تازيون خبرون

Daily Archives: July 14, 2015

سنڌ ۾ امڪاني ٻوڏ ۽ برساتن جي سلسلي ۾اجلاس، 45 ماڳ حساس قرار

ڪراچي(اسٽاف رپورٽر) سنڌ ۾ امڪاني ٻوڏ ۽ برساتن جي سلسلي ۾ اڳواٽ اپائن جي سلسلي ۾ سڄي سنڌ جي ڪمشنرن ۽ ڊپٽي ڪمشنرن، ايريگيشن کاتي، لائيو اسٽاڪ ۽ صحت کاتي جي آفيسرن جو هڪ اعليٰ سطحي اجلاس سينيئر بورڊ آف روينيو سيد ممتاز علي شاهه جي صدارت هيٺ ٿيو، جنهن ۾ ايريگيشن کاتي پاران اجلاس کي ٻڌايو ويو ته سنڌ ۾ موجوده صورتحال ۾ هيٺين سطح جي ٻوڏ جو انديشو آهي. ان سلسلي ۾ ايريگيشن کاتي سمورا انتظام مڪمل ڪري ورتا آهن. ايريگيشنکاتي پاران اجلاس کي ٻڌايو ويو ته سنڌ جي ٽنهي بئراجن جي حدن ۾ 1325 ميل بچاءَ بند آهن، جڏهن ته سڄي سنڌ ۾ ٻوڏ جي حُالي سان 45 هنڌ حساس آهن. اجلاس کي وڌيڪ ٻڌايو ويو ته ايريگيشن کاتي سمورا احتياطي اپاءُ مڪمل ڪري ورتا آهن. لائيو اسٽاڪ کاتي پاران ٻڌايو ويو ته امڪاني ٻوڏ ۽ برساتن دوران 255 وٽرنري ڪيمپس قائم ڪيا پيا وڃن  جن ۾ 23 موبائيل يونٽس به شامل آهن. صحت کاتي پاران اجلاس کي ٻڌايو ته صحت کاتي پاران سمورا انتظام مڪمل ڪيا ويا آهن. اجلاس ۾ فيصلو ڪيو ويو ته ايريگيشن کاتي پاران فلڊ الرٽ انفارميشن سروس شروع ڪئي ويندي ۽ سڄي سنڌ جي ڪمشنرن، ڊپٽي ڪمشنرن، لاڳاپيل آفيسرن ۽ ادارن کي روزانو جي بنيادن تي سنڌو درياهه ڪئنالن ۽ ريگيوليٽرس ۾ پاڻي جي گيج جي باري ۾ انفارميشن فراهم ڪئي ويندي. اجلاس  ۾ طئي ٿيو ته ضلعي ۽ تعلقي سطح تي سمورا ڊپٽي ڪمشنر ڪانٽيجنسي پلان تيار ڪندا، جنهن ۾ ضلعي ۽ تعلقي سطح تي بچاءَ بندن جي حساس هنڌن، سرڪاري ۽ غيرسرڪاري موجوده وسيلن، ٻيڙين، اسپتالن، ٽوٻن، اين جي اوز، ٽرانسپورٽ ۽ رليف جي حوالي سان تفصيلي ۽ جامع معلومات فراهم ڪئي ويندي ته جيئن ڪنهن به هنگامي صورتحال ۾ ان ڪانٽيجنسي پلان تحت موثر اپائن کي يقيني بڻائي سگهجي. اجلاس ۾ فيصلو ڪيو ويو ته ضلعي انتظاميه پاران ضلعي ۽ تعلقي سطح تي ڪنٽرول روم قائم ڪيا ويندا ته جيئن علائقي جي ماڻهن کي ٻوڏ ۽ برساتن جي حوالي سان ڪنهن به مسئلي ۽ ڏکيائي جي حل جي سلسلي ۾ مدد ۽ سهائتا فراهم ڪري سگهجي. اجلاس ۾ فيصلو ڪيو ويو ته امڪاني ٻوڏ جي صورتحال ۾ متاثر ٿيل ماڻهن کي مقامي طور تي ٽينٽ لڳائي ويجهن هنڌن تي رهائش فراهم ڪئي ويندي، جڏهن ته برساتن جي ڪري متاثر ماڻهن کي تعليمي ادارن جون بلڊنگس فراهم ڪيون وينديون. سينيئر ميمبر بورڊ آف روينيو سيد ممتاز علي شاهه سمورن ڪمشنرن ۽ ڊپٽي ڪمشنرن تي زور ڏنو ته هو اول دستي جو ڪردار ادا ڪندي امڪاني ٻوڏ ۽ برساتن جي صورتحال ۾ سمورن لاڳاپيل کاتن سان گڏجي هڪ گڏيل جامع پلان تيار ڪن. هن ڪمنشرن ۽ ڊپٽي ڪمشنرن کي هدايت ڪئي ته سمورن لاڳاپيل کاتن جا اجلاس گهرائي موثر حڪمت عملي تيار ڪن ته جيئن امڪاني ٻوڏ ۽ برساتن دوران ڪچي توڙي پڪي جي علائقن ۾ رهندڙ ماڻهن ۽ جانورن کي هر ممڪن نقصانن کان بچائي سگهجي. اجلاس ۾ ڊائريڪٽر جنرل پي ڊي ايم اي ۽ ٻين لاڳاپيل آفيسرن پن شرڪت ڪئي.

 

فلمساز ڪرن جوهر ۽ هدايتڪار روهت شيٽي فلم جي ريميڪ جي ڪاسٽ لاءِ اڃا ڪو رابطو ناهي ڪيو: شرڌا ڪپور

ممبئي (شوبز نيوز) بالي ووڊ اداڪارا شرڌا ڪپور 1989ع جي هٽ فلم انيل ڪپور ۽ جيڪي شيروف جي رام لکن جي ريميڪ ۾ ڪم ڪرڻ جي خبرن جي ترديد ڪندي چيو آهي ته فلمساز ڪرن جوهر ۽ هدايتڪار روهت شيٽي فلم جي ريميڪ جي ڪاسٽ لاءِ اڃا ڪو رابطو ناهي ڪيو. هن چيو ته ڪرن ۽ روهت سان ان سلسلي ۾ ڪا به ڳالهه ٻولهه ناهي ٿي، جڏهن ته هو ڌرما پروڊڪشن سان ڪم ڪرڻ جي خواهشمند آهي. واضح رهي ته شرڌا ڪپور ”عاشقي ٽو، ايڪ ولين، حيدر ۽ اي بي سي ڊي“ جهڙيون ڪامياب فلمون ڪري چڪي آهي جڏهن ته سندس ايندڙ فلمون ”راڪ آن ٽو ۽ باغي“ آهن

 

نانا پاٽيڪر فلم ”ويڪلم ٽو“ جي رليز ۾ دير جي ذميواري جان ابراهيم تي مڙهي ڇڏي

ممبئي (شوبز نيوز) بالي ووڊ اداڪار نانا پاٽيڪر فلم ”ويڪلم ٽو“ جي رليز ۾ دير جي ذميواري جان ابراهيم تي مڙهي ڇڏي آهي. بالي ووڊ ذريعن موجب نانا  پاٽيڪر پنهنجي نئين فلم ويلڪم ٽو جي رليز تي هڪ پاسي خوش آهي ته وري ٻئي پاسي رليز ۾ دير تي ٿوري ڪاوڙ جو پڻ اظهار ڪيو آهي. صحافين سان ڳالهائيندي نانا پاٽيڪر چيو ته اسان جي فلم هڪ سال ۾ تيار ٿي وڃي ها پر جان ابراهم جي ڪري دير ٿي. جان ابراهم جو نالو کڻڻ تي هن مسڪرائيندي چيو ته مڙئي ڪنهن جو نه ڪنهن ته نالو کڻبو آ نه. ياد رهي ته ويلڪم ٽو 4 سيپٽمبر تي سينما گهرن جي زينت بڻبي

 

شرارا شرارا گاني ۽ ساٿيا ۾ چوڙي پي چوڙي ۾ ڪيل ڊانس تي هميشه فخر رهندو:شميتا شيٽي

ممبئي (شوبز نيوز) بالي ووڊ اداڪارا شميتا شيٽي چيو آهي ته کيس ڊانس صلاحيت ڏيکارڻ لاءِ مناسب موقعو نه مليو، ڀارتي ٽي وي جي ريئلٽي شو جهلڪ دکلاجا ۾ شرڪت دوران هن چيو ته وڏي اسڪرين ته ڊانس پرفارمينس ڏيڻ جي دل چوندي آهي پر ڪڏهن به سٺو موقعو نه ملي سگهيو. 36 سالن جي شميتا چيو ته کيس فلم ميري يار ڪي شادي هي ۾ شرارا شرارا گاني ۽ ساٿيا ۾ چوڙي پي چوڙي ۾ ڪيل ڊانس تي هميشه فخر رهندو، هن چيو ته ڊانس صلاحيتون ته تمام گهڻيون هيون پر انهن کي وڏي اسڪرين تي ظاهر ڪرڻ جو ڪنهن به موقعو نه ڏنو

 

هر اداڪار سان ڪڏهن ڪڏهن نه ايئن ضرور ٿيو هوندو جو ڪنهن فلمساز جو مليل چيڪ بائونس ٿيو هجي:ريچا چڍا

ممبئي (شوبز نيوز) بالي ووڊ اداڪارا ريچا چڍا چيو آهي ته فلمسازن جا ڏنل چيڪ پڻ بائونس ٿين ٿا، پر ان سان هن تي ڪنهن به قسم جو فرق ان ڪري به نه ٿو پوي جو هو پئسي لاءِ ڪم ناهي ڪندي. ريچا چڍا چيو ته هر اداڪار سان ڪڏهن ڪڏهن نه ايئن ضرور ٿيو هوندو جو ڪنهن فلمساز جو مليل چيڪ بائونس ٿيو هجي، هن چيو ته بالي ووڊ ۾ گهڻا ئي اهڙا اداڪار آهن جيڪي فقط پئسي لاءِ فلمون نه ڪندا آهن، جنهن ۾ هو پاڻ کي شمار ڪري ٿي. ريچا چيو ته هن جو بالي ووڊ ڪيريئر 2012ع کان شروع ٿيو ۽ انڊسٽريءَ ۾ گذاريل وقت تمام سٺو رهيو آهي، ريچا چڍا چيو ته گينگز آف واسي پور تي بهترين اداڪارا جو فلم فيئر ايوارڊ ماڻي خوشي ٿي هئي. هن چيو ته انڊسٽريءَ ۾ گهاريل ٽن سالن دوران هڪ ايوارڊ حاصل ڪرڻ سميت ڪجهه بهترين دوست مليا آهن. هن چيو ته انڊسٽري ۾ دل سان ڪم ڪندي رهنديس

 

بنگلاديش جي ڪرڪيٽ ٽيم نيوزيلينڊ، پاڪستان، ڀارت کانپوءِ ڏکڻ آفريڪا کي به ٽانڊا ڏئي ڇڏيا

ڍاڪا(اسپورٽس نيوز) بنگلاديش جي ڪرڪيٽ ٽيم نيوزيلينڊ، پاڪستان، ڀارت کانپوءِ ڏکڻ آفريڪا کي به ٽانڊا ڏئي ڇڏيا آهن. ٻي ون ڊي ميچ ۾ بنگالين پروٽيز کي 7 وڪيٽن تان شڪست ڏئي چيمپئنز ليگ ۾ پنهنجي جاءِ پڪي ڪري ورتي آهي. بنگلاديش ۽ ڏکڻ آفريڪا وچ ۾ ون ڊي سيريز جو ٻيو ميچ ڍاڪا جي ڪرڪيٽ گرائونڊ تي کيڏيو ويو. ميچ ۾ ڏکڻ آفريڪا جي ٽيم پهريان بيٽنگ ڪندي صرف 162 رنسون ٺاهي آئوٽ ٿي وئي. ڏکڻ آفريڪا پاران ڊُپليسس سڀ کان وڌيڪ 41 رنسون ٺاهيون، جڏهن ته بيهر ڊين 36 ۽ هاشم آملا 22 رنسن سان نمايان رهيا. بنگلاديش پاران ناصر حسين ۽ مشفق الرحمان 3_3 وڪيٽون ورتيون جڏهن ته روبيل حسين 2 ۽ محمد الله ۽ مشرفي مرتضيٰ هڪ هڪ وڪيٽ ورتي. 163 رنسن جي جواب ۾ بنگلاديش جي ڪرڪيٽ ٽيم 167 رنسون ٺاهي گھربل ٽارگيٽ صرف 27 اوورن ۾ ٽن وڪيٽن جي نقصان تي حاصل ڪري ميچ کٽي ورتو. بنگلاديش جي بيٽسمين سوميا سرڪار 88 ۽ محمد الله 50  رنسون ٺاهيون ۽ ناٽ آئوٽ رهيو. ناصر حسين کي مين آف دي ميچ قرار ڏنو ويو. بنگلاديش ميچ کٽي ون ڊي سيريز هڪ هڪ ميچ تان برابر ڪري ورتي آهي. ان کان اڳ ڏکڻ آفريڪا جي ٽيم پهريون ون ڊي ميچ کٽي ورتو هو. سيريز جو ٽيون ۽ آخري ميچ هاڻي اهميت اختيار ڪري ويو آهي. جيڪا به ٽيم ميچ کٽيندي اها سيريز به کٽي ويندي. هوڏانهن ڏکڻ آفريڪا کي شڪست ڏئي بنگلاديش جي ٽيم چيمپئنز ليگ ۾ پنهنجي جاءِ پڪي ڪري ورتي آهي. جڏهن ته بنگالين جي فتح سان پاڪستان جي چيمپئنز ليگ ۾ شرڪت وڌيڪ ڏکي ٿي وئي آهي. بنگلاديش جي ٽيم جي ڪاميابي کانپوءِ هاڻي پاڪستان کي چيمپئنز ليگ ۾ اٺين ٽيم طور شامل ٿيڻ جو موقعو هوندو ان لاءِ پاڪستان ۽ ويسٽ انڊيز جي ٽيمن ۾ مقابلو آهي. ايندڙ ميچن ۾ ان جو نتيجو نڪرندو ته چيمپئنز ٽرافي ۾ اٺين ٽيم پاڪستان جي هوندي يا ويسٽ انڊيز جي

 

هاڪي معاملن کي سنڀاليندڙ قومي هاڪي فيڊريشن هڪ نااهل ادارو آهي: جاچ ڪميٽي

اسلام آباد (اسپورٽس نيوز) وزيراعظم پاران هاڪي ٽيم جي ڪارڪردگيءَ جي جاچ لاءِ جوڙيل ڪميٽي پنهنجي جاچ مڪمل ڪندي رپورٽ وزيراعظم سيڪريٽريٽ ۾ جمع ڪرائي ڇڏي، جنهن ۾ چيو ويو آهي ته هاڪي معاملن کي سنڀاليندڙ قومي هاڪي فيڊريشن هڪ نااهل ادارو آهي جنهن هاڪي جي واڌاري ۽ ڀلائي لاءِ ڪجهه به ناهي ڪيو. وزيراعظم پاران جوڙيل فيڪٽ فائينڊنگ ڪميٽي پنهنجي رپورٽ م وڌيڪ چيو آهي ته موجوده هاڪي فيڊريشن هاڪي لاءِ ڪجهه ناهي ڪيو، جنهن تي انهن کي هٽايو وڃي، ڪميٽي موجب فيڊريشن جا عهديدار پگهارون ۽ ٻيون مراعتون ته کڻن ٿا پر پنهنجو ڪم نه پيا ڪن، ڪميٽي موجب جيڪڏهن هاڪي کي بچائڻو آهي ته پوءِ فيڊريشن ۾ تبديليون اڻٽر بڻجي ويون آهن. ڪميٽي پنهنجين سفارشن ۾ چيو آهي ته هاڪي راند جي بهتريءِ لاءِ تربيت ورتل ۽ اهل ماڻهن کي فيڊريشن ۾ آڻڻو پوندو. ڪميٽي موجب تربيت ورتل اسٽاف کڻڻ سان قومي راند جو اڳوڻو ۽ وڃايل مقام حاصل ٿي سگهند

 

پاڪستان ۽ سريلنڪا وچ ۾ ٻي ون ڊي انٽرنيشنل ڪرڪيٽ ميچ 15 جولاءِ تي کيڏي ويندي

پالي ڪيلي (اسپورٽس نيوز) پاڪستان ۽ سريلنڪا جي ڪرڪيٽ ٽيمن وچ ۾ ٻي ون ڊي انٽرنيشنل ڪرڪيٽ ميچ 15 جولاءِ تي پالي ڪيلي انٽر نيشنل استيڊيم ۾ کيڏي ويندي. ميچ ڊي اينڊ نائيٽ هوندي ۽ پاڪستاني وقت موجب منجهند جو 2 وڳي شروع ٿيندي. گرين شرٽس کي پنجن ميچن جي سيريز ۾ 0-1 جي برتري حاصل آهي. دمبولا ۾ کيڏيل پهرين ميچ ۾ پاڪستان سريلنڪا کي 6 وڪيٽن تان هارايو هو. ٻنهي ٽيمن وچ ۾ سيريز جي ٽين ون ڊي 19 جولا3، چوٿين ون ڊي 22 جولاءِ جڏهن ته پنجين ۽ آخري ون دي 26 جولاءِ تي کيڏي ويندي

 

عالمي ڪرڪيٽ ڪائونسل رانديگرن جي نئين ٽيسٽ رينڪنگ جاري ڪري ڇڏي

دبئي(اسپورٽس نيوز) عالمي ڪرڪيٽ ڪائونسل رانديگرن جي نئين ٽيسٽ رينڪنگ جاري ڪري ڇڏي آهي، جنهن مطابق ڏکڻ آفريڪا جو اي بي ڊويليئرز هڪ درجو ترقي ڪري پهرين نمبر تي اچي ويو آهي. آءِ سي سي جي ٽيسٽ رينڪنگ ۾ آسٽريليا جو اسٽيون سمٿ هڪ درجوهيٺ لهي ٻئي ۽ ڏکڻ آفريڪي بيٽسمين هاشم آملا ٽئين نمبر تي آهي، انگلينڊ جو جي روٽ 3 درجا ترقي ڪري چوٿين نمبر تي پهچي ويو، جڏهن ته سريلنڪن بيٽسمين ڪمار سنگاڪارا هڪ درجو پوئتي هٽي پنجين پوزيشن تي اچي ويو آهي. پاڪستان جو يونس خان هڪ درجو هيٺ لهي ڇهين کان ستين نمبر تي هليو ويو آهي جڏهن ته آءِ سي سي جي ٽيسٽ بالنگ رينڪنگ  ۾ ڏکڻ آفريڪا جو ڊيل اسٽين پهرين، انگلينڊ جو جيمز اينڊرسن ٻئي نمبر تي آهي، نيوزيلينڊ جي ٽرينٽ بولٽ ٽين پوزيشن تي قبضو ڄمائي ورتو آهي ۽ پاڪستان جو ياسر شاهه چوٿين نمبر تي اچي ويو آهي

 

پوليس هٿان مقابلو ڄاڻائي قتل ڪيل پوليس اهلڪار سان انصاف ڪير ڪندو؟

 

ڳڙهي ياسين پوليس ڳوٺ وڪڙ وٽ مقابلي ۾ هڪ ڏينهن اڳ ڳوٺ منٺار ڪاڪيپوٽو مان گرفتار ڪيل 3 ڄڻن مان هڪ ڄڻي کي ڏوهاري ڄاڻائي ماري ڇڏيو. ڳڙهي ياسين پوليس هڪ ڏينهن اڳ ڳوٺ منٺار ڪاڪيپوٽو تي چڙهائي ڪري ڪاڪيپوٽا 3 نوجوانن آصف ڪاڪيپوٽو، گلزار ڪاڪيپوٽو ۽ ديدار ڪاڪيپوٽو کي گرفتار ڪري گم ڪري ڇڏيو هو، جن مان آصف ڪاڪيپوٽو کي ڳوٺ وڪڙ وٽ ڳڙهي ياسين -شڪارپور روڊ تي مقابلو ڏيکاري ماري ڇڏيو جڏهن ته ٻن ڄڻن گلزار ڪاڪيپوٽو ۽ ديدار ڪاڪيپوٽو کي اڃان تائين ظاهر نه ڪيو ويو آهي. رابطو ڪرڻ تي ايس ايس پي شڪارپور ثاقب اسماعيل ميمڻ ٻڌايو ته پوليس مقابلي ۾ مارجي ويل آصف ڪاڪيپوٽو ڏوهاري هيو، هن مٿان ڳڙهي ياسين، ڊکڻ ٿاڻن تي 15 کان وڌيڪ ڪيس داخل ٿيل آهن ۽ سندس ساٿي فرار ٿي ويا. پوليس مقابلي ۾ مارجي ويل آصف ڪاڪيپوٽو جي ڀيڻ صفيه، امڙ فاطمه ۽ وارث عورتن قرآن پاڪ کڻي پريس ڪلب پهچي احتجاجي مظاهرو ڪندي چيو ته پوليس اسان جي مخالفن ۽ پوليس اهلڪار کان 5 لک روپيا وٺي اسان جي ڳوٺ تي چڙهائي ڪري ڪالهه اسان جي نوجوان آصف ڪاڪيپوٽو کي زمين ۾ رونبو ڪندي گرفتار ڪيو هو ۽ اسان جي ٻن نوجوانن گلزار ڪاڪيپوٽو ۽ ديدار ڪاڪيپوٽو کي به آصف سان گڏ گرفتار ڪيو هو، اسان کي خدشو آهي ته اسان جي ٻن نوجوانن کي به ڪوڙي مقابلي ۾ ماريو ويندو. هنن چيو ته آصف ڏوهاري نه آهي، هو 12 سالن کان پوليس جي نوڪري ڪندو ايندو ھو ۽ ھو پوليس اھلڪار آھي، ڪجهھ عرصي کان موڪل تي آيو ھو، ھنن چيو ته مقابلي جي جاچ ڪرائي  اسان کي انصاف ڏياريو وڃي. هوڏانهن ڳڙهي ياسين ٿاڻي تي مقابلي جو اي ايس آءِ بشير احمد شيخ جي فرياد تي مارجي ويل آصف ڪاڪيپوٽو، ڏوهاري اوغان مارفاڻي ۽ امان تنيو، گلزار ڪاڪيپوٽو سميت 5 جوابدارن خلاف ڪيس داخل ڪيو ويو آهي .