تازيون خبرون

Monthly Archives: July 2015

گرمي وگهي ماڻهن کي ڪفن نه ڏئي سگهندڙ پاڻي ڪيئن پهچائيندا؟ سپريم ڪورٽ

ڪراچي (اسٽاف رپورٽر) سپريم ڪورٽ ڪراچي ۾ هائيڊرينٽس ۽ واٽر ٽينڪرن بابت اڄ تائين رپورٽ طلب ڪري ورتي آهي، عدالت جو چوڻ آهي ته گرمي وگهي ماڻهن کي ڪفن نه ڏئي سگهندڙ پاڻي ڪيئن پهچائيندا؟ سپريم ڪورٽ ڪراچي رجسٽري ۾ جسٽس امير هاني مسلم، جسٽس مقبول باقر ۽ جسٽس مشير عالم تي ٻڌل بينچ غير قانوني هائيڊرينٽس خلاف داخل ڪيل درخواست تي ٻڌڻي ڪئي. ٻڌڻي دوران واٽر بورڊ جي ايم ڊي هاشم رضا زيدي جي پيش نه ٿيڻ تي عدالت سخت ڪاوڙ جو اظهار ڪيو جنهن بعد واٽر بورڊ جي ڊپٽي مئنجنگ ڊائريڪٽر کي اڌ ڪلاڪ اندر گهرايو ويو. واٽر بورڊ جي آفيسرن عدالت کي ٻڌايو ته ايم ڊي هاشم رضا زيدي اسلام آباد ويل آهي تنهنڪري پيش نه ٿي سگهيو. عدالت واٽر بورڊ جي آفيسرن کان پڇاڻو ڪيو ته ڪهڙي قانون يا اسڪيم تحت هائيڊرينٽس ۽ واٽر ٽينڪر هلايا پيا وڃن جنهن تي انتظاميا وضاحت ڪئي ته جن علائقن ۾ پاڻي کوٽ آهي تي ٽينڪرن ذريعي پاڻي پهچايو ويندو آهي. عدالت ريمارڪس ۾ واٽر بورڊ جي عملدارن سان مخاطب ٿيندي چيو ته ڪراچي ۾ گرمي وگهي فوت ٿي ويل ماڻهن کي ڪفن نه ٿا ملن عوام کي پاڻي ڪئين ملندو؟ سپريم ڪورٽ واٽر بورڊ جي ايم ڊي کي سڀاڻي طلب ڪندي هائيڊرنٽس ۽ واٽر ٽينڪرن بابت تفصيلي رپورٽ پيش ڪرڻ جو حڪم ڏيڻ بعد ٻڌڻي ملتوي ڪري ڇڏي.

 

ملڪ ۾ بجلي جي پيداور جا شروع ڪيل منصبن سان لوڊشيڊنگ ۾ گهٽتائي ايندي: عابد شير علي

سکر(بيورو) پاڻي ۽ بجلي واري وزير عابد شير علي چيو آهي ته ملڪ ۾ بجلي جي پيداور جا شروع ڪيل منصبن سان لوڊشيڊنگ ۾ گهٽتائي ايندي، ن ليگ جي حڪومت توانائي جي منصوبن تي ڪم جي رفتار کي تيز ڪري ڇڏيو آهي، سيپڪو سميت بجلي جي ورهاست وارين ڪمپنين کي هدايتون ڏنيون آهن ته هو بجلي جي چوري ۽ رهتون ادا نه ڪرڻ وارن صارفين خلاف مهم کي تيز ڪرين ۽ بجليچوري ۾ ملوث صارفين ۽ انهن کي بجلي جي سهولتون فراهم ڪندڙن خلاف ڪاروائي ڪئي وڃي.، سيپڪو ۾ موجود ڪرپٽ آفيسرن جي خلاف لٺ کئي آهي آفيسرن کي هدايتون به ڏنيون آهن ته هو پنهنجي ڪارڪردگي کي بهتر بڻائڻ سان گڏو گڏ صارفين کي ريليف فراهم ڪرڻ جي لاءِ پنهنجو ڪردار ادا ڪرين. ٻئي صورت ۾ انهن جي خلاف سخت کاتيدار ڪاروائي ڪئي ويندي. اهڙن خيالن جو اظهار هن مسلم ليگ ن ضلعي سکر جي صدر سيپڪو بورڊ آف ڊائريڪٽر جي ميمبر امام الدين کوسو، ترجمان خورشيد احمد ميراڻي، ميمبر سيپڪو بورڊ آغا امتياز جي اڳواڻي ۾ سيپڪو ريسٽ هائوس ۾ ملاقات ڪندڙ ليگي ڪارڪنن جي وفد سان ڳالهائيندي ڪيو. هن چيو ته لائن مين، ميٽر ريڊر، لائين سپريٽنڊنٽ ۽ ٻين اسٽاف کي پنهنجي ڪارڪردگي کي بهتر بڻائڻ جي لاءِ هڪ مهيني جي مهلت ڏني آهي هڪ مهيني کانپوءِ سکر جو دورو ڪندس. ان موقعي تي وفد ضلعي سکر ۾ پارٽي مسئلن ۽ سپڪو جي ڪاڪردگي ۽ صارفين جي مشڪلات جي باري ۾ تفصيلي طور تي آگاهه ڪيو جنهن تي عابد شير علي يقين ڏيارو ته سکر جو دورو ڪري سندن ن ليگ جي آفيس ۾ ڪارڪن جا مسئلا پڻ ٻڌندس.

 

سنڌ دريا ۾ ٻوڏ اچڻ کان پوءِ سڳيون جي ڪچي ۾ 50 کان وڌيڪ ڳوٺ پاڻي جي هيٺ اچي ويا

هنڱورجا (نمائندو) سنڌ دريا ۾ ٻوڏ اچڻ کان پوءِ سڳيون جي ڪچي ۾ 50 کان وڌيڪ ڳوٺ پاڻي جي هيٺ اچي ويا آهن جڏهن ته هزارين ڳوٺاڻا پاڻي جي اندر ڦاٿل آهن انهن کي ٻاهر پڪي طرف ڪڍڻ لاءِ انتظاميه جي طرفان اڃا تائين ڪي به انتظامات ناهن ڪيا جنهن جي ڪري ڪچي ۾ ڦاٿل ماڻهو سخت پريشاني ۾ مبتلا ٿي ويا آهن جڏهن ته انتظاميه جي پاران 3 ٻيڙيون سڳيون جي زيرو پوائنٽ تي ايس ايم بچاءُ بند وٽ آنديون ويون آهن جن کي پيٽرل فراهم نٿو ڪيو وڃي جنهن جي ڪري اهي ٻيڙيون بند ٿي بيٺل آهن جڏهن ته ڪچي ۾ اندر ڦاٿل ڳوٺاڻا پنهنجي مدد پاڻ تحت ٻيڙين جي ذريعي ڳرا خرچ ڪري ٻاهر نڪري رهيا آهن جن کي رهائڻ توڙي راشن فراهم نٿو ڪيو وڃي جنهن ڪري ڪچي جا ٻوڏ متاثرين ڳوٺاڻا کليل آسمان هيٺ بند تي پنهنجن ٻچن ٻارن سميت پريشان امداد جي آسري ويٺل آهن. هوڏانهن ڪچي جي ڳوٺن تي سڳيون جي پڪي سان ملائيندڙ سدا واهه جي محمود چنا واري پل پاڻي جي شديد دباءُ سبب ڪري پئي آهي جنهن جي ڪري سوين ڳوٺاڻن جو زميني رابطو ڪٽجي ويو آهي. هوڏاهن ڪچي جي علائقي ۾ ماڻهن سان گڏ هزارين جانور ڦاٿل آهن جن ۾ خطرناڪ بيمارين منهن ڪڍيو آهي جڏهن ته بيمارين کان بچاءُ لاءِ لائيو اسٽاڪ کاتي پاران اڃا تائين ڪنهن به قسم جي ويڪسئن ناهي ڪرائي وئي نه ئي وري ڪئمپون لڳايون ويون آهن ٻئي پاسي سڳيون جي ايس ايم بچاءُ بند جي ڪزور هجڻ جي ڪري 2010 جي مها ٻوڏ دوران بند جي مضبوطي لاءِ شروع ڪيل اسٽون پچنگ وارو ڪم رولڙي جو شڪار آهي 5 سال گذرڻ باوجود ڪم مڪمل نه ٿيو آهي ۽ ٺيڪيدار آبپاشي ڪامورن سان ملي ڀڳت ڪري بل پاس ڪرائي گم ٿي ويو آهي. سڳيون جي ڪچي ۾ پاڻي جي شديد دباءُ کانپوءِ هزارين ايڪڙن تي پوکيل فصل ڪمند، جوئر، تر، وونئڻ سميت ٻيا فصل مڪمل طور تي ٻڏي تباهه ٿي ويا آهن. جڏهن ته ڪجهه زمينداري بند اڃا تائين موجود هجڻ جي ڪري پاڻي جو دباءُ دريا جي بند طرف وڌي رهيو آهي جنهن ڪري قاضي ڀٽا، محمود چنا ۽ ٻين هنڌن تان بند ڪمزور هجڻ جي ڪري پاڻي جو دباءُ وڌڻ جي صورت ۾ ٽٽڻ جا امڪان موجود آهن. هوڏانهن هن وقت تائين ٻوڏ متاثرين جي رليف لاءِ وزيراعلي سنڌ جي واضع حڪمن جي باوجود اڃا تائين رليف وارو ڪم شروع نه ٿي سگهيو آهي ۽ ڪٿي به سڳيون جي علائقي ۾ اڃا تائين نه ته رليف ڪئمپ لڳي آهي ۽ نه ئي وري صحت کاتي پاران ميڊيڪل ڪئمپ لڳائي آهي. جنهن جي ڪري ڪچي جا ٻوڏ متاثرين ماڻهو بيمارين سبب سڳيون جي اسپتال جتي ڪنهن به قسم جي ڪابه صحت جي سهولت موجود ناهي اتي پهچن ٿا يا وري ٻين ڏوراهه علائقن هنڱورجا، راڻيپور، صوڀوديرو، گمبٽ جي اسپتالن ڏانهن وڃڻو پوي ٿو. هوڏانهن تعلقي انتظاميه جا عملار بندن جا سکڻا چڪر ڪاٽي ڪوڙا بل ۽ ووچر ٺاهڻ ۾ مصروف ٿي ويا آهن ڄڻ کين جي عيد ٿي وئي هجي. سڳيون جي ڪچي جي متاثر ڳوٺاڻن ميڊيا آڏو دانهون ڪندي چيو آهي ته پاڻي جي ٻوڏ اچڻ جي ڪري اسان جو سڀ ڪجهه لڙهي ويو آهي پر انتظاميه اسان ڳوٺاڻن کي به ڪچي مان ٻاهر ڪڍڻ لاءِ ڪي به اپاءُ وٺڻ لاءِ تيار ناهي. سڳيون ۾ ٽي ٻيڙيون بيهاريون ويون آهن جن کي به تيل فراهم نٿو ڪيو وڃي هن مطالبو ڪيو آهي ته ڪچي ۾ پاڻي اندر ڦاٿل ڳوٺاڻن کي فوري طور تي ٻاهر ڪڍڻ لاءِ بندوبست ڪيو وڃي رليف ڪئمپون توڙي ميڊيڪل ۽ لائيو اسٽاڪ جون ڪئمپون لڳرايون وڃن ۽ متاثرين کي راشن فراهم ڪرڻ لاءِ بندوبست ڪيو وڃي.

 

ڏوڪري ۾ برساتي پاڻي نيڪال نه ٿيڻ، گندگي جي آزار ۽ ٽي ايم او جي ڪرپشن خلاف جيئي سنڌ تحريڪ پاران احتجاج

ڏوڪري(نمائندو)ڏوڪري ۾ برساتي پاڻي نيڪال نه ٿيڻ، گندگي جي آزار ۽ ٽي ايم او جي ڪرپشن خلاف جيئي سنڌ تحريڪ ۽ شهرين طرفان 4 ڏينهن به علامتي بک هڙتال ڪري احتجاجي مظاهرو ڪيو ويو، ٽي ايم او جي نااهلي ۽ ڪرپشن سبب سڄو شهر ڀوڳي رهيو آهي، عوام جي زندگي عذاب بڻائيندڙ ٽي ايم او خلاف بنا دير ڪارروائي ڪري شهر جي صفائي بحال ڪرڻ جو مطالبو. تفصيل مطابق ڏوڪري شهر ۾ برساتي پاڻي نيڪال نه ٿيڻ ڪري گندو پاڻي شاهي بازار، اسپتال روڊ، سئنيما روڊ، امام بارگاهه روڊ سميت مکيا روڊن ۽ گهٽين ۾ بيهڻ ڪري دوڪاندار ۽ شهري سخت پريشان آهن. ٻئي طرف برساتي پاڻي ۽ گندگي سبب ميمڻ محلو، عباسي محلو، عيدگاهه محلو، قريشي محلو، جوڻيجا محلي، بينظير ڪالوني، فارم محلي سميت ڪيترن ئي محلن ۾ گندو پاڻي گهٽين ۽ گهرن ۾ بيهڻ ڪري مليريا سميت ٻين وبائي بيمارين منهن ڪڍيو آهي. ٻئي طرف برساتي پاڻي نيڪا نه ٿيڻ، شهر ۾ گندگي ۽ ٽي ايم او امداد کوکر جي مبينا ڪرپشن خلاف جيئي سنڌ تحريڪ جي سڏ تي شهر جي سياسي سماجي تنظيمن ۽ شهرين طرفان ڪامريڊ شبن جتوئي، ديشي شبير، عثمان جيسر، جميل شيخ ۽ ٻين جي اڳواڻي ۾ ڪارڪنن بينر ۽ پلي ڪارڊ کڻي ٽائون هال ۾ 4 ڪلاڪ علامتي بک هڙتال ڪئي، جڏهن ته مظاهرين شهر جو گشت ڪري حيدر چوڪ وٽ ڌرڻو پڻ هنيو. ان موقعي تي خطاب ڪندي ڪامريڊ شبن جتوئي، عثمان جيسر ۽ جميل شيخ چيو ته ڏوڪري شهر ۾ گندگي جي ذميوار ٽي ايم او امداد کوکر ۽ سندس ننڍي ڀاءُ ٽائون آفيسر گلشير کوکر ڏوڪري ڪروڙين روپيا ڪرپشن ڪري شهر کي تباهه ۽ برباد ڪري ڇڏيو آهي. هنن چيو ته 4 ڏينهن کان جاري شهرين جي احتجاج جو ڪنهن به چونڊيل نمائندي توڙي سرڪاري ڪاموري نوٽيس نه ورتو آهي، جيڪا عوام سان وڏي زيادتي آهي. اڳواڻن چيو ته شهر ۾ 6 ڏينهن اڳ پيل برسات جو پاڻي نيڪال نه ٿيڻ انتظامي نااهلي آهي، پر تنهن هوندي به اينٽي ڪرپشن سميت سرڪاري ادارا خاموش تماشائي بڻيل آهن. شهرين ۽ قومي ڪارڪنن وڏي وزير، بلديات جي وزير، چيئرمين نيب، چيئرمين اينٽي ڪرپشن ۽ ڪمشنر لاڙڪاڻوکان مطالبو ڪيو ته ڏوڪري تعلقي جي هڪ ڪروڙ 35 لک روپيا بجيٽ هڙپ ڪندڙ ٽي ايم او امداد کوکر ۽ سندس ڀاءَ ٽائون آفيسر گلشير کوکر کي بنا دير هٽائي سندن ڪيل ڪروڙين روپيا ڪرپشن جي انڪوائري ڪرائي ڏوڪري شهر ۾ صفائي ڪرائي وڃي.

 

3 وحشي جوابدارن جي نوجوان ناري سان لجالُٽ، ناري کي حمل جي تصديق، وارثن جو ميڊيا سينٽر آڏو احتجاج

پنوعاقل ( رپورٽر )3 وحشي جوابدارن جي نوجوان ناري سان لجالُٽ، ناري کي حمل جي تصديق، وارثن جو ميڊيا سينٽر آڏو احتجاج، عدالتون ۽ اختياريون نوٽيس وٺي انصاف فراهم ڪن، جوابدارن خلاف قدم نه کنيو ته پاڻ ساڙي ڇڏيندس، رپورٽ موجب، وحشيت جو شڪار ناري رابعه، ڀيڻ فرزانه بي بي، ماءُ بشيران بي بي ۽ ڀاءُ غلام قاسم ۽ ٻين ميڊيا سينٽر آڏو سخت احتجاج ڪندي دانهيندي چيو ته ضلعي بهاولپور جي تعلقي احمدپور ۾ بٺي مالڪ ملڪ عابد جي سرن جي بٺي تي مزدوري ڪندا هئا سين ته بٺي جي منشين جوابدار آصف علي، نور محمد ۽ حضور بخش خان بلوچ 14 سالن جي ناري رابعه سان زبردستي لجالُٽ ڪندا هئا. هنن ڌمڪيون ڏنيون ته ڪنهن سان به ڳالهه ڪئي ته سڀني کي قتل ڪري ڇڏينداسين. اسان جي مٿان پهرو ڏيندا هئا اسان کي يرغمال بڻائي رکيو ويو هو. اسان رات جي انڌيري ۾ وجهه وٺي پيري پنڌ ڪري ريل رستي پنهنجي گهر پنوعاقل ۾ پهتا آهيون. هو اسان جي تلاش ۾ آهن ۽ هو بااثر آهن اسان کي جان ۽ مال جو خطرو آهي هنن ميڊيا وارن کي اپيل ڪئي ته هو اسان مظلوم خاندان جي واهر ڪن. اسان جو آواز اقتدار جي ايوانن تائين پهچايو وڃي. مظلوم ناري رابعه روئيندي مُلڪ جي عدالتن، حڪومت پنجاب ۽ حڪومت سنڌ کان گهر ڪئي آهي ته وحشي جوابدارن خلاف قدم کڻي انصاف ڏياريو وڃي ۽ تحفظ ڏنو وڃي. ناري چيو ته جيڪڏهن وقت جي حڪمرانن انصاف نه ڏياريو ته مان پاڻ کي باهه ڏئي ساڙي ڇڏيندس. ٻي طرف پنوعاقل تعلقه اسپتال جي ڊاڪٽرياڻي آسما ناري کي 3 مهينن جي حمل جي تصديق ڪري ڇڏي آهي.

 

پاڪستان ۾ رهندڙ مائٽ پسند نه ٿا ڪن ته مان پاڪستان مخالف ڪردار ادا ڪريان: سيف علي خان

نئين دهلي (شوبز نيوز) بالي ووڊ اداڪار ڇوٽي نواب سيف علي خان جو چوڻ آهي ته پاڪستان ۾ رهندڙ مائٽ پسند نه ٿا ڪن ته هو پاڪستان مخالف ڪردار ادا ڪري، ڀارتي هدايتڪار ڪبير خان فلم ”بجرنگي ڀائي جان“ جي ڪاميابيءَ کان پوءِ نئين فلم ”فينٽم“ آڻي رهيو آهي، خابرو اداري موجب نئين فلم جي پروموشن لاءِ هڪ پريس ڪانفرنس کي خطاب ۾ سيف علي خان، ڪترينا ڪيف ۽ هدايتڪار ڪبير خان شريڪ ٿيا، سيف علي خان سوالن جي جواب ۾ چيو ته تازو ئي هڪ مائٽ ڳالهايو هو، هن جو چوڻ هو ته هِت پاڪستان مخالف ڪردار ڪير به پسند ناهي ڪندو ۽ اسان مان ڪو به اينٽي پاڪستان ڪردار يا اهڙي فلم ڪرڻ پسند ناهي ڪندو جنهن ۾ پاڪستان تي تنقيد ٿيل هجي. ڊائريڪٽر ڪبير خان ”بجرنگي ڀائي جان“ جي ڪاميابيءَ تي خوش ٿيندي چيو ته مون کي نه ٿو لڳي ته پاڪستان دهشتگردن جي نمائندگي ٿو ڪري، پاڪستان ۾ رهندڙ امن پسند آهن، هن چيو ته ڀارت ۾ خراب ذهنيت موجود آهي، جيڪا پاڪستاني دهشتگردن جي نمائندگي ڪري رهي آهي. مان ”بجرنگي ڀائي جان“ جو ڊائريڪٽر آهيان ۽”فينٽم“ جو به، ٻنهي فلمن ۾ پاڪ-ڀارت ماڻهن وچ ۾ رابطو وڌائڻ جو پيغام آهي.ڪانفرنس دوران صحافي ڪبير خان تي ڏمرجي پيا ۽ چيو ته ڪبير ٻڌائي ته ڀارت ۾ ڪير انتها پسند آهي، جنهن تي ڪبير خان چيو ته اوهان ان زبان ۽ لهجي ۾ نه ٿا ڳالهائي سگھو، آرام سان ڳالهايو.

 

ڪنگنا راناوت ۽ سندس ڀيڻ رنگولي راناوت جي هدايتڪار راجڪمار هيراڻي سان ملاقات

ممبئي (شوبز نيوز) بالي ووڊ اداڪارا ڪنگنا راناوت ۽ سندس ڀيڻ رنگولي راناوت جي هدايتڪار راجڪمار هيراڻي سان ملاقات ڪئي، بالي ووڊ ذريعن موجب ڪنگنا جي راجڪمار هيراڻيءَ سان ملاقات ڪنهن اسڪرپٽ کي پڙهڻ واري معاملي تي ٿي سگهي ٿي، ڇو جو سندس گهران نڪرندي ٻنهي جي هٿن ۾ هڪ فائيل هئو. واضح رهي ته ڪنگنا جي راجڪمار هيراڻي سان ملاقات عامر خان ڪرائي هئي، جڏهن ته اها سمجهه ۾ سولي ڳالهه آهي ته  ڪنگنا کي سنجي دت جي زندگي تي ٺهندڙ فلم لاءِ چيو ويو هو، پر ٻئي پاسي بالي ووڊ ذريعن جو پڻ چوڻ هو ته ملاقات ۾ فقط مالي معاملن تي ڳالهه ٻولهه ٿي آهي

 

ڪاليج ۾ ٿيل شوٽنگ بعد عمران خان شاگردن ۽ شاگردياڻين سان ڊگهيون ڪچهريون ڪيون

ممبئي (شوبز نيوز) بالي ووڊ جي مسٽر پرفيڪٽ جي ڀاڻج اداڪار عمران خان جي ڪنگنا راناوت سان گڏ ايندڙ فلم ”ڪٽي بٽي“ جي شوٽنگ دوران مختلف مصروفيتون ڏٺيون ويون، بالي ووڊ ذريعن موجب هڪ ڪاليج ۾ فلم جي شوٽنگ دوران عمران خان کي شاگردن سان ڪچهريون ڪندي ڏٺو ويو. فلم ۾ ٻئي اداڪار ڪاليجي شاگردن جو ڪردار ادا ڪري رهيا آهن، پهريون ڀيرو ڪاليج ۾ ٿيل شوٽنگ بعد عمران خان شاگردن ۽ شاگردياڻين سان ڊگهيون ڪچهريون ڪيون، جنهن ۾ فلم ٺهڻ جو طريقه ڪار دنيائي فلمن ۽ ٻين معاملن تي ڳالهه ٻولهه ڪئي ويئي. ياد رهي ته نڪهل آڏواڻي جي هدايتڪاري هيٺ ٺهندڙ فلم ”ڪٽي بٽي“ 18 سيپٽمبر تي رليز ڪئي ويندي.

 

مان ساٿي فنڪارن سان جھيڙو نه ٿي چاهيان، پر جيڪڏهن ڪو مون تي تنقيد ڪندو ته ان جو کَرو جواب ڏيڻ جو حق رکان ٿي:ميرا خان

ڪراچي (شوبز نيوز) پاڪستاني اداڪارا ميرا چيو آهي ته مان ساٿي فنڪارن سان جھيڙو نه ٿي چاهيان، پر جيڪڏهن ڪو مون تي تنقيد ڪندو ته ان جو کَرو جواب ڏيڻ جو حق رکان ٿي، مان فلمن جي لاءِ ماڻهن کي منٿون ڪرڻ واري ناهيان پنهنجي عزت ۽ معيار تي ڪو سمجھوتو نه ڪنديس، خاص ڳالهه ٻولهه دوران اداڪارا ميرا چيو ته منهنجون اهي ساٿي اداڪارائون جن جون ٻيڙيون ٻڏي رهيون آهن، اهي پاڻ کي انڊسٽريءَ ۽ ميڊيا ۾ جيئرو رکڻ لاءِ مون سميت هر ڪنهن تي تنقيد ڪرڻ کي فرض ٿيون سمجھن، پر مان کين واضح ٻڌائي ڇڏيان ته مان ڪنهن سان جھيڙو نه ٿي چاهيان پر جيڪڏهن ڪو بداخلاقي ڪندو ته ان جو کيس کَرو ۽ کُتو جواب ڏيڻ جو حق رکان ٿي، مون ان کان اڳ به پنهنجي عزت تي ڪو سمجھوتو ناهي ڪيو ۽ نه ئي اڳتي ڪنديس.

 

اهڙيون سيريزون تمام گھٽ ٿينديون آهن جن ۾ سڀ رانديگر پرفارمنس سٺي ڏيندا هجن:اظهر علي

لاهور (اسپورٽس نيوز) پاڪستان جي ون ڊي ڪرڪيٽ ٽيم جي ڪپتان اظهر عليءَ سريلنڪن دوري کي ڪامياب قرار ڏيندي چيو آهي ته سريلنڪا خلاف ون ڊي سيريز ۾ ڪاميابي ٽيم ورڪ جو نتيجو آهي. اهڙيون سيريزون تمام گھٽ ٿينديون آهن جن ۾ سڀ رانديگر پرفارمنس سٺي ڏيندا هجن. آخري ميچ ۾ پراڻين ميچن جھڙي ڪارڪردگي نه ڏيکاري سگھياسين، جنهن تي تمام گھڻو افسوس آهي. لاهور ۾ ميديائي نمائندن سان ڳالهائيندي اظهر عليءَ جو چوڻ هو ته ون ڊي ۾ جڏهن واپس آيس ته مون تي تمام گھڻو پريشر هو، سريلنڪا پنهنجي هوم گرائونڊ تي تمام مضبوط ٽيم آهي، ۽ اسان تي ون ڊي ميچن دوران تمام گھڻو پريشر هو، پر رب جو شڪر آهي ته پاڪستان سيريزکٽي ورتي جنهن ۾ سموري ٽيم جي سٺي ڪارڪردگي رهي، هڪ سوال جي جواب ۾ ڪپتان اظهر عليءَ جو چوڻ هو ته وڪيٽ ڪيپر بيٽسمين سرفراز احمد کي مٿي کيڏائڻ پلان جو حصو هو، جيڪو ڪامياب رهيو، اظهر عليءَ چيو ته سڀني رانديگرن فيلڊنگ جي شعبي ۾ تمام گھڻي محنت ڪئي جنهن جو فائدو به پهتو. اظهر عليءَ چيو ته کيس اميد آهي ته پاڪستان ٽي ٽوئنٽي سيريز ۾ به لنڪا کي 2-0 تان هارائيندو.