تازيون خبرون

Daily Archives: August 19, 2015

سياسي ۽ عسڪري قيادت جو ڪراچي آپريشن منتقي انجام تائين پهچائڻ تي اتفاق

اسلام آباد(بيورو) وزيراعظم نواز شريف ۽ آرمي چيف جنرل راحيل شريف، ڪراچي ۾ ڏوهارين خلاف جاري آپريشن کي هر صورت ۾ منطقي انجام تائين پهچائڻ ۽ دهشتگردن جي سهولتڪارن خلاف بنا فرق جي ڪارروائي جاري رکڻ تي اتفاق ڪري ورتو آهي. پِي ايم هائوس اسلام آباد ۾ وزيراعظم نواز شريف سان آرمي چيف جنرل راحيل شريف ملاقات ڪئي. ملاقات دوران وفاقي وزيرن چوڌري نثار، اسحاق ڊار، وزيراعظم جي صلاحڪار سرتاج عزيز ۽ خاص مددگار طارق فاطمي به شرڪت ڪئي. ملاقات ۾ ملڪ جي مجموعي سڪيورٽي صورتحال ۽ ملڪي سلامتي جي معاملن تي خيالن جي ڏي وٺ ڪئي وئي. ان موقعي تي پنجاب جي گهرو وزير ڪرنل رٽائرڊ شجاع خانزادي جي شهادت کانپوءِ پيدا ٿيل صورتحال تي پڻ غور ويچار ڪيو ويو. ذريعن موجب ملاقات دوران ڪراچي ۾ ڏوهارين خلاف جاري آپريشن کي هر صورت ۾ منطقي انجام تائين پهچائڻ ۽ دهشتگردن جي سهولتڪارن خلاف بنا فرق جي ڪارروائي جاري رکڻ تي اتفاق ڪيو ويو. ان کانسواءِ ملاقات ۾ طئي ڪيو ويو ته پرڏيهي صلاحڪار سرتاج عزيز جي ڀارتي هم منصب سان ملاقات ۾ ڀارتي اڳرائي جو معاملو پهرين ترجيح هوندو.

 

اليڪشن ڪميشن کي سنڌ ۽ پنجاب ۾ مڪاني چونڊن لاءِ تاريخ پاڻ طئي ڪرڻ جو حڪم

اسلام آباد(بيورو) ســُپريم ڪورٽ، سنڌ ۽ پنجاب ۾ مڪاني چونڊن بابت درخواستون اُڪلائيندي چيو آهي ته اليڪشن ڪميشن جو ڪم تاريخون وٺڻ نه پر صوبن کي حڪم ڏنو آهي ان ڪري اليڪشن ڪميشن چونڊن لاءِ تاريخ پاڻ طئي ڪري. چيف جسٽس جواد ايس خواجا جي سربراهي ۾ 3 رڪني بينچ، سنڌ ۽ پنجاب ۾ مڪاني چونڊن بابت ڪيس جي ٻڌڻي ڪئي. ان موقعي تي اليڪشن ڪميشن چونڊن ۾ دير بابت 2 درخواستون پيش ڪيون. ٻڌڻي دوران جسٽس قاضي فائز عيسيٰ رمارڪس ڏنا ته آرٽيڪل هڪ سئو 40 اَي تحت مڪاني چونڊون ڪرائڻ اليڪشن ڪميشن جي آئيني ذميواري آهي. هن چيو ته آئينيادارو چئي رهيو آهي ته اهو پنهنجون ذميواريون ادا نه ٿو ڪري سگهي ۽ ٻئي اداري کي چئي رهيو آهي ته آئين جي ڀڃڪڙي جي اجازت ڏني وڃي، جيڪڏهن اليڪشن ڪميشن پنهنجي آئيني ذميواري پوري نه ٿو ڪري سگهي ته ميمبر استعيفيٰ ڏئي ڇڏين. ٻڌڻي دوران اليڪشن ڪميشن جي وڪيلن موقف اختيار ڪيو ته هـُو مڪاني چونڊن لاءِ آئين تحت ذميواري ادا ڪرڻ لاءِ تيار آهن پر عدالت واضح ڪري ته سنڌ ۽ پنجاب ۾ گذريل 6 سالن کان مڪاني ادارا موجود ئي ناهن. جسٽس دوست محمد خان رمارڪس ڏنا ته قانون تحت مڪاني چونڊون 90 ڏينهن اندر ڪرائڻ ضروري آهن. هن چيو ته سنڌ ۽ پنجاب ۾ حڪومتن مڪاني چونڊن کانسواءِ پنهنجو مدو پورو ڪري ۽ هاڻي به حڪومتون اڌ عرصو گذاري چڪيون آهن پر چونڊون ڪرائڻ اليڪشن ڪميشن جي ذميواري آهي. جسٽس دوست محمد خان چيو ته اليڪشن ڪميشن جو ڪم تاريخون وٺڻ نه پر صوبن کي تاريخن تي اليڪشن ڪرائڻ جو حڪم ڏيڻ آهي. عدالت، اليڪشن ڪميشن جون ٻئي درخواستون اڪلائيندي حڪم ڏنو ته مڪاني چونڊن جي تاريخن بابت اليڪشن ڪميشن پاڻ فيصلو ڪري.

 

ڪراچي ۾ ايم ڪيو ايم اڳواڻ رشيد گوڊيل قاتلاڻي حملي ۾ سخت زخمي، ڊرائيور مارجي ويو

ڪراچي (اسٽاف رپورٽر) ڪراچي جي علائقي بهادر آباد ۾ فائرنگ جي نتيجي ۾ زخمي ٿي متحده اڳواڻ رشيد گوڊيل جي جسم مان 4 گوليون ڪڍي کيس آءِ سي يو منتقل ڪيو ويو، فائرنگ ۾ سندس ڊرائيور مارجي ويو آهي. ڪراچي جي علائقي بهادر آباد ۾ فائرنگ جي نتيجي ۾ ايم ڪيو ايم ايم اين اي رشيد گوڊيل سخت زخمي ٿي پيو، جڏهن ته ڊرائيور عبدالمتين مارجي ويو. فائرنگ بعد رشيد گوڊيل کي لياقت نيشنل اسپتال پهچايو ويو، جتي ڊاڪٽرس آپريشن ڪري ڄاڙي، ڇاتي ۽ جسم جي ٻين حصن مان گوليون ڪڍي ورتيون، جنهن بعد کيس آءِ سي يو منتقل ڪري ونٽيليٽر تي رکيو ويو. ڊاڪٽرز جو چوڻ آهي ته رشيد گوڊيل جي حالت ڳڻتي جوڳي آهي. اسپتال ذريعن جو چوڻ آهي ته گولي لڳڻ سبب رشيد گوڊيل جي هڪ ڦڦڙ ۽ هڪ گڙدي کي نقصان پهتو آهي، شگر جو مريض هئڻ ڪري سندس حالت ۾ نازڪ آهي.

 

سازش تحت امن امان جي صورتحال خراب ڪئي پئي وڃي: قائم علي شاهه

ڪراچي(اسٽاف رپورٽر) سنڌ جي وڏي وزير سيد قائم علي شاهه ڪراچي ۾ هڪ ڀيرو ٻيهر پکڙيل بدامني جي لهر تي ڳڻتي ظاهر ڪندي چيو آهي ته سازش تحت امن امان جي صورتحال خراب ڪئي پئي وڃي.وزير اعليٰ هائوس ڪراچي مان جاري ڪيل ۾ بيان ۾ وڏي وزير سيد قائم علي شاهه چيو ته دهشتگردن پاران حساس اداري جي آفيسر ساجد احمدکي قتل کانپوءِ ايم ڪيو ايم اڳواڻ رشيد گوڊيل تي قاتلاڻو حملو سوچيل سمجهيل سازش آهي.هن چيو ته ڪراچي جون حالتون خراب ڪندڙن جو پير کوڙي مقابلو ڪيو ويندو، سازشون ڪندڙن کي ڪنهن به صورت ۾ بخش نه ڪيو ويندو..وڏي وزير سيد قائم علي شاهه آءِ جي سنڌ غلام حيدر جمالي ۽ ڊي جي رينجرز ميجر جنرل بلال اڪبر کي هدايت ڪئي ته ساجد احمد ۽ رشيد گوڊيل تي حملو ڪندڙ جوابدارن کي فوري طور گرفتار ڪيو وڃي..

 

ڪراچي ۾ حساس اداري جي آفيسر جي شهادت ۽ رشيد گوڊيل تي حملو امن خراب ڪرڻ جي سازش آهي: نثار کهڙو

ڪراچي (اي پي پي) سنڌ جي اطلاعات واري سينيئر وزير نثار احمد کهڙو چيو آهي ته ڪراچيءَ ۾ حساس اداري جي آفيسر جي شهادت ۽ ايم ڪيو ايم اڳواڻ رشيد گوڊيل تي حملو سياسي ماحول ۽ شهر ۾ امن خراب ڪرڻ جي سازش آهي، جنهن سازش جو ڄمي مقابلو ڪيو ويندو ۽ اهڙن عنصرن کي ڪنهن به صورت ۾ ڪامياب ٿيڻ نه ڏينداسين ۽ شهر ۾ هر صورت امن امان کي برقرار رکيو ويندو. اهڙن خيالن جو اظهار هن اڱاري ڏينهن ميڊيا سان ڳالهائيندي ڪيو. نثار احمد کهڙو چيو ته ڪراچي شهر ۾ ڪنهن به صورت ۾ امن امان خراب ڪرڻ نه ڏنو ويندو ۽ دهشتگردن جي خاتمي تائين آپريشن جاري رهندو. هن چيو ته ايم ڪيو ايم اڳواڻ رشيد گوڊيل تي حملي جي جاچ لاءِ ڪميٽي قائم ڪئي وئي آهي ۽ سڀني رخن کان اعليٰ سطحي جاچ شروع ڪئي وئي آهي ۽ قانون لاڳو ڪندڙ ادارا جلد واقعي جي جوابدارن تائين پهچي ويندا ۽ واقعي ۾ ملوث جوابدارن کي گرفتار ڪيو ويندو. هن چيو ته صفوران سانحي جي جوابدارن کي گرفتار ڪري سگهون ٿا ته پوءِ هن واقعي جي جوابدران کي به جلد گرفتار ڪيو ويندو. هن چيو ته رشيد گوڊيل جي حملي جي سخت لفظن ۾ مذمت ڪيون ٿا ۽ اهڙن واقعن جي روڪٿام لاءِ دهشتگرديءَ ۾ ملوث عنصرن جي خلاف وڌيڪ منظم انداز ۾ ڪاروائيءَ جي ضرورت آهي.

 

مولانا فضل الرحمان، ايم ڪيو ايم کي استعيفائن جي معاملي تي ڳالهين جي ٻئي دور لاءِ راضي ڪري ورتو

ڪراچي(اسٽاف رپورٽر) جـي يو آءِ سربراهه مولانا فضل الرحمان، ايم ڪيو ايم کي استعيفائن جي معاملي تي ڳالهين جي ٻئي دور لاءِ راضي ڪري ورتو، جيڪو اسلام آباد ۾ ٿيندو، مولانا فضل الرحمان جو چوڻ آهي ته اميد آهي ته متحده بهتر رويو جاري رکندي. جي يو آءِ اڳواڻ مولانا فضل الرحمان ڪراچي ۾ ايم ڪيو ايم جي مرڪز نائين زيرو تي پهتو ته متحده ڪارڪنن سندس روايتي طريقي سان شاندار آجيان ڪئي. ايم ڪيو ايم اڳواڻ رشيد گوڊيل تي حملي جي خبر اچڻ بعد خوشگوار ماحول ۾ ٿيندڙ ڳالهيون روڪيون ويون. مولانا فضل الرحمان، رشيد گوڊيل تي حملي جي مذمت ڪندي مطالبو ڪيو ته حملو ڪندڙن کي بنا دير گرفتار ڪيو وڃي. ڪجهه دير کانپوءِ ايم ڪيو ايم اڳواڻن ۽ مولانا فضل الرحمان وچ ۾ ٻيهر ڳالهيون ٿيون. ڳالهين کانپوءِ مولانا فضل الرحمان سان گڏ پريس ڪانفرنس ڪندي متحده اڳواڻ ڊاڪٽر فاروق ستار چيو ته جي يو آءِ سربراهه ٽياڪڙي طور نائين زيرو آيو. هن چيو ته مولانا فضل الرحمان کين اچي مڃايو آهي ۽ چيو ته ايم ڪيو ايم پارليامينٽ ۾ رهندي مسئلا حل ڪري. فاروق ستار چيو ته الطاف حسين ۽ هنن مولانا فضل الرحمان تي اعتماد ڪيو آهي. هن چيو ته جــَي يــُو آءِ سربراهه سان ڳالهيون جاري هيون ته رشيد گوڊيل تي حملي جي خبر ملي، حملو بزدلاڻي ڪارروائي ۽ ڳالهين کي نقصان پهچائڻ جي ڪوشش آهي. ان موقعي تي مولانا فضل الرحمان چيو ته هــُو خير سگالي طور تي مسئلي جو حل ڪڍڻ چاهي ٿو. هن چيو ته ڪو ناراض ٿي وڃي ته ان کي پرچائڻ لاءِ وڃڻو ئي پوندو آهي، ڳالهين دوران انتهائي اهم معاملي تي ڳالهيون ٿي رهيون هيون ته رشيد گوڊيل تي حملي جي خبر ڏني وئي. مولانا فضل الرحمان چيو ته هـُو الطاف حسين ۽ سندس ساٿين جو ٿورائتو آهي جن افسوسناڪ واقعي باوجود بهتر رويو اختيار ڪيو، اميد آهي ته ايم ڪيو ايم ايئن ئي رويو جاري رکندي. جي يو آءِ سربراهه چيو ته ڳالهين جو ٻيو دورو اسلام آباد ۾ ٿيندو جنهن لاءِ ايم ڪيو ايم اڳواڻ راضي ٿي ويا آهن. ياد رهي ته ايم ڪيو ايم طرفان اسيمبلين ۽ سينيٽ تان استعيفائون ڏيڻ بعد حڪومت انهن کي منظور نه ڪرڻ جو فيصلو ڪيو ۽ متحده جا خدشا ختم ڪرڻ لاءِ مولانا فضل الرحمان کي ٽياڪڙيءَ جو ڪردار ادا ڪرڻ لاءِ ڪراچي پهتو.

 

ريحام خان آئنده تحريڪ انصاف جي ڪنهن به تقريب ۾ شرڪت نه ڪندي:عمران خان

اسلام آباد(بيورو) پِي ٽِي آءِ چيئرمين عمران خان چيو آهي ته سندس گهر واري ريحام خان آئنده تحريڪ انصاف جي ڪنهن به تقريب ۾ شرڪت نه ڪندي، کيس نه پارٽي ۾ ڪو عهدو ڏنو پيو وڃي ۽ نه ئي ڪو پروٽوڪول ڏنو پيو وڃي. سماجي رابطن واري ويب سائيٽ ٽوئٽر تي پنهنجي پيغام ۾ عمران خان اين اي 19 هري پورجي ننڍي چونڊ ۾ شڪست کانپوءِ سوشل ميڊيا تي ريحام خان کي تنقيد جو نشانو بڻائڻ تي افسوس جو اظهار ڪيو. پي ٽي آءِ سربراهه چيو ته ريحام خان تحريڪ انصاف جي اميدوار جي چوڻ تي تڪ ۾ وئي ۽ اها ڳالهه رڪارڊ جو حصو آهي ته هـُن هميشه پي ٽي آءِ ميمبرز ۽ خاص طور عورتن طرفان گهـُرائڻ تي ئي ڪنهن به تقريب ۾ شرڪت ڪئي. عمران خان چيو ته سندس گهر واري ريحام خان آئنده تحريڪ انصاف جي ڪنهن به تقريب ۾ شرڪت نه ڪندي، کيس نه پارٽي ۾ ڪو عهدو ڏنو پيو وڃي ۽ نه ئي ڪو پروٽوڪول ڏنو پيو وڃي.

 

شهيد شجاع خانزاده جو دهشتگرديءَ جي خاتمي وارو مِشن مڪمل ٿيڻ تائين جاري رهندو: شهباز شريف

لاهور(اي پي پي) پنجاب جي وڏي وزير محمد شهباز شريف اڱاري ڏينهن هدايتون ڏنيون آهن ته دهشتگردن ۽ سندن سهولت ڪارن خلاف آپريشن کي تيز ڪيو وڃي، امن امان جي صورتحال بابت هڪ اجلاس جي صدارت ڪندي هن پنجاب جي اڳوڻي گهرو وزير شجاع خانزاده جي شهادت کي قومي سانحو قرار ڏنو ۽ چيو ته ملڪ هڪ بهادر ۽ پاڻ ارپيندڙسياستدان کان محروم ٿي ويو آهي. هن چيو ته شهيد جون خدمتون ڊگهي عرصي تائين ياد رکيون وينديون، هن شهيد جي مشن کي دهشتگرديءَ جي مڪمل خاتمي لاءِ جاري رکڻ جو عزم ڪيو. پنجاب جي وڏي وزير چيو ته دهشتگرد قوم جي دهشتگرديءَ خلاف ويڙهه واري عزم کي ڪمزور نٿا ڪري سگهن. هن چيو ته دهشتگردن ۽ کين سهولتون فراهم ڪندڙن سان کُلي جنگ آهي ۽ دهشتگردي توڙي انتهاپسنديءَ جون پاڙون پٽيون وينديون ته جيئن اسان جي ڌرتيءَ کي محفوظ ۽ پرامن بڻائي سگهجي. هن عوام کي سيڪيورٽي فراهم ڪرڻ لاءِ مضبوط قدم کڻڻ جون هدايتون ڏنيون. ميان محمد شهباز شريف چيو ته انٽيليجنس سسٽم کي وڌيڪ مؤثر بڻائڻ جي ضرورت آهي ۽ پوليس توڙي قانون لاڳو ڪندڙ ادارن کي متحرڪ انداز ۾ پنهنجون ذميواريون نڀائڻيون پونديون.

 

بالي ووڊ اداڪار تبو پنهنجي ايندڙ فلم ۾ آواز جو جادو جاڳائيندي

ممبئي(شوبز نيوز)پنهنجي مضبوط اداڪاري جي ذريعي بالي ووڊ ۾ شهرت ماڻيندڙ اداڪارا تبو هاڻي پنهنجي ايندڙ فلم ۾ آواز جو جادو به جاڳائيندي. ڀارتي ميڊيا مطابق تبو هنن ڏينهن ۾ پنهنجي ايندڙ فلم “مسنگ” جي عڪس بندي ۾ رڌل آهي، فلم ۾ ان جي مقابلي ۾ منوج واجپائي اداڪاري جا جوهر ڏيکاريندو، فلم ۾ هن اداڪاري کان سواءِ پنهنجي آواز جو جادو به جاڳايو. تبو جو چوڻ آهي ته هن ڳائڻ جي باقائده تربيت ناهي ورتي پر فلم جي ميوزڪ ڊائريڪٽر ايم ايم ڪريم جو0 چوڻ آهي ته هو ڳائڻ جي دوران رڳو سندس هدايت تي عمل ڪري ۽ هن ائين ئي ڪيو، هاڻي ان کي پسند ڪرڻ يا نه ڪرڻ  تبو کي چاهيندڙ تي ٻڌل آهي.

 

ڪراچي ۾ لان جي نون ڪپڙن جي نمائش لاءِ فيشن شو، عورتون موهجي پيون

ڪراچي(شوبز نيوز) : ڪراچي ۾ لان جي ڪپڙن جي نئين ڊزائن پيش ڪرڻ لاءِ رنگا رنگ فيشن شو ٿيو، عورتن وڻندڙ ايمبر ائيڊي وارا ڪپڙا خوب پسند ڪيا، ڪراچي جي مقامي مال ۾ لان جي ڪپڙن جي نئين مقامي برانڊ کي لانچ ڪرڻ لاءِ فيشن شو ٿيو، جنهن ۾ ماڊلز جديد ڀرت ۽ ٿوري ايمبرائيڊري سان سينگاريل لباس ريمپ تي پيش ڪيا،ان موقعي تي ڊزائنر افشان فاروق چيو ته هن پنهنجي ڊزائنر ۾ روايت ۽ جدت ٻنهي کي گڏ ڏيکارڻ جي ڪوشش ڪئي آهي، فيشن شو ۾ عورتن جو وڏي انگ موجود هو، جن ڪپڙن ۾ گهري دلچسپي ڏيکاري.