تازيون خبرون

Daily Archives: August 22, 2015

ڪرنسي اسمگلنگ ڪيس ۾ ماڊل گـَرل ايان علي مٿان فرد جرم لاڳو ڪرڻ وارو معاملو هڪ مهيني تائين ملتوي

راولپنڊي(م.ڊ) راولپنڊي جـِي ڪسٽم عدالت، ڪرنسي اسمگلنگ ڪيس ۾ ماڊل گـَرل ايان علي مٿان فرد جرم لاڳو ڪرڻ وارو معاملو هڪ مهيني تائين ملتوي ڪري ڇڏيو آهي. ڪسٽم عدالت جي جج راڻا آفتاب، ماڊل گرل ايان علي خلاف ڪرنسي اسمگلنگ ڪيس جي ٻڌڻي ڪئي. ٻڌڻيءَ دوران ايان علي ۽ سندس وڪيل سردار لطيف کوسا عدالت ۾ پيش ٿيا. ٻڌڻيءَ دوران ڪسٽم عملدارن ڪيس جو چالان پيش ڪندي چيو ته ڪيس ۾ پرائرٽي ڊيلر ۽ خريدار ممتاز ۽ اويس کي شريڪ جوابدار طور شامل ڪيو ويو هو پر سندن گرفتاري عمل ۾ ناهي اچي سگهي. ڪسٽم اختيارين ٻڌايو ته جوابدارن جي گرفتاري لاءِ ڪوششون جاري آهن پر جوابدار روپوش آهن. عدالت، ڪسٽم اختيارين کي حڪم ڏنو ته ٻنهي جوابدارن کي گرفتار ڪرڻ بعد ڪيس جو مڪمل چالان پيش ڪيو وڃي ۽ جوابدارن کي به چالان ۾ شامل ڪيو وڃي. عدالت، ماڊل ايان علي تي فرد جرم لاڳو ڪرڻ وارو معاملو ملتوي ڪندي ڪيس جي ٻڌڻي ملتوي ڪري ڇڏي

 

بالي ووڊ جو مشهور ادڪار نانا پاٽيڪر به هدايتڪاريءَ جي ميدان ۾ ڪُڏي پيو

ممبئي (شوبز نيوز) بالي ووڊ جو مشهور ادڪار نانا پاٽيڪر به هدايتڪاريءَ جي ميدان ۾ ڪُڏي پيو آهي. ڀارتي ميڊيا کي ڏنل انٽرويوءَ ۾ نانا پاٽيڪر چيو ته هو هڪ فلم جي هدايتڪاري ڪري رهيو آهي. هيءَ فلم هڪ عورت جي سوانح عمريءَ تي ٺاهي وئي آهي. فلم جو اسڪرپٽ تيار آهي ۽ ان جي شوٽنگ کٽمنڊو ۾ ٿيندي. هن چيو ته بالي ووڊ ۾ فلمسازيءَ دوران ڪيتري قسم جون مداخلتون ٿينديون آهن، جيڪي کيس بلڪل ناپسند آهن، هو اُن وقت ڪنهن فلم جي هدايتڪاري ڪندو جڏهن فلم جي ڪهاڻيءَ کان وٺي ان جي لاءِ ڪردارن جي چونڊ ۽ شوٽنگ جو مڪمل اختيار کيس حاصل نه ٿئي. نانا پاٽيڪر جو چوڻ هو ته جلد ئي هو فلمسازيءَ جي ميدان ۾ قدم رکندو. سندس پٽ هڪ پروڊڪشن هائوس ٺاهي رهيو آهي، جنهن جي بينر هيٺ سنجيده نوعيت جون فلمون ٺاهيون وينديون، پر هو بلڪل نه چاهيندو ته ان جي هر فلم ۾ اداڪاري ڪري. اڄوڪي دؤر ۾ ٻار به چڱيءَ طرح ڄاڻن ٿا ته هو ڇا ٿا ڪرڻ چاهين، ان لاءِ هو پنهنجي پٽ کي ڪا به صلاح نه ڏيندو.

 

ڀارتي اداڪارا ڀوميڪا چاولا 37هين سالگره ملهائيندي

نئين دهلي (شوبز نيوز) ڀارتي اداڪارا ڀوميڪا چاولا اڄ پنهنجي 37 هين سالگرهه ملهائيندي، ادڪارا ڀوميڪا 21 آگسٽ 1978ع ۾ نئين دهليءَ جي هڪ پنجاب گھراڻي ۾ جنم ورتو هو. ڀوميڪا چاولا 2000ع ۾ تيلگو فلم سان فلم انڊسٽريءَ ۾ پير پاتو هو، هن هيل تائين تيلگو، تامل، هندي، ڪانڊا، ڀوڄپوري، پنجابي ۽ ملايا ۾ ٺهندڙ لڳ ڀڳ 30 کان وڌيڪ فلمن ۾ ڪم ڪيو آهي. سندس بالي ووڊ ڊيبيو 2003ع ۾ بالي ووڊ دبنگ اسٽار سلمان خان سان پهرين فلم ”تيري نام“ ۾ ڪم ڪري قدم رکيو هو. ”تيري نام“ سال جي بهترين فلم جو ايوارڊ پڻ پنهنجي نالي ڪيو هو. فلم ۾ اداڪاريءَ تي ڀوميڪا کي زي سينيما ايوارڊ، فلم فيئر جو ”بيسٽ ڊيبيو“ ايوارڊ پڻ ڏنو ويو هو. ان کان پوءِ هن 2004ع ۾ اميتا بچن جي پٽ اڀيشيڪ بچن سان فلم ”رن“ ۾ به مرڪزي ڪردار نڀايو هو.

 

پاڪستان مخالف ڀارتي فلم ”فينٽم“ جي ملڪ ۾ نمائش روڪڻ جو حڪم

لاهور (شوبز نيوز) لاهور هاءِ ڪورٽ پاڪستان مخالف ڀارتي فلم ”فينٽم“ جي ملڪ ۾ نمائش روڪڻ جو حڪم ڏئي ڇڏيو. خابرو ادارن جي رپورٽ موجب ڀارتي فلم ”فينٽم“ جي ملڪ ۾ نمائش تي لاهور هاءِ ڪورٽ پابندي لڳائيندي جماعة الدعوه جي امير حافظ سعيد جي درخواست تي فيصلو محفوظ ڪري ڇڏيو. درخواست ۾ مؤقف اختيار ڪيو ويو هو ته ڀارتي فلم پاڪستان خلاف نفرت ڏياريندڙ ۽ چڙ ڏياريندڙ مواد تي ٻڌل آهي، جنهن ۾ پاڪستان جي خلاف خراب پروپئگينڊا ڪندي ملڪ خلاف جذبات ڀڙڪائڻ جي شرمناڪ ڪوشش ڪئي وئي آهي. درخواست جي ٻڌڻي جسٽس شاهد بلال تي ٻڌل لاهور هائيڪورٽ جي بينچ ڀارتي فلم جي نمائش تي پابندي لاءِ جماعة الدعوه جي امير حافظ محمد سعيد پاران داخل ڪيل درخواست جي ٻڌڻي ڪئي. ان موقعي تي پٽيشنر جي وڪيل اي ڪي ڊوگر ايڊووڪيٽ ٻڌايو ته ڀارتي فلم پاڪستان ۽ اسلام جي خلاف آهي، فلم ۾ پٽيشنر حافظ سعيد جي ڪردار ڪشي ڪئي وئي آهي. هن شڪ ظاهر ڪيو ته ان فلم جي پاڪستان ۾ نمائش وڳوڙ پکيڙيندي. وفاقي حڪومت طرفان عدالت کي ٻڌايو ويو ته ان فلم جي پاڪستان ۾ نمائش جي اجازت لاءِ درخواست ناهي ملي ۽ درخواست کان سواءِ اين او سي جاري نه ٿي ڪري سگهجي. ڌرين جا دليل ٻڌڻ کان پوءِ عدالت درخواست تي ٻڌڻي مڪمل ڪندي فيصلو محفوظ ڪندي پاڪستان ۾ ”فينٽم“ جي نمائش تي پابندي هڻي ڇڏي.

 

ريحام خان جي پهرين فلم ”جنان“ جو پوسٽر جاري

ڪراچي (شوبز نيوز) عمران خان جي گھر واري ريحام خان جي پهرين فلم ”جنان“ جو پوسٽر جاري ڪيو ويو آهي، صحافت، سياست ۽ هاڻي فلم نگريءَ ۾ قدم، ريحام خان جي صلاحيتن جو چِٽو ثبوت آهي. فلم ”جنان“ ۾ پاڪستان جي ثقافت، خوبصورتي ۽ ملڪ جي ڪيترن ئي خوشگوار طرفن کي اجاگر ڪيو ويو آهي، جڏهن ته فلم جي عڪسبندي اترين علائقن ۾ ڪئي ويندي. فلم ”جنان“ جي مرڪزي ڪردارن ۾ بلال اشرف، ارمينا رانا خان، علي رحمان خان سميت ڪيترائي ڄاتل سڃاتل اداڪار شامل آهن. اظفر جعفريءَ جي هدايتڪاريءَ ۾ ريحام خان ۽ عمران رضا ڪاظمي جي سيڙپ سان ٺهندڙ فلم ”جنان“ ايندڙ سال رليز ڪئي ويندي.

 

پي سي بي سلمان بٽ ۽ محمد آصف کي ڊوميسٽڪ ۽ ٽي ٽوئنٽي سميت ڪنهن به فارميٽ واري ڪرڪيٽ کيڏڻ کان روڪي ڇڏيو

لاهور (اسپورٽس نيوز) پاڪستان ڪرڪيٽ بورڊ اسپاٽ فڪسنگ ڪيس ۾ ملندڙ سزا کان گذريل ڏينهن رعايت ملندڙ رانديگرن سلمان بٽ ۽ محمد آصف کي ڊوميسٽڪ ۽ ٽي ٽوئنٽي سميت ڪنهن به فارميٽ واري ڪرڪيٽ کيڏڻ کان روڪي ڇڏيو آهي. خابرو ادارن جي رپورٽن موجب گذريل ڏينهن آءِ سي سيءَ طرفان ٻنهي رانديگرن تي لڳل پابنديءَ جا 5 سال مڪمل ٿيڻ تي هٽائي وئي هئي، جنهن کان پوءِ لاهور سٽي ڪرڪيٽ ايسوسئيشن سلمان بٽ ۽ محمد آصف کي ٽيم ۾ شامل ڪرڻ جو اعلان ڪيو هو. پي سي بي ذريعن جو چوڻ هو ته عملدارن لاهور ڪرڪيٽ ايسوسئيشن کي ٻنهي رانديگرن کي ٽيم ۾ شامل ڪرڻ کان روڪي ڇڏيو آهي، جڏهن ته ٻنهي رانديگرن کي به حڪم ڏنو ويو آهي ته جيستائين پي سي بي عملدار ٻنهي رانديگرن جي کيڏڻ يا نه کيڏڻ بابت باقاعدي فيصلو نه ڪري ان وقت تائين ڪنهن به ٽيم طرفان کيڏڻ کان پرهيز ڪئي وڃي. ٻئي طرف سلمان بٽ جو ميڊيائي نمائندن سان ڳالهه ٻولهه دوران چوڻ هو ته پابندي هٽائڻ ۾ پي سي بيءَ تمام گھڻو ساٿ ڏنو ۽ هاڻي ماضيءَ کي وساري پاڪستان جي لاءِ ڪرڪيٽ کيڏڻ چاهيان ٿو. ڊوميسٽڪ ۾ پنهنجي راند جي ڏڍ تي واپس اچڻ چاهيان ٿو، سندس چوڻ هو ته نوجوان رانديگرن کي اسان کان سبق سکڻ گھرجي جيئن ان قسم جي مسئلن سان منهن نه ڏيڻو پوين. واضح رهي ته 2010ع ۾ انگلينڊ خلاف ٽيسٽ ميچ ۾ اسپاٽ فڪسنگ جي الزام ۾ ان وقت جي ٽيسٽ ڪپتان سلمان بٽ تي 10 سال، محمد آصف تي 7 سال ۽ محمد عامر تي 5 سال پابندي هنئي وئي هئي.

 

شعيب ملڪ ملڪي ڪرڪيٽ ٽيم ۾ ڪاميابيءَ جو ڪريڊٽ ثانيه مرزا کي ڏئي ڇڏيو

ڪراچي (اسپورٽس نيوز) پاڪستان ڪرڪيٽ ٽيم جي آل رائونڊر شعيب ملڪ ملڪي ڪرڪيٽ ٽيم ۾ ڪاميابيءَ جو ڪريڊٽ ثانيه مرزا کي ڏئي ڇڏيو. شعيب ملڪ چيو ته اهڙو به وقت ايندو آهي جڏهن توهان جا خيالن ۽ احساسن بابت ٽيم ۾ ڪنهن سان ڳالهائي نه ٿا سگھو، ان دوران مان ثانيه مرزا جو ساٿ ملڻ تي پاڻ کي ڪافي خوش قسمت سمجھيو. مان هن سان رانديگر طور خيالن جي ڏي وٺ ڪندو آهيان ۽ سٺيون صلاحون وٺندو آهيان. مان ڄاڻان ٿو ته هو ڪيتري سخت محنت ڪندي آهي. ان شيءَ مون کي ڪرڪيٽ ۾ فائدو پهچايو ۽ مان پاڪستاني ٽيم ۾ ڪاميابيءَ سان ڪم بيڪ ڪيو.

 

برطانيا جو ٽينس اسٽار اينڊي مري آئس ڪريم وڪڻڻ شروع ڪري ڇڏي

سنسناٽي (اسپورٽس نيوز) برطانيا جو ٽينس اسٽار اينڊي مري آئس ڪريم وڪڻڻ شروع ڪري ڇڏي آهي. ڪجھه ڏينهن اڳ راجرز ڪپ فائنل ۾ نوواڪ جوڪووچ کي هارائيندڙ اينڊي مري هِن وقت سنسناٽي اوپن جي لاءِ اُتي موجود هو، عالمي نمبر 2 ٽينس اسٽار هڪ آئس ڪريم پالر ۾ سيلز مين جو روپ ڌاري مٿي تي وگ هڻي ان مٿان ٽوپي پائي عينڪ پڻ لڳائي هئي، پر ان باوجود سندس اصل شڪل گھڻي بدليل نظر نه آئي. اينڊي مري ان روپ سان پنهنجي تصوير سوشل ميڊيا تي به شيئر ڪئي.

 

اسپاٽ فڪسرن جي واپسي تي پاڪستاني ڪرڪيٽ برادري ورهاست جو شڪار

لاهور (اسپورٽس نيوز) آءِ سي سيءَ ته سلمان بٽ، محمد آصف ۽ عامر تي اسپاٽ فڪسنگ جي ڪري مڙهيل پابندي هٽائڻ جو اعلان ڪري ڇڏيو آهي پر ٽنهي رانديگرن جي ملڪي ٽيم ۾ واپسي جي مامري تي پاڪستاني ڪرڪيٽ برادري ان مامري تي ونڊ ورهاست جو شڪار ٿي ويا آهن. ملڪي ٽيم جي اڳوڻي ڪپتان راشد لطيف ان مامري تي ڳالهائيندي چيو ته اهڙي ڪنهن به قدم جي سخت خلاف آهي. مان هنن جي عالمي ڪرڪيٽ ۾ واپسي جي حمايت نه ڪندس ۽ اهو به ته هو ڪنهن به اهڙي رانديگر جي جاءِ والارين جيڪو شايد سندن صلاحيت جيترو نه هجي پر ان ڪا غير اخلاقي حرڪت ناهي ڪئي ۽ نه ئي هو گھوٻين ۾ ملوث آهي. ان سان گڏوگڏ ملڪي ٽيم جي چيف سليڪٽر طور ڪم ڪندڙ محسن حسن خان به عامر، آصف ۽ سلمان بٽ جي ملڪي ٽيم ۾ واپسي جي سخت مخالفت ڪئي هن چيو ته ٽنهي يقينن پنهنجي سزا پوري ڪئي آهي، پر منهنجي خيال ۾ پنهنجي ملڪ طرفان کيڏندي ميچ کي وڪڻڻ يا فڪس ڪرڻ تمام وڏو ڏوهه آهي، ايئن ڪندڙ ٻيهر رحم جي لائق ناهن هوندا. اڳوڻي ڪپتان ۽ ڪامينٽريٽر رميز راجا چيو ته موجوده ٽيم جي رانديگرن کان به پڇيو وڃي ته ڇا هو عامر سان کيڏڻ پسند ڪندا. ڪو به پاڪستاني رانديگر ۽ مصباح پاڪستان جي اميج کي وڏين محنتن کان پوءِ بهتر ڪيو آهي، جيڪو اهڙن رانديگرن کي کيڏائي سندن محنت تي پاڻي ڦيرڻ لائق هوندو. انهن سميت جاويد ميانداد، محمد يوسف، باسط علي، عامر سهيل ۽ ٻين پڻ ”اسپاٽ فڪسرن“ جي ملڪي ٽيم ۾ واپسيءَ تي سخت ڳڻتيءَ ۽ کٽڪن جا اظهار ڪيا.

 

ڪارو ڪاري جهڙي ڪڌي رسم جو خاتمو آندو وڃي…!

 

ڏهرڪيءَ ۾هڪ هفتو اڳ رانوتي ٿاڻي جي حد ڳوٺ چڪ شهبازپور ۾ ٽي جريب زمين ۽ چئن دڪانن جي تڪرار تان پسند جو پرڻو ڪندڙ ٻن ڀينرن مائي مريم زال عبدالحميد لاڙڪ ۽ مائي جميلان زال عبدالحفيظ لاڙڪ کي ڪارنهن جو الزام لڳڻ بعد لاڙڪ برادري جي سردار گل حسن لاڙڪ وٽ سام طور رکيو ويو آهي. ان ڏس ۾ نارين جي پيءُ اربيلو لاڙڪ صحافين کي ٻڌايو ته ڳوٺ چڪ شهباز پور ۾ زرعي زمين ۽ دوڪان آهن، جڏهن ته منهنجي ڌيئرن جميلان ۽ مائي مريم تي منهنجي نياڻين جي سهري ۽ منهنجي ڀاءُ عبدالمجيد لاڙڪ زور ڀريو ته هو منهنجي ملڪيت منهنجي نالي تان ڦيرائي پنهنجي سهري جي نالي تي کاتو ڪرائي ڏين، جن پاران انڪار ڪرڻ تي منهنجي ٻنهي ڌيئرن جي مڙسن هنن مٿان وحشياڻو تشدد ڪيو ۽ کين گهران نيڪالي ڏئي ڇڏي، جنهن بعد منهنجي ٻنهي ڌيئرن مون وٽ پهچي مونکي پاڻ مٿان ٿيندڙ ظلمن جو ٻڌايو. هن چيو ته اهڙي واقعي بعد منهنجي هڪ ڄاٽي عبدالحميد منهنجي ڌي مائي مريم مٿان ناحق ڪارنهن جو ڪوڙو الزام ڏئي کيس قتل ڪرڻ جي ڪوشش ڪئي، ان دوران منهنجي ٻنهي ڌيئرن پاڙي وارن جي مدد سان رانوتي ٿاڻي تي پهچي پناهه ورتي، جنهن بعد رانوتي پوليس نارين جي مامي ارباب علي کي ٿاڻي تي گهرائي منهنجي ٻنهي ڌيئرن کي ان جي حوالي ڪيو. هن وڌيڪ ٻڌايو ته منهجون ٻئي ڌيئر ٽي ڏينهن دربدر هيون، جنهن بعد مان پنهنجي نياڻين کي پنهنجي گهر وٺي آيس ته منهنجي ڀائرن عبدالمجيد لاڙڪ قربان لاڙڪ ۽ منهنجي ڄاٽن منهنجي گهر تي ٻيهر حملو ڪري منهنجي ٻنهي ڌيئرن کي ڪارنهن الزام هيٺ قتل ڪرڻ جي ڪوشش ڪئي ته پاڙي وارن جي بروقت پهچڻ تي منهنجو ٻئي ڌيئرون قتل ٿيڻ کان بچي ويون، جنهن بعد مون ٻنهي نياڻين کي لاڙڪ برادري جي سردار گل حسن لاڙڪ وٽ سام طور پهچايون آهن هوڏانهن ٻنهي نارين مريم ۽ مائي جميلان صحافين کي ٻڌايو ته اسان ٻنهي ڀينرن هڪ مهينو اڳ عبدالحميد ۽ عبدالحفيظ لاڙڪ سان پسند جو پرڻو ڪيو، پسند جي پرڻي بعد اسان کي مڙسن  چيو ته اسان پنهنجي پيءِ جي ملڪيت هنن جي پيءُ جي نالي تي کين کاتو ڪرائي حوالي ڪرائي ڏيون،  اسان جي انڪار ته هنن اسان مٿان ڪارنهن جو ڪوڙو الزام مڙهي قتل ڪرڻ جي ڪوشش ڪئي، هنن چيو ته اسان جي زندگين کي خطرو آهي، تحفظ ۽ انصاف فراهم ڪيو وڃي .