تازيون خبرون

Daily Archives: July 27, 2015

چترال ۾ قيامت برپا ڪندڙ برسات ۽ ٻوڏ جون تباهيون جاري، فوتين جو انگ 40 ٿي ويو

چترال (مانيٽرنگ ڊيسڪ) قيامت برپا ڪندڙ برسات ۽ گليشيئرز پگهرجڻ سبب چترال ۾ آيل ٻوڏ سبب هزارين ماڻهو ڦاٿل آهن ۽ فوتين جو انگ 40 ٿي ويو آهي، جڏهن ته پاڪ فوج پاران متاثر علائقن ۾ امدادي ڪارروائين جو سلسلو جاري آهي. چترال ۾ برسات ۽ گليشيئرز پگهرجڻ سبب آيل ٻوڏ تباهي مچائي ڇڏي آهي. چترال ۾ ٻوڏ جي پاڻيءَ جون تباهيون نه رُڪجي سگهيون، اڄ به 2 ڄڻا لـُڙهي ويا جنهن بعد فوتين جو انگ 40 ٿي ويو آهي. برسات ۽ ٻوڏ سبب ڪيترائي رابطا روڊ ۽ پـُليون لــُڙهي ويون آهن، ڪيترن ئي ڳوٺن جو هڪ هفتو گــُذري وڃڻ باوجود ملڪ سان زميني رابطو ڪٽيل آهي. روڊ لــُڙهي وڃڻ سبب چترال جي مٿانهن علائقن ۾ هزارين ماڻهو ڦاٿل آهن جن کي محفوظ هنڌن ڏانهن منتقل ڪرڻ لاءِ پاڪ فوج امدادي سرگرمين ۾ مصروف آهي

 

سنڌ حڪومت جوچترال لاءِ 5 ڪروڙ رپين جو اعلان

اسلام آباد:(بيورو) سنڌ حڪومت پاران چترال جي ٻوڏ متاثرن لاءِ 5 ڪروڙ رپيا ڏيڻ جو اعلان ڪيو آهي پر خراب موسم وچ ۾ اچڻ جي ڪري پيپلز پارٽي جو وفد چترال نه پهچي سگهيو. مخالف ڌر جي اڳواڻ خورشيد احمد شاهه چيو آهي ته  جئين ئي حالتون بهتر ٿيون ته متاثرن جي مدد لاءِ وينداسين، هن ٻڌيو ته پارٽي چئيرمين بلاول ڀٽو زرداري جي هدايت تي 3 رڪني وفد متاثر ٿيل علائقن جو دورو ڪندو، متاثرن جي مدد ڪنداسين، سياست نه. آصف علي زرداري ۽ بلاول ڀٽو زرداري به چترال جو دورو ڪندا.تيمر گرا کان واپسي تي اسلام آباد هيلي ڪاپٽر ۾ صحافين سان ڳالهائيندي خورشيد شاهه چيو ته اڳوڻي چيف جسٽس افتخار حمد چوڌري جي سياست ۾ اچڻ کي سٺو سنئوڻ سمجهون ٿا،۽ گڏوگڏ کيس پرويز مشرف کي به گڏ ملائڻ جي صلاح ڏينداسين.چونڊن جي ڌانڌلي سان لاڳاپيل جڊيشل ڪميشن جي فيصلي تي ڳالهائيندي مخالف ڌر جي اڳواڻ جو چوڻ هو ته جيڪي ٽرمز ۽ ريفرينسز جوڙيا ويا آهن انهن سان جاچ ڪميشن جو اهو ئي فيصلو اچڻو هو. عمران خان کي معافي وٺڻ جي ڪا به ضرورت ناهي.خورشيد شاهه ٻڌايو ته سنڌ حڪومت پاران چترال ٻوڏ متاثرن لاءِ مليل 5 ڪروڙ رپيا ترت انهن تائين پهچايا ويندا، موسم ٺيڪ ٿيڻ سان ئي پيپلز پارٽي جو وفد چترال ويندو.

 

عمران خان جي پريس ڪانفرنس هڪ ناشڪري، بي اعتبار ۽ ضدي شخص جون رڙين کان سواءِ ڪجهه نه هو: وفاقي وزير خواجه سعد رفيق

لاهور (م ڊ) ريلوي واري وفاقي وزير خواجه سعد رفيق چيو آهي ته عمران خان جي وات مان نڪتل هر لفظ نه ته قانون ٺهي سگهي ٿو ۽ نه ئي وري حڪم جو درجو رکي ٿو. تحريڪ انصاف جوڊيشل ڪميشن جي معاملي تي مسلم ليگ (ن) سان ڪيل معاهدي تي فري وئي آهي. جڏهن ته اها ڳالهه طئي ٿي هئي ته منظم ڌانڌلي ثابت ٿي ته نيون چونڊون ڪرايون وينديون ٻي صورت ۾ پي ٽي آءِ پنهنجا الزام واپس وٺندي. پي ٽي آءِ کي الزام هڻڻا هئا ته جوڊيشل ڪميشن تي مسلم ليگ (ن) سان معاهدو ڇو ڪيو. پنهنجي هڪ بيان ۾ خواجه سعد رفيق چيو ته عمران خان جي پريس ڪانفرنس هڪ ناشڪري، بي اعتبار ۽ ضدي شخص جون رڙيون هيون. پي ٽي آءِ گمراهي ۽ غيريقيني پکيڙي جمهوريت ڪيرائڻ جي سازش ۾ ملوث هئي. عمران خان جي وات مان نڪتل هر لفظ نه ته قانون بڻجي سگهي ٿو ۽ نه ئي وري اهو حڪم جو درجو رکي ٿو. ٻين کان معافين ۽ استعيفائن جي گهر ڪندڙ ڪوڙ پڪڙجڻ تي پاڻ معافي گهري استعيفيٰ ڇو نه ٿو ڏئي؟ هن چيو ته پيپلز پارٽي جي شڪست جو سبب ڌانڌلي نه ان جي ناقص ترين ڪارڪردگي آهي. شفاف حڪمراني ۽ موثر ڪارڪردگي ڪڏهن به پيپلز پارٽي جي ڌيان جو مرڪز نه رهي ۽ پي ٽي آءِ به پيپلز پارٽي وانگر تباهي جي رستي تي هلڻ کان پاسو ڪري.

 

اسٽيل مل جا گئس ڪنيڪشن ڪاٽڻ سوچيل سمجھيل سازش آهي: شيري رحمان

اسلام آباد (بيورو) پاڪستان پپلزپارٽي پارليامينٽرينزجي نائب صدر سينيٽر شيري رحمان ، سئي سدرن گئس ڪمپني طرفان هڪ طرفي ڪارروائي ڪندي لاڳاپيل ڌر سان بنا ڪنهن اڳواٽ صلاح مشوري جي پاڪستان اسٽيل ملز جا سمورا گئس ڪنيڪشن ڪاٽڻ تي انتهائي ڳڻتي جو اظهار ڪيو آهي، جاري ڪيل هڪ بيان ۾  پاڪستان پپلزپارٽي پارليامينٽرينزجي نائب صدر چيو ته سئي سدرن گئس ڪمپني جو اهو عمل هڪ طرفو ۽ سوچيل سمجھيل سازش لڳي ٿي جنهن مان وفاقي حڪومت جي تعصباڻي رويي جي عڪاسي ٿئي ٿي گڏوگڏ اهو عمل جمهوري قدرن ۽ مشاورت جي به نفي ڪري ٿو. هن چيو ته معاملي جي بهتر حل لاءِ لاڳاپيل ڌرين سان ڪو به صلاح مشورو ڪرڻ کانسواءِ ۽ بنا ڪنهن منصوبابندي جي اسٽيل ملز جي گئس فراهمي بند ڪرڻ مان ظاهر ٿئي ٿو ته وفاقي حڪومت پاڪستان اسٽيل ملز جي 16 هزارن کان وڌيڪ ملازمن جي مسئلن کي بلڪل نظرانداز ڪيو ويو آهي، شيري رحمان وڌيڪ چيوته لکين ماڻهن جو گذر سفر اڻ سڌي ريت پاڪستان اسٽيل ملز سان ڳنڍيل آهي، تنهن ڪري وفاقي حڪومت کي پاڪستان اسٽيل ملز کي گئس جي فراهمي بند ڪرڻ کان اڳ ۾ گھٽ ۾ گھٽ لاڳاپيل ڌرين سان صلاح مشورويا ڳالهه ٻولهه ضرور ڪرڻ گھرجي ها، هاڻي اهو معاملوگڏيل مفادن واري ڪائونسل ۾ وڃڻ گھرجي، سنينٽر شيري رحمان چيو ته  جيڪڏهن انهي معاملي ۾ شفافيت کان ڪم نه ورتو ويو آهي ته پوءِ اهو چوڻ گھرجي ته وفاقي حڪومت پاڪستان اسٽيل ملز کي بند ڪرڻ جو فيصلو ڪري ڇڏيو آهي ته جيئن پنهنجي من پسندن کي هي اهم قومي اثاثو ڀڳڙن مٺ تي وڪرو ڪري ڏجي. هن چيو ته عالمي مالياتي اداري آءِ ايم ايف کي ڊسمبرڌاري پاڪستان اسٽيل ملزکي خانگائڻ جي پڪ ڏني وئي آهي ۽ سئي سدرن گئس ڪمپني جو اهو قدم وفاقي حڪومت جي سوچيل سمجھيل منصوبا بندي تحت ئي کنيو ويو آهي، هن چيو ته پاڪستان اسٽيل ملز اڳ ئي گئس جي گھٽ پريشر سبب بحران جو شڪار آهي ۽ هاڻي ته ان جي پيداوار مڪمل طور تي تباه ٿي ويندي جنهن کي ٻيهر ٺيڪ ڪرڻ ۾ 3 کان 4 سال لڳندا، شيري رحمان چيو ته پاڪستان اسٽيل ملز شهيد ذوالفقار علي ڀٽو جو تصور هوجنهن هن قومي اداري جو بنياد رکيو، تنهن ڪري هن قومي اداري کي ختم ڪرڻ لاءِ رات جي اونداهي ۾ کنيل ڪنهن به هڪ طرفي قدم خلاف سمورن آئيني فورمن تي آواز اٿاريو ويندو، هي صرف ڪو اڏاوت جو شاهڪار نمونو يا وري ريئل اسٽيٽ ڪامپليڪس ناهي پر هن اداري سان 17 هزار کان وڌيڪ خاندانن جو ماني ڳڀو جڙيل آهي ۽ گڏوگڏ ملڪ جي ڪنڊ ڪڙڇ مان ڪراچي ۾ پنهنجي گذر سفر لاءِ ايندڙن جي لاءِ اتساه ۽ ٻڌي جو اهڃاڻ به آهي

 

ٻوڏ جي سلسلي ۾ سنڌ حڪومت پنهنجيون تياريون مڪمل ڪري ڇڏيون آهن: نثار کهڙو

لاڙڪاڻو(بيورو) سنڌ جي سينيئر صوبائي وزير اطلاعات ۽ آبپاشي نثار احمد کهڙو چيو آهي ته عمران خان اسلام آباد فريز ڪرڻ جي ڳالهه ڪئي هئي پر هاڻي جوڊيشل ڪميشن جي رپورٽ کانپوءِ هو پاڻ گهر ۾ فريز ٿي ويو آهي، پرويز مشرف به ڪالاباغ ڊيم جون ڳالهيون ڪندو هو پر ملڪ جي ماڻهن ان کي ڊيم نه ٺاهڻ ڏنو. اهڙن خيالن جو اظهار هن اڄ عاقل آگاڻي بند جي دوري دوران ميڊيا سان ڳالهائيندي ڪيو. هن چيو ته ٻوڏ جي سلسلي ۾ سنڌ حڪومت پنهنجيون تياريون مڪمل ڪريڇڏيون آهن اسان ڪا به ڳالهه وڌائي پيش نه ڪري رهيا آهيون. هن چيو ته ٻوڏ جي وارننگ ٿا ڏيون ته ان تي به اعتراض ڪيا وڃن ٿا پاڻي نه اچڻ جي ڳالهه تي به اعتراض ڪيا وڃن ٿا. هن وڌيڪ چيو ته جيڪڏهن جبل ڪٽي چين سان اقتصادي راهداري منصوبو ٺاهي سگهجي ٿو ته ڀاشا ڊيم به ٺاهي سگهجي ٿو ان تي ڪم شروع ٿيڻ گهرجي. هن چيو ته پاڻي جا اهڙا منصوبا ٿيڻ گهرجن جنهن تي ڪنهن کي به اعتراض نه هجي. ڪالاباغ ڊيم جي مخالفت ۾ سنڌ سميت سڄي ملڪ وارن جدوجهد ڪئي ۽ عالمي قانون موجب به پاڻي تي پهريون حق پڇڙيءَ وارن جو هوندو آهي. هن چيو ته سنڌ ۾ 100 ننڍا ڊيم ٺهي رهيا آهن جن مان9-8 مڪمل ٿي ويا آهن ٻين تي ڪم هلي رهيو آهي. هن چيو ته ٻوڏ جي ڪري سنڌ جي ڪمانڊ ايريا وارو ڪو به ڳوٺ نه ٻڏو آهي باقي ڪچي ۾ هيٺائين وارا ڳوٺ پاڻي هيٺ آيا آهن اتي رهندڙ ماڻهن کي ڪڍڻ لاءِ ڪوششون ڪيون پيون وڃن. هن چيو ته سمورن ادارن پنهنجو ڪيمپيون قائم ڪيون آهن جن ۾ ٻوڏ متاثرن لاءِ سموريون سهولتون موجود آهن. هن چيو ته سکر مان 2010 ۾ 13 لک ڪيوسڪ کان وڌيڪ پاڻي گذري ويو هو هاڻي 6 کان ساڍا 6 لک ڪيوسڪ پاڻي اچڻ جي اميد آهي. هن چيو ته حساس هنڌن جي مڪمل نگراني ڪئي پئي وڃي بندن تي عملو، مشينري ۽ پٿر وڏي پيماني تي موجود آهن، ميڊيڪل ڪيمپيون پڻ قائم ڪيون ويون آهن. هن چيو ته روينيو ۽ ايريگيشن کاتي وارا سروي ڪري ٻڌائين ته ڪچي جا ڪيترا ڳوٺ ٻڏا آهن پر پڪي وارو ڪو به ڳوٺ پاڻي هيٺ نه آيو آهي.هڪ سوال جي جواب ۾ هن چيو ته 2010 ۾ آيل ٻوڏ دوران هندستان پاڻي اچڻ بابت اڳواٽ اطلاع نه ڏنوهو هاڻي به اهڙو ڪو اطلاع نه آهي. هن چيو ته ايريگيشن کاتي پاران ڪئنالن، شاخن ۽ واهن جي لائيننگ جو ڪم جاري آهي وارا بندي دوران ڪئنالن جي مرمت ڪئي ويندي آهي ۽ ننڍن ڊيمن ۾ برسات جو پاڻي ذخيرو ڪيو ويندو آهي. هن چيو ته عاقل آگاڻي بند تي ڪو به خطرو نه آهي هتي 2010 کان وٺي بند جي مضبوطي جو ڪم هلي رهيو آهي ڪنهن به خطري کي منهن ڏيڻ لاءِ 12لک ڪيوسڪ فوٽ پٿر ذخيرو ڪيا ويا آهن. هڪ سوال جي جواب ۾ نثار احمد کهڙو چيو ته ملڪ کان ٻاهر جيڪو به ماڻهو وڃي ٿو ان کي ويزا ۽ پاسپورٽ هوندو آهي جيڪا جاري ڪرڻ جي ذميواري وفاقي حڪومت جي آهي. هن چيو ته پرڏيهه ويل ڪامورن تي ڪرپشن جا الزام آهن پر اهي اڃا ثابت ناهن ٿي سگهيا، الزامن ثابت ٿيڻ تائين هو معصوم آهن جاچ ڪندڙ ادارا الزام ثابت ڪري کين سزا ڏيارين ته اسان کي ڪو اعتراض نه هوندو. ان کان اڳ صوبائي وزير کي آبپاشي کاتي جي عملدارن عاقل آگاڻي بند جي صورتحال ۽ پاڻي ۾ چاڙهه بابت بريفنگ ڏني ۽ چارٽن جي مدد سان کيس صورتحال کان آگاهه ڪيو. صوبائي وزير بندن تي قائم ڪيل ڪيمپن جو پڻ معائنو ڪيو ۽ عملدارن کي ڪيمپن ۾ سهولتون بهتر ڪرڻ جي هدايت ڪئي، جنهن بعد صوبائي وزير موريا بچاءَ بند جو پڻ دورو ڪيو، جتي کيس بچاءَ بند جي صورتحال بابت آگاهي ڏني وئي. دوري دوران ايم پي اي نواب سردار خان چانڊيو، پ پ پ اڳواڻ عبدالفتاح ڀٽو، سليم سومرو، سڪينه گاد، امير بخش گاد پ پ پ اڳواڻ، ڊپٽي ڪمشنر لاڙڪاڻو جاويد علي جاگيراڻي ۽ آبپاشي عملدارموجود هئا

 

زمينن جي غيرقانوني الاٽمينٽ بابت ايف آئي اي، ڪي ڊِي اي آفيسرن جا بيان وٺڻ شروع ڪري ڇڏيا

ڪراچي(اسٽاف رپورٽر وفاقي جاچ اداري ايف آئي اي ڪراچي ڊولپمينٽ اٿارٽي(ڪي ڊي اي) جي آفيسرن جا بيان قلمبند ڪرڻ شروع ڪري ڇڏيا آهن. ٻئي پاسي رينجرز سنڌ جي ترجمان وضاحت ڪئي آهي ته سوڪ سينٽر جي لينڊ ڊپارٽمينٽ جي آفيس تي ڇاپي جي اڳواڻي ايف آئي اي ڪئي، رينجرز اهلڪار رڳو سيڪيورٽي ڏئي رهيا هئا. ذريعن جو چوڻ آهي ته لينڊ ڊپارٽمينٽ جي آفيس تي ڇاپي کانپوءِ اينٽي انڪروچمينٽ سيل جي اعليٰ آفيسرن سوڌو ڪيترن ئي عملدارن کان جاچ شروع ڪئي وئي آهي. ذريعن جو اهو به چوڻ آهي ته ايف آئي اي پاران ڪي ڊِي اي آفيسرن جي بينڪ اڪائونٽن جا تفصيل جمع به ڪرڻ شروع ڪيا ويا آهن، جڏهن ته لينڊ ڊپارٽمينٽ جي آفيسرن جي ملڪيت بابت به جاچ ڪئي پئي وڃي. ٻه ڏينهن پهرين ايف آئي اي ۽ رينجرز سوڪ سينٽر ۾ لينڊ ڊپارٽمينٽ جي آفيس تي ڇاپو هڻي رڪارڊ قبضي ۾ ورتو هو. ذريعن مطابق وفاقي حڪومت جي ادارن سان لاڳاپيل 700 کان 800 ايڪڙ زمين اعتراض جوڳي طريقي سان نجي ماڻهن کي ڏني وئي آهي، جنهن بابت جاچ جو دائرو وڌايو ويو آهي.

 

گڊو وٽ وڏي ٻوڏ کانپوءِ پاڻي جو سکر ڏانهن سفر، ڪچو مڪمل طور ٻڏل

لاهور/ سکر/ گڊو(م ڊ) سنڌو درياهه جو ٻوڏ وارو وڏو وهڪرو ڏکڻ پنجاب ۾ تباهي پکيڙڻ کانپوءِ سنڌ ڏانهن وڌي رهيو آهي، گڊو وٽ 5 لک ڪيوسڪ پاڻي پهچڻ کانپوءِ  اهو ڪچي کي ٻوڙيندو سکر ڏانهن سفر ڪري رهيو آهي، جنهن دوران ڪچي ۾ رهيل ماڻهن جي وڏي پيماني تي لڏپلاڻ هلندڙآهي، جن لاءِ پڪي تي رليف ڪيمپون قائم ڪيون ويون آهن، فلڊ وارننگ سينٽر جي ذريعن مطابق ڊيرا غازي خان ۾ ٻوڏ سبب جکڙا امام شاهه فلڊ بند ۾ هڪ وڌيڪ 100 فوٽ جو ڪٽ لڳي ويو،  جڏهن ته ساڳئي بند ۾ 4 ڏينهن اڳ لڳل گهارو به ساڍا 3 سئو فوٽ ويڪرو ٿي ويو آهي. ڪوٽ چٺا جي اسسٽنٽ ڪمشنر خالد سنڌو ٻڌايو ته جکڙا امام شاهه واري هنڌان 8 هزار ماڻهن کي محفوظهنڌن تي پهچايو ويو آهي، بند کي گهاري سب ٻوڏ جو وڏو وهڪرو سنڌ جي اولهندي علائقن ۾ داخل ٿي ويو، رحيم يار خان جي وسندي حامد پور ۾ به زمينداري بند ٽٽي پيو، جنهن جي نتيجي ۾ هڪ سئو کان وڌيڪ گهر ۽ فصل پاڻي هيٺ اچي ويا، ليا ۾ ڪوٽ سلطان واري هنڌ پل ٽٽڻ ڪري بکري احمد خان ويندڙ ٽريفڪ معطل ٿي وئي، مظفر ڳڙهه ۾ ٻوڏ جي وهڪري سرڪي، سيت پور ۽ ڪندائي واري هنڌ 20 کان 25 گهر متاثر ڪيا آهن،ٻوڏ جا وهڪرا پنجاب مان گذري سنڌ ۾ داخل ٿيڻ کانپوءِ گڊو وٽ وڏي ۽ سکر بيراج وٽ وچولي درجي جي ٻوڏ جو اعلان ڪيو ويو آهي. مقامي ذريعن مطابق ٻوڏ سبب ڪشمور ۽ گهوٽڪي جو ڪچو مڪمل طور تي ٻڏي چڪو آهي. جتان ڳوٺاڻا وڏي انگ ۾ لڏپلاڻ ڪري پڪي طرف پهچي رهيا آهن، جتي سرڪاري ادارن ۽ نجي تنظيمن پاران رليف ڪيمپون قائم ڪيون ويون آهن.ٻوڏ سبب گهوٽڪي ۽ ڪشمور جي ڪچي جا ڪيترائي ڳوٺ پاڻي هيٺ آيل آهن، جڏهن ته فصل به لڙهي ويو آهي

 

اسلام آباد مان غيراخلاقي سرگرمين ۾ ملوث پرڏيهي عورتن سوڌو 38 ملڪي عورتون ۽ سهولتڪار گرفتار

اسلام آباد(بيورو)وفاقي گهرو وزير چوڌري نثار علي خان جي هدايت تي وفاقي گادي واري شهر جي پوليس غير اخلاقي سرگرمين ۾ ملوث پرڏيهيعورتن ۽ انهن جي سهولتڪارن سوڌو 45 ماڻهن کي گرفتار ڪيو ويو آهي. ذريعن مطابق وفاقي گهرو وزير چوڌري نثار علي خان جي هدايت تي اسلام آباد پوليس ۽ خاص جاچ ڪندڙ ٽيم سوڌو 100 ڪمانڊرز ايس پي ايس آئي يو ڪيپٽن الياس جي اڳواڻي ۾ غير اخلاقي سرگرمين ۾ ملوث ماڻهن خلاف ڪارروائي ڪئي وئي. پوليس ڪارروائي دوران غير اخلاقي سرگرمين ۾ ملوث 20 پرڏيهي عورتن سوڌو انهن جي 3 سهولتڪارن ۽ 4 ڇوڪرن کي گرفتار ڪيو آهي.گرفتار پرڏيهي عورتن جو تعلق چين، آزربائيجان، ازبڪستان،نائيجيريا ۽ ترڪمانستان سان آهي، جڏهن ته گرفتار ٿيندڙن ۾ مشهور ۽ بدنام ٻيون عورتون به شامل آهن، جيڪي گذريل 20 سالن کان انهن غير اخلاقي سرگرمين ۾ ملوث هيون.غيراخلاقي سرگرمين ۾ ملوث عورتن جي سرپرستي ڪرڻ ۾ وفاقي پوليس جا 3 حاضر سروس آفيسر شامل هجڻ جو انڪشاف ٿيو آهي. ان حوالي سان پوليس اختيارين جو چوڻ آهي ته وقعي جي جاچ هلي رهي آهي، جيڪڏهن پوليس آفيسر ان ۾ ملوث هجڻ جا ثبوت مليا ته انهن جي خلاف به قانون مطابق ڪارروائي ڪئي ويندي.

 

پوليس کاتي ۾ سٺي ساک رکندڙ ۽ پيشيوار صلاحيتن وارن آفيسرن کي اهم ذميواريون سونپيون وڃن: آءِ جي سنڌ

ڪراچي (اسٽآف رپورٽر) آءِ جي سنڌ پوليس غلام حيدر جمالي جي صدارت ۾ ٿيل اهم اجلاس ۾ پوليس ۾ سڌارن جو جائزو ورتو ويو. جاري ڪيل پڌرائي موجب آءِ جي سنڌ پوليس واسطيدار عملدارن کي هدايتون ڪيون ته پوليس کاتي ۾ سٺي ساک رکندڙ ۽ بهترين پيشيور صلاحيتن جي مالڪ پوليس آفيسرن کي ئي اهم ذميواريون سونپيون وڃن. اجلاس ۾ ڏوهارين سان لاڳاپن جي بنياد تي ڏوهن ۾ ملوث هجڻ تي پوليس مان نيڪالي ڏنل ۽ بعد ۾ نوڪرين تي بحال ٿيل آفيسرن ۽ اهلڪارن خلاف ۽ انٽيليجنس رپورٽ، اسڪروٽني ڪميٽي جي سفارشن جي روشني ۾ سامهون آيل ملازمن خلاف ڪارروائي شروع ڪرڻ جو فيصلو ڪيو ويو. جنهن تحت اهڙن آفيسرن کي پوسٽنگ تان هٽائڻ کان پوءِ ضروري کاتيوار ڪارروائي ڪئي ويندي. ان حوالي سان آءِ جي سنڌ پوليس طرفان قائم ڪيل ايڊيشنل آءِ جي اسپيشل برانچ ۽ ايڊيشنل آءِ جي ڪراچي تي ٻڌل 2 رڪني ڪميٽي ڪيس ٽو ڪيس بنياد تي ڇنڊڇاڻ ڪندي ۽ 15 ڏينهن اندر فيصلي جي روشنيءَ ۾ تعميلي رپورٽ آءِ جي سنڌ کي پيش ڪندي. اجلاس ۾ فيصلو ڪيو ويو ته پوليس ۾ ڀرتي جي خواهشمند اميدوارن جي باري ۾ معلومات جي تصديق واسطيدار ٿاڻي، پوليس رينج ۽ زون سان گڏوگڏ خاص ڪري سي آر او مان به ڪرائي ويندي ته جيئن ڪرمنل رڪارڊ وارو ڪو به اميدوار پوليس ۾ مقرر نه ٿي سگهي. اجلاس ۾ فيصلو ڪيو ويو ته پوليس ۾ مقرري لاءِ ڪامياب اميدوارن کان انٽرويو لاءِ نفسياتي ماهرن جون به خدمتون حاصل ڪيون وينديون. اجلاس ۾ پوليس جي ڪارڪردگي ۽ غفلت ڪندڙ عملدارن خلاف ڪارروائي وارن معاملن تي پڻ فيصلا ڪيا ويا. اجلاس ۾ ايڊيشنل آءِ جي ٽريفڪ خادم حسين ڀٽي، ايڊيشنل آءِ جي اسپيشل برانچ اي ڊي خواجه، ايڊيشنل آءِ جي ڪراچي مشتاق احمد مهر، ايڊيشنل آءِ جي سي ٽي ڊي ڊاڪٽر ثناءُ الله عباسي ۽ ٻين آفيسرن شرڪت ڪئي.

 

خيبر ايجنسي ۾ پاڪ – افغان سرحد وٽ گاڏي تي آمريڪي ڊرون حملو،5 طالبان ويڙها مارجي ويا

پشاور(م ڊ)خيبر ايجنسي سان ڳنڍيل افغان علائقي چڪنور ۾ گاڏي تي آمريڪي ڊرون حملي جي نتيجي ۾ 5 طالبان ويڙها مارجي ويا، افعان سيڪيورٽي ذريعن مطابق پاڪ- افغان سرحد تي خيبر ايجنسي سان ڳنڍيل ضلعي لال پوره جي علائقي چڪنور ۾ آمريڪي جاسوس جهازطالبان ويڙهاڪن جي گاڏي کي نشانو بڻايو، جاسوس جهاز مان گاڏي تي ٻه ميزائل فائر ڪيا ويا، جنهن جي نتيجي ۾ 5 طالبان مارجي ويا، جڏهن ته گاڏي مڪمل طور تي تباهه ٿي وئي،ذريعن جو چوڻ آهي ته ڊرون حملو طالبان جي ٿاڪ ڀرسان ڪيو ويو،جنهن جي نتيجي ۾ ڪيترائي ويڙهاڪ زخمي پڻ ٿيا آهن،  طالبان ذريعن جو چوڻ آهي ته مارجي ويل طالبان جو تعلق مهمند ايجنسي سان هو.