تازيون خبرون

Daily Archives: August 20, 2015

ناڪاري ڪردارن ۾ مزو وڌيڪ ۽ داٻي وارو ڪردار هوندو آهي: سنڌي اداڪاره جوهي چاولا

ممبئي (شوبز نيوز) بالي ووڊ تي ٻن ڏهاڪن تائين راڄ ڪندڙ سنڌي اداڪارا جوهي چاولا چيو آهي ته ناڪاري ڪردارن ۾ مزو وڌيڪ ۽ داٻي وارو ڪردار هوندو آهي، ان ڪري هاڻي ناڪاري ڪردار ڪرڻ ئي پسند ڪنديس، بالي ووڊ ۾ هاڪاري ۽ صاف شخصيت رکندڙ اداڪارا سال 2014ع جي ”گلاب گينگ“ ۾ سمرتا ديوي جو ناڪاري ڪردار ڪري هڪ نئين سڃاڻپ پڻ ٺاهي هئي. هن چيو ته سمرتا ديوي وارو ڪردار ڪندي تمام گهڻو مزو آيو ۽ ان ڪري ناڪاري ڪردارن سان ڄڻ ته پيار ٿي پيو آهي ۽ هاڻي هاڪاري ڪردار نه ڪرڻ تي زور هوندو، سندس موجب 20 سالن تائين سڌي ناري طور ڄاتو ويو پر هاڻي مٺو ۽ پيار وارو ڪردار نه پر خطرناڪ، شاطر ۽ ڏنگي عورت وارو ڪردار ڪنديس

 

دپيڪا پڊڪون جي تمام گهڻي تعريف ٻڌي آهي : نريانا مرٿي

ممبئي (شوبز نيوز) ڀارت جي مشهور ڪمپني انفوسيز جي گڏيل باني ۽ مالڪ نريانا مرٿي چيو آهي ته هن دپيڪا پڊڪون جي تمام گهڻي تعريف ٻڌي آهي ۽ کيس هن تي فخر آهي، سندس موجب نوجوان جڏهن پنهنجي لاءِ ڪو آئيڊيل چونڊين ته احتياط کان ڪم وٺن، ممبئي جي مقامي ڪاليج جي شاگردن کي خطاب ڪندي سندس چوڻ هو ته دپيڪا پڊوڪون سخت محنت ڪري بالي ووڊ ۾ هڪ وڏو مقام ٺاهيو آهي ۽ هن وقت هو ڪروڙين ڀارتين جي دلين تي راڄ ڪري ٿي. نريانا موجب شاگردن کي پنهنجي زندگيءَ ۾ ڪو مثالي ڪم ڪرڻو آهي يا وري ڪامياب زندگي بڻائڻي آهي ته دپيڪا کي پنهنجو آئيڊيل سمجهن ۽ ان وانگر محنت ڪن. هن چيو ته رنگيني واري دنيا ۾ ديانت، محنت ۽ ايمانداري سان پنهنجي هر ڪم کي پاڙي دپيڪا پڊڪون ثابت ڪيو ته محنت سان هر شئي حاصل ڪرڻ کي ممڪن بڻائي سگهجي ٿو

 

عاليه ڀٽ ۽ سڌارٿ ملهوترا وچ ۾ هڪ ڀيرو ٻيهر ويجھڙايون

ممبئي (شوبز نيوز) بالي ووڊ ۾ پنهنجي بهادراڻي اداڪاري جي ڪري مشهور اداڪارا عاليه ڀٽ ۽ سڌارٿ ملهوترا وچ ۾ هڪ ڀيرو ٻيهر ويجھڙايون وڌي ويون آهن، سڌارٿ ملهوترا ۽ عاليه ڀٽ جي رومانس جون خبرون هر زبان تي عام آهن جڏهن ته ٻنهي اداڪارائن کي ڪيترن ئي هنڌن تي گڏ پڻ ڏٺو ويو آهي. اهو ئي نه پر ٻئي اداڪار اڪثر ڪري فلمي سيٽ تي به ملاقاتون ڪندي نظر ايندا آهن، پر هِن جوڙي پنهنجن لاڳاپن بابت ڪجھه واضح ناهي ڪيو. اڪشي ڪمار ۽ سڌارٿ جي فلم ”برادرز“ جي اسپيسل اسڪريننگ ۾ ٻنهي گڏ شرڪت ڪئي، جڏهن ته سڌارٿ کي روئيندو ڏسي عاليه کان به ڳوڙها وهي ويا ۽ هنن فلم جي پڻ ڏاڍي تعريف ڪئي. عاليه ڀٽ بابت خبرون پڻ آهن ته هن سڌارٿ جي خاندان وارن سان ڪافي وقت گڏ گذاريو ۽ ڊنر پڻ ڪيو.

 

سلمان خان سان ڪم ڪندي تمام گهڻو مزو آيو ۽ هو هڪ تمام سٺو تجربو رهيو: سونم ڪپور

ممبئي (شوبز نيوز) بالي ووڊ جي ڪپور خاندان جي لاڏلي اداڪارا سونم ڪپور چيو آهي ته کيس سلمان خان سان ڪم ڪندي تمام گهڻو مزو آيو ۽ هو هڪ تمام سٺو تجربو رهيو. 2007ع  ۾ سانوريا ذريعي سلمان، راني مکرجي ۽ رنبير ڪپور سان گڏ بالي ووڊ ۾ انٽري ڏيندڙ سونم ڪپور هڪ ڀيرو ڪجهه سالن کان پوءِ سونم سلمان خان سان مين رول ۾ نظر ايندي، ميلورن جي شو ۾ صحافين سان ڳالهائيندي سونم چيو ته ڪيترن ئي سالن کان پوءِ به بالي ووڊ ۾ ساڳي حيثيت ۾ ڪم ڪيان پئي ۽ ڪا وڏي تبديلي ناهي آئي. فيشن بابت ڳالهائيندي سندس چوڻ هو ته اهو مسئلو ناهي ته ڪهڙو ٿا فيشن ڪيو ۽ ان بابت ٻين جي راءِ ڪا وڏي اهميت ناهي هوندي، هن چيو ته اها اسان ڀارتين جي روايت آهي ته اسان امڙ، سس، ڀاءُ، مڙس ۽ دوست کي خوش ڪرڻ لاءِ انهن جي پسند جو فيشن يا سينگار ڪنديون آهيون.

 

ايٿيليٽڪ بلبائوءَ اسپينش سپر فٽبال ڪپ جو ٽائيٽل کٽي ورتو

بار سلونا (اسپورٽس نيوز) ايٿيليٽڪ بلبائوءَ اسپينش سپر فٽبال ڪپ جو ٽائيٽل کٽي ورتو. فاتح ٽيم فيصلائتي مرحلي ۾ بارسلونا کي ايگريگيٽ اسڪور 1-5 گولن تان هارائي 31 سالن کان پوءِ پهرين ٽرافي کٽڻ جو اعزا پڻ ماڻيو. ٻنهي ٽيمن وچ ۾ سيڪنڊ ليگ ميچ 1-1 گول سان برابريءَ تي ختم ٿي، پر فرسٽ ليگ ۾ 4-0 گولن جي سرسي جي ڪري ايٿيلٽ بلبائو ٽائيٽل پنهنجي نالي ڪيو. ايوينٽ جي سلسلي ۾ کيڏيل فائنل ۾ ايٿيليٽڪ بلبائو ۽ بارسلونا وچ ۾ سخت مقابلو ڏسڻ لاءِ مليو. ڪيترين ئي سخت ڪوششن باوجود ٻئي ٽيمون فيصلائتو گول ڪري نه سگھيون ۽ ميچ 1-1 سان برابريءَ تي ختم ٿي، ميچ برابر به بلبائو جي حق ۾ بهتر رهيو ۽ هُن بارسلونا جي ايگريگيٽ پوائنٽن تي 1-5 گولن تان هارائي ٽائيٽل کٽڻ جو اعزاز ماڻيو.

 

انگلينڊ ۽ آسٽريليا جي ٽيمن وچ ۾ پنج ميچن تي ٻڌل سيريز جي پنجين ۽ آخري ٽِيسٽ 20 تاريخ تي رٿيل

ناٽنگھم (اسپورٽس نيوز) انگلينڊ جي فاسٽ بالر اسٽيورٽ براڊ جو چيو آهي ته ٽيم جي سمورن رانديگرن ايشز سيريز جي آخري ٽِيسٽ ۾ ڪاميابي حاصل ڪرڻ لاءِ ڀرپور تياري ڪئي آهي ۽ هو گهڻو پراميدآهي، سيريز هڪ جي ڀيٽ ۾ چئن ميچن سان پنهنجي نالي ڪندا. انگلينڊ ۽ آسٽريليا جي ٽيمن وچ ۾ پنج ميچن تي ٻڌل سيريز جي پنجين ۽ آخري ٽِيسٽ 20 تاريخ تي رٿيل آهي. سيريز جي آخري ٽِيسٽ ميچ ۾ ڪاميابي حاصل ڪرڻ لاءِ انگلش ٽيم ڀرپور تياري ۾ رڌل آهي. تيارين واري سلسلي ۾ ٽيم جا سمورن رانديگرن فزيڪل فٽنس بعد نيٽ ۾ بيٽنگ ۽ بالنگ جي پريڪٽس ڪئي. فاسٽ بالر اسٽيورٽ براڊ جو چوڻ هوته هو ۽ ٽيم جي سمورا رانديگر گهڻا پراميد آهن ته سيريز ۾کين هڪ جي ڀيٽ چئن ميچن جي سرسي ملندي ۽ هو ان لاءِ ڀرپور تياري ڪري رهيا آهن.

 

گيل مونفلز سنسناٽي ماسٽرز ٽينس ٽورنامينٽ کان جي پهرئين ئي رائونڊ ۾ هارائجي ٻاهر ٿي ويو

سنسناٽي (اسپورٽس نيوز) فرانس جو گيل مونفلز سنسناٽي ماسٽرز ٽينس ٽورنامينٽ کان جي پهرئين ئي رائونڊ ۾ هارائجي ٻاهر ٿي ويو، آمريڪي شهر سنسناٽي ۾ هلندڙ ماسٽرز ايوينٽ جو پهريون رائونڊ فورٽين سيڊ فرانس جي گيل مونفلز جي لاءِ آخري ثابت ٿيو، فرينچ رانديگر پولينڊ جي جيري جانووچ کان اسٽريٽ سيٽن ۾ شڪست کائي ويو. پولش رانديگر پهريون سيٽ 6-4 سان کٽي هڪ ٻڙيءَ جي سرسي ماڻي، مونفلز ٻئي سيٽ ۾ ڪم بيڪ ڪيو ۽ سيٽ کي ٽاءِ بريڪ تائين کڻي ويو پر يانووچ 7-5 سان فتح پنهنجي نالي ڪئي.

 

آف اسپنر سعيد اجمل فيصل آباد کان پوءِ برطانيا ۾ به ڪرڪيٽ اڪيڊمي کولي ورتي

لنڊن (اسپورٽس نيوز) آف اسپنر سعيد اجمل فيصل آباد کان پوءِ برطانيا ۾ به ڪرڪيٽ اڪيڊمي کولي ورتي آهي. انگلينڊ ۾ افتتاحي تقريب ۾ اسٽار رانديگرن شرڪت ڪئي. ٽاپ ڪلاس اسپنر سعيد اجمل برطانيا ۾ ڪرڪيٽ اڪيڊميءَ جو افتتاح ڪري ڇڏيو. انگلينڊ ۾ ٿيندڙ تقريب ۾ ڪامران اڪمل، فواد عالم، رانا نويد الحسن سميت ڪيترن ئي اسٽار رانديگر شريڪ ٿيا. ان کان پهريان سعيد اجمل اڪيڊمي فيصل آباد ۾ به ڪم ڪري رهي آهي. سعيد اجمل جو چوڻ هو ته اڪيڊمي ڪرڪيٽ جي واڌاري ۾ اهم ڪردار ادا ڪندي

 

سنڌ ۽ پنجاب ۾ مڪاني چونڊون ڪرائڻ جو حڪم…!

 

سپريم ڪورٽ سنڌ ۽ پنجاب ۾ مڪاني چونڊن بابت اليڪشن ڪميشن جون ٻئي درخواستون اڪلائيندي چيو ته اليڪشن ڪميشن  جو ڪم تاريخون گهرڻ نه پر صوبن کي حڪم ڏيڻ آهي، ان ڪري اليڪشن ڪميشن مڪاني چونڊن جون تاريخون پاڻ طئي ڪري. چيف جسٽس آف پاڪستان جسٽس جواد ايس خواجا جي اڳواڻي ۾ 3 رڪني بينچ سنڌ ۽ پنجاب ۾ مڪاني چونڊن بابت ڪيس جي ٻڌڻي ڪئي. ان موقعي تي اليڪشن ڪميشن چونڊن ۾ ديرٿيڻ بابت 2 درخواستون پيش ڪيون، جنهن تي ٻڌڻي جي دوران جسٽس قاضي فائزعيسِيٰ رمارڪس ڏيندي چيو ته قلم 140 اي جي هيٺ مڪاني چونڊون ڪرائڻ اليڪشن ڪميشن جي آئيني ذميواري آهي پر هڪ آئيني ادارو چوي ٿو ته اهو پنهنجي ذميواري نڀائي نه پيو سگهي ۽ ٻين ادارن کي چيو پيو وڃي ته آئين جي ڀڃڪڙي جي اجازت ڏني وڃي، جيڪڏهن اليڪشن ڪميشن پنهنجي آئيني ذميواري پوري نٿي ڪري سگهي ته پنهنجن عهدن تان استعيفيٰ ڏئي ڇڏي.ٻڌڻي دوران اليڪشن ڪميشن جي وڪيلن موقف ڏنو ته مڪاني چونڊن لاءِ آئين جي هيٺ ذميواري ادا ڪرڻ لاءِ تيار آهيون پر عدالت واضع ڪري ته سنڌ ۽ پنجاب ۾ گذريل 6 سالن کان مڪاني ادارا موجود ئي نه آهن، جنهن تي جسٽس دوست محمد خان  ريمارڪس ڏنا ته قانون تحت مڪاني چونڊون 90 ڏينهن اندر ڪرائڻ ضروري آهن، سنڌ ۽ پنجاب ۾ حڪومتن بنا مڪاني چونڊون ڪرائڻ جي پنهنجو مدو پورو ڪيو ۽ هاڻوڪيون به حڪومتون پنهنجو اڌ وقت گذاري چڪيون آهن، ان ڪري اليڪشن ڪميشن جي ذميواري آهي ته مڪاني چونڊن کي يقيني بڻائي، اليڪشن ڪميشن جو ڪم تاريخون گهرڻ نه آهي پر صوبن کي تاريخن تي چونڊون ڪرائڻ جو حڪم ڏيڻ آهي. عدالت اليڪشن ڪميشن جي ٻنهي درخواستن کي اڪلائيندي حڪم ڏنو ته مڪاني چونڊن جي تاريخن بابت اليڪشن ڪميشن پاڻ فيصلو ڪري. چيف جسٽس جسٽس جواد ايس خواجه رمارڪس ڏيندي چيو ته سنڌ ۽ پنجاب ۾ ٻن مرحلن ۾ مڪاني چونڊون ڪرائي سگهجن ٿيون، جڏهن ته جسٽس قاضي فائز عيسيٰ رمارڪس ڏنا آهن ته عجيب لڳي رهيو آهي ته هڪ آئيني ادارو ٻئي آئيني اداري کي آئين جي خلاف ورزي جو چئي رهيو آهي، ان سان مون کي جهٽڪو لڳو آهي، آئين تي عملدرآمد ۾ هڪ منٽ به دير نه ڪنداسين، جسٽس دوست محمد خان رمارڪس ڏيندي چيو آهي ته ضياءُالحق مڪاني چونڊون ڪرائي بلدياتي نمائندن کي فنڊ به جاري ڪيا هئا، سڀني جي ان تي نظر آهي ۽ هاڻي ڪو ان کي شيئر ڪرڻ لاءِ تيار ناهي. اڳوڻين حڪومتن مڪاني چونڊون ڪرائڻ کان بغير پنهنجو مدو پورو ڪيو ۽ موجوده حڪومتون به اڌ مدو گذاري چڪيون آهن. اليڪشن ڪميشن عدالت کي ٻڌايو ته اليڪشن ڪميشن ٻوڏ ۽ ٻين مسئلن جي ڪري چونڊن ۾ ڪجهه دير چاهي ٿي ۽ موجوده تاريخن ۾ 30 سيپٽمبر تي چونڊون نٿيون ڪرائي سگهجن. جنهن تي عدالت صوبن جي ايڊووڪيٽ جنرلن کان پڇيو ته ڇا اهي مڪاني چونڊون ڪرائڻ لاءِ تيار ناهن، جنهن تي صوبائي لا آفيسرن چيو ته هو ان سلسلي ۾ تيار آهن ۽ اليڪشن ڪميشن سان مڪمل سهڪار ڪنداسين، جنهن تي جسٽس قاضي فائز عيسيٰ چيو ته عدالت اڳ ۾ ئي حڪم جاري ڪري چڪي آهي ۽ هاڻي ڪو غيرآئيني حڪم جاري نٿا ڪري سگهون، اليڪشن ڪميشن وڃي ۽ پنهنجون آئيني ذميواريون پوريون ڪري. ان دوران فاروق ايڇ نائيڪ ايڊووڪيٽ عدالت کي ٻڌايو ته مڪاني چونڊون نه ڪرائڻ آئين جي خلاف ورزي هوندي، چيف جسٽس چيو ته جڏهن صوبا مڪاني چونڊن لاءِ تيار آهن ته پوءِ اليڪشن ڪميشن ڇو نه پئي چونڊون ڪرائي.

 

ويڳاڻپ ۾ ورتل سنڌي سماج ۽ متبادل وارو سوال!؛مارئي سومرو

مُلڪ ۾ تيزيءَ سان تبديل ٿيندڙ سياسي منظرن سبب سنڌ جو عوام ڳنڀيرتا ۾ ورتل آهي، کين ڪو پتو ناهي ته سُڀاڻي ڇا ٿيڻ وارو آهي؟ ڪڏهن پي ٽي آءِ جو رُسامو آهي ته ڪڏهن ايم ڪيو ايم ڪاوڙ مان وَر کُنجيو بيٺل ڏسجي ٿي. جڏهن ته پيپلز پارٽيءَ تي خاموشي طاري آهي. خبر ناهي اُهي ڪنهن صدمي جو شڪار آهن يا خاموش رهڻ سندن مجبوري آهي. ڪجهه به هُجي، جنهن قسم جون ڪرپشن ڪهاڻيون ٻُڌڻ ۾ اچن ٿيون، تنهن عام کي تمام گهڻو مايوس ڪري وڌو آهي، سندن انهيءَ مايوسيءَ ۾ ويتر اضافو اِها ڳالهه ڪري رهي آهي ته پارٽيءَ جي قيادت حالتن کي مُنهن ڏيڻ بجاءِ وڃي دبئيءَ جا وڻ وسايا آهن.

سنڌي ماڻهن جو آواز سڏي ويندڙ شهيدن جي پارٽي اڄ جنهن زوال جو شڪار آهي، تنهن جو شايد ضياءَ الحق به تصور نه ڪيو هُجي! انهيءَ زوال سببان سنڌي ماڻهوءَ جي حالت ميلي ۾ وڃايل ڪنهن اهڙي ٻارڙي جيان آهي، جنهن جي هٿ مان سهاري واري چيچ ڇڏائجي وئي هُجي ۽ هُو وائڙو ٿي ميلي جون رنگينيون ڏسندو هُجي.

اِها ڪيڏي نه حيرت جي ڳالهه آهي ته ڪراچيءَ جي امن جي ڳالهه هجي يا اُن جي وارثيءَ واري حق جي، سنڌي ماڻهوءَ جو ڪٿي پاڇو به نظر نه ٿو اچي. ڪي پي ڪي سان تعلق رکندڙ ماڻهو ته ڪراچيءَ جي حالتن تي بحث ۾ حصو وٺن ٿا، پر ڪراچيءَ جي حقيقي وارثن کان ڪو پُڇڻ جي ضرورت ئي محسوس نه ٿو ڪري. جنهن سبب سنڌ ماڻهوءَ جي ويڳاڻپ انتهائن تي پهتل آهي. هنن گذريل چئن ڏهاڪن کان جنهن نظريي سان پاڻ کي سلهاڙي رکيو، جنهن نظريي خاطر هُو جيئڻ مرڻ لاءِ تيار هوندو هو، سو ڪرپشن جي ٻوڏ ۾ اهڙو ته لڙهيو آهي جو اُهو هاڻ ڪنهن معجزي سان ئي واپس وري سگهي ٿو! ڪرپشن واري انهيءَ ٻوڏ کانپوءِ ڏسڻو اِهو آهي ته سنڌي ماڻهو پاڻ کي اُن معجزي جي آسري تي رکي ٿو يا ڪنهن متبادل جي تلاش ڪري ٿو؟ جيتوڻيڪ متبادل جي حوالي سان به ڪا اُميد نظر نه ٿي اچي، جو سماج جڏهن مايوسين جي ڪوهيڙي ۾ وٺجي ويندا آهن ته روشنيءَ جو ڪو به ڪرڻو اُنهن کي نظر ناهي ايندو. لڳ ڀڳ اهڙي ئي صورتحال آهي سنڌي ماڻهن جي. ڪنهن وقت ۾ سنڌ اندر قومپرست ڌرين کي پيپلز پارٽيءَ جو متبادل تصور ڪيو ويندو هو، پر موجوده حالتن ۾ قومپرست ڌريون به تيزيءَ سان زوال پذير ٿي رهيون آهن. جي ٿوريون گهڻيون پارٽيون عمل ۾ آهن به ته اُنهن جي سڄي سياست جو محور پنهنجي وجود جي بقا ئي وڃي رهيو آهي. اُهي نه ته سماج ۾ اُتساهه جو سبب رهيون آهن، نه ئي اُنهن جي ڪنهن تحرڪ سان رياست تي ڪو اثر پوي ٿو. بلڪه انهيءَ سحر جي صحرا ۾ ڪيترائي ڳڀرو نوجوان اسان کان وڃائجي ويا. جن جي پونئيرن کان پارٽي قيادتون خير خيريت به معلوم نه ٿيون ڪن. اهڙو ئي مشاهدو مون کي ڪجهه ڏينهن پهريان خان محمد چانڊئي جي ٻارڙن کي ڏسي ٿيو. خان محمد مزدور طبقي جو ماڻهو هو، قومپرست تنظيمن سان تعلق سبب کانئس مزدوريون به هليون ويون ۽ هُو سال سوا اڳ بيماريءَ وگهي لاڏاڻو ڪري ويو. اڄ سندس ٻارڙن جي حالت انتهائي رحم جوڳي آهي، جيڪا لفظن ۾ بيان نٿي ڪري سگهجي.

چوڻ جو مطلب ته اسان جون قومپرست ڌريون ماڻهن ۾ اُها ساک ٺاهڻ ۾ بنهه ناڪام ويون آهن، جهڙي شهري تنظيمن پنهنجي بيشمار غلطيون باوجود جوڙي ورتي آهي. بلڪه حقيقت هيءَ آهي ته قومپرست ڌرين هيستائين فقط سحر جي سهاري گاڏو پئي گهليو آهي، اُنهن عام ماڻهن جي ڀلائي ۽ بهتريءَ لاءِ ڪي اهڙا ساراهه جوڳا قدم ناهن کنيا، جن جي بنياد تي هُو ڪو متبادل بڻجي سگهن ها. هتي متبادل مان مراد سنڌي ماڻهن جي گڏيل اظهار جو پليٽ فارم آهي، نه ڪي ووٽ واري سياست!

اشوز تي جيئندڙ ڌريون گهڻو جٽاءُ ناهن ڪري سگهنديون! اِهوئي ڪجهه اسان کي هتي ڏسڻ ۾ اچي پيو. جيڪڏهن حالتن پٽاندر قومپرست ڌريون پاڻ ۾ تبديلي آڻين ها ۽ ماڻهن جي بنيادي مسئلن کي حل ڪرائڻ وارن مرحلن ۾ سندن ساٿ ڏين ها ته شايد اڄ هن قحط جو مُنهن ڏسڻو نه پوي ها. پر ان معاملي ۾ سدائين ضد کان ڪم ورتو ويو، جنهن جو فائدو پيپلز پارٽي خوب نموني کنيو آهي ۽ اڄ سوڌو اُها کڻندي رهي ٿي. بلڪه متبادل نه هُجڻ ڪري احساسِ برتريءَ جو ايترو ته شڪار آهي جو سنڌ جون ٻنيون ٻيٽ کپائڻ هُن لاءِ ڪو مسئلو ئي ناهي. ظاهر آهي جڏهن ڪو روڪڻ ٽوڪڻ وارو ناهي هوندو ته پوءِ ائين ئي ٿيندو آهي. جيتوڻيڪ پيپلز پارٽيءَ جي اڳوڻي دؤر ۾ ڪنهن حد تائين سنڌ جي ماڻهن پنهنجي ردعمل جو اظهار ڪيو هو، پر هن ڀيري واري خاموشي سمجهه کان ٻاهر آهي.

جيڪڏهن پيپلز پارٽيءَ جي گذريل ستن سالن واري دؤر جو جائزو وٺبو ته انهن ستن سالن ۾ سنڌي ماڻهن کي تمام گهڻو نقصان رسيو آهي، کانئن شهر ته اڳ ئي ڦُرجي چُڪا هئا، هاڻ ٻهراڙيون به اُنهن جي هٿن مان واريءَ جيان کسڪنديون وڃن پيون، جو ڌاريءَ آباديءَ ٻهراڙين توڙي ننڍن شهرن جو رُخ ڪيو آهي. اِئين محسوس ٿي رهيو آهي ته سنڌ جي ٻهراڙين تي هاڻ ڌارين آبادين جو ڪڙو چڙهي چُڪو هجي. هڪ طرف اِها صورتحال آهي ته ٻئي طرف سنڌ جي ساڃاهه رُڃ ۾ تبديل ٿي وئي آهي، ساڃاهه وندن کي مصلحتن ماري وڌو آهي ۽ اُهي پنهنجي عيش عشرت واري زندگيءَ جي خمارن ۾ ورتل آهن، اُنهن کي سنڌ يا سنڌي ماڻهو ياد ناهن. اهڙي صورت ۾ وهم وسوسا فطري هُجن ٿا، جيڪي مون سميت هزارين ذهنن کي مايوسيءَ جي ڪُن ڏانهن ڌڪيندا رهن ٿا. تڏهن سوال ٿو اُڀري ته ڇا هيءُ وهنوار اِئين ئي جاري رهندو، ڪا تبديلي، ڪو تحرڪ يا متبادل سنڌي ماڻهن جي نصيب ۾ ڪڏهن به نه ايندو؟ جي ايندو ته ڪهڙيءَ ريت ۽ ڪيئن؟ انهن سوالن تي ويچارڻ لاءِ پڙهندڙن کي موقعو ڏجي ٿو.