تازيون خبرون

Daily Archives: August 20, 2015

مائينس الطاف حسين فارمولي جي ڳالهه حڪومت ناهي ڪئي: چوڌري نثار

منڊي بهاءَ الدين(م.ڊ) وفاقي گهرو وزير چوڌري نثار، دهشتگرديءَ خلاف جاري جنگ هر حال ۾ کٽڻ جو عزم ورجائيندي چيو آهي ته شجاع خانزادي تي حملي ۾ ملوث دهشتگردن جو پتو پئجي ويو آهي، جلد کين انجام تي پهچايو ويندو، مائينس الطاف حسين فارمولي جي ڳالهه حڪومت طرفان ناهي ڪئي وئي. منڊي بهاءُ الدين ۾ ميڊيا سان ڳالهائيندي چوڌري نثار چيو ته شجاع خانزادي تي حملو ڪندڙ جوابدار نشاني تي آهن، سرڪار رڳو جاچ مڪمل ٿيڻ جو انتظار ڪري رهي آهي. گهرو وزير چيو ته شجاع خانزادو بهادر انسان هو ۽ سڪيورٽي حاصل ڪرڻ لاءِ ڪنهن جو به پابند نه هو، پنهنجي ڳوٺ جي ماحول موجب پاڻ سان سڪيورٽي گهٽ رکندو هو. چوڌري نثار چيو ته اٽڪ واقعي کانپوءِ قوم وڌيڪ متحد ٿي وئي آهي، ڌماڪي ۾ ملوث دهشتگردن کي هر صورت ۾ انجام تائين پهچايو ويندو. ان کان اڳ منڊي بهاءُ الدين ۾ ئي پنجاب رينجرز جي 30هين پاسنگ آئوٽ پريڊ کي خطاب ڪندَي وفاقي گهرو وزير چوڌري نثار چيو ته پاڪستان بيشمار مسئلن کي منهن ڏئي رهيو آهي، جن ۾ سلامتي، امن امان ۽ دهشتگردي نمايان آهن. هـُن چيو ته پاڪستان جو دشمن ڊڄڻو ۽ بي اصولو آهي، جيڪو هڪ طرف ٺاهه جي ڳالهه ڪري ٿو ته ٻئي طرف ورڪنگ بائونڊري آبادي کي نشانو بڻائي ٿو. چوڌري نثار چيو ته ڪجهه ماڻهو اسلام جَي نالي تي ملڪ ۾ ڏڦيڙ پيدا ڪرڻ گهرن ٿا، جن جو قوم کي ڄمي مقابلو ڪرڻو آهي، عورتن ۽ معصوم ٻارڙن کي قتل ڪندڙ ڪهڙي قسم جا مسلمان آهن. گهرو وزير چيو ته پاڪستان جو هڪ دشمن ظاهر ۽ ٻيو لڪل آهي، لڪل دشمن جو مقابلو ڪرڻ ايترو آسان ناهي جيترو عام ماڻهو سمجهن ٿا. چوڌري نثار عزم ورجائيندي چيو ته دهشتگردي خلاف جاري جنگ هارائڻ جو سوال ئي پيدا نٿو ٿئي، اها هر حال ۾ کٽڻي آهي

 

عدالتن کي حدون ارنگهڻ جو احساس ڏياريندڙ پهريان آئين پڙهي وٺن: چيف جسٽس

اسلام آباد (بيورو) سـُپريم ڪورٽ، نيب ميگا ڪرپشن ڪيس ۾ ريمارڪس ڏيندي چيو آهي ته احتساب بيورو آئيني باڊي ناهي، حڪومت کي نيب خلاف ڪارروائي جو اختيار آهي، عدالتن کي حدون ارنگهڻ جو احساس ڏياريندڙ پهريان آئين پڙهي وٺن. چيف جسٽس، جواد ايس خواجه جي سربراهي ۾ سپريم ڪورٽ جي 3 رڪني بينچ نيب ميگا ڪرپشن ڪيس جي ٻڌڻي ڪئي.  ٻڌڻيءَ دوران جسٽس قاضي فائز عيسيٰ ريمارڪس سوال ڪيو ته نيب کي هر سال صدر کي رپورٽ پيش ڪرڻي آهي، ڇا ان تي عمل ٿئي پيو، نيب رپورٽ پڌر ڪئي ويندي آهي.؟ اٽارني جنرل عدالت کي ٻڌيو ته نيب جي قانون ۾ ترميم ڪئي پئي وڃي، جنهن تحت شروعاتي انڪوائري،  مڪمل جاچ ۽ چالان لاءِ ڌار ڌار ڊپارٽمينٽ ذريعي وڃي سگهندا. چيف جسٽس ريمارڪس ۾ چيو ته نيب آئيني باڊي ناهي، اهو قانوني طور ٺهيل آهي، حڪومت نيب خلاف ڪارروائي ڪري سگهي ٿي. چيف جسٽس ريمارڪس ۾ چيو ته بار بار عدالتن کي احساس ڏياريو پيو وڃي ته عدالتون حدون اورانگهي رهيون آهن،لڳي ٿو ته انهن آئين ناهي پڙهيو، جيڪڏهن حڪومت ڪجهه نه ڪندي ته اسان خاموش نه ويهنداسين.

 

مولانا فضل الرحمان، وزيراعظم کي ايم ڪيو ايم جي مطالبن کان آگاهه ڪري ڇڏيو

اسلام آباد(بيورو) جي يو آءِ سربراهه مولانا فضل الرحمان، وزيراعظم کي ايم ڪيو ايم جَي مطالبن کان آگاهه ڪري ڇڏيو، سندس چوڻ آهي ته متحده ڪراچي آپريشن جَي خلاف ناهي ۽ اهي مطالبا تسليم ٿيڻ جي صورت ۾ اسيمبلين ۾ واپس اچڻ لاءِ تيار آهن. پي ايم هائوس اسلام آباد ۾ جي يو آءِ سربراهه مولانا فضل الرحمان وزيراعظم ميان نواز شريف سان ملاقات ڪري متحده سان ٿيل ڳالهين بابت خيالن جي ڏي وٺ ڪئي. ملاقات دوران مولانا فضل الرحمان وزيراعظم کي متحده جي مطالبن بابت پڻ آگاهه ڪيو. وزيراعظم ميان نواز شريف سان ملاقات کانپوءِ ميڊيا سان ڳالهائيندي جي يو آءِ سربراهه مولانا فضل الرحمان چيو ته رشيد گوڊيل تي حملي سبب ڳالهين ۾ هڪ ڏينهن جي دير ٿي. هـُن چيو ته هر جماعت کي خدشا پيش ڪرڻ جو حق آهي، جڏهن ته ايم ڪيو ايم کي ڪراچي آپريشن تي ڪو به اعتراض ناهي. مولانا فضل الرحمان چيو ته متحده مطالبا تسليم ٿيڻ جي صورت ۾ استعيفائون واپس وٺڻ لاءِ هاڪاري رويو ڏيکاريو آهي، جڏهن ته ڳالهين جو ايندڙ مرحلو اسلام آباد ۾ ٿيندو. جي يو آءِ سربراهه چيو ته هو سياسي استحڪام لاءِ ڪوششون جاري رکندو….

 

اليڪشن ڪميشن سنڌ ۽ پنجاب ۾ مڪاني چونڊن جي پهرين مرحلي جي تاريخ تبديل ڪري ڇڏي

اسلام آباد (بيورو) اليڪشن ڪميشن، سنڌ ۽ پنجاب ۾ مڪاني چونڊن جي پهرين مرحلي جي تاريخ تبديل  ڪري ڇڏي آهي، جنهن تحت سنڌ جي 13  ۽ پنجاب جي ٻارنهن ضلعن ۾ پهرين مرحلي لاءِ پولنگ 12 آڪٽوبر تي ٿيندي.  چيف اليڪشن ڪمشنر جسٽس رٽائرڊ سردار رضا جي صدارت هيٺ اليڪشن ڪميشن جو اعليٰ سطحي اجلاس ٿيو. اجلاس ۾ سنڌ۽ پنجاب ۾ مڪاني چونڊن لاءِ تاريخ طئي ڪرڻ بابت سپريم ڪورٽ جي حڪم تي غور ڪيو ويو. اجلاس ۾ ٻنهي صوبن ۾ مڪاني چونڊن لاءِ پهرين مرحلي جي تاريخ تبديل ڪئي وئي. اليڪشن ڪميشن جي ترجمان موجب، سنڌ ۽ پنجاب ۾ مڪاني چونڊن لاءِ پهريون مرحلو 12 آڪٽوبر کان شروع ٿيندو. پهرين مرحلي ۾سنڌ جي 13 ۽ پنجاب جي ٻارنهن ضلعن ۾ مڪاني چونڊون ڪرايون وينديون، ان لاءِ نامزدگي فارم 28 آگسٽ کان پهرين سيپٽمبر تائين جمع ڪرائي سگهبا، جنهن بعد ڇنڊ ڇاڻ جو عمل شروع ٿيندو. اليڪشن ڪميشن موجب پهرين مرحلي ۾ حيدرآباد ڊويزن جي مٽياري، ٽنڊو الهيار، ٽنڊو محمد، خان، ٺٽو، سجاول، بدين، دادو، ڄامشورو،سکر ڊويزن جي خيرپور، جڏهن ته لاڙڪاڻي ڊويزن جي شڪارپور، ۽ قمبر شهدادڪوٽ ۾ 12 آڪٽوبر تي چونڊ ٿيندي. اليڪشن ڪميشن موجب، مڪاني چونڊن جي ٻي ۽ ٽئين مرحلي جو شيڊول 21 آگسٽ تي جاري ڪيو ويندو.

 

ايم ڪيو ايم جي استعيفائن وارو اشو خوش اسلوبي سان حل ٿي ويندو: نثار کهڙو

ڪراچي (اي پي پي ) سنڌ جي اطلاعات واري سينيئر وزير نثار احمد کهڙو چيو آهي ته ايم ڪيو ايم ۽ مولانا فضل الرحمان وچ ۾ ڳالهين واري پهرين دور ۾ ايم ڪيو ايم مثبت رويو اختيار ڪيو آهي ۽ هاڻي سندن وچ ۾ ڳالهين جو ٻيو دور اسلام آباد ۾ ٿيندو ۽ اميد آهي ته ايم ڪيو ايم جي استعيفائن وارو اشو خوش اسلوبي سان حل ٿي ويندو. اهڙن خيالن جو اظهار هن اربع ڏينهن آمريڪي قونصل جنرل برائن هيٿ جي ساڻس ملاقات کان پوءِ ميڊيا سان ڳالهائيندي ڪيو. نثار احمد کهڙو چيو ته استعيفائن وارو انتهائي قدم مسئلي جو حل ناهي ۽ مسئلي جو حل ڳالهيون ئي آهن ڇاڪاڻ ته انتهائي قدم کڻڻ سان جمهوري ادارا ڪمزور ٿيندا. هن چيو ته ايم ڪيو ايم اڳواڻ رشيد گوڊيل تي حملي واري واقعي کان پوءِ به سياسي جماعتن پاران ڳالهيون جاري رکڻ وارو رويو سياسي جماعتن جي مدبراڻي سوچ آهي جنهن کي ساراهيون ٿا. هن چيو ته ڪراچي آپريشن ايم ڪيو ايم سميت سڀني سياسي جماعتن جي اتفاق سان شروع ڪيو ويو ۽ شهر ۾ دهشتگرديءَ جي خاتمي تائين اهڙو آپريشن بنا ڪنهن فرق جي جاري رهندو ۽ امن امان تي ڪنهن به قسم جو سمجهوتو نه ڪيو ويندو. هن چيو ته ڪراچي شهر ۾ سياسي اڳواڻن تي حملا ۽ اهڙيون ڪاروايون ڪري پرامن ماحول کي بگاڙڻ جي ڪوشش آهن ۽ ڪجهه عنصر سياسي ماحول کي بهتر نموني ڏسڻ نه ٿا چاهين ۽ اهي چاهين ٿا ته ماحول خراب ٿئي پر اهڙن عنصرن کي پهريان به ناڪامي نصيب ٿي آهي ۽ هاڻي به ناڪامي نصيب ٿيندي. هن چيو ته سنڌ حڪومت مڪاني چونڊن لاءِ تيار آهي پر چونڊون ڪرائڻ ۽ چونڊن جي تاريخ ڏيڻ اليڪشن ڪميشن جي ذميداري آهي ۽ هاڻي ڏسڻو اهو آهي ته اليڪشن ڪميشن ڪڏهن ٿي مڪاني چونڊن جي تاريخ ڏئي. نثار احمد کهڙو چيو ته ايم ڪيو ايم سان ڳالهين لاءِ وفاقي حڪومت مولانا فضل الرحمان کي ذميداري ڏني آهي ۽ هو ساڻن ڳالهيون ڪري رهيو آهي اميد آهي ته معاملو جلد حل ٿي ويندو. هن چيو ته عوامي مسئلن تي آواز اٿارڻ جو بهتر فورم ايوان ۽ اسيمبليون ئي آهن انڪري کين ايوان ۾ اچڻ گهرجي. ان کان اڳ آمريڪي قونصل جنرل برائن هيٿ اطلاعات واري سينيئر وزير نثار احمد کهڙو سان سندس آفيس ۾ ملاقات ڪئي، ملاقات دوران سياسي صورتحال، امن امان، تعليم سميت گڏيل دلچسپيءَ جي معاملن تي خيالن جي ڏي وٺ ڪئي وئي.ا

 

رشيد گوڊيل جي زندگي لاءِ ايندڙ 24 ڪلاڪ اهم قرار، وينٽي ليٽر هٽائڻ تي غور

ڪراچي(اسٽاف رپورٽر) ايم ڪيو ايم اڳواڻ رشيد گوڊيل جي زندگي لاءِ ايندڙ 24 ڪلاڪ اهم قرار ڏنا ويا آهن، گذريل ڏينهن ڪراچي ۾ فائرنگ۾ زخمي ٿيل ايم ڪيو ايم جو ايم اين اي رشيد گوڊيل لياقت نيشنل اسپتال ۾ وينٽي ليٽر تي آهي، جيڪو هٽائڻ تي غور ڪيو پيو وڃي. اسپتال جي ترجمان انجم رشِد ميڊيا کي ٻڌايو ته ماهر ڊاڪٽرن جو پينل رشيد گوڊيل جي حياتي بچائڻ لاءِ هر ممڪن ڪوشش ڪري رهيو آهي، سندس دماغ ۽ بڪيون صحيح نموني ڪم ڪري رهيون آهن،سندس بلڊ پريشر ۽ دل جي ڌڙڪن به ٺيڪ آهي، هن چيو ته ڊاڪٽرن جي سڏ ڪرڻ تي رشيد گوڊيل اکين جا پنبڻ ڇنڀيا ۽ هٿ پير لوڏڻ جي ڪوشش ڪئي، پر ان کانپوءِ به هو اڃا به ڳڻتي جوڳي حالت ۾ آهي ۽ ايندڙ 24 ڪلاڪ سندس حياتي لاءِ اهم آهن. انجم رشيد ٻڌايو ته رشيد گوڊيل کي ڪل 5 گوليون لڳيون، جن مان 3 منهن ۽ ڪنڌ، باقي 2ِ سيني ۾ لڳل آهن، هن ٻڌايو ته سيني ۾ لڳل گولي سان سندس هڪ ڦڦڙ تمام گهڻو متاثر ٿيو آهي ۽ اها گولي سندس ڦڦڙ ۾ موجود آهي، جيڪا سندس طبيعت خطري کان ٻاهر ٿيڻ کانپوءِ ئي ڪڍي سگهجي ٿي، جڏهن ته سندس ٻيو ڦڦڙ صحيح نموني ڪم ڪري رهيو آهي، جنهن ڪري کيس ڏني ويندڙ آڪسيجن ۾ 40 سيڪڙو گهٽائي وئي آهي ته جيئن هو پاڻ ساهه کڻي سگهي.

 

سنڌ ۽ پنجاب حڪومتن جو درخواستون رد، تلور جي شڪار تي پابندي برقرار

اسلام آباد(بيورو) سپريم ڪورٽ، تلور پکين جَي شڪار تي پابندي وارو بلوچستان هاءِ ڪورٽ فيصلو برقرار رکندَي سنڌ ۽ پنجاب سرڪار جون درخواستون رد ڪري ڇڏيون، چيف جسٽس ريمارڪس ڏنا آهن ته تلور پکي جو شڪار غيرقانوني آهي، حڪمران ملڪ نٿا هلائي سگهن ته عرب شهزادن کي ٺيڪي تي ڏئي ڇڏين. چيف جسٽس جواد ايس خواجا جي سربراهي ۾ سپريم ڪورٽ بئنچ، تلور پکين جي شڪار بابت سنڌ ۽ بلوچستان حڪومتن پاران داخل ڪرايل درخواستن تي ٻڌڻي ڪئي. ٻڌڻيءَ کانپوءِ عدالت تلور پکين جَي شڪار تي پابندي وارو بلوچستان هاءِ ڪورٽ فيصلو برقرار رکندَي سنڌ ۽ پنجاب سرڪار جون درخواستون رد ڪري ڇڏيون. ان موقعي تي چيفجسٽس جواد ايس خواجا ريمارڪس ڏنا ته عرب شهزادن کي تلور پکين جي شڪار جي اجازت ڏيڻ غيرقانوني آهي. هـُن چيو ته ملڪ کي ٽڪرا ٽڪرا ڪري عرب شهزادن حوالي ڪيو ويو آهي، حڪمران جيڪڏهن ملڪ نٿا هلائي سگهن ته عرب شهزادن کي ٺيڪي تي ڏئي ڇڏي. چيف جسٽس چيو ته وفاق کي صوبائي معاملن ۾ مداخلت ڪرڻ جو ڪو به اختيار ناهي.

 

رشيد گوڊيل تي حملو ڳالهيون ناڪام ڪرڻ جي سازش آهي:آغا سراج دراني

ڪراچي(اسٽاف رپورٽر) سنڌ اسيمبلي جي اسپيڪر آغا سراج دراني چيو آهي ته رشيد گوڊيل تي حملو ڳالهيون ناڪام ڪرڻ جي سازش آهي، حملي ۾ ملوث جوابدارن کي جلد گرفتار ڪيو ويندو. ڪراچي ۾ هٿياربندن هٿان زخمي ٿيل ايم ڪيو ايم اڳواڻ رشيد گوڊيل جي اسپتال ۾ مختلف شخصيتن پاران عيادت جو سلسلو جاري آهي. سنڌ اسيمبلي جي اسپيڪر آغا سراج دراني به اسپتال پهچي رشيد گوڊيل جي عيادت ڪئي. عيادت ڪرڻ بعد ميڊيا سان ڳالهائيندي آغا سراج دراني واقعي تي افسوس جو اظهار ڪندي چيو ته سندن دعا آهي ته رشيد گوڊيل جلد صحتياب ٿئي. اسپيڪر چيو ته رشيد گوڊيل سان گڏ سڪيورٽي هجڻ گهـُرجي ها، هر ميمبر سان گڏ سڪيورٽي هجڻ لازمي آهي. آغا سراج دراني چيو ته ايم ڪيو ايم اڳواڻ تي حملو ڳالهيون ناڪام ڪرڻ جي سازش آهي. اسپيڪر آغا سراج دراني چيو ته رشيد گوڊيل تي حملي ۾ ملوث جوابدارن کي جلد گرفتار ڪيو ويندو.

 

عدالتي نظام ۾ سڌاري لاءِ سرجيڪل آپريشن ٿيڻ گهرجي پر اهو آپريشن ماتحت عدالتن مان شروع ٿئي: سينيٽ ڪميٽي

اسلام آباد (بيورو) تڪڙي ۽ سستي انصاف بابت سينيٽ جي سموري ايوان تي ٻڌل ڪميٽي ۾ قانوندانن ۽  ميمبرز تجويزون ڏنيون آهن ته عدالتي نظام ۾ سڌاري لاءِ سرجيڪل آپريشن ٿيڻ گهرجي پر اهو آپريشن ماتحت عدالتن مان شروع ٿئي ته بهتر هوندو. سينيٽ جي سموري ايوان تي ٻڌل ڪميٽي جو اجلاس چيئرمين رضا رباني جي صدارت هيٺ ٿيو،نهن ۾ ملڪ اندر تڪڙي ۽ سستي انصاف جي فراهمي لاءِ سفارشن تي غور ڪيو ويو. سينيئر قانوندان ۽ سينيٽ جي اڳوڻي چيئرمين ايس ايم ظفر چيو ته ملڪ ۾ عدليه جو نظام نه رهيو ته پارليامينٽ به نه رهندي، ملڪ ۾ عدالتي ۽ جمهوريت نظام موجود آهي پر اهو ناقص آهي. ايس ايم ظفر چيو ته قانون کي بهتر ڪرڻ جي ضرروت آهي، انصاف ڪميشن ۾ ڪو به حاضر سروس جج نه هئڻ گهرجي. پ پ سينيٽر فرحت الله بابر چيو ته لا اينڊ جسٽس ڪميشن هن وقت تائين تڪڙي ۽ سستي انصاف لاءِ ڇا ڪيو آهي، سپريم ڪورٽ جي پاڻمراو نوٽيس واري معاملي تي به لا اينڊ جسٽس ڪميشن کان پڇيو وڃي. فرحت الله بابر چيو تهِ ڪميشن کان اهو به پڇيو وڃي ته سڪيورٽي ادارن کي قانون تحت آڻڻ لاءِ ڇا ڪيو ويو آهي. جي يو آءِ جي حافظ حمد الله چيو ته ملڪ ۾ عدالتن کان علاوه جرڳي ۽ ٽياڪڙي جو نظام بحال ڪيو وڃي. حافظ حمد الله چيو ته شرعي عدالتون قائم ڪيون وڃن، تڏهن ئي عدالتن  بار گهٽ ٿيندو ۽ بهتر ڪارڪردگي ڪري ڏيکارينديون. مشاهد حسين سيد چيو ته ملڪ ۾ مئجسٽريٽ ۽ سول ججز جون 1500 جايون خالي پيل آهن، جڏهن ته سپريم ڪورٽ ۾ هزارين ڪيس التويٰ هيٺ آهن، جن کي تڪڙو اڪلايو وڃي.

 

اتر وزيرستان ۾ جيٽ جهازن جي بمباري، وڌيڪ 28 دهشتگرد مارجي ويا

اتر وزيرستان(م.ڊ) اتر وزيرستان ۾ جيٽ جهازن جي بمباري ۾ وڌيڪ 28 دهشتگرد مارجي ويا ۽ سندن 3 ٿاڪ به تباهه ڪيا ويا آهن. اتر وزيرستان ۾ دهشتگردن خلاف آپريشن ضرب عضب ڪاميابيءَ سان جاري آهي. سڪيورٽي ذريعن موجب اتر وزيرستان جي شوال واري علائقي ۾ چوٿين ڏينهن به سڪيورٽي فورسز جيٽ جهازن ذريعي فضائي ڪارروائي ڪئي. جيٽ جهازن جي ڪارروائي ۾ وڌيڪ 28 دهشتگرد مارجي ويا ۽ 3 زخمي ٿي پيا جڏهن ته دهشتگردن جا 3 ٺڪاڻا به تباهه ڪيا ويا. گذريل ڏينهن شوال واري علائقي ۾ سڪيورٽي فورسز جي ڪارروائي دوران 18 دهشتگرد مارجي ويا هئا جڏهن ته سومر ڏهاڙي پڻ اتر وزيرستان ۽ خيبر ايجنسي ۾ جيٽ جهازن جي بمباري ۾ 65 دهشتگرد مارجي ويا ۽ ڪيترائي زخمي ٿي پيا هئا.