تازيون خبرون

Daily Archives: August 24, 2015

زرين خان ۽ سندس ڀيڻ کي آمريڪي اختيارين ايئرپورٽ تي روڪي ورتو،ڪيترائي ڪلاڪ پڇا ڳاڇا کانپوءِ ڇڏيو ويو

نيويارڪ(شوبز نيوز) بالي ووڊ اداڪارا زرين خان ۽ سندس ڀيڻ کي آمريڪي اختيارين ايئرپورٽ تي روڪي ورتو ۽ ڪيترائي ڪلاڪ پڇا ڳاڇا کانپوءِ کين وڃڻ ڏنو. ڀارتي ميڊِيا مطاباق زرين خان آمريڪا ۾ رٿيل هڪ شو ۾ پرفارم ڪرڻ لاءِ پنهنجي مينيجر ۽ ڀيڻ سان گڏ نيويارڪ پهتي ، ايئرپورٽ تان سندس مينيجر کي ته وڃڻ ڏنو ويو پر زرين ۽ سندس ڀيڻ کي روڪيو ويو، ٻنهي کي ڪيتري ئي دير تائين هڪ ڌار ڪمري ۾ ويهارڻ کانپوءِ آمريڪا اچڻ جي ڪارڻن ۽ رهائش دوران گهمڻ ڦرڻ جي حوالي سان شيڊول بابت پڇا ڳاڇا ڪئي وئي. ڪيترائي ڪلاڪ پڇا ڳاڇا کانپوءِ آمريڪي اختيارين ٻنهي ڀينرن کي وڃڻ ڏنو. زرين خان ان واقعي جي تصديق ڪندي چيو ته هوءَ ڪيترائي ڀيرا آمريڪا جو دورو ڪري چڪي آهي پر ساڻس پهرين ڪڏهن به ائين ناهي ٿيو، آمريڪي اختيارين طرفان پڇا ڳاڇا دوران هن ساڻن مڪمل سهڪار ڪيو، هر پاسي کان مطمئن ٿيڻ کانپوءِ ئي آمريڪي اختيارين کين ڇڏي ڏنو. واضح رهي ته شاهه رخ خان کي به ٽي سال پهرين نيويارڪ ايئرپورٽ تي 2 ڪلاڪ روڪيو ويو هو.

 

راڌيڪا اُپتي جو رجني ڪانت سان گڏ ڪم ڪرڻ وارو خواب ساڀيان ٿي ويو

ممبئي(شوبز نيوز)بالي ووڊ اداڪاره راڌيڪا آپتي پنهنجي تامل فلم ۾ رجني ڪانت جي آڏو پرفارم ڪندي. ڀارتي ميڊيا مطابق اداڪاره راڌيڪا آپتي رجني ڪانت جي مداح پڻ آهي.هن سندس اڪثر فلمن کي ڏٺو آهي ۽ سندس چوڻ آهي ته رجني ڪانت سان گڏ ڪم ڪرڻ سندس خواب هو. جيڪو فلم ڪبالي سان پورو ٿي رهيو آهي. هن چيو ته رجني ڪانت سان گڏ ڪم ڪرڻ تي تمام گهڻي خوش آهيان ۽ ان دوران هن کان وڌ کان وڌ سکڻ تي ڌيان ڏينديس.

 

رنبير ڪپور ۽ بولڊ اداڪارا عاليا ڀٽ ” دل هي ڪي مانتا نهين“ جي سيڪوئل ۾ گڏ نظر ايندا

ممبئي(شوبز نيوز)بالي ووڊ جو چاڪليٽي هيرو رنبير ڪپور ۽ بهادر اداڪارا عاليا ڀٽ فلم “ دل هي ڪي مانتا نهين” جي سيڪوئل ۾ گڏ نظر ايندا. ڀارتي فلم انڊسٽري ۾ بولڊ ڪردار فلمائڻ ۽ اسڪينڊل ڪوئين طور مشهور عاليا ڀٽ گذريل سال رنبير ڪپور سان نه رڳو فلمن ۾ گڏ ڪم ڪرڻ تي راضپو ظاهر ڪيو هو پر هن ساڻس کلي عام عشق جو اظهار ڪندي شادي جو ارادو به ڏيکاريو هو ، هاڻ انهن ٻنهي مان سندس هڪ خواهش جلد پوري ٿيڻ واري آهي. 1991ع ۾ رليز ٿيل فلم “ دل هي ڪي مانتا نهين” ۾ بالي ووڊ جي مسٽر پرفيڪشنسٽ عامر خان ۽ پوجا ڀٽ مک ڪردرا ادا ڪيو هو ۽ ان فلم جي گانن وڏي مشهوري ماڻي هئي، ڀارتي ميڊِيا مطابق هاڻ فلمساز ايان مکرجي “ دل هي ڪي مانتا نهين” جو سيڪوئل ٺاهڻ جو اعلان ڪيو آهي، جنهن ۾ رنبير ڪپور ۽ عاليا ڀٽ مرڪزي ڪردارن ۾ نظر ايندا، اها سندن پهرين گڏ فلم هوندي.

 

ديويا دتا کي چاڪ اينڊ ڊسٽر ۾ ناڪاري ڪردار ادا ڪري مزو اچي ويو

ممبئي(شوبز نيوز)بالي ووڊ اداڪاره ديويا دتا چيو آهي ته هوءَ نئين فلم ”چاڪ اينڊ ڊسٽر“ ۾ ناڪاري ڪردار ادا ڪري تفريح ماڻي رهي آهي. ڀارتي سڌ سماءَ وارن ذريعن مطابق اداڪاره چيو ته جڏهن کيس ان فلم ۾ ناڪاري ڪردار جي آڇ ٿي ته کيس وڏي حيراني ٿي ۽ کيس اهو منفرد ڪردار لڳو. هن چيو ته جڏهن اسڪرپٽ پڙهيم ته تمام گهڻو وڻيو. ان فلم ۾ جوهي چاولا ۽ شبانه اعظمي به ڪم ڪري رهيون آهن، جيڪي منهنجيون پسنديده اداڪارائون آهن. ساڻن گڏ ڪم ڪرڻ سان گهڻو ڪجهه سکڻ جو موقعو مليو. فلم جي ڪاسٽ ۾ جيڪي شيروف، زرينا وهاب ۽ سمير سوني به شامل آهن.

 

پاڪ_ڀارت ڪرڪيٽ سيريز جو آخري ڏيئو به اجهامي ويو

لاهور / دهلي (اسپورٽس نيوز) پاڪستان ۽ ڀارت وچ ۾ ڳالهيون رد ٿيڻ کان پوءِ  پاڪ – ڀارت ڪرڪيٽ سيريز جي اميدن جو آخري ڏيئو به اجهامي ويو آهي، ڀارت پاران ڳالهين کان نٽائڻ واري عمل ڪرڪيٽ جي شوقينن کي مايوس ڪري ڇڏيو آهي، ٻنهي ملڪن ۾ ڳالهين جي عمل ۾ ڊيڊلاڪ سبب پي سي بي اختيارين ۾ مايوسي جي لهر ڊوڙي وئي آهي، فيوچر ٽوئر پروگرام هيٺ پاڪستان کي هلندڙ سال ڀارت جي ميزباني ڪرڻي آهي ،3 ٽيسٽ، 5 ون ڊي ۽ 2 ٽوئنٽي ٽوئنٽي ميچن لاءِ پي سي بي پاران نيوٽرل وينيو يو اي اي جي چونڊ به ڪئي وئي آهي، ان حوالي سان ٻنهي ڪرڪيٽ بورڊن  ايم اويو تي صحيحون به ڪيون آهن  پر گورداس پور ۾ پوليس اسٽيشن تي حملي کانپوءِ سياسي ڇڪتاڻ ۾ اضافو ٿي ويو، سرحدن تي به فائرنگ جي ڏي وٺ  معمول بڻجي وئي آهي، ان صورتحال ۾ بي سي سي آءِ کي سيريز کان انڪار جا بهانا ڳولڻ جو موقعو ملي ويو آهي،بي سي آئي جو  سيڪريٽري انوراگ ٺاڪر هڪ سياستدان به آهي، جنهن سدائين پاڪ – ڀارت ڪرڪيٽ سيريز جي مخالفت ۾ بيان ڏنا آهن، پاڪستان تي مداخلت جو الزام هڻندي هن چيو ته اسان جي ملڪ جو امن متاثر ٿي رهيو آهي، سرحدن تي ڇڪتاڻ هجي ته ڪرڪيٽ نه ٿي کيڏي سگهجي، ڳالهيون ختم ڪرڻ جي اطلاعن تي پي سي بي اختيارين ۾ به سخت مايوسي جي لهر ڏٺي وڃي ٿي، جنهن ڪري ٿنڪ ٽينڪ کي بي پلان تي عمل جو فيصلو جلد ڪرڻو پوندو، جڏهن ته ڊسمبر ۾ رڳو زمبابوي ۽ بنگلاديش جون ٽيمون ئي فارغ آهن.

 

ميٿيوز ڪولمبو ٽيسٽ ۾ پنهنجي ڪيريئر جي ڇهين سينچري ٺاهي ورتي

(اسپورٽس نيوز)سريلنڪا جي ڪرڪيٽ ٽيم جي ڪپتان اينجلو ميٿيوز ڪولمبو ٽيسٽ ۾ پنهنجي ڪيريئر جي ڇهين سينچري ٺاهي ورتي، گذريل ڏينهن ڀارت خلاف ٽيسٽ جي ٽئين ڏينهن ميٿيوز بهترين بيٽنگ جو مظاهرو ڪيو ۽ 102 رنسن جي وڻندڙ اننگ کيڏي، جنهن ۾ 12 چوڪا پڻ شامل هئا، هو هيستائين 87 اننگز ۾ 52.38 جي سراسري سان 3667 رنسون ٺاهي چڪو آهي، جن ۾ 6 سينچريون ۽ 22 هاف سينچريون شامل آهن

 

ڀارت پنهنجي ٻي اننگ ۾ هڪ وڪيٽ جي نقصان تي 70 رنسون ٺاهي ورتيون

ڪولمو(اسپورٽس نيوز) ڀارت جي ڪرڪيٽ ٽيم سري لنڪا خلاف ٻئي ٽيسٽ ميچ جي ٻي اننگ ۾ 157 رنسن جي برتري حاصل ڪري ورتي آهي.ڀارت پنهنجي ٻي اننگ ۾ هڪ وڪيٽ جي نقصان تي 70 رنسون ٺاهي ورتيون آهن. ٽئين ڏينهن جي راند ختم ٿيڻ وقت ڀارت جو ٻي اننگ ۾ اسڪور هڪ وڪيٽ جي نقصان تي 70 رنسون هيون. مرلي وجي 39 ۽ اجنڪا راهاني 28 رنسن سان ڪريز تي موجود هئا. ان کان اڳ ڀارت جي ٽيم پنهنجي پهرين اننگ ۾ 393 رنسون ٺاهي آل آئوٽ ٿي وئي هئي، جڏهن ته جواب ۾ سري لنڪا جي ٽيم پهرين اننگ ۾ 306 رنسون ٺاهي آل آئوٽ ٿي وئي هئي.

 

پاڪستاني ڪرڪيٽ ٽيم جي آءِ سي سي جي سڀ کان وڏي ايونٽ چيمپئنز ٽرافي ۾ شرڪت ۾ آيل سموريون رنڊڪون ختم

لاهور(اسپورٽس نيوز) پاڪستاني ڪرڪيٽ ٽيم جي آءِ سي سي جي سڀ کان وڏي ايونٽ چيمپئنز ٽرافي ۾ شرڪت ۾ آيل سموريون رنڊڪون ختم ٿي ويون آهن ۽ هاڻي قومي ٽيم جي چيمپئنز ٽرافي ۾ شرڪت يقيني بڻجي وئي آهي. عالمي ميڊيا جي رپورٽن ۾ ڄاڻايو ويو آهي ته چيمپئنز ٽرافي کان اڳ ويسٽ انڊيز جي ڪنهن به ملڪ سان ون ڊي سيريز طئي نه ٿي سگھي آهي، جنهن ڪري پاڪستان ڪا دروازا کلي ويا آهن، ۽ پاڪستان جي چيمپئنز ٽرافي ۾ شرڪت ممڪن ٿي آهي. آءِ سي سي چيمپئنز ٽرافي ۾ صرف عالمي رينڪنگ ۾ اٺين نمبر تائين ايندڙ ٽيمون ئي شرڪت جون اهل هونديون آهن. پاڪستان گذريل مهيني سري لنڪان کي ون ڊي سيريز ۾ شڪست ڏئي آءِ سي سي جي رينڪنگ ۾ اٺين پوزيشن ماڻي ورتي هئي، جڏهن ته ويسٽ انڊيز جي ڪنهن ملڪ سان ميچ جي صورت ۾ پاڪستان نائين نمبر تي هليو وڃي ها ۽ ويسٽ انڊيز جي اٺين پوزيشن ٿي وڃي ها. ويسٽ انڊين ميڊيا دعويٰ ڪئي آهي ته ويسٽ انڊيز جو ڪرڪيٽ بورڊ ڪنهن به ملڪ سان سيريز طئي ڪرڻ ۾ ناڪام ٿي چڪو آهي، جنهن جي ڪري ويسٽ انڊيز ڪرڪيٽ ٽيم جي هاڻي چيمپئنز ٽرافي ۾ شرڪت نا ممڪن ٿي وئي آهي. واضح رهي ته ويسٽ انڊيز جي ڪرڪيٽ بورڊ ڀارت سان سيريز کيڏڻ جون ڪوششون ڪيون هيون پر ٻنهي ٽيمن وچ ۾ ون ڊي سيريز ٿي نه سگھي. چيمپئنز ٽرافي لاءِ ڪواليفاءِ ڪرڻ جي آخري تاريخ 30 سيپٽمبر 2015ع آهي ان وقت تائين اٺين نمبر تائين جون ٽيمون چيمپئنز ٽرافي کيڏي سگھنديون ۽ ويسٽ انڊيز لاءِ ان وچ ۾ ڪا به سيريز رٿيل ناهي، جنهن ڪري هاڻي پاڪستان اٺين نمبر جي ٽيم طور چيمپئنز ٽرافي ۾ شرڪت ڪندو.

 

ڏهرڪي واقعو رشتن مٿان سواليه نشان.؟

 

ڏهرڪي ويجهو کينجهو ٿاڻي جي حد ۾اوباش نوجوانن نشي ۾ ڌت ٿي ڪري پنهنجي دوست جي  گهرواريءَ کي اجتماعي لڄالٽ جو نشانو بڻائي ڇڏيو، جنهن بعد کينجهو پوليس ٻنهي جوابدارن کي گرفتار ڪري لاڪپ ڪري ڇڏيو. ان حوالي سان ڄاڻ موجب ميرپور ماٿيلي جي ڳڙهي چاڪر ۽ واڳڻي واري علائقي سان واسطو رکندڙ ٻن اوباش نوجوانن درشن ڀيل ۽ مهراڻ ڀيل گذريل رات دير سان کينجهو ٿاڻي جي حد ڳوٺ مراد مهر ۾رهندڙ پنهنجي دوست گلو ڀيل جي گهر مهمان ٿي آيا. جن گلو ڀلي کي شراب ۾ نشي آور گوريون کارائي کيس بيهوش ڪري ڇڏيو. بعد ۾ ٻنهي جوابدارن گلو ڀيل جي گهر واريءَ ثمينه ڀيل کي اجتماعي لڄالٽ جو نشانو بڻايو. واقعي بعد ٻئي جوابدار عورت کي ڪمري ۾ بند ڪري فرار ٿي ويا.  هوڏانهن گلو ڀيل هوش ۾ اچڻ بعد پنهنجي گهر واريءَ ثمينه کي بند پيل ڪمري مان ٻاهر ڪڍيو. جنهن جا ڪپڙا ليڙون ليڙون ٿيل هئا. جنهن بعد گلو ڀيل پنهنجي گهر واريءَ ثمينه کي ساڻ ڪري کينجهو ٿاڻي پهتو ۽ ٻنهي جوابدارن خلاف اين سي داخل ڪرائي ڇڏيي آهي. اهڙي رپورٽ داخل ٿيڻ بعد کينجهو پوليس ٻنهي جوابدارن جي گهرن تي چڙهائي ڪري کين گرفتار ڪري ورتو آهي. واقعي بابت ثمينه ڀيل صحافين کي ٻڌايو ته درشن ۽ مهراڻ ڀيل منهنجي مڙس گلو ڀيل جا دوست آهن، جيڪي رات دير سان اسان جي گهر پهچي منهنجي مڙس شراب ۾ نشي جون گوريون ڏئي کيس بيهوش ڪري ڇڏيو.  جنهن بعد هنن مون سان سڄي رات لڄالٽ ڪئي. جڏهن ته منهنجي مزاحمت تي هنن منهنجا ڪپڙا به  ليڙون ليڙون ڪري ڇڏيا. هنن چيو ته ٻنهي جوابدارن مون کي قتل جون ڌمڪيون پڻ ڏنيون. ثمينه ڀيل اعليٰ اختيارين کان ٻنهي جوابدار کي ڦاهي تي لٽڪائڻ جي گهر ڪئي آهي. هوڏانهن کينجهو ٿاڻي تي لاڪپ ڪيل درشن ڀيل ۽ مهراڻ ڀيل صحافين کي بيان ڏيندي چيو ته هنن کان نشي جي حالت ۾ خطا ٿي وئي آهي. اسان پنهنجي ڏوهه قبول ڪريون ٿا. ٻئي طرف کينجهو جو چوڻ آهي ته ناري سان ڏاڍائي ڪندڙ ٻئي جوابدار گرفتار ڪيا ويا آهن. جڏهن ته واقعي جي جاچ هلندڙ آهي. جاچ مڪمل ٿيڻ بعد جوابدارن تي ايف آءِ آر داخل ڪئي ويندي .

ضرورت ان ڳالهه جي آهي ته هن واقعي ۾ ملوث جوابدارن کي عبرتناڪ سزائون ڏنيون وڃن ته جيئن ٻيهر اهڙي قسم جو واقعو ڪرڻ کان اڳ ڏوهاري قسم جي ماڻهن کي هزار ڀيرا انهن رشتن جو خيال اچي جنهن رشتن تي هن وقت دنيا قائم ۽ دائم آهي ڇاڪاڻ ته رشتو چاهي ڪهڙو به هجي پر ان جو احترام ڪرڻ هر ڪنهن جو فرض آهي، اگر رشتن جي پئمالي ٿيندي ته اڳتي هلي اسان جي سماج سان سمورا رشتا ختم ٿي ويندا جنهن سان نه صرف نفرتون وڌنديون بلڪه ڪيترائي ڀيانڪ واقعا پيش ايندا تنهن ڪري سنڌ حڪومت کي هن واقعي جو سخت نوٽيس وٺي جوابدارن کي سخت کان سخت ڏئي.

 

ڇا متحده جو مطالبو مڃيو ويندو؟؛عديل مهر

مفاهمت جي مڙني ڪوششن مان مايوس ٿي متحده پارلياماني خودڪشيءَ جو پڪو اعلان ڪري ڇڏيو آهي. حڪومت ٺاهه ڪرائڻ لاءِ مولانا صاحب جي هڪ به نه هلي، هن کي پهريون وچ ۾ آڻي پوءِ ٻاهر ويهاريو ويو. مولانا کين آسرو ڏئي ويو هو وزيراعظم سان ملائڻ لاءِ اسلام آباد وٺي وڃڻ جو، پر وزيراعظم خميس ڏهاڙي ڪراچيءَ ۾ اچي ڪري به متحده وارن سان ملڻ کان لُپڙائي ويو، عرض ڪرڻ جي باوجود نه ملين! متحده کي انهيءَ تي مٺيان لڳي ۽ هن خار ۾ جمعي ڏهاڙي پريس ڪانفرنس ڪري چيو ته هاڻ ڳالهيون اجايون آهن، بس اسان جون استعيفائون قبول ڪيون وڃن. هن ٽياڪڙي ڪندڙ کي به هٿ ٻڌي عرض ڪيو ته مولانا صاحب ان ڪم لاءِ وري هيڏي نه اچجانءِ!

حالانڪه هن وقت تائين ٺاهه ڪرائي مولانا صاحب لکي الطاف حسين سان مبارڪباد جو ڀاڪر پائڻ لاءِ لنڊن هجڻو هو پر مولانا جي من ۾ هڪڙي ۽ سرڪار جي من ۾ ڪا ٻي هئي. مولانا صاحب ڊيره اسماعيل خان وڃي ويهي رهيو آهي. هن جو مشن امپاسبل ناڪام ٿيو آهي. خبر ناهي ته هن کي رحمان ملڪ فون ڪري اهو چيو الائي ڪا نه ته ٽياڪڙي ڪريو ته اها مون کان سکو. رحمان ملڪ اهڙن موقعن تي ڪم وارن جي ڪم ايندو هو، جيڪو لڳس لائيندو هو، پر ڪم ڪري ايندو هو. متحده کي مڃائڻ جو ته وڏو ڏانءُ هيس، مڃڻ مراد آهي!! پر هو جن جو نائب ٿي ويندو هو، اهي کيس ڪجهه ڪرڻ جو اختيار به ڏيندا هئا، هي حڪمران ڪجهه ڪنجوس نڪتا، سکڻا سلام کڻائي مولانا صاحب کي موڪلي ڇڏيائون. متحده جا شرط اُماڻي هو پاسيرو ٿي ويو، جن کان هيڏن سان احتجاجن ۽ ڌرڻن جي باوجود پاڪستان عوامي تحريڪ ۽ تحريڪ انصاف کي ڪجهه نه مليو ته صرف استعيفائون ڏيندڙ متحده کي ڇا ملڻو هو؟ ائين ٿيڻو هو، وچ وارن وچ ۾ پئي اجايو پنهنجو ٽائيم وڃايو! هنن جو نائن زيرو جو ڀيرو ڪرڻ بيڪار ثابت ٿيو. ڏنل آسرا اڪارت ويا، سرگرميون سڪارتيون نه ٿيون. ڳالهه وڃي اُتي بيٺي جتي ٽياڪڙيءَ کان اڳ ۾ هئي. ٽنهي ايوانن مان متحده جي ميمبرن جون استعيفائون هاڻ عمل جو انتظار پيون ڪن، لڳي ٿو اهو معاملو ائين ئي لٽڪيل رهندو پر جي ٿي ٿو وڃي استعيفائن تي عمل، ته ڪراچيءَ ۾ وڄندا دهل ۽ ٿينديون نيون ننڍيون چونڊون!!

مسلسل خبرن ۾ رهڻ جي خواهش ٻي ڳالهه آ، باقي جيڪو رُسڻ وارن جي ريت ۽ ريچڪ کان واقف هوندو اهو پرچائڻ جي چڪر ۾ پئي پنهنجو وقت برباد نه ڪندو. ٻئين ٽئين ٽمجهڻ آهي ئي آهي، پوءِ ته ماڻهو پنهنجا ڪم ئي نه ڪري، وتي هنن جا نياپا ڍوئيندو. ڪڏهن ڪير رُسندن ته ڪڏهن ڪير، هنن جو ڪهڙو خير! هنن جون ميڙون منٿون پيون هلنديون، اها ڪنهن واندي ماڻهوءَ جي وندر ته ٿي سگهي ٿي پر ڪنهن قائد جهڙي ماڻهوءَ جو ڪم ناهي. جڏهن ڪو مانُ ئي نه ملي، مڃتا نه ٿئي ته اهڙي ڪم کي ئي ٻَنُ ڏجي! اڳواڻن کي پنهنجي پارٽي ۽ ڪارڪنن جي ڪم مان ئي واندو نه ٿيڻ گهرجي. ديني فرض به ته وقت گهرندا آهن، ڪنهن قومي ڏچي کي ٽارڻ لاءِ ته وقت ڪڍي سگهجي ٿو پر ريچڪ جي راڻن ۽ موڊ جي بادشاهن جو اڳ پوءِ ڇو ڪجي! جڏهن ته قومي ادارن کي اها ڳالهه ناهي وڻي، خلق الڳ خارَ ۾ آهي! نائن زيرو واري ملاقات کانپوءِ اڱاري ڏهاڙي وزيراعظم ۽ آرمي چيف جي ملاقات ٿي، تنهن کانپوءِ حڪومت بي نيازي اختيار ڪئي آهي، ڪنهن جو احتجاج جيڪڏهن سياسي هجي ها ته سياسي ملاقات هڪ وڏي سياسي ملاقات کي جنم ڏي ها پر ڪراچيءَ واري ملاقات قومي ادارن جي وچ ۾ ملاقات جو ڪوئي ڪارڻ بڻي آ شايد، ٻي ملاقات کي پهرين قسم واريءَ جو جواب سمجهي سگهجي ٿو. اهو معاملو ڪنهن سياست يا سياسي محروميءَ جو ناهي، اهو ڪراچيءَ جي امن جو معاملو آهي. امن جي ردعمل کي ايتري اهميت نٿي ڏئي سگهجي ۽ ردعمل کي عمل تي ترجيح ته بلڪل به نٿي ڏئي سگهجي. انهيءَ ڪري شايد وزيراعظم ڪراچيءَ ۾ ڪن سان ملڻ کان لهرائي ويو.

ٻيو ته هاڻي جڏهن هٿ ڪڍي ويو آهي ۽ هٿ ٻَڌي متحده به کيس روڪيو آهي ته پوءِ مولانا صاحب کي قوم اڳيان پڌرو ڪرڻ گهرجي ته هن جي اڳيان متحده ڪهڙا مطالبا رکيا هئا. خود هن جو خاموش ٿي وڃڻ به ٿي سگهي ٿو ته انهن مطالبن جي نامناسب هجڻ وارو ڪارڻ هجي پر مولانا صاحب پاڻ ڳالهه اچي ڪري ته آخر ڪهڙي ڳالهه جي ڪري هن جو مشن ناڪام ويو. ميڊيا ۾ لکيو ويو آهي ته هڪ مطالبو ڪراچي جي آپريشن تي پارلياماني ڪاميٽي قائم ڪرڻ جو هو. ان سان قومي ادارن جي ڪارڪردگيءَ تي شڪ ڪرڻ ۽ سياسي نگراني ڪري ناڪام بنائڻ جهڙو عمل سمجهيو ويندو، ائين ته پوءِ ڪراچي کان وڏو آپريشن وزيرستان ۾ ضرب عضب پيو هلي، اول ته ان تي پارلياماني ڪاميٽي ٺهڻ گهرجي. سوال هي آهي ته پارلياماني پارٽين ڀلا ڪڏهن پنهنجو ڪم پورو ڪيو آهي؟ ادارا سياست کان پري رهي ڪم ڪندا آهن، تڏهن ته ڪجهه ڪري سگهندا آهن. ٻيو ته جيڪا جماعت 12 مئي جي واقعي جي جاچ پارلياماني ڪاميٽيءَ کان ڪرائڻ لاءِ ڪڏهن تيار نه ٿئي، اها اڄ پنهنجي فرمائش تي ڪراچي آپريشن تي ائين ڇو ٿي چاهي؟

انهيءَ کان به وڌيڪ اهم مطالبو متحده جو اهو ٿو چيو وڃي ته، هنن الطاف حسين جي لائيو خطاب ڪرڻ ۽ ان کي نشر ڪرڻ تان پابندي ختم ڪرڻ جي ڳالهه ڪئي آهي پر اهو مطالبو مڃڻ حڪومت جي وس ۾ هونئن به ڪونهي. وزيراعظم ۽ صدر کانسواءِ ٻئي هر ڪنهن جي لائيو خطاب نشر ڪرڻ تي پابندي هاءِ ڪورٽ هنئي آهي. پيمرا کي پابند عدالت ڪيو آهي ته خلاف ورزي ڪندڙ چينل کي بند ڪيو وڃي. انهيءَ پابنديءَ الطاف حسين کي پريشان ڪري ڇڏيو آهي، هو جيڪو نه مهل ڏسندو هو نه موقعو ۽ هن جي ڪارڪنن جيان ڪراچي ۾ چينل به پابند هئا ته سڌو سنئون نشر ڪن، ڀلي ڪلاڪ گذري وڃن، ڀائي پيو ڳالهائيندو رهي. اصل تڪليف انهن جي اها آهي، دٻاءُ وجهي هو پنهنجي تقرير جي نشريات بحال ڪرائڻ گهري ٿو. قومي ادارن خلاف ڳالهائڻ کانپوءِ ته هن جي انٽرويوز نشر ڪرڻ تي به پابندي آهي. هاڻي پاڻ سوچيو ته هو ڪاڏي وڃي، پنهنجي ڳالهه مڃائڻ لاءِ پارلياماني اڳواڻن جي سيٽن جي قرباني نه ڏي ته ٻيو ڪهڙو زور هلائي سگهندو؟

متحده جون ضرورتون پنهنجي جاءِ تي ليڪن ٻئي طرف ڪراچي سميت پورو پاڪستان آهي. ان جي ترجيح ڇاهي؟ ڪراچيءَ کي امن کپي يا متحده جي خوشي؟ قانون جي عملداري کپي يا سياسي ڀائيواري؟ مصلحتن ۽ سياسي سرچائن ڪڏهن به ڪراچيءَ کي امن ناهي ڏنو. ماضيءَ ۾ اهڙيون ڪيئي ڪاميٽيون ٺهيون، رابطن جون رانديون ٿيون. رُسڻ جون به ادائون ٿيون، پرچڻ ۽ پرچائڻ جي پريڪٽس ٿي. رحمان ملڪ جا پنڌ ٿيندا ها، هن جُتيون گسائي ڇڏيون، ڀاڪر به پائيندا هئا ۽ هڪ ٻئي جي وات ۾ لڏون به وجهندا هئا پر ڪراچيءَ ۾ امن ٻن ڏينهن جي ڳالهه هوندو هو. هو ته پنهنجي ليکي خير ڪري ڇڏيندا هئا پر ڪراچيءَ ۾ خير ڪا نه هوندو هو. ڪراچيءَ ۾ مسلسل هٿيار ڀونڪندا هئا ۽ انسانن کي ڏاڙهي وجهندا هئا. سياست ڪڏهن به امن ناهي ڪرايو، امن هميشه قانون جي موچڙي کڄڻ سان ممڪن ٿيو آهي. جڏهن گولي هڻڻ واري کي گولي پنهنجو نشانو بڻائيندي ۽ اهلڪار قاتل کي ڊڪائي ڊڪائي پڪڙيندا، تڏهن هن جا هٿ هٿيار مان ڍرا ٿيندا. متحده صحيح ٿي چوي ته هاڻي مذاڪرات اجايا آهن، هاڻي استعيفائن کي قبول ڪيو وڃي. هاڻ ڏسون ته حڪومت سندن اِهو مطالبو ڪڏهن ٿي پورو ڪري!