تازيون خبرون

Daily Archives: August 8, 2015

ماهرا خان فلم رئيس ۾ اداڪار نوازالدين صديقي سان بولڊ سين ڪرڻ کان انڪار ڪري ڇڏيو

ممبئي (شوبز نيوز) بالي ووڊ فلم ”رئيس“ ۾ ڪم ڪندڙ پاڪستاني اداڪارا ماهرا خان بابت چيو پيو وڃي ته هن فلم ۾ اداڪار نوازالدين صديقي سان بولڊ سين ڪرڻ کان انڪار ڪري ڇڏيو آهي، بالي ووڊ ذريعن موجب فلم ۾ ريپ سين جو حصو ٿيڻ کان ماهرا خان کتو جواب ڏئي ڇڏيو، جيڪو کيس نوازالدين صديقي سان گڏ ڪرڻو هو. واضح رهي رئيس فلم ۾ ماهرا خان مرڪزي ڪردار ۾ نظر ايندي جڏهن ته ان سان گڏ شاهه رخ خان به مرڪزي ڪردار ۾ هوندو، ٻين اداڪارن ۾ نوازالدين صديقي، فرحان اختر به شامل آهن. فلمي پنڊتن موجب ماهرا کي سندس ڊرامي همسفر ڪري بالي ووڊ ۾ انٽري ملي پر سندس شاهه رخ خان سان گڏ اچڻ هن لاءِ خوش قسمتي کان گهٽ ناهي.

 

بالي ووڊ اداڪارا دپيڪا پڊڪون ڊپريشن کي هڪ اهم بيماري قرار ڏئي ڇڏيو

ممبئي (شوبز نيوز) بالي ووڊ اداڪارا دپيڪا پڊڪون ڊپريشن کي هڪ اهم بيماري قرار ڏيندي چيو آهي ته ان بابت آگاهي ڏيڻ گهرجي، ماضي ۾ ڊپريشن يا ذهني دٻاءُ جو شڪار رهندڙ اداڪارا چيو ته اهو مسئلو تمام حساس آهي جيڪو هاڻي سموري ملڪ ۾ پکڙجي چڪو آهي. هن چيو ته جڏهن هو ڊپريشن جو شڪار ٿي هئي ته کيس احساس ٿيو ته ان کي ڪنٽرول ڪرڻ ڪيترو ڏکيو آهي. ان حوالي سان هن ٽوئيٽر تي ڊپريشن خلاف ادارو قائم ڪرڻ جو اعلان ڪيو ۽ ان جو نالو ”لِو لُو لاف“ ڊپريشن خلاف فائونڊيشن جو نالو ڏنو ويو آهي ۽ هو ان کي جلد مارڪيٽ ۾ آڻڻ جو ارادو رکي ٿي.

 

استاد ۽ شاگرد جو رشتو دوستي جو رشتو هوندو آهي: يمي گوتم

ممبئي (شوبز نيوز) بالي ووڊ اداڪاره يمي گوتم، کيس ڊانس سيکاريندڙ استاد کي سندس سالگرهه جي ڏينهن سرپرائيز ڏنو، ڀارتي ميڊيا موجب اداڪارا يمي گوتم کي پنهنجي ڊانس استاد سان ماءُ واري محبت آهي،هوءَ استاد جي سالگرهه جي ڏينهن گلن ۽ تحفن سان سندس گهر وئي، يمي جو ان حوالي سان چوڻ آهي ته استاد ۽ شاگرد جو رشتو دوستي جو رشتو هوندو آهي، اداڪارا جي ايندڙ فلم ”صنم رهي“ آهي، جنهن جي شوٽنگ شروع ٿي وئي آهي، فلم ايندڙ سال رليز ڪئي ويندي.

 

ارجن ڪپور بالي ووڊ انڊسٽري جو هڪ اداڪار آهي ان ڪري هن سان دوستي هئڻ ڪري گڏ گهمندي آهيان: جيڪولين

ممبئي (شوبز نيوز) بالي ووڊ جي سريلنڪائي اداڪارا جيڪولين فرنيڊيس ميڊيا ۾ سندس ۽ ارجن ڪپور جي لاڳاپن بابت خبرون اچڻ بعد سخت ردعمل ڏيندي چيو آهي ته هتي ٻن منٽن جي ملاقات کي عجيب رنگ ڏنو وڃي ٿو، هن چيو ته ارجن ڪپور بالي ووڊ انڊسٽري جو هڪ اداڪار آهي ان ڪري هن سان دوستي هئڻ ڪري گڏ گهمندي آهيان ۽ اسان وچ ۾ ڪي اعتراض جوڳا يا وري ٻيا لاڳاپا نه آهن. هن چيو ته ان کان اڳ کيس سلمان خان سان ڳنڍيو ويو ۽ اخبارن ۾ هن بابت الائي ڇا مان ڇا لکيو ويو، جيڪولين واضح ڪيو ته هو هر سوال جو جواب ڏيڻ پسند ناهي ڪندي، ميڊيا ڀلي ڪهڙا به سوال اٿاري هر ڪنهن جو جواب نه ٿي ڏئي سگهان. هن واضح ڪيو ته ارجن ڪپور هڪ سٺو دوست آهي.

 

مون مٿان ٿيل فائرنگ واري واقعي جو سيڪيورٽي  معاملي سان ڪو واسطو نه آهي: وسيم اڪرم

ڪراچي(اسپورٽس نيوز) پاڪستان ڪرڪيٽ ٽيم جي اڳوڻي ڪپتان ۽ اسٽار الرائونڊر وسيم اڪرم جو چوڻ آهي ته سندس مٿان فائرنگ وارو واقعي جو سيڪيورٽي  معاملي سان ڪو واسطو نه آهي۽ آئون پنهنجي گهر ۾ محفوظ آهيان. اربع واري ڏينهن ڪراچي جي ڪارساز روڊ تي اڳوڻي ڪپتان وسيم اڪرم سان حادثو پيش آيو، جنهن دوران هڪ گاڏي سندس گاڏي کي ٽڪر هنيو، جنهن بعد وسيم اڪرم گاڏي مان لهي ساڻس ڳالهائڻ جو ڪوشش ڪئي ته ٻنهي وچ ۾ سخت جملن جي ڏي وٺ ٿي. سخت جملن جي ڏي وٺ بعد وسيم اڪرم جي گاڏي کي ٽڪر هڻندڙ گاڏي مان گارڊ لٿو ۽ هن ڪاوڙ ۾ فائرنگ شروع ڪئي ۽ وسيم اڪرم جي گاڏي جي ٽائرن ۾ فائر ڪرڻ بعد گاڏي ۾چڙهي  فرار ٿي ويو. اهڙي واقعي بعد وسيم اڪرم جي سيڪيورٽي سخت ڪئي وئي آهي، جنهن لاءِ پوليس جي وڌيڪ نفري هاڻي وسيم اڪرم سان گڏ هوندي. نيشنل ڪرڪيٽ اسٽيڊيم۾ جاري فاسٽ بالنگ ڪيمپ ۾ وسيم اڪرم جي نگراني هيٺ جاري ٽريننگ ڪيمپ جي سيڪيورٽي پڻ وڌائي وئي آهي. ميِڊيا سان ڳالهائيندي وسيم اڪرم جو چوڻ هو ته آئون پنهنجي سمورن مداحن جو ٿورائتوآهيان، جن منهنجي وڏي عمر جون دعائون گھريون. هن چيو ته اربع واري شام پيش آيل واقعي بعد حالتن کي بهترانداز سان سنڀاليوويو.

 

يونس خان به سرفراز احمد جي حمايت ۾ ميدان ۾ لهي آيو

ڪراچي(اسپورٽس نيوز) پاڪستان ڪرڪيٽ ٽيم جي مڊل آرڊر بيٽسمين يونس خان به سرفراز احمد جي حمايت ۾ ميدان ۾ لهي آيو آهي. ان سلسلي ۾ سندس چوڻ آهي ته سرفراز هر قسم جي ڪرڪيٽ ۾ پاڻ مڃرايو آهي، کيس ٽيم ۾ شامل ڪرڻ گھرجي. گذريل ڏينهن ڪراچي ۾ يونس خان، سرفراز احمد ۽ انور علي فٽبال ميچ ۾ شرڪت ڪئي. ميچ کانپوءِ ميڊيا سان ڳالهائيندي يونس خان جو چون هو ته ڪارڪردگي يکاريندڙ رانديگرن کي ساراهڻ گھرجي، ڪپتان هجان ها ته سرفراز خان کي پنهنجي ٽيم ۾ شامل ڪريان ها. سرفراز احمد جهڙن رانديگرن جي ساراهه ٿيڻ گھرجي. ان کي ٽيم ۾ شامل ڪرڻ گھرجي. هُن هر فارميٽ ۾ بهترين ڪارڪردگي ڏيکاري آهي. هن چيو ته مون  پنهنجي ڪيريئر ۾ ڪا به غلطي ناهي ڪئي. يونس خان موجب پاڪستان ۽ ڀارت وچ ۾ ڪرڪيٽ ميچ ٿيڻ گھرجن.

 

پاڪستان ۽ پاڪستاني عوام جي لاءِ دعاگو آهيان: باڪسر عامر خان

لاهور(اسپورٽس نيوز) پاڪستاني نسل جي برطانوي باڪسر عامر خان چيو آهي ته منهنجي خوائش آهي ته آمريڪي باڪسر فلائيڊ ميويڌر سان مقابلو ڪري پر آمريڪي باڪسر مونسان فائيٽ ڪرڻ کان لنوائي رهيو آهي. لاهور ۾ داتا درٻار جي مزار تي حاضري ڀرڻ کانپوءِ ميڊيا سان ڳالهائيندي عامرخان جو چوڻ هوته آئون هميشه پاڪستان جي عزت کي اهيمت ڏيندو رهيو آهيان. عامر خان وڌيڪ چيو ته پاڪستان ۽ پاڪستاني عوام جي لاءِ دعاگو آهيان. برطانوي باڪسر جو وڌيڪ چوڻ هو ته منهنجي خوائش آهي ته آمريڪي باڪسر فلائيڊ ميويڌر ساڻس مقابلو ڪري ۽ هن کيس مقابلو ڪرڻ جي دعوت به ڏني آهي، پر آمريڪي باڪسر فائيٽ کان لنوائي رهيو آهي.

 

انگلينڊ جي فاسٽ بالر اسٽورٽ براڊ تباهي مچائي ڇڏي

نوٽنگهم(اسپورٽس نيوز) انگلينڊ جي فاسٽ بالر اسٽورٽ براڊ تباهي مچائي ڇڏي ۽ ايشز سيريز جي چوٿين ٽيسٽ جي پهرين اننگز ۾ 8 وڪيٽون وٺي ڪينگروز جون وايون بتال ڪري ڇڏيون، جنهن سبب مهمان ٽيم 60 رنسن تي ڍير ٿي وئي. چوٿين ٽيسٽ ميچ جي پهرين اننگز ۾ آسٽريليا بيٽنگ شروع ڪئي ته اسٽورٽ براڊ قهر بڻجي ڪينگروز تي ڪڙڪي پيو، هن پهرين ئي اوور ۾ ڪرس راجر ۽ اسٽيون سمٿ کي پويلين جو رستو ڏيکاري ڇڏيو. ان کانپوءِ ٻئي اوور جي ٻي بال تي هُن مارڪ وڊ وري ڊيوڊ وارنر کي آئوٽ ڪري ورتو. 1950 ع کانپوءِ ايشز جي تاريخ ۾ اهو پهريون ڀيرو هو جو ڪنهن به ٽيم جا اوپنر ٻڙي تي آئوٽ ٿيا، 1950ع ۾ برسبين ۾ کيڏيل ٽيسٽ ميچ ۾ آرٿر مورس ۽ جيڪ مورني ٻڙي تي آئوٽ ٿيندڙ اوپنر هئا. براڊ پنهنجي تباهي آڻيندڙ بالنگ جو سلسلو جاري رکيو ۽ شان مارش کي پويلين موٽائي ڇڏيو، جڏهن آسٽريليا جو اسڪور 21 تي پهتو ته ايڊم ووڪس به آئوٽ ٿي ويو، اهو 75 سالن جي تاريخ ۾ پهريون ڀيرو هو جو آسٽريليا ڪنهن به ايشز ٽيسٽ دوران 21 رنسن تي 5 وڪيٽون وڃايون، آسٽريليا جون شروعاتي 5 وڪيٽون رڳو 25 بالن اندر ڪري پيون، براڊ وري اسٽارڪ ۽ پوءِ وري آسٽريلوي اننگز ۾ سڀ کان وڌيڪ 13 رنسون ٺاهيندڙ مچل جانسن کي به پويلين موٽائي ڇڏيو، ان موقعي تي آسٽريليا جو اسڪور 47 هو ۽ 9 وڪيٽون ڪرڻ سبب ان کي پنهنجي ٽيسٽ ڪيريئر جي سڀ کان گهٽ اسڪور 53 تي آئوٽ ٿيڻ جو چيلينج سامهون اچي ويو، پر آخري وڪيٽ تي معمولي مزاحمت سان اسڪور 60 تائين پهچايو ويو، جنهن کانپوءِ براڊ آسٽريلين اننگز ويڙهي ڇڏي، اسٽورٽ براڊ شاندار بالنگ ڪرائيندي رڳو 15 رنسون ڏئي 8 وڪيٽون ورتيون، آسٽريليا جا 9 بيٽسمين ته ڊبل فگرز ۾ ئي نه پهتا ۽ سڄي ٽيم 18 ڏهائي 3 اوورن ۾ 60 رنسن تي ڍير ٿي وئي.

 

پارليامينٽ جي بالادستي لاءِ يڪراءِ قرارداد منظور

 

وزيراعظم جي ڪوششن کانپوءِ ايم ڪيو ايم ۽ جمعيت علماءِ اسلام (ف) تحريڪ انصاف خلاف التوا واريون رٿون واپس وٺي ڇڏيون آهن. قومي اسيمبلي ۾ ايم ڪيو ايم جي ميمبر محمد سلمان خان بلوچ پنهنجي سمورن ساٿين پاران پي ٽي آءِ جي 28 ميمبرن جون سيٽون خالي ڪرڻ جي حوالي سان رٿ واپس ورتي. جي يو آءِ (ف) جي ميمبر نعيمه ڪشور خان چيو ته مولانا فضل الرحمان جمهوريت ۽ آئين جي سربلندي جي لاءِ ڪردار ادا ڪندي حقيقي معنيٰ ۾ قائد هجڻ جو ثبوت ڏنو آهي. هن پنهنجي پاران ۽ پنهنجي سمورن ساٿين پاران پي ٽي آءِ جي ميمبرن کي سيٽن کان محروم ڪرڻ جي حوالي سان رٿون واپس ورتيون. قومي اسيمبلي پاڪستان جي آئين جي سربلندي، پارليامينٽ جي بالادستي لاءِ متفقه قرارداد منظور ڪري ورتي آهي قرارداد ۾ چيو ويو آهي ملڪ جي اسلامي ۽ جمهوري تشخص تي ڪو به ڌٻو اچڻ نه ڏنو ويندو، پارليامينٽ جي وقار ۽ تقدس جو تحفظ هر پاڪستاني جو فرض آهي، قرارداد ۾ پارليامينٽ، قومي ميڊيا ۽ پاڪستان جي عوام کي آزمائش جي گهڙيءَ ۾ آئين، جمهوريت ۽ پارليامينٽ جي تقدس لاءِ تاريخي ڪردار ادا ڪرڻ تي خراج تحسين پيش ڪيو ويو آهي. قومي اسيمبلي ۾ مولانا فضل الرحمان قرارداد پيش ڪئي ته هي ايوان 19 سيپٽمبر 2014ع تي پارليامينٽ جي گڏيل اجلاس ۾ اتفاق راءِ سان منظور ڪيل قرارداد جي تجديد ڪندي قرار ڏي ٿو ته هي ايوان الله تعاليٰ جي حاڪميت، عوام جي حق حڪمراني، آئين جي بالادستي ۽ جمهوريت جي استحڪام جي علامت آهي. هي ايوان انهن سمورين سياسي پارٽين، معزز پارليامينٽ ميمبرن، قومي ميڊيا ۽ پاڪستان جي عوام کي خراج تحسين پيش ڪري ٿو جن آزمائش جي گهڙيءَ ۾ آئين، جمهوريت ۽ پارليامينٽ جي تقدس جي لاءِ تاريخي ڪردار ادا ڪيو. هي ايوان پاڪستان جي دفاع، سلامتي، اتحاد ۽ يڪجهتي ۽ وفاق جي تحفظ جي علامت آهي. هن ايوان جي وقار ۽ تقدس جو تحفظ هر پاڪستاني جو فرض آهي خاص طور تي جمهوري عمل ۾ شامل اهي پارٽيون جيڪي عوامي مينڊيٽ جي ترجماني ڪن ٿيون هن ايوان ۾ موجود آهن انهن تي لازمي آهي ته ايوان جي مرتبي ۽ مقام جو ڀرپور احترام ڪن. هي ايوان 2013ع جي چونڊن بابت انڪوائري ڪميشن جي جامع رپورٽ ۽ آئيني ترميمن بابت اعليٰ عدليه جي تاريخي فيصلي جي موقعي تي هن عزم کي ورجائي ٿو ته پاڪستان جي آئين جي سربلندي، پارليامينٽ جي بالادستي ۽ ملڪ جي اسلامي ۽ جمهوري تشخص تي ڪوبه ڌٻو اچڻ نه ڏنو ويندو. ايوان ان قرارداد جي اتفاق راءِ سان منظوري ڏئي ڇڏي.

ٻوڏ متاثرن کي هندو هئڻ سبب واهر ڪرڻ کان کتو جواب

مانجهند لڳ ڳوٺ حاجي احمد خاصخيلي ۾ زميندار وٽ پناھ ورتل ڳوٺ اوڪو ڪولهي جي ٻوڏ متاثرن کي انتظاميه مذهب جي بنياد تي نظر انداز ڪري ڇڏيو هندو هئڻ سبب واهر ڪرڻ کان کتو جواب ڏئي ڇڏيو. درياءُ جي چاڙھ سبب ٻڪريون، مينهون، اناج، بسترا ۽ ٻيو سامان پاڻي ۾ لڙهي وڃڻ سبب صرف جانيون  بچائي زميندار اصغر خاصخيلي جي ڳوٺ ۾ پهتل ڪولهي قبيلي جا خاندان بيماري سان گڏ دربدري واري زندگي گذارڻ تي مجبور آهن، بکن ۾ پاھ ٿيل معصوم ٻار انگ اگهاڙي گاھ تي سمهڻ ۽ پاڙي اوڙي مان ماني ٽڪر پني گذارو ڪرڻ لڳا. اهڙي عمل خلاف ڳوٺ اوڪو ڪولهي جي متاثرن ارجن، شگن، پرڀو عورتن ۽ ٻارڙن سميت احتجاج ڪندي دانهيو ته رليف صرف بااثرن کي ملي رهيو آهي جيڪي ٻوڏ متاثر به نه آهن، جنهن سبب دربدري واري زندگي گذاري رهيا آهيون هن ٻڌايو ته زميندار ٻيڙين جي مدد نه ڪري ها ته سڄي ڳوٺ وارا لڙهي وڃن ها. هن مطالبو ڪيو ته کين مذهب جي بنياد تي نظر انداز ڪرڻ بند ڪري سندن سهائتا ڪئي وڃي رابطو ڪرڻ تي مختيارڪار ٻڌايو ته انهن بابت  مون کي خبر نه هئي هاڻي تپيدار موڪليان ٿو جيڪي انهن کي رجسٽرڊ ڪندو جنهن بعد کين امداد ڏني ويندي.

 

ملڪ ۾ وڏي راند لاءِ ننڍي راند شروع؛عاجز جمالي

سپريم ڪورٽ فوجي عدالتن ۽ ارڙهين ترميم ٻنهي جي حق ۾ هڪ ئي وقت فيصلو ڏيئي سڀني کي خوش ڪري ڇڏيو آهي. سنڌي چوڻي ”ڪل پيران دا خير“ وانگر سڀ چپ ٿي ويا. ملڪ جي سياست تي وکريل کوڙ سارا مامرا هڪ ٻئي سان ڳنڍيل آهن پر سڀني مامرن جي هڪ ئي نشست ۾ تجزيو ڪرڻ سولو ڪم ناهي پر ننڍين ننڍين ڳالهين کي سمجهڻ سان سڀ کان وڏي ڳالهه سمجهه ۾ اچي ويندي. سپريم ڪورٽ جي فيصلي کان اڳ ڌانڌلين بابت ڪميشن جو فيصلو آيو، جنهن عمران خان جي سياست کي ائين غوطا کارايا جيئن سنڌ جي ڪچي ۾ هن وقت آيل ٻوڏ مان نڪرندڙ ماڻهو کائي رهيا آهن. غوطا کائي جان بچائي ٻوڏ کان نڪري هو جڏهن ميدان تي اچن ٿا ته سندن مدد لاءِ ڪير به نظر ڪونه پيو اچي. لڳ ڀڳ اهڙي ئي صورتحال عمران خان سان هئي. وري قومي اسيمبلي ۾ مولانا فضل الرحمان ۽ ايم ڪيو ايم کانئس پراڻو حساب چڪتو ڪرڻ لاءِ کين اسيمبلي مان ٻاهر ڪڍڻ لاءِ واويلا شروع ڪئي. خير ڪالهه اهو مسئلو ته حل ٿي ويو پر عمران خان جي سياست جو گراف لاڳيتو هيٺ ئي اچي پيو. وٽس ان اسيمبلي ۾ ويهڻ کانسواءِ ڪو رستو ناهي، جيڪا اسيمبلي کيس مسلسل خوار ڪري رهي آهي. هڪ طرف عمران خان کي اڳيان رکو ۽ پوءِ اڳتي وڌو. سپريم ڪورٽ جي فيصلي اهو تاثر ڏنو آهي ته وفاقي سرڪار، عدليه ۽ فوج هڪ ئي وانگر سوچن پيا، جنهن لاءِ اڄڪلهه هڪ ئي پيج يا هڪ ئي صفحو استعمال ڪجي ٿو، پر هن ڪالم جي هڪ ئي پيج تي هڪ ئي وقت ۾ مون ڪيترائي تضاد لکيا. سو هڪ ئي پيج تي گڏ هوندي به ساڳئي وقت ڪيترائي تضاد به گڏوگڏ هوندا آهن. هڪ تضاد جنهن جو ذڪر ڪجهه ڏينهن اڳ چوڌري نثار ڪيو، سندس چوڻ هو ته ڪجهه جنرلن جي مرضي نه هلندي، سڄي قوم ۽ سرڪار جنرل راحيل شريف سان گڏ آهي. سپريم ڪورٽ جي فيصلي ۽ چوڌري نثار جي ان بيان کي نظر ۾ رکندي فوجي جرنيلن جي ڪورٽ مارشل واري فيصلي کي ڏسو جو اين ايل سي اسڪينڊل ۾ کين سزائون ڏنيون ويون آهن. سپريم ڪورٽ فوجي ڪورٽن کي جائز ڏيکاريو ۽ جنرل راحيل شريف فوجين کي سزائون ڏيئي ان فيصلي کي وڌيڪ سگهارو ثابت ڪيو. فوجي عدالتن کي جائز قرار ڏيئي هڪ طرف جمهوريت ۽ پارليامينٽ کي چماٽون هنيون ويون پر ٻار کي چماٽ هڻي چپ ڪرائڻ لاءِ کيس ڪجهه نه ڪجهه ڏنو ويندو آهي، تيئن قوم کي ۽ سياستدانن کي چپ ڪرائڻ لاءِ وري ارڙهين ايڪيهين ترميمن کي به درست قرار ڏنو ويو. سڀ طاقتور ڌريون ماٺ رهن، اصل واڳ ڌڻين کي جيڪو ڪرڻو هوندو، هو سولائي سان ڪري سگهندا. هن پسمنظر سان وري ڪراچي آپريشن ۽ ايم ڪيو ايم سان اسٽيبلشمينٽ جي ويڙهه کي نظر ۾ رکي اڳتي وڌون ٿا. اڄ سنڌ اسيمبلي جو اجلاس آهي. پيپلز پارٽي کانسواءِ باقي ٻيون پارٽيون الطاف حسين خلاف مذمتي قراردادون جمع ڪرائي چڪيون آهن پر سنڌ اسيمبلي ۾ پيپلزپارٽي جي مرضيءَ کانسواءِ هو قراردادون منظور ڪرائي نه ٿيون سگهن. ڇو ته وٽن عددي اڪثريت ڪانهي. هن کان اڳ به سنڌ اسيمبلي ۾ ايم ڪيو ايم خلاف ٺهراءُ ايندا رهيا آهن پر پيپلز پارٽي جي مخالفت سبب اهي منظور نه ٿي سگهيا. اڄ پيپلزپارٽي لاءِ نئون امتحان هوندو پر خبر پئي آهي ته پيپلزپارٽي جو موڊ بدلجي چڪو آهي، ڪرپشن جي مامرن ۾ واڳ ڌڻين پيپلزپارٽي کي اڳي ئي سوڙهو ڪيو. ان ڪري اهو امڪان آهي ته پيپلزپارٽي هن ڀيري سنڌ اسيمبلي ۾ ايم ڪيو ايم کي بچائڻ جي ڪوشش نه ڪري، ائين ان اسيمبلي ۾ ايم ڪيو ايم خلاف قرارداد منظور ٿي ويندي، جنهن اسيمبلي ۾ ايم ڪيو ايم خود به موجود هوندي، پر ايم ڪيو ايم جو ردعمل ڇا هوندو اهو الڳ سوال آهي؟سنڌ اسيمبلي جو اجلاس اڄ کان شروع ٿيندو، هفتو ڏيڍ هلندو، ڏسجي ته مسلم ليگ فنڪشنل، مسلم ليگ (ن) ۽ پي ٽي آءِ جي قراردادن جو سنڌ اسيمبلي ڪهڙو فيصلو ٿي ڪري؟ ايم ڪيو ايم جي سرواڻ بابت اسٽيبلشمينٽ ظاهر آهي ته فيصلو ڪري چڪي آهي. ايم ڪيو ايم مڃي يا نه پر مائنس الطاف حسين جو فيصلو ٿي چڪو آهي. اسان جا ڪجهه دوست خام خيالي ۾ آهن ته شايد ايم ڪيو ايم ختم ٿي ويندي، ائين بلڪل به نه سوچيو. 1992ع کان وٺي 1993ع جي عام چونڊن تائين سوچيو يا سنڌ اسيمبلي جي تڏهوڪين سيٽن جا انگ اکر کڻو، ڳالهه سمجهه ۾ اچي ويندي. سڄي صورتحال جي نتيجي جي ڪا به خبر ناهي. ايندڙ سال چوڌري افتخار پنهنجي نئين پارٽي سميت ميدان ۾ ايندو، سندس پارٽي عمران خان جي پارٽي ۾ ٻوڏ آڻيندي. تيستائين ايم ڪيو ايم جي نئين شڪل به چٽي ٿي چڪي هوندي، جنرل راحيل جو مدو به پورو ٿي چڪو هوندو. سپريم ڪورٽ جو چيف به نئون اچي چڪو هوندو ۽ سڀ جو سڀ اليڪشن جي تيارين ۾ لڳي ويندا. ڪجهه نوان تجربا ٿيندا، مشرف لاءِ ماحول سازگار ٿيندو. هر طاقتور اداري مان ماڻهو فارغ ٿيندا. هڪ نئون وايو منڊل ٺاهڻ جي ڪوشش ٿيندي. پيپلزپارٽي ۽ نواز ليگ ٻئي مشڪلات ۾ اينديون، هڪ نئين ڪنگز پارٽي لاءِ ڪم شروع ٿي چڪو آهي. مارچ 2019ع کانپوءِ نوان قصا شروع ٿي سگهن ٿا. اڄڪلهه جي سڄي راند ان وڏي راند جي ريهرسل آهي پر گهڻيون ڳالهيون اڃا چٽيون ناهن. ڪرپشن جي نالي تي ڪجهه صفائي کانپوءِ شايد منظرنامون سمجهه ۾ اچي وڃي.