تازيون خبرون

Daily Archives: August 26, 2015

ڪيس تڪڙا اڪلائڻ لاءِ آرمي چيف ملٽري ڪورٽس جو انگ وڌائڻ جي منظوري ڏئي ڇڏي

ڪراچي(اسٽاف رپورٽر) فوج جي سربراهه جنرل راحيل شريف ڪراچي ۾ فوجي عدالتن جو انگ وڌائڻ جي منظوري ڏيندي ڪراچي ۾ دهشتگردن خلاف بنا فرق جي آپريشن جاري رکڻ جي هدايت ڪري ڇڏي،پاڪ فوج جي سربراهه سنڌ پوليس ۽ سڪيورٽي ادارن جي ڪارڪردگي جي ساراهه ڪندي چيو آهي ته آپريشن جي نتيجي ۾ امن امان جي صورتحال بهتر ٿي آهي. ڪورهيڊڪوارٽر ڪراچي ۾ اعليٰ  سطحي اجلاس جي صدارت دوران ڳالهائيندي آرمي چيف ڪراچي ۾ رينجرز، پوليس ۽ انٽيليجنس ادارن جي ڪارڪردگي کي ساراهيو، جڏهن ته ڪراچي پوليس کي ساڍا ڇهه ڪروڙ رپيا ڏيڻ جي منظوري پڻ ڏني وئي. فوج جي سربراهه ڪراچي ۾ دهشتگردن خلاف آپريشن جاري رکڻ جي هدايت ڪئي آهي. جنرل راحيل شريف چيوته ڪراچي ۾ امن امان جي صورتحال ۾ بهتري آئي آهي. هن چيو ته دهشتگردن ۽ مافيا جي خاتمي تائين آپريشن جاري رهندو. آئي ايس پي آر مطابق آرمي چيف ڪراچي پوليس جي صلاحيت وڌائڻ ۽ تربيت لاءِ ڇهه ڪروڙ رپيا ڏيڻ جي منظوري ڏني. اجلاس ۾ ان ڳالهه جو عزم ورجايو ويو ته ڪراچي کي دهشتگردي کان پاڪ شهر بڻايو ويندو. ان موقعي تي جنرل راحيل شريف کي ڊي جي رينجرز ميجر بلال اڪبر ڪراچي جي سيڪيورٽي جي صورتحال تي بريفنگ به ڏني. آءِ ايس پي آر موجب آرمي چيف ملير ڪينٽ ۾ آرمي ايئر ڊفينس سينٽرجو دورو ڪري شهيدن جي يادگار تي حاضري ڀري آهي. ان موقعي تي آرمي چيف ليفٽيننٽ جنرل ضمير الحسن شاهه کي ڪرنل ڪمانڊنٽ جا بيجز لڳايا. آءِ ايس پي آر موجب آرمي چيف آرمي ايئر ڊفينس سينٽر ۾ آفيسرن ۽ جوانن کي خطاب به ڪيو.

سنڌ ۽ پنجاب ۾ مڪاني چونڊن دوران رينجرز جون خدمتون وٺڻ جو فيصلو

اسلام آباد(بيورو) اليڪشن ڪميشن سنڌ ۽ پنجاب ۾ مڪاني چونڊن دوران رينجرز جون خدمتون وٺڻ جو فيصلو ڪندي پاڪ فوج کي ڪوئيڪ ريسپانس فورس طور استعمال ڪرڻ تي غور شروع ڪري ڇڏيو آهي،  جڏهن ته ٻنهي صوبن ۾ مڪاني چونڊن لاءِ نامزدگي ڪاغذن جي ڇپائي شروع ڪئي وئي آهي. ذريعن موجب، اليڪشن ڪميشن سنڌ ۽ پنجاب ۾ مڪاني چونڊ دوران امن امان جي صورتحال کي نظر ۾ رکندي رينجرز جون خدمتون حاصل ڪرڻ جو فيصلو ڪيو آهي ذريعن موجب، پاڪ فوج کي ڪوئيڪ ريسپانس فورس طور استعمال ڪرڻ تي غور به جاري آهي، ان سلسلي ۾ گهرو وزارت ۽ دفاع واري وزارت کي جلد خط لکيو ويندو. اليڪشن ڪميشن موجب، گهرو ۽ دفاع واري وزارت سان مشاورت ڪري اڳتي جي پلان جو اعلان ڪيو ويندو. اليڪشن ڪميشن، سنڌ ۽ پنجاب ۾ مڪاني چونڊن لاءِ نامزدگي فارمن جي ڇپائي به شروع ڪري ڇڏي آهي، جيڪا اڄ تائين مڪمل ٿيندي. اليڪشن ڪميشن موجب، ٻنهي صوبن ۾ پهرين مرحلي جي چونڊن لاءِ پنجاب ۾ ٻن ۽ سنڌ ۾ ٽن قسمن جا نامزدگي ڪاغذ ڇاپيا پيا وڃن. سنڌ ۽ پنجاب ۾ مڪاني چونڊن جو پهريون مرحلو 31 آڪٽوبر، ٻيو 19 نومبر ۽ ٽيون 3 ڊسمبر تي ٿيندو.

 

ايم ڪيو ايم جون استعيفائون: حڪومت ۽ متحده ڳالهين ۾ اڳڀرائي، اهم معاملن تي اتفاق

اسلام آباد (بيورو) متحده قومي موومينٽ ۽ حڪومت وچ ۾ استعيفائن جي معاملي تي ڳالهين جو ٻيو درو جاري آهي، جڏهن ته ڌرين کي ڳالهين جي ٽيبل تي آڻڻ بعد مولانا فضل الرحمان علحيدگي اختيار ڪري ورتي آهي. اسلام آباد ۾ پنجاب هائوس تي ايم ڪيو ايم ۽ حڪومتي وفد ۾ ڳالهين جو ٻيو دور جاري آهي. ڳالهين ۾ حڪومت پاران ناڻي وارو وفاقي وزير اسحاق ڊار، بئريسٽر ظفر الله، پرويز رشيد ۽ اشتر اوصاف شامل آهن، جڏهن ته ايم ڪيو ايم پاران فاروق ستار، ڪنور نويد جميل، بئريسٽر سيف ۽ ريحان هاشمي شريڪ آهن. ڳالهين دوران ايم ڪيو ايم ميمبرز جي استعيفائن جي واپسي تي ڳالهيون ڪيون پيون وڃن. ذريعن موجب متحده وفد ڪراچي آپريشن ۽ گم ٿيل ڪارڪنن سميت ٻين خدشن کان حڪومتي وفد کي آگاهه ڪيو. هوڏانهن حڪومت ۽ متحده کي ڳالهين جي ٽيبل تي آڻڻ بعد مولانا فضل الرحمان ڳالهين کان علحيدگي اختيار ڪري ورتي آهي. فضل الرحمان جو چوڻ سندس ڪردار ٻنهي ڌرين کي ڳالهين جي ٽيبل تي آڻڻ هو، تعطل پيدا ٿيو ته هو ٻيهر ڪردار ادا ڪندو.

 

اياز صادق کي سپريم ڪورٽ بدران عوامي عدالت ۾ وڃڻ گهرجي،اليڪشن ڪميشن ميمبر استعفيٰ ڏين: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه هڪ دفعو ٻيهر اليڪشن ڪميشن جي ميمبرن جي استعيفي ڏيڻ جو مطالبو ڪندي چيو ته ميمبرن کي 8 لک رپيا ماهوار ملندا هجن ته اهي استعيفيٰ ڪيئن ڏيندا سردار اياز صادق سپريم ڪورٽ ۾ وڃڻ بدران عوام جي عدالت ۾ وڃي ڪراچي ۾ آپريشن جاري رهڻ گهرجي ايم ڪيو ۽ حڪومت وچ ۾ ڳالهين واري عمل جي ڪاميابي لاءِ دعاگو آهيون ميڊيا سان غير رسمي ڳالهه ٻولهه ڪندي خورشيد شاهه چيو ته اليڪشن ڪميشن جا ميمبر تڪراري ٿي چڪا اهي عزت سان استعيفا ڏين هن چيو ته مان عمران خان جي مطالبي جي حمايت نه پيو ڪيان هي منهنجو پنهنجو مطالبو آهي جو هن کان اڳ به ڪري چڪو آهيان خورشيد شاهه ٻڌايو ته اياز صادق تحريڪ انصاف کان بدلو وٺي سگهي پيو پر نه ورتو مان اياز صادق جي ان عمل جي واکاڻ ڪيان ٿو اپوزيشن ليڊر چيو ته سعد رفيق کي به عوام جي عدالت ۾ وڃڻ لاءِ چيو هو جيڪڏهن هو ڳالهه مڃي ها ته اياز صادق سان ايئن نه ٿئي ها ايم ڪيو ايم ۽ حڪومت وچ ۾ ٿيندڙ ڳالهين جي حوالي سان هن چيو ته هو ڳالهين واري عمل جي ڪامياب ٿيڻ لاءِ دعاگو آهي اسان به سمجهون ٿا ته مانيٽرنگ ڪميٽي جو قيام ضروري آهي جڏهن ته ڪراچي آپريشن کي به جاري رهڻ گهرجي هن چيو ته آپريشن کي سياست کان الڳ رکڻ گهرجي سياستدانن جي اندروني ويڙهه سان رياست کي خطرو آهي ايم ڪيو ايم جون استعيفائون واپس ٿيڻ گهرجن اميد آهي ته متحده سياسي تدبر جو مظاهرو ڪندي.

 

وزيراعظم ٻن ڏينهن جي دوري تي قازقستان پهچي ويو، شاندار استقبال

آستانه(م.ڊ) وزيراعظم نواز شريف ٻن ڏينهن جي سرڪاريَ دوري تي قازقستان پهچي ويو، جتي هـُو قازق صدر، هم منصب ۽ ٻين سان ملاقاتون ڪري ٻطرفن لاڳاپن، خطي جي صورتحال توڙي عالمي معاملن تي خيالن جي ڏي وٺ ڪندو. وزيراعظم نواز شريف قازقستان جي صدر نور سلطان ابيش وِچ نذر بائيوف جي دعوت تي آستانا پهتو. قازقستان جي گادي واري شهر آستانا پهچڻ تي وزيراعظم نواز شريف جي شاندار آجيان ڪئي وئي. ٻن جي دوري دوران وزيراعظم نواز شريف قازقستان جي صدر نور سلطان ابيش وِچ نذر بائيوف ۽ وزيراعظم ڪريم ماسيموف سان ملاقاتون ڪندو. ملاقاتن دوران مختلف شعبن ۾ ٻطرفن لاڳاپن کي هٿي وٺرائڻ، علائقائي ۽ عالمي صورتحال تي ڳالهيون ڪيون وينديون. وزيراعظم نواز شريف سان گڏ اعليٰ سطحي وفد به گڏ آهي، جن ۾ واپار وارو وزير خرم دستگير، مملڪتي وزير ڄام ڪمال، خاص مددگار طارق فاطمي ۽ ٻيا شامل آهن..

 

سردار اياز صادق اين اي 122 جي فيصلي جي خلاف اڄ سپريم ڪورٽ ۾ اپيل داخل ڪندو

اسلام آباد (اين اين آءِ) پاڪستان مسلم ليگ (ن) جو اڳواڻ سردار اياز صادق اين اي 122 جي فيصلي جي خلاف اڄ اربع تي سپريم ڪورٽ ۾ اپيل داخل ڪندو ميڊيا رپورٽ مطابق سردار اياز صادق جي وڪيل گذريل ڏينهن اين اي 122 جي فيصلي جي ڪاپي حاصل ڪئي هئي جنهن کان پوءِ اپيل تيار ڪرڻ جو سلسلو شروع ڪيو ويو هو فيصلي ۾ ڪجهه اهم دستاويز موجود نه هئا ان حوالي سان اياز صادق جي وڪيل ٽربيونل کي درخواست ڏني اياز صادق جو وڪيل ٻڌايو ته ٽربيونل اهم دستاويز دير سان ڏنا جنهن سان اپيل جي تياري ۾ وڌيڪ وقت لڳندو دير جي ڪري اڱاري تي اپيل سپريم ڪورٽ ۾ داخل نه ٿي سگهي اپيل مڪمل تيار ڪرڻ کان پوءِ اياز صادق جي منظوري سان اڄ اربع تي سپريم ڪورٽ ۾ داخل ڪئي ويندي.

 

ڀارتي ميڊيا نريندر مودي جي پاڪستان بابت پاليسي تي ڪاوڙجي پيو ، پاليسيون ڀارت لاءِ خطرو قرار

نئين دهلي (اين اين آءِ) ڀارتي ميڊيا نريندر مودي جي پاڪستان بابت پاليسي تي ڪاوڙجي پيو هندستان ٽائيمز جي ايڊيٽوريل مطابق نريندر مودي جي پاليسي سان صرف زهريلا اثر مرتب ٿيا آهن پرڏيهي صلاحڪار سطح تيڳالهيون رکڻ سان ڀارت جي سڄي دنيا ۾ بدنامي ٿي جنهن کان پوءِ خود ڀارتي اخبارن مودي جي پاڪستاني پاليسيءَ تي تنقيد ٿيڻ لڳي هندستان ٽائيمز ۾ لکيل ايڊٽوريل مطابق ڳالهين جو ايجنڊا ۽ ڪشميري اڳواڻن بابت مودي سرڪار جي پاليسي سان زهر ڀريا اثر جڙيا اخبار مطابق پاڪستان جو حريت اڳواڻن سان ملاقات ڪرڻ يقيني هو هي تصور ئي غلط هو ته پاڪستان صرف پنهنجي مٿان دهشتگردي جا الزام ٻڌڻ لاءِ ڳالهيون ڪندو جيڪڏهن پاڪستان دهشتگرد آهي ته هو اوفا ملاقات ڇو ڪئي ويئي هندستان ٽائيمز مطابق مودي جي پاليسي سان پاڪستان ۾ ڀارت جي مخالفن جو انگ وڌي ويو آهي اخبار مودي کي پاڪستان ۾ ڪنهن به ڪارروائي کان خبردار ڪندي چيو ته جيڪڏهن ايئن ٿيو ته ڀارتي جهازن يا ڪمانڊرز جو واپس ورڻ آسان نه هوندو ايڊيوٽوريل مطابق جيڪڏهن ڀارت دهشتگردي جي ڪنهن واقعي تي آمريڪا يا عالمي برادري جو دروازو کڙڪايو ويندو ته اتان جواب ملندو ته آگسٽ ۾ پرڏيهي سيڪريٽري سطح جون ڳالهيون به ته پاڻ ئي ملتوي ڪيون هيون هندستان ٽائيمز نريندر مودي جي پاليسي کي ڀارت لاءِ خطرو قرار ڏنو.

 

ڪميشن آئيني ادارو آهي، ڪنهن سياسي جماعت آڏو جوابده ناهي: اليڪشن ڪميشن

اسلام آباد(بيورو) اليڪشن ڪميشن، پي ٽي آءِ سربراهه عمران خان جي مطالبي تي استعيفائون ڏيڻ کان انڪار ڪندي چيو آهي ته اليڪشن ڪميشن آئيني ادارو آهي، ڪنهن سياسي جماعت آڏو جوابده ناهي. اليڪشن ڪميشن، عمران خان جي خط جو جواب ڏئي ڇڏيو. جواب ۾ چيو ويو آهي ته اليڪشن ڪميشن آئيني ادارو آهي، ڪنهن سياسي جماعت آڏو جوابده ناهي. اليڪشن ڪميشن جي سيڪريٽري پاران ڏنل جواب ۾ چيو ويو آهي ته عمران خان اليڪشن ڪميشن کان اهڙي ريت وضاحت نه ٿو وٺي سگهي. سيڪريٽري موجب اليڪشن ڪميشن جڊيشل ڪميشن جي سفارشن تي عملدرآمد ڪري رهيو آهي. جواب ۾ چيو ويو ته عمران خان جيالزامن جو جواب ڏنو ويو آهي، بي بنياد الزام هڻڻ کان پاسو ڪيو وڃي. ٻئي طرف تحريڪ انصاف جي ترجمان نعيم الحق جو چوڻ آهي ته اليڪشن ڪميشن جو جوابي خط ملي ويو آهي جنهن جو جائزو ورتو پيو وڃي جنهن تي اڄ شام تائين ردعمل ظاهر ڪيو ويندو.

 

اليڪشن ڪميشن جي ميمبرن جي خلاف ڪارروائي نه ڪئي وئي ته ٻيهر رستن تي اچي وينداسين:عمران خان

اسلام آباد (اين اين آءِ) پاڪستان تحريڪ انصاف جي چيئرمين عمران خان چيو آهي ته اليڪشن ڪميشن کان ڌانڌلي ڪندڙن جي خلاف ڪارروائي جو مطالبو ڪرڻ آئيني حق آهي جنهن کان اسان کي ڪوئي نٿو روڪي سگهي (ن) ليگ مڪاني چونڊن ۾ به اليڪشن ڪميشن جي عملي ۽ پنجاب جي بيورو ڪريسي سان گڏجي ڌانڌلي جو منصوبو رٿي رهيآهي اهڙن خيالن جو اظهار هن گذريل ڏينهن پنهنجي رهائشگاهه بني گالا تي صوبائي آرگنائيزر چوڌري محمد سرور سان ڳالهه ٻولهه ڪندي ڪيو چوڌري محمد سرور عمران خان سان ملاقات ڪئي ۽ موجوده سياسي صورتحال تي ڳالهيون ڪيون ان موقعي تي پارٽي معاملا ۽ تنظيم سازي سميت ٻين معاملن تي مشاورت ڪئي ويئي اڳواڻن حڪومتي پاليسين تي عدم اعتماد جو اظها رڪري چڏيو ان موقعي تي نيشنل آرگنائيزر شاهه محمود قريشي ۽ سينٽرل آرگنائيزر جهانگير خان ترين ۽ ٻيا پڻ موجود هئا عمران خان ڳالهائيندي چيو ته اليڪشن ڪميشن کان ڌانڌلي ڪندرن جي خلاف ڪارروائي جو مطالبو ڪرڻ آئيني حق آهي جنهن کان اسان کي ڪوئي نٿو روڪي سگهي (ن) ليگ جي امپائر کي پاڻ سان ملائي چونڊ ميدان ۾ ڌانڌلي ڪرڻ جي سياست کي عوامي طاقت سان هميشه لاءِ ختم ڪري ڇڏينداسين ۽ ان کي عوام جي ووٽن جي تقدس تي يقين ڪرڻو پوندو هن چيو ته (ن) ليگ ڪماني چونڊن ۾ به اليڪشن ڪميشن جي عملي ۽ پنجاب جي بيورو ڪريسي سان گڏجي ڌانڌلي جو پلان جوڙي رهي آهي جنهن لاءِ تحريڪ انصاف سڄي پنجاب ۾ پنهنجن ڪارڪنن کي اهڙي ٽريننگ ڏيئي رهي آهي جنهن سان حڪمرانن جي ڌانڌلي جي هن منصوبي کي ڪامياب نه ٿيڻ ڏنو ويندو هن چيو ته تحريڪ انصاف جي مطالبن جي منظوري لاءِ اليڪشن ڪميشن کي ڊيڊ لائين ڏيئي ڇڏي آهي جيڪڏهن اسان جا مطالبا پورا نه ٿيا ته اسان وٽ ڌرڻي کان سواءِ ڪوئي آپشن نه هوندو.

 

عدالتون دهشتگردن جي نشاني تي، حملن جو خطرو، ڳجهن ادارن رپورٽ ڏئي ڇڏي

ڪراچي (اين اين آءِ) ڪراچي ۾ عدالتون به دهشتگردن جي نشاني تي آهن حملن بابت ڌمڪي وارين ڪالز کان پوءِ عدالتن جي سيڪيورٽي ۾ اضافو ڪري اڻ لاڳاپيل ماڻهن جي داخلا تي پابندي هڻي ڇڏي اطلاع مطابق ڌمڪي وارا فون ڪالز ۽ حملن جي خطرن سبب ڪراچي بار ايسوسيئيشن ۽ سٽي ڪورٽ لاءِ ريڊ الرٽ جاري ڪيا ويا حفاظتي قدم سخت ڪرڻ جو حڪم ڏنو ويو بار ايسوسيئيشن ساڍا ست هزار وڪيل ججز عدالتي عملو جيلن مان ايندڙ قيدين سميت سٽي ڪورٽ ايندڙ شهرين جي تحفظلاءِ سيڪيورٽي طلب ڪري ورتي ذريعن مطابق حساس ادارن پاران ڪراچي ۾ سياسي جماعت جي ايم اين اي تي حملي کان پوءِ ڪالعدم تنظيمن سميت دهشتگردن پاران عدالتن ۾ پيش ٿيندڙ قيدين وڪيلن ججز عدالتي عملي ۽ مختلف ڪيسن ۾ ايندڙ ماڻهن کي دهستگردي جو نشانو بنائڻ جي ڳجهي اطلاع کان پوءِ سندس تحفظ لاءِ ڪراچي بار کي قدم کڻڻ جو چيو ويو آهي ٻئي پاسي ذريعن ٻڌايو ته ڌمڪي وارا فون ڪالز جي رڪارڊنگ کان پوءِ ايمرجنسي بنيادن تي الرٽ جاري ڪري ڇڏيو آهي ۽ مناسب سيڪيورٽي جو بندوبست ڪرڻ لاءِ چيو آهي جنهن ۾ سٽي ڪورٽ ۽ بار بلڊنگ کي نهايت حساس قرار ڏنو ويو آهي ۽ حفاظتي انتظام سخت ڪرڻ جو چيو آهي جنهن کان پوءِ ڪراچي بار ايسوسيئيشن بار ميمبرن جي سيڪويرٽي لاءِ انچارج سيڪيورٽي جج کي ايمرجنسي بنيادن تي سيڪيورٽي فراهم ڪرڻ لاءِ باقاعده لکت ۾ اطلاع ڏنو آهي.