لاڳيتو ايم پي اي رهندڙ ڊاڪٽر نصرالله بلوچ جيڪو سيد خورشيد احمد شاهه جو ويجهو مائٽ آهي، ان جي اها ڪوشش آهي ته سکر ميونسپل ڪارپوريشن تي ميئر جي سيٽ ڊاڪٽر نصرالله بلوچ کي ملي. جڏهن ته اسلام الدين شيخ جي ڪوشش هوندي ته هو پنهنجي پٽ بئريسٽر ارسلان شيخ کي ميئر جي لاءِ پارٽي کان ٽڪيٽ وٺي. ساڳي ريت سيد ناصر حسين شاهه جيڪو هينئر مڪاني ادارن جو صوبائي وزير آهي، ان جو پٽ پڻ سياست ۾ لٿل آهي ۽ تقريبن ۾ رڌل آهي. صوبائي وزير جي ضرور خواهش هوندي ته هو ڪنهن وڏي عهدي تي پنهنجي پٽ کي ڏسي. ساڳيءَ ريت متحده جي دعويٰ آهي ته هنن جو شهر ۾ ووٽ بئنڪ آهي، ميئر ڪو هنن جي پارٽيءَ جو اچي.

هن ڀيري صورتحال ڪجهه هن ريت به تبديل آهي ته (ن) ليگ جو ايترو ووٽ ناهي پر فنڪشنل ليگ ۽ تحريڪ انصاف وارا اليڪشن جي ڪايا کي پلٽي سگهن ٿا. جيڪڏهن کٽي نه سگهن تڏهن به نَنهن چوٽيءَ جو زور لڳائي سخت مقابلي واري صورتحال پيدا ڪري سگهن ٿا. پيپلز پارٽي جي ستن سالن جي دورِ حڪومت ۾ سکر ۾ ڪا وڏي تبديلي نظر ڪونه پئي اچي، جيڪا هو کڻي اليڪشن ۾ عوام وٽ ويندا. فنڊن جو ڪو حساب ڪتاب ڪونهي ڪو؛ شهرن جي ڀينگ لڳي پئي آهي. سو هن ڀيري صحيح اميدوار چونڊجڻ لاءِ سول سوسائٽي، سماجي تنظيمن، ميڊيا، وڪيلن کي پنهنجو ڀرپور ڪردار ادا ڪرڻو پوندو. عوام ۾ سجاڳي مهم جي هاڻي کان ابتدا ڪرڻي پوندي. سيپٽمبر ۾ عمران خان به سنڌ جا دورا شروع ڪندو، پنهنجي پارٽي کي کٽرائڻ لاءِ. اسان کي ماضي جي غلطين کي ورجائڻ کان پهرين ڪا حڪمت عملي جوڙڻ جي ضرورت آهي، جنهن جي سخت کوٽ آهي. هاڻي اهو زمانو ناهي جو ووٽ خيرات ۾ ڏجي. ٻي هڪڙي اهم ڳالهه ڪندو هلان ته 2010ع واري مها ٻوڏ دوران لکن جي تعداد ۾ جيڪا لڏ پلاڻ ٿي هئي، اُن نه رڳو سکر پر سنڌ جي 50 سيڪڙو شهرن تي نوان اثر ڇڏيا هئا. انهن مان سوين خاندان هن وقت به واپس پنهنجن ڳوٺن گهرن ڏانهن وڃڻ بدران نقل مڪاني ڪري ويٺل آهن. ڪيترن ئي ڳوٺن جا نشان ختم ٿيل آهن. سو اليڪشن ڪميشن کي اليڪشن کان پهرين مردمشماري، گهر شماري ڪرائڻي پوندي. ان بنياد تي نيون تڪ بنديون ڪرڻ سان گڏ اهو به جائزو وٺڻ جي ڪوشش ڪئي وڃي ته سنڌ کان علاوه جيڪي ٻاهران هتي لڏي اچي پنهنجا شناختي ڪارڊ ٺهرائي سڃاڻپ وٺي ويٺا آهن، انهن جو ووٽ ڪيئن ڪاسٽ ٿيندو؟جيڪڏهن مڪاني چونڊون بايو ميٽرڪ سسٽم تحت ٿين ته جيڪر سئو سيڪڙو اڇا ڪارا پڌرا ٿي وڃن. پارٽين تي قابض شخصيتن، پارٽين جا منشور ۽ نظريا تباهه ڪري ڇڏيا آهن، اسان وٽ رڳو خانداني سياست ٿي وئي آهي. مخصوص خاندانن پنهنجي مفادن خاطر سنڌ جو اسٽرڪچر تباهه ڪري ڇڏيو آهي. پورو سماج ڄڻ انارڪيءَ ڏانهن پيو وڃي. ’هيڏا هاڃا ٿين بري هن ڀنڀرو ۾‘ تڏهن به اسان خاموش رهون. آخر ڪڏهن سجاڳ ٿينداسين؟ اهو ڪڏهن احساس پيدا ٿيندو ته سماج ۾ تبديلي اسان کي ئي آڻڻي آهي، ٻاهران اچي ڪو اسان کي سڀ ڪجهه ٺيڪ ڪري ڪونه ڏيندو. چئجي ته هر شيءَ ڪو هٿ تي اچي رکندو، اهو صرف خواب ئي ٿي سگهي ٿو. جيڪي خوابن ۾ رهندا آهن، اهي ڪڏهن ساڀيان کي ڇهي ناهن سگهندا. مڪاني چونڊون به ٻوڏ وانگر ڪامورن جي ڪمائيءَ جو رڳو ذريعو نه بڻجڻ گهرجي. جيڪڏهن پاڻ جيئن آهي تيئن جي بنياد تي هلڻ چاهيون ٿا ته پوءِ ڪڏهن به ترقي نه ايندي، سڀ ڪجهه ڌوڙ ٿي ويندو.