تازيون خبرون

Daily Archives: July 13, 2015

ايپڪيس ڪميٽي جو اجلاس، قومي ايڪشن پلان تي سختي سان عملدرامد ڪرڻ تي اتفاق

ڪراچي (اسٽاف رپورٽر) ايپڪيس ڪميٽي سنڌ ۾ دهشتگردن خلاف جاري آپريشن وڌيڪ تيز ڪرڻ ۽ ڏوهارين خلاف بنا فرق جي ڪارروايون جاري رکڻ جو فيصلو ڪري ورتو،سياسي ۽ فوجي قيادت، اتفاق ڪيو آهي ته سمورا ادارا پنهنجي آئيني حدن اندر رهي ڪم ڪندا رهندا. ايپيڪس ڪميٽي سنڌ جو اهم اجلاس وڏي وزير سيد قائم علي شاهه جي صدارت هيٺ سي ايم هائوس ۾ ٿيو. اجلاس ۾ گورنر ڊاڪٽر عشرت العباد، گهرو وزير سهيل انورسيال،ناڻي واري وزير مراد علي شاهه،پ پ اڳواڻ رحمان ملڪ،آءِ جي سنڌ غلام حيدر جمالي، گهرو سيڪريٽري، ڪور ڪمانڊر ڪراچي ليفٽيننٽ جنرل نويد مختار، ڊي جي رينجرز ميجر جنرل بلال اڪبر، چيف سيڪريٽري محمد صديق ميمڻ ۽ حساس ادارن جي آفيسرز به شرڪت ڪئي. اجلاس ۾ رينجزر جي اختيارن، امن امان جي صورتحال ۽ ڪراچي ۾ هلندڙ آپريشن، صوبائي حڪومت ۽ قانون لاڳو ڪندڙ ادارن وچ ۾ رابطن کي وڌيڪ اثرائتو بڻائڻ، دهشتگردن، سندن سهولتڪارن ۽ مالي مدد ڪندڙن خلاف جاري ڪاررواين سميت ٻين معاملن تي غور ويچار ڪيو ويو. ايپيڪس ڪميٽي سنڌ جي اهم اجلاس دوران سياسي توڙي فوجي قيادت ان ڳالهه تي اتفاق ڪيو ته سمورا ادارا آئيني حدن ۾ رهي پنهنجو ڪم جاري رکندا، ڏوهارين جو تعلق ڀلي ڪهڙي به جماعت سان هجي کين نه بخشيو ويندو. اجلاس ۾ دهشتگردن خلاف جاري ٽارگيٽڊ آپريشن کي منطقي انجام تي رسائڻ لاءِ ڪارروايون وڌيڪ تيز ڪرڻ، ڪراچي کي ڏوهن کان مڪمل طور پاڪ ڪرڻ ۽ ڳجهن اطلاعن تي ڏوهارين خلاف ڪارروايون جاري رکڻ جو فيصلو ڪيو ويو. سياسي ۽ فوجي قيادت اهو به فيصلو ڪيو ته رينجرز کي سمورن اختيارن سميت دهشتگردن خلاف ڪارروائي جو اختيار آهي، صوبي ۾ امن جي قيام لاءِ رينجرز ۽ پوليس جو اهم ڪردار آهي. ان کان اڳ اجلاس دوران صوبي ۾ قائم ديني مدرسن بابت رپورٽ پيش ڪندي انڪشاف ڪيو ويو ته 48 مدرسن جو دهشتگردن سان رابطو آهي. گهرو وزارت پاران پيش ڪيل رپورٽ ۾ ٻڌايو ويو ته سنڌ ۾ ڪل 9 هزار 5 سئو 90 مدرسا قائم آهن. رپورٽ موجب صوبائي راڄڌاني واري شهر ڪراچي ۾ 6 هزار 5 سئو 3 مدرسن مان 3 هزار مدرسا اڻ رجسٽرڊ آهن، هڪ سئو 65 غيرقانوني مدرسن کي سيل ڪيو ويو آهي. گهرو کاتي جي رپورٽ موجب سنڌ ۾ قائم 48 مدرسن جو دهشتگرد تنظيمن سان رابطو ثابت ٿيو آهي. ايپيڪس ڪميٽي جي اجلاس دوران ڳجهن ادارن پاران به پنهنجي ڪارڪردگي بابت رپورٽس پيش ڪيون ويون.

 

دهشتگردي جو مائينڊ سيٽ رکندڙ مدرسن خلاف فل ايڪشن ٿيندو: سنڌ حڪومت

ڪراچي ( اسٽاف رپورٽر) اطلاعات واري صوبائي وزير شرجيل انعام ميمڻ چيو آهي ته پابندي مڙهيل تنظيمن، ملڪ دشمن غير ملڪي عنصرن ۽ دهشتگردي جو مائينڊ سيٽ رکندڙ مدرسن جي خلاف ايڪشن تيز ڪرڻ جو فيصلو ڪيو ويو آهي، دهسشتگرد ڀلي ڪهِڙي به پارٽي ، رنگ نسل سان واسطو رکندڙ هوندو کيس ڪنهن به قيمت تي بخش نه ڪيو ويندو، جيڪي به عنصر دهشتگردي ۾ ملوث آهن انهن کي منتقي انجام تائين پهچايو ويندو. اهڙو اظهار هن ڪالهه چيف منسٽر هائوس ۾ ايپيڪس ڪميٽي جي اجلاس بعد پريس ڪانفرنس کي خطاب ڪندي ڪيو.هن وڌيڪ چيو ته ڪراچي ۾ جيڪوآپريشن هلي رهيو آهي اهودهشتگردي جي مڪمل خاتمي تائين جاري رهندو ۽ ان آپريشن جو ڪپتان سي ايم سنڌ سيد قائم علي شاهه آهي ۽ ڪراچي ۾ پوليس توڙي رينجرز پاران جيڪو به ايڪشن ٿي رهيو آهي اهو وڏي وزير جي هدايت تي ٿي رهيو آهي رينجرز ۽ سنڌ حڪومت وچ ۾ ڪي به اختلاف ناهن اسان سڀ گڏجي دهشتگردي جي خاتمي لاءِ ڪم ڪري رهيا آهيون.هن چيو ته ايپيڪس ڪميٽي ۾ سنڌ جي موجوده صورتحال تي غور ويچار ڪيو ويو ۽ امن امان جي حوالي سان تفصيلي ڳالهه ٻولهه ڪئي وئي ۽ پوليس ۽ رينجرز جي ڪارروائين کي پڻ ساراهيو ويو هن چيو ته هي آپريشن وقتي رليف لاءِ نه پر هميشه لاءِ دهشتگردي جون پاڙون پٽڻ لاءِ ڪيو پيو وڃي ۽ جيڪي به عنصر ڏوهاري سرگرمين م ملوث آهن يا انهن جي جيڪي مدد ڪري رهيا آهن انهن جو پڻ جڙ کان خاتمو ڪيو ويندو. صوبائي وزير چيو ته بدنام ڌاڙيل نظرو ناريجو کي مارڻ تي پوليس جي ايڪشن کي پڻ ساراهيو ويو ۽ ان مقابلي ۾ 2 سپاهي جيڪي شهيد ٿياا نهن جي خدمتن تي کين سلام پيش ڪيو ويو . هن چيو ته پوليس ۽ رينجرز جي گڏيل ڪاروائين جي ڪري هن وقت سنڌ ۾ ڏوهن ۾ ڪافي حد تائين گهٽتائي ٿي آهي . هن چيو ته ايڪشن اڃا به جاري رهندو ۽ خاص ڪري انهن پابندي مڙهيل تنظيمن، ۽ دهشتگردي کي هٿي ڏيندڙ مدرسن ۽ ملڪ ۾ رهندڙ انهن غير ملڪين جيڪي ملڪ کي غير مستحڪم ڪرڻ چاهين ٿا ۽ ملڪ دشمنن جي هٿان استعمال ٿين ٿا انهن جي خلاف ڪارروائين ۾ تيزي آڻڻ جو فيصلو ڪيو ويو آهي ته جيئن دهشتگردي هميشه هميشه لاءِ ختم ٿي سگهي.

 

علم جي نالي تي جهالت، تعصب ۽ قتل و غارت گيري علم ناهي: پرويز رشيد

لاهور(م.د) وفاقي وزير اطلاعات پرويز رشيد چيو آهي ته الله جي راهه ۾ ڏنل رقم سان دوا يا بم خريد ڪيو وڃي اهو فرق رکڻ ضروري آهي، علم جي نالي تي جهالت، تعصب ۽ قتل و غارت گيري علم ناهي، فلاحي اداري ۾ تقريب کي خطاب ڪندي وفاقي وزير پرويز رشيد چيو ته قيامت جي ڏينهن هر ماڻهو پنهنجي چندي جو حصاب به ڏيڻو پوندو، عوام جي فلاح و بهبود جي ڪم ۾ مصروف ماڻهو قابل تعريف آهن، چندي جي صورت ۾ ملندڙ رقم جان بچائڻ واري اداري کي ملڻ گهرجي، عطيي جي رقم خودڪش جيڪيٽ ۾ استعمال ٿي ته الله کي جواب ڏيڻو پوندو.

 

ڪور ڪمانڊر ڪراچي ۽ ڊي جي رينجرز سنڌ جي بلاول ڀٽو زرداري سان ملاقات، امن امان جي صورتحال تي ڳالهيون

ڪراچي (اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري ڪورڪمانڊر ڪراچي ليفٽيننٽ جنرل نيود مختيار کي دهشتگردي ۽ ڪرپشن خلاف ڀرپور ساٿ ڏيڻ جو يقين ڏياريو آهي. وزيراعليٰ هائوس ڪراچي ۾ صوبائي ايپڪس ڪميٽي جي اجلاس کان اڳ ۾ بلاول ڀٽو زرداري ۽ ڪورڪمانڊر ڪراچي ليفٽيننٽ جنرل نيود مختيار وچ ۾ ٿيندڙ ملاقات ۾ ڊي جي رينجرز سنڌ ميجر جنرل بلال اڪبر، سنڌ جي گورنر ڊاڪٽر عشرت العباد خان ۽ وڏو وزير سيد قائم علي شاهه شريڪ ٿيو. ذريعن موجب ملاقات دوران ڪراچي ۾ امن امان جي صورتحال ۽ رينجرز جي ٽارگيٽيڊ آپريشن تي تفصيلي خيالن جي ڏي وٺ ڪئي وئي. انهيءَ موقعي تي بلاول ڀٽو زرداري يقين ڏياريو ته ڪراچي ۾ امن امان برقرار رکڻ، ڪرپشن ۽ لينڊ مافيا خلاف ڪارروائي ۽ دهشتگردي جي خاتمي لاءِ ڀرپور ساٿ ڏنو ويندو.

 

حڪومت ملڪ ۾ ٽيڪس ڪلچر کي هٿي ڏيڻ جو پڪو پهه ڪيو آهي: اسحاق ڊار

اسلام آباد(اي پي پي) ناڻي واري وفاقي وزير محمد اسحاق ڊار چيو آهي ته حڪومت ملڪ ۾ ٽيڪس ڪلچر کي هٿي ڏيڻ جو پڪو پهه ڪيو آهي، اسان چاهيون ٿا ته اهي مقصد حاصل ڪرڻ لاءِ سڀئي شعبا پنهنجو ڪردار ادا ڪن. اهڙن خيالن جو اظهار هن آچر تي اينگرو فرٽيلائزر جي وفد سان ڳالهائيندي ڪيو. اينگرو فرٽيلائزرز جي وفد وفاقي وزير سان ملاقات ڪئي ۽ کيس ٽريڊرز ايسوسيئيشن ۽ واپاري برادري جي ميمبرن سان ود هولڊنگ ٽيڪس جي معاملي تي ڪامياب معاهدي تي مبارڪون ڏنيون. وفد وفاقي وزير کي اينگرو جي پيداواري منصوبي بابت آگاهه ڪيو. ناڻي واري وفاقي وزير محمد اسحاق ڊار ملڪ جي زرعي شعبي ۾ ڀاڻ جون ضرورتون پوريون ڪرڻ تي اينگرو فرٽيلائزرز جي ڪارڪردگي جي واکاڻ ڪئي. هن چيو ته اهوملڪي معيشت جو سڀ کان اهم شعبو آهي.

 

اليڪشن ڪميشن ڪي پي ڪي ۾ بلدياتي چونڊون ٻيهر 30 جولاءِ تي ڪرائڻ جو اعلان ڪري ڇڏيو

اسلام آباد(اي پي پي) اليڪشن ڪميشن خيبر پختونخوا ۾ بلدياتي چونڊن لاءِ 352 پولنگ اسٽيشنن تي ٻيهر پولنگ لاءِ 30 جولاءِ جي تاريخ مقرر ڪري ڇڏي. اليڪشن ڪميشن ٻيهر پولنگ فوج جي نگراني ۾ ڪرائڻ لاءِ انتظامن کي حتمي شڪل ڏئي ڇڏي آهي. اليڪشن ڪميشن طرفان جاري تفصيل مطابق ان کان اڳ انهن پولنگ اسٽيشنن تي 5 جولاءِ تي ٻيهر پولنگ ٿيڻي هئي پر اسٽي آرڊر سبب پولنگ ملتوي ڪئي وئي هئي. پشاور هاءِ ڪورٽ ٻيهر پولنگ خلاف سموريون درخواستون اهي چئي اڪلائي ڇڏيون آهن ته اهو ڪم ڪنهن عدالت جو نه پر اليڪشن ڪميشن جو آهي.

 

ايم ڪيو ايم مرڪزي اڳواڻ محمد انور کي لنڊن رابطا ڪميٽي کان الڳ ڪري ڇڏيو

لنڊن(م.ڊ) ايم ڪيو ايم مرڪزي اڳواڻ محمد انور کي لنڊن رابطا ڪميٽي کان الڳ ڪري ڇڏيو، اطلاعن موجب محمد انور کي عدالت جي ڪري رابطا ڪميٽي کان الڳ ڪيو ويو آهي، جڏهن ته محمد انور کان ٻيون تنظيمي ذميواريون به واپس ورتيون ويون آهن، سينيئر ميمبر نديم نصرت جي صدارت ۾ ٿيل اجلاس ۾ فيصلوڪيو ويو ته رابطا ڪميٽي ۾ سينيئر ۽ فعال ڪارڪنن کي شاممل ڪيو ويندو.

 

متحده پاران نائين زيرو تي رينجرز ڇاپي جي عدالتي جانچ جو مطالبو

ڪراچي(اسٽاف رپورٽر) ايم ڪيوايم نائن زيرو تي رينجرز جي ڇاپي کي 4 مهينا پورا ٿيڻ کانپوءِعدالتي جاچ جو مطالبو ڪيو آهي، ايم ڪيو ايم جي ترجمان پاران جاري ڪيل بيان ۾ مطالبو ڪيو ويو آهي ته عدالتي ڪميشن جوڙي نائن زيرو تي رينجرز جي ڇاپي بابت اڻڌري جاچ ڪرائي حقيقتون سڄي دنيا جي سامهون آنديون وڃن. بيان ۾ چيو ويو ته ايم ڪيوايم نائن زيرو تي ڇاپي جي حوالي سان گذريل ڪجهه ڏينهن اندر ميڊيا کي ڪوبه بيان جاري ناهي ڪيو، ان ڪري حقيقتن کي ٽوڙڻ مروڙڻ جو سوال ئي پيدا نه ٿوٿئي، ايم ڪيو ايم جي ترجمان چيو ته جيستائين نائن زيرو تي ڇاپي، اتان گرفتارڪيل ماڻهن ۽ ميڊيا کي رينجرز جي ڏنل بريفنگ جو تعلق آهي ته ان بابت ايم ڪيو ايم جون شڪايتون جائز ۽ مڪمل حقيقتن تي ٻڌل آهن. ترجمان چيو ته ان وقت جڏهن سڄي ملڪ جو عوام عبادتن ۾ رڌل آهي ته رينجرز جي ترجمان بنا ڪنهنن جواز جي بيان ڇو جاري ڪيو ۽ بلڪل عيد جي موقعي تي ان قسم جا بيان جاري ڪرڻ پويان ڪهڙا مقصد لڪل آهن؟ هن چيو ته مناسب اهو هوندو ته ان معاملي تي ميڊيا کي بيان جاري ڪرڻ بدران سپريم ڪورٽ يا سنڌ هاءِ ڪورٽ جي ججن تي ٻڌل اڻڌري ڪميشن جوڙي نائن زيرو تي ڇاپي ۽ ايم ڪيوايم جي ميڊيا سيل جي ڪارڪن وقاص شاهه جي قتل واري واقعي جي جاچ ڪرائي وڃي ته جيئن ان معاملي بابت سڀ حقيقتون سڄي دنيا جي سامهون اچي سگهن.

 

رينجرز پاران نائن زيرو تي ڇاپي بابت ايم ڪيو ايم جي رپورٽ رد، سياسي پارٽي شهر جو امن متاثر ڪرڻ جي ڪوشش ڪئي آهي: ترجمان

ڪراچي(اسٽاف رپورٽر) رينجرز سنڌ، ايم ڪيو ايم جي الزامن ۽ رپورٽ کي رد ڪندي چيو آهي ته سياسي جماعت نائن زيرو تي ڇاپي جي حوالي سان غلط ڄاڻ ڏئي شهر جو امن خراب ڪرڻ جي ڪوشش ڪئي. رينجرز جي ذريعن جو چوڻ آهي ته سياسي پارٽي نائن زيرو تي ڇاپي بابت غلط رپورٽ جاري ڪري عوام کي گمراهه ڪرڻ جي ڪوشش ۽ شهر جو امن متاثر ڪرڻجي سازش ڪئي آهي. رينجرز جي ترجمان اعلان ڪيو ته نائن زيرو تي ڇاپي جي حوالي سان اصل حقيقتون سامهون آڻڻ لاءِ ٻن ٽن ڏينهن اندر رپورٽ جاري ڪئي ويندي. رينجرز مطابق 11 مارچ تي نائن زيرو تي لڳل ڇاپي بابت سياسي پارٽي جا انگ اکر صحيح ناهن، حقيقتن کي ٽوڙِي مروڙِي پيش ڪري شهر جي امن امان ۽ شهرين کي سندن حفاظت واري معاملي کان گمراهه ڪيو پيو وڃي، سنڌ رينجرز ترت فيڪٽ شيٽ جاري ڪندي،جنهن ۾ آپريشن بابت وڌيڪ ڄاڻ ڏني ويندي.

 

ڪراچي ۾ گرمي وگهي فوتگيون: ذميوار راجستان ۾ ڪوئلي تي هلندڙ پاور پلانٽ قرار

اسلام آباد(بيورو)  ڪراچي ۾ گرمي وگهي فوتگين بابت جوڙيل ڪميٽي سانحي جو ذميوار ڀارتي رياست راجستان ۾ ڪوئلي جي پاورپلانٽن کي قرار ڏئي ڇڏيو، ميڊِيا رپورٽن مطابق موسميات کاتي جي اڳوڻي ڊي جي قمرالزمان چوڌري جي سربراهي م ڪراچي ۾ گرمي ۽ فوتگين جا ڪارڻ ڄاڻڻ لاءِ جوڙيل ڪميٽي ۾ صحت، موسميات، پي ڊي ايم اي، اين ڊِي ايم اي، ڊزاسٽر رسڪ رڊڪشن ۽ ٻين کاتن جا نمائندا شامل هئا، ڪميٽي پنهجي رپورٽ جي شروعاتي جملن ۾ لکيو آهي ته راجستاني علائقي ٿمبلي ۾ موجود گرال ڪول پاور پلانٽ جي گرمي پد ڪراچي جي ڏيڍ هزار شهرين جي جان ورتي، گرال پاور پلانٽ سنڌ کان رڳو ڪجهه سئو ڪلوميٽر پري آهي، جنهن ڪري ان مان نڪرندڙ دونهين جو رخ سنڌ ۾ داخل ٿيڻ سبب گرمي پد لاڳيتو وڌي رهيو آهي، رپورٽ ۾ ٻڌايوويو آهي ته گرال کانسواءِ راجستان ۾ برسنگ سر، صورت ڳڙهه، ڪوٽا ۽ ڇابڙا بجلي گهر به ڪوئلي سان هلن ٿا، جن مان زهريلو دونهون خارج ٿئيٿو. رپورٽ ۾ چيو ويو آهي ته جيڪڏهن اهو معاملو سفارتي سطح تي نه اٿاريو ويو ته ڪراچي متاثر ٿيندو رهندو. ذريعن مطابق ڪراچي ۾ گرمي وڌڻ جي ٻين ڪارڻن ۾ گرين بيلٽ ۽ ساوڪ ختم ٿيڻ ، پاڻي موجود نه هجڻ ۽ بجلي بند رهڻ به شامل آهن.