تازيون خبرون

Daily Archives: July 11, 2015

سنڌ ۾ رينجرز ڇڪتاڻ ڇاجي؟عاجز جمالي

پاڪستان جهڙي جمهوريت ۾ اهو ممڪن آهي ته ڪنهن به صوبي جو وڏو وزير ملڪ جي هڪ فوجي اداري سان ٽڪر کائي سگهي؟ ڳالهه سمجهه کان ٻاهر آهي، جي ائين هجي ته شايد اهو وڏو وزير هفتو به نه هلي سگهي. سنڌ سرڪار پاران صوبي ۾ رينجرز جي اختيارن ۽ مدي ۾ واڌ نه ڪرڻ وارو فيصلو ته گهڙي جي ڪانٽن کي هڪ چڪر پورو ڏيڻ کان اڳ ئي واپس ٿي ويو. رينجرز جا اختيار ۽ مدو رات جو 12 وڳي ختم ٿي رهيو هو ۽ مدي ۾ واڌ جو نوٽيفڪيشن ٻارنهن ٿيڻ کان اڳ جاري ٿي چڪو هو. ان نوٽيفڪيشن کان اڳ وفاقي گهرو وزير چوڌري نثار جا رابطا، سندس پريس ڪانفرنس، سنڌ جي وڏي وزير جي بلاول سان ملاقات، گورنر سنڌ سان رينجرز جي ميجر جنرل بلال جي ملاقات، قائم علي شاهه جا آصف زرداري سان رابطا. سڀ هڪ ئي عمل جو حصو هئا. نتيجو رينجرز جو ڪم جيئن جو تيئن، نوٽيفڪيشن جاري. رينجرز سنڌ ۾ اڄڪلهه کان ناهي ۽ نه رينجرز جي سنڌ ۾ رهڻ نه رهڻ جي ڪهاڻي ڪا نئين آهي. 1992ع ۾ ايم ڪيو ايم جي خلاف آپريشن کانپوءِ جڏهن عام چونڊون ٿيون، 1993ع جي اليڪشن ۾ پيپلز پارٽي کي اڪثريت ملي، محترمه بينظير ڀٽو ملڪ جي وزيراعظم بڻجي وئي پر ڪراچي ۾ آپريشن کي جاري رکيو ويو. هڪ چونڊيل سرڪار ۾ فوجي آپريشن بدران ڪراچي ۾ سنڌ سرڪار جي درخواست تي رينجرز کي گهرايو ويو، جيڪا گذريل 21 سالن کان نه رڳو ڪراچي ۾ پر پوري سنڌ ۾ موجود آهي. ڪراچي ۾ آپريشن دوران جنرل عبدالقادر بلوچ کي محترمه بينظير ڀٽو جي فرمائش تي ڊائريڪٽر جنرل رينجرز سنڌ مقرر ڪيو ويو هو. ان زماني ۾ ڪراچي پوليس ۾ به دبنگ آفيسر هئا. دهشتگردن خلاف آپريشن ته جاري رهيو پر محترمه جي ان سڄي سرڪار جي دوران ڪراچي ۾ بدامني به عروج تي رهي. رينجرز جي موجودگي باوجود ڪراچي ۾ امن ڪونه هو.

رينجرز تڏهن کان وٺي اڄ تائين ڪراچي ۾ رهي، جمهوري حڪومت هجي يا جنرل مشرف جي ون وي سرڪار پر رينجرز ڪراچي ۾ هڪ مستقل فورس جي صورت اختيار ڪري چڪي آهي. رينجرز کي ڪراچي ۾ رهائشي ڪالونيون ملي ويون، سندن هيڊڪوارٽر ٺهي ويو، وٽس لاڪپ جا اختيار به اچي ويا. رينجرز جو ڪراچي ۾ پاڻي جي هائيڊرينٽس تي ڪنٽرول رهيو. هائيڊرينٽس جو ڪراچي ۾ مطلب ئي ڪاروبار آهي. روزانو لکين واٽر ٽينڪرز ڀرجن ٿا، يعني شهر ۾ روزانو پاڻي به ڪروڙين روپين جو وڪامي ٿو. اهڙي ريت رينجرز جو ڪيترن ئي مامرن ۾ ملوث هجڻ جون ڳالهيون ٿين ٿيون، جنهن ۾ چوري جي ايراني ڊيزل ۽ پيٽرول به شامل آهي. اڄ جيڪا ايم ڪيو ايم، رينجرز جي مخالفت ڪري پئي اها پاڻ رينجرز جو سنڌ  ۾ مدو وڌائيندي رهي آهي، بلڪه مطالبو ڪندي رهي آهي. ائين ئي پيپلزپارٽي به ڪڏهن رينجرز کي سنڌ مان واپس موڪلڻ ۾ ڪا سنجيدگي ڪانه ڏيکاري، ان ڪري هاڻي ائين پيو لڳي ته جهڙوڪر سنڌ مان رينجرز ڪڏهن به واپس ڪانه ويندي! ڇو ته رينجرز به هاڻي سنڌ تي پنهنجو حق ٿي سمجهي، جيئن باقي ماڻهو ٻين صوبن کان اچي سنڌ ۾ روزگار، ڪاروبار ۽ ڪرپشن کي پنهنجو حق ٿا سمجهن تيئن ئي رينجرز به سمجهي ٿي.

سنڌ سرڪار جو تازو موقف آهي ته رينجرز کي مليل اختيارن ۾ اها ڳالهه شامل ناهي ته هو سرڪاري آفيسن ۾ ڇاپا هڻي يا سرڪاري آفيسرن کي گرفتار ڪري، وٽس رڳو ٽارگيٽ ڪلنگز ۽ دهشتگردي ختم ڪرڻ جا اختيار آهن، ملزمن کي گرفتار ڪري 90 ڏهاڙن تائين جاچ هيٺ رکڻ جا اختيار آهن. ان حد تائين ته سنڌ سرڪار جو موقف درست آهي پر رينجرز وٽ وري زبردست جواب آهي، جيڪو غلط به ناهي.

رينجرز چوي ٿي ته دهشتگردي جي خاتمي لاءِ دهشتگردن کي ٿيندڙ فنڊنگ يا مالي مدد کي روڪڻ لازمي آهي. سرڪاري ادارن مان جن ماڻهن کي پڪڙيو ويو آهي، اهي ڪرپشن ذريعي جيڪو پئسو ڪمائين ٿا اهو پئسو دهشتگردي جي مقصدن لاءِ استعمال ٿئي ٿو، ان ڪري دهشتگردن جي فنڊنگ روڪڻ لاءِ اُنهن جي حامي ڪامورن کي گرفتار ڪرڻ لازمي آهي. رينجرز اهڙو موقف ايپيڪس ڪميٽي جي اجلاسن ۾ رکي چڪي آهي، جنهن جي اتي ڪنهن به مخالفت نه ڪئي هئي، پر سنڌ سرڪار سمجهي ٿي ته اها صوبائي مامرن ۾ مداخلت آهي. ها رينجرز جي موجودگي خود مداخلت آهي، ڇو جو صوبي جي پاليسين ۾ دم ناهي. سنڌ وٽ پنهنجي پيرا ملٽري فورس يا بارڊر فورس ئي ناهي. مان ڪٿي پڙهيو آهي ته پاڪستان ٺهڻ کان اڳ به سنڌ ۾ سنڌ بارڊرز فورس هوندي هئي، جيڪا سنڌ سرڪار جي ماتحت هوندي هئي. مون اها ڳالهه گذريل مضمون ۾ به لکي هئي ته گذريل ويهن سالن ۾ سنڌ، رينجرز تي کربين روپيا خرچ ڪري چڪي آهي، ان کان گهٽ رقم ۾ سنڌ وٽ پنهنجي پيرا ملٽري فورس، بارڊر فورس يا سنڌ لا اينڊ آرڊر فورس به ٺهي وڃي ها پر سنڌ ڪڏهن به اهڙي فورس جي قيام جي ڪوشش نه ڪئي.

هاڻي ڇا ٿيندو؟ سنڌ سرڪار چوي ٿي ته سنڌ اسيمبلي کان قانون منظور ڪرائبو. ڇا اهو قانون اهڙو هوندو جو رينجرز واپس ويندي؟ بلڪل به نه، ان قانون ۾ رينجرز کي ٿورو محدود ڪرڻ جي ڪوشش ڪئي ويندي، جيئن اها سنڌ سرڪار جي مرضي سان هلي، هروڀرو کيس تنگ نه ڪري، حدون نه اورانگهي پر اصل ۾ رينجرز ۽ ايف آءِ اي کي مليل اختيار ان پي پي او جو حصو آهن، جنهن جي سڀني سياسي ڌرين پارليامينٽ ۾ حمايت ڪئي. سنڌ سرڪار پهريون دفعو رينجرز جي مامري تي سخت موقف اختيار ڪري وفاق کي ٽريلر ڏيکاريو آهي پر اهو صرف ڪجهه ڏيو ۽ ڪجهه وٺو جو پيغام آهي ۽ نه ٿو لڳي ته ڪو سنڌ مان رينجرز واپس ويندي. گهٽ ۾ گهٽ ڪراچي جي حد تائين ته هر ماڻهو چاهي ٿو ته ڪراچي ۾ دهشتگردن خلاف جيڪو رينجرز جو ڪردار آهي، اهو جاري رهي. ان ڪري سنڌ سرڪار کي اهڙي خوش فهمي ۾ نه رهڻ گهرجي ته ڪو هو رينجرز کي واپس موڪلي سگهندي ۽ نه ان ڇڪتاڻ جو سنڌ جي عوام کي ڪو فائدو  ٿيندو.

 

ڇا اڄ نواز- مودي ملاقات ٿيندي؟؛مير اعظم علي ٽالپر

اڄ ڏهين جولاءِ جمعي تي روس جي شهر ’اوفا‘ ۾ برڪس شنگهائي جي ستين (7) اجلاس دوران پاڪستان جي وزيراعظم نواز شريف ۽ هندستان جي وزيراعظم نريندر مودي وچ ۾ ملاقات متوقع آهي. حالانڪه هن ملاقات لاءِ ٻنهي طرفن کان ڪابه سرڪاري طرح سان ڄاڻ نه ملي آهي. هن تحرير وقت به صرف ٻنهي سربراهن جي ملڻ جو امڪان آهي. پاڪستان ۽ هندستان جي پيار ۽ محبت جي گاڏي ٽريڪ تان لهي چڪي آهي، سا هن پهرين ملاقات ۾ هڪدم ريل ته ڊوڙڻ شروع نه ڪندي. البته نواز شريف ۽ مودي جي ملڻ سان هندستاني جبل هماليه ۽ پاڪستاني جبل نيله پربت تان هڪدم برف پگهرڻ نه لڳندي، پر ٻنهي ملڪن وچ ۾ ڪشمڪش گهٽ ٿيندي. هن کان اڳ 2013ع ۾ هندستاني وزيراعظم من موهن سنگهه ۽ نواز شريف به ملي چڪا آهن ۽ تازو مسلمانن جي مقدس مهيني رمضان جي آمد تي مودي جو مبارڪن وارو فون نواز شريف لاءِ هڪ سٺو قدم هو. هن برڪس ۾ ٻنهي ملڪن کي نئون ميمبر بڻايو ويندو ۽ خاص ڪري دنيا ۾ يونان (گريس) جي کوٽ کاتي کانپوءِ ٻيو ڪهڙو ملڪ کوٽ ۾ ايندو؟ ان کان بچڻ لاءِ هي اجلاس اهم آهي ۽ چون ٿا يونان کانپوءِ ڏيوالي ٿيڻ لاءِ ٻيو نمبر ’اسپين‘ جو آهي.مودي هن کانپوءِ هندستان ۾ 17 تاريخ تي ڪشمير ايندو ۽ مسلمانن سان گڏجي عيد ملهائيندو، جيئن هو ڪجهه مهينا اڳ هندو پنڊتن سان ڏيئا (ديوالي) ملهائي چڪو آهي ۽ پڻ افطار پارٽي به ڏيندو. هندستان ۾ هر رمضان ۾ ڪانگريس پاران افطار ۽ عيد ملن پارٽيون مقرر آهن. اڳوڻي هندستاني صدر فخر علي احمد جي دور کان زور شور ملهايون وينديون آهن. بهرحال اڄوڪي ملاقات ٻنهي ملڪن طرفان هن خطي لاءِ هڪ خوشگوار قدم آهي.تازو هندستان ۾ ناليواري قانوندان رام ڄيٺ ملاڻي چيو آهي ته ممبئي جو ڊان ’دائود ابراهيم‘ واپس هندستان اچڻ لاءِ تيار هو ۽ ان مون کي ٻڌايو هو ته بقول رام ڄيٺ ملاڻي ته دائود هندستان ۾ اچڻ کانپوءِ پنهنجي ممبئي واري گهر ۾ رهندو ۽ کيس گرفتار نه ڪيو ويندو ۽ پوءِ ڀلي ڪيس هلايا وڃن، پر بقول وڪيل رام ڄيٺ ملاڻي ته ان وقت جي مهاراشٽر جي وزيراعليٰ شرت پوار اها ڳالهه منظور نه ڪئي ۽ پڻ ”ڇوٽا شڪيل“ جيڪو ممبئي اچي نه سگهيو، رام ڄيٺ ملاڻي جي هن بيان کانپوءِ هندستان جي سياسي بازار ۾ هلچل پيدا ٿي وئي آهي ۽ هرطرف ’دائود ابراهيم‘، ’ڇوٽا شڪيل‘ ۽ ’رام‘ جو نالو هڪ ئي آواز ۾ تنقيد سان ورتو پيو وڃي. جڏهن ته هندستان جي سياست ۽ موجوده حڪمران پارٽي بي جي پي جو جهونو ۽ ناليوارو سنڌي ليڊر ايل ڪي آڏواڻي به پارٽي ۾ هئڻ جي باوجود حڪومت پاران سرڪار ۾ نظرانداز آهي. جڏهن ته هو پارٽي جو مکيه پائي جو ليڊر ۽ مرڪزي باڊي جو اڳواڻ هوندي به ميٽنگ ۾ وزيراعظم نريندر مودي سامهون چپ چاپ ويٺو هوندو آهي. جو هندستان ۾ بي جي پي پارٽي بدران هڪ شخص مودي جي شخصي حڪومت چئي وڃي ٿي.تازو ايل ڪي آڏواڻي هڪ واضح اشارو ڏنو آهي ته جيئن ته 1977ع ۾ ان وقت جي وزيراعظم مسز انڌرا گانڌي پنهنجي اقتداري ڪرسي بچائڻ خاطر الهه آباد ڪورٽ جي فيصلي کي نظرانداز ڪندي پنهنجي اقتدار لاءِ هندستان ۾ ايمرجنسي هڻائي هئي ۽ ان ڪاري ڏينهن کانپوءِ هندستان ۾ سياست جو اصل روح ئي تبديل ٿي ويو هو. هن وقت به حالتون ان رستي تي وڃي رهيون آهن، جتي اڳتي هلي وزيراعظم مودي کي ڪا نئين ايمرجنسي نافذ ڪرڻي پوندي. انهي بيان کانپوءِ ناليوارو سياستدان سنڌ ڄائو لال ڪرشن آڏواڻي هندستان جي سياست ۾ وڏي تنقيد جو نشانو بڻجي ويو آهي. ٻئي پاسي سنڌ جو هڪ ٻيو ناليوارو پنڊت نوابشاهه ضلعي وارو ’چاچا آشا رام‘ مختلف ڪيسن ۽ الزامن تحت احمدآباد سينٽرل جيل ۾ مسلسل نظربند آهي. ان جي پٺيان به سياسي نظريو ۽ مذهبي ڪٽرپڻو چيو وڃي ٿو، ان لاءِ تازو دنيا ۽ هندستان ۾ اقوام متحده پاران يوگا جو عالمي ڏينهن ملهائيندڙ سوامي ’بابا رام ديو‘ جو خفيه هٿ چيو وڃي ٿو. ڇو ته آشا رام بطور ’سوامي‘ رام ديو کان وڌيڪ ميمبر ۽ مذهبي اثر رکندڙ شخصيت آهي. بهرحال جيڪي به مذهب جي ڪري پنهنجي ڌرتي ڇڏي ويا آهن، اهي ٻئي هنڌ به تڪليف ۾ آهن ۽ ڪجهه سال اڳ هتان لڏي ويل هڪ نه پر ڪافي شخص هندستان وڃڻ کانپوءِ واپس سنڌ ۾ موٽي آيا. جيتوڻيڪ هنن کي سنڌ ڌرتي تي رهڻ وارن کان کوڙ ساريون شڪايتون، اغوا، ڦر، ڌاڙا، قتل کانسواءِ ٻيا ڪيترائي مسئلا درپيش آهن.اڄڪلهه هندستان ۾ سڀ کان وڌيڪ ڳالهه وزيراعظم مودي جي حڪم تي ”ڊجيٽل انڊيا“ جي هلي رهي آهي. ان سلسلي ۾ سڀ کان پهرين 36 ٽڪرين تي مشتمل ڪجهه سال اڳ مڌيه پرديش ۽ ٻين علائقن کي ملائي هڪ نئون صوبو ڇٽيهه ڳڙهه ٺاهيو ويو هو، ان کي ئي ڊجيٽل انڊيا جو مرڪز بڻايو ويو آهي. هن صوبي جي گادي واري شهر راڻيپور ۾ هتان لڏي ويل سنڌين جي اڪثريت آباد آهي. ڊجيٽل انڊيا جي پهرين ڏينهن ئي هندستان جي ويب سائيٽ وارن الزام هنيو آهي ته پاڪستان مان ڪن ماڻهن سندن ويب سائيٽ جام ڪري انهن مٿان پاڪستان جو جهنڊو لڳائي ڇڏيو ۽ ڪافي ڪلاڪن جي مٿا ڪٽ ڪرڻ کانپوءِ هندستان جي ويب سائيٽ رکڻ وارن پنهنجيون بي ايس، اينل جون ويب سائيٽ بحال ڪري وري پاڪستاني ويب سائيٽ کي هيڪ ڪري انهن مٿان هندستان جو ٽه رنگو جهنڊو لڳائي ڇڏيو. ان سلسلي ۾ راڻيپور جي هڪ نوجوان فيصل افضل چيو ته هي هڪ غير اعلانيه مقابلو آهي ته ڪير ڪنهن کان زور آهي ۽ ان ۾ ’واري وٽي‘ وارو طريقو آهي، جنهن ۾ ٻنهي طرفن کان طاقت جو ڀرپور مظاهرو ڪيو پيو وڃي، پر اصل ۾ هي گلوبل ۾ کلي عام هڪ جنگ آهي. ان سائيبر ڪرائم تحت پاڪستان وارا اسان جون ويب سائيٽس هيڪ ڪن ته اتي ۽ جيڪڏهن اسان هتي (هندستان مان) پاڪستان وارن جون ويب سائيٽس جام ڪريون ته مقامي انتظاميه قانوني چاره جوئي ڪري. پر في الحال اهڙو سائيبر ڪرائيم جو قانون نظر نٿو اچي. جڏهن ته خود هن صوبي ڇٽيهه ڳڙهه ۾ فون جي مڪمل سهوليت به دستياب نه آهي، جنهن سان ’بي ايس اينل‘ تحت ڊجيٽل انڊيا جو ڪم هلي سگهي، ان کانسواءِ موبائل جو سسٽم به ميلن جا ميل ٽاور پري هئڻ سبب سگنل نه آهن ۽ ان ڪري هتي موبائل ڳالهائڻ ۽ رابطي واري سم کانسواءِ گانا ٻڌڻ لاءِ استعمال ٿئي ٿو.روڊ ۽ رستن تي ٽريفڪ حادثا ۽ ٽڪر ٿيڻ عام واقعا آهن، پر تازو هندستان جي صوبي راجستان جي شهر جئه پور ۾ نيشنل هاءِ وي جي باءِ پاس تي دُوسوا وٽ ٻن ڪارن ۾ خاص ٽڪر ٿيو، جنهن ۾ هڪ ڪار ماضي جي ڊريم گرل ادڪاره هيما مالني جي مرسڊيز ۽ ان اڳيان ٻي ڪار الٽو هئي،

جنهن کي ٽڪر لڳڻ سبب ان ۾ هڪ ڇوڪري ٻن سالن جي ننڊ ۾ ئي ڌڪ لڳڻ شرط گذاري وئي، جڏهن ته خود هيما مالني جي اک ۽ منهن تي زبردست ڌڪ لڳڻ سبب چار ٽانڪا هڪ پرائيويٽ اسپتال ۾ هنيا ويا. هتي ماضي جي قصي ۽ داستان کي هڪ دفعو ٻيهر قارئين جي دلچسپي لاءِ لکڻ ضروري آهي ته هيما مالني فلمن ۾ اچڻ کانپوءِ مدراس ۾ جتيندر سان شادي ڪرڻ واري هئي، پر سنڌي فلمساز سپي صاحب جي فلم شعلي ۾ ’بسنتي ٽانگي واري‘ جو ڪردار هيما مالني ڪندي رام ڳڙهه ويندي فلم جي هيرو ڌرميندر سان شادي ڪري ڇڏي. جڏهن ته ڌرميندر سان ماضي جي ناليواري اداڪاره مينا ڪماري بي پناهه محبت ڪندي هئي ۽ ان ڪري هن پنهنجي مڙس ڪمال امروهي (فلم پاڪيزه ٺاهيندڙ) کان ڌار ٿي وئي. پر ڌرميندر مينا ڪماري سان بيوفائي ڪري ويو ۽ هن ناليواري فلمسٽار بدران نئين اداڪاره ۽ ڊريم گرم هيما مالني سان پرڻو ڪري ڇڏيو. جڏهن ته ان وقت خود ڌرميندر شادي شده ۽ سندس گهرواري پرڪاش مان کيس پٽ اجيه 22 سال ۽ ڌيءَ 21 سالن جي هئي. ان وقت ان شادي تي مشهور سنڌي فلمي اخبار شڪنتلا ۾ سڀ ڪجهه ديپ ڪوڏواڻي (مرحوم) لکيو هو ۽ ان کانسواءِ فلم شعلي هندستان ۾ رليز ٿيڻ بعد ان جي تصويري ڪهاڻي سنڌي ۾ عبرت اخبار جي فلم ايڊيشن ۾ قسط وار شايع ڪئي هئي، جيڪا پڻ شڪنتلا ۽ ديپڪ ڪوڏواڻي جي سهڪار سان ڇپي هئي. بهرحال ڪجهه ڏينهن اڳ هيما مالني جي ڪار جي ٽڪر سان گذاري ويل ڇوڪريءَ هريش جي ڏاڏي کي وڏو صدمو رسيو آهي ۽ ان کانسواءِ والد هنومان کنڊيوال سخت پريشان آهي ۽ هنن چيو آهي ته هڪ وي آءِ پي شخصيت تي هرڪو ڌيان ڏئي ٿو ۽ عام ماڻهو جانور وانگر اسپتال ۾ پيو آهي. منهنجي گاڏي روڊ تي زيرو رفتار ۾ هئي ۽ هيما جي ڪار 160 جي اسپيڊ سان طوفان بڻجي لڳي وئي هئي ۽ ان لاءِ ڊرائيور مهيش ٺاڪر ذميوار آهي يا خود قومي اسيمبلي جي ميمبرياڻي ۽ اداڪاره هيما مالني پاڻ فيصلو ڪري، پر سرڪار ته اسان جي مدد ڪري. هيما مالني ممبئي پهچي الزام هنيو آهي ته مخالف ۾ هنومان کنڊيوال جي ڪار وارن جو ڏوهه آهي. هن اهو نيٽ تي ٽوئيٽ ڪيو آهي. جيتوڻيڪ هيما مالني جي ڌيءَ استپال ۾ اچي زخمي ۽ معاوضي ڀرڻ جو چيو هو، پر خود هيما نه آئي، غلطي ڪنهن جي به هئي، پر ٻارڙي جو موت افسوسناڪ آهي.