تازيون خبرون

Daily Archives: July 9, 2015

اسحاق ڊار اختيارن جي غلط استعمال ۽ اثاثا ٺاهڻ جي الزامن کي رد ڪري ڇڏيو

اسلام آباد(اي پي پي) ناڻي واري وفاقي وزير اسحاق ڊار اختيارن جي ناجائز استعمال ۽ اثاثا ٺاهڻ وارن الزامن کي رد ڪندي انهن کي غلط ۽ بي بنياد قرار ڏنو آهي. وفاقي وزير هڪ جاري ڪيل بيان ۾ چيو آهي ته کيس اخبارن ۾ نيب اختيارن جي حوالي سان سندس باري ۾ اختيارن جي ناجائز استعمال ۽ پنهنجي حيثيت کان وڌيڪ اثاثا ٺاهڻ وارن الزامن تي ٻڌل خبرن پڙهي تمام گهڻي حيرت ٿي آهي. هن چيو ته هو مستقل طور تي پنهنجي آمدني ۽ اثاثن بابت سالياني گوشوارن ۾ تفصيل جاري ڪندو رهندو آهي. 20

 

مولا علي عه جي محبت ايمان ڪامل جي نشاني آهي: عبدالفتاح عباسي

مولاءِ ڪائنات سيدي مرشدي اميرالمومنين حضرت سيدنا علي المرتضيٰ شير خدا رضي الله تعالي عنه اسلامي تاريخ جو اهو نالو آهي جنهن جي هر پاسي کان قربانين جو ذڪر واضع ۽ عيان آهي پاڻ سخي،شجاعت ۾ عاليشان،صبر جا پيڪر،سادگيءَ جا مالڪ ۽ مهمان نوازي ۾ هڪ انمول حيثيت رکندا هئا.سندن جي والد مبارڪ جو اسم پاڪ حضرت ابو طالب رضي الله عنه هو.مولا علي شير خدا رضي الله عنه جو لقب ابو تراب يعني زمين جو ابو ڇاڪاڻ ته پاڻ سادگي پسند هئا ان لاءِ اهو لقب مليو.پاڻ سرور ڪائنات رحمت عالميان حضرت محمد مصطفيٰ صلي الله عليه وآله وسلم جن جا سئوٽء هئا.سندن جي ولادت پاڪ خانه ڪعبه ۾ ٿئي ٿي هي انهن مبارڪ هستين مان آهن جن لاءِ سائين ڪريمن صلي الله عليه وسلم جن بشارت ڏني ته اهي جنتي آهن يعني عشره مبشره مان آهن.حضرت علي المرتضي شير خدا رضي الله عنه جو سيده خاتون جنت حضرت بيبي فاطمه زهره رضي الله تعالي عنها سان نڪاح ٿيو جنهن مان ڪائنات جا حسين و جميل شهزاده حضرت سيدنا امام عالي مقام، امام حسن رضي الله تعالي عنه ۽ حضرت سيدنا امام عالي مقام،امام عرش مقام، امام ڪون و مڪان،امام حسين رضي الله تعالي عنه جن جي پيدائش ٿي جن جي عظمت بلندي جو ذڪر تاريخ اسلام ۾ ڪيڏو نه عظيم ۽ اعليٰ آهي.حضرت مولا علي شير خدا رضي الله تعالي عنه بهادري،شجاعت،رحمدلي،سخاوت،سادگي ۽ صبر جي معاملي ۾ عرب و عجم مشهور هئا.سندن رياضت، عبادات،زهد و تقويٰ جي ڪمالات تي هيا پر ڪڏهن به عاجزي انڪساري کان ٻاهر نه ويا هميشه رب العالمين جي بارگاه ۾ عجز جي حالت ۾ رهيا.ڪروڙين اربين،کربين اولياءَ الله سندن جي فيضان سان مستفيض آهن.سندن جو ارشاد آهي ته زمين تي خدا پرست ۽ اطاعت ڪندڙ قائم هوندا.پاڻ خوش بيان ۽ فصيح ۽ معروف خطباءَ ۾ هوندا هئا.سندن جي الله ڪريم جي پاڪيزه ڪلام پاڪ سان بي انتها محبت عقيدت ۽ هر معاملي ۾ قرآن پاڪ کان زندگيءَ جي هرموڙ تي رهنمائي حاصل ڪرڻ زندگيءَ جو مقصد هو.حضرت مولا علي مشڪلڪشا شير خدا رضي الله تعالي عنه جن کي پنهنجن نالن مان ابو تراب ڏاڍو پسند هوندو هو۽ انهي نالي تي خوش ٿيندا هئا.انهي ڪري جو هڪ ڏينهن پاڻ مسجد شريف جي ڀت جي ڀرسان سمهايا پيا هئا ته پٺي مبارڪ کي مٽي لڳي وئي هئي.انهي موقعي تي سائين ڪريم صلي الله عليه وسلم به تشريف فرما ٿيا ۽ حضرت علي المرتضي رضي الله تعالي عنه جي پٽي مبارڪ تان مٽي پري ڪري فرمايو ته ”اجلس ابا تراب“ هي حضور ڪريم صلي الله عليه وسلم جو عطا ڪيل خطاب سندن کي سڀني نالن کان وڌيڪ پيارو لڳندو هو.حضرت علي المرتضي شير خدا رضي الله عنه جا تمام گهڻا فضائل آهن حضرت سعد بن وقاص کان روايت آهي ته حضور ڪريم صلي الله عليه وسلم تبوڪ جي جنگ جي دوران حضرت علي شير خدا رضي الله عنه جن کي مدينه پاڪ ۾ اهلبيت پاڪ جي حفاظت جي لاءِ رکيو.حضرت علي رضي الله عنه عرض ڪيو ”آقا يارسول الله صلي الله عليه وسلم توهان مون کي عورتن ۽ ٻارن ۾خليفو بڻايو ٿا.حضور صلي الله عليه وسلم فرمايو ڇا توهان راضي ناهيو جو توهان کي منهنجي درٻار ۾ اهو مرتبو حاصل ٿئي جيڪو حضرت هارون عليه السلام کي درٻار حضرت موسيٰ عليه السلام ۾هيو.اها ٻئي ڳالهه آهي ته مون کان پوءِ ڪو به نبي نه آيو.

حضرت سهل بن سعد رضي الله عنه کان روايت آهي ته حضور ڪريڪ صلي الله عليه وسلم خيبر جنگ جي موقعي تي فرمايو ته مان سڀاڻي جهنڊو انهيءَ شخص کي ڏيندس جنهن جي هٿ تي الله تعالي فتح فرمائيندو.۽ اهو الله ۽ رسول کي محبوب رکندو آهي ۽ الله ۽ رسول ان کي محبوب رکندا آهن.جنهن کان پوءِ تمام صحابه اڪرام جي دل جي آرزو هئي ته جيڪر اهو ڪرم عنايت سندن جي نصيب ۾ ٿئي.سندن جون اکيون انهيءَ وقت جي انتظار ۾رهڻ لڳيون ته شل فتح جو جهنڊو عطا ٿي وڃي پر علي المرتضي شير خدا رضي الله عنه جن کي مليو۽ حضور صلي الله عليه وسلم جن فرمايو ته ” علي مون مان آهي ۽ مان علي مان“ انهيءَ مان حضرت علي المرتضيٰ شير خدا رضي الله تعالي عنه جو ڪمال بارگاه رسالت مان ظاهر ٿئي ٿو.حضرت علي شير خدا رضي الله عنه فرمائن ٿا ته”بيشڪ مون کي آقا يارسول الله صلي الله عليه وسلم ٻڌايو ته مون سان ايماندار محبت ڪندا ۽ منافق بغض رکندا.“مديني جي آقا رحمت عالميان صلي الله عليه وسلم فرمايو ته”علي رضي الله تعالي عنه کي ڏسڻ عبادت آهي.۽ جنهن علي کي ايذاءَ ڏنو ان مون کي ايذاءَ ڏنو. حضرت علي المرتضي شير خدا رضي الله تعالي عنه جن وٽان ئي سلسله طريقت جاري ٿين ٿا ۽ سندن جو فيضان نه صرف سلسله عاليه قادريه تائين آهي پر سندن جو فيضان سلسله عاليه نقشبنديه،چشتيه،سهرورديه ۾ پڻ عام و خاص لاءِ يڪجاءَ معرفت الاهيءَ جي رضا سان جاري و ساري آهي.

سيدي مرشدي مولائي ڪائنات حصرت مولا علي مشڪل ڪشا شير خدا رضي الله تعالي عنه جن کي الله جي بارگاه ۾ عجز انڪساري جي معاملي ۾ وڏو شوق جذبو هيو جنهن ڪري ئي نماز فجر جي لاءِ ”صداءِ مدينه“ لڳائڻ لاءِ صبح جو سوير اٿي ٻين مومنن مسلمانن کي به نيڪيءَ جي دعوت ۾ حصيدار بڻائڻ لاءِ ”الصلوات خير من النوم“ نماز ننڊ کان بهتر آهي جي صدا لڳائيندي لڳائيندي مسجد طرف ايندا هئا.جيئن ٻيا مومن به نماز جي تياري ڪري سگهن۽ الله جي بارگاه ۾ انهن کي به رضاءِ الاهيءُ جو موقعو ملي سگهي. شير خدا مولا علي رضي الله عنه جي محبت ايمان ڪامل جو حصو ۽ خاص نشاني آهي جيڪڏهن علي سان محبت ڪندڙ هوندو ته انجي پاڪيزه سيرت پاڪ جو عاشق ۽ پروانو هوندو انجي اهلبيت پاڪ سان پنهنجي تن من ۽ ڌن کان به وڌيڪ محبت ڪندڙ سچو عاشق رسول صلي الله عليه وسلم ئي ٿي سگهي ٿو.عشق ۽ محبت جي خواهش آهي ته مولا علي شير خدا ڪرم الله وجهه الڪريم جي نجف اشرف عراق مقدس جي زيارت نصيب ٿئي ۽ ان پاڪ در جي قدم بوسي سان روحاني رمز نصيب ٿي وڃي هر هڪ مسلمان مومن جي اها تمنا ۽ خواهش آهي ته مڪي ،مديني ،نجف اشرف ۽ ڪربلا مولا جي سعادت نصيب ٿئي.اهي ڏينهن ڪيڏا نه ڀلارا ۽ متبرڪ هوندا جڏهن انهيءَ ڪعبي ۾ ولادت حاصل ڪندڙ هستي جي بارگاهه ۾ حاضري ملي وڃي اها حاضري دنيا ۽ آخرت جو عظيم تحفو آهي شال هر مسلمان مومن کي نصيب ٿي وڃي.

آمين ۽ اهو ياد ڪرڻ کپي ته علي شير خدا رضه کي پنهنجي رب ڪريم جي عبادت ۾ نماز سان بي انتها محبت هوندي هئي جڏهن به آزان ايندي هئي ته نماز جي لاءِ مسجد ڏانهن پهريان پهريان ويندا هئا جيئن پهرين صف ملي وڃي ڇاڪاڻ ته پهرين صف ۾ نماز جي پڙهڻ جو وڏو ثواب ۽ مرتبو احاديث ۾ اچي ٿو.انهي لاءِ نماز جي باري ۾ الله پاڪ جي پياري محبوب صلي الله عليه وسلم جو فرمان آهي ته نماز منهنجي اکين جي ٿڌاڻ آهي،نماز مومن جومعراج آهي،نماز پل صراط تي آسانيءَ جو رستو آهي،نماز براين کان بچائي ٿي نماز ئي آهي جيڪا رب العالمين جي ويجهو پنهنجي ٻانهي کي ڪري عجز انڪساري، عاجزي ،نياز ۽ نوڙت جو درس ملي ٿو.انهيءَ لاءِ حضرت ِ علي شير خدا رضي الله عنه سان محبت ڪندڙ نماز جي پابندي ڪري پنهنجي رب پاڪ جي راضپي جو سبب بڻجي وڃو ۽ انهي ۾ اسان سڀني جي ڀلائي سمايل آهي.

 

راز فاش ڪندڙ جولين اسانج…..(ارشاد)

”جولين اسانز (Julian Assange) وڪي ليڪس جو باني 1971ع ۾ آسٽريليا ۾ پيدا ٿيو. ڪَمسِني ۾ ئي هيڪنگ جي ڏوهه ۾ پوليس کي گهربل هو. پر هن کي عالمي سطح تي مشهوري وڪي ليڪس جي ڪري ملي. اها ويب سائيٽ 2006ع ۾ منظرعام تي آئي، جنهن جو مقصد بين الاقوامي رازن تان پردو هٽائڻ هو. ۽ ان معلومات کي عام ماڻهو جي پهچ ۽ رسائي تائين ممڪن بنائڻو هو، جن کي وڏيون طاقتون يا حڪومتون ڳجهو رکنديون هيون. ان مقصد جي پهرين ڪاميابي تڏهن حاصل ڪئي وئي، جڏهن اپريل 2010ع ۾ اسانز نيشنل پريس ڪلب واشنگٽن ۾ هڪ وڊيو ڏيکاريو، جنهن ۾ 2007ع ڌاري بغداد ۾ هڪ امريڪي اپاچي فوجي هيليڪاپٽر مان 18 عراقين کي قتل ڪندي ڏيکاريو ويو آهي، جن ۾ 2 رائٽرز جا صحافي به شامل آهن. ان کان پوءِ هڪ قدم اڳتي وڌائيندي وڪي ليڪس جولاءِ 2010ع ۾ افغانستان جي جنگ بابت 77 هزار امريڪي فوجي دستاويز ظاهر ڪيا. آڪٽوبر 2010ع ۾ عراق جي جنگ تي 4 لک خفيا دستاويز جاري ڪيا. نومبر 2010ع ۾ وڪي ليڪس پاران امريڪي ڳجهي نيٽ ورڪ جا هزارين خط ماڻهن جي آڏو آڻي ٿرٿلو پيدا ڪيو. بذات خود جولين اسانز سويڊن سرڪار کي گهربل آهي. ڇاڪاڻ ته ان تي ٻن عورتن کي جنسي ڏاڍائي ۽ هوس جو نشانو بنائڻ جا الزام آهن. هن جا انٽرپول وارنٽ به جاري ڪيا آهن. (وڪيپيڊيا)اها مختصر جيون ڪٿا هئي جولين اسانز جي پر هينئر سندس آئنده جي حڪمت عملي جي باري ۾ ٽيڪا ٽپڻي ڪجي ٿي. لڳاتار ٽن سالن کان اسانز لنڊن ۾ ايڪواڊور جي سفارتخاني ۾ سياسي پناهه ورتي آهي ۽ اتي ئي رهيو پيو آهي. هو امريڪا ۽ سويڊن پاران ڪيسن جي پيروي نٿو ڪري. ان سبب هي ٿي سگهي ٿو ته کيس جيڪو حقيقي خطرو آهي، اهو امريڪا کان آهي ۽ مفت ۾ مرڻ جي موڊ ۾ ناهي. هو جُون 2012ع کان ايڪواڊور جي سفارتخاني ۾ اڪيلائي جي زندگي گهاري رهيو آهي. ڄڻ ته هو هڪ جيل ۾ نظربند هجي! اسانز نٿو چاهي ته هو ڪيسن کي منهن ڏئي ۽ ڪنهن ٻوهي ۾ اچڻ جي ڪري سموري عمر جيلن ۾ واڙيو پيو هجي. ان ڪري هو فلمي سين ڪرڻ کان لنوائي ٿو. هينئر به وڪي ليڪس پاران فرانس جي ٽن صدرن جي جاسوسي ڪرڻ جي باري ۾ جيڪي دستاويز ظاهر ڪيا، جنهن ڪري امريڪا ۽ فرانس جي وچ ۾ ڇڪتاڻ پيدا ٿي. وڪي ليڪس جي رپورٽ پڌري ٿيڻ کان پوءِ جيولين اسانز فرانس جي هڪ معتبر اخبار ۾ هڪ خط لکيو هو، جنهن کي فرانس رد ڪري ڇڏيو. وڪي ليڪس (انگريزي) جي ترجمان ڪرسٽين هڪ انٽرويو ۾ سوالن جا جواب ڏيندي ٻڌايو ”هي خط سياسي پناهه جي لاءِ ناهي لکيو ويو، اهو ايئن ناهي جيئن توهان سمجهو ٿا. اخبار ۾ جيڪو کليل خط شايع ٿيو آهي، اهو فرانس جي وزيرِانصاف جي ان حقيقت جي روشني ۾ ڏسڻ گهرجي، جنهن ۾ هن چيو هو ته ڪنهن به سياسي پناهه جي درخواست جي آجيان ڪئي ويندي.فرانس جي 40 کان وڌيڪ معزز حضرات سياسي پناهه لاءِ صدر تي زور ڀريو هو. جيولن ان خيرسگالي حمايت جي مڃتا لاءِ خط لکيو آهي. هڪ قسم جو علامتي اظهار آهي نه ڪي سياسي پناهه جي درخواست آهي.“ ظاهر آهي ته جيولن اسانز هر طريقي جو سياسي ۽ اخلاقي ڌٻاءُ وڌائي هڪ اهڙو ماحول جوڙڻ جي ڪوشش ڪندو، جنهن ۾ هو وڌيڪ آزادي سان پنهنجي پيشاورانا زندگي کي دائم ۽ قائم رکي سگهي، پر ان سان گڏوگڏ پنهنجي مقصد ۽ ترجيحات تي به سولائي سان هلي سگهي. اهو ايڪواڊور جي سفارتخاني ۾ بند وارڊ جهڙي ڪيفيت ۽ ماحول ۾ ٿيڻ ممڪن ناهي! تنهن ڪري فرانس ۾ سياسي پناهه لاءِ اثر و رسوخ وڌائڻ هڪ حڪمت عملي جو حصو چئي سگهجي ٿو. وڪي ليڪس جي باني ۽ ايڊيٽر جيولن پال اسانز فرانس جي صدر ڏانهن لکيل پنهنجي کليل خط ۾ جيڪو مشهور اخبار لي موندي ۾ شايع ٿيو آهي، ان ۾ بيان ڪري ٿو:”صحافتي پيشي ورانا سرگرمين جي نتيجي ۾ امريڪا جي اعليٰ اختيارن موت جي ڌمڪي ڏني.“امريڪا جي اها ڪوشش رهي آهي ته هو پنهنجي بالادستي برقرار رکي هر جائز ۽ ناجائز حربا استعمال ڪري ۽ ان جي باري ۾ ڪوبه کانئس نه پڇي. ڇاڪاڻ ته هو دنيا جو واحد سپر پاور آهي، جنهن کي اهو اختيار آهي ته هو ڇا به ڪري. اهو عمل هڪ اهڙي سوچ جي عڪاسي آهي، جيڪا سرمائيدار ۽ سامراج جي وصف آهي! سامراجي پاليسين جي بدولت امريڪا دنيا کي غلام رکيو آهي.

جيولن اسانز امريڪا جي ان حرڪتن کي ظاهر ڪري رهيو آهي ۽ امريڪا اسانز مٿان ڏمريل آهي ۽ ڪنهن وقت به کيس نقصان پهچائي سگهي ٿو، جنهن جو اظهار اسانز پنهنجي خط ۾ به ڪيو آهي. اسانز وڏي هوشياري ۽ سياڻپ کان ڪم وٺندي جيڪو ڪجهه ڪري ٿو ته جيئن امريڪا جي وار کان بچي سگهجي، هو وقت ۽ حالتن جو انتظار ڪري رهيو ته ماحول بهتر ٿئي ته پوءِ ٻاهر نڪرجي، تيستائين هڪ ڪنڊ ۾ ويهي وقت جو انتظار ڪرڻ دانشمندي آهي!

 

 

ڪرپشن ڪيسن جي ڇنڊڇاڻ به ٿيندي يا نه..

چار ڏهاڪا آمريت جي انڌاري ۾ رهندڙ هن مُلڪ جي جمهوريت پسند اڳواڻن جو جيڪو حال آهي، سو ڄاڻايل نيب واري فهرست مان پڌرو آهي ته اُهي ڪيتري قدر جمهوري قدرن جا پاسدار آهن. ستهٺ سال مڪمل ڪرڻ واري هن مُلڪ جو حال هيءُ آهي جو اڪثريت پيئڻ لائق پاڻيءَ کان محروم آهي، ماڻهو غلاظت ڀريل گهٽين ۽ محلن ۾ رهڻ تي مجبور آهن، صحت سندن زندگين کان جيئن رُٺي آهي ته ورڻ جو نانءُ نه ٿي وٺي. ڪٿي ڏڪار ماڻهن جا ڏيل ڏڪائي ٿو، ڪٿي هيپاٽائيٽس ماڻهن کان سَتُ ساهه ڦري ورتو آهي ته ڪٿي اُرڙي ۽ ٻيا مرض نئون دم ڀري اُٿندا رهن ٿا. سڄي دنيا جي دانهن باوجود مُلڪ مان پوليو جو خاتمو ناممڪن بڻيل آهي، انهيءَ وبا کي روڪڻ ۾ ڪٿي انتظامي غفلت رُڪاوٽ بڻيل آهي ته ڪٿي انتهاپسندي سندو ڪڍي اُن کي وڌڻ جو موقعو فراهم ڪري ٿي. تعليم جيڪا ڪنهن به سماج جي اڏاوت لاءِ بنيادي جُز هوندي آهي، سا اهڙو وکر بڻائي وئي آهي جو حڪمرانن توڙي تعليم سان واڳيل ڪامورن جون پنج ئي گيهه ۾ هُجن ٿيون. تعليم لاءِ بجيٽ ۾ مختص ڪيل رقم هُجي يا دنيا کان ملندڙ فنڊ، تعليم تي خرچ ٿيڻ بجاءِ حصو پتي ٿي وڃن ٿا ۽ حال هيءُ آهي جو لکين ٻار اڄ به پوري مُلڪ ۾ وڻن جي ڇانوَ هيٺ تعليم حاصل ڪرڻ تي مجبور آهن، جنهن سبب جهالت طوفاني رفتار سان وڌندي رهي ٿي. ساڳي صورت ترقياتي مد ۾ پڻ آهي، معدني حوالي سان سُکئي ستابي بلوچستان جي حالت ڏسجي ٿي ته پٿر وارو دؤر ياد پوي ٿو، ساڳيو حشر سنڌ سان پڻ آهي، جيڪا ڪنهن چڱي موچاري منصوبي لاءِ سڪندي رهي ٿي، ٻئي طرف پنجاب آهي جو نت نوان منصوبا متعارف ٿيڻ جون خبرون اينديون رهن ٿيون، موٽر وي کان ميٽرو بس سروس تائين پنجاب کي جديد کان جديد تر بڻائڻ جون ڪوششون ٿي رهيون آهن، جڏهن ته باقي صوبا ڪنهن خاطر ۾ ئي ناهن. اهو سڀ اِن ڪري آهي جو اسان وٽ جمهوري قدرن جي ڪا اهميت ئي ناهي سمجهي ويندي.

پنهنجي وجود کان وٺي اڄ تائين مُلڪ اندر جيڪڏهن جمهوريت مضبوط ٿي نه سگهي آهي ته اُن پٺيان حڪمرانن جو غير جمهوري رويو ئي رهيو آهي، جنهن ۾ رياست کي ذاتي جاگير سمجهي هلائڻ جي ڪوشش ڪئي وئي آهي. ڏسجي ته انهيءَ رويي ئي غير جمهوري قوتن کي سدائين پئي ڪوٺ ڏني آهي ته هُو ڀل جمهوري بساط کي ويڙهي ڇڏين. جيڪڏهن حڪمران جمهوري فلسفي تي عمل ڪندڙ هُجن ها، اُهي حڪومتن کي عوام جي ڀلي ۽ بهتريءَ لاءِ ڪتب آڻين ها ته هوند ههڙي قسم جي رسوائي ڀرين خبرن ٻُڌڻ کان قوم بچي پوي ها، پر بدقسمتي چئجي هن خطي جي، جو مُلڪ جي وجود ۾ اچڻ کان اڄ تائين ڪي آڱرين تي ڳڻڻ جيترن اڳواڻن کي ڇڏي باقي اڪثريت ذاتي مفادن جي پورائي کي ئي سياست تصور ڪري ٿي. هُنن سياست کي مثبت انداز ۾ ڏسڻ جي ضرورت ئي محسوس ناهي ڪئي،آهي، سندن مرضيءَ سان ضلعي توڙي تعلقي سطح جا پوليس آفيسر مقرر ٿين، ٿاڻا توڙي ٻيو سڄو عملو سندن تابع هُجي، اُهي انڌي ڪاڻي کي نوڪريون ورهائي ڏين، اِهو ئي هيستائين سياست جو ڪارج سمجهيو وڃي ٿي. اڄ جيڪڏهن مُلڪي کاتا ماهرن کان محروم آهن، ته ههڙي ٻه اکيائيءَ ئي اُن جو وڏو ڪارڻ آهي. جيڪڏهن ميرٽ کي اوليت ڏني وڃي ها، مُلڪ جي سڀني حصن کي هڪ ئي اک سان ڏٺو وڃي ها ته نه علحدگيءَ جهڙيون تحريڪون سامهون اچن ها نه ئي وري صوبا وفاق کان بدظن ٿين ها. انهن سڀني اڀاڳن جو جيڪڏهن تت ڪڍبو ته اُن ۾ اسان جي سياستدانن جو اُهو غير جمهوري رويو ئي سامهون ايندو، جنهن پٽاندر هُنن ڪڏهن به مُلڪ توڙي عوام جي ڀلي لاءِ ناهي سوچيو، بلڪه هُنن جون سموريون ترجيحون پنهنجي خاندان کي سُکيو ڪرڻ توڙي ذاتي ڏيک ويک تي هُجي ٿي. اهي رويا ئي ميگا ڪرپشن جهڙا ڪُڌا عمل ڪرڻ تي آماده ڪن ٿا. بهرحال، ميگا ڪرپشن واري فهرست قومي احتساب بيورو، مُلڪ جي اعليٰ عدالت ۾ پيش ڪئي آهي، هاڻ ڏسڻو اِهو آهي ته انهيءَ فهرست تحت ڪا ڇنڊ ڇاڻ ٿئي ٿي يا ماضيءَ جيان اِهو قصو وقت جي دز هيٺان دٻجي وڃي ٿو!

 

 

مون کان وڌيڪ ساٿي ادارن کي ڊائيلاگ ملندا آهن ته سٺو ناهي لڳندو: نانا پاٽيڪر

ممبئي (شوبز نيوز) بالي ووڊ اداڪار نانا پاٽيڪر جو چوڻ آهي ته جڏهن ساڻس گڏ ڪم ڪندڙ ٻين اداڪارن کي مون کان وڌيڪ سٺا ڊائلاگ ڏنا ويندا آهن ته مون کي سٺو ناهي لڳندو. فلم ”ويلڪم بيڪ“ ۾ نانا کي انيل ڪپور کانساڙ ٿي پيو آهي. ممبئيءَ ۾ رٿيل ”ويلڪم بيڪ“ جي پريس ڪانفرنس ۾ نانا پاٽيڪر چيو ته غير محفوظ هجڻ جو احساس تڏهن ٿيندو آهي، جڏهن سامهون وارو اداڪار بهتر ڊائلاگ يا کيس پنج لائينون ملن. ان ڳالهه تي منهنجي هدايتڪار انيس بزمي سان به تمام گھڻو بحث ٿيندو هو. انيل ڪپور ۽ نانا پاٽيڪر سنه 1989ع جي هِٽ فلم ”پرنده“ ۾ ڪم ڪرڻ سان گڏ 19 سال کان پوءِ فلم ”ويلڪم“ ۾ ۽ هاڻي ”ويلڪم بيڪ“ ۾ گڏ ڪم ڪري رهيا آهن. نانا چيو ته ”پرنده“ دوران انيڪل ڪپور تمام وڏو اسٽار هو پر ويلڪم ڪندي وقت انيل ڪپور جي صورت ۾ ننڍو ڀاءُ ملي ويو. فلم ”ويلڪم بيڪ“ ۾ انٽرنيشنل ڊان جو ڪردار هاڻي نصير الدين شاهه ادا ڪندو، پهرين ويلڪم ۾ اهو رول ليجنڊري فيروز خان ادا ڪيو هو.

 

سلمان خان جي ”هيرو“ ۽ جان ابراهيم جي ”ويلڪم بيڪ“ هڪ ئي ڏينهن تي رليز ٿينديون

ممبئي (شوبزنيوز) بالي ووڊ جا ٻه ڪامياب اداڪار سلمان خان ۽ جان ابراهيم پنهنجي فلمن جي رليز جي ڪري هڪ ٻئي جي آمهون سامهون اچي ويا آهن. اداڪار جان ابراهيم جي فلم ”ويلڪم بيڪ“ 4 سيپٽمبر تي رليز ڪئي ويندي جنهن جو اعلان هن گذريل ڏينهن ايوينٽ دوران ڪيو هو، پر سلمان خان جي پروڊڪشن ۾ ٺهندڙ فلم ”هيرو“ کي به ان ئي ڏينهن رليز ڪيو پيو وڃي، جنهن جو اعلان تازو ئي سلمان خان سماجي رابطن جي ويب سائيٽ ٽوئٽر تي ڪيو هو. سلمان خان ٽوئٽر تي ان فلم جي رليز تي سڀني کي”پوئتي هٽي وڃڻ“ جي لاءِ چيو هو، جنهن مان اندازو لڳائي سگھجي ٿو ته هو جان ابراهيم کي ان جي فلم جي تاريخ بدلائڻ جو اشارو ڏئي رهيو هو، پر تازو ئي فلم ”ويلڪم بيڪ“ جو ٽريلر رليز وقت فلم جي پروڊيوسر فروز نڊيا والا جو چوڻ هو ته ان فلم جي رليز جي تاري ڪنهن به طريقي نه بدلائي ويندي ۽ فلم 4 سيپٽمبر تي رليز ٿيندي.

 

سونم ڪپور جو پنهنجي نئين ايندڙ فلم ”بٽل آف بٽورا“ جي لاءِ پنهنجو وزن اڃا به گھٽ ڪرڻ جي لاءِ برطانوي شهزادي ڪيٽ ميڊلٽن جي ڊائٽ پلان تي عمل ڪرڻ جو فيصلو

ممبئي (شوبز نيوز) بالي ووڊ اداڪارن ۽ اداڪارائن پاران فلمن ۾ پنهنجي ڪردار تي فٽ بيهڻ لاءِ پاڻ کي سنهون ٿلهو ڪندي ڏٺو هوندو، پر اداڪار انيل ڪپور جي ڌيءُ سونم ڪپور سنهي ۽ سلم هوندي پاڻ کي اڃا به سنهو ڪرڻ جو سوچي رهي آهي. سونم ڪپور برطانيا جي شهزادي ڪيٽ مڊلٽن جي ڊائٽ پلان تي عمل ڪرڻ جو سوچي رهي آهي. سونم ڪپور پنهنجي نئين ايندڙ فلم ”بٽل آف بٽورا“ جي لاءِ پنهنجو وزن اڃا به گھٽ ڪرڻ جي لاءِ برطانوي شهزادي ڪيٽ ميڊلٽن جي ڊائٽ پلان تي عمل ڪرڻ جو فيصلو ڪيو آهي. ان ڊائيٽ پلان کي ”پروٽين شيئرنگ موڊيفائيڊ فاسٽ“ جو نالو ڏنو ويو آهي. ان طريقي ۾ ڪاربوهائيڊيٽس ۽ فيٽن جو استعمال بلڪل به ڇڏي ڏنو ويندو آهي. رڳو معمولي مقدار ۾ پروٽينز جو استعمال ڪيو ويندو آهي جيئن جسماني عضوا ٺيڪ طرح سان ڪم ڪندا رهن.

 

پاڪستان ۽ سري لنڪا جي ڪرڪيٽ ٽيمن وچ ۾ ون ڊي سيريز 11 جولاءِ تي دمبولا ۾ کيڏي ويندي

دمبولا(اسپورٽس نيوز) پاڪستان ۽ سري لنڪا جي ڪرڪيٽ ٽيمن وچ ۾ پنجن هڪ ڏينهن وارين بين الاقومي ميچن تي ٻڌل سيريز جي پهرين ميچ 11 جولاءِ تي دمبولا ۾ کيڏي ويندي. پاڪستاني ٽيم اڄڪلهه سري لنڪا ۾ موجود آهي تي اها ميزبان ٽيم خلاف سيريز کيڏڻ ۾ مصروف آهي، ون ڊي سيريز کان اڳ ٻنهي ٽيمن وچ ۾ کيڏيل ٽيسٽ سيريز نهايت دلچسپ رهي هئي، پاڪستان پهرين ٽيسٽ ۾ سري لنڪا کي شڪست ڏني ته آئي لينڊرز ٻئين ٽيسٽ کٽي سيريز برابر ڪري ڇڏي، ٽئين ۽ فيصلائتي ٽيسٽ ۾ به ٻنهي ٽيمن وچ ۾ زبردست مقابلو ٿيو پر قسمت گرين شرٽس جو ساٿ ڏنو ۽ ان ميزبان ٽيم کي هارائي سيريز 1-2 سان پنهنجي نالي ڪئي.