تازيون خبرون

Daily Archives: July 18, 2015

ڀارتي ڪارروائي شرمناڪ آهي، حڪمران ذميواريون پوريون ڪن: چوڌري شجاعت

لاهور(م.ڊ) مسلم ليگ ق جي صدر چوڌري شجاعت چيو آهي ته ڀارتي جارحيت شرمناڪ آهي، حڪمران مودي جو منهن ڏسڻ بدران پنهنجون ذميواريون پوريون ڪن.لاهور مان جاري هڪ بيان ۾چوڌري شجاعت ورڪنگ بائونڊري ۽ ڪنٽرول لائين تي ڀارتي جارحيت جي مذمت ڪندي چيو ته ڀارتي کليل جارحيت ڪري اسان جي شهرين کي شهيد ڪري رهيو آهي، حڪمران ڀارت جي باري ۾ قومي مفاد کي ذاتي مفاد تي قربان ڪرڻ جو سلسلو بند ڪري. چوڌري شجاعت ڀارتي جاسوس جهاز ڪيرائڻ تي پاڪ فوج کي ساراهيو. هن مسلم ليگ ق سيالڪوٽ جي عهديدارن کي هدايت ڪئي ته هو عيد شهيدن جي خاندان وارن سان ملهائين ۽ انهن جي ڏک ۾ شريڪ ٿين.

 

اداڪارا ڪرينا ڪپور خان فلم ۾ هڪ بيمار ڇوڪريءَ جو ڪردار ادا ڪرڻ کان انڪار ڪري ڇڏيو

ممبئي (شوبز نيوز) بالي ووڊ جي سهڻي اداڪارا ڪرينا ڪپور خان فلم ۾ هڪ بيمار ڇوڪريءَ جو ڪردار ادا ڪرڻ کان انڪار ڪيو آهي. ڪافي وقت کان ڪرينا جي ڪا فلم هِٽ نه پئي ٿئي، جنهن جي ڪري به ڪرينا ڪپور بالي ووڊ ۾ ڦوڪي ڦوڪي قدم رکي رهي آهي. بالي ووڊ هدايتڪار راج ڪمار گپتا نئين فلم جي هيروئن کي لاءِ سائڻ ڪرڻ جي خواهش کڻي ڪرينا ڪپور وٽ پهچي ويو، جتي فلم جو اسڪرپٽ پڙهي ڪرينا ڪپور فلم ۾ ذهني مريضه ڇوڪريءَ جو ڪردار ادا ڪرڻ کان انڪار ڪيو، جنهن تي راج ڪمار گپتا جو چوڻ هو ته ڪرينا پهريان ته فلم ۾ ڪم جي حامي ڀري هئي، پر جڏهن هن اسڪرپٽ پڙهيو ته هن انڪار ڪري ڇڏيو آهي. ٻئي طرف ڪرينا ڪپور خان جو چوڻ هو ته پاڻ کي هڪ ذهني مريضا جي روپ ۾ اچڻ لاءِ تيار نه ٿي سمجھان، جنهن جي ڪري انڪار ڪيو آهي. راج ڪمار ڪرينا جي انڪار کان پوءِ ڪنهن ٻي اداڪارا جي تاڙ ۾ آه

 

سمارٽ فون فلمي تارن کي به پنهنجي وڪڙ ۾ آڻي ڇڏيو

ممبئي (شوبز نيوز) سمارٽ فون نه رڳو سڄي دنيا ۾ ٿرٿلو مچائي ڇڏيو آهي، پر دنيا جي مشهور شخصيتن کي به پنهنجو ديوانو بڻائي ڇڏيو آهي. سمارٽ فون جي مختلف ۽ مزاحيه ايپليڪيشنن ٻارن توڙي ٻڍن ۽ فلمي تارن کي به پنهنجي وڪڙ ۾ آڻي ڇڏيو آهي، جتان هو چاهيندي به نه ٿا نڪري سگھن. تازو ئي نئين آيل ايپليڪيشن ”ڊب سميش“ سڄي دنيا ۾ نالو ڪمايو آهي، هر عمر جي ماڻهن سميت بالي ووڊ جا مشهور ۽ مصروف فلمي تارا به ان جي لاءِ وقت سيڙائي رهيا آهن. هِن وڊيو ۾ ڪو به ڪنهن جي ڊائلاگ تي پنهنجي وڊيو ٺاهي سگھي ٿو. مٿي ڄاڻايل اداڪارن کان سواءِ بالي ووڊ جا ڪيترائي سينيئر اداڪار پڻ ان بخار جي ور چڙهيل آهن. بالي ووڊ ۾ سڀ کان پهريان ”ڊب سميش“ جو شَرو سوناڪشي سنها وڌو، جنهن کان پوءِ عاليه ڀٽ، رنوير سنگھه، سلمان خان، شروتي هاسن ۽ ٻين ڪيترن ئي فنڪارن ان ۾ وڌي چڙهي حصو وٺڻ لڳا، هاڻي ان مزيدار ۽ تفريحي ڪم ۾ بالي ووڊ جا ٻيا به تارا جن ۾ بالي ووڊ جو سينيئر اداڪار شڪتي ڪپور، انيل ڪپور، نواز الدين صديقي، فرحان اختر، شاهه رخ خان، زرين خان ۽ ٻيا ان بخار جي ور چڙهي ويا آهن

 

بالي ووڊ اداڪار نواز الدين صديقي جي فلم ”منجھي دي مائونٽين مين“ جو ٽريلر جاري

ممبئي (شوبز نيوز) بالي ووڊ اداڪار نواز الدين صديقي جي فلم ”منجھي دي مائونٽين مين“ جو ٽريلر جاري ڪيو ويو آهي، جنهن کي شوقين ڀرپور موٽ ڏئي رهيا آهن. فلم منجھي بهار جي ڳوٺ گهلور جي هڪ مزدور دسرٿ منجھي جي زندگيءَ تي ٺاهي وئي آهي. ان فلم ۾ ڏيکاريو ويو آهي ته منجھيءَ جي گھر واري هڪ ڊاڪٽر جي بروقت ڳوٺ نه پهچڻ جي ڪري مري ويندي آهي، جنهن کان پوءِ منجهي هٿوڙي سان هڪ جبل ڪٽي ڇڏيو، جيئن ڳوٺ ۾ رهندڙن کي اسپتال وڃڻ ۾ ڏکيائيون پيش نه اچن. منجھيءَ کي اهو ڪم مڪمل ڪرڻ ۾ 22 سال لڳي ويا. ان فلم جي ٽريلر ۾ نواز الدين صديقي جي اداڪاري کي تمام گھڻو پسند ڪيو پيو وڃي. ڪيتن مهتا جي هدايتن ۾ ٺهندڙ هيءَ فلم 21 آگسٽ تي سئنيما گھرن ۾ نمائش جي لاءِ پيش ڪئي ويندي

 

ان ڳالهه جو افسوس آهي ته مان فلمن ۾ ته سپر اسٽار بڻجي ويس پر سٺو پٽ بڻجي نه سگھيس: سلمان خان

ممبئي (شوبز نيوز) بالي ووڊ اداڪار سلمان خان کي ان ڳالهه جو افسوس آهي ته هو فلمن ۾ ته سپر اسٽار بڻجي ويو آهي پر سٺو پٽ بڻجي نه سگھيو. پنهنجي هوم پروڊڪشن جي پهرين فلم ”بجرنگي ڀائي جان“ جي پرموشن جي موقعي تي ڏنل انٽرويوءَ دوران سلمان چيو ته مان هڪ سٺو پٽ بڻجڻ جي پوري ڪوششن ۾ رڌل آهيان، پر مون کي لڳي ته منهنجي ڪري منهنجي خاندان وارن کي تمام گھڻي تڪليف ڳڻتي آهي. ان جو سبب منهنجا ڪيس آهن، جن جي ڪري منهنجا والدين به وقت کان اڳ پوڙها ٿي ويا. هن چيو ته منهنجي والدين کي ڏسي اهو سمجھه ۾ اچي ٿو ته هو مون لاءِ فڪرمند آهن. منهنجو سمورو خاندان گڏجي ان سان وڙهي رهيو آهي، زندگيءَ ۾ جيڪي ڪجھه ٿيو مستقبل ۾ اسان ان کي قبولڻ لاءِ تيار آهيون. حد کان وڌيڪ پروموشن راس ناهن ايندا. فلم سڀاڻي رليز ٿيندي.”بجرنگي ڀائيجان” جي هدايتڪار ۽ ان جي ڪاسٽ سان فلم جي پروموشن جي سلسلي ۾ دهلي پهتل هئا. هن ڳائڻي ميڪا سنگهه سان گڏ ”آج ڪي پارٽي ميري طرف سي“ گيت ڳايو. ان موقعي تي ڪرينا ڪپور ۽ نواز الدين صديقي پڻ موجود هئا

 

سري لنڪا پاڪستان کي ٻي ون ڊي ۾ شڪست ڏئي ڇڏي

پالي ڪيلي(اسپورٽس نيوز) سري لنڪا پاڪستان کي ٻي ون ڊي ۾ شڪست ڏئي ڇڏي آهي، جنهن کان پوءِ پاڪستان جي چيمپئنز ليگ  کيڏڻ جا امڪان گھٽجي ويا آهن. سري لنڪا جي پالي ڪيلي ڪرڪيٽ گرائونڊ تي کيڏين ٻي ون ڊي ميچ ۾ سري لنڪا پاڪستان کي ٻن وڪيٽن تان شڪست ڏئي ڇڏي. پاڪستان پهريان بيٽنگ ڪندي مقرر ڪيل پنجاهه اوورن ۾ 8 وڪيٽن جي نقصان تي 287 رنسون ٺاهيون. پاڪستان پاران ڪپتان اظهر علي 79 رنسون ٺاهي نمايان رهيو، جڏهن ته محمد رضوان 52 ۽ شعيب ملڪ 51   رنسون ٺاهيون. احمد شهزاد 43 بالن تي 30 رنسون ٺاهي سگهيومحمد حفيظ 15 بالن تي 9 رنسون ٺاهي سگهيو. انور 29 رنسن جي اننگ کيڏي. جواب ۾ سري لنڪا جي ٽيم 49 هين اوور ۾ 8 وڪيٽن جي نقصان تي 288 رنسون ٺاهي ميچ کٽي ورتو. سري لنڪا پاران پريرا 68 رنسون ٺاهيون، جڏهن ته چندي مل 48 رنسون ٺاهي ناٽ آئوٽ رهيو. ٻين رانديگرن ۾ دلشن 47، پٿيرانا 33، سري واردانا26 ۽ ٿرنگا 28 رنسون ٺاهيون. پاڪستان کي سري لنڪا هٿان شڪست ملڻ کانپوءِ عالمي رينڪنگ ۾ قومي ٽيم نائين نمبر تي پهچي وئي آهي، جڏهن ته چيمپئنز ليگ عالمي رينڪنگ ۾ 8 نمبر تائين جون ٽيمون کيڏي سگهنديون. پاڪستان کي شڪست سبب ويسٽ انڊيز جي ٽيم نائين کان اٺين نمبر تي اچي وئي آهي، ان ڪري امڪان ظاهر ڪيا پيا وڃن ته پاڪستان ڪرڪيٽ ٽيم چيمپئنز ليگ مان ٻاهر ٿي سگھي ٿي ۽ اٺين نمبر جي ٽيم ويسٽ انڊيز ان جي جاءِ تي چيمپئنز ليگ لاءِ ڪواليفاءِ ڪري وٺندي

 

تماشائين جي گھٽ سرگرميءَ جي ڪري ليگ جي گورننگ ڪائونسل ليگ کي ختم ڪرڻ جو فيصلو

ممبئي (اسپورٽس نيوز) چيمپئنز ٽي ٽوئنٽي ليگ جي ڇهن سيزنن ۾ تماشائين جي گھٽ سرگرميءَ جي ڪري ليگ جي گورننگ ڪائونسل ليگ کي ختم ڪرڻ جو فيصلو ڪيو آهي. ڪرڪ انفو موجب ليگ جي گورننگ ڪائونسل ۾ ڀارتي ڪرڪيٽ بورڊ، آسٽريلوي ڪرڪيٽ بورڊ ۽ ڏکڻ آفريڪا جا ڪرڪيٽ بورڊ شامل آهن. ڀارتي ڪرڪيٽ بورڊ طرفان جاري بيان ۾ چيو ويو آهي ته تماشائن جي گھٽ گرمجوشي کي نظر ۾ رکندي ٽورنامينت کي ختم ڪرڻ ئي بهتر فيصلو هو. چيمپئنز ٽي ٽوئنٽي ليگ جو ستون سيزن هِن سال سيپٽمبر ۽ آڪٽوبر ۾ کيڏيو وڃي ها. ڀارتي ڪرڪيٽ بورڊ جي سيڪريٽري انوراڳ ٺاڪر چيو ته هي هڪ ڏکيو فيصلو هو. چيمپئنز ٽرافي ٽي ٽوئنٽي ليگ ڊوميسٽڪ ٽي ٽوئنٽي جيئن ڀارت جي آءِ پي ايل، آسٽريليا جي بگ بيش ۽ ڏکڻ آفريڪا جي ريم سليم کي هڪ نئون رخ ڏنو. بيان ۾ وڌيڪ چيو ويو ته سڄي دنيا جي رانديگرن لاءِ پنهنجو نئون ٽيلينٽ ڏيکارڻ لاءِ هڪ بهترين پليٽ فارم هو. پر ان ۾ تماشائين جي اها دلچسپي ڏسڻ ۾ نه آئي جنهن جي اميد هئي. هي فيصلو اسان پنهنجي ڪمرشل پارٽنرن سان گڏجي ڪيو آهي

 

سعيد اجمل جي هڪ ٻي بهترين پرفارمنس سندس ٽيم وورسٽر شائر کي فتح ڏياري

ليڊز (اسپورٽس نيوز) انگلش ٽي ٽوئنٽي ٽورنامينٽ ۾ پاڪستاني آف اسپنر سعيد اجمل جي هڪ ٻي بهترين پرفارمنس سندس ٽيم وورسٽر شائر کي فتح ڏياري. هيڊنگلي ليڊز تي کيڏيل ميچ ۾ وورسٽر شائر پهريان کيڏندي روس ويٽلي جي 35 بالن تي 2 چوڪن ۽ 11 ڇڪن جي مدد سان ٺاهيل شاندار 91 رنسن جي ڪري مقرر 20 اوورن ۾ 6 وڪيٽن تي 191 رنسون ٺاهيون. يارڪشائر جي ٽيم 192 رنسن جي پويان شروع ۾ ئي دٻاءَ جو شڪار رهي ۽ سموري ٽيم 17 اوورن ۾ 117 رنسن تي ڍير ٿي وئي. وورسٽر شائر جي اوليور 3 جڏهن ته سعيد اجمل 4 اوورن ۾ 21 رنسون ڏئي 2 رانديگرن جو شڪار ڪيو. 37 سالن جي پاڪستاني آف اسپنر هيل تائين 10 ٽي ٽوئنٽي ميچن ۾ 21-15 جي سراسريءَ سان 19 شڪار ڪري هلندڙ سيزن ۾ وڌيڪ آئوٽ ڪندڙ بالرن ۾ چوٿين نمبر تي پهتو آهي

 

بنگلاديش ڏکڻ آفريڪا کي ٽي ون ڊي انٽرنيشنل ميچ ۾ 9 وڪيٽن تان هارائي 2-1 سان سيريز پنهنجي نالي ڪري ورتي

چٽاگانگ (اسپورٽس نيوز) بنگلاديش ڏکڻ آفريڪا کي ٽي ون ڊي انٽرنيشنل ميچ ۾ 9 وڪيٽن تان هارائي 2-1 سان سيريز پنهنجي نالي ڪري ورتي. ظهور احمد چوڌري اسٽيڊيم چٽاگانگ ۾ کيڏيل ميچ ۾ ڏکڻ آفريڪا ٽاس کٽي پهريان بيٽنگ جو فيصلو ڪيو جيڪو سٺو ثابت نه ٿيو ۽ ڏکڻ آفريڪا جي سموري ٽيم 40 اوورن ۾ 168 رنسن تي ڍير ٿي وئي. ڏکڻ آفريڪا طرفان سڀ کان وڌيڪ 51 رنسون جي پي ڊومني ٺاهيون. جڏهن ته ڊيوڊ ملر 44 سان نمايان رهيو، ٻي سموري ٽيم ديشي بالرن اڳيان پاڻ جھلي نه سگھي ۽ اوپنر ڊي ڪوڪ 7، آملا 15، ڊو پليسي 6، روسو 17، بهاردين 12، راباڊا1، ايبٽ 5 ۽ مورڪل 1 رنسون ٺاهي آئوٽ ٿيا. بنگلاديش طرفان سڀ کان ڪامياب بالر شڪيب الحسن رهيو جنهن 8 اوورن 33 رنسون ڏئي 3 ڏکڻ آفريڪي بيٽسمينن کي آئوٽ ڪيو، جن ۾ آملا پڻ شامل هو، جڏهن ته مستفيض الرحمان ۽ روبيل حسين 2،2 وڪيٽون ورتيون، جڏهن ته محمود الله ۽ مرتضيٰ هڪ هڪ وڪيٽ ورتي. بنگلاديش طرفان سوميا سرڪار 75 بالن تي 90 رنسن جي شاندار اننگ کيڏي ۽ هو بنگلاديش طرفان اڪيلو آئوٽ ٿيندڙ رانديگر به هو جنهن کي عمران طاهر کاپايو. جڏهن ته اوپر تميم اقبال ناقابل شڪست 61 رنسون ۽ ليٽن داس 5 رنسن سان ناٽ آئوٽ رهيا. بنگلاديش جي سوميا سرڪار کي مين آف ميچ ۽ مين آف دي سيريز جو ايوارد ڏنو ويو

 

ڀارتي فوج جون سرگرميون جنگبندي واري معاهدي جي ڀڃڪڙي آهن

 

ڀارتي فورسز ڪنٽرول لائن ۽ ورڪنگ بائونڊري تي بنا جواز فائرنگ ۽ گولاباري ڪري عورت سميت 4 پاڪستاني شهرين کي شهيد  ۽ 8 ڄڻن کي زخمي ڪري وڌو. جڏهن ته پنجاب رينجرز ڀارتي اڳرائي جو ڀرپور جواب ڏنو. آءِ ايس پي آر موجب ڀارتي سڪيورٽي فورسز، سيالڪوٽ جي چپڙار سيڪٽر ۾ صلاح پور، جميان ۽ پتوال ڳوٺن ۾ بنا جواز فائرنگ ۽ گولاباري ڪئي. ڀارتي فورسز جي حملي ۾ 3 پاڪستاني شهري غلام مصطفيٰ، راحت ۽ بوٽا شهيد جڏهن ته پنج ڄڻا زخمي ٿي پيا. ڀارتي گولاباري سبب ڪيترن ئي گهرن کي نقصان پڻ پهتو جڏهن ته ڪيترائي ڍور به مري ويا. ڀارتي فورسز طرفان لائين آف ڪنٽرول تي راولاڪوٽ جي نيزا پير سيڪٽر ۾ نند پور ۽ ٻين ڳوٺن ۾ به بنا جواز فائرنگ ڪئي جنهن جي نتيجي ۾ هڪ عورت شهيد ٿي وئي. ورڪنگ بائونڊري ۽ ڪنٽرول لائن تي ڀارتي فورسز جي فائرنگ ۽ گولاباري تي پنجاب رينجرز پاران ڀرپور جواب ڏنو پيو وڃي. ياد رهي ته گذريل ڏينهن به جنگي جنون ۾ ورتل ڀارتي سڪيورٽي فورسز سيالڪوٽ ۾ ورڪنگ بائونڊري جي ڦوڪ ليان سيڪٽر تي فائرنگ ۽ گولاباري ڪئي جنهن جي نتيجي ۾ پنجاب رينجرز پاران به ڀرپور جوابي ڪارروائي ڪئي وئي.هوڏانهن پاڪستان، ڀارتي جاسوس جهاز جي سرحدي حدن ۾ گھڙي اچڻ تي ڀارت آڏو سخت احتجاج ڪيو آهي، پرڏيهي سيڪريٽري اعزاز چوڌري جو چوڻ آهي ته سرحد تي ڀارتي فوج جون سرگرميون جنگبندي واري معاهدي جي ڀڃڪڙي آهن. پاڪستان ۾ مقرر ڀارتي هاءِ ڪمشنر ٽي سي اَي رگهوان کي پرڏيهي آفيس طلب ڪيو ويو. ان موقعي تي پرڏيهي سيڪريٽري اعزاز چوڌري ڀارتي جاسوس جهاز جي پاڪستاني سرحدي حدن جي ڀڃڪڙي ڪرڻ تي سخت احتجاج رڪارڊ ڪرايو. اعزاز چوڌري چيو ته جاسوس جهاز پاڪستان جي هوائي حدن جي ڀڃڪڙي ڪندي تصويرون حاصل ڪري رهيو هو. هن چيو ته اهڙي قسم جا واقعا روس ۾ پاڪ ڀارت وزيراعظمن جي ملاقات بعد پيدا ٿيل خوشگوار ماحول کي متاثر ڪري سگهن ٿا. پرڏيهي سيڪريٽري چيو ته ڀارتي سرگرميون جنگ بندي واري معاهدي جي ڀڃڪڙي آهن، نئين دهلي هوائي حدن واري معاهدي تي عمل ڪري. پرڏيهي سيڪريٽري چيو ته پاڪستان خطي ۾ امن ۽ پاڙيسري ملڪن سان بهتر لاڳاپا چاهي ٿو. ياد رهي ته گڏيل ڏينهن ڪنٽرول لائن تي ڀمبر سيڪٽر وٽ پاڪستاني حدن ۾ ڀارتي جاسوس جهاز داخل ٿيو جنهن کي ڪيرايو ويو. ٻئي طرف پاڪستان ڪشمير تي غير قانوني قبضي واري ڀارتي الزام کي رد ڪندي چيو آهي ته ڪشمير تڪراري علائقو آهي، ڪنهن به قسم جا هڪ طرفا فيصلا ان جي اها حيثيت ختم نٿا ڪري سگھن ۽ ڪشمير مسئلي جو واحد حل گڏيل قومن جي ٺاهه تي مڪمل عمل ڪرڻ ۾ آهي، پرڏيهي وزارت جي هفيتوار نيوز بريفنگ ۾ پرڏيهي کاتي جي ترجمان خليل الله قاضي جو چوڻ هو ته روس جي شهر اوفا ۾ پاڪ-ڀارت وزير اعظمن ملاقات دوران سمورن مسئلن کي حل ڪرڻ تي اتفاق ڪيو. پاڪستان ڀارت سان سمورن مسئلن تي ڳالهائڻ لاءِ تيار آهي. سندس چوڻ هو ته ڪشمير مسئلي جو واحد حل گڏيل قومن جي ٺاهه تي عمل سان آهي. ترجمان جو وڌيڪ چوڻ هو ته ڀارتي هاءِ ڪمشنر کي گهرائي ڊورن جهاز سان پاڪستان جي جاسوسي ڪرڻ تي ڀارت سان سخت احتجاج ڪيو آهي.سندس چوڻ هو ته 11 جولاءِ تي ايل او سي جي ڀڃڪڙي تي به ڀارت سان احتجاج ڪيو آهي، ڀارتي جاسوسي جهاز گڏيل قومن جي قانون ۽ 1991ع جي پاڪ-ڀارت ٺاهه جي به ڀڃڪڙي ڪئي آهي. هن چيو ته گذريل ڏينهن ڀارتي فوج جي فائرنگ سان 4 شهري شهيد ٿيا آهن. ڀارت 5 جولاءِ تي به ڪنٽرول لائن جي ڀڇڪڙي ڪئي هئي.ترجمان جو وڌيڪ چوڻ هو ته 10 جولاءِ پاڪستان جي سفارتي تاريخ جو اهم ڏينهن هو، ان ڏينهن پاڪستان شنگهائي سهڪاري تنظيم جو مڪمل ميمبر بڻيو. ايس سي او جي مڪمل  رڪنيت جو درجو ملڻ پاڪستان جي وڏي ڪاميابي آهي. وزيراغظم نوازشريف چين، روس ۽ افغانستان جي صدر سان ملاقات ڪئي. چيني صدر سان ملاقات ۾ لاڳاپن کي نئين مٿانهين تي کڻي وڃڻ تي به اتفاق ٿيو.