تازيون خبرون

Daily Archives: July 11, 2015

ڪميونٽيز ۾ وڃي ڪم ڪندڙورڪرن ۽ رضاڪار عورت ورڪرن جو پوليو جي خاتمي جي مهم ۾ اهم ڪردار آهي: آصفه ڀٽو

ڪراچي(اسٽاف رپورٽر) پاڪستان مان پوليو جي خاتمي لاءِجدوجهد ۾ بين القوامي مڃتا ماڻيندڙآصفه ڀٽو زرداري چيو آهي ته ڪميونٽيز ۾ وڃي ڪم ڪندڙورڪرن ۽ رضاڪار عورت ورڪرن جو پوليو جي خاتمي جي مهم ۾ اهم ڪردار آهي، آصفه ڀٽو زرداري، انهن جي ڪميونٽيز۾ وڃي انهي موذي مرض جي خاتمي ۾ سندن ڪردارجي واکاڻ ڪئي آهي آصفه ڀٽو زرداري اڄ بلاول هائوس ۾ پوليو جي خاتمي جي حوالي سان هڪ اعليٰ سطحي اجلاس جي صدارت ڪئي، اجلاس ۾ سيڪريٽري صحت ڊاڪٽر سعيد احمد مڱڻيجو، پوليو بابت صوبائي ڪوآرڊينيٽرشهناز وزيرعلي، بل گيٽس اينڊ ملينڊا فائونڊيشن جي ڊاڪٽر احمد علي شيخ، محمد عثمان چاچڙ، صحت جي عالمي اداري ڊبليوايڇ او جي ڊاڪٽر ٽومس گرائن، ڊاڪٽر ٽيمسم دميڪي، يونيسيف جي پوليو سربراه اڊينو ليري ۽ هما عارف شرڪت ڪئي، اجلاس ۾ ٻڌايو ويو ته گذريل سال سڄي  سنڌ مان پوليو جا 30 ڪيس رپورٽ ٿيا، جن مان 23 ڪيس ڪراچي ۽ باقي ٻيا صوبي جي ٻين علائقن مان ظاهر ٿيا هئا، اجلاس ۾ ٻڌايو ويو ته هن وقت ڪراچي بلڪل پوليو فري شهر آهي ۽ سنڌ جي ٻين علائقن مان به صرف 4 پوليو جا ڪيس رپورٽ ٿيا آهن، پوليو جي خاتمي لاءِ هلندڙ مهم ۾ 5 سالن جي عمر جا 1.60726 ملين ٻار شامل رهيا آهن.

 

جيڪڏهن بن روئي ڪامياب وئي ته وڌيڪ پاڪستاني فلمن ۾ ڪم ڪندس: ماهرا خان

لاهور (شوبز نيوز) پاڪستاني اداڪارا ماهرا خان چيو آهي ته جيڪڏهن هن جي فلم بن روئي ڪامياب وئي ته وڌيڪ پاڪستاني فلمن ۾ ڪم ڪندي، ذريعن موجب پاڪستاني اداڪارا کي عالمي فلم ڪمپنين ايور نيو پڪچرز ۽ ريڊي پڪچرز پاران به ڪم جي آڇ ٿي آهي پر ماهرا هنن کي ڪو جواب ناهي ڏنو. ماهرا چيو ته هو هن وقت بالي ووڊ فلمن ۾ مصروف آهي ۽ هتي فلمي شيڊيول تيديل ٿيندا رهن ٿا ان ڪري پاڪستاني فلمن لاءِ وقت ڪڍڻ تمام ڏکيو هوندو.

 

35 سال گڏ زندگيءَ گهاريندڙ منهنجا والدين اڄ به تمام گهڻا پيارا لڳن ٿا: سوناڪشي سنها

ممبئي (شوبز نيوز) بالي ووڊ اداڪارا سوناڪشي سنها پنهنجي والدين شتروگن سنها ۽ پونم سنها کي شادي جي 35 هين سالگرهه تي مبارڪون ڏيندي نيڪ تمنائن جو اظهار ڪيو. ان موقعي تي سوناڪشي سنها پنهنجي ٽوئيٽر اڪائونٽ تي هڪ گانو به اپلوڊ ڪيو جنهن ۾ شتروگن ۽ پونم گڏ آيا هئا. سوناڪشي چيو ته 35 سال گڏ زندگيءَ گهاريندڙ اڄ به تمام گهڻا پيارا لڳن ٿا ۽ پيار ونڊيندڙ آهن. 1973ع ۾ پهريون ڀيرو بالي ووڊ فلم سبق گڏ ايندڙ اداڪار شتروگهن ۽ پونم جي شادي 1980ع ۾ ٿي هئي. شادي جي لڳ ڀڳ 30 سالن کان پوءِ اداڪارا پونم سنها وري 2008 ع جي هٽ فلم ”جوڌا اڪبر“ ۾ ظاهر ٿي هئي.

 

هڪ ٽي وي چينل غلط فهمي ۾ غلط خبرون هلايون آهن : سلمان خان

ممبئي(شوبز نيوز) بالي ووڊ جي دبنگ خان سلمان خان هڪ ڪوڙي واٽس ايپ ميسيج تي ممبئي پوليس جي ڪمشنر کي شڪايت ڪئي آهي، سلمان خان جي ويجهن ذريعن موجب هڪ ڪوڙي واٽس ايپ ميسيج ۾ سلمان خان جي تصوير لڳائي اهو چيو ويو آهي ته ”سلمان خان کي اويسي جي حامي مسلمانن جي حمايت جي ضرورت نه آهي ۽ بجرنگي ڀائي جان مسلمانن جي حمايت کان سواءِ  ئي هٽ ٿي ويندي“ جنهن تي سلمان خان ڪاوڙ جو اظهار ڪندي ڪوڙي واٽس ايپ ميسيج پوليس کي شڪايت ڪري ڇڏي ۽ چيو ته هن ڪڏهن به اهڙو بيان نه ڏنو آهي ۽ هڪ ٽي وي چينل غلط فهمي ۾ غلط خبرون هلايون آهن. بالي ووڊ پنڊتن موجب فلم بجرنگي ڀائي جان  17 جولاءِ تي رليز ٿي رهي آهي ان ڪر ي اهڙا مسئلا فلم جي رليز ۾ رڪاوٽ وجهي سگهن ٿا ۽ اهڙين ڳالهين کان پاسو ڪيو وڃي

 

بالي ووڊ جي ٻن ستارن شاهه رخ ۽ اجي ويوگن  وچ ۾ هلندڙ سرد جنگ ختم

ممبئي (شوبز نيوز) بالي ووڊ اداڪارن شاهه رخ ۽ اجي ويوگن  وچ ۾ هلندڙ سرد جنگ ختم ٿيڻ بابت خبرون گردش هيٺ آهن، پنهنجي ڪيريئر جي شروعات کان ئي سرد جنگ ڪندڙ ٻنهي اداڪارن وچ ۾ دوستي ٿيڻ جا امڪان وڌي ويا آهن. فلمي ذريعن موجب شاهه رخ ۽ اجي ديوگن کي پهريون ڀيرو گڏ ڏٺو ويو ۽ انهن بلغاريا جي هڪ ريسٽورينٽ ۾ گڏجي ماني کاڌي. شاهه رخ خان ۽ اجي ديوگن وچ ۾ سرد جنگ جي شروعات سال 1994ع جي فلم ڪرن ارجن تان ٿي هئي، جنهن ۾ پهرين  اجي ديوگن ۽ شاهه رخ گڏ اچڻا هئا پر بعد ۾ اجي جي جاءِ تي سلمان کي کنيو ويو هو، جنهن جو ذميوار اجي ديوگن پاران شاهه رخ کي قرار ڏنو ويو هو. ان کان پوءِ شاهه رخ ۽ اجي وچ ۾ دوستي يا وري ميل ملاقات نه ٿي هئي. انڊسٽري ۾ شاهه رخ جي سڀ کان سٺي دوست ڪاجول کي مڃيو ويندو آهي پر اجي جي ڪاجو ل سان شادي به ٻنهي اداڪارن جي دوستي لاءِ ڪردار ادا نه ڪيو، ڪجهه سال پهرين به ٻنهي اداڪارن هڪٻئي جي فلم جي رليز تي سخت بيان ڏنا هئا پر هاڻي لڳي ٿو ته وقت بدلجي ويو آهي ۽ ٻئي اداڪار دوست ٿيڻ جي ويجهو پهچي ويا آهن

 

ناليوارو پاڪستاني اسپن بالر سعيد اجمل پنهنجي پراڻي فارم ۾ اچي ويو

لنڊن(اسپورٽس نيوز) ناليوارو پاڪستاني اسپن بالر سعيد اجمل پنهنجي پراڻي فارم ۾ اچي ويو آهي. سعيد اجمل پنهنجي بالنگ ذريعي ڪائونٽي ڪرڪيٽ ۾ ڌاڪو ڄمائي ورتو آهي. سعيد اجمل اڄڪلهه انگلينڊ ۾ ڪائونٽي ڪرڪيٽ کيڏي رهيو آهي، جتي هن پنهنجي جادوءَ واري بالنگ ذريعي بيٽسمينن کي منجھائي ڇڏيو آهي. گذريل ڏينهن ورڪشائر پاران کيڏندي سعيد اجمل مخالفن جي اڌ ٽيم آئوٽ ڪري ڇڏي. سعيد اجمل پنهنجي 13 اوورن ۾ صرف 14 رنسون ڏئي همپشائر جي ٽيم جا 5 بيٽسمين آئوٽ ڪري ورتا. واضح رهي ته ايڪشن شڪي قرار ڏيڻ کانپوءِ سعيد اجمل تي پابندي لڳائي وئي هئي. جنهن مان بحالي کانپوءِ هو لاڳيتو پنهنجو فارم بحال ڪرڻ جي ڪوششن ۾ رهيو، جنهن ۾ هو ڪامياب ٿي ويو آهي.

 

ثانيا مرزا ومبلڊن اوپن ٽينس ٽورنامينٽ جي ڪوارٽر فائنل ۾ پهچي وئي

(اسپورٽس نيوز) ڀارتي اسٽار ٽينس رانديگرياڻي ثانيا مرزا ومبلڊن اوپن ٽينس ٽورنامينٽ جي مڪسڊ ڊبلز جي ڪوارٽر فائنل ۾ پهچي وئي آهي. ثانيا مرزا ۽ برونوسوريز ٽئين رائونڊ ۾ ڪروشيا جي جوڙي کي دلچسپ مقابلي کانپوءِ شڪست ڏئي ڇڏي. سال جي ٽئين گرينڊ سلم ٽينس ٽورنامينٽ ۾ مڪسڊ ڊبلز جي ايونٽ جي سلسلي ۾ کيڏيل پري ڪوارٽر فائنل ميچ ۾ ثانيا مرزا ۽ سندس برازيلين ساٿي دار برونوسوريز بهترين ڪارڪردگي جو مظاهرو ڪيو. ٻنهي رانديگرياڻين مرين ڊريگنجا ۽ ايناڪونجو تي ٻڌل ڪروشين جوڙي کي 6_7 ۽  6_3 تان شڪست ڏئي ڪوارٽر فائنل ۾ جاءِ ٺاهي ورتي آهي.

 

ٽينس اسٽار اعصام الحق فٽنيس مسئلن سبب ڊيوس ڪپ ٽائي ۾ شرڪت کان معذرت ڪري ڇڏي

لاهور (اسپورٽس نيوز) ٽينس اسٽار اعصام الحق فٽنيس مسئلن سبب ڊيوس ڪپ ٽائي ۾ شرڪت کان معذرت ڪري ڇڏي آهي. هاڻي پاڪستان جي ٽي رڪني ٽينس انڊونيشيا جو مقابلو ڪندي. پاڪستان ۽ انڊونيشيا وچ ۾ ڊيوس ڪپ ايشيا ۽ شيانا گروپ ٽو سيمي فائنل 14 کان 16 جولاءِ تائين جڪارته ۾ کيڏيو ويندو. پاڪستان ٽينس ٽيم کي ان وقت لوڏو آيو جڏهن سينيئر ٽينس اسٽار اعصام الحق گوڏي جي انجري سبب ايونٽ ۾ شرڪت کان معزرت ڪئي. فيڊريشن اعصام الحق جو ڪوبه متبادل رانديگر نه موڪلڻ جو فيصلو ڪيو آهي، اهڙي طرح هاڻي صرف ٽي رڪني ٽينس ٽيم عقيل خان، سامر افتخار ۽ عابد علي انڊونيشيا جو اهم ٽائي ۾ مقابلو ڪندا.

 

ورلڊ هاڪي ليگ ۾ شرم جوڳي شڪست کانپوءِ پي ايڇ ايف ٽه رڪني ڪميٽي جوڙي ڇڏي

لاهور(اسپورٽس نيوز) ورلڊ هاڪي ليگ ۾ شرم جوڳي شڪست کانپوءِ پي ايڇ ايف ٽه رڪني ڪميٽي جوڙي ڇڏي آهي. اڳوڻو اولپئن اخلاق، شاهد علي خان ۽ منصور احمد ڪميٽي جا ميمبر آهن. ڪميٽي پنهنجي جاچ رپورٽ هڪ هفتي اندر هاڪي فيڊريشن جي صدر اختر رسول کي پيش ڪندي.  هوڏانهن پي ايڇ ايف جي صدر اختر رسول جو چوڻ آهي ته منهنجو گھراڻو هاڪي رانديگرن تي ٻڌل آهي، تاريخ ۾ پهريون ڀيرو اولمپڪس مان ٻاهر ٿيڻ جو درد مون جيترو ٻيو ڪير به محسوس نٿو ڪري سگھي.  هن چيو ته استعيفا وٺڻ يا ڪنهن کي ٻاهر ڪڍڻ سان معاملا بهتر نه ٿيندا، مسئلن کي حل ڪرڻو آهي ته مالي معاملا بهتر ڪرڻا پوندا. هن چيو ته جيڪڏهن منهنجي استعيفا سان معاملا بهتر ٿي سگھن ٿا ته آئون اڄ ئي ائين ڪرڻ لاءِ تيار آهيان. هن چيو ته رڳو ڳالهين سان صورتحال ۾ ڪا به بهتري نه ايندي.

 

سنڌ ۾ بدعنوان ڪامورن خلاف ڪريڪ ڊائون جاري

 

سنڌ ۾ ڪرپشن ۽ بدعنوانين خلاف ڪارروايون تيز ٿي ويون، نيب، اينٽي ڪرپشن ۽ ايف آءِ اي جي ڪاررواين ۾ 4 ڪي ڊي اي عملدار، بينظير انڪم سپورٽ پروگرام جي ڊائريڪٽر سميت 8 ڄڻن کي گرفتار ڪيو ويو آهي. تعليم کاتي مٽياري ۾ ٿيندڙ غير قانوني ڀرتين ۽ فنڊن ۾ گهوٻين جي جاچ شروع ، نيب جي اسسٽنٽ ڊائريڪٽر پنهنجي ٽيم گڏجي مٽياري جي تعليم آفيس تي ڇاپو هڻي آفيس جا دروازا بند ڪري آفيس اندر پيل رڪارڊ پنهنجي تحويل ۾ وٺي سمورو رڪارڊ پاڻ سان گڏ کڻي ويا. مٽياري جي تعليم کاتي ٿيندڙ بيقاعدگين جي اڳ ۾ ئي اينٽي ڪرپشن وٽ تعليم کاتي جي عملدار عطاءُالله ڀٽو ، گلزار ميمڻ سميت ٻين تي ٻـ ڪيس داخل ڪري جاچ هلندڙ هئي اڃان اها جاچ مڪمل ئي نـ ٿي تـ گذريل ڏينهن اسسٽنٽ ڊائريڪٽر نيب اوصاف ٽالپر پنهنجن ٻين عملدارن سان گڏجي تعليم کاتي مٽياري جي آفيس تي ڇاپو هڻي اتي موجود ملازمن کانسواءِ ٻين غير واسطيدار ماڻهن کي آفيس مان ٻاهر ڪڍي آفيس جو مين توڙي اندريان سمورا گيٽ بند ڪري آفيس اندر الماڙين ۾ رکيل سموري رڪارڊ کي چيڪ ڪرڻ بعد 2007ع کان 2015ع جون تائين جو سمورو رڪارڊ پنهنجي تحويل ۾ وٺي آفيس ۾ ويٺل ملازمن کان پڇا ڳاڇا ڪري سمورو رڪارڊ پاڻ سان گڏ کڻي ويا ۽ ڪنهن بـ عملدار کي هن وقت تائين پنهنجي حراست ۾ نـ ورتو ويو باقي تعليم کاتي جي عملدارن کي پابند بڻائي ويا تـ جنهن بـ عملدار جي نيب کي ضرورت پئي تـ ان کي اتي حاضر ٿيڻو پوندو ، جڏهن تـ نيب جي ٽيم تعليم کاتي جي آفيس تي ڇاپو هنيو تـه صحافين سميت ڪنهن کي بـ اندر نـ ڇڏيو ويو ۽ نيب جي اسسٽنٽ ڊائريڪٽر اوصاف ٽالپر صحافين کي تفصيل ٻڌائڻ کانسواءِ پنهنجي گاڏي ۾ سوار ٿي هليو ويو ، جڏهن تـ خبر پئي تـ نيب جو اسسٽنٽ ڊائريڪٽر اوصاف علي کي مٽياري ضلعي اندر تعليم کاتي جي جعلي ڀرتين ، فنڊن ۾ خردبرد۾ ملوث ايجوڪيشن آفيسر ساجن ملاح ، عطاءُ الله ڀٽو ، آفيس سپريڊنٽ گلزار ميمڻ سميت ٻين عملدارن جي خلاف انڪوائري جون ذميواريون مليون آهن. ڊسٽرڪٽ اڪائونٽ آفيسر نيب جي ٽيم کي رڪارڊ فراهم ڪرڻ جي يقين ڏيارڻ بعد تعليم کاتي جي عملدارن ۾ ٿرٿلو مچي ويو آهي نيب جي عملدارن پاران جنهن وقت آفيس تي ڇاپو هنيو تـ گلزار ميمڻ سميت ڪيترائي ڪم ڪندڙ ڪلارڪ آفيس جي درين مان ٽپا ڏيئي خوف وچان ڀڄي ويا ۽ ڪيترن ئي ملازمن پاڻ کي ملازم سڏرائڻ بدران غير واسطيدار سڏائي نيب جي پڇا ڳاڇا ڪرڻ واري خوف کان ڀڄي وڃڻ ۾ ڪامياب ٿي ويا. هوڏانهن اينٽي ڪرپشن اسٽيبلشمينٽ سنڌ  پلاٽن جي غير قانوني الاٽمينٽ ۽ اختيارن جي غلط استعمال جي الزامن  هيٺ ڪي ڊي اي جي چئن آفيسرن کي گرفتار ڪري ورتو آهي. ڊائريڪٽر اينٽي ڪرپشن اسٽيبلشمينٽ سنڌ غلام حسين ميمڻ ٻڌايو آهي ته اينٽي ڪرپشن اسٽبلشمينٽ سنڌ اختيارن جي غلط استعمال ۽ پلاٽن جي غير قانوني الاٽمينٽ جي الزام هيٺ ڪي ڊي اي جي چئن آفيسرن خلاف ايف آءِ آر نمبر 24/2015  داخل ڪري کين گرفتار ڪري ورتو آهي. آفيسرن ۾ شاڪر علي، عذير احمد، محمد حنيف خان ۽ شهاب الدين شامل آهن، جڏهن ته اينٽي ڪرپشن اسٽيبلشمينٽ شڪارپور سول اسپتال جي اسٽور انچارج الله ڏنو ولد امير بخش لاکو خلاف ايف آءِ آر نمبر /2015 02 داخل ڪري کيس گرفتار ڪري ورتو آهي. ڊائريڪٽر اينٽي ڪرپشن سنڌ غلام حسين ميمڻ ٻڌايو ته اسٽور انچارج تي الزام آهي ته هن سول اسپتال شڪارپور جي ٻئي عملي سان ملي ڀڳت سان وڌيڪ اگهه تي دوائن جي خريداري ڪئي ۽ سول اسپتال شڪارپور جي فنڊن ۾ لکين رپين جون گهوٻيون هنيون. ٻئي طرف سجاول ۾ بينظير انڪم سپورٽ پروگرام جي آفيس تي ايف  آئي اي جي ٽيم جو ڇاپو پروگرام جو اسسٽنٽ ڊائريڪٽر نياز ميمڻ گرفتار، بينظير انڪم سپورٽ ۾ ڪرپشن جعلي آئي ڊي جي زريعي سوين مستحق عورتن جي وظيفي  واري رقم ڦٻائڻ جي الزام هيٺ ايف آئي اي جي ٽيم ڪارروائي ڪندي BISPسجاول جي اسسٽنٽ ڊائريڪٽر نياز ميمڻ کي گرفتار ڪري کڻي وئي ذريعن موجب ڪجهھ ڏينهن اڳ  ۾ بينظير انڪم اسپورٽ پروگرام جا جعلي ڪارڊ کڻي سجاول جي سينٽر تي پهتل اينجنٽن مان ٻن ڄڻن کي ڇاپي دوران ايف آئي اي جي ٽيم گرفتار ڪيو هو جن کان پڇا ڳاڇا بعد ڪرپشن جي الزام هيٺ نياز ميمڻ کي گرفتار ڪيو ويو. ٻي طرف BISPسينٽر بند ٿيڻ خلاف سينٽر تي موجود مستحق عورتن سخت احتجاج ڪندي مطالبو ڪيو ته فوري طور ايماندار اسسٽنٽ ڊائريڪٽر مقرر ڪري سينٽر بحال ڪيو وڃي جئين ڪارڊ ٺهرائي وظيفو حاصل ڪري سگهون. نيب عملدار ٽنڊو الهيار پهچي ٽريزري آفيس ۾ ڇاپو هڻي اهم ريڪارڊ تحويل ۾ وٺي ڇڏيو جڏهن ته تحويل ۾ ورتل ريڪارڊ ۾ تازو ڊفرنس بلن جي مَد ۾ ساڍا چار ڪروڙ نڪرڻ جو ريڪارڊ پڻ ضبط ڪيو ويو آهي. مليل ڄاڻ موجب نيب عملدارن ٽريزري آفيس تي ڇاپو هڻي ڊسٽرڪٽ اڪائونٽ آفيسرن سان ملاقات ڪري اهم ريڪارڊ ضبط ڪري ورتو آهي ذريعن وٽان مليل ڄاڻ موجب ٽنڊو الهيار جي ٽريزري آفيس ۾ تازو 104 ملازمن جا ڊفرنس بل ٺهيا هئا، ساڍا چار ڪروڙ جي لڳ ڀگ ڊفرنس بل کڻندڙ ملازمن جو تعلق مخلتف کاتن سان هو، جڏهن ته ملازم سنڌ حڪومت پاران ڊفرنس بلن تي پابندي باوجود پگهارن واري اڪائونٽس ۾ لکين روپيا منتقل ڪرائي ڪڍرايا هئا جنهن جا تفصيل ۽ اهم ثبوت نيب عملدار پاڻ سان گڏ کڻي ويا. ياد رهي ته ٽنڊو الهيار جي ڊسٽرڪٽ اڪائونٽ آفيس ۾ روزانو لکين روپيا ايجنٽن معرفت وصول ڪيا ويندا هئا، جڏهن ته صحت کاتو ۽ تعليم کاتي سميت مختلف کاتن جا بل ڪميشن تحت پاس ڪيا ويندا هئا. ٻئي طرف شڪارپور ۾ نيب عملدارن ڊي ايڇ او آفيس ۾ ڇاپو هڻي هيڊڪلارڪن سميت 3 ڄڻن کي گرفتار ڪري ورتو