تازيون خبرون

Daily Archives: July 14, 2015

الطاف حسين جي تڪراري تقرير، چوڌري نثار پاران برطانيا سان رابطي جو اعلان

اسلام آباد (بيورو) وفاقي گهرو وزير چوڌري نثار علي خان جو چوڻ هو ته الطاف حسين گذريل ڏينهن پنهنجي تقرير ۾ تهذيب ۽ شرافت جون سموريون حدون پار ڪري ڇڏيون آهن سندس پاران فوج ۽ رينجرز خلاف گاريون سمجهه کان ٻاهر آهن، الطاف حسين جي تقرير جي معاملي تي تمام گهڻو صبر ڪيو پر هاڻي اُن تي برطانيه سان ڳالهه ٻولهه ڪرڻ جو وقت اچي ويو آهي. وفاقي گهرو وزير چوڌري نثار الطاف حسين جي گذريل ڏينهن ڪيل تقرير تي ردعمل جو اظهار ڪندي بيان ۾ چيو آهي ته الطاف حسين پاران سيڪيورٽي ادارن خلاف بدترين زبان استعمال ڪئي وئي، الطاف حسين اسانجي دشمن ڀارت جي زبان استعمال ڪئي ۽ هن پنهنجي تقرير ۾ تهذيب ۽ شرافت جون سموريون حدون پار ڪري ڇڏيون. سندس چڙ ڏياريندڙ تقرير ۾ آخري حدون پار ڪري ڇڏيون آهن. الطاف حسين جي معاملي تي هر طرح سان صبر جو مظاهرو ڪيو پر هاڻي سندس تقرير تي برطانيه سان ڳالهائڻ جو وقت اچي ويو آهي. چوڌري نثار علي خان چيو ته سيڪيورٽي ادارن خلاف بدزباني برداشت جوڳي ناهي، پرڏيهه مان دفاعي ادارن تي گارين جي اجازت نٿي ڏئي سگهجي، الطاف حسين جي صورتحال جي ذميوار فوج يا رينجرز ناهي، لڳي ٿو ته برطانيه ۾ سندس ڪرتوتن سبب گهيراءُ تنگ ٿي رهيو آهي اُن جي ڪاوڙ ۽ مايوسي پنهنجي ادارن تي ڪڍي رهيو آهي. وفاقي گهرو وزير چوڌري جو چوڻ هو ته اردو ڳالهائيندڙ ڪميونٽي مهذب ۽ تهذيب يافته آهي پر الطاف حسين سندن تذليل ڪري رهيو آهي. واضح رهي ته الطاف حسين نائين تي زيرو خطاب ۾ چيو هو ته ڊي جي رينجرز سنڌ وائسرائي جو ڪردار ادا ڪري رهيو آهي ۽ وزيراعظم نوازشريف جو ذاتي ملازم بڻجي پنهنجي بنيادي فرضن جي ادائيگي ۾ ڏوهراڻي غفلت جو مظاهرو ڪري رهيو آهي.

 

ڪي اليڪٽرڪ قبلو درست نه ڪيو ته ذميوار سلاخن پويا هوندا: سنڌ حڪومت

ڪراچي(اسٽاف رپورٽر) اطلاعات ۽ بلديات واري وزير شرجيل انعام ميمڻ چيو آهي ته ڪراچي جي ترقي ۽ هتي ميگا پروجيڪٽ کي جلد کان جلد مڪمل ڪري عوام کي سهولتن جي فراهمي اسان جي پهرين ترجيح آهي. ايئن محسوس ٿئي ٿو ته وفاقي حڪومت سنڌ حڪومت کي مڪمل طور تي ڊس اوون ڪري ڇڏيو آهي. ڪي اليڪٽرڪ جي انتظاميه کي خبردار ڪريون ٿا ته هو پنهنجو قبلو فوري طور درست ڪري ورنه ان جي پوري انتظاميا کي سلاخن پويان وڃڻو پوندو. اسان وفاقي حڪومت، واپڊا ۽ ڪي اي کي به وارن ڪريون ٿا ته هو پنهنجو قبلو درست ڪن، ڇو ته اسان ڀڃ ڊاهه جي سياست نٿا چاهيون. اهڙن خيالن جو اظهار هن صفوران چورنگي تي الاظهر گارڊن ڏانهن ڪي ايم سي پاران ساڍا 12 ڪروڙ رپين جي لاڳت سان صرف 45 ڏينهن اندر اندر 5 ڪلوميٽر ڊگهو ۽ 36 فوٽ ويڪرو ڪارپيٽيڊ روڊ جي افتتاح جي موقعي تي ميڊيا سان ڳالهائيندي ڪيو. ان موقعي تي صوبائي وزير ايڪسائيز ۽ ٽيڪسيشن گيانچند ايسراڻي، ڪمشنر ۽ ايڊمنسٽريٽر ڪراچي شعيب احمد صديقي، ميونسپل ڪمشنر ڪراچي سميع صديقي، ڊائريڪٽر جنرل ٽيڪنيڪل سروسز نياز سومرو، سينيئر ڊائريڪٽر ميونسپل سروسز مسعود عالم، ڊائريڪٽر پريس انفارميشن سنڌ يوسف ڪابورو ۽ ٻيا به ساڻس گڏ هئا. شرجيل انعام ميمڻ چيو ته اڄ جنهن جديد طريقي سان ٺهيل رستي تي اسان موجود آهيون اها ڏيڍ مهينو اڳ هڪ کنڊر ۽ جهنگ جيان هئي. هن چيو ته آئون ڪي ايم سي جي سمورن انهن آفيسرن ۽ اهلڪارن کي مبارڪون ڏيان ٿو ته هنن 35 ڏينهن جي گهٽ ۾ گهٽ وقت ۾ ڏينهن رات محنت ڪري ان رستي جي تعمير جو ڪم مڪمل ڪيو. هن چيو ته ان جي ڪوالٽي جي حوالي سان خود هتان جا رهواسي اسماعلي برادري به تصديق ڪئي آهي ۽ انهن جي پنهنجي انجنيئرن ان جي نگراني ڪئي ۽ ان ڳالهه جي تصديق ڪئي آهي ته ان رستي جي مرمت ۾ اعليٰ معيار جو مٽيريل استعمال ڪيو ويو آهي. شرجيل ميمڻ چيو ته اسان جو مقصد صرف هڪ ئي آهي ته ڪراچي جي عوام کي سهولتن جي فراهمي لاءِ ڏينهن رات هڪ ڪئي وڃي. هن چيو ته جلد ئي ملير هالٽ، مهراڻ انڊر پاس، ڄام صادق علي پل سميت ٻيا اهم منصوبا به جلد مڪمل ڪري عوام لاءِ کوليا ويندا. هن چيو ته ان سلسلي ايڊمنسٽريٽر ڪراچي جي  اضافي چارج رکندڙ ڪمشنرڪراچي شعيب احمد صديقي به ڏينهن رات ڪوشان آهي. شرجيل انعام ميمڻ چيو ته اسٽريٽ لائٽس لڳائڻ ۽ رستن جي استرڪاري جي ڪم جي شروعات به جلد ڪئي ويندي. شرجيل انعام ميمڻ چيو ته دبئي ۾ سنڌ حڪومت ۽ دبئي سميت ٻين ملڪن جي سيڙپڪارڪمپنين وچ ۾ معاهدي کان پوءِ پهرين مرحلي ۾ ڪراچي ۾ ڪلفٽن ۽ 2 تلوار کان قائدآباد تائين جديد ايل اي ڊي اسٽريٽ لائيٽس ۽ ان ۾ سي سي ٽي وي ڪئميرا ۽ مفت وائي فائي جي اضافي سروس جي ڪم جي شروعات ڪئي ويندي ۽ ان کان پوءِ ان کي پوري شهر ۾ پکيڙيو ويندو. شرجيل ميمڻ چيو ته منهنجي ان منصوبي جي اعلان کان پوءِ ڪجهه تنقيد ڪئي وئي ته شهر کي پاڻي ته ناهي ملي رهيو مفت وائي فائي جو ڇا ڪريون ته مون انهن کي اهو چوڻ چاهيان ٿو ته پاڻي جي فراهمي جي منصوبن تي به ڪم جي شروعات ٿي چڪي آهي ۽ انهن جي مڪمل ٿيڻ تائين اسان ڪراچي کي اسمارٽ سٽي ٺاهڻ جي ٻين منصوبن تي ڪم نٿا روڪي سگهون. هن چيو ته پاڻي جو وائي فائي سان ڪو تعلق نه آهي. هن چيو ته ان منصوبي تي سموري فنڊنگ غير ملڪي سيڙپڪار ڪمپنين ئي ڪنديون ۽ اسان جي ڪوشش هوندي ته ان ۾ سنڌ حڪومت جو ڪو به فنڊ استعمال نه ٿئي. هڪ سوال جي جواب ۾ شرجيل انعام ميمڻ چيو ته ذاتي مفادن ۾ غلط ڪم ڪندڙن کي ڪنهن صورت ۾ نه بخش ڪيو ويندو. ڪي اليڪٽرڪ انتظاميه پاران ڪراچي جي شهرين کي عذاب ۾ مبتلا ڪرڻ جي سوال جي جواب ۾ شرجيل ميمڻ چيو ته ڪي اي جي صرف نااهلي ئي ناهي بلڪ ان ۾ بدنيتي به شامل آهي. هن چيو ته ڪي اي انتظاميه ساليانو 16 ارب رپين جو خالص منافعو هن شهر مان ڪمائي رهي آهي. پر هو هتي جي ترسيلي نظام ۽ سسٽم تي ڪجهه ناهن ڪري رهيا هن چيو ته ڪي اليڪٽرڪ مڪمل طور تي نااهل ٿي وئي آهي ۽ حڪومت ان خلاف سنجيدگي سان قانوني ايڪشن کڻڻ جي باري ۾ سوچي رهي آهي. هن چيو ته بجلي جي ترسيلي نظام جي ذميوار نيپرا به آهي ۽ ان سلسلي ۾ سنڌ حڪومت پاران ڪيترا ڀيرا وفاقي حڪومت ۽ نيپرا کي خط به لکيا ويا آهن ته اندرين سنڌ 16 کان 20 ڪلاڪ  جي روزانو جي بجلي جي بندش معمول بڻجي وئي آهي. پر افسوس اسان اڄ اهو چوڻ تي مجبور ٿي ويا آهيون ته وفاقي حڪومت سنڌ حڪومت کي مڪمل ڊس اوون ڪري ڇڏيو آهي ۽ هن سنڌ جي عوام سان زيادتين جو سلسلو شروع ڪري ڇڏيو آهي. هن چيو ته اسان وفاقي حڪومت، نيپرا ۽ واپڊا ۽ ڪي اليڪٽرڪ انتظاميه کي خبردار ڪريون ٿا ته هو پنهنجو قبلو درست ڪن. هن وفاقي حڪومت کي مخاطب ٿيندي چيو ته اسان ڀڃ ڊاهه جي ميان شهبازشريف واري سياست کي سنڌ ۾ اپنائڻ نٿا چاهيون بلڪ اسان سمورا معاملا ڳالهين ذريعي حل ڪرڻ لاءِ ڪوشان آهيون. هن ڪي اليڪٽرڪ جي انتظاميه کي خبردار ڪيو ته هاڻ معاملا برداشت کان ٻاهر ٿي چڪا آهن ۽ ڪي اليڪٽرڪ انتظاميه پنهنجو قبلو درست ڪري ٻي صورت ۾ ان جي پوري انتظاميه کي جيل جي سلاخن پويان وڃڻو پوندو.هن چيو ته ڪي اليڪٽرڪ عدالتي حڪمن جو ڌڄيون اڏائي ڇڏيون آهن ۽ عدالت جي واضح حڪمن جي باوجود واٽر بورڊ جي تنصيبات تي لوڊ شيڊنگ جو سلسلو جاري آهي، جنهن جي ڪري عوام پاڻي جي سخت بحران کي منهن ڏئي رهيو آهي. هن چيو ته ڪي اليڪٽرڪ انتظاميا کي هاڻي سنڌ حڪومت ۽ عوام ٻئي نه ڇڏيندا. ٻئي طرف سنڌ حڪومت ڪراچي ۾ بدترين بجلي جي بريڪ ڊائون ۽ لڳاتار لوڊشيڊنگ جو سخت نوٽيس وٺندي ڪي اليڪٽرڪ اختيارين کي چيو آهي ته شهر ۾ بجلي جي بنا رنڊڪ فراهمي کي يقيني بڻايو وڃي. سنڌ جي ناڻي ۽ توانائي واري سينيئر وزير سيد مراد علي شاهه ڪي اليڪٽرڪ جي چيف ايگزيڪيوٽو کي فون ڪري ڪراچي ۾ بجلي جي بحران تي سخت ناراضگي جو اظهار ڪيو ۽ ڪي اليڪٽرڪ جي ڪارڪردگي بابت صوبائي حڪومت جي شديد خدشن بابت آگاهه ڪيو. سيد مراد علي شاهه ڪراچي اليڪٽرڪ جي چيف ايگزيڪيوٽو کي سمورا وسيلا ڪتب آڻي شهر ۾ اڻ اعلانيل لوڊشيڊنگ ۽ بجلي جي شديد بريڪ ڊائون تي ضابطو آندو وڃي. سيد مراد علي شاهه ڪمشنر ڪراچي کي به فون تي هدايت ڪئي آهي ته هو ڪي اليڪٽرڪ جي انتظاميه سان رابطي ۾ رهي ته جيئن ٻيهر اهڙي صورتحال پيش نه اچي سگهي.

 

آپريشن ضرب عضب سبب شهري علائقن تي هاڪاري اثر پيا: آرمي چيف

راولپنڊي (بيورو) چيف آف آرمي اسٽاف جنرل راحيل شريف چيو آهي ته پاڪ فوج دهشتگردي کي پاڙان پٽي اڇلائيندي ۽ آخري دهشتگرد جي خاتمي تائين آپريشن َضرب عضب جاري رهندو، پاڪ فوج جي سربراهه جنرل راحيل شريف سومر ڏينهن 4 ڪور لاهور جو دورو ڪيو ۽ گيريزن آفيسرن کي خطاب ڪندي ملڪ جي اندروني توڙي ٻاهرين سيڪيورٽي جي صورتحال تي تفصيلي روشني وڌي. آرمي چيف قبائيلي علائقن ۾ جاري آپريشن ضرب عضب، انٽيليجنس جي بنياد تي ٿيندڙ سيڪيورٽي فورسز جي آپريشن ۽  شهري علائقن ۾ امن امان جي بهتر ٿيندڙ صورتحال جي حوالي سان پڻ خيالن جو اظهار ڪيو.پاڪ فوج جي سربراهه جو چوڻ هو ته آپريشن ضرب عضب ڪاميابي سان اڳتي وڌي رهيو آهي ۽ ان سان شهري علائقن ۾ هاڪاري اثر پيا آهن،هن چيو ته انٽيليجنس اطلاعن جي بنياد تي آپريشن سان ملڪ ۾ سيڪيورٽي جي صورتحل ۾ بهتري آئي آهي،  آءِ ايس پي آر مطابق آرمي چيف جنرل راحيل شريف کي ان موقعي تي پيشيور معاملن ۽ آپريشنل تيارين جي حوالي سان تفصيلي بريفنگ پڻ ڏني وئي. ان کان اڳ لاهور ڪور هيڊڪوارٽر پهچڻ تي ڪور ڪمانڊر ليفٽيننٽ جنرل نويد زمان آرمي چيف جو مانائتو آڌر ڀاءُ ڪيو.

 

نيب ڏيڍ سئو ميگا اسڪينڊل ڪيس ۾ ترميمي رپورٽ سپريم ڪورٽ ۾ جمع ڪرائي ڇڏي

اسلام آباد (بيورو) نيب ڏيڍ سئو ميگا اسڪينڊل ڪيس ۾ ترميمي رپورٽ سپريم ڪورٽ ۾ جمع ڪرائي ڇڏي آهي، جنهن ۾ چيو ويو آهي ته  وزيراعظم نواز شريف خلاف غير قانوني ڀرتين ۽  آصف علي زرداري خلاف غير قانوني اثاثا ٺاهڻ  تي جاچ هلي رهي آهي، اسحاق ڊار، شهباز شريف ۽ حسين حقاني خلاف به جاچ  ڪئي پئي وڃي. سپريم ڪورٽ جي حڪم کانپوءِ نيب، ڏيڍ سئو ميگا ڪرپشن اسڪينڊل ۾ ترميمي رپورٽ جمع ڪرائي ڇڏي آهي، جنهن ۾ تصديقي خانو ۽ شڪايت ڪندڙ جو نالو به شامل ڪيو ويو آهي. رپورٽ ۾ چيو ويو آهي ته وزيراعظم نواز شريف خلاف غير قانوني ڀرتين تي ريٽائرڊ جنرل ايڇ ايم انصاري جي شڪايت تي جاچ هلي رهي آهي، نواز شريف خلاف شڪايت 1999 ۾ داخل ڪئي وئي. رپورٽ موجب، وزيراعظم نواز شريف ۽ شهباز شريف خلاف مخبر جي رپورٽ تي سڌيءَ ريت جاچ جو به حڪم ڏنو ويو. نيب موجب، اڳوڻي صدر آصف علي زرداري خلاف غير قانوني اثاثا ٺاهڻ جي الزام هيٺ جاچ هلي پئي پر آصف علي زرداري خلاف جاچ ڪنهن جي حڪم تي شروع ڪئي وئي ۽ شڪايت ڪندڙ ڪير آهي، ان بابت ڄاڻ ناهي ملي سگهي. نيب رپورٽ موجب، ناڻي واري وزير اسحاق ڊار خلاف 2000 ۾ مخبر جي رپورٽ تي جاچ شروع  ڪئي وئي، ، جڏهن ته حسين حقاني ۽ ٻين خلاف به ڪرپشن جي جاچ هلي رهي آهي.  سپريم ڪورٽ ۾ ميگا ڪرپشن اسڪينڊل ڪيس جي ٻڌڻي 15 جولاءِ تي ٿيندي، عدالت گذريل ٻڌڻي تي نيب جي رپورٽ رد ڪئي هئي.

 

ڀارت سان ڪشمير سميت سمورن معاملن تي ڳالهيون ٿينديون: پاڪستان

اسلام آباد (اين اين آءِ) وزيراعظم جي قومي سلامتي جي صلاحڪار ۽ پرڏيهي معاملن جي صلاحڪار سرتاج عزيز 10 جولاءِ تي پاڪستان جي سفارتي تاريخ جو اهم ڏينهن ڪوٺيندي چيو ته هن ڏينهن شهنگائي تعاون تنظيم پاڪستان کي گڏيل طور تي مڪمل ميمبرشپ ڏيڻ جو فيصلو ڪيو ٽن وڏن ملڪن جي سربراهن سان پاڪستان جي وزيراعظم جون ملاقاتون ٿيون ڀارتي وزيراعظم سان نوازشريف جي ملاقات ڪنهن ڳالهين واري عمل جي باضابطه شروعات نه هئي مسئلن جي حل لاءِڳالهه ٻولهه لاءِ مفاهمت حاصل ڪرڻ جو موقعو مليو گڏيل پڌرنامي ۾ سمورن مسئلن جي حل جو ذڪر آهي جنهن ۾ ڪشمير پهرين نمبر تي اهي ڏکڻ ايشيا جو عوام امن جو خواهشمند آهي وزيراعظم جي روسي صدر ولاديمير پيوٽن سان ملاقات ۾ تجارت سيڙپڪاري ۽ دفاع جي شعبن ۾ بطرفو لاڳاپن کي هٿي ڏيڻ تي اتفاق ڪيو ويو پاڪ افغان قيادت پاڪستان ۾ افغان حڪومت ۽ افغان طلابان جي وفد سان 7 جولاءِ تي ٿيندڙ ملاقات تي اطمينان جو اظهار ڪيو جنهن جو مقصد افغانستان ۾ مفاهمت کي هٿي ڏيڻ هو چيني صدر سان ملاقات ۾ ان جي پاڪستان جي دوري دوران فيصلن تي عملدرامد جو جائزو ورتو ويو داعش وڏو مسئلو نه آهي مستقبل ۾ ٿي سگهي ٿو ته پاڪستان افغانستان کي تعاون ڪرڻو پوندو سرتاج عزيز سومر تي پرڏيهي دفتر ۾ صحافين کي بريفنگ ڏيندي چيو ته 10 جولاءِ 2015 جو ڏينهن پاڪستان جي سفارتي تاريخ جو اهم ڏينهن هو شنگهائي تعاون تنظيم گڏيل طور تي پاڪستان کي ميمبرشپ ڏيڻ جو فيصلو ڪيو ان حوالي سان ڪارروائي شروع ٿي چڪي آهي ۽ ضروري معاملا مڪمل ٿيڻ کان پوءِ پاڪستان ايس سي او جو مڪمل ميمبر بڻجي ويندو هي تنظيم خطي جي ماحول کي سازگار بنائڻ لاءِ اهم ڪردار ادا ڪري سگهي ٿي جنهن سان ان جي سمورن ميمبرن ملڪن ۾ امن ۽ خوشحالي ايندي هن چيو ته 10 جولاءِ تي هڪ ٻي وڏي اڳڀرائي وزيراعظم جي روسي صدر ولادي مير پيوٽن سان ٿيل ملاقات ڪئي ٻنهي اڳواڻن سمورن شعبن خاص ڪري تجارت سيڙپڪاري ۽ دفاع جي شعبن ۾ ٻطرفو لاڳاپن کي هٿي ڏيڻ تي اتفاق ڪيو ملاقات ۾ ڪيترائي فيصلا ڪيا ويا جن تي اڳڀرائي ٿي رهي آهي پرڏيهي صلاحڪار ٻڌايو ته وزيراعظم نوازشريف جي انهي ڏينهن چين جي صدر زي جن پنگ سان ٿيل ملاقات سان به اعليٰ ترين سطح تي چيني صدر جي اپريل ۾ پاڪستان جي دوري دوران ٿيندڙ فيصلن تي عملدرامد جي اڳڀرائي جو جائزو وٺڻ جو موقعو مليو جنهن ۾ چين پاڪستان اقتصادي راهداري منصوبي سميت ٻنهي ملڪن وچ ۾ تعاون جا ٻيا معاملا شامل آهن هن چيو ته پاڪستان ۽ چين دوستي جي گهاٽن رشتن ۾ ٻڌل آهن ۽ اهي هر سٺي ۽ بري وقت جا اسٽريٽجڪ پارٽنر آهي سرتاج عزيز چيو ته ان موقعي تي وزرياعظم نوازشريف جي افغان صدر اشرف غني سان ملاقات ٿي جنهن ۾ ٻنهي ملڪن وچ ۾ لاڳاپن ۾ ٿيندڙ اڳڀرائي جي رفتار کي برقرار رکڻ جي عزم جو اظهار ڪيو ويو ٻنهي اڳواڻن پاڪستان ۾ افغان حڪومت ۽ افغان طالبان جي وفدن جي 7 جولاءِ تي ٿيندڙ ملاقات تي به اطمينان جو اظهار ڪيو جنهن جو مقصد افغانستان ۾ مفاهمت کي هٿي ڏيڻ هو پاڪستان انهن ڳالهين جي ميزباني ڪئي ۽ هو امن ۽ مفاهمت جي عمل جي حمايت جاري رکندو جيڪو پاڪستان جي هن موقف تي ٻڌل آهي ته هڪ پرامن ۽ خوشحال افغانستان اسان جي خطي جي بهترين مفاد ۾ آهي پرڏيهي صلاحڪار چيو ته وزيراعظم نوازشريف جي نريندر مودي جي ملاقات ڀارت جي درخواست تي دوستاڻي ماحول ۾ ٿي ڀارتي وزيراعظم وزيراعظم نوازشريف جي پرعزم ۽ بهتر پاڙيسري لاڳاپن جي ويزن جي حمايت ڪئي جيڪو ٻئي ملڪ پنهنجي عوام جي معاشي ترقي تي توجهه ڏيڻ لاءِ ماحول فراهم لاءِ اهم آهي هن چيو ته 10 جولاءِ تي ٿيندڙ ملاقات جي نتيجي ۾ اسان کي پنهنجو هڪ وڏو حدف حاصل ڪرڻ ۾ ڪاميابي حاصل ٿي جيڪا ڇڪتاڻ گهٽائڻ ۽ ٻنهي ملڪن لاءِ اهميت جي سمورن معاملن کي بامقصد ڳالهين جي ذريعي حل ڪرڻ لاءِ ماحول پيدا ڪرڻ هو. هڪ ٻئي سوال تي سرتاج عزيز ٻڌايو ته پاڪ ڀارت گڏيل پڌرنامي ۾ ڀارت جون ڪيتريون ئي شيون به شامل نه آهن صرف بيانن ۾ ذڪر ڪرڻ سان مسئلا حل نٿا ٿين ان لاءِ ڳالهه ٻولهه ڪئي وڃي ٿي هڪ ٻئي سوال تي هن ٻڌايو ته ڀارت جو معاملو گڏيل قومن ۾ اٿارڻ جي حوالي سان اڃا ڪوئي فيصلو ناهي ٿيو.

 

دهشتگردن ۽ ڪالعدم تنظيمن خلاف ڪارروائي تيز ڪئي وڃي: آصف علي زرداري

اسلام آباد(اي پي پي) اڳوڻي صدر آصف علي زرداري چيو آهي ته دهشتگردن ۽ ڪالعدم تنظيمن خلاف ڪارروائي تيز ڪئي وڃي ۽ انهن جي حامين ۽ مالي مدد فراهم ڪندڙن جي لڪل هٿن کي منهن ڏنو وڃي. اهڙو اظهار هن سومر ڏينهن دبئيءَ ۾ اڳوڻي گهرو وزير سينيٽر رحمان ملڪ سان ڳالهائيندي ڪيو. ملاقات ۾ رحمان ملڪ اڳوڻي صدر کي ملڪ جي مجموعي سياسي ۽ سلامتي جي صورتحال بابت بريفنگ ڏني. رحمان ملڪ طرفان جاري ڪيل بيان مطابق پ پ جي شريڪ چيئرمين آصف علي زرداري آپريشن ضرب عضب ۾ پاڪ فوج جي ڪردار جي واکاڻ ڪئي ۽ وطن لاءِ پنهنجون حياتيون قربان ڪندڙ شهيدن جي قربانين کي خراج تحسين پيش ڪيو. اڳوڻي صدر چيو ته سنڌ رينجرز ۽ پوليس ڪراچيءَ کي دهشتگردن کان پاڪ ڪرڻ لاءِ شاندار نموني ڪم ڪري رهي آهي. هن چيو ته ڪراچيءَ ۾ جاري آپريشن جي نتيجي ۾ ڪراچي واسين سک جو ساهه کنيو آهي. هن چيو ته سندس جماعت ۽ حڪومت دهشتگردن خلاف سنڌ رينجرز سميت قانون لاڳو ڪندڙ ادارن جي ڪارروائين جي مڪمل حمايت ڪري ٿي. پ پ هميشه دهشتگرديءَ خلاف جنگ ۾ پاڪ فوج ۽ قانون لاڳو ڪندڙ ادارن جي حمايت ڪئي آهي. ملاقات دوران رحمان ملڪ آصف علي زرداريءَ کي ملڪ سميت ڪراچيءَ ۾ داعش جي وڌندڙ خطري ۽ ان جي ڪاررواين متعلق آگاهه ڪيو.

 

سڀاڻي کان 16 جولاءِ تائين ڪراچي ويندڙ عيد اسپيشل ٽرينن جي ڀاڙن ۾ 50 سيڪڙو گهٽتائي جو اعلان

لاهور (بيورو) ريلوي واري وزارت، سڀاڻي کان 16 جولاءِ تائين ڪراچي ويندڙ عيد اسپيشل ٽرينن جي ڀاڙن ۾ 50 سيڪڙو گهٽتائيءَ جو اعلان ڪري ڇڏيو، وفاقي وزير خواجا سعد رفيق جو چوڻ آهي ته موجوده حڪومت ريلوي جي بحالي لاءِ سنجيدگي ۽ ايمانداريءَ سان ڪوشش ڪري رهي آهي. لاهور ۾ ميڊيا سان ڳالهائيندي ريلوي واري وزير خواجا سعد رفيق چيو ته پنجاب ۽ خيبر پختون خواهه جا لکين ماڻهو ڪراچي ۾ روزگار لاءِ آباد آهن ان ۾ ريلوي جو ڪو قصور ناهي، هر مذهبي ڏڻ ۽ عيدن تي ماڻهو ڪراچي کان پنهنجي اباڻن ڏانهن واپس ورندا آهن. هن چيو ته جيڪڏهن ٽرين ڪراچي نه ويندي ته مسافرن کي واپس ڪيئن آڻيندي، جيڪي ريل گاڏيون خالي ڪيون ويون هيون انهن واپس پنهنجي منزلن تي سوين مسافرن کي واپس آندو آهي. هن چيو ته اڄ به جيڪي مسافر ٽرين ذريعي ڪراچي روانو ٿيا آهن انهن مان واپسي لاءِ 450 مسافرن ايڊوانس بــُڪنگ ڪرائي رکي آهي. ريلوي واري وزير اعلان ڪيو ته سڀاڻي کان 16 جولاءِ تائين ڪراچي ويندڙ عيد اسپيشل ٽرينن جي ڀاڙن ۾ 50 سيڪڙو گهٽتائي ڪئي ويندي. خواجا سعد رفيق چيو ته قومي ادارا هلائڻ جي سنجيده ڪوششون ڪيون پيون وڃن، پر ڪجهه ماڻهن کي ان ڳالهه جي تڪليف آهي ته ڌرڻو ڪامياب نه ٿيو. هن چيو ته موجوده حڪومت ريلوي جي بحالي لاءِ سنجيدگي ۽ ايمانداريءَ سان ڪوششون ڪري رهي آهي، هنن جي دور ۾ پاڪستان ريلوي آمدني ۾ 11 سيڪڙو اضافو ڪيو ۽ خرچن کي گهٽايو.

 

ڪراچي ۾ هڪ هفتي دوران بجلي جو چوٿون وڏو بريڪ ڊائون، شهر اونداهي ۾ ٻڏي ويو

ڪراچي (اين اين آءِ) ڪراچي ۾ هڪ هفتي دوران بجلي جو چوٿون وڏو بريڪ ڊائون ٿيو آهي مسلسل بريڪ ڊائون جو سبب ٽيڪنيڪي آهي يا انتظامي نااهلي ڪوئي ذميواري کڻڻ لاءِ تيار نه آهي فني خرابيون ڪئبل فالٽس جا بهانا پراڻا ٿي چڪا آهن حقيقت هي آهي ته ڪي اليڪٽرڪ جو بجلي جي روانگي جو پراڻو نظام ختم ٿي چڪو آهي گذريل رات هڪ هفتي ۾ چوٿون بريڪ ڊائون ٿيو رات دير سان بن قاسم ٿرمل پاور پلانٽ ۾ فني خرابي سان شهر جا ڪيترائي علائقا اونداهي ۾ ٻڏي ويا لانڍي ڪورنگي ايئرپورٽ گلستان جوهر گلشن اقبال فيلڊر بي ايريا لياري صدر سوسائٽي سميت شهر جي سمورن علائقن ۾ بجلي بند رهي پاور بريڪ ڊائون سبب اسٽيل مل پورٽ قاسم سميت صنعتي زون جي بجلي به بند ٿي ويئي اڱارو ست جولاءِ کان سومر 13 جولاءِ تائين شهر ۾ هڪ هفتي دوران بجلي جو چوٿون وڏو بريڪ ڊائون ٿيو آهي رمضان جي رات پنجويهين شب تي ڪٿي ٻه وڳي ۽ ڪٿي سحري وقت کان بجلي بند ٿي ويئي منجهند 12 وڳي تائين بجلي جي مڪمل بحالي ممڪن نه ٿي سگهي هئي جن علائقن جي بجلي غائب ٿي انهن ۾ لانڍي گلشن اقبال گلستان جوهر گلشن معمار گلشن جمال ملير لياقت آباد نارٿ ڪراچي ناظم آباد ڪلفٽن ڊفينس گذري ڊفينس ويو بفرزون گلبرگ ايف بي ايريا سهراب ڳوٺ اسڪيم 33 انچولي نيوڪراچي برنس روڊپاڪستان چوڪ آءِ آءِ چندريگر روڊ ۽ ايئرپورٽ جا لاڳاپل علائقا شامل آهن بريڪ ڊائون جو سبب ٽيڪنيڪي آهي انتظامي نااهلي آهي يا ڪجهه ٻيو آهي ڪوئي ٻڌائڻ لاءِ تيار نه آهي ۽ نه ئي ڪوئي جوابده اهي هوڏانهن ترجمان ڪي اليڪٽرڪ پهريان دعويٰ ڪئي ته سومر جي صبح ڪراچي ۾ بجلي جو ڪوئي وڏوبريڪ ڊائون نه ٿيو آهي خرابي دور ڪري اڌ ڪلاڪ ۾ تمام گريڊز ۽ فيڊر بحال ڪري ڇڏينداسين پر ڪجهه دير کان پوءِ ترجمان جو نئون بيان آڏو آيو ته بن قاسم هڪ ۽ ٻه جا تمام يونٽ ٽرپ ڪري ويا ۽ 95 فيڊرز بند ٿي ويا آهن جن تي ڪم جاري آهي. ٻئي طرف سومر جي صبح واٽر بورڊ جي پنج پمپنگ هائوسز ڌاٻيجي، پپري، گهارو، NEK ۽ حب پمپنگ هائوس جي بجلي 3.45 تي هڪ ئي مهل شٽڊائون سبب شهرين کي 154 ملين گيلن پاڻي تان هٿ ڌوئڻو پيو ۽ 72 انچ جي مين لائين به ڦاٽي پئي. تفصيل مطابق سومر تي صبح جو سوير 3.45 تي تمام پمپنگ هائوسز تي بجلي جو بريڪ ڊائون ٿيو جيڪو صبح 7 لڳي 20 منٽن تائين 3 ڪلاڪ کان وڌيڪ جاري رهيو ان دوران پاڻي جي فراهمي مڪمل طور تي بند ٿي ويئي 7 لڳي 20 منٽن تي بجلي بحال ڪئي ويئي جنهن کان پوءِ ڌاٻيجي مان سسٽم کي آهستي آهستي روانو ڪيو ويو ۽ پاڻي جي فراهمي معمول تي اچي ويئي جڏهن ته ان دوران ڌاٻيجي مان 128 ملين گيلن، پپري مان 18 ملين گيلن، Nek مان 18 ملين گيلن ۽ حب مان 8 ملين گيلن پاڻي جي فراهمي بند ٿي ويئي پاڻي جي هي کوٽ ايندڙ چئن کان وڌيڪ رهندي ان لاءِ ته ان کان اڳ به بجلي جي شٽ ڊائون سان پاڻي جي قلت آهي ان کان علاوه NEK تي بجلي 3 دفعا بند ڪئي ويئي رات 2 وڳي، 2 لڳي 45 منٽ ۽ 345 منٽن تي بجلي بند ٿيڻ سان 18 ملين گيلن پاڻي فراهم نه ٿي سگهيو ايم ڊي واٽر بورڊ سيد هاشم رضا زيدي شهرين سان تعاون ۽ پاڻي احتياط سان استعمال ڪرڻ جي اپيل ڪئي آهي.

 

غلط افواهه پکيڙي مونکي تڪراري بڻايو پيو وڃي: ڊاڪٽر تنويز زماني

اسلام آباد (بيورو) ڊاڪٽر تنوير زماني چيو آهي ته غلط افواهه پکيڙي کيس تڪراري بڻايو پيو وڃي، تمام گهڻا مسئلا آهن، جن تي زور ڏيڻ چاهي ٿي، هو شهيدن جي خون کي ڪيش ڪرائڻ لاءِ ناهي آئي، هر طرح جي ڀرتي ۽ هر شعبي ۾ ميرٽ هئڻ گهرجي.. اسلام آباد ۾ ميڊيا سان ڳالهائيندي ڊاڪٽر تنوير زماني چيو ته سندس/ حوالي سان تمام گهڻا افواه پکيڙيا ويا آهن، جنهن ذريعي کيس تڪراري بڻائڻ جي ڪوشش ڪئي پئي وڃي. هن چيو ته ملڪ ۾ تمام گهڻا مسئلا آهن، جن تي هو زور ڏيڻ چاهي ٿي، سڀني کي گڏجي عوام ۾ شعور پيدا ڪرڻو پوندو. ڊاڪٽر تنوير زماني وڌيڪ چيو ته جنرل راحيل شريف ۽ نواز شريف جو ضرب عضب آپريشن شروع ڪرڻ ڪامياب قدم آهي، جنرل راحيل شريف جي پوزيشن سبب ملڪ ۾ امن قائم ٿيو. هن چيو ته هر پارٽي جي نوجوان کي متحرڪ ٿيڻ جي ضرورت آهي، هو شهيدن جي خون کي ڪيش ڪرائڻ لاءِ ناهي آئي، هر شعبي ۾ ميرٽ هئڻ گهرجي.

 

بلاول ڀٽو زرداري ۽ عسڪري قيادت قيام امن لاءِ صوبي جي مفاد ۾ فيصلا ڪيا آهن: آغا سراج دراني

ڪراچي (اين اين آءِ) اسپيڪر سنڌ اسيمبلي آغا سراج دراني چيو ته بلاول ڀٽو زرداري ۽ عسڪري قيادت قيام امن لاءِ صوبي جي مفاد ۾ فيصلا ڪيا آهن بلاول جي فيصلي تي عمل ڪندي ٽارگيٽيڊ آپريشن ڪامياب بڻائينداسين رينجرز جي قدمن سان ڪراچي ۾ امن قائم ٿيو آهي دهشتگردن ۽ لينڊ مافيا کان ڪراچي کي پاڪ ڪرائڻ جو ڪريڊٽ رينجرز کي آهي ڪي اليڪٽرڪ ڪراچي ۾ بجلي جو نظام تباهه ڪري ڇڏيو آهي ڪي اليڪٽرڪ جي خلاف فيصلائتي ڪارروائي شهرين جي مفاد ۾ ٿيندي هو سومر تي سنڌ اسيمبلي ۾ پنهنجي چيمبر ۾ صحافين سان ڳالهه ٻولهه ڪري رهيو هو آغا سراج دراني چيو ته بلاول ڀٽو زرداري پارٽي کي اعتماد ۾ وٺي ڪور ڪمانڊر سان ملاقات ڪئي آهي 18هين ترميم کان پوءِ رينجرز جي اختيارن کي اسيمبلي مان منظور ڪرائڻ لازمي آهي رينجز جي ڪارڪردگي تسلي بخش آهي شهر کي يرغمال بڻائيندڙ عنصرن کي ختم ڪرڻ تي رينجرز کي سلام پيش ڪيان ٿو رينجرز جو معاملو اسيمبلي آيو ته قانون مطابق غور ٿيندو ۽ ان حوالي سان فيصلو ايوان ڪندو. ڪي اليڪٽرڪ جي حوالي سان هن چيو ته ڪي اليڪٽرڪ ڪراچي ۾ بجلي جو نظام تباهه ڪري ڇڏيو آهي ڪي اليڪٽرڪ جي حوالي سان فيصلو ڪرڻ جو وقت اچي ويو آهي. ڪي اليڪٽرڪ جي خلاف فيصلائتي ڪارروائي شهرين جي مفاد ۾ هوندي بجلي نه هئڻ سبب 15 ڪلاڪ جرنيٽر تي گذارو ڪيو غريب ڪين گذارو ڪندا هوندا ڪي اليڪٽرڪ جي خلاف ڪارروائي ٿيڻ گهرجي.