تازيون خبرون

Daily Archives: August 7, 2015

هالي ووڊ جي فلم واريئر جي ري ميڪ برادرس ڪليش آف فائيٽرز کي 14 آگسٽ تي رليز ڪيو پيو وڃي

ممبئي (شوبز نيوز) هالي ووڊ جي فلم واريئر جي ري ميڪ برادرس ڪليش آف فائيٽرز کي 14 آگسٽ تي رليز ڪيو پيو وڃي، فلم جي پروموشن لاءِ هڪ تقريب ڀارتي شهر ممبئي ۾ ٿي، جنهن ۾ اداڪار اڪشي ڪمار ۽ سڌارٿ ملهوترا سميت فلم جي ٻي ڪاسٽ شرڪت ڪئي.بالي ووڊ فلم برادرس ۾ اڪشي ڪمار ۽ سڌارٿ ملهوترا کي اينيميشن واري مَوڊ ۾ ڏيکاريو ويو آهي، جڏهن ته فلم موبائيل گيمز تي ٻڌل آهي. اڪشي ڪمار جو چوڻ آهي ته آئوٽ ڊور رانديون جيئن جسماني صحت لاءِ ضروري هونديون آهن، تيئن آن لائين گيمز ذهني آسودگي لاءِ مفيد ٽوٽڪو آهن. فلم ۾ اڪشي ڪمار ۽ اداڪاره جيڪولين فرنينڊز مک ڪردار ادا ڪيا آهن، جڏهن ته اها فلم هالي ووڊ جي 2011 واري سپر هٽ فلم واريئرز جو ري ميڪ آهي. فلم مڪس مارشل آرٽ تي ٻڌل آهي، فلم کي پاڪستان جي آزادي واري ڏينهن يعني 14 آگسٽ تي رليز ڪيو پيو وڃي.

 

هالي ووڊ فلم ” آئرن مين“ جي اسٽار رابرٽ ڊائوني سڀني کي پوئتي ڌڪي ڇڏيو

نيويارڪ(شوبز نيوز) آمريڪي ميگزين فوربز دنيا جي سڀ کان وڌيڪ ڪمائي ڪندڙ اداڪارن جي فهرست جاري ڪري ڇڏي آهي، جنهن مطابق هالي ووڊ فلم ” آئرن مين“ جي اسٽار رابرٽ ڊائوني سڀني کي پوئتي ڌڪي ڇڏيو آهي. فوربز مطابق 50 ورهين جي رابرٽ ڊائوني جون 2014ع کان جون 2015ع تائين 8 ڪروڙ ڊالر ڪمايا آهن، سندس ڪمائي ۾ وڏو هٿ فلم ” اوينجر ايج آف الٽرون“ جو آهي، جنهن سڄي دنيا ۾ هڪ ارب ڊالرن کان وڌيڪ ڪاروبار ڪيو. ٻئي نمبر تي چيني اداڪار جيڪي چن جو نالو آهي، جنهن 5 ڪروڙ ڊالر ڪمايا، ٽئين نمبرتي ” فاسٽ اينڊ فيورس“ فلمن جو اداڪار ون ڊيزل آهي، جنهن 4 ڪروڙ 70 لک ڊالر ڪمايا آهن.

 

سلمان خان پنهنجي بلاڪ بسٽر فلم” ڪڪ“ جي سيڪوئل ۾ ڊبل رول ۾ نظر ايندو

ممبئي(شوبز نيوز) بالي ووڊ دبنگ سلمان خان پنهنجي بلاڪ بسٽر فلم” ڪڪ“ جي سيڪوئل ۾ ڊبل رول ۾ نظر ايندو، ڀارتي ميڊيا مطابق سلمان خان پنهنجي هڪ انٽرويو دوران ” ڪڪ“ جي سيڪوئل ۾ ڪم ڪرڻ جي تصديق ڪئي آهي، سندس چوڻ هو ته فلم جي ڪهاڻي تمام گهڻي سٺي آهي، جنهن ۾ هو ڊبل رول ادا ڪندو، فلم جي اسڪرپٽ تي به ڪم شروع ڪيو ويو آهي. فلم جي هدايتڪار ۽ پروڊيوسر ساجد نڊياوالا جو چوڻ هو ته ” ڪڪ“ جي سيڪوئل جواسڪرپٽ ايندڙ ٻن کان ٽن مهينن اندر تيار ٿي ويندو، جڏهن ته فلم لاءِ ٻين اداڪارن جي چونڊ اڃا ناهي ڪئي وئي، واضح رهي ته سلمان خان ان کان پهرين ڪرن ارجن ۽ جڙوان ۾ به ڊبل رول ادا ڪري چڪو آهي

 

ڪروڙين دلين تي راڄ ڪندڙ بالي ووڊ سندري ڪاجول جي نئين فلم ”دل والي“ هلندڙ سال ڊسمبر ۾ رليز ٿيندي

ممبئي(شوبز نيوز) ڪروڙين دلين تي راڄ ڪندڙ بالي ووڊ سندري ڪاجول جي نئين فلم ”دل والي“ هلندڙ سال ڊسمبر ۾ رليز ٿيندي. بالي ووڊ ڪنگ شاهه رخ خان سان گڏ فلمن ۾ ڪم ڪري مشهوري ماڻيندڙ من موهڻي اداڪارا ڪاجول کي ڀارتي فلم انڊسٽري ۾ ڪم ڪندي 23 سالن جو مدو گذري چڪو آهي، ان دوران هُن ڪيتريون ئي ڪامياب فلمون ڏنيو. 1992ع ۾ هُن پنهنجي پهرين فلم ”بي خودي“ ۾ ڪم ڪيو، ان کانپوءِ شاهه رخ خان سان گڏ مشهور فلم ”دل والي دلهنيان لي جائينگي“ ڪيائين، جنهن ٻنهي اداڪارن کي شرت جي بلندين تائين پهچائي ڇڏيو. ڪاجول ۽ شاهه رخ خان جي ٻين بهترين فلمن ۾ پيار تو هونا هي ٿا، ڪڀي خوشي ڪڀي غم ۽ فنا شامل آهن. 2011ع ۾ ڪاجول کي ڀارت جو سڀ کان وڏو ايوارڊ ”پدماشري“ سان به نوازيو ويو هو.

 

سريلنڪن ٽيم خلاف رٿيل ٽيسٽ ميچز ۾ ڪاميابي حاصل ڪرڻ لاءِ سمورا رانديگر ڀرپور تيارين ۾ مصروف آهن: ويرات ڪوهلي

ڪولمبو(اسپورٽس نيوز) ڀارتي ڪرڪيٽ ٽيم جي نوجوان ڪپتان ويرات ڪوهلي چيو آهي ته سريلنڪن ٽيم خلاف رٿيل ٽيسٽ ميچز ۾ ڪاميابي حاصل ڪرڻ لاءِ سمورا رانديگر ڀرپور تيارين ۾ مصروف آهن ۽ هو گهڻُو پراميد آهي ته سيريز ۾ کين فتح نصيب ٿيندي. سريلنڪن ٽيم خلاف رٿيل ٽن ٽِيسٽ ميچز تي ٻڌل سيريز ۾ ڪاميابي حاصل ڪرڻ لاءِ ڀارتي ٽيم ڪولمبو ۾ ڀرپور تيارين ۾ مصروف آهي. تيارين واري سلسلي ۾ ڀارتي ٽيم جي سمورن رانديگرن مختلف ورزشون ڪرڻ بعد نيٽ ۾ بالنگ ۽ بيٽنگ جي پريڪٽيس ڪئي. پريڪٽس سيشن بعد ميڊيا سان ڳالهائيندي ڀارتي ڪپتان ويرات ڪوهلي چيو ته ميزبان ٽِيم خلاف ڪاميابي حاصل ڪرڻ لاءِ ڀرپور تياري ڪئي آهي. هن چيو ته ماضي ۾ کيس ڪپتان مقرر ڪيو ويو هو پر هو سٺي ڪارڪردگي جومظاهرو ڪري نه سگهيو هو پر هن ڀيري هو گهڻو پراميد آهي ته سيريز ۾ ڪاميابي ماڻيندو.

 

آءِ پي ايل جي اڳوڻي سربراهه للت مودي جا ضمانت نه ٿيڻ جوڳا گرفتاري وارنٽ جاري

ممبئي(اسپورٽس نيوز) ممبئي جي خاص عدالت انڊين پريميئر ليگ (آءِ پي ايل) جي اڳوڻي سربراهه للت مودي جا ضمانت نه ٿيڻ جوڳا گرفتاري وارنٽ جاري ڪري ڇڏيا آهن. ڀارتي ميڊيا مطابق خاص عدالت للت مودي جا گرفتاري وارنٽ مني لانڊرنگ جي ڪيس ۾ جاري ڪيا آهن، گذريل ڏينهن ڀارتي پارليامينٽ ۾ للت مودي کي پاسپورٽ ڏيارڻ ۾ شڪي طور مدد ڪرڻ تي پرڏيهي وزير سشما سوراج کي سخت تنقيد جو نشانو بڻايو ويو هو.

 

اسپيشل اولمپڪ گيمز ۾ شرڪت ڪرڻ بعد قومي جٿو ڪراچي  ۽ اسلام آباد پهچي ويو

ڪراچي/اسلام آباد(اسپورٽس نيوز) آمريڪي شهر لاس اينجلس ۾ منقعد ٿيل اسپيشل اولمپڪ گيمز ۾ شرڪت ڪرڻ بعد قومي جٿي ۾ شامل رانديگر ۽رانديگرياڻيون ڪراچي  ۽ اسلام آباد پهچي ويا، جتي سندس شاندار استقبال ڪيو ويو آهي. پاڪستان جي 77 رڪني جٿي آمريڪي شهر لاس اينجلس ۾ منعقد ٿيل اسپيشل اولمپڪ گيمز جي 9 راندين ۾ شرڪت ڪئي. قومي ايٿليٽس اڄ لاس اينجلس کان ڪراچي ايئر پورٽ پهچي ويا،جتي سندن آڌرڀاءِ ڪرڻ لاءِ ماڻهن جو وڏو انگ موجود هو. پاڪستان جي 77رڪني جٿي 9 راندين ۾ حصو ورتو. قومي اسپيشل ايٿليٽس مجموعي طور تي ميگا ايونٽ ۾ شاندار ڪارڪردگي جومظاهرو ڪندي 14 گولڊ، 11 چاندي ۽8 پتل جا ميڊلز حاصل ڪيا.  پاڪستان جي 77 رڪني جٿي جا ميمبر ٻن گروپس ۾ ڪراچي ۽ اسلام آباد ايئرپورٽ پهتا.

 

سرفراز احمد ٽي ٽوئنٽي ٽيم جو ايندڙ ڪپتان آهي: وقار يونس

لاهور(اسپورٽس نيوز)پاڪستاني ڪرڪيٽ ٽيم جي وڪيٽ ڪيپر سرفراز احمد کي ٽيم مان ٻاهر ڪرڻ وارن الزامن هيٺ آيل ٽيم جي هيڊ ڪوچ وقار يونس چيو آهي ته سرفراز احمد ٽي ٽوئنٽي ٽيم جو ايندڙ ڪپتان آهي. سرفراز احمد سري لنڪا خلاف ون ڊي سيريز ۾ اسان جو اهم رانديگر هو. مقامي اخبار کي انٽرويو ڏيندي پاڪسان ڪرڪيٽ ٽيم جي هيڊ ڪوچ وقار يونس جو چوڻ هو ته سرفراز احمد سان منهنجي ڪا ذاتي دشمني ناهي جو کيس ٽوئنٽي ٽوئنٽي ميچن مان ڊراپ ڪري ڇڏيان ها. هن چيو ته آئون ان کان اڳ محمد حفيظ ۽ ٻين سينئر رانديگرن کي به آرام ڪرائي چڪو آهيان، پر ان وقت ڪنهن به هُل نه ڪيو، اسان کي صورتحال جي نسبت سان فيصلا ڪرڻا پوندا آهن، اهو ئي ڪم اسان سري لنڪا ۾ به ڪيو. وقار يونس وڌيڪ چيو ته اسڪواڊ ۾ 2 وڪيٽ ڪيپر هجڻ جي ڪري مون پهريان ئي سرفراز کي گھرائي سمجھائي ڇڏيو هو ته ٽي_20 ۾ رضوان کي آزمائڻ چاهيون ٿا ۽ اُن اهو فيصلو دل سان قبول به ڪيو هو. وقار يونس سوال اٿاريو ته جيڪڏهن اسڪواڊ ۾ بيو وڪيٽ ڪيپر موجود آهي ته ڇا ان کي ڪو موقعو نه ملڻ گھرجي؟ هن چيو ته اسين ورلڊڪپ ٽي_ٽوئنٽي تائين اهڙا وڌيڪ تجربا ڪندا رهنداسين. انٽرويو دوران وقار يونس ڪرڪيٽ جي شوقينن ۽ اڳوڻن ڪرڪيٽرن کي به درخواست ڪئي ته اهي ننڍين ننڍين ڳالهين کي وڌائي پيش نه ڪن، گرين شرٽس ٽنهي فارميٽس ۾ آءِ لينڊرز کي ناڪ آئوٽ ڪري ڇڏيو، جنهن تي اسان کي خوش ٿيڻ گھرجي. الزامن مان ڪجھه حاصل نه ٿيندو. هن وڌيڪ چيو ته ٻين ٽيمن ۾ به رانديگرن کي آرام جو موقعو ڏنو ويندو آهي، اتي ته ڪو به تڪرار نٿو اٿاريو وڃي، اسان به ان کي ڪرڪيٽنگ جو فيصلو سمجھڻ گھرجي. هڪ سوال جي جواب ۾ وقار يونس چيو ته جيڪڏهن ڪرڪيٽ بورڊ مونکان سرفراز جي معاملي تي وضاحت گھري ته ضرور ٻڌائيندس ته ٽيم جي ضرورت موجب فيصلا ڪيا، ڪنهن سان ذاتي جهيڙو ناهي.

 

فوجي عدالتن خلاف سموريون درخواستون رد

 

سپريم ڪورٽ فوجي عدالتن خلاف سموريون درخواستون رد ڪندي فوجي عدالتن کي جائز قرار ڏيندي انهن طرفان مليل سزائن کي برقرار رکڻ جو فيصلو ڏئي ڇڏيو آهي. چيف جسٽس ناصرالملڪ 18 هين ۽ 19 هين ترميم سميت فوجي عدالتن جي حوالي سان عدالتي فيصلو پڙهي ٻڌايو، عدالتي فيصلو 900 صفحن کان وڌيڪ آهي ۽ اهو چيف جسٽس پاڻ لکيو آهي جڏهن ته 6 ججن فوجي عدالتن جي مخالفت ڪئي آهي. عدالتي فيصلي موجب 17 مان 14 ججن 18 هين ترميم جي حق جڏهن ته ٽن درخواستگذارن جي موقف جي حق ۾ فيصلو ڏنو جڏهن ته 21 هين ترميم ۽ فوجي عدالتن جي حق ۾ 11 ججن ۽ مخالفت ۾ 6 ججن فيصلو ڏنو. واضح رهي ته پارليامينٽ آرمي پبلڪ اسڪول تي حملي کانپوءِ 21 هين آئيني ترميم منظور ڪندي ٻن سالن لاءِ فوجي عدالتون قائم ڪرڻ جي سلسلي ۾ آرمي ايڪٽ 1952ع ۾ ترميم جي منظوري ڏني هئي ته جيئن دهشتگردي ۾ ملوث عنصرن جو تيزي سان ٽرائل ڪري سگهجي، ان ترميم جي منظوري کانپوءِ ان جي خلاف سپريم ڪورٽ بار ايسوسيئيشن، پاڪستان بار ڪائونسل، لاهور هاءِ ڪورٽ بار ايسوسيئيشنن سميت مختلف وڪيلن جي تنظيمن 15 آئيني پٽيشنون داخل ڪيون ۽ پنهنجو موقف اختيار ڪيو ته آئين فوجي عدالتون قائم ڪرڻ جي اجازت نه ٿو ڏي ۽ اهو موجوده عدليه تي عدم اعتماد ڪرڻ جي برابر آهي جڏهن ته 18 هين ترميم خلاف پهرين کان 16 درخواستون التوا هيٺ هيون، عدالت ٻنهي ترميمن جي خلاف داخل درخواستن جي ٻڌڻي ڪئي ۽ فيصلو محفوظ ڪيو هو جيڪو گذريل ڏينهن چيف جسٽس فل ڪورٽ جي موجودگي ۾ ٻڌايو جنهن جي جسٽس جواد ايس خواجه، جسٽس اعجاز افضل، جسٽس اعجاز چوڌري، جسٽس دوست محمد خان ۽ جسٽس قاضي فائز عيسيٰ مخالفت ڪئي جڏهن ته جسٽس جواد ايس خواجه سپريم ڪورٽ جي اڪثريتي فيصلي خلاف 25 صفحن تي ٻڌل هڪ پنهنجو اختلافي نوٽ لکندي چيو آهي ته پارليامينٽ کي ڪي لامحدود اختيار نه آهن پر ان جون مقرر حدون آهن ان لاءِ ضروري نه آهي ته پارليامينٽ جا سمورا فيصلا عوامي خواهشن موجب هجن ۽ آئين جي رهندي به 21 هين ترميم جا هدف حاصل ٿي پئي سگهيا ان جي لاءِ عدالت کي اهو اختيار حاصل آهي ته مخصوص حالتن ۾ پارليامينٽ جي منظور ڪيل آئيني ترميمن کي ڪالعدم قرار ڏي. جسٽس جواد ايس خواجه پنهنجي اختلافي نوٽ ۾ وڌيڪ چيو آهي ته 21 هين ترميم کي ڪالعدم قرار ڏيڻ لازمي آهي، پارليامينٽ بالادست نه آهي، آئون جسٽس قاضي فائز عيسيٰ جي ان ڳالهه سان متفق آهيان ته 21 هين ترميم کي ڪالعدم قرار ڏنو وڃي، پارليامينٽ جي اختيار جون حدون نه رڳو سياسي نوعيت جون آهن پر آئين سان به ٽڪراءُ ۾ آهن، عدالت کي اختيار حاصل آهي ته هو ڪنهن به قانون کي ڪالعدم قرار ڏي، چونڊيل نمائندا ڪو به اهڙو قانون يا ترميم نه ٿا آڻي سگهن جيڪو عوامي حقن جي ابتڙ هجي يا اهڙو ڪو قانون يا ترميم جيڪا جمهوريت جي اصولن جي خلاف هجي يا عدليه جي آزادي سان ٽڪراءُ ۾ هجي اهو چونڊيل نمائندن جي اختيار ۾ شامل نه آهي، آرٽيڪل 52 تحت اقليتن جي چونڊ جو طريقيڪار ڪالعدم قرار ڏنو ويو آهي جڏهن ته آرٽيڪل 51 جي ترميم سان اقليتن کي ٻئين درجي جو شهري ٺاهيو ويو آهي جڏهن ته سپريم ڪورٽ پنهنجي اڪثريتي فيصلي ۾ فوجي عدالتن کي جائز قرار ڏيندي چيو آهي ته اها وقت جي ضرورت آهي ۽ عدالت فوجي عدالتن پاران مليل سزا کي به بحال ڪري ڇڏيو آهي.

 

فوجي عدالتن جي حق ۾ آيل فيصلو!؛نسيم بخاري

سپريم ڪورٽ پاران فوجي عدالتن ۽ ارڙهين، ايڪيهين ترميمن جي حق ۾ آيل فيصلي کانپوءِ نت نوان بحث مباحثا شروع ٿي ويا آهن. هڪ طرف فوجي عدالتن مٿان سپريم ڪورٽ جي لٽڪندڙ امڪاني تلوار هميشه هميشه لاءِ هٽي وئي آهي ته ٻئي طرف ارڙهين ترميم کي آئيني تحفظ سان گڏوگڏ عدالتي تحفظ به ملي ويو آهي. هاڻ فوجي عدالتون بنا ڪنهن هٻڪ ۽ جهجهڪ جي ڪم ڪنديون، انهن کي ڪو اونو ڪا اڻ تڻ ڪا پريشاني ڪو خطرو نه هوندو. جتي اُهي بنا ڪنهن خوف جي ڪم ڪنديون اُتي انهن جي اثر هيٺ ايندڙ ڏوهاري وڌيڪ ڏڪندا ۽ ڪنبڻ لڳندا. اڙهين ترميم ذريعي صوبن کي مليل جيڪي کاتا اڃا تائين وفاق جي وڪڙ ۾ هئا، اُهي هاڻ اصولي، آئيني ۽ عدالتي تحفظ کانپوءِ صوبن حوالي ڪرڻ اڻٽر ٿي ويا آهن، جنهن سان صوبن جي ڪارڪردگي به بهتر ٿيندي ۽ سندن اپت ۾ به اضافو ٿيندو. فوجي عدالتن جي ڦڙتي سان گهڻو تڻو جيڪي ماڻهو جيل ويندا يا قانون جن کي پڪڙ ۾ آڻيندو، تن ۾ انتهاپسندن ۽ دهشت پکيڙيندڙ تنظيمن سان تعلق رکندڙ ڏوهارين جو وڏو تعداد ڏچي ۾ ايندو.

اڃا جڏهن سپريم ڪورٽ فوجي عدالتن جي حق ۾ فيصلو ڏنو ئي نه هو ته ايم ڪيو ايم ۽ رينجرز هڪ ٻئي سان مهاڏو اٽڪايو بيٺا هيا. هڪ طرف رياست ۽ ان جا ادارا هئا ته ٻئي طرف رياست اندر پنهنجي مرضيءَ جي رياست جا خواب ڏسندڙ همراهه هئا. اڃا ڪالهه ڪلهوڪو ڏينهن آهي ته ڊي جي رينجرز جي دفتر مان هڪ ليفٽيننٽ ڪرنل ايم ڪيو ايم جي اڳواڻ فاروق ستار کي خط لکي 1990ع واري ڏهاڪي ۾ پوليس اهلڪارن جي خون ۾ گهربل ايم ڪيو ايم جي ڪارڪنن جي ٻانهن گهُري ورتي آهي. هن خط ۾ ايم ڪيو ايم جي جن ڏوهارين جي ٻانهن گهري وئي آهي، انهن تي الزامن جا وچور به وائکا ڪيا ويا آهن. هن وقت انهن جو جيڪو متحده سان تعلق آهي سو به ٻڌايو ويو آهي. متحده جي سربراهه الطاف حسين پاران مهاجرن جي رت وهڻ تي ڀارت پاران ڪنهن به افسوس ۽ مدد نه ڪرڻ وارين ميارن بابت وفاقي ۽ صوبائي حڪومتن ۾ جيڪا ڪاوڙ جي لهر اڀري آئي آهي ۽ جهڙيءَ ريت خيبر پختونخواهه اسيمبلي ٺهراءُ پاس ڪري الطاف حسين جي انٽر پول ذريعي گرفتاريءَ کي يقيني بڻائي، پاڪستان ۾ ڪورٽ جي ڪٽهڙي ۾ بيهاري سزا ڏيارڻ جي ڳالهه ڪئي آهي يا جيئن پنجاب ۽ بلوچستان حڪومتون به اهڙا ٺهراءُ پاس ڪرائڻ لاءِ متحرڪ ٿيون آهن، اُهي سڀ سرگرميون نه فقط الطاف حسين پر پوري پارٽيءَ کي سياسي طور سوڙهو ۽ اڪيلو ڪري رهيون آهن.

الطاف حسين تي ويجهن ڏينهن ۾ ملڪ جي ڪنڊ ڪڙڇ ۾ ٻه اڍائي سئو غداريءَ جا ڪيس داخل ڪيا ويا آهن. ايم ڪيو ايم اها دعويٰ ڪئي آهي ته سندن آباديءَ جو 72 سيڪڙو عام ماڻهو چاهي ٿو ته الطاف حسين ايم ڪيو ايم جو سربراهه بڻيل هجي، جنهن جو هڪڙو مطلب اهو به ٿئي ٿو ته اردو آباديءَ جا ٽي حصا ماڻهو الطاف حسين جي هر لفظ ۽ هر عمل جي تائيد ڪن ٿا.

هتي سوال اهو به پيدا ٿئي ٿو ته جيڪڏهن سچ پچ به ايڏا وڏا پرستار الطاف حسين تي اکيون ٻوٽي اعتبار ڪن ٿا، نه فقط ان جي ها ۾ ها ملائين ٿا پر ان جي حڪم تي سِر به ڏئي سگهن ٿا ته ڇا انهن سڀني ماڻهن تي الطاف حسين جي ساٿاري وارو ڪيس داخل ٿي سگهي ٿو؟ الطاف حسين جهڙيءَ ريت ڏيهي ۽ پرڏيهي سطح تي پنهنجي ساک پت ٺاهي آهي، ان آڌار تي ڪو به عقل فهم وارو ماڻهو ان جي ويجهو اچڻ پسند نه ڪندو. ايم ڪيو ايم جهڙيءَ ريت الطاف حسين جي وارثي ۽ وڪالت ڪندي آئي آهي، الطاف حسين اهڙي ئي تيزيءَ سان پنهنجي عهديدارن، رابطا ڪميٽيءَ جي ميمبرن ۽ مک ماڻهن تي الزام هڻي عهدا کسيندو آيو آهي. سوال اهو به پيدا ٿئي ٿو ته سڀاڻي جيڪڏهن الطاف حسين جا رد ڪيل ماڻهو قانون جي ڪنهن وٺ پڪڙ هيٺ اچن ٿا ته ڇا ڪو ردعمل ظاهر نه ٿيندو؟

ايم ڪيو ايم اندر جيڪا ڀڃ ڊاهه ۽ گروپ بندي عملي طور تي آڏو اچي چڪي آهي، ان جو اندازو ٻڌائي ٿو ته هنن جي اندر به ٽولا آهن. اُها الڳ ڳالهه آهي ته انهن جا جهيڙا دٻيل رهن ٿا ۽ سندن اختلاف لُڙ نه ٿا ثابت ٿين. هنن جي اندروني ويڙهه ’اندر جون مُڪون اندر ۾‘ وانگر آهن پر هاڻ صورتحال جنهن ڳنڀيرتا سان سامهون اچي رهي آهي، تنهن مان صاف ظاهر آهي ته ڪانه ڪا هڪ هڪاڻي ٿيڻ واري آهي. اهوئي سبب آهي جو ايم ڪيو ايم اڄ جهڙيءَ ريت رياست ۽ رياستي ادارن سان ٽڪراءَ واري پاليسيءَ تي عمل ڪري رهي آهي، اها اڳ ڪڏهن به مهاڏي يا جهيڙي جي موڊ ۾ ڏسڻ ۾ نه آئي هئي.

ايم ڪيو ايم جا اڳواڻ جيڪو ڪجهه چئي رهيا آهن ۽ جهڙيءَ ريت اکيون اکين ۾ ملائي حڪومتن سان جهيڙي رهيا آهن، انهن جو اهڙو عمل اهو ٻڌائي رهيو آهي ته هنن جي من ۾ ڪهڙو مانڌاڻ متل آهي. اڄ به فاروق ستار جو اُهو بيان شايع ٿيو آهي ته ماضي ۾ مهاجرن سان جيڪي ظلم ۽ ڏاڍايون ٿيون، اُهي ته برداشت ڪيوسين پر اسان جي نئين ٽهي ڪڏهن به ڪجهه ڪري سگهي ٿي، جن کي اسان روڪي نه ٿا سگهون ۽ نه وري انهن جي ڪائي ضمانت کڻي سگهون ٿا. لڳ ڀڳ لفظن جي ٿوري گهڻي فرق سان الطاف حسين به هر ڀيري اهڙيون ئي ڳالهيون ڪندو آيو آهي. شايد اهو ئي سبب آهي ته رياستي ادارن به ايم ڪيو ايم جي نيت کي پرکي ورتو آهي ۽ ان ڪري ئي اهي تحرڪ ۾ اچي ويا آهن ۽ متحده کي حيلن بهانن سان پنهنجي حيثيت ۾ رهڻ جي شعوري ڪوشش ڪري رهيا آهن.

ايم ڪيو ايم اڄ انصاف جا  مطالبا ڪري ٿي ۽ مظلوميت جو راڳ آلاپي ٿي پر ايم ڪيو ايم بابت ڏيهي ۽ پرڏيهي پرنٽ توڙي اليڪٽرانڪ ميڊيا جيڪي دهشت ۽ وحشت سان ڀرپور خبرون رپورٽ ڪندي آئي آهي، اهو تعارف سڄي دنيا ۾ بحث جو موضوع بڻيل آهي. ايم ڪيو ايم اقتدار ۾ رهي پنهنجي ڪميونٽي کي ۽ واسطيدار ووٽرن جي علائقن کي ترقي ۽ خوشحاليءَ جون شاندار شاهراهون وٺرايون پر ٻين قومن ۽ علائقن کي اوتري ئي تيزيءَ سان پوئتي ڌڪيو ۽ چٿيو نه فقط ايترو پر پاڻ کي هر حوالي سان احساس برتريءَ وارو اوج وٺرائي ۽ ٻين کي گهٽ سمجهيو ۽ محسوس ڪرايو.

ايم ڪيو ايم مظلومن، محڪومن، حقدارن ۽ ڌرتي ڌڻين جي وسيلن کي جهڙيءَ ريت بيدرديءَ سان لٽيو ڦريو، اهڙي ئي تيزيءَ سان پنهنجي ڪميونٽيءَ کي معاشي حوالي سان مستحڪم ڪيو ۽ انهيءَ سڄي سلسلي ۾ ناجائزيون، ناانصافيون ايڏي زبردست ۽ منظم طريقي سان ڪيون ويون جن جو پاڪستان جي سياسي تاريخ ۾ ڪو مثال نه ٿو ملي. پاڪستان جي پوري تاريخ ۾ ڪنهن به ڪميونٽي ۽ ڪنهن به سياسي پارٽي زندگيءَ جي هر موڙ تي ۽ هر هنڌ ايتري ڏاڍائي نه ڏيکاري آهي جهڙو ايم ڪيو ايم جو تعارف ڏسڻ ۾ ايندو رهيو آهي.

ايم ڪيو ايم بابت مٿيان حوال ايم ڪيو ايم سان منهنجي ڪنهن اختلاف، ساڙ ۽ تنقيد جو ردعمل ناهن پر توهان ملڪ جي ڪنڊ ڪڙڇ ۾ تازو الطاف حسين خلاف داخل ٿيل ٻه اڍائي سئو ڪيسن جا وچور پڙهي ڏسو. اوهان ڪجهه مهينا اڳ ايس ايس پي ملير رائو انوار جي پريس ڪانفرنس تي نظر وجهو ۽ بي بي سي پاران ايم ڪيو ايم خلاف هڪ ٻئي پٺيان آيل اسٽوريون نظر مان ڪڍو، توهان پيپلزپارٽيءَ جي ايم پي ايز، ايم اين ايز ۽ وڏي وزير قائم علي شاهه پاران وقت به وقت ڪيل پريس ڪانفرنسن کي نگاهه ۾ رکو، اوهان ڊي جي رينجرز جون گذريل ٽن چئن مهينن دوران جاري ڪيل پريس پڌرايون ۽ پريس ڪانفرنسون ڏسو، اوهان کي اهو معلوم ڪري وڏي حيرانگي ٿيندي ته ايم ڪيو ايم ڇا آهي ۽ ان جي عسڪري ونگ ڪيترا ۽ ڪهڙا ڀوائتا مهانڊا ٿي رکي.سو فوجي عدالتن جو قيام انتهاپسنديءَ وارا ڪيس اڪلائڻ هو ۽ جنهن کي هاڻ عدالتي تحفظ به ملي ويو تن ۾ جيڪڏهن ڏوهارين جا ڪيس به هلن ٿا ۽ مجرمن کي سزائون به ملڻ شروع ٿي وڃن ٿيون ته اُن سان مُلڪ خاص ڪري ڪراچيءَ ۾ پکڙيل انتشار ۾ واضح ڪمي ڏسڻ ۾ ايندي.

ماڻهو فوجي عدالتن کان ڏاڍو ڊنل آهن ۽ اهي ڏڪن ڊڄن ٿا. ڇو ته اتي بچڻ ايترو آسان ناهي جيئن ڏوهاري عام حالتن ۾ ڏئي وٺي جان ڇڏائيندا آهن. فوجي عدالتن ۾ جيڪڏهن تيزيءَ سان ڏوهاري سزائن هيٺ اچڻ شروع ٿيا ته ان سان ملڪ ۾ قانون جي بالادستي واري احساس کي هٿي ملندي. ماڻهن جو انصاف تي ويساهه پختو ٿيندو ۽ خود اسان جو موجوده عدالتي سسٽم وڌيڪ مضبوط ۽ متحرڪ ٿيندو. فوجي عدالتن سان عام عدالتن جي ڪارڪردگي وڌيڪ بهتر ٿيڻ جا چٽا آثار ڏسجن ٿا ۽ جيڪڏهن انصاف کي يقيني بڻائڻ جي حوالي سان اُهي ٻنهي قسمن جون عدالتون پنهنجي پنهنجي وت ۽ وس آهر وسان نه ٿيون گهٽائن ۽ عوام جي اُميدن تي پوري لهڻ جي پوري پوري ڪوشش ڪن ٿيون ته عدالتن جي اهڙي عمل سان سياسي ڏوهارين، عام ڏوهارين، انتهاپسندن، دهشتگردن، ڌاڙيلن، ڀتاخورن ۽ ٽارگيٽ ڪلرز ڏانهن به سڌري وڃڻ جو يا منظر تان ئي غائب ٿيڻ جو نياپو ويندو!

اُهي مٿيان عوام ۽ ملڪ دشمن، عنصر جيڪڏهن پنهنجون سرگرميون گهٽائن يا مضبوط ڪن ٿا ته اُهو به هر حوالي سان ملڪ جي ۽ عوام جي مفاد ۾ آهي ۽ سڀ کان اهم ۽ سگهارو سوال اهو آهي ته ڇا اسان جون حڪومتون، اسان وٽ انصاف جي فراهمي ۾ واقع به مخلصاڻو ڪردار ادا ڪرڻ جي نيت رکن ٿيون؟ ڪٿي حڪومتي مصلحتن، اهم مقصدن کي مفاهمت جي اڏيءَ تي قربان ته نه ڪنديون.