تازيون خبرون

Daily Archives: July 25, 2015

ڪنهن به فلم جي ڪاميابيءَ ۽ ناڪاميءَ جو فيصلو باڪس آفيس تي ٿيندڙ آمدنيءَ مان نه ٿو لڳائي سگھجي:سنڌي هدايتڪار راجڪمار هيراڻي

ممبئي (شوبز نيوز) بالي ووڊ جي ڪامياب ترين سنڌي هدايتڪار راجڪمار هيراڻيءَ جو چوڻ آهي ته ڪنهن به فلم جي ڪاميابيءَ ۽ ناڪاميءَ جو فيصلو باڪس آفيس تي ٿيندڙ آمدنيءَ مان نه ٿو لڳائي سگھجي. بالي ووڊ فلم ”مسان“ جي اسڪريننگ تي ميڊيائي نمائندن سان ڳالهائيندي راجڪمار هيراڻيءَ جو چوڻ هو ته فلم سٺي آهي يا خراب ان جو تعلق باڪس آفيس سان ناهي. جيڪڏهن ڪا سٺي فلم آهي ۽ اها 2 يا ٽِن ڏينهن ۾ باڪس آفيس تان غائب ٿي وڃي ٿي ته ان کي ناڪام نه ٿو چئي سگھجي، ڇو ته اها ماڻهن جي دلين ۾ هميشه ياد رهندي آهي. فلم ”مسان“ بابت هدايتڪار جو چوڻ هو ته هيءَ هڪ بهترين فلم آهي، جنهن جي بهترين اداڪاري ان کي آسڪر ايوارڊ تائين وٺي وڃي سگھي ٿي. فلم ”مسان“ مئي ۾ ٿيندڙ ڪينز فلمي ميلي ۾ پڻ ٻه ايوارڊ ماڻيا هئا، فلم جي نمائش جمعي تي ڪئي ويندي.

 

ڪيرتي سينن پنهنجي سالگرهه تقريب گهر وارن سان گڏ ملهائڻ جون مڪمل تياريون ڪري ورتيون

ممبئي (شوبز نيوز) بالي ووڊ اداڪارا ڪيرتي سينن پنهنجي سالگرهه تقريب گهر وارن سان گڏ ملهائڻ جون مڪمل تياريون ڪري ورتيون، فلم ”هيروپنتي“ذريعي بالي ووڊ ۾ انٽري ڏيندڙ ڪيرتي سينن جيڪا اصل نئين دهلي جي آهي پر سندس سالگرهه تقريب ملهائڻ لاءِ سندس والدين خاص طور تي ممبئي پهچندا، ڪيرتي سينن 27 جولاءِ 1990ع ۾ نئين دهلي ۾ ڄائي هئي، جيڪا هاڻي پنهنجي 25 سالگرهه ملهائيندي. بالي ووڊ ذريعن موجب ڪيرتي سينن کي بالي ووڊ ۾ مڃتا ملڻ تي تمام گهڻي خوش آهي.

 

هالي ووڊ جي مشهور اداڪارا اينجلينا جوليءَ کي هاڻي هديتڪاري ڪرڻ جو جنون جاڳي پيو

يويارڪ (شوبز نيوز) هالي ووڊ جي مشهور اداڪارا اينجلينا جوليءَ کي هاڻي هديتڪاري ڪرڻ جو به خيال آيو آهي، هالي ووڊ ذريعن موجب فلمساز ادارو نيٽ فلڪس ڪجهه سالن کان بالي ووڊ اچڻ جون تياريون ڪري رهيو آهي ۽ چيو پيو وڃي ته ايندڙ سال ”فرسٽ دي ڪلڊ ماءِ فادر“ نالي هڪ فلم ٺاهي پئي وڃي، جنهن جي هدايتڪاري جا فرض خوبصورت اداڪارا اينجلينا جولي نڀائيندي نظر ايندي. فلم جي ڪهاڻي ڪمبوڊيا جي هڪ ناول نگار جي ناول تان کنيل آهي، جنهن ڪمبوڊيا جي خطرناڪ حڪومت جي قدمن کي پاڻ پنهنجين اکين سان ڏٺو. اينجلينا جولي نه رڳو فلم جي هدايتڪاري ڪندي پر هوءَ ان فلم کي پروڊيوس به ڪندي.

 

بالي ووڊ اداڪارا دپيڪا پڊڪون 2015ع جي بهترين پرفارمر اداڪارا جو ٽائيٽل پنهنجي نالي ڪري ورتو

ممبئي (شوبز نيوز) بالي ووڊ اداڪارا دپيڪا پڊڪون 2015ع جي بهترين پرفارمر اداڪارا جو ٽائيٽل پنهنجي نالي ڪري ورتو. سڌ سماءَ وارن ذريعن موجب بالي ووڊ جي خوبرو اداڪارا دپيڪا پڊڪون هلندڙ سال جي پهرين ٽه ماهي ۾ 8 هِٽ فلمون ڏنيون، جنهن کان پوءِ ميگزين طرفان ڪيل سروي ۾ 53 سيڪڙو ماڻهن کيس هلندڙ سال جي بهترين پرفارمر اداڪارا چونڊيو. دپيڪا جي تازو رليز ٿيل فلم ”پيڪو” آهي جنهن ۾ سندس ڪردار هن جي مشهوريءَ ۾ واڌ ڪئي. ان فهرست ۾ ٻئين نمبر تي پريانڪا چوپڙا جڏهن ته ڪنگنا رناوت ٽئين نمبر تي رهي

 

ويسٽ انڊيز جي تيز مزاج بيٽسمين ڪرس گيل چيلهه جي سور سبب 2 کان 3 مهينا ڪرڪيٽ کان ٻاهر ٿي ويو

جميڪا (اسپورٽس نيوز) ويسٽ انڊيز جي تيز مزاج بيٽسمين ڪرس گيل چيلهه جي سور جي ڪري 2 کان 3 مهينا ڪرڪيٽ کان ٻاهر ٿي ويو آهي. ڪرس گيل اڄ ڪلهه ڪيريبيئن پريميئر ليگ کيڏڻ ۾ مصروف آهي، هن جو چوڻ هو ته جلد چيلهه جي سرجري ڪرائيندو، جنهن کان پوءِ 2 يا ٽِن مهينن تائين ڪرڪيٽ کان پري رهندو، جڏهن ته هلندڙ سال ڊسمبر ۾ هو ٻيون ڀيرو ڪرڪيٽ کيڏندو. ڊسمبر تائين ڪرڪيٽ کان پري رهڻ جي صورت ۾ ڪرس گيل ايندڙ مهيني زمبابوي سان رٿيل سيريز پڻ نه کيڏي سگھندو، جڏهن ته هن آسٽريلين بگ بيش ليگ جي لاءِ ميلبرن رينيگيڊ ٽيم سان به معاهدو ڪيو آهي جنهن جي شروعات 18 ڊسمبر کان ٿي رهي آهي.

 

پاڪستان فٽبال فيڊريشن جي صدر فيصل صالح حيات کي عهدي تان هٽايو ويو

لاهور (اسپورٽس نيوز) لاهور هاءِ ڪورٽ، پاڪستان فٽبال فيڊريشن جي باڊي کي ٽوڙي صدر فيصل صالح حيات کي عهدي تان هٽائي ڇڏيو، جڏهن ته سندن خلاف توهين عدالت جي ڪارروائي به شروع ڪئي وئي آهي. لاهور هاءِ ڪورٽ، پاڪستان فٽبال فيڊريشن جي چونڊن بابت تفصيلي فيصلو ٻــُڌائي ڇڏيو. فيصلي موجب عدالت فٽبال فيڊريشن جي باڊي کي ٽوڙي فيصل صالح حيات کي فيڊريشن جي صدارت تان هٽائي سندن خلاف توهين عدالت جي ڪارروائي به شروع ڪري ڇڏي آهي. عدالت، لاهور هاءِ ڪورٽ جي اڳوڻي جج اسد منير کي فيڊريشن جو وقتي سربراهه مقرر ڪندي هڪ مهيني اندر ٻيهر چونڊون ڪرائڻ جو حڪم به جاري ڪري ڇڏيو آهي. ياد رهي ته پاڪستان فٽبال فيڊريشن جي مخدوم فيصل صالح حيات ۽ ارشد لوڌي گروپ وچ ۾ اقتدار جي تڪرار کان پوءِ لاهور هاءِ ڪورٽ ڌرين کي چونڊون ڪرائڻ کان روڪي ڇڏيو هو، پر ان باوجود فيصل صالح حيات جي سربراهي ۾ قائم پي ايف ايف اليڪشن منعقد ڪرائي جنهن ۾ هــُو لاڳيتو چوٿون ڀيرو ايندڙ چئن سالن لاءِ صدر چونڊجي ويو هو.

 

فاسٽ بالر وهاب رياض انجريءَ سبب سريلنڪا خلاف ٽي ٽوئنٽي سيريز کان به ٻاهر ٿي ويو

لاهور (اسپورٽس نيوز) پاڪستان ڪرڪيٽ ٽيم جو فاسٽ بالر وهاب رياض انجريءَ سبب سريلنڪا خلاف ٽي ٽوئنٽي سيريز کان به ٻاهر ٿي ويو آهي، وهاب رياض سريلنڪا خلاف ٽيسٽ سيريز ۾ هٿ زخمي ڪرائي ويٺو هو، جنهن جي ڪري هو سريلنڪا خلاف ون ڊي سيريز کان به ٻاهر ٿي ويو هو، پر ٽي ٽوئنٽي سيريز جي جٿي ۾ کيس شامل جون اميدون ظاهر ڪيون پي ويون، پر هاڻي انجريءَ کان ڇوٽڪارو نه ملڻ ڪري وهاب رياض ٽي ٽوئنٽي سيريز کان به ٻاهر ٿي ويو آهي. وهاب رياض جي جاءِ تي نوجوان فاسٽ بالر ضياءُ الحق کي ٽيم ۾ شامل ڪيو ويو آهي.

 

پاڪستان ڪرڪيٽ ٽيم چيمپئنز ٽرافي ٽورنامينٽ ۾ ڪوليفاءِ ڪري ورتو

لاهور (اسپورٽس نيوز) پاڪستان ڪرڪيٽ ٽيم چيمپئنز ٽرافي ٽورنامينٽ ۾ ڪوليفاءِ ڪري ورتو آهي ان کان پوءِ پاڪستان ڪرڪيٽ بورڊ ملڪي ٽيم پاران امڪاني زمبابوين دورو رد ڪرڻ جو اعلان ڪري ڇڏيو آهي، ذريعن جو چوڻ هو ته پي سي بيءَ طرفان دورو رد ڪرڻ جي لاءِ زمبابوي ڪرڪيٽ بورڊ پڻ رضامندي ظاهر ڪئي آهي ۽ ٻنهي ملڪن ۾ اتفاق ڪيو ويو آهي ته پاڪستان ڪرڪيٽ ٽيم مناسب وقت تي زمبابوي جو دورو ڪندي. ياد رهي ته ڪرڪيٽ ٽيم کي هلندڙ سال آگسٽ ۾ زمبابوي جو دورو ڪرڻو هو. جڏهن ته ان کان پوءِ گڏيل عرب امارتن ۾ هلندڙ سال پاڪستان ڪرڪيٽ ٽيم پنهنجي هوم سيريز انگلينڊ سان کيڏندو، ڪالهه تصديق سان گڏ مڪمل شيڊيول پڻ جاري ڪيو ويو آهي. ٻنهي ٽيمن ۾ رٿيل سيريز ۾ 3-ٽيسٽ ميچون 4 ون ڊي ۽ 3 ٽي-ٽوئنٽي ميچون کيڏيون وينديون. سيريز جي شروعات ٽيسٽ ميچن سان ٿيندي، پهرين ٽيسٽ ميچ 13 آڪٽوبر تي ابوظهبي ۾ کيڏي ويندي، جڏهن ته ون ڊي ميچن جي سيريز 11 نومبر کان ۽ ٽي-ٽوئنٽي ميچن جي سيريز 26 نومبر کان کيڏي ويندي. ٻنهي ٽيمن وچ ۾ سيريز دوران چار پريڪٽس ميچون پڻ کيڏيون وينديون. واضح رهي ته پاڪستان ۾ انٽر نيشنل ڪرڪيٽ 2009 ۾ سري لنڪن ٽيم تي حملي کان پوءِ بند آهي، جنهن ڪري پاڪستان ٽيم هوم سيريز گذريل ڪيترن سالن کان گڏيل عرب امارتن ۾ کيڏڻ تي مجبور آهي

 

گهوٽڪي ۽ سکر جا ڳوٺ پاڻيءَ هيٺ، ڏوڪري ۾ وارننگ جاري

 

ٻوڏ سبب  ملڪ ۾ درجنين ماڻهو فوت ٿيڻ جي تصديق، سنڌو ۾ چاڙهه سبب ڪچي جا وڌيڪ علائقا پاڻي هيٺ اچي ويا آهن، گڊو بيراج وٽ 24 ڪلاڪن اندر وڏي ٻوڏ جو امڪان آهي، گڊو وٽ وچولي درجي جي ٻوڏ برقرار ۽ سکر بئراج وٽ ننڊي ٻوڏ برقرار سنڌو درياءِ جي پاڻي جي وهڪرن ۾ تيزي سان واڌ ايندڙ 24 ڪلاڪن ۾ گڊو وٽ اوچي درجي جي ٻوڏ ٿيڻ جو امڪان جڏهن ته 24 ڪلاڪن ۾ سکر بئراج تي وچولي درجي ٻوڏ ٿي ويندي گذريل 24 ڪلاڪن دوران گڊو بئراج وٽ  57 هزار 307 ڪيوسڪس ، سکر بئراج وٽ 19 هزار 433 ڪيوسڪس ۽ ڪوٽڙي بئراج وٽ 22 هزار 816 ڪيوسڪس پاڻي جي واڌ ٿي آهي ، جڏهن ته سنڌو ۾ چاڙه سبب ڪچي جو 70 سيڪڙو علائقو پاڻي هيٺ اچي ويو آهي الف ڪچي جي  ڳوٺڻ ۾ ڪوڙو، اقبال ڀارو، خان ۾محمد ڀارو.، عظيم ماڇي، مير محمد مهر، علي مراد ڀارو، ولي محمد مهر،ڪريم ڏنو ڌاريجو سميت ڪيترن ئي ڳوٺ ۾ پاڻي داخل ٿي ويو آهي پاڻي داخل ٿيڻ سبب ڳوٺاڻا پنهنجي مدد پاڻ تحت ٻيڙين ذريعي گهرن مان سامان ڪڍي ڪچي جي طرف منتقل ٿياگڊو بئراج وٽ مٿانهون وهڪرو 4 لک 24 هزار 298 ڪيوسڪس هيٺانهون وهڪرو 4 لک 608 ڪيوسڪس، سکر وٽ مٿانهون وهڪرو 3 لک 6 هزار 41 ڪيوسڪس هيٺانهون وهڪرو 2 لک 56 هزار 666 ڪيوسڪس ۽ ڪوٽڙي وٽ مٿانهون وهڪرو 1 لک 16 هزار 250 ڪيوسڪس ۽ هيٺانهون وهڪرو 1 لک 3 هزار 45 ڪيوسڪس ريڪارڊ  ڪيو ويو آهي.سنڌو درياءَ مسلسل ۾ چاڙهه سبب ضلعي گهوٽڪي جي ڪچي جي هزارين ايڪڙ زمين پاڻي اچي ويئي آهي جنهن سبب ڪچي جون 9 يونين ڪائونسلن جا 310 کان وڌيڪ ڳوٺ پاڻي هيٺ اچي ويا آهن، درياءَ ۾ ٻوڏ اچڻ سبب ڏيڍ لک کان مٿي ماڻهو امدادي ڪاروايون نه هجڻ سبب ڳوٺاڻا بي يارو مدد گار بڻيل آهي، ڳوٺاڻا پنهنجي مدد پاڻ تحت ٻيڙن ۽ ڪڙهان جي مدد سان محفوظ هنڌن ڏانهن لڏ پلاڻ ڪرڻ تي مجبور آهن، ڪچي جي هزارين ايڪڙن تي مشتمل فصل پڻ پاڻي هيٺ اچي ويو آهي، متاثر پنهنجا قيمتي سامان پاڻي ۾ اڇلائي پنهنجي جان بچائي پڪي واري علائقن ۾ لڏ پلاڻ ڪري رهيا آهن، 150 کان وڌيڪ ڳوٺن جو زميني رابطو پڪي وارن علائقن سان ڪٽجي ويو آهي، ضلعي انتظاميه طرفان امدادي ڪاروايون شروع نه ڪرڻ سبب سوين چوپايو مال پاڻي ۾ ٻڏي ويو آهي، ڪچي جي علائقي قادرپور بچاءُ بند، شينڪ بند، قادرپور لوپ بند حساس قرار ڏيڻ بعد امدادي ڪارواين جو جائزو وٺڻ لاءِ جي او سي پنوعاقل ڪينٽ ميجر جنرل محمد عارف وڙائچ، صوبائي صلاحڪار بحالي ۽ چيئرمين پي.ڊي.ايم.اي علي حسن هنڱورجو ڪمشنر سکر عباس بلوچ،  آبپاشي سيڪريٽر سيد ظهير حسين شاهه، ايم ڊي سيڊا بابر حسين آفندي، ڊپٽي ڪمشنر گهوٽڪي حساس قرار ڏنل علائقن جا دورو ڪري امدادي ڪارواين جو جائزو ورتو، ان موقعي تي ڊپٽي ڪمشنر گهوٽڪي محمد طاهر وٽو ٻوڏ کي منهن ڏيڻ لاءِ ضلعي انتظاميه پاران ڪيل انتظامن متعلق تفصيلي بريفنگ ڏيندي ٻڌايو ته ضلعي گهوٽڪي جون 9 يونين ڪائونسلون ڪچي جي علائقن ۾ اچن ٿيون جن ۾ 310 کان وڌيڪ ڳوٺ شامل آهن ۽ ڪچو 2 لک 10 هزار ايڪڙن تي مشتمل آهي، هن چيو ته ڪچي جي آبادي هڪ لک 25 هزار تائين آهي، هن ٻڌايو ته امڪاني ٻوڏ کي منهن ڏيڻ لاءِ 42 ٻيڙيون موجود آهن جن ذريعي ڪچي جي ماڻهن کي محفوظ هنڌن ڏانهن منتقل ڪيو پيو وڃي ان کان علاوه 29 ڊيوارٽنگ پمپ به موجود آهن جن ذريعي شهرن مان هنگامي بنيادن تي چوماسي جي برساتن جو پاڻي نيڪال ڪري سگهجي ٿو ان سان گڏوگڏ 48 لائيف جيڪٽون به آهن جيڪي ضرورت پوڻ تي ڪتب آڻي سگهجن ٿيون. هن وڌيڪ ٻڌايو ته متاثرن جي رجسٽريشن ڪرڻ لاءِ حفاظتي بندن تي رجسٽريشن ڪئمپون قائم ڪيون ويون آهن ته جيئن حقيقي متاثرن کي رجسٽر ڪري کين سهولتون فراهم ڪيون وڃن جڏهن ته 167 خاندانن کي راشن به فراهم ڪيو ويو آهي ۽ 30 خاندانن کي ڪچي مان منتقل ڪيو ويو آهي، ان کان علاوه هن وقت حفاظتي بندن تي ميڊيڪل ڪئمپون ۽ وٽنري ڪئمپون قائم ڪيون ويون آهن جڏهن ته موبائل ميڊيڪل ڪيمپ به ڪم ڪري رهي آهي، هوڏانهن جي.او.سي 16 ڊويزن پنوعاقل ڪينٽ ميجر جنرل محمد عارف وڙائچ ان موقعي تي ڪمشنر سکر ۽ ڊپٽي ڪمشنر گهوٽڪي کي سخت هدايتون جاري ڪيون ته ترت ڪچي جي علائقن ۾ ڦاٿل ماڻهن کي ريسڪيو ڪري خيما وسندي  ۾ آندو وڃي ۽ کين کاڌي پيتي سميت هر سهولتون فراهم ڪرڻ جون هدايتون ڏنيون، ان موقعي تي هن چيو ته امڪاني ٻوڏ کي منهن ڏيڻ لاءِ پاڪ فوج پرعزم آهي ضلعي انتطاميه کي جڏهن به ضرورت پوندي ته کين پاڪ فوج جا جوان فراهم ڪيا ويندا.سنڌ ۾ امڪاني ٻوڏ بعد ڏوڪري جي ڪچي وارن علائقن ۾ ٻوڏ جو خطرو وڌي ويو آهي جڏهن ته موهن جو دڙو ڀرسان سنڌو درياهه جي پاڻي ۾ چاڙهه اچي ويو آهي ان ڏس ۾ ڪچي جي ماڻهن کي پڪي وارن علائقن ڏانهن منتقل ٿيڻ لاءِ انتظاميا پاران وارننگ ڏني وئي آهي جنهن کان پوءِ ڪچي جي ماڻهن پڪي جي علائقن ڏانهن اچڻ به شروع ڪري ڏنوآهي مليل ڄاڻ موجب ڏوڪري جي ڪچي وارن ڳوٺن ابراهيم ممڻاني، ڪلهوڙا ڳوٺ،چڪرو، حسن واهڻ ۽ ٻين ڳوٺن ڏانهن پاڻي وڌڻ لڳو آهي جڏهن ته موهن جو دڙو ڀرسان درياهه کي تمام گهڻو چاڙهه آهي ۽ درياهه جو پاڻي بچاءُ بندن جي ويجهو پهچي چڪو آهي جنهن ڪري علائقي واسين ۾ خوف ۽ حراس پکڙيل آهي انتظاميا پاران ڪچي جي ماڻهن کي پڪي تي اچڻ لاءِ پڙها ته ڏياريا آهن ۽ وراننگ به ڏني آهي پر ڪچي جي ماڻهن کي رليف ڏيڻ لاءِ ٽينٽ سٽي ۽ ٻيا انتظام نه ڪيا ويا آهن ان ڏس ۾ اسسٽنٽ ڪمشنر ڏوڪري سيد يار علي شاهه ميڊيا سان ڳالهائيندي چيو ته ٻوڏ جي خطري سبب الرٽ آهيون ۽ ملازمن جون به بندن ۽ ٻين هنڌن تي ڊيوٽيون لڳايون ويون آهن، هوڏانهن اين ڊي ايم اي چيو آهي ته تازين برساتن ۽ ٻوڏ سبب درجنين ماڻهو فوت ۽ ساڍا 3 لک ماڻهو متاثر ٿيا آهن، چترال ۾ 3، پنجاب ۾ 3 ۽ بلوچستان ۾ 7 ڄڻا فوت ٿيا ٻوڏ جي اڳ ڪٿي ڪندڙ ادارا سنڌ ۽ بلوچستان ۾ 5 ڏينهن تائين تيز برساتن جو امڪان ڏيکاريو آهي. سنڌو درياءِ ۾ ڪالا باغ ۽ چشمه وٽ وچولي درجي جڏهن ته تربيلا، گڊو ۽ سکر وٽ هيٺاهين درجي جي ٻوڏ آهي.  فيڊرل فلڊ ڪميشن مطابق ڪابل درياءَ ۾ نوشهر وٽ وچولي درجي جڏهن ته ڪابل وٽ هيٺاهين درجي جي ٻوڏ آهي، اهڙي طرح سوات درياءِ ۾ چارسده وٽ هيٺاهين درجي جي ٻوڏ آهي جڏهن ته جهلم، چناب، غازي ۽ ستلج معمول مطابق وهي رهيا آهن. تربيلا ۽ منگلا ۾ پاڻي جي اوچائي ترتيب وار 1527 فوٽ ۽ 1234 فوٽ رڪارڊ ڪئي وئي آهي .  سنڌ ۾ برساتن جو سلسلو جاري آهي، ڪراچي، لاڙ ۽ ٿر سميت ٻين علائقن ۾ ڪالهه ٽئين ڏينهن به ڪڻ ڪڻ کانپوءِ تيز هوائن سان ڪيترن ئي ڪلاڪن تائين مينهن وسندو رهيو، نتيجي ۾ هيٺاهين وارا علائقا پاڻي هيٺ اچي ويا،

 

 

ساڳيا لاٽون ساڳيا چُگهه!؛ارشد شاهه

پاڪستان ۾ خاص طور تي سنڌ ۾ سياسي طور تي وڏي اٿل پٿل وارو ماحول نظر اچي رهيو آهي، ڪرپشن خلاف نيب، اينٽي ڪرپشن ۽ ايف آءِ اي جي ڪاررواين- متحده قومي موومينٽ خلاف ڪاررواين، ڪرپٽ بيورو ڪريسي کي جاچ جي دائري ۾ آڻڻ ۽ ڪرپشن جي الزام هيٺ آيل وزيرن کي گهر ڀيڙو ڪرڻ لاءِ پ پ سرڪار تي دٻاءُ وارن معاملن پ پ لاءِ ڪيترائي مونجهارا پيدا ڪري ڇڏيا آهن. بيورو ڪريسي کي جاچ جي دائري هيٺ آڻڻ واري مامري تان پ پ سرڪار ۽ جاچ ادارن ۾ اڻ اعلانيل طور تي سرد جنگ شروع ٿي وئي آهي. پ پ قيادت سخت اسٽينڊ وٺڻ بعد يوٽرن واري پراڻي پاليسي جو ورجاءُ ڪندي سنڌ ۾ ڪيترن ئي ڪامورن کي عهدن تان هٽائي ڇڏيو، ان ۾ اڪثر ڪامورا اهي هئا جيڪي پ پ قيادت جا منظور نظر هئا ۽ ملڪ مان فرار ٿي چڪا هئا، ٻئي مرحلي ۾ سنڌ ڪابينا ۾ وڏي ردوبدل جون ڳالهيون ڪيون پئي ويون، ان لاءِ سمنڊ پار دبئي ۾ پ پ قيادت جا ڪجهه اجلاس ٿيا، جنهن مان نتيجو ٺيڪ ان اردو چوڻي وانگي نڪتو ته ”کودا پهاڙ اور نڪلا چوها“ ڪجهه ڏينهن کان اهي ڳالهيون ٻڌڻ ۾ اچي رهيون هيون ته اطلاعات ۽ بلديات کاتن جي صوبائي وزير شرجيل انعام ميمڻ کي ڪابينا مان فارغ ڪيو ويندو. ذريعن موجب پ پ قيادت اهڙو فيصلو به ڪري ورتو هو، ان سان گڏ سهيل انور سيال کي هٽائي نادر مگسي کي گهرو وزارت ڏيڻ جو فيصلو ڪيو ويو هو، پر دبئي واري اجلاس ۾ پ پ جي هڪ بااثر عورت ايم اين اي جي مداخلت تي اهي فيصلا واپس ورتا ويا ۽ شرجيل ميمڻ کي فارغ ته نه ڪيو ويو پر ورڪس اينڊ سروسز جهڙي تڳڙي وزارت سان نوازيو ويو، ان وزارت جا بلڊنگس ۽ روڊس شعبا ئي بلديات ۽ اطلاعات وزارتن کان سڻڀا آهن، ان بااثر عورت ايم اين اي جي مداخلت تي ئي نادر مگسي کي ڪابينا ۾ شامل نه ڪيو ويو. ڊاڪٽر سڪندر مينڌري کي پارلياماني معاملن، ماحوليات ۽ ڪوسٽل ڊولپمينٽ اٿارٽي کانپوءِ ڪو آپريشن کاتو به ڏنو ويو آهي. مڪيش چاولا به پبلڪ هيلٿ ۽ ڳوٺاڻي ترقي کانپوءِ انفارميشن ٽيڪنالاجي جو کاتو ماڻڻ ۾ ڪامياب ٿي ويو آهي.

سنڌ حڪومت جي رولز آف بزنس جي لتاڙ ڪندي آرڪائيوز کاتو اطلاعات کاتي کان ڌار ڪري شرجيل ميمڻ حوالي ڪيو ويو آهي. سکر مان چونڊيل پ پ ايم پي اي سيد ناصر شاهه جي به لاٽري کلي وئي ۽ کيس صوبائي وزير بڻائي بلديات کاتي جو قلمدان ڏيڻ جو اعلان ڪيو ويو آهي. بااثر سيڪريٽري تعليم فضل الله پيچوهو سان انتظامي معاملن تي اختلاف رکندڙ سينئر پ پ اڳواڻ ۽ وزير تعليم نثار کهڙي کان تعليم کاتو واپس وٺي کيس اطلاعات ۽ آبپاشي کاتا ڏنا ويا آهن، اهو فيصلو بهتري جي نيت سان ڀلي ئي نه ڪيو ويو هجي، پر سنڌ حڪومت جي ترجمان جي حيثيت ۾ نثار کهڙو پارٽي پاليسي ۽ حڪومتي فيصلن کي بهتر انداز ۾ پيش ڪرڻ جي اهليت رکي ٿو، پر جي کيس ڪم ڪرڻ لاءِ آزاد ڇڏيو ويو ته هو ڪارڪردگي ڏيکاري سگهي ٿو. مير هزار خان بجاراڻي کي وزير تعليم مقرر ڪيو ويو آهي، هي موصوف پ پ جو سينئر اڳواڻ آهي، ان مان به بهتري جي اميد ڪري سگهجي ٿي.

سنڌ ۾ گورننس جي معاملن تان وزيراعظم ۽ سگهارن ادارن پ پ قيادت ۽ سنڌ سرڪار آڏو اعتراض واريا هئا، ان ملاقاتن ۾ ڪجهه ڪامورن ۽ وزيرن جا نالا وٺي کين پاسيرو ڪري گورننس بهتر ڪرڻ جي هدايت ڪئي وئي هئي، پر پ پ قيادت جي ڄاڻايل فيصلن مان ڪٿي به اهو نظر نٿو اچي ته سنڌ ۾ گورننس بهتر ڪرڻ لاءِ اهي فيصلا ڪا خاص تبديلي آڻي سگهندا. اعتراض هيٺ آيل ڪنهن به وزير کي هٽائڻ جو فيصلو نه ڪيو ويو، پر ذريعن موجب دبئي ۾ ٿيل اجلاس ۾ بهبود آبادي واري کاتي جي وزير سيد علي مردان شاهه، ثقافت کاتي بابت وڏي وزير جي خاص معاون شرميلا فاروقي ۽ فشريز ۽ لائيو اسٽاڪ کاتن جي وزير ڄام خان شوري کي ڪابينا مان فارغ ڪرڻ تي غور ڪيو ويو، پر ان معاملي کي في الحال التوا ۾ رکيو ويو. جڏهن ته ڪجهه نوان وزير ڪابينا ۾ کڻڻ واري معاملي تي به غور ويچار ڪيو ويو. پر اهو معاملو به غور فڪر تائين محدود ئي رهيو. رڪارڊ ڪرپشن ڪرڻ جي الزام هيٺ آيل سنڌ سرڪار ساڳين چهرن جا کاتا تبديل ڪري پنهنجي سياسي ساک بچائڻ ۾ ڪيتري حد تائين ڪامياب ٿئي ٿي؟ اهو ته ايندڙ وقت ٻڌائيندو پر تجزيه نگارن موجب پ پ قيادت ڪجهه آفيسر هٽائي ۽ ڪجهه وزيرن جا کاتا تبديل ڪري آءِ واش ذريعي سياسي ساک بچائڻ جي جيڪا ڪوشش ڪئي آهي، اها ڪامياب نه ٿيندي. پ پ قيادت هڪ ٻيو به فيصلو ڪيو آهي، جنهن تحت سنڌ ۾ وڏي وزير جي سربراهي ۾ انٽرنل انڪوائري ڪميٽي ٺاهي آهي ۽ وڏي وزير کي اختيار ڏنا ويا آهن ته هو وزيرن ۽ آفيسرن خلاف جاچ ڪري ثابتي ملڻ تي انهن کي هٽائي سگهي ٿو. ان فيصلي تي حيرت جو اظهار ئي ڪري سگهجي ٿو. سائين سڳوري کي ايس ايس پي ۽ ڊي سي هٽائڻ جو به اختيار نه آهي ۽ اها ڳالهه عالم آشڪار آهي ته فيصلا ڪير ڪري ٿو؟ اڳوڻي صدر آصف زرداري جو هڪ بيان اخبارن ۾ ڇپيو آهي ته قبضن، ڪرپشن ۽ ٻين ڏوهي سرگرمين ۾ ملوث وزير ۽ آفيسر پاڻمرادو استعيفيٰ ڏئي ڇڏين. چوڻ جي حد تائين اڳوڻي صدر جو بيان ٺيڪ آهي، باقي ائين ٿيڻ ٻٻرن کان ٻير گهرڻ جي برابر آهي.

پ پ قيادت جي ان اجلاسن ۽ انهن ۾ ٿيندڙ فيصلن ۾ چيئرمين بلاول ڀٽو زرداري جي پوزيشن بلڪل علامتي آهي، ان کي صرف فوٽو سيشن لاءِ اجلاس ۾ ويهاريو وڃي ٿو. فيصلا وري به اڳوڻو صدر ۽ سندس ڀيڻ فريال ٽالپر جي منشا تي ٿي رهيا آهن، جن تي پ پ جي لڏي ۾ ئي سخت تحفظات ظاهر ڪيا پيا وڃن.

پ پ قيادت وٽ سنڌ ۾ گورننس جي بهتري ۽ پارٽيءَ مان احساس محرومي کي ختم ڪرڻ لاءِ سنهري موقعو هو، جيڪو قيادت وڃائي چڪي آهي. پ پ جي اندروني حلقن موجب بلاول ڀٽو زرداري وڏي پئماني تي تبديلي جي خواهش رکي ٿو، پر کيس انتظار ڪرڻ جو لالي پاپ ڏئي اڃا به معاملا ساڳئي نموني هلائڻ جو سلسلو جاري رکيو ويو آهي. پ پ قيادت کي اهي فيصلا ڪرڻ بعد ڀلي اطمينان حاصل ٿيو هجي پر ٻيون سموريون ڌريون ان کي سياسي ڊرامو قرار ڏئي رهيون آهن.

ڪجهه تجزيه نگارن جو اهو به چوڻ آهي ته پهرئين اجلاس ۾ ٿيل فيصلن کي ٻيو اجلاس منعقد ڪري تبديل ڪيو ويو ۽ پوءِ نوٽيفڪيشن جاري ڪيو ويو ۽ ان ٻئي اجلاس ۾ بلاول ڀٽو شرڪت نه ڪئي هئي.

وفاقي حڪومت ۽ سگهارا ادارا پ پ قيادت جي ان فيصلن مان مطمئن ٿين ٿا يا پنهنجي خدشن کي ختم ڪرڻ لاءِ هو پاڻ ميدان ۾ اچي معاملا هٿ ۾ کڻن ٿا، اها صورتحال جلد واضح ٿي ويندي، پر اهو واضح ٿي ويو آهي ته پ پ قيادت کاتا تبديل ڪرڻ تائين تبديلي آڻي سگهي ٿي، باقي چهرا تبديل ڪرڻ لاءِ هرگز تيار نه آهي.