تازيون خبرون

Daily Archives: August 26, 2015

سلمان خان سان گڏ ڪم ڪرڻ کان اڳ مون کي خوف ٿيندو هو: پريتي زنٽا

ممبئي (شوبز نيوز) بالي ووڊ اداڪارا پريٽي زنٽا انڪشاف ڪيو آهي ته سلمان خان سان گڏ ڪم ڪرڻ کان اڳ مون کي خوف ٿيندو هو. سماجي رابطن جي ويب سائيٽ ٽوئٽر تي پنهنجي مداحن جي سوالن جا جواب ڏيندي پريٽي زنٽا جو چوڻ هو ته ”مون کي خبر ناهي ڇو، پر هُو واحد اداڪار هو جنهن سان ڪم ڪرڻ کان اڳ مون کي خوف ورائي ويندو هو، ۽ اهو سلمان خان هو.“ 40 ورهين جي اداڪارا پنهنجي 17 سالا ڪيريئر ۾ دبنگ خان سان 5 فلمن ۾ ڪم ڪري چڪي آهي، سندس چوڻ هو ته سلمان خان فطرتن  شرميلو آهي. هن لکيو ته ”فلم چوري چوري چپڪي چپڪي جا ڊائلاگ ٻڌي سلمان خان شرمائجي ويندو هو، هو حقيقت ۾ ڏاڍو شرميلو آهي.“ هن چيو ته ”چوري چوري چپڪي چپڪي“ ۾ ڪم ڪندڙ پنهنجي ساٿي اداڪارا راني مکرجي کي پنهنجي سڀ کان بهترين ساٿي اداڪارا قرار ڏيندي چيو ته اسان وچ ۾ بهترين ڪيميسٽري آهي. پريتي ۽ رانيءَ ”هر دل جو پيار ڪريگا، وير زارا ۽ ڪڀي خوشي ڪڀي غم“ ۾ گڏ ڪم ڪيو هو.

 

شاعر احمد فراز جي وڇوڙي کي 7 سال گذري ويا

اسلام آباد (ڪلچرل نيوز) مشهور ترقي پسند شاعر احمد فراز جي وڇوڙي کي 7 سال گذري ويا. سندس ستين ورسي اڄ ملهائي ويندي، ان سلسلي ۾ سڄي ملڪ جي ادبي حلقن پاران سيمينار، تعزيتي ميڙاڪا ۽ ٻين تقريبن جو اهتمام ڪيو ويندو، جنهن ۾ احمد فراز جي ادبي خدمتن کي ڀيٽا پيس ڪئي ويندي. احمد فراز 25 آگسٽ 2008ع تي فوت ٿي ويو هو. احمد فراز 14 جنوري 1931ع تي پشاور ۾ پيدا ٿيو هو، تعليم دوران هن پنهنجون پهريون شعري مجموعو ”تنها تنها“ لکيو هو. احمد فراز جي ڪلام ۾ ”تنها تنها، دردِ آشوب، بي آواز گلي ڪوچون مين، نابينا شهر مين آئينه، نايافت، خواب گل پريشان هين، جانان جانان، غزل بهانه ڪرون“ ۽ ٻيا ذڪر لائق آهن. احمد فراز کي آدم جي ايوارڊ، ستاره امتياز، هلالِ امتياز، اباسين ايوارڊ، نقش ادب ايوارڊن سميت اڻ ڳڻيا ملڪي ۽ غير ملڪي ايوارڊن سان نوازيو ويو، احمد فراز اڳوڻي ڊڪٽيٽر پرويز مشرف جي حڪومتي دور ۾ ڪجھه پاليسين جي مخالفت سبب احتجاجن هلال امتياز واپس ڪري ڇڏيو هو. احمد فراز جي شاعري جي انگريزي، فرانسيسي، پنجابي، جرمني، روسي ۽ ٻين زبانن ۾ به ترجما ڇپجي چڪا آهن. احمد فراز گردن جي مرض جو شڪار هو، هُو علاج لاءِ آمريڪا به ويو هو، جتي هو صحتياب ٿي واپس آيو، ست سال اڳ 25 آگسٽ 2008ع تي اوچتو گردن جي بيماريءَ جي ڪري اسلام آباد جي هڪ اسپتال ۾ دم ڌڻيءَ حوالي ڪيائين.

 

ميل گبسن تي آسٽريليا جي شهر سڊني ۾ هڪ عورت فوٽوگرافر کي ڌِڪو ڏيڻ جو الزام

لاس اينجلس (شوبز نيوز) آسڪر ايوارڊ ماڻيندڙ اداڪار ميل گبسن تي آسٽريليا جي شهر سڊني ۾ هڪ عورت فوٽوگرافر کي ڌِڪو ڏيڻ جو الزام لڳو آهي. ڊيلي ٽيليگراف جي فوٽوگرافر ڪرسٽي مِلر آسٽريلوي ميڊيا کي ٻڌايو ته ميل گبسن ۽ سندس گرل فرينڊ جي تصويرون وٺڻ دوران کيس ڌِڪو ڏنو ويو هو ۽ ساڻس بدڪلامي به ڪئي وئي هئي. هن الزام هنيو ته گبسن بحث ۽ تڪرار  ان وقت ختم ڪيو، جڏهن سندس 24 سالا آمريڪي گھوڙي سوار دوست روسالنڊ روس وچ ۾ مداخلت ڪئي. مِلر موجب مون لڳو ته هو منهنجي منهن تي مُڪ هڻڻ وارو آهي. هو مون تي رڙيون ڪري رهيو هو ۽ چهري تي ٿُڪي رهيو هو. ڇنڇر تي جاري ڪيل بيان ۾ پوليس جي هڪ ترجمان جو چوڻ هو ته گذريل رات ڇهه لڳي 20 منٽن ويجھو هڪ شخص آڪسفورڊ اسٽريٽ پيٽنگٽن جي سينيما ٻاهران هڪ عورت فوٽوگرافر سان جھيڙي ۾ ملوث مليو آهي ۽ مٿس الزام آهي هن عورت فوٽوگرافر کي ڌڪا ڏنا آهن. سري هلز موجب پوليس حڪمن موجب واقعي جي جاچ ڪري رهي آهي ۽ ٻين ماڻهن کان مليل معلومات ذريعي جاچ اڳتي وڌائي پئي وڃي.

 

عام طور بالي ووڊ جون فلمون تمام گھٽ ڏسندو آهيان: نانا پاٽيڪر

ممبئي (شوبز نيوز) بالي ووڊ جو مشهور اداڪار نانا پاٽيڪر دپيڪا جي اداڪاريءَ جي تعريف ڪندي پنهنجي هدايتڪاريءَ ۾ ٺهندڙ فلم ۾ کيس شامل ڪرڻ جي خواهش جو اظهار ڪيو آهي. ڀارتي ميڊيا کي ڏنل انٽرويوءَ ۾ نانا پاٽيڪر جو چوڻ هو ته هو عام طور بالي ووڊ جون فلمون تمام گھٽ ڏسندو آهي، پر ڀارتي فلم نگريءَ ۾ هِن وقت جيڪڏهن سٺين اداڪارائن جي فهرست ٺاهي وڃي ته ان ۾ دپيڪا پڊوڪون ۽ پريانڪا چوپڙا جا نالا سڀ کان اڳتي اچن ٿا، خاص طور دپيڪا تمام نفيس انسان آهي، هو چاهي ٿو ته دپيڪا سندس هدايتڪاريءَ ۾ ٺهندڙ فلم ۾ ڪم ڪري، ان جي لاءِ مون کيس اسڪرپٽ به موڪليو آهي، جيڪڏهن هن انڪار ڪيو ته پوءِ ان ڪردار جي لاءِ نئين اداڪارا کي موقعو ڏنو ويندو. واضح رهي ته نانا پاٽيڪر هڪ عورت جي زندگيءَ تي ٺهندڙ فلم جي هدايتڪاري ڪندو ۽ ان جي شوٽنگ جو وڏو حصو کٽمنڊو ۾فلمايو ويندو.

 

دائود ابراهيم ڪراچي ۾ آهي، قومي سلامتي جا صلاحڪار هاڻي ڪشميرين سان ملڻ چاهين ٿا:انوراگ ٺاڪر

نئين دهلي (اسپورٽس نيوز) ڀارتي ڪرڪيٽ بورڊ ڪشمير جي حريت اڳواڻن سان ملاقات ۽ مبينا ڳجھي سربراهه دائود ابراهيم جي پاڪستان ۾ موجودگيءَ جو الزام هڻي پاڪستان سان ڪرڪيٽ سيريز تي سواليه نشان هڻي ڇڏيو. واضح رهي ته پاڪ-ڀارت جي قومي سلامتي صلاحڪارن وچ ۾ 23 آگسٽ تي ٿيڻي ملاقات رد ڪئي وئي آهي. نئين دهلي ۾ پاڪستاني هاءِ ڪمشنر ڪشميري حريت اڳواڻن کي سرتاج عزيز سان ملاقات لاءِ دعوت ڏني هئي، جنهن کي ڀارت جواز بڻائيندي چيو ته سرتاج عزيز ڳالهين کان اڳ ڪشميري اڳواڻن سان ملاقات نه ڪري. پر ان سان گڏ ڀارتي ميڊيا انڪشاف ڪيو ته ڳجھو سربراهه ابراهيم پاڪستان جي شهر ۾ موجود آهي ۽ ثبوت طور سندس گھر واريءَ جي نالي ڪفلٽن ۾ واقع گھر جي ٽيليفون بل جي تصوير به ڏيکاري. دائود ابراهيم تي 1993ع ممبئي ۾ ٿيندڙ بم ڌماڪن ۾ ملوث هجڻ جو الزام آهي، جنهن ۾ 257 ماڻهو مارجي ويا هئا. بي سي سي آءِ جي سيڪريٽري انوراگ ٺاڪر ٽوئٽر تي  لکيو ته دائود ابراهيم ڪراچي ۾ آهي، قومي سلامتي جا صلاحڪار هاڻي ڪشميرين سان ملڻ چاهين ٿا، ڇا اوهان واقعي امن بابت سنجيد آهيو؟ ۽ اسان کان اميد ٿا ڪيو ته اسان توهان سان ڪرڪيٽ کيڏون؟.

 

ڳڙهي خيرو جي گورنمينٽ اسڪول وچ ۾ ڪرڪيٽ ٽورنامينٽ ڪرائي وئي

ڳڙهي خيرو( اسپورٽس نيوز) يو ايس ايڊ جي سنڌڪميونٽي موبلائيزيشن پروگرام تحت ڳڙهي خيرو جي گورنمينٽ اسڪول وچ ۾ ڪرڪيٽ ٽورنامينٽ ڪرائي وئي. هايرسيڪنڊري اسڪول گرائونڊ تي گورنمينٽ هاير سيڪنڊري، گورنمينٽ ماڊل هاءِ اسڪول، گورنمينٽ مڊل اسڪول پراجيڪٽ، گورنمينٽ ايليمنٽري اسڪول ڄام خان ميرجت اسڪول ۾ وچ ميچون ٿيون. پهرين رائونڊ ۾ گورنمينٽ ايليمنٽري اسڪول ڄام خان ميرجت ۽ مڊل اسڪول پراجيڪٽ ڳڙهي خيرو وچ ۾ ٿي. پهرين بيٽنگ ڪندي ڄام خان ميرجت اسڪول جي 129 رنسون اسڪور ڪيون. ڄام ميرجت اسڪول جي امجد علي لاشاري ۽ سيف الله پڻ سٺي بيٽنگ سبب 8 اوورن ۾ اسڪور ٽارگيٽ ماڻيو. مڊل اسڪول پراجيڪٽ جو شاگرد رياض احمد بروهي بهترين بيٽنگ ڪندي 6 ڇڪن ۽ 8 چوڪن جي مدد سان 75 اسڪور ڪيو. جڏهن ته الطاف جمالي ٽي وڪيٽون ورتيون. ٻئين رائونڊ ۾ هايرسيڪنڊري اسڪول ۽ ماڊل هاءِ اسڪول وچ ۾ کيڏي وئي. ماڊل هاءِ اسڪول جي سڄي ٽيم 63 رنسن تي آئوٽ ٿي وئي. جڏهن ته هاير سيڪنڊري اسڪول جو هادي بخش ۽ حسن ٻرڙو سٺي بالنگ ڪئي. اڄ هايرسيڪنڊري اسڪول ۽ مڊل اسڪول پراجيڪٽ ڳڙهي خيرو وچ ۾ فائينل کيڏيو ويندو

 

سنڌ اسپورٽس بورد جي سهڪار سان مواڇ ڳوٺ ۾ شاندار ملاکڙو ڪرايو ويو

ڪراچي (اسپورٽس نيوز) سنڌ اسپورٽس بورد جي سهڪار سان مواڇ ڳوٺ ڪراچي سيد قاسم علي شاهه جي عرس جي موقعي تي فٽبال اسٽيڊيم ۾ هڪ شاندار ملاکڙو ٿيو، جنهن ۾ سنڌ جي ناليوارن 60 پهلوانن حصو ورتو، ملاکڙي ۾ وڏي انگ ۾ شوقينن شرڪت ڪئي. تقريب جو خاص مهمان پيپلز پارٽي اڳواڻ بشير بلوچ، شبير کونهارو هئا. اعزازي مهمان وزير علي شيخ، علي نواز گوندل، لياقت ابڙو، علي نواز زرداري، صادق سرائيڪي، عبدالشڪور ڪاڪڙ، اجمل خان ۽ ٻيا هئا. ملاکڙي ۾ بهترين ملهون ماري پهريون انعام خير محمد ڀٽي، ٻيو انعام عبدالجبار گلدستو، ٽيون انعام ماجد چانڊيو ماڻيو، ملاکري جي نگراني بهرام خاصخيلي ڪئي، انائونسمينٽ عبدالستار خاصخيلي ڪئي. سنڌ اسپورٽس بورڊ طرفان ڪامياب ملهه پهلوانن ۾ انعام ورهايا ويا

 

ڀارت سريلنڪا کي ٻي ٽيسٽ ميچ ۾ 278 رنسن جي واضح مارجن تان شڪست ڏئي ڇڏي

ڪولمبو (اسپورٽس نيوز) ڀارت سريلنڪا کي ٻي ٽيسٽ ميچ ۾ 278 رنسن جي واضح مارجن تان شڪست ڏئي 3 ٽيسٽ ميچن جي سيريز 1-1 تان برابر ڪري ڇڏي. ميزبان ٽيم سريلنڪا 413 رنسن جو ٽارگيٽ حاصل ڪرڻ ۾ ناڪام رهي ۽ سڄي ٽيم 134 تي آئوٽ ٿي وئي. ريمٿ ڪرونا رتني 46 رنسن سان ٽاپ اسڪور رهيو. روي چندرن اسٽيون 5 ۽ اميت مشرا 3 رانديگرن کي آئوٽ ڪيو. ڀارت اوپنر لوڪيش راهول کي 108 رنسن جي اننگز کڏيڻ تي مين آف دي ميچ جو ايوارڊ ڏنو ويو. ڀارت پاران روي چندرن ايشون سڀ کان ڪامياب بالر رهيو، هن 42 رنسون اسڪور ڪيون ۽ 5 وڪيٽون ورتيون. اميت مشرا 3، جڏهن ته اميش ياديو ۽ ايشانت شرما هڪ هڪ وڪيٽ حاصل ڪئي، لوڪيش راهول کي مين آف دي ميچ قرار ڏنو ويو. جڏهن ته سريلنڪا ۽ ڀارت جي چ ۾ فيصلائتي ٽيسٽ ميچ 28 آگسٽ کان پهرين سيپٽمبر تائين سنهاليز اسپورٽس ڪلب ۾ کيڏي ويندي. ٻنهي ٽيمن چ ۾ 3 ٽيسٽ ميچن جي سيريز 1-1 تان برابر آهي. گال ۾ کيڏيل پهرئين ٽيسٽ ميچ ۾ مهمان ٽيم ڀارت کي هارائي سيريز ۾ ڪاميابي حاصل ڪئي پر ايندڙ ميچ ۾ ڀارتي ٽيم شاندار ڪم بيڪ ڪيو ۽ آئي لينڊرز کي 278 رنسن جي وڏي مارجن تان شڪست ڏئي سيريز برابر ڪري ڇڏي.

 

ڪراچي آپريشن کي وڌيڪ تيز ڪرڻ جو فيصلو

 

وفاقي ڪابينا ۾ ڪراچي آپريشن کي وڌيڪ تيز ڪرڻ جو فيصلو ڪندي ڀارت خلاف عالمي سطح تي سفارتڪاري تيز ڪرڻ تي اتفاق ڪيو آهي. جڏهن ته وزيراعظم نواز شريف چيو آهي ته آپريشن ۾ ڪا به سياسي مداخلت برداشت نه ڪئي ويندي، ڪراچي آپريشن تان هڪ قدم به پوئتي نه هٽيو ويندو، جڏهن اهڙو اتفاق وزيراعظم هائوس ۾ وزيراعظم نواز شريف جي صدارت ۾ ٿيل وفاقي ڪابينا جي اجلاس ۾ڪيو ويو. اجلاس ۾ نيشنل ايڪشن پلان جو جائزو ورتو ويو. وزيراعظم جي قومي سلامتي ۽ پرڏيهي معاملن بابت صلاحڪار سرتاج عزيز ڪابينا جي اجلاس کي ڀارت سان تازين ڳالهين ۾ تعطل بابت آگاهه ڪيو. وزيراعظم چيو ته ڪشمير مسئلي کانسواءِ ڪو به ڳالهين وارو عمل بيڪار هوندو. هن چيو ته ڪشميري اڳواڻ ٽين ڌر نه پر مسئلي جي اهم ڌر آهن جن جي راءِ ۽ مشاورت کانسواءِ مستقبل جو ڪو فيصلو نه ٿو ڪري سگهجي. وزيراعظم نيشنل ايڪشن پلان تي تفصيلي بريفنگ کانپوءِ چيو ته حڪومت نيشنل ايڪشن پلان تي پوري طرح عملدرآمد جو پڪوپهه ڪيو آهي ڇو ته ان جا فائدا ملڪ جي هر ڪنڊ تائين پهچندا. هن چيو ته جيڪي عنصر فرقيواريت ۾ ملوث آهن انهن کي سختي سان منهن ڏنو ويندو ۽ نفرت پکيڙيندڙن، شدت پسندي تي اتساهيندڙن ۽ دهشتگردي جي حوصلا افزائي ڪندڙن کي ڪنهن صورت ۾ نه ڇڏيو ويندو. هن چيو ته دهشتگرد ماڻهن جي جانين ۽ انسانيت سان کيڏن ٿا جيڪي ناقابل معافي ڏوهه ڪري رهيا آهن جن کي معاف نه ڪيو ويندو. وزيراعظم چيو ته ڪراچي ۾ ڏوهاري عنصرن خلاف آپريشن سمورين ڌرين جي اتفاق راءِ سان شروع ڪيو ويو آهي ۽  آپريشن جا نتيجا واضح آهن. هن چيو ته ڪراچي ۾ شهري امن چاهين ٿا ۽ حڪومت ڪراچي ۾ امن ۽ روايتي ڀائيچاري جي بحالي جي راهه ۾ ڪنهن سياسي مصلحت کي رڪاوٽ بڻجڻ نه ڏيندي. هن چيو ته جيستائين ڪراچي آپريشن جو تعلق آهي اسان هڪ قدم به پٺتي هٽڻ جو تصور نه ٿا ڪري سگهون ۽ جن ميمبرن جي عوامي مينڊيٽ سان پارليامينٽ ۾ نمائندگي آهي، انهن کي عوام جا مسئلا ۽ معاملا انهي فلور تي کڻڻ گهرجن. هن خاطري ڪرائي ته حڪومت ڪراچي جي عوام کي امن ۽ سلامتي فراهم ڪرڻ جي لاءِ پنهنجون ڪوششون جاري رکندي. وزيراعظم گهرو وزارت کي هدايت ڪئي ته پوري معاشري کي هٿيارن کان پاڪ ڪرڻ جي حڪمت عملي تيار ڪئي وڃي ڇو ته ڪا به جمهوري حڪومت هٿياربند گروپن کي آزادي سان گهمڻ ڦرڻ جي اجازت نه ٿي ڏئي سگهي. هن ڪابينا کي ٻڌايو ته آپريشن ضرب عضب ڪاميابي سان پنهنجا مقصد حاصل ڪري رهيو آهي ۽ ان جو سهرو اسان جي هٿياربند فوج ۽ سويلين ادارن ڏانهن وڃي ٿو. وزيراعظم چيو ته عالمي برادري پڻ آپريشن ضرب عضب جي ڪاميابين کي ساراهيو آهي ان سلسلي ۾ وزيراعظم هٿياربند فوج جي سربراهه جنرل راحيل شريف جي ڪوششن ۽ عزم کي ساراهيو. هن آپريشن جي قيادت تي فضائيه جي سربراهه ايئر چيف مارشل سهيل امان کي پڻ ساراهيو. وزيراعظم چيو ته بلوچستان جي صورتحال ڏينهون ڏينهن بهتر ٿي رهي آهي ۽ انشاءَ الله اهو عمل امن قائم ڪرڻ جو عمل فاٽا کان بلوچستان ۽ شهر قائد ۾ خوشحالي اچڻ تائين جاري رهندو. وزيراعظم سرڪاري ۽ نيم سرڪاري ادارن ۾ اردو ٻولي جي استعمال جي حوالي سان سپريم ڪورٽ جي هدايتن تي عملدرآمد جي جائزي لاءِ ڪابينا جي 5 رڪني ڪميٽي پڻ جوڙي ڇڏي. اطلاعات، نشريات ۽ قومي ورثي وارو وفاقي وزير سينيٽر پرويز رشيد ڪميٽي جو چيئرمين هوندو. ڪميٽي جي ٻين ميمبرن ۾ مذهبي معاملن وارو وفاقي وزير سردار محمد يوسف، هائوسنگ وارو وفاقي وزير اڪرم دراني، قومي معاملن وارو خصوصي معاون عرفان صديقي ۽ ڪابينا معاملن بابت خصوصي معاون بيريسٽر ظفرالله شامل آهن. ڪميٽي اردو کي سرڪاري طور تي فروغ ڏيڻ جي لاءِ ضروري قدم کڻندي. ان کان اڳ وفاقي گهرو وزير چوڌري نثار علي خان ڪابينا کي نيشنل ايڪشن پلان تي ٿيندڙ اڳڀرائي کان آگاهه ڪيو. هن اجلاس کي ٻڌايو ته 20 هزار کان وڌيڪ دهشتگردن خلاف ڪارروائي ڪئي وئي آهي ۽ ساڍا  ٽي هزار دهشتگرد گرفتار ڪيا ويا آهن، 30 شڪي مدرسن کي نيشنل ايڪشن پلان تحت بند ڪيو ويو ۽ دهشتگردي ۾ استعمال ٿيندڙ 124 بئنڪ اڪائونٽس بند ڪيا ويا آهن، ڳجهن ادارن 58 هزار انٽيليجنس بيس آپريشن ڪيا. هن چيو ته هيستائين 79 ڪيس فوجي عدالتن ڏانهن موڪليا ويا آهن. هن چيو ته حڪومت پلان جي اهم نقطن ۾ اڳڀرائي ڪري رهي آهي ۽ هٿياربند فوج ۽ قانون لاڳو ڪندڙ ادارن جي ڪوششن سان صورتحال ۾ تمام گهڻي بهتري آئي آهي. هن ڪابينا ميمبرن کي يقين ڏياريو ته نيشنل ايڪشن پلان تي عملدرآمد ۾ ڪنهن ڏوهاري شخص يا دهشتگرد گروپ کي نه ڇڏيو ويندو. گهرو وزير چيو ته ملڪ جي مجموعي سيڪيورٽي صورتحال ۾ نمايان بهتري آئي آهي ۽ ڪنهن کي به ڏوهارين خلاف آپريشن کي نقصان پهچائڻ جي اجازت نه ڏني ويندي. ڪابينا مختلف ايجنڊا ائٽمز جو جائزو ورتو ۽ انهن جي منظوري ڏني جڏهن ته اجلاس ۾ اٽڪ خودڪش حملي جي شهيدن جي روح جي ايصال ثواب لاءِ فاتحه پڙهي ۽ ملڪ ۽ قوم جي خدمت جي لاءِ شهيد ڪرنل (ر) شجاع خانزاده کي خراج عقيدت پيش ڪيو. وزيراعظم شجاع خانزاده جي صوبائي اسيمبلي جي ميمبر ۽ پنجاب جي صوبائي گهرو وزير جي حيثيت سان ڪردار کي سنهري لفظن ۾ ساراهيو جنهن شدت پسندي ۽ انتهاپسندي جي خاتمي جي لاءِ ڪردار ادا ڪيو.

 

ڪالا باغ ۽ سنڌ جي ورهاست: ديواني جا خواب؛جئه پرڪاش موراڻي

ڳالهه تي ڳنڍ ٻڌي بيهڻ ڪو اسان وارن همراهن کان سکي، اصل ٺهي نه ٺهي وٺ رينگٽ واري ڪار آهي. رکي رکي ڦٽاڪو ڇوڙڻ ۽ پوءِ ماڻهن جون متيون منجهائي پاڻ پري بيهي تماشو ڏسڻ واري ريت پڻ پراڻي آهي. چوندا آهن ته ڪانوَ کي لُڙ ۾ مزو اچي، اهو ئي حال اسان جي ڪجهه همراهن جو آهي، جن مان هڪڙا ملڪ جي وڏي صوبي جا وڏا حاڪم آهن ٻيا وري سنڌ جي وڏي شهر جا وڏا سياستدان يعني ڀائي لوگ. ٻه مامرا اهڙا آهن جن بابت ڪنهن عقل کان عاري ماڻهو کان به پڇندا ته اهو ئي ٻڌائي ڇڏيندو ته اها اڻ ٿيڻي آهي، پر اسان جا يار آهن جيڪي ويٺي ويٺي ککر ۾ کڙهو هڻي پاڻ وڃي اوڍي سمهي رهندا آهن، باقي اسان پارا اڌ پڙهيل جن جو ساهه سڳو انهن معاملن سان سلهاڙيل آهي، اهي ويٺا ليڪو ڪٽيندا.انهن ٻن معاملن مان هڪ آهي ڪالاباغ ڊيم جو. ملڪ جا سمورا آبپاشي ماهر متفق آهن ته پاڻي جا ذخيرا ضروري آهن، پر ڏيهه ۾ الله جي زمين گهڻي ئي پئي آهي، جتي ننڍا توڙي وڏا ذخيرا جوڙي واڌو پاڻي کي ذخيرو ڪري سگهجي ٿو، پر اسان جي مٿين همراهن جو مٿيون چيمبر يا ته خالي آهي يا وري ضرورت کان وڌيڪ ڀريل آهي جو انهن کي رکي رکي ڪالاباغ ڊيم جا ڇرڪ ٿا پون، ٻه مينهن ڪڻيون پيون ناهن، درياءُ ۾ پنجند کان هيٺ پاڻي آيو ناهي ته همراهه اصل هٿن مان پيا ويندا. اصل گهوڙا گهوڙا ته پاڻي ”ضايع پيو ٿئي وارو ڪريو ڪالاباغ ڊيم جوڙيو نه ته سڀاڻي سڀ ڪجهه لڙهي ويندو“. پهرين ڳالهه اها ته پاڻي ضايع ڪيئن ٿو ٿئي. سڄو سال ڪوٽڙي کان هيٺ ويندي سنڌوءَ جي چاڙهه تائين درياءَ شاهه دادلي جي پيٽ ۾ پاڻي ڦڙو به نه هوندو آهي، ماڻهو پيئڻ لاءِ لپ پاڻي لاءِ پريشان هوندا آهن، کارو ڌوڪي اچي مٺي زمين کي بنجر بڻائيندو آهي، لکين ايڪڙ ڳڙڪائڻ کانپوءِ به سامونڊي بک آهي جيڪا بس ئي نه پئي ڪري. لاڙي رتڙيا، سڳداسي ۽ جيرو سائي چانورن جي خوشبوءَ ته تاريخ جي ورقن ۾ وڃائجي ويئي، پر هاڻي لاڙ واسين جي حياتي حيران ٿي وئي آهي. گذر سفر جا وسيلا ختم ٿيڻ سبب هزارين ويڙها ويران ٿي ويا آهن، انهن ماڻهن لاءِ اهو واڌو پاڻي ئي واحد وسيلو آهي، جنهن جي آسري تي اهي سڄو سال ويهي گذاريندا آهن، رڳو اسان جي ڪرپشن هاڻي سرڪاري مشينري تان اِهو ڪارو ڪٽ لهي ته هيل جيترا وهڪرا کِلندي کِلندي وڃي سامونڊي سير تائين پهچن. موٽ ۾ ماڻهن جي چهرن تي مُرڪون به موٽن ته لوڻياٺيون بڻجي ويل مياڻيون به مٺيون ٿي وڃن، تمر جي ٻيلن ۾ به ساهه پوي ته سانن جي نسل کي آيل جوکو به ٽري، پلو پڻ ڀلي بئراجن جي بندش سبب لال جي حاضري نه ڀري سگهي، پر ڪوٽڙي تائين ته مهاڻا بتيلا ڀري مڇي مارين ۽ سندن ويران واهيرن ۾ اڏامندڙ واريءَ جي جاءِ تي ڪي ڪڻا به اچن ته اهي ڪيئي ڪارج به سنوارين، پر سنڌ واسي ساوا ٿين اهو شايد اُترين آدمين کي اوکو ٿو لڳي، ان ڪري ڪالاباغ واري ڪِڙ ڪِڙ ختم ئي نٿي ٿئي، سڀڪو ڀلي ڀت ٿو ڄاڻي ته جنهن رٿا کي 3 صوبا هڪ کان وڌيڪ ڀيرا رد ڪري چڪا آهن، ان جو ڍنڍورو پٽڻ جو ڪو فائدو؟ بس کين پنهنجون ويران زمينون آباد ڪرڻيون آهن، باقي ملڪ ٻڏي يا سُڪي ”سانون ڪي؟“ٻيو مسئلو خبر ناهي اسان جي ڀائي لوگن جي ذهن جي پيداوار آهي يا سندن قائد جي (جنهن بابت ڪوڙين ڪنين ٻڌو آهي ته کيس ننڊ نه اچڻ جي ڪا بيماري آهي! مالڪ شفا ڏيس) من ۾ متل مانڌاڻ جو نتيجو آهي، پر جڏهن به اهي ڏاهي ڪانوَ وانگر ٻه ٽنگا ڦاسبا آهن ته کين سنڌ ورهائڻ جو برو خواب ضرور ايندو آهي. ڪڏهن لڪي لڪي، ڪڏهن ظاهر ظهور، ڪڏهن ڪنهن پردي جي پويان ته ڪڏهن وري پڌري پٽ اهي ٻن صوبن جي ڳالهه ڪندا ضرور آهن.جيڪڏهن بلدياتي نظام سندن مطلب جو نه اچي ته به ٻن صوبن جي ٻولي، جيڪڏهن وزارتون من پسند نه ملن ته پڻ ڌار ٿيڻ جي ڌمڪي، جيڪڏهن رينجرز ڪراچي ۾ امن ڪرائڻ لاءِ ڪي ڪوششون وٺي ته به سنڌ کي اڌ ڪرڻ جو اُپچار. اهي يارڙا به چڱي ريت سمجهن ٿا ته سنڌ ورهائڻ جا سپنا ڏسڻ سولا پر انهن جي ساڀيان ناممڪن آهي. اڳ ۾ کين اهو تجربو ٿي چڪو آهي ته پ پ جي حڪومت ۾ پنهنجي پرڪارن جي ڪري ئي پر دٻ جهلڻ جي اصل قوت ڪونهي، ان ڪري هو هميشه مٿن دٻاءُ وجهي پنهنجا جائز ناجائز مطالبا مڃرائڻ ۾ ڪامياب ٿي ويندا هئا. هن ڀيري جڏهن مٿن ڏيهه ۾ توڙي پرڏيهه ۾ ڌرتي تنگ پئي ٿئي ته اهي وري به ساڳئي مطالبي ڏانهن هليا ويا آهن. يارن اهو ٿي سمجهيو ته هو جيڪڏهن استعيفائن وارو آپشن استعمال ڪندا ته پ پ ۽ ن ليگ وارا مجبور ٿي پوندا. ڪراچي ۾ هلندڙ آپريشن ختم ڪري مٿن ٿيندڙ سختيون گهٽ ٿينديون پر منهنجي خيال ۾ 1990ع ۾ اليڪشن جي بائيڪاٽ کانپوءِ سندن هي وڏي ۾ وڏي سياسي غلطي آهي جنهن جا ڏور رس نتيجا نڪرندا. حڪومت واضح ڪري چڪي آهي ته آپريشن جي معاملي تي نه ڪا ڳالهه ٿيندي نه ان بابت ڪو ٺاهه ڪيو ويندو. هاڻي لڳي اهو ٿو ته يا دوستن کي ٻيهر ساڳي پگهار تي ڪم ڪرڻو پوندو يا وري سندن استعيفائون منظور ٿي وينديون. جيڪا اندروني ذريعن چواڻي سندن اڪثر پارليامينٽرينز جي خواهش آهي ته جيئن اهي اڏامي وڃي ڪنهن ”محفوظ“ هنڌ تي ٿانيڪا ٿين. ان ريت جيڪي ڪجهه ڪڻا وڃي منجهن بچيا آهن، اهي به ڪک پن ٿي ويندا. باقي رهندو وڃي نانءُ الله جو.اهي ٻه مسئلا يعني ڪالا باغ ڊيم ۽ سنڌ ورهائڻ فقط ديواني جا خواب آهن، جن کي ڏسڻ وارا هميشه خوابن جي دنيا ۾ ئي زنده رهندا آهن ۽ زميني حقيقت سان سندن پري پري جو ڪو واسطو ناهي هوندو. جيڪي سياستدان ماڻهو جي من جي ڳالهه نه پڙهي سگهندا آهن، اهي ماڻهن جي دلين تي راڄ ناهن ڪري سگهندا. باقي زور جي ميندي نه ماضي ۾ رنگ ڪيو نه اڳتي اُميد ڪري سگهجي ٿي.