تازيون خبرون

Daily Archives: August 7, 2015

ايپڪس ڪميٽي بلوچستان جو اجلاس: وزيراعظم پر امن بلوچستان پلان جي منظوري ڏئي ڇڏي

ڪوئيٽا (بيورو) وزيراعظم نواز شريف ڪوئيٽا ۾ ٽن منصوبن جي پيڙهه جو پٿر رکي ڇڏيو آهي، وزيراعظم ۽ آرمي چيف جنرل راحيل شريف بلوچستان ۾ امن امان بابت اجلاس جي صدارت پڻ ڪندا. وزيراعظم نواز شريف ۽ آرمي چيف جنرل راحيل شريف هڪ ڏينهن جي دوري تي ڪوئيٽا پهتا ته ايئرپورٽ تي بلوچستان جي وڏي وزير عبدالمالڪ بلوچ ۽ ٻين صوبائي وزيرن سندن آجيان ڪئي. وزيراعظم ۽ آرمي چيف جي ڪوئيٽا آمد جي موقعي تي شهر ۾ سڪيورٽي جا انتظام انتهائي سخت ڪيا ويا آهن. وزيراعظم نواز شريف گورنر هائوس ڪوئيٽا ۾ ٽن منصوبن جي پيڙهه جو پٿر رکيو،  جن ۾ زرعي يونيورسٽي، مانگي ڊيم ۽ سمنگلي روڊ فلائي اور شامل آهن. گورنر هائوس ۾ پيڙهه جو پٿر رکڻ واري تقريب ۾ آرمي چيف جنرل راحيل شريف، گورنر بلوچستان محمد خان اچڪزئي، بلوچستان جو وڏو وزير عبدالمالڪ بلوچ، وفاقي گهرو وزير چوڌري نثار ۽ ٻيا پڻ موجود هئا. ان موقعي تي وزيراعظم نواز شريف جو بلوچستان جي صوبائي ڪابينا جي ميمبرز سان تعارف پڻ ڪرايو ويو. ٻئي طرف وزيراعظم نواز شريف پر امن بلوچستان پلان جي منظوري ڏئي ڇڏي آهي، اپيڪس ڪميٽي جي اجلاس ۾ بلوچستان جي وڏي وزير عبدالمالڪ بلوچ پاران ناراض بلوچ اڳواڻڻ سان ٿيل ڳالهين بابت بريفنگ پڻ ڏني وئي.  گورنر هائوس ڪوئيٽا ۾ وزيراعظم نواز شريف جي صدارت هيٺ بلوچستان اپيڪس ڪميٽي جو اجلاس ٿيو. اجلاس ۾ بلوچستان جي گورنر محمد خان اچڪزئي، وڏي وزير عبدالمالڪ بلوچ، وفاقي گهرو وزير چوڌري نثار، آرمي چيف جنرل راحيل شريف، ڪور ڪمانڊر سدرن ليفٽيننٽ جنرل ناصر جنجوعا ۽ ٻين اعليٰ عملدارن شرڪت ڪئي. اجلاس ۾ بلوچستان ۾ امن امان جي صورتحال ۽ صوبي ۾ دهشتگردن خلاف جاري ڪاررواين تي بريفنگ ڏني وئي. ذريعن موجب، بلوچستان جي وڏي عبدالمالڪ بلوچ پاران ناراض بلوچ اڳواڻن سان ٿيل ڳالهين تي بريفنگ ڏني وئي. ان موقعي تي وزيراعظم نواز شريف پاران پر امن بلوچستان پلان جي منظوري پڻ ڏني وئي. وزيراعظم نواز شريف گورنر هائوس ڪوئيٽا ۾ ٽن منصوبن جي پيڙهه جو پٿر رکيو،  جن ۾ زرعي يونيورسٽي، مانگي ڊيم ۽ سمنگلي روڊ فلائي اور شامل آهن.

 

مانسهره ويجهو آرمي جو هيليڪاپٽر ڪري تباهه، 9 ڄڻا اجل جو شڪار

مانسهره(مانيٽرنگ ڊيسڪ) مانسهره ويجهو آرمي ايوي ايشن جو هيليڪاپٽر ڪري تباهه ٿيڻ جي نتيجي ۾ 9 ڄڻا اجل جو شڪار ٿي ويا آهن، ذريعن مطابق مانسهره جي لسان نواب واري علائقي ۾ ارمي ايوي ايشن جو هيليڪاپٽر ايم آئي 17 ڪري تباهه ٿي ويو آهي، جيڪو راولپنڊي کان گلگت وڃي رهيو هو، هيليڪاپٽر ڪرڻ کانپوءِ وڏو ڌماڪو ٿيو ۽ ان ۾ باهه لڳي وئي، مانسهره جي ڊي پي او نجيب الرحمان هيليڪاپٽر ڪرڻ جي تصديق ڪندي ٻڌايو ته حادثي جي نتيجي ۾ 9 ماڻهو اجل جو شڪار ٿي ويا آهن،اطلاع ملڻ تي پوليس،سيڪيورٽي ادارا ۽ امدادي ٽيمون حادثي واري هنڌ روانيون ٿي ويون آهن. ڊپٽِي ڪمشنر عامر خٽم موجب حادثي بعد اسپتالن ۾ ايمرجنسي لاڳو ڪئي وئي آهي

 

ڪارڪنن جي گمشدگي: ايم ڪيو ايم جو ڀارت سميت 55 ملڪن کي خط، مدد طلب

ڪراچي (اسٽاف رپورٽر) متحده قومي موومينٽ، حيدرآباد ويجهو گم ٿيل چئن ڪارڪنن جِي بازيابيءَ ۾ مدد لاءِ ڀارت سميت 55 ملڪن جَي سفارتخانن کي خط لکيا آهن، جڏهن ته فاروق ستار ۽ وسيم اختر پاران ترديد ڪئي وئي آهي. ايم ڪيو ايم اڳواڻ عارف خان، شبير قائمخاني ۽ اقبال خانزادَي طرفان لکيل خط ۾ چيو ويو آهي ته 29 جولاءِ تي شادي ۾ شرڪت لاءِ ڪراچي کان حيدرآباد ويندڙ 12 ڪارڪنن کي رستي مان گرفتار ڪيو ويو. خط موجب، گرفتار ڪيل 12 مان 8 ڪارڪنن کي آزاد ڪيو ويو، جڏهن ته وليد ڪمال، شايان رحمان، سعد هاشمي ۽ اسد رضا اڃا تائين گم آهن. مختلف ملڪن جَي سفارتخانن کي لکيل خط ۾ چيو ويو آهيته غيرقانوني طور ڪارڪنن کي حراست ۾ رکڻ انساني حقن جي ڀڃڪڙي آهي. خط ۾ 55 ملڪن جَي سفيرن کي اپيل ڪئي وئي آهي ته اهي معاملي جو نوٽيس وٺي ان سلسلي ۾ آواز اٿارن. ٻئي طرف ايم ڪيو ايم اڳواڻ فاروق ستار ترديد ڪندَي چيو آهي ته هنن ڀارت سميت ڪنهن به ملڪ جَي هاءِ ڪمشنر کي اهڙو ڪو به خط ناهي لکيو. فاروق ستار چيو ته ڀارت هاءِ ڪمشنر کي ايم ڪيو ايم جو خط ملڻ ٽيڪنيڪل غلطي ٿي سگهي ٿي. ٻئي پاسي ايم ڪيوا يم جي اڳواڻ وسيم اختر مطابق ايم ڪيوا يم مدد لاءِ ڪنهن به سفارتخاني کي خط ناهي موڪليو. ڀارت دشمن ملڪ آهي ،اسان به ان جي حق ۾ناهيون، حڪومت پاران ڀارتي حڪومت کي انب موڪليا ويا ۽ انهن سان تجارت ڪئي پئي وڃي.ايم ڪيو ايم جي ميمبرن سان ذيادتي تي ٻين ملڪن کي خط لکيا آهن اهي ڪي ڳجها ناهن، پر معمول جي ڳالهه آهي، ان قسم جا خط آمريڪا ، ڪئينڊا ۽ سعودي عرب کي به موڪليا ويا آهن.

 

ايف آئي اي ۽ نيب سنڌ حڪومت خلاف حملي آور آهن: قائم علي شاهه

ڪراچي (اسٽاف رپورٽر) وڏي وزير قائم علي شاهه جي صدارت هيٺ سنڌ ڪابينا جي اجلاس ۾ اهم فيصلا ڪيا ويا، وڏي وزير نيب ۽ ايف آءِ اي جي ڪاررواين کي غير قانوني قرار ڏيندي چيو آهي ته نيب جي ڪاررواين بابت وزيراعظمکي شڪايت ڪئي وئي آهي، ڪي ايم سي مان کنيل هڪ به فائل گم ٿيو ته ذميوار ايف آءِ اي هوندي. وڏي وزير سيد قائم علي شاهه جي صدارت هيٺ سنڌ ڪابينا جو اجلاس ٿيو، جنهن ۾ سڌ سماءُ واري وزير نثار کهڙَي، ناڻي واري وزير سيد مراد علي شاهه سميت ٻين شرڪت ڪئي. اجلاس دوران وڏي وزير سيد قائم علي شاهه ڳالهائيندي چيو ته سنڌ اندر ايف آءِ اي ۽ نيب جون ڪارروايون افسوسناڪ ۽ قانون جي خلاف آهن. هن چيو ته وفاقي ادارن طرفان سنڌ حڪومت خلاف ڪرپشن جي نالي تي ميڊيا ٽرائل ٿي رهيو آهي، ايف آءِ اي بنا اجازت جي ڪي ايم سي مان فائلون کڻي وئي. سندس چوڻ هو ته ڪي ايم سي مان کنيل فائلن مان ڪا هڪ به فائل گم ٿي ته ذميوار ايف آءِ اي هوندي. وڏي وزير چيو ته ٻڌايو وڃي ته نيب هيستائين ڪيترا ماڻهو چالان ڪيا ۽ ڪيترن کي پِلـِي بارگين ذريعي آزاد ڪيو ويو. وڏو وزير قائم علي شاهه چيو ته ايف آءِ اَي جي بنا اجازت ڪاررواين تي وزيراعظم آڏو شڪايت ڪئي آهي. هن چيو ته دهشتگردي جي خاتمي لاءِ قومي ايڪشن پلان تي عمل ڪيو پيو وڃي ۽ هاڻي ڪراچي جون حالتون به بهتر ٿي ويون آهن. وڏي وزير چيو ته سنڌ اندر امن امان جي بهتري لاءِ وزيراعظم ۽ آرمي چيف دلچسپي وٺي رهيا آهن، جن تي هــُو انهن جا ٿورائتا آهن. سيد قائم علي شاهه چيو ته وزيراعظم سنڌ مٿان مهربان آهي، جنهن ٻوڏ متاثر علائقن جو دورو به ڪيو.

 

اهڙي فيصلي سان ڪنهن جي فتح يا شڪست نه پر جمهوريت ۽ پارليامينٽ جي سوڀ ٿي آهي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر، خورشيد شاهه، پي ٽي آءِ ميمبرز کي ڊي سيٽ ڪرڻ واريون رٿون واپس وٺڻ کي سٺو سنوڻ قرار ڏيندي چيو آهي ته اهڙي فيصلي سان ڪنهن جي فتح يا شڪست نه پر جمهوريت ۽ پارليامينٽ جي سوڀ ٿي آهي. قومي اسيمبلي جي اجلاس کي خطاب ڪندي اپوزيشن ليڊر خورشيد شاهه چيو ته اڄوڪو ڏينهن ملڪي تاريخ جو اهم ڏينهن آهي. هن چيو ته ايم ڪيو ايم ۽ جي يو آءِ پاران رٿون واپس وٺڻ واري فيصلي تي کيس خوشي ٿي آهي،اڄوڪي فيصلي سان ڪنهن جي شڪست يا فتح نه پر جمهوريت ۽ پارليامينٽ جي سوڀ ٿي آهي. خورشيد شاهه چيو ته وڏي قربانين کانپوءِ ملڪ ۾ جمهوريت آئي آهي،  جي يو آءِ ۽ ايم ڪيو ايم جو فيصلو مستقبل لاءِ بهتر آهي. اپوزيشن ليڊر چيو ته هو تحريڪ انصاف جي قيادت جي غلطي جي سزا ووٽرز کي نه پيا ڏيڻ چاهي، پي ٽي آءِ کي اسيمبلي ۾ آڻي سندن ووٽرز جو تحفظ ڪيو آهي. خورشيد شاهه چيو ته سياست ۾ ڪو آخري دوست يا دشمن ناهي هوندو، سياسي پارٽين کي پنهنجا رويا بهتر ڪري اڳتي وڌڻو پوندو.

 

آءِ جي ، گهرو ۽ چيف سيڪريٽري جي رپورٽن ۾ فرق: ڪنهن تي اعتبار ڪريون؟: سپريم ڪورٽ

ڪراچي (اسٽاف رپورٽر) سـپريم ڪورٽ، پوليس جي جاچ ونگ کي فنڊَ فراهم نه ڪرڻ بابت پيش ڪيل رپورٽ رد ڪندي چيف سيڪريٽري جي سربراهي ۾ ڪميٽي جوڙي مهيني اندر رپورٽ پيش ڪرڻ جو حڪم ڏئي ڇڏيو آهي. جسٽس امير هاني مسلم جي سربراهي ۾ ٽه رڪني بينچ، جاچ پوليس سنڌ کي فنڊ فراهم نه ڪرڻ بابت ڪيس جي ٻڌڻي دوران چيف سيڪريٽري سنڌ، آءِ جــِي، ايڊووڪيٽ جنرل، گهرو سيڪريٽري، سيڪريٽري فنانس ، ناڻي وارو سيڪريٽري پيش ٿيا. عدالت، چيف سيڪريٽري، اَي آءِ جِي فنانس ۽ آءِ جي سنڌ جي رپورٽ تي بي اعتمادي جو اظهار ڪندي گڏيل مشاورت سان صحيح انگن اکرن تي ٻڏل رپورٽ مهيني اندر جمع ڪرائڻ جو حڪم ڏنو. عدالت، چيف سيڪريٽري سنڌ کان پڇاڻو ڪيو ته فنڊ ڪيئن ڏيندا آهيو؟ چيف سيڪريٽري چيو ته آءِ جي سنڌ پاران جيڪي پئسن جي گهر ٿيندي آهي ان تحت پئسا جاري ڪيا ويندا آهن. عدالت آءِ جي کان پڇاڻو ڪيو ته اهي پئسا جاچ پوليس کي ڪيئن ڏيندا آهيو؟ ايڊوڪيٽ جنرل سنڌ عدالت کي ٻڌايو ته اهي پئسا آءِ اوز کي ڏنا ويندا آهن. جسٽس امير هاني مسلم چيو ته قانون چئي ٿو اهي فنڊ ڊي ڊي اوز کي ڏنا ويندا آهن. عدالت چيو ته آءِ اوز تي ٿاڻن تي لڳل هوندا آهن اهي جاچ پوليس کي پئسا ڪيئن ڏيندا ؟ عدالت جو چوڻ هو ته اوهان جاچ پوليس کي پئسا نه ٿا ڏيو ان جي ڪري 80 سيڪڙو ڪيس اي ڪلاس ۾ خارج ٿي وڃن ٿا. عدالت چيو ته اوهان سڀني جي رپورٽ انگن اکرن ۾ فرق ڇو آهي ؟ اسان ڪنهن جي رپورٽ تي اعتبار ڪريون، جڏهن ته آءِ جي سنڌ ، گهرو سيڪريٽري، چيف سيڪريٽري جي رپورٽ ۾ فرق آهي. عدالت پڇاڻو ڪيو ته هن مهل تائين ڪيترائي ڪيس خارج ٿي ويا آهن، پئسا نه ملندا ته ڪيسن جي پيروي نه ٿيندي . چيف سيڪريٽري عدالت کي ٻڌايو ته جيستائين کيس ڄاڻ آهي ته جاچ پوليس جا فنڊ ايس ايس پي وٽ جمع ٿيندا آهن ۽ اهو ئي ورهائيندو آهي. عدالت چيو ته هر هفتي ايس ايس پي کي بدلي ڪيو ٿو وڃي اهي ڪنهن جي چوڻ تي بدلي ٿين ٿا، جڏهن ته ايس ايس پي اڃا معاملن کي سمجهندو ئي مس آهي ته ان جي بدلي ٿي ويندي آهي. عدالت چيو ته مٽياري ضلعي کي 2 ڪروڙ 20 لک کي ڏنا ويا آهن ۽ وري سجاول ضلعي کي وڌيڪ پئسا ڏنا ويا آهن، جڏهن ته حيدرآباد کي وري گهٽ پئسا ڏنا ويا آهن ڇا اتي ڏوهه نه ٿا ٿين ؟ عدالت، مهيني اندر گڏيل صلاح مشوري سان رپورٽ جمع ڪرائڻ جو حڪم ڏيندي مهيني تائين ٻڌڻي ملتوي ڪري ڇڏي.

 

پاڪستان ڀارت ۾ ٿيل واقعن ۾ ملوث آهي ته الزام مڙهڻ بدران ثبوت فراهم ڪيا وڃن: پرڏيهي ترجمان

اسلام آباد (بيورو) پرڏيهي کاتي جي ترجمان قاضي خليل الله چيو آهي ته پاڪ-ڀارت قومي سلامتي جي صلاحڪارن جي ملاقات لاءِ تجويز ڪيل تاريخن تي غور جاري آهي، ڪو پاڪستان ڀارت ۾ ٿيل واقعن ۾ ملوث آهي ته الزام مڙهڻ بدران ثبوت فراهم ڪيا وڃن، ممبئي حملا ڪيس جو ٽرائل اڳتي وڌائڻ لاءِ ڀارت جي وڌيڪ ثبوتن جو انتظار آهي.پرڏيهي کاتي جيترجمان اسلام آباد ۾ هفتيوار بريفنگ ڏيندي چيو ته ڀارت قومي سلامتي جي صلاحڪارن جي ملاقات لاءِ 23 ۽ 24 آگسٽ جي تاريخ تجويز ڪئي آهي، جنهن تي غور ڪيو پيو وڃي. هن چيو ته ڀارت بنا ثبوتن جي پاڪستان مٿان الزام مڙهڻ کان پاسو ڪري، جيڪڏهن ڪو پاڪستاني ڀارت ۾ ٿيل واقعن ۾ ملوث آهي ته ان جي حوالي سان ثبوت فراهم ڪيا وڃن. قاضي خليل الله چيو ته ممبئي حملا ڪيس جو ٽرائيل هلي رهيو آهي، جنهن لاءِ ڀارت جي وڌيڪ ثبوتن جو انتظار آهي. پرڏيهي کاتي جي ترجمان چيو ته پاڪستان پاڙيسري ملڪن سان بهتر لاڳاپا چاهي ٿو ۽ ايل او سي تي جنگبنديءَ تي پڻ عمل ڪري رهيو آهي. هن چيو ته افغان طالبان ۽ افغان حڪومت وچ ۾ امن ڳالهين ۾ پاڪستان سهولتڪار جو ڪردار ادا ڪري رهيو آهي، اميد ته جلد ڳالهين وارو عمل شروع ٿي ويندو. ايم ڪيو ايم سربراهه الطاف حسين بابت پڇيل سوال جي جواب ۾ قاضي خليل الله چيو ته جيڪڏهن حڪومت ان معاملي تي ڪو ٽاسڪ ڏنو ته عمل ڪيو ويندو.

 

رحمان ملڪ جي چيئر مين بلاول ڀٽو زرداري سان ملاقات

ڪراچي ( اي پي پي) بلاول هائوس ڪراچي جي ترجمان پڌرو ڪيو آهي ته پاڪستان پيپلز پارٽي جي مرڪزي اڳواڻ ۽ پي پي پي اوورسيز جي صدر سينيٽر رحمان ملڪ خميس جي ڏينهن پي پي پي جي چيئر مين بلاول ڀٽو زرداري سان ملاقات ڪئي. ان موقعي تي هنن ملڪ جي مجموعي سياسي صورتحال تي خيالن جي ڏي وٺ ڪئي وئي. ترجمان موجب رحمان ملڪ پارٽي چيئرمين کي اوورسيز پارٽي جي معاملن ۽ تنظيمي صورتحال کان آگاهه ڪيو .

 

ايم ڪيو ايم ڀارت کي خط لکي ملڪ دشمني جو ثبوت ڏنو آهي: خواجه آصف

اسلام آباد (بيورو) بچاءُ واري وفاقي وزير خواجا آصف چيو آهي ته ايم ڪيو ايم ڀارت کي خط لکي ملڪ دشمني جو ثبوت ڏنو آهي، اهڙي حرڪت ڪندڙن کي هو پاڪستاني ئي نٿو سمجهي. اسلام آباد ۾ ميڊيا سان ڳالهائينديخواجه آصف چيو ته ملڪ جون حالتون ڪهڙيون به هجن دشمن جو دروازو کڙڪائڻ نه گهرجي. هن چيو ته ڀارت سان لاڳاپن جي صورتحال سڄي دنيا جي سامهون آهي، ايم ڪيو ايم ڀارت کي خط لکي ملڪ دشمني جو ثبوت ڏنو، جنهن سبب هو کين پاڪستاني نٿو سمجهي. هڪ سوال جي جواب ۾ خواجا آصف چيو ته پارليامينٽ جو جمهوريت جي مضبوطي لاءِ ڪردار ساراهه جوڳو آهي، ايوان ۾ موجود سموريون پارٽيون ذميواري جو مظاهرو ڪري رهيون آهن. هن چيو ته ناڪاري روين سبب ملڪ ۽ نظام کي نقصان پهچندو آهي، تحريڪ انصاف احتجاج ۽ عدليه جا هربا استعمال ڪري چڪي آهي، هاڻي پي ٽي آءِ کي عوام جي مفاد لاءِ ڪم ڪرڻ گهرجي. خواجه آصف چيو ته تحريڪ انصاف جي قيادت کي سياسي بصرت جو مظاهرو ڪرڻ لاءِ تلقين ڪرڻ گهرجي، جيڪڏهن پي ٽي آءِ پنهنجي رويي تي معافي ورتي ته سٺا اثر پوندا. هڪ سوال جي جواب ۾ خواجه آصف چيو ته ايم ڪيو ايم ۽ جي يو آءِ پي ٽي آءِ خلاف رٿ واپس وٺڻ لاءِ ڪا به شرط ناهي رکي.

 

بلوچستان ۾ فورسز جي ڪارروائي، لياري گينگ وار جو اهم ڪردار بابا لاڊلا مارجي ويو

ڪراچي (اسٽاف رپورٽر) بلوچستان ۾ سيڪيورٽي فورسز جي ڪارروائي دوران لياري گينگ وار جو اهم جوابدار بابا لاڊلا مارجي ويو آهي. بابا لاڊلي جي ويڊيو منظر عام تي اچي وئي آهي. ذريعن موجب ايراني بارڊر جي ڀرسان قانون لاڳو ڪندڙ ادارن جي ڪارروائي ۾ گينگ وار جي جوابدار وچ ۾ فائرنگ ٿي جنهن کانپوءِ جوابي فائرنگ ۾ بابا لاڊلا مارجيويو. لاش ۽ گاڏين کي قانون لاڳو ڪندڙ ادارن تحويل ۾ وٺي ڇڏيو آهي. واضح رهي ته بالا لاڊلا لياري سميت ڪراچي ۾ 100 کان وڌيڪ وارداتن ۾ ملوث هو ۽ سندس سر جي قيمت 25 لک روپيا مقرر هئي.