تازيون خبرون

Daily Archives: July 18, 2015

10 ڊپٽي ڪمشنر عهدن تان فارغ، غلام قادر ٿيٻو کي هٽايو ويو، مشتاق مهر اي آءِ جي مقرر

ڪراچي(اسٽاف رپورٽر) سنڌ سرڪار وڏا فيصلا ڪري ڇڏيا، وڏن آفيسرن تي ڇُري ڦيرائي ڇڏي، ايڊيشنل آءِ جي غلام قادر ٿيٻو کي هٽائي چيئرمين اينٽي ڪرپشن مقرر ڪيو ويو، مشتاق مهر کي ايڊيشنل آءِ جي مقرر ڪيو ويو آهي. سنڌ حڪومت جي اهم فيصلن تحت سنڌ بلڊنگ ڪنٽرول اٿارٽي جي ڊي جي منظور قادر ڪاڪا، ايدمنسٽريٽر ڪراچي ثاقب اسماعيل سومرو، سيڪريٽري ڪو آپريشن شاذر شمعون ۽ ڊائريڪٽر اينٽي ڪرپشن اعجاز شيخ کي به عهدن تان هٽايو ويو آهي. شڪارپور، سجاول، ميرپوخاص، ڄامشوري، سانگهڙ ۽ دادو جي ڊپٽي ڪمشنرن سميت سنڌ جي 10 ڊي سيز کي به عهدن تان هٽايو ويو آهي، جڏهن ته ڪرپشن ۽ غيرقانوني ملڪيتون ٺاهڻ جي الزامن هيٺ آيل وڌيڪ آفيسرن خلاف به ڪارروائي جو فيصلو ڪيو ويو آهي، جن ۾ پوليس جا سينيئر آفيسر به شامل آهن. ذريعن جو چوڻ آهي ته سنڌ حڪومت ۾ وڏي پيمانيتي مقررين، بدلين ۽ ڪرپشن الزامن هيٺ آيل آفيسرن خلاف ڪارروائي جو فيصلو سنڌ ايپڪس ڪميٽي جي گذريل اجلاس ۾ ڪيو ويو هو، اجلاس کان اڳ پ پ چيئرمين بلاول ڀٽو زرداري ۽ وڏي وزير قائم علي شاهه سان ڪور ڪمانڊر ڪراچي ۽ ڊي جي رينجرز به ملاقات ڪئي هئي. آفيسرن خلاف ڪارروائي جي منظوري دبئي ۾ گذريل رات آصف زرداري جي صدارت هيٺ اجلاس ۾ ڏني وئي، جڏهن ته اڄ وڏي وزير سيد قائم علي شاهه جي صدارت هيٺ اجلاس ۾ حتمي منظوري ڏيڻ بعد وڏن آفيسرن سميت ڊپٽي ڪمشنرن کي هٽايو ويو آهي

 

عمران فاروق قتل ڪيس: برطانوي حڪومت ڏوهاري گهرڻ جو مطالبو ناهي ڪيو: چوڌري نثار

اسلام آباد(بيورو) وفاقي گهرو وزيرچوڌري نثار علي خان جو چوڻ آهي ته برطانوي حڪومت عمران فاروق قتل ڪيس جي ڏوهارين جي باضابطا گهر ناهي ڪئي، ان ڪري جيڪڏهن هن اها گهر ڪئي ته ان تي غور ڪيو ويندو. گهرو وزارت جي ذريعن مطابق پاڪستان ايندڙ اسڪاٽ لينڊ يارڊ جي 2 رڪني ٽيم عمران فاروق قتل ڪيس جي اهم ڏوهاري معظم علي کان جاچ پوري ڪري ڇڏي آهي ۽ هاڻي ٽيم کي هڪ ٻئي ڏوهاري تائين پهچ ڏني وئي آهي. گهرو وزارت  جي هڪ ٻئي آفيسر ٻڌايو ته ٽيم ٽئين ڏوهاري تائين پهچ جي درخواست به ڪئي آهي. سيڪيورٽي اختيارين جو به اهو چوڻ آهي ته پاڪستان ۽ برطانيا معظم علي خان ۽ ٻين جي بدلي بلوچ ڌار رهندڙن جي حوالگي تي به غور ڪري رهي آهي.بي بي سي جي رپورٽ جي حوالي سان جاچ ڪندڙ ايڦ آئي اي جي هڪ آفيسر جو چوڻ آهي ته اسان“ ڪجهه ڏيو، ڪجهه وٺو” جي پاليسي تي هڪٻئي سان سهڪار چاهيون ٿا.اختيارين جو چوڻ آهي ته ڊائريڪٽر انعام غني جي قيادت ۾ ايف آئي اي جي 2 رڪني ٽيم عمران فاروق قتل ڪيس ۽ ايم ڪيو ايم جي ڳجهي ايجنسي کان فنڊ وٺڻ جي جاچ ڪري رهي آهي ۽ ايندڙ مهيني ۾ گهرو وزارت کي رپورٽ پيش ڪندي.جڏهن ته ٽيم اسڪاٽ لينڊ يارڊ کي بريفنگ به ڏئي چڪي آهي. سيڪيورٽي اسٽيبليشمينٽ حڪومت کي بلوچن ۽ ايم ڪيوا يم جي اعليٰ قيادت جي حوالگي جي حوالي سان به صکاح ڏني آهي.

 

سنڌ ۾ رينجرز جي مقرري جي مدي ۾ هڪ سال لاءِ واڌ، نوٽيفڪيشن جاري

ڪراچي (اسٽاف رپورٽر) وڏي وزير سيد قائم علي شاهه سنڌ ۾ رينجرز جي مقرري جي مدي ۾ هڪ سال لاءِ واڌ ڪري ڇڏي، وڏي وزير جي منظوري کانپوءِ گهرو کاتي نوٽيفڪيشن جاري ڪري ڇڏيو، رينجرز جي مقرري جو مدو 19 جولاءِ تي ختم ٿي رهيو هو. وڏي وزير جي ترجمان پاران جاري ڪيل بيان مطابق رينجرز جي قيام جي مدي ۾ توسيع آرٽيڪل 147 جي تحت ڪئي وئي آهي، رينجرز جي مدي ۾ 17 جولاءِ 2016 تائين واڌ ڪئي وئي آهي. ڪجهه ڏينهن اڳ سنڌ حڪومت رينجرز جي اختيارن جي مدي ۾ هڪ مهيني جي واڌ ڪئي وئي هئي، جڏهن ته صوبي ۾ رينجرز جي مقرري جو مدو هڪ ڏينهن کانپوءِ ختم ٿي رهيو هو. وڏي وزير جي منظوري کانپوءِ گهرو وزارت سنڌ ۾ رينجرز جي مقرري جي مدي ۾ هڪ سال واڌ جو نوتيفڪيشن جاري ڪري ڇڏيو آهي، سول انتظاميه جي مدد لاءِ رينجرز وڌيڪ هڪ سال تائين صوبي ۾ موجود رهندي

 

پاڪ فوج جو سربراهه جنرل راحيل شريف جوانن سان عيد ملهائڻ وزيرستان پهچي ويو

راولپنڊي(م.ڊ) پاڪ فوج جو سربراهه جنرل راحيل شريف مورچن تي مقرر جوانن سان عيد ملهائڻ لاءِ وزيرستان پهچي ويو.پاڪ فوج جي عام لاڳاپن واري شعبي جي ڊائيريڪٽر ميجر جنرل عاصم باجوا سماجي رابطن واري ويب سائيٽ ٽوئيٽر تي پنهنجي هڪ نياپي ۾ چيو ته پاڪ فوج جو سربراهه جنرل راحيل شريف جوانن سان عيد ملهائڻ لاءِ وزيرستان پهچي ويو آهي جڏهن ته آرمي چيف رات فاتا ۾ رهندو، جنهن کانپوءِ هو صبح جو ٻين مورچن تي به جوانن سان عيد ملهائيندو.

 

گجرانوالا حادثي جي ذميواري ڊرائيور ۽ ريلوي اختيارين جي آهي: جاچ ٽيم جي رپورٽ

گجرانوالا (م.ڊ) گڏيل جاچ ٽيم گجرانوالا ٽرين حادثي جي جاچ رپورٽ جاري ڪري ڇڏي آهي، جنهن ۾ حادثي جو ڪارڻ تيز رفتاري قرار ڏئي ان جي ذميواري ٽرين جي ڊرائيور ۽ ٻين ريلوي اختيارين تي لڳائي وئي آهي.گجرانوالا ٽرين حادثي ۾ 8 فوجين سوڌو 19 ڄڻا موت جي ننڊ سمهي رهيا. ريلوي ترجمان آفتاب اڪبر پاران جاري ڪيل رپورٽ مطابق ٽرين جي رفتار 30 بدران 60 ڪلو ميٽر هئي ۽ حادثو تيز رفتاري جي ڪري پيش آيو.جاچ رپورٽ ۾ جيتوڻيڪ ريلوي جي اعليٰ اختيارين جي خلاف ڪارروائي جي حوالي سان ڪجهه به ناهي چيو ويو، پر ان حادثي جي ذميواري ڄاڻايل اختيارين تي لاڳو ڪئي وئي آهي.

 

گرفتاريون ۽ ظلمن سان ارادا ڪمزور نه ٿي ڪري سگهجن:الطاف حسين

ڪراچي (اسٽاف رپورٽر) ايم ڪيو ايم سربراهه الطاف حسين نائين زيرو تي رينجرز ڇاپي ۽ گرفتارين خلاف سخت احتجاج ڪندي چيو آهي ته ڇاپا، گرفتاريون ۽ ظلمن سان سندن ارادا ڪمزور نه ٿي ڪري سگهجن. ايم ڪيو ايم پاران جاري ڪيل بيان ۾ الطاف حسين نائين زيرو تي رينجرز جي ڇاپي جي سخت لفظن ۾ مذمت ڪندي اڳواڻن جي گرفتارين تي احتجاج ڪيو. هن چيو ته محب وطن مهاجرن کي آخر ڪهڙا مقصد حاصل ڪرڻ لاءِ ڀت سان لڳايو پيو وڃي، ڪروڙين عوام جي چونڊيل جماعتجي قيادت کي غير قانوني هٿڪنڊن ذريعي چِٿيو پيو وڃي. الطاف حسين چيو ته سنڌ جي شهري علائقن جي عوام جا آئيني، قانوني ۽ انساني حق پامال ڪيا پيا وڃن. متحده سربراهه پنهنجي ڪارڪنن کي پـُرامن رهڻ جي هدايت ڪندي چيو ته عيد جون تياريون ڪيون وڃن، عيد جي خوشين کان محروم ڪرڻ اسلامي روايتن جي ڀڃڪڙي آهي.

 

اڄ اسان جون دليون آرمي پبلڪ اسڪول جي انهن شهيدن کي ياد ڪري رهيون آهن: بلاول ڀٽو جو پيغام

ڪراچي(اسٽاف رپورٽر) پاڪستان پپلزپارٽي جي چيئرمين بلاول ڀٽو زرداري، عيد جي موقعي تي پشاور جي آرمي پبلڪ اسڪول حملي جي متاثرن جي نالي پنهنجي خصوصي پيغام ۾ چيو آهي ته اڄ اسان جون دليون آرمي پبلڪ اسڪول جي انهن شهيدن کي ياد ڪري رهيون آهن، جن کي گذريل سال 16 ڊسمبر تي دهشتگردن گوليون هڻي شهيد ڪيو هو، گڏوگڏ انهن شهيدن جي وارث خاندانن ۽ حملي ۾ بچي ويل ٻارڙن سان به گڏ آهيون. پنهنجي خصوصي پيغام ۾ بلاول ڀٽو زرداري وڌيڪ چيو ته جيڪڏهن اهي 140 کان وڌيڪ ٻار، ٽيچرس ۽ اسٽاف ميمبربي رحم دشمن هٿان شهيد نه ٿين ها ته اهي اڄ سڄي قوم وانگر عيد ملهائي رهيا هجن ها. اسان انهن معصوم ۽ ننڍڙن شهيدن کي سلام ٿا پيش ڪريون ۽ اهي اسان جا قومي هيروز ۽ هيروئن آهن، بلاول ڀٽو زرداري چيو ته انهن جي همت ۽ عظيم قرباني پهريون ڀيرو دهشگردي خلاف ويڙه ۾ قوم کي يڪجا ڪري ڇڏيو. انهن شهيدن جو اسان تي قرض آهي ته اسان دشمن خلاف سندس در تي وڃي ويڙهه ڪريون ۽ کين پنهنجي وچ مان ڪڍي ختم ڪريون۽ اسان انهن شهيدن جو اهو قرض لاهينداسين. بلاول ڀٽو زرداري چيو ته ڪي اهڙا لفظ ئي ناهن جيڪي شهيد ٿيل ٻارڙن جي والدين ۽ خاندان جي ڏکن کي گھٽائي سگھن،بلاول ڀٽو زرداري پشاور آرمي پبلڪ اسڪول حملي جي شهيدن جي وارثن جي نالي پيغام ۾ وڌيڪ چيو ته توهان جي پٽن ۽ ڌيئرن جي قرباني هن قوم جي شعور جي اجتماعي يادن ۾ سمائجي چڪي آهي جيڪا ڪڏهن به ختم نه ٿيندي.پوري قوم جو دعائون ۽ نيڪ تمنائون توهان سان گڏ آهن.

 

رينجرز جو هڪ ڀيرو ٻيهر نائين زيرو تي ڇاپو، ڪيف الوريٰ ۽ قمر منصور گرفتار

ڪراچي (اسٽاف رپورٽر) ايم ڪيو ايم جي مرڪز نائن زيرو تي رينجرس ڇاپو هڻي رابطا ڪميٽي جي انچارج ڪيف الوريٰ ۽ قمر منصور کي گرفتار ڪري ورتو، فاروق ستار ۽ حيدر عباس رضوي جي گهر تي به رينجرس چڙهائي ڪئي پر ڪابه گرفتاري عمل ۾ نه آئي، شهر جي مختلف علائقي مان ايم ڪيو ايم عهديدارن سميت 7 ڪارڪنن کي گرفتار ڪيو ويو. ڪراچي جي عزيز آباد واري علائقي ۾ گذريل رات دير سان رينجرس جي وڏي نفري ايم ڪيو ايم جي مرڪز نائن زيرو کي گهيري هيٺ آڻي ايندڙ ويندڙ رستن کي سيل ڪيو. رينجرس اهلڪارن بيگم خورشيد سيڪريٽريٽ ۾ داخل ٿي تلاشي ورتي، جنهن دوران رينجرس ايم ڪيو ايم رابطا ڪميٽي جي انچارج ڪيف الوريٰ، رابطا ڪميٽي جي ميمبر قمر منصور، عظيم فاروقي ۽ صفيان يوسف کي حراست ۾ ورتو. رينجرس عظيم فاروقي ۽ صفيان يوسف کي بيگم خورشيد ميموريل هال ۾ پڇا ڳاڇا بعد ڇڏي ڏنو، جڏهن ته ڪيف الوريٰ ۽ قمر منصور کي گرفتار ڪري اڻڄاتل هنڌ منتقل ڪيو ويو. نائن زيرو جي ڇاپي کانپوءِ رينجرس اهلڪارن گلشن اقبال جي بلاڪ چار ۾ ايم ڪيو ايم اڳواڻ حيدر عباس رضوي ۽ پي آءِ بي ڪالوني ۾ ڊاڪٽر فاروق ستار جي گهر تي به چڙهائي ڪئي، پر ٻئي اڳواڻ رينجرس جي ڇاپي وقت گهر ۾ موجود نه هئا، جنهن کان پوءِ رينجرس بنا ڪنهن گرفتاري جي واپس هلي وئي. هوڏانهن ملير جي ماڊل ڪالوني، باغ ڪورنگي ۽ اورنگي ٽائون ۾ رينجرس ڪارورائي ڪري ايم ڪيو ايم جي ٽن عهديدارن سميت 7 ڪارڪنن کي گرفتار ڪري ورتو آهي.

 

شوال جو چنڊ نظر اچي ويو، عيد الفطر اڄ ٿيندي: مفتي منيب الرحمان

اسلام آباد(بيورو) شوال جو چنڊ نظر اچي ويو، سڄي ملڪ ۾ اڄ عيد الفطر هوندي، مرڪزي رويت هلال ڪميٽِي جي چيئرمين مفتي منيب الرحمان اسلام آباد ۾ اعلان ڪيو اهي ته عيد الفطر جو چنڊ نظر اچي ويو آهي، لحٰذا اڄ بروز ڇنڇر 17 جولاءِ تي پهرين شوال 1436هه هوندي، ان کان اڳ شوال جي چنڊ جي حوالي سان ملڪ جي 12 هنڌن تان زونل رويت هلال ڪميٽين مان چنڊ نظر اچڻ جون شهادتون مليون، جنهن بعد مرڪزي رويت هلال ڪميٽِي انهن شهادتن جو جائزو ورتو ۽ عيد الفطر جي چنڊ نظر اچڻ جو اعلان ڪيو ويو.

 

نائين زيرو تان گرفتار ماڻهو نفرت ۽ چڙ ڏياريندڙ تقرير واري پروگرام جا منتظمين آهن: ڊي جي رينجرز

ڪراچي (اسٽاف رپورٽر) نائين زيرو تي ڪارروائي کان پوءِ سوشل ميڊيا تي جاري ڪيل پيغام ۾ ڊي جي رينجرز سنڌ بلال اڪبر چيو آهي ته نائين زيرو تان گرفتار ماڻهو نفرت واري تقرير واري پروگرام جا منتظمين آهي ڪارروائي دوران ايم ڪيو ايم قمر منصور ۽ ڪيف فلوري کي گرفتاري ڪيو ويو نائين زيرو تي ڪارروائي جي ٻن ڪلاڪن کان پوءِ ڊي جي رينجرز عوام رابطي جي ويب سائيٽ تي پنهنجو بيان جاري ڪري ڇڏيو. هوڏانهن ترجمان رينجرز پنهنجي بيان ۾ رابطا ڪميٽي جي اڳوڻن ۽ موجوده انچارجز جي گرفتاري جي تصديق ڪندي نائين زيرو تي ڪارروائي تي عزيزآباد ۾ سرجيل آپريشن جو نالو ڏنو ۽ وڌيڪ چيو ته قمر منصور ۽ ڪيف فلوري نالي ماڻهو حراست هيٺ آهن ترجمان رينجرز مطابق ڪارروائي رينجرز آفيسرن ۽ جوانن جي خلاف نفرت ڏياريندڙ تقرير ۽ شهر جو امن خراب ڪندڙن جي خلاف آهي.