تازيون خبرون

Daily Archives: August 19, 2015

بالي ووڊ فلم ”پيڪو“ انڊين فلم فيسٽيول آف ميلبورن ۾ بهترين فلم جو ايوارڊ کٽي ورتو

ميلبورن(شوبز نيوز) انڊين فلم فيسٽيول آف ميلبورن ۾ فلم ”پيڪو“ بهترين فلم جو ايوارڊ حاصل ڪري ورتو. سڌ سماءَ وارن ذريعن مطابق ايوارڊن جي اها تقريب نيشنل گيلري آف وڪٽوريا ۾ ٿ جنهن ۾ 2015ع جي بهترين فلم جو ايوارڊ فلم ”پيڪو“ کي ڏنو ويو آهي. بهترين هدايتڪار جو ايوارڊ شوجيت سرڪار، بهترين اداڪاره جو ايوارڊ ڀومي پيڊنيڪر، بهترين اداڪار جو ايوارَڊ عرفان خان، بهترين پيپلز چوائس ايوارڊ راجڪمار هيراني ۽ انيل ڪپور کي دنيا جي سينيما ۾ سرسي جو خاص ايوارڊ ڏنو ويو. ايوارڊن جي ان تقريب م ڀارت لاءِ آسٽريليا جي هاءِ ڪمشنر، ڀارتي هاءِ ڪمشنر ۽ هدايتڪارن ۽ فنڪارن سميت شوبز جي اهم شخصيتن شرڪت ڪئي.

 

فلمي دنيا ۾ قدم رکڻ کانپوءِ شوٽنگ جي پهرين ڏينهن غيرذميوار قرار ڏنو ويو هو: ڪنگنا رناوت

ممبئي(شوبز نيوز)بالي ووڊ ۾ پنهنجي جاندار اداڪاري ۽ ڪردار ۾ گم ٿي وڃڻ جي حوالي سان مشهور اداڪارا ڪنگنا رناوت انڪشاف ڪيو آهي ته فلمي دنيا ۾ قدم رکڻ کانپوءِ شوٽنگ جي پهرين ڏينهن کيس غيرذميوار قرار ڏنو ويو هو. هڪ انٽرويو ۾ ڪنگنا ٻڌايو ته ڏکڻ ڪوريا جي شهر سيول ۾ فلم گينگسٽر جي شوٽنگ جو پهريون ڏينهن عجيب هو،هن ٻڌايو ته فلم جي هدايتڪار انوراگ ڊگهي وقت جي منظر جي عڪسبندي لاءِ خاص هنڌ تي هلڻ جو چيو پر مان هلندي هلنديان هنڌ کان به اڳتي نڪري ويس، جنهن ڪري فلمي سيٽ تبديل ڪري ان منظر جي ٻيهر عڪسبندي ڪرڻي پئي. سندس چوڻ هو ته ان سڄي صورتحال سبب مون لاءِ غير ذميواري جا لفظ چيا ويا، جنهن ڪري مان تمام گهڻو مايوس ٿي ويس پر ساٿي اداڪار عمران هاشمي مونکي ڪم ڪرڻ تي راضي ڪيو. واضح رهي ته ڪنگنا رناوت قلمي ڪيريئر جي شروعات 2006ع ۾ ان ئي فلم گينگسٽر ذريعي ڪئي هئي ۽ هن وقت کيس بالي ووڊ جي سڀ کان وڌيو ڪامياب اداڪارا سمجهيو پيو وڃي.

 

سلمان بٽ کي 5 سالن واري معطل ٿيل سزا کان ڇوٽ ملڻ جو امڪان

لاهور(اسپورٽس نيوز) سلمان بٽ کي 5 سالن واري معطل ٿيل سزا کان ڇوٽ ملڻ جو امڪان ظاهر ٿي ويو آهي، ذريعن جو چوڻ آهي ته  آئي سي سي پاران ڪلين چٽ ملڻ کانپوءِ اوپنر کي ڊوميسٽڪ ڪرڪيٽ کيڏڻ جي اجازت ڏني ويندي.تفصيل مطابق سلمان بٽ، محمد آصف ۽ محمد عامر 2010ع ۾ انگلينڊ جي دوري دوارن اسپاٽ فڪسنگ ۾ ملوث مليا هئا، جنهن تي کين نه رڳو آئي سي سي جي اينٽي ڪرپشن ٽربيونل 5 کان 10 سالن تان پابندي مڙهي ۽ معطلي جي سزا ٻڌائي وئي هئي پر لنڊن ۾ جيل جي هوا به کائڻي پئي، محمد عامر جي 5 سالن واري پابندي ايندڙ مهيني ٿي رهي آهي پر قائدن ۽ ضابطن ۾ ترميم جي نتيجي ۾پيسر کي هلندڙ سال اپريل ۾ پيٽرنز ٽرافي گريڊ 2 ٽورنامينٽ ۾ شرڪت جو موقعو ملي ويو هو، ان جي انٽرنيشنل ڪرڪيٽ ۾ واپسي لاءِ رستا صاف ٿي چڪا آهن،ٻئي پاسي سلمان بٽ محمد عامر جيان کلي دل سان اسپاٽ فڪسنگ ۾ ملوث هجڻ جو اعتراف ناهي ڪيو، پر پي سي بي معاملو آئي سي سي کي ڏئي ڇڏيو آهي.

 

اينڊي مري پهريون سيٽ 4-6 سان کٽيو

مونٽريال (اسپورٽس نيوز) برطانيا جي اينڊي مري مونٽريال ماسٽرز ٽورنامينٽ جي فائنل ۾ عالمي نمبر 1 نوواڪ جوڪو وچ کي هارائي ٽائيٽل پنهنجي نالي ڪري ورتو. ڪينيڊا جي شهر مونٽريال ۾ ٿيندڙ فائنل 3 ڪلاڪن تائين جاري رهيو. اينڊي مري پهريون سيٽ 4-6 سان کٽيو، جڏهن ته ٻيون سيٽ نوواڪ جوڪو وچ بهترين راند جو مظاهرو ڪيو ۽ 4-6 سان ڪاميابي ماڻي. ٽئين سيٽ ۾ اينڊي مري جارحاڻي راند جو مظاهو ڪيو ۽ هڪ طرفي مقابلي کان پوءِ سيٽ 3-6 سان کٽي فتح پنهنجي نالي ڪئي. هي 2013ع کان پوءِ اينڊي مري جي نوواڪ جوڪو وچ خلاف پهرين ڪاميابي آهي.

 

اسپين ۾ ’ميلون‘ دوران گھٽين ۾ ڏاندن اڳيان ڊوڙندڙ خطرناڪ راند ۾ 7 ڄڻا جان تان هٿ ڌوئي ويٺا

ميڊرڊ (اسپورٽس نيوز) سڄي اسپين ۾ ’ميلون‘ دوران گھٽين ۾ ڏاندن اڳيان ڊوڙندڙ خطرناڪ راند ۾ 7 ڄڻا جان تان هٿ ڌوئي ويٺا. جولاءِ کان شروع ٿيندڙ ان فيسٽيول ۾ هيل تائين سَت ڄڻا مارجي چڪا آهن، چار موت گذريل هفتي دوران ٿيا ۽ ايتري ئي وقت ۾ ٿيندڙ موتن جو هڪ غير معمولي واقعو آهي. مارجي ويلن ۾ هڪ ڪائونسلر به شامل آهي جيڪو ميڊرڊ جي اتر ۾ واقع علائقي ڊولڊ ۾ ڏاند جو سنڱ لڳڻ ڪري مارجي ويو. ان کان سواءِ نوارا جي علائقي ۾ ڏاند 18 سالن جي نوجوان کي پيٽ ۾ سنڱ هڻي ماري وڌو هو. ان سان گڏوگڏ ويلنشيا، مرشيا، توليڊو، ڪيسٽيلون ۽ ايلي ڪينٽ جي علائقن ۾ به فيسٽيول دوران موت واقع ٿيا. گذريل سال بُل فائيٽرن 7 هزار 200 کان وڌيڪ ڏاندن کي ماريو هو. اڃا به ملڪ ۾ سالياني بنياد تي لڳ ڀڳ ٻه هزار فل فائيٽون ٿيڻيون آهن، پر وقت گذرڻ سان گڏوگڏ ان انگ ۾ گھٽتائي اچي رهي آهي.

 

شهيد شجاع خانزاده ملڪ ۾ ڪرڪيٽ جي بحالي لاءِ تمام گھڻيون ڪوششون ورتيون: پي سي بي چيئرمين

لاهور(اسپورٽس نيوز) پاڪستان ڪرڪيٽ بورڊ جي چيئرمين شهريار خان ۽ ڪرڪيٽ ٽيم جي رانديگرن شهيد شجاع خانزاده جي شهادت کي ڪرڪيٽ بحالي جي ڪوششن لاءِ وڏو نقصان قرار ڏنو آهي. اٽڪ ۾ شهيد شجاع خانزاده جي اوطاق تي حملي ۽ سندس شهادت کانپوءِ جاري ڪيل بيان ۾ پي سي بي چيئرمين شهريار خان جو چوڻ هو ته شهيد شجاع خانزاده ملڪ ۾ ڪرڪيٽ جي بحالي لاءِ تمام گھڻيون ڪوششون ورتيون. هن چيوته شهيد شجاع خانزاده زمبابوي جي ڪرڪيٽ ٽيم جي دوري دوران سيڪيورٽي جا بهترين انتظام ڪيا انهن انتظامن کي ڏسڻ کانپوءِ ئي زمبابوي جي اختيارين ڪرڪيٽ ٽيم پاڪستان اماڻي. هن چيو ته شهيد شجاع خانزاده مستقبل ۾ به ڪرڪيٽ ميچ ڪرائڻ لاءِ ان قسم جي ئي سيڪيورٽي ڏيڻ جي خاطري ڪرائي هئي. هوڏانهن ناليواري ڪرڪيٽ ٽيم جي ڪپتان شاهد خان آفريدي به شهيد شجاع خانزاده تي حملي جي سخت لفظن ۾ مذمت ڪئي آهي. هن چيو آهي ته شهيد شجاع خانزاده جي وڇوڙي سان سڄي ملڪ سان گڏ ڪرڪيٽ کي به تمام گھڻو نقصان پهتو آهي. هن چيو ته شهيد جون ڪرڪيٽ جي بحالي لاءِ وڏيون قربانيون هيون. کيس ان حوالي سان به تمام گھڻو ياد رکيو ويندو.

 

ٿرڪول منصوبو، عوام کي ڪيترو فائدو ملندو…!؟

 

سنڌ سرڪار ٿر ڪول منصوبي جي ترقي لاءِ 8 بينڪن جي سهڪار سان 50 ارب روپيا قرضن جو اينگرو ڪول مائنگ ڪمپني سان معاهدو ڪري ورتو. سنڌ اينگرو ڪول مائننگ ڪمپني ٿل لميٽيڊ (هائوس آف حبيب) ، حبيب بينڪ لميٽيڊ، اينگرو، حب ڪو، Mengdong CPI ۽ چائنه مشينري انجنيئرنگ ڪارپوريشن سان هڪ ماسٽر شئير هولڊر  معاهدو ڪيو آهي، سنڌ اينگرو ڪول مائين ڪمپني ملڪ جي معروف بينڪن سان گڏ فائننس جي معاهدن تي صحيحون ڪيون آهن جنهن تحت منصوبي کي گهربل 50 ارب رپين جي مالي مدد لاءِ شرط ۽ ضابطن جي اتفاق ڪيو ويو، ڪوٺايل تقريب ۾ وڏي وزير سيد قائم علي شاهه خطاب ڪندي چيو ته ٿر ڪول رٿا بابت مون جڏهن وزير اعظم محمد ميان نواز شريف کي بريف ڪيو ۽ گذارش ڪئي ته ٻاهرن ڪمپينن ضمانت گهري آهي جنهن تي وزير اعظم گهٻرائجي ويو ۽ چيائين ته صوبن جا قرض ڪئين ڀربا جنهن بعد مون کيس چيو ته جيڪو به خرچ ٿيندو اهو سنڌ سرڪار ڀريندي جنهن تي وزير اعظم رضا مندي ظاهر ڪئي جنهن تي ان جا شڪرگذار آهيون جنهن جي مهرباني سان سنڌ سرڪار ٿرڪول منصوبي کي عملي جامو پرائڻ طرف وٺي وڃي رهي آهي هن وڌيڪ چيو ته سنڌ قدرتي وسيلن سان مالا مال آهي اهو ئي سبب آهي ته ٻاهرين دنيا جا سيڙپڪار سنڌ ۾ سيڙپڪاري ۾ وڏي دلچسپي رکن ٿا، ٿرڪول ملڪ جو وڏي ۾ وڏو منصوبو آهي جنهن مان 2018 تائين مڪمل ٿيڻ سان 16 سئو ميگا واٽ بجلي پيدا ڪندو. هن چيو ته اسان جي ڪوشش رهندي ته مقامي سيڙپڪارن کي همت افزائي ڪندي انهن کي موقعو ڏيون، سنڌ اينگرو ڪول مائننگ ڪمپني، سنڌ حڪومت سان گڏ معاهدن تي صحيح ڪئي آهي . ان معاهدن جي روح سان حڪومت سنڌ منصوبي جي پڄاڻي لاءِ گهربل منظُوري ۽ مدد فراهم ڪندي رهندي.هن تاريخي ڪاميابي تي ڳالهائيندي سي اي او شمس الدين احمد شيخ سنڌ اينگرو ڪول مائننگ ڪمپني چيو ته منصوبي جي چين جي فائننسنگ جا معاملا پڻ طئه ٿي ويا آهن . دستاوير تيار ڪيا پيا وڃن. اميد آهي ته ٻاهرين فائنينشل ڪلوزنگ مالي سال جي پڄاڻي تائين ٿي ويندي. ان موقعي تي چيئرمين ڊائريڪٽر بورڊ آف سنڌ، اينگرو ڪول مائننگ ڪمپني خورشيد جمالي ڳالهائيندي چيو ته هن اهم پيش رفت کي حڪومت پاڪستان، سنڌ حڪومت، اينگرو ۽ ٻين سيڙپڪارن جي طرف کان مڪمل تعاون جي ذريعي ممڪن بڻايو ويو آهي، هن چيو ته اڄ طئه ٿيندڙ معاهدا اسان جي محنت ۽ ڪاوشن جو نتيجو آهن. ٿر ڪول منصوبي لاءِ 8 بينڪن کان 50 ارب روپيا قرض ورتو ويندو ان سلسلي ۾ معاهدن تي صحيحون پڻ ڪيون

 

جنسي دهشتگرديءَ کان اخلاقي دهشتگرديءَ تائين!؛شوڪت لوهار

جيتوڻيڪ اسان وٽ ڪڏهن اهڙن واقعن کانپوءِ صرف خاموشي ئي خاموشي ۽ سڀ ٺيڪ آهي کانسواءِ ٻيو ڪجهه به نه رهيو آهي. تنهن هوندي به نه ڄاڻ ڇو اندر ۾ هڪ عجيب گناهه جو احساس ٿئي ٿو. هر پرڀات ڏنگي ٿي. هر لمحو ڪنهن اهڙي اڄاتي خوف ۾ مبتلا رهي ٿو، جنهن جي ٿوري وقت کانپوءِ ڄڻ قيامت اچي ويندي.

قيامت جو منظر خبر ناهي انهيءَ کان ڪيترو وڌيڪ خوفائتو ۽ ڀيانڪ ٿي سگهي ٿو، جو جيڪي انسان روزانو اٿندي ويهندي قيامت جهڙي اذيت ۾ هجن، سائيءَ ماريل هن ڏيهه ۾ استحصال جو شڪار ٿيندڙ طبقو هر وقت ذري ذري قيامت جي ور چڙهي ٿو. هو هر ساهه ۽ ساهن ۾ ٿورو ٿورو مري ٿو ۽ پوءِ نيٺ هو زنده نظر ضرور اچي ٿو پر هو ذهني طرح مرده ٿي پوي ٿو.

جديد دور جون ڪربلائي ڪٿائون به اهڙن خوفناڪ المين جو داستان آهن، جن جي سُڌ پوڻ سان لڱ ڪانڊارجي وڃن ٿا.

هونئن ته هميشه اسين اهڙي ذهني گند ۾ ڀريل پئي رهيا آهيون، جيڪي ٿي سگهي ٿو ته دنيا جو ڪو به علم صاف نه ڪري سگهي، تنهن هوندي به ٿوريون ٿڪيون جيڪي ڪوششون ٿيون آهن، اهي ڪنهن عروسي تياري کان وڌيڪ ڪجهه ڪو نه آهن.

اسان جا اخلاقي ڀاشڻ هاڻ ايترا ته گهڻا ٿي ويا آهن جو لڳي ائين ٿو ته ظاهري طور تي اسان کان وڌ مهذب، دنيا جي ٻي ڪا قوم آهي ئي ڪو نه. مشهور فرانسيسي مقالا نگار مشل مانٽين چواڻي ته وحشي ماڻهو صرف ظاهري طرح وحشي آهن جڏهن ته اسين پنهنجي اندر ۾ ڪيڏا نه خطرناڪ وحشي آهيون، جيڪي ظاهري ڏيک ويک ۾ مهذب نظر اچون ٿا.“ واقعي صحيح ڳالهه آهي اسين سانڊي جيان هڪ لام کان ٻي تي ويندي رنگ بدلائيندا رهندا آهيون. منافقت جي کل پائي منهن تي مصنوعي مرڪ سجائي ماڻهن سان ملندا رهندا آهيون.

اسان وٽ پرهيزگار لاءِ هڪ عجيب قسم جا پيمانا آهن. ظاهري ڏيکاءَ ۾ جيڪڏهن اوهان پرهيزگار آهيو ته اوهان بس سڀ کان اعليٰ آهيو. غريبن کي خيرات ڏيو ٿا ۽ روزا پابندي سان رکو ٿا ته اوهان جي گهر، پاڙي وارن ۽ علائقي ۾ اوهان جي چڱي خاصي عزت ٺهي ويندي. ان جي بدلي ۾ اوهين ڀلي رشوت خور هجو، سڄي زندگي گهر ۾ عورتن کي انهن جي جائز حقن کان محروم رکندا هجو. ٻارن تي اجائي سختي ۽ پنهنجي ذهن مطابق کين پڙهائيندا هجو، اهي سڀ پيمانا اسان جي سماج کي قابل قبول آهن. جڏهن ته ان جي ابتڙ جيڪڏهن اوهين انسان دوست، مددگار ۽ احساس ڪندڙ آهيو ته اهي اهڃاڻ اوهان کي اهو درجو ڪو نه ڏياريندا جيڪي اڳ ٻڌايل پيمانا ڏياري سگهن ٿا.

قصور جو قصور اهو آهي جو اهو بي قصور آهي ۽ ان کان به وڌ وقت جي ستم ظريفي اها آهي جو اهو علائقو اسان جي ڏيهه ۾ موجود آهي. بلي شاهه جي مزاحمتي ۽ تصوفي پرڳڻي جي ڳوٺ ڳنڊا سنگ ۾ جيڪو لڱ ڪانڊاريندڙ واقعو پيش آيو آهي، انهيءَ واقعي انسانيت جو ڪنڌ شرم کان جهڪائي ڇڏيو آهي. اهو واقعو انهيءَ ڳالهه جي تصديق ڪري ٿو ته اسين پنهنجي پر ۾ ڪيڏا نه وحشي ۽ درنده آهيون. اسان جي ڏندن ۾ واڳوئن کان به وڌ وحشت ۽ دهشت ڀريل آهي. اسين پنهنجي وات ۾ زبان بجاءِ انهيءَ ازدها جي زهر رکون ٿا جيڪو پنهنجي ٻچن کي به بخش ڪو نه ڪندو آهي. اسين جديد دور جا وحشي آهيون، اسين سيٽلائيٽ جي دنيا جا ڊريڪولا آهيون، اسان ثابت ڪيو آهي ته ڊجيٽلي آدم خور آهيون.

هي واقعو جيڪو هنن ڏينهن ۾ منظرعام تي آيو، جنهن ۾ معصوم ٻارڙن سان ڏاڍائي رپورٽ ڪئي ويئي آهي. ٽي کان پنج ۽ تيرنهن سالن جي ڇوڪرن ۽ ڇوڪرين جون سئو کان وڌيڪ وڊيوز منظرعام تي آيون آهن ۽ تقريبن 280 جي لڳ ڀڳ واقعا رپورٽ ٿيا آهن.

اهو اذيتناڪ ۽ وحشتناڪ ناٽڪ گذريل پنجن سالن کان معصوم گلن جهڙن ٻارڙن سان جاري هو، جنهن ۾ معصوم ٻارڙن کي اغوا ڪيو ويندو هو ۽ کين جنسي زيادتيءَ جو نشانو بڻائي انهن سان ڪيل ڏاڍائين جي وڊيو ٺاهي ويندي هئي، بعد ۾ ان وڊيو کي والدين جي ڪمزوري بڻائي انهيءَ تي کين ڀتو وصول ڪيو ويندو رهيو آهي. ڪيترا ئي والدين لکين روپيا ڏيڻ جي باوجود پنهنجي معصوم ٻارڙن جي وڊيوز کي ڊليٽ نه ڪرائي سگهيا ۽ اِهي وڊيوز ٻاهرين ملڪن ۾ وڪرو ڪيو وينديون رهيون آهن.

ان جنسي دهشتگردي جي وحشتناڪ واقعي ڦاٽ تڏهن کاڌو جڏهن علائقي واسين اهڙن درندن خلاف احتجاج ڪيو پر ڪا اُميد نه ڏسي سندن پوليس سان چڪريون ٿيو ۽ ڳالهه ميڊيا تائين پهتي.

ههڙي خطرناڪ جنسي دهشتگردي جي واقعي ٿيڻ کانپوءِ به خاص طور قصور پوليس ان کي مام ۾ رکڻ جي ڪوشش ڪري رهي هئي ۽ انهن هنن خطرناڪ ۽ ڏيهه جي اتهاس جي بدترين واقعي جي ڇنڊڇاڻ ڪرڻ بجاءِ ان کي ڪاغذن جي ڪفن ۾ دفنائڻ جا سانباها پئي ڪيا ۽ پوليس جو  اهو چوڻ هو ته هي واقعو زميني تڪرار کان وڌ ڪجهه نه آهي.

”واهه سائين واهه، پوليس اهلڪار! واقعي هي واقعو زميني تڪرار کان وڌيڪ ڪجهه به نه هو.“ مان سمجهان ٿو ته اهو واقعو زميني تڪرار هجي يا نه پر پوليس جو ضميري تڪرار ضرور آهي!“

اهڙا واقعا اسان جي چوڌاري روزانو پيا ٿين پر ڪڏهن ڪڏهن ڪو واقعو جڏهن ميڊيا تي اچي ٿو ته پوءِ اسين واويلا شروع ڪيون ٿا.

اسان جو تعليمي سرشتو جيڪو مُدي خارج نصاب سان ڀريل آهي. اسان سائنس ۾ به غير سائنسي شيون ڀري ڇڏيون آهي. نفرت جو هڪ بمپر ڪراپ فصل تيار ڪري رهيا آهيون. اسان جي نصاب ۾ رڳو نظرياتي ۽ ڪٿائي داستانن جي ٻيو ڪجهه به ڪين آهي. اسين بلا جا پرهيزگار صرف هڪ مهيني ۾ ٿي ويندا آهيون، جيڪو رمضان شريف جو مهينو آهي ان ۾ به عجيب قسم جون حرڪتون ڪندڙ مُلي هجڻ جون دعوائون ڪندڙ ماڻهن جي احساسن سان راند ڪن ٿا. ملٽي نيشنل ڪمپنيون ۽ اشتهاري گرناري ماڻهن کي وڏيون وڏيون لابيون ڏيئي ماڻهن جي ضرورتن کي ڪيش ڪن ٿا. باقي يارنهن مهينا ٽي وي تي ڪجهه به پيو هلندو.

ٻارڙن سان جنسي ڏاڍاين جو معاملو صرف قصور تائين محدود ڪو نه آهي، بلڪه اهو هڪ عالمي سطح جو معاملو آهي. رمن ڪئٿولڪ عيسائين پادرين جي حوالي سان ڪيترائي ڇرڪائيندڙ واقعا روزانو سامهون ايندا پئي رهيا آهن.

اسان جيستائين پنهنجي تعليمي نصاب کي عمليت نٿا ڏيون، ايستائين اهڙا واقعا پيا ٿيندا. رڳو اهڙيون عجيب ڳالهيون جن ۾ غاصبن جي حاصلات کي وڏو ويڪرو ڪري پيش ڪرڻ سان علم جي آبياري ته ڪونه ٿيندي يا صرف فوٽو ڪاپي ڪري رٽو هڻي امتحان پاس ڪرڻ سان ته مسئلا حل ڪو نه ٿيندا. ان لاءِ ضروري آهي ته پنهنجي ثقافت کي سامهون رکندي اصلي، سائنسي تعليم ۽ جنس بابت هضم ڪرڻ جيتري ڄاڻ ته نصاب ۾ به شامل ڪئي وڃي، جو ماڻهو ڪجهه نه ڪجهه پنهنجي بچاءُ لاءِ ڪري ته سگهي. جيئن سائين علي مرتضيٰ ڌاريجي صاحب جو ڪتاب ”جنس جي سائنسي ڄاڻ“ آهي. مان سمجهان ٿو اهڙن ڪتابن پڙهڻ سان ماڻهوءَ جون اکيون کلي وڃن ٿيون. اهڙن ڪتابن يا ان جي ڪجهه حصن کي نصاب جو حصو بنائڻ ۾ ڇا آهي.

ٻارڙن جا ذهن ڏاڍا ڪچا ۽ ڪونئرا هوندا آهن، انهن جي ذهنن تي اهڙن جنسي واقعن/حادثن جي ڇاپ سڄي زندگي رهجي ويندي آهي، تنهن ڪري ضروري آهي ته انهن کي هڪ سهارو، هڪ اعتماد مهيا ڪيو وڃي. انهيءَ کان علاوه اهڙن درنده صفت ماڻهن کي انهن جي ڏوهن مطابق سزا ملڻ گهرجي. قصور سانحي اسان جي سامهون روزانو ٿي رهيا آهن، پر اسان اُٺ پکي جيان اکيون پوريو ويٺا آهن. اسان وٽان سڀ مور مرندا وڃن، اسان وٽان معصوم ٻارڙن جون مرڪون موڪلائي رهيون آهن. اسان کي هن پوپٽن پڪڙڻ واري وهي واري سنگت جو وڌ کان وڌ خيال رکڻو آهي. اهي آئيندي جا اعليٰ آدرشي اهڃاڻ آهن. معصوم ٻالڪ جي مرڪ الله جي طرفان هڪ آٽوگراف هوندي آهي، ڪنهن به ڊجيٽلي درندي کي ڪو حق ناهي ته ان آٽوگراف تي منڌيئڙو ڦيرائي.

 

’شجاع خانزاده سڌي ڳالهه ڪرڻ وارو ماڻهو هو‘؛عديل اڪرم

پاڪستان جي صوبي پنجاب جي گهرو وزير ڪرنل رٽائرڊ شجاع خانزاده 16 آگسٽ تي خودڪش حملي ۾ مارجي ويو. هو 28 آگسٽ 1943ع تي پنجاب جي شهر اٽڪ جي ڳوٺ شادي خان ۾ پيدا ٿيو هو. هن ابتدائي تعليم ضلع اٽڪ مان حاصل ڪئي ۽ پوءِ 1966ع ۾ اسلاميه ڪاليج پشاور مان گريجوئيشن ڪيائين. 1967ع ۾ هن فوج ۾ ڪميشن حاصل ڪئي ۽ سن 1971ع جي پاڪ- ڀارت جنگ ۾ پڻ حصو ورتو.

شجاع خانزاده 1974ع کان 1978ع تائين ملٽري انسٽرڪٽر طور تي به فرض سرانجام ڏنا. شجاع خانزاده انهن ڪجهه ماڻهن مان هڪ هو، جيڪو سڀ کان پهريان 1983ع تي دنيا جي بلند ترين جنگي محاذ سياچن گليشئر تي پهتو هو.

هن 1992ع کان 1994ع تائين آمريڪي گاديءَ جي هنڌ واشنگٽن ڊي سي ۾ قائم پاڪستاني سفارتخاني ۾ بطور فوجي اتاشي به فرض سرانجام ڏنا. ڪرنل رٽائرڊ شجاع خانزاده ملٽري انٽيليجنس ۾ به خدمتون سرانجام ڏنيون ۽ هن کي سن 1988ع ۾ تمغئه بسالت سان پڻ نوازيو ويو.

ڪرنل رٽائرڊ شجاع خانزاده جو تعلق ضلع اٽڪ جي هڪ بااثر خاندان سان هو، هُن جو ڏاڏو ڪئپٽن عجب خان انڊين قانون ساز اسيمبلي جو ميمبر رهيو، جڏهن ته هُن جو چاچو ڪئپٽن تاج محمد خانزاده به قومي ۽ صوبائي اسيمبلي جو ميمبر رهيو.

شجاع خانزاده ٽي دفعا ميمبر پنجاب اسيمبلي چونڊيو ويو. هو 2002ع ۾ مسلم ليگ قاف جي ٽڪيٽ تي پهريون دفعو پنجاب اسيمبلي جو ميمبر چونڊجي وزيراعليٰ جو خاص صلاحڪار رهيو. 2008ع جي عام چونڊن ۾ هن آزاد اُميدوار جي حيثيت سان اليڪشن ۾ حصو ورتو ۽ ڪاميابي حاصل ڪئي. جڏهن ته هن 2013ع جي عام چونڊن ۾ مسلم ليگ (ن) جي ٽڪيٽ تي ڪاميابي ماڻي. شجاع خانزاده روايتي سياستدانن وانگر گول مول جواب ڏيڻ بجاءِ سڌي ڳالهه ڪرڻ جو عادي هو. شايد ان جو هڪ سبب فوجي پس منظر به هو. هو ميڊيا جي نمائندن جي تلخ ۽ تکن سوالن کي غور سان ٻڌي تحمل سان جواب ڏيندو هو.

2014ع ۾ هن پنجاب جي گهرو وزير جو قلمدان سنڀاليو ۽ دهشتگردي جي خلاف جنگ ۾ اهم ڪردار ادا ڪيو.

آرمي پبلڪ اسڪول تي حملي بعد ڪرنل رٽائرڊ شجاع خانزاده نيشنل ايڪشن پلان تحت سڄي پنجاب ۾ دهشتگردن ۽ پابندي مڙهيل تنظيمن خلاف ايڪشن ۾ ڀرپور ڪردار ادا ڪيو.

ڪجهه وقت اڳ پابندي مڙهيل تنظيمن جي باري ۾ ڳالهائيندي هن چيو هو ته ”هڪ وقت اهڙو به آيو هو، جو عام ماڻهو انهن جو نالو وٺندي به ڊڄندا هئا ۽ الٽو اسان هنن کي ”سر، سر‘ چئي سڏيندا هئاسين پر هاڻ خوف ۽ حراس ڦهلائيندڙ ۽ مذهب جي نالي تي قتل ڪندڙ هر شخص جي خلاف ڪارروائي ٿيندي.“

هلندڙ سال زمبابوي ڪرڪيٽ ٽيم جي پاڪستاني دوري دوران شجاع خانزاده سيڪيورٽي جي انتظامن کي فول پروف بڻائڻ ۾ اهم ڪردار ادا ڪيو هو ۽ هو پاڻ حفاظتي انتظامن جي نگراني ڪندو رهيو.

ڪيترن هنڌن تي ميڊيا جي نمائندن سان ڳالهائڻ دوران گهرو وزير پاڻ کي دهشتگردن پاران ملندڙ ڌمڪين جو به ذڪر ڪيو هو پر هُن جو اهو ئي چوڻ هو ته هو پنهنجي مقصد کان پوئتي نه هٽندو ۽ دهشتگردي خلاف جنگ کي هو پنهنجي منطقي انجام تائين پهچائيندو.

شجاع خانزاده ان مؤقف تي يقين رکندو هو ته جيستائين معاشري مان نفرت کي ختم نه ڪيو ويندو، تيستائين امن امان تي ڪنٽرول ڪرڻ مشڪل آهي.

هڪ ملاقات ۾ هُن پنهنجي علائقي جي هڪ اهڙي مسجد جي پيش امام جو واقعو ٻڌايو، جيڪو 24 ڪلاڪن مان 18 ڪلاڪ ڪڏهن چندو گڏ ڪرڻ ۽ ڪڏهن نفرت ڦهلائيندڙ تقرير ڪرڻ لاءِ لائوڊ اسپيڪر جو استعمال ڪندو هو.

هن چيو ته ”اسان چاهيندي به انهن کي روڪي نه ٿا سگهون، ڇو ته هي هڪ ”نو گو ايريا‘ هو، ۽ ڪهڙي خبر ته هو توهان لاءِ فتويٰ جاري ڪري ڇڏي. ڇو ته هتي بنا سوچي سمجهي ڪنهن لاءِ به فتويٰ ڏئي سگهجي ٿي.“

هن وڌيڪ چيو ته ”نيشنل ايڪشن پلان کانپوءِ جڏهن ڀرپور ڪارروائي جي شروعات ٿي ته لائوڊ اسپيڪر جي غلط استعمال تي ڪيترن ماڻهن سان گڏ منهنجي علائقي جي اُن پيش امام جي خلاف به ڪارروائي ٿي ۽ هو 14 ڏينهن تائين قيد ۾ رهيو.“

گهرو وزير چيو هو ته ”گرفتاري کانپوءِ هڪ ڏينهن اڳ منهنجي ملاقات مسجد جي پيش امام سان ٿي ۽ مون هُن کان پڇيو ته ”هاڻ توهان لائوڊ اسپيڪر جو استعمال نٿا ڪريو“ پيش امام چيو ته ”وڏي مشڪل سان چوڏنهن ڏينهن جيل ۾ گذاريا آهن ۽ هاڻ منهنجي توبهه جو ٻيهر اهڙي چڙ ڏياريندڙ تقرير ڪريان.“