تازيون خبرون

Daily Archives: August 4, 2015

سياسي ۽ عسڪري قيادت وچ ۾ ملاقات، ملڪي صورتحال تي ڳالهيون

اسلام آباد(بيورو) وزيراعظم نواز شريف سان پاڪ فوج جي سربراهه جنرل راحيل شريف اهم ملاقات ڪئي آهي، جنهن ۾ ملڪ جي اندروني ۽ ٻاهرين توڙي سرحدي سيڪيورٽي جي صورتحال تي خيالن جي ڏي وٺ ڪئي وئي. ذريعن مطابق وزيراعظم ۽ آرمي چيف وچ ۾ پي ايم هائوس اسلام آباد ۾ ملاقات ٿي، ان موقعي تي وفاقي گهرو وزير چوڌري نثار علي خان، ناڻي وارو وفاقي وزير سينيٽر اسحاق ڊار ۽ آئي ايس آئي جو سربراهه ليفٽيننٽ جنرل رضوان اختر به موجود هئا، ملاقات دوران دهشتگردي خلاف هلندڙ آپريشن ضرب عضب ۾ هن وقت تائين مليل ڪاميابين جو جائزو ورتو ويو، جڏهن ته ملڪ جي اندروني ۽ سرحدن جي سيڪيورٽي واري صورتحال تي خيالن جي ڏي وٺ ڪئي وئي. ان موقعي تي وزير اعظم نواز شريف چيو ته پاڪ فوج جي قربانين سبب ملڪ ۾ امن بحال ٿي رهيو آهي، دهشتگردي جو خاتمو ٿي رهيو آهي، ان کان پهرين جنرل راحيل شريف نشي جي خاتمي واري اداري جي هيڊڪوارٽر جو دورو ڪيو، جنهن دوران اي اين ايف جي ڊي جي، آرمي چيف کي نشي جي اسمگلنگ خلاف هلندڙ آپريشن بابت بريفنگ ڏني، هن ٻڌايو ته نشي مان ملندڙ رقم دهشتگردي جي ڪاررواين ۾ استعمال ٿي رهي آهي، جنهن کي منهن ڏيڻ لاءِ وڌيڪ سخت قدم کنيا پيا وڃن. آرمي چيف جنرل راحيل شريف 15-2014ع جي رڪارڊ ۾ نشي جون شيون پڪڙڻ تي اينٽي نارڪوٽڪس فورس جي ڪارڪردگي کي ساراهيو ۽ شهيدن جي قربانين کي زبردست ڀيٽا پيش ڪئي،

 

ٻوڏ متاثرن جي مدد پهرين ترجيح آهي، زمينداري بندن خلاف آهيون: نثار کهڙو

ڏوڪري(رپورٽر) صوبائي وزير آبپاشي نثار کهڙو ٻلهڙيجي پتڻ تي پهچي بندن جو دورو ڪيو ۽ ٻوڏ متاثرن ۾ راشن تقسيم ڪيو. تفصيل مطابق ڏوڪري تعلقي جي ڪچي واري علائقي ٻلهڙيجي پتڻ تي پهچي هڪڙا بچاءُ بند، حسن واهڻ ۽ ٻلهڙيجي بچاءُ بندن جو دورو ڪيو. ان موقعي تي صوبائي وزير نثار کهڙو ڊي سي لاڙڪاڻو جاويد جاگيراڻي، پ پ اڳواڻن عبدالفتاح ڀٽو، طارق سيال، خان محمد سانگهرو ۽ ٻين سان گڏجي ٻوڏ متاثرن جي ڪيمپن جو دورو ڪندي کانئن مسئلا معلوم ڪيا ۽ ٻوڏ متاثرن ۾ راشن تقسيم ڪيو. ان موقعي تي صوبائي وزير نثار کهڙو ميڊيا سان ڳالهائندي چيو ته موهن جو دڙو واري علائقي کان سنڌو دريا جو پيٽ تمام گهڻو وڏو آهي، گذريل ٻوڏ دوران 11 لک ڪيوسڪ پاڻي گذري ويو ۽ هاڻي به خيريت سان 8 لک پاڻي گذري ويندو. هن چيو ته سنڌ جي حساس بندن جي مان پاڻ نگراني ڪري رهيو آهيان، ٻوڏ سبب متاثر علائقن ۾ ڦاٿل ماڻهن کي آرمي ۽ نيوي اهلڪارن جي مدد سان کين ٻاهر ڪڍيو پيو وڃي. هن چيو ته لاڙڪاڻو خيرپور پل مضبوط آهي، پل کي ڪمزور قرار ڏيندڙن جي سوچ ڪمزور آهي. هن چيو ته اسان زمينداري بندن جي خلاف آهيون، زمينداري بندن سبب پاڻي نيڪال ۾ سخت پريشانيون درپيش اچي رهيون آهن، جن کي جلد هٽايو ويندو. هن وڌيڪ چيو ته ٻوڏ متاثرن جي مدد ڪرڻ حڪومت جي پهرين ترجيح آهي، کين ڪنهن به صورت ۾ اڪيلو نه ڇڏيو ويندو. ان مو قعي تي پ پ اڳواڻ طارق انور سيال خطاب ڪندي چيو ته ڏوڪري باقراڻي تعلقي جي عوام جا ڏک اسان جا ڏک آهن ۽ انهن جي خدمت جاري آهي .ان سلسلي م اسين هر روز اچي ٻوڏ سٽيلن کي امداد ڏيون ٿا.

 

گهڻو ٿي چڪو، هاڻ سڀني کي گڏجي بدعنواني خلاف جهاد ڪرڻو پوندو: صدر ممنون حسين

اسلام آباد(بيورو) صدر ممنون حسين چيو آهي ته سڀني کي گڏجي بدعنواني خلاف جهاد ڪرڻو پوندو، اسلام آباد ۾ فاسٽ يونيورستي جي شاگردن جي ڪنووڪيشن کي خطاب ڪندي صدر ممنون حسين چيو ته بدعنواني ملڪ کي تمام گهڻو نقصان پهچايو آهي، گهڻو ٿي چڪو، هاڻ اسان کي بدعنواي جو خاتمو ڪرڻ گهرجي. سندس چوڻ هو ته بدعنوان عنصرن جا حوصلا گهٽائڻ لاءِ انهن جو سماجي بائڪاٽ ڪيو وڃي، هن چيو ته ماضي جي حڪومتن 800 ارب رپين جو قرض ورتو پر ڪو منصوبو نه جوڙيو، موجوده دور ۾ معيشت کي سياست تي اهميت حاصل آهي. صدر ممنو حسين چيو ته اسان کي پنهنجي معيشت کي مضبوط بڻائڻو آهي.

 

 

نشو وڪڻندڙن ۽ دهشتگردن ۾ رابطا ٽوڙڻ جو پڪو پهه، اسمگلرن ۽ ڊيلرن کي لوهي هٿن سان منهن ڏنو ويندو: آرمي چيف

راولپنڊي(م.ڊ) پاڪ فوج جي سربراهه جنرل راحيل شريف نشو وڪڻندڙن ۽ دهشتگردن ۾ رابطا ٽوڙڻ توڙي نشي جو ڪاروبار ڪرڻ سان ڳنڍيل ماڻهن سان لوهي هٿن سان منهن ڏيڻ واري عزم جو اظهار ڪيو آهي. پاڪ فوج جي عام لاڳاپن واري شعبي آئي ايس پي آر مطابق جنرل راحيل شريف اڄ اينٽي نارڪوٽڪس فورس جي هيڊڪوارٽر جو دورو ڪيو، جتي اي اين ايف جي ڊائريڪٽر جنرل نشي جي روڪٿام ۽ اداري جي ڪاررواين بابت کيس بريف ڪيو،ان موقعي تي تقريب کي خطاب ڪندي آرمي چيف چيو ته نشو پيدا ڪندڙ ۽ وڪڻندڙ قومي سلامتي لاءِ خطرو آهن. هن چيو ته نشي جي اسمگلرن ۽ ڊيلرن کي مستبقل جي نسلن کي تباهه ڪرڻ جي اجازت نه ڏني ويندي ۽ کين لوهي هٿن سان منهن ڏنو ويندو. آئي ايس پي آر مطابق جنرل راحيل شريف هلندڙ سال اي اين ايف پاران رڪارڊ منشيات ضبط ڪرڻ جي به ساراهه ڪئي، جنهن سان ملڪي ۽ عالمي سطح تي ان لعنت کي ختم ڪرڻ ۾ مدد ملندي.

 

جن علائقن ۾ پاڻي جو دٻاءُ آهي انهن کي پي ڊي ايم اي طرفان وڌيڪ ٻيڙيون ڏياريون وينديون: وڏو وزير

سکر (اي پي پي)سنڌ جي وڏي وزير سيد قائم علي شاهه رليف بابت خاص صلاحڪار محمد حسن هنڱورو کي هدايت ڪئي آهي ته جن علائقن ۾ پاڻي جو دٻاءُ آهي انهن کي پي ڊي ايم اي طرفان وڌيڪ ٻيڙيون ڏياريون وڃن، جنهن ۾ سکر ۽ گهوٽڪي ضلعن لاءِ 30، 30 جڏهن ته خيرپور ضلعي لاءِ 40 ٻيڙيون فوري فراهم ڪيون وڃن، وڏي وزير سيد قائم علي شاهه چيو ته رليف جي ڪمن لاءِ هر ضلعي لاءِ 505 ملين رپيا جاري ڪيا ويندا، جنهن لاءِ خزاني واري وزارت کي هدايت جاري ڪئي وئي آهي، ان موقعي تي آبپاشي جي صوبائي سيڪريٽري سيد ظهير حيدر شاهه وڏي وزير کي بريفنگ ڏيندي ٻڌايو ته بندن تي پاڻي جي دٻاءَ سبب ڪو به خطرو نه آهي، ضلعي انتظاميا ۽ آبپاشي کاتي جا عملدار 24 ڪلاڪ نگراني ڪري رهيا آهن، هن وڌيڪ ٻڌايو ته سکر بيراج مان 7 لک 25 هزار ڪيوسڪ پاڻي گذرندو، ڪوهه سليمان تي وڌيڪ برساتن سبب پاڻي ۾ اضافي جو خدشو آهي، ان جي باوجود اسان 9 لک ڪيوسڪ پاڻي گذارڻ جي تياري ڪئي آهي، هن ٻڌايو ته ڪچي جي علائقن مان وڏي تعداد ۾ ماڻهن کي محفوظ جاين ڏانهن منتقل ڪيو ويو آهي، جڏهن ته انهن ماڻهن جي علاج سان گڏ انهن جي چوپائي مال جي ويڪسينيشن پڻ ڪئي پئي وڃي، جڏهن ته ڪچي جي علائقن مان متاثرن کي محفوظ جاين ڏانهن منتقل ڪرڻ ۾ ڏکيائيون درپيش اچي رهيون آهن، متاثرن کي رليف فراهم ڪرڻ لاءِ فنڊ فراهم ڪيا وڃن.

 

 آصف زرداري سنڌ جي وڏي وزير کي اهم معاملن تي صلاح مشورن لاءِ دبئي گهرائي ورتو

ڪراچي(م.ڊ) پيپلز پارٽي جي شريڪ چيئرمين ۽ اڳوڻي صدر آصف علي زرداري سنڌ جي وڏي وزير سيد قائم علي شاهه کي اهم معاملن تي صلاح مشورن لاءِ دبئي گهرائي ورتو آهي،ذريعن مطابق آصف زرداري جي هدايت ملڻ کانپوءِ قائم علي شاهه دبئي روانو ٿي ويو، ذريعن جو چوڻ آهي ته ٻنهي اڳواڻن وچ ۾ ملاقات دوران سنڌ ۾ ٻوڏ سبب پيدا ٿيل صورتحال، صوبي ۾ امن امان ۽ حڪومتي ڪارڪردگي سوڌو اهم معاملن تي خيالن جي ڏي وٺ ڪئي ويندي، واضح رهي ته گذريل مهيني به سنڌ ڪابينا جو اجلاس آصف زرداري جي صدارت هيٺ دبئي ۾ ٿيو هو، جنهن دوران سنڌ ڪابينا ۾ وڏي ڦيرڦار ڪئي وئي هئي.

 

اُهو نٿو ٿي سگهي ته ڪجهه آفيسر گڏجي آرمي چيف کي تبديل ڪري ڇڏين: چوڌري نثار

اسلام آباد (بيورو) وفاقي گهرو وزير چوڌري نثار چيو آهي ته آرمي چيف جنرل راحيل شريف کي حڪومت، فوج ۽ سڄي قوم جي مڪمل حمايت حاصل آهي، پاڪ فوج نظم ضبط جي پابند آهي ان لاءِ ڪجهه آفيسرن جو گڏجي آرمي چيف کي تبديل ڪرڻ ناممڪن آهي. اسلام آباد ۾ نادرا جي آن لائين درخواست فارم سسٽم جي افتتاحي تقريب کي خطاب ۽ ميڊيا سان ڳالهائيندي وفاقي گهرو وزير چيو ته پاڪستان ۾ حڪومت ۽ انتظامي معاملا هلائڻ آسان ناهي. هن چيو ته تحريڪ انصاف جي ڌرڻي تي هــُو هڪ سڄو ڪتاب لکي سگهي ٿو، پر خراب ڪپڙا چوڪ تي ڌوئڻ ٺيڪ ناهي. سندس چوڻ هو ته سياسي ماڻهن بابت سازشن جي ڳالهه ٿيندي رهندي آهي پر فوج ڪڏهن به اهڙي قسم جي تڪرارن جو حصو ناهي بڻي. هن چيو ته هـُو جنگ واري حالت ۾ آهن ۽ دشمن گهٽين ۽ بازارن ۾ لِڪل آهن، فوج خلاف بيان ڏيڻ ملڪ لاءِ نقصانڪار آهي. چوڌري نثار چيو ته پاڪ فوج نظم ضبط جي پابند ۽ دنيا جي بهترين فوج آهي، ملڪ ۾ امن لاءِ پاڪ فوج جون قربانيون فخر جوڳيون آهن. هن چيو ته پاڪستاني فوج واحد فوج آهي جنهن گوريلا جنگ ۾ ڪاميابي حاصل ڪئي، اهو ممڪن ئي ناهي ته ڪجهه آفيسر گڏجي آرمي چيف تبديل ڪن، موجوده آرمي چيف کي حڪومت، فوج ۽ سڄي قوم جو مڪمل اعتماد حاصل آهي. ان کان اڳ تقريب کي خطاب ڪندي چوڌري نثار چيو ته نادرا اهو ادارو آهي جنهن تي پاڪستان فخر ڪري سگهي ٿو. هن چيو ته حڪومت نادرا کي قومي مفاد جو مينڊيٽ ڏنو آهي، پيپلز پارٽي جي آخري دور ۾ نادرا خساري ۾ هو، پر سندن دور ۾ اداري کي پنج ارب رپين جو فائدو ٿيو. وفاقي گهرو وزير چيو ته سندس ذاتي خواهش آهي ته نادرا جو ادارو شفاف ٿئي، گذريل دورن ۾ نادار لکين پرڏيهين کي سڃاڻپ ڪارڊ جاري ڪيا. هن چيو ته 2011ع ۾ 26، 2012ع ۾ 493، 2013ع ۾ 6 هزار ۽ هلندڙ جي ڇهن مهينن ۾ 60 هزار سڃاڻپ ڪارڊ بلاڪ ڪيا ويا. سندس چوڻ هو ته جيڪڏهن آمريڪي ويزا آن لائن ٿي سگهي ٿي ته پاڪستان جا ڇو نه ؟ ڊي جي پاسپورٽ ان ڳالهه تي بنا دير عمل ڪندي آن لائين درخواست فارم سسٽم شروع ڪري ڇڏيو. وفاقي گهرو وزير چوڌري نثار چيو ته پهريون ڀيرو سڃاڻپ ڪارڊ ٺهرائيندڙ کي بائيو ميٽرڪ ڪرائڻو پوندو، ان کانسواءِ ايندڙ ڇهن مهينن ۾ نادار جي ڊي اين اي ليب ٺاهڻ جو به منصوبو آهي

 

جيڪڏ هن قاعدا 25 سال نه ٺهيا ته ڇا 25 سال چونڊ ئي نه ڪرائي ويندي؟: سپريم ڪورٽ

اسلام آباد (بيورو) سپريم ڪورٽ ا سلام آباد ۾ مڪاني چونڊن بابت ڪيس جي ٻڌڻي ڪندي اٽارني جنرل سان نئين ايڪٽ هيٺ قائدا تيار ڪرڻ جي اڳڀرائي تي ٻڌل رپورٽ 5 آگسٽ تائين گهرائي ورتي آهي، جسٽس جواد ايس خوا جه جي سربراهي ۾ 2 رڪني بينچ ڪيس جي ٻڌڻي ڪئي،حڪومت پاران اٽارني جنرل عدالت ۾ پيش ٿي ٻڌ ايو ته سينيٽ کانپوءِ قومي اسيمبلي به اسلام آباد (ڪيپيٽل ٽيريٽري) لوڪل گورنمينٽ ايڪٽ 2015 جي منظوري ڏ ني آهي ، اهو قانون اڄ صحيح لاءِ صدر کي موڪليو ويندو،  ان ايڪٽ جي سيڪشن 17 ۾ اليڪشن ڪرائڻ جي مڪمل اٿارٽي اليڪشن ڪميشن کي ڏ ني وئي آهي، هن عدالت کي خاطري ڪرائي ته ان ايڪٽ هيٺ قائدا 7 ڏينهن ۾ تيار ٿي  ويندا، اليڪشن ڪميشن جي ايڊيشنل ڊائريڪٽر لا چيو ته جيسيتائين قاعدا نه ٿا تيار ٿين، اليڪشن ڪميشن چونڊ نه ٿي ڪرائي سگهي، جنهن تي عد االت ڪاوڙ جو اظهار ڪندي چيو ته ايڪٽ ۾ سمورا  ا ختيار توهان کي ڏ نا ويا آهن پوءِ توهان اليڪشن  ڪرائڻ  ۾ رنڊڪ ڇو پيد ا ڪري رهيا آهيو؟  ا سلام آباد جا شهري 23 سالن کان پنهنجن نمائندن جي حق کان محروم آهن، اليڪشن ٿيڻ سان ماڻهن جا مسئلا حل ٿيندا پر پوءِ به  خبر ناهي ڇو ان ۾ ان حد تائين رنڊڪون وڌ يون پيون وڃن، جيڪڏ هن رولز 25 سال نه ٺهيا ته ڇا 25 سال اليڪشن ئي نه ڪرائي ويندي؟ پوءِ ان صورت ۾ سيڪشن 17 کي ڪيڏانهن وٺي ويندا، ان سيڪشن جي موجودگي ۾ اليڪشن ڪميشن اسلام آباد ۾ هاڻ اليڪشن ڪرائڻ جي پا بند آهي، عد الت حڪومت کان نئين ايڪٽ هيٺ قائدا ٺاهڻ جي اڳڀرائي تي ٻڌل رپورٽ طلب ڪندي ڪيس جي ٻڌڻي 5 آگسٽ تائين ملتوي ڪري ڇڏي.

 

باجوڙ ۾ تيز برسات دوران گهر جي ڇت ڪري پئي، هڪ ئي ڪٽنب جا 6 ڀاتي فوت،4 زخمي

باجوڙ (م.ڊ) باجوڙ ۾ تيز طوفاني برساتن سبب گهر جي ڇت ڪرڻ جي نتيجي ۾ هڪ ئي ڪٽنب جا 6 ڀاتي فوت ٿي ويا ۽ 4 زخمي ٿي پيا. ماموند جي علائقي برهه موخا ۾ تيز برسات دوران هڪ گهر جي ڇت ڪري پئي،جنهن جي نتيجي ۾ هڪ ئي ڪٽنب جا 6 ڀاتي مٽيءَ جي ڍيرن هيٺان  دٻجي فوت ٿي ويا، جڏهن ته 4 ڄڻا زخمي ٿي پيا، مقامي ماڻهنپنهنجي مدد پاڻ هيٺ فوتين جا لاش ۽ زخمين کي مٽيءَ جي ڍيرن هيٺان ٻاهر ڪڍيو، جنهن کانپوءِ زخمين کي اسپتال نيوويو، جتي ڊاڪٽرن مطابق سندن حالت بهتر آهي. خيبرپختونخوا جي گورنر مهتاب عباسي حادثي تي افسوس جو اظهار ڪندي پوليٽيڪل انتظاميا کان رپورٽ گهري ورتي آهي، هن لاڳاپيل اختيارين کي هدايت ڪئي آهي ته متاثر ڪٽبب جي هر ممڪن مدد ڪئي وڃي.

 

پرڏيهي ايجنڊا تي الطاف حسين پاڪ فوج ۽ سيڪيورٽي ادارن کي بدنام ڪري رهيو آهي: سراج الحق

اسلام آباد(بيورو) جماعت اسلامي جي امير سراج الحق چيو آهي ته ڪراچي جو امن الطاف حسين جي ناڪاري پاليسي سبب خراب ٿيو آهي، پنهنجي جاري ڪيل بيان ۾ سراج الحق چيو ته ماضي ۾ به الطاف حسين جا مفاد ڪنهن کان لڪل ناهن، هو پرڏيهي ايجنڊا تي ڪم ڪري رهيو آهي ۽ انهن ئي پرڏيهين جي چوڻ تي پاڪ فوج توڙي سيڪيورٽي ادارن کي بدنام ڪري رهيو آهي. سندس چوڻ هو ته ايم ڪيو ايم خراب ناهي پر ان کي الطاف حسين جي پاليسين خراب بڻايو آهي، هن چيو ته ايم ڪيو ايم ايم جي ڪارڪنن کي گهرجي ته اهي الطاف حسين خلاف آواز اٿارين. سراج الحق چيو ته ايم ڪيو ايم ڪارڪن سوچين ته کين ڪهڙي رستي تي هلايو پيو وڃي.