تازيون خبرون

Daily Archives: July 8, 2015

جاچ 2002 ۾ ڪئي وئي مهلت 2015 ۾ گهري پئي وڃي: سپريم ڪورٽ

اسلام آباد (بيورو) سپريم ڪورٽ، ميگا ڪرپشن ڪيسز بابت نيب جي رپورٽ تي بي اعتمادي ظاهر ڪندي سومر تي ٻيهر تفصيلي رپورٽ پيش ڪرڻ جو حڪم ڏئي ڇڏيو، عدالت نيب پاران ايم سي بي جي نجڪاري بابت مهلت ڪرڻ تي سخت ڪاوڙ ظاهر ڪندي چيو آهي ته جاچ 2002 ۾ ڪئي وئي، مهلت 2015 ۾ گهري پئي وڃي. جسٽس جواد ايس خواجه جي سربراهي ۾ سپريم ڪورٽ جي ٽي رڪني بينچ نيب جي ڪارڪردگي بابت ڪيس جي ٻڌڻي ڪئي، جنهن دوران نيب ڏيڍ سئو ميگا ڪرپشن اسڪينڊلز بابت رپورٽ عدالت ۾ جمع ڪرائي. نيب رپورٽ موجب، مالي بي ضابطگين جا 22 ڪيس جاچ جي مرحلي ۾ آهن، جڏهن ته 50ڪيس مالي بي ضابطگين ۽ 50 مالي اسڪينڊل جا آهن. رپورٽ موجب، اختيارن جي ناجائز استعمال بابت ٽوٽل 50 ڪيس آهن، جن مان 20 ڪيسز جي جاچ ڪئي پئي وڃي،  جڏهن ته اختيارن جي غلط استعمال تي بلوچستان جي اڳوڻي وڏي وزير اسلم رئيساني خلاف به جاچ ڪئي پئي وڃي. نيب رپورٽ موجب، وزيراعظم نواز شريف خلاف ايف آءِ اي ۾ ڀرتين ۽ اختيارن جي غلط استعمال، آصف علي زرداري ۽ آفتاب شيرپائو خلاف وڌيڪ اثاثا ٺاهڻ سميت ناڻي واري وزير اسحاق ڊار خلاف مني لانڊرنگ معاملي جي جاچ هلي رهي آهي. رپورٽ موجب،ا ڳوڻن وزيراعظم يوسف رضا گيلاني، راجا پرويز اشرف، حسين حقاني، فردوس عاشق اعواڻ، اوگرا جي اڳوڻي چيئرمين توقير صادق، اي او بي جي اڳوڻي چيئرمين ظفر گوندل ۽ ٻين خلاف جاچ ٿي رهي  آهي.  سپريم ڪورٽ نيب جي رپورٽ تي بي اعتمادي ظاهر ڪندي هدايت ڪئي ته سومر تي ٻيهر تفصيلي رپورٽ جمع ڪرائي وڃي. ٻڌڻيءَ دوران عدالت جي پڇاڻي تي نيب پاران ايم سي بي بينڪ نجڪاري بابت جاچ لاءِ 4 هفتن جي مهلت طلب ڪئي وئي، جنهن تي عدالت سخت ڪاوڙ جو اظهار ڪيو. جسٽس مقبول باقر ريمارڪس ۾ چيو ته بينڪ جي نجڪاري تي نيب اڳ ئي 2002 ۾ جاچ ڪري چڪو آهي،جاچ بعد هاڻي مهلت ڇو پئي گهري وڃي، جاچ 2002 ۾ ٿيل جاچ صحيح نه هئي.

 

صوبائي حڪومت جي راضپي کانسواءِ رينجرز جي اختيارن ۾ واڌ ممڪن ناهي: وڏو وزير

ڪراچي (اسٽاف رپورٽر) وڏي وزير سيد قائم علي شاهه چيو آهي ته صوبائي حڪومت جي راضپي کانسواءِ رينجرز جي اختيارن ۾ واڌ ممڪن ناهي، اهڙو ڪو به فيصلو ناهي ٿيو، رينجرز جي اختيارن واري معاملي تي هو اسيمبلي ۾ ويندا. ڪراچي ۾ ميِڊيا سان ڳالهائيندي وڏي وزير سيد قائم علي شاهه چيو ته رينجرز جي اختيارن ۾ واڌ لاءِ اسيمبلي مان منظوري وٺڻ ضروري آهي، اختيارن ۾ واڌ جو فيصلو حڪومت جي رضامندي سان ڪيو ويندو،  رينجرز جي معاملي تي آرمي چيف جي رهنمائي حاصل آهي. وڏي وزير چيو ته رينجرز جي اختيارن ۾ واڌ سنڌ سرڪار جي مرضي کانسواءِ نه ٿيندي، قانوني ماهرن سان مشاورت کانپوءِ رينجرز جي اختيارن واري معاملي تي هو اسيمبلي ۾ ويندا. هن چيو ته ڪراچي ۾ امن امان جي صورتحال بهتر ٿي رهي آهي، رينجرز جي ڪردار کان انڪار نٿو ڪري سگهجي، پوليس ۽ رينجرز گڏجي امن امان لاءِ ڪم ڪري رهيون آهن. قائم علي شاهه وڌيڪ چيو ته صفورا سانحي جي جوابدارن کي هنن گرفتار ڪيو آهي، هاڻ عدالتن جو ڪم آهي ته انهن کي سزائون ڏين. وڏي وزير چيو ته ڪراچي ۾ آبادي وڌي رهي آهي، جنهن سان مسئلا به وڌي رهيا آهن، سمورن مسئلن کي حل ڪيو ويندو

 

ڀارت سميت سمورن پاڙيسري ملڪن سان پـُر امن لاڳاپا چاهيون ٿا: وزيراعظم

اوسلو/اسلام آباد (م.ڊ/ بيورو) وزيراعظم نواز شريف چيو آهي ته  ڀارت سميت سمورن پاڙيسري ملڪن سان پـُر امن لاڳاپا چاهيون ٿا، ٻنهي ملڪن کي پر امن رابطو قائم ڪري ويڇا ختم ڪرڻ گهرجن. روسي خابرو اداري کي انٽرويو ڏيندي وزيراعظم نواز شريف چيو ته پاڪستان ايٽمي طاقت آهي ۽ عالمي قانونن جي پاسداري ڪري رهيو آهي. هن چيو  پاڪستان توانائي بحران جي حل لاءِ ڪوششون ڪري رهيو آهي، روس ۽ پاڪستان به توانائي شعبي ۾ هڪٻئي سان سهڪار ڪريرهيا آهن.  پاڪ ڀارت لاڳاپن بابت سوال جي جواب ۾ وزيراعظم نواز شريف چيو ته ٻنهي ملڪن کي پر امن رابطو ڪرڻ گهرجي. وزيراعظم چيو ته پاڪستان ڀارت سميت سمورن پاڙيسري ملڪن سان بهتر لاڳاپا چاهي ٿو. وزيراعظم محمد نوازشريف چٽن لفظن ۾ واضح ڪيو آهي ته ايٽمي توانائي جي سلامتي ۽ حفاظت جو پاڪستان کي 40 سالن جو تجربو آهي پاڪستان جي ايٽمي اثاثن تائين دهشتگردن جي پهچ بابت خبرون بي بنياد آهن هي پروپيگنڊا جو حصو آهي هي سڀ بي بنياد ڳالهيون آهن معاشي ترقي لاءِ پاڪ ڀارت لاڳاپا بهتر ٿيڻ ضروري اهن شنگهائي تعاون تنظيم پاڪ ڀارت لاڳاپا بهتر ڪرڻ ۾ ڪردار ادا ڪري وزيراعظم چٽن لفظن ۾ چيو ته پاڪستان جا ايٽمي اثاثا محفوظ هنٿن ۾ آهن دهشتگردن جي اثاثن تائين پهچ بابت افواهه بي بنياد آهن هلندڙ سال 14 مئي تي آمريڪي ڪانگريس پاران جاري رپورٽ ۾ پاڪستاني ايٽمي اثاثن بابت خدشن تي وزرياعظم چيو ته پاڪتان ايٽمي توانائي جي عدم ڦهلاءَ بابت قائدن ۽ ضابطن تي سختي سان ڪاربند آهي.

 

حڪومت کي چونڊون ناهن ڪرائڻيون ته ٻڌائي ڇڏي، واضح جواب نه آيو ته عدالت پاڻ حڪم جاري ڪندي: جسٽس جواد ايس خواجه

اسلام آباد (بيورو) سـُپريم ڪورٽ، اسلام آباد ۾ مڪاني چونڊن نئين يا پراڻي قانون تحت ڪرائڻ بابت حڪومت کان سڀاڻي تائين واضح ۽ لکت ۾ جواب داخل طلب ڪري ورتو، جسٽس جواد ايس خواجه ريمارڪس ۾ چيو آهي ته اسلام آباد ۾ مڪاني چونڊون ڪرائڻ بابت اٽارني جنرل کي مهلت ڏيڻ واري غلطي کليل عدالت ۾ تسليم ڪيان  ٿو، حڪومت کي چونڊون ناهن ڪرائڻيون ته ٻڌائي ڇڏي، واضح جواب نه آيو ته عدالت پاڻ حڪم جاري ڪندي. جسٽس جواد ايس خواجه جي سپريم ڪورٽ جي ٽـَي رڪني بينچ اسلام آباد ۾ مڪاني چونڊن بابت ڪيس جي ٻڌڻي  ڪئي. ٻڌڻيءَ دوران جسٽس جواد ايس خواجه، ايڊيشنل اٽارني جنرل کان سوال ڪيو ته اسلام آباد ۾مڪاني چونڊن بابت قانون جو ڇا ٿيو؟. ايڊيشنل اٽارني جنرل عدالت کي ٻڌايو ته سينيٽ جي گهرو معاملن بابت اسٽينڊنگ ڪميٽي مڪاني قانون بابت پنهنجي رپورٽ سينيٽ ۾ پيش ڪري ڇڏي آهي، سينيٽ جو اجلاس جاري آهي، جلد بل منظور ٿي ويندو. جسٽس شيخ عظمت سعيد ريمارڪس ڏنا ته مڪاني چونڊون آئيني معاملو آهي پر وفاق جي سنجيدگي نظر نٿي اچي، ايترو اهم معاملو اناڙين جي هٿ ۾ ڪيئن ڏنو ويو آهي.؟ ايڊيشنل اٽارني جنرل چيو ته حڪومت مڪاني چونڊون ڪرائڻ لاءِ سنجيده آهي پر اليڪشن پارٽي يا غير جماعتي بنيادن تي ڪرائڻ واري معاملي تي مسئلا پيدا ٿي رهيا آهن. جسٽس جواد ايس خواجه ريمارڪس ۾ چيو ته مڪاني چونڊون پارٽي يا غير جماعتي بنيادن تي ٿيڻ الڳ ڳالهه آهي، مڪاني چونڊن جو مقصد هيٺين سطح تي اختيار منتقل ڪرڻ آهي. جسٽس جواد ريمارڪس ۾ وڌيڪ چيو ته آئين جي آرٽيڪل هڪ سئو چاليهه اي ۾ مڪاني چونڊن بابت وضاحت آهي، جيڪڏهن ان ۾ڪو خال آهي ته ڪيئن پورو ڪري سگهجي. درخواستگذار جي وڪيل عدالت کي آگاهي ڏني ته اسلام آباد ۾ مڪاني چونڊون ڪرائڻ لاءِ 2002 وارو قانون موجود آهي، جنهن تي عدالت حڪم ڏنو ته 2002 جي مڪاني قانون وارو نوٽيفڪيشن پيش ڪيو وڃي. ڪيس جي ٻڌڻي وقفي بعد ٻيهر شروع ٿي ته ايڊيشنل اٽارني جنرل عدالت کي ٻڌايو ته 2002 جي مڪاني چونڊن واري قانون جو نوٽيفڪيشن جاري ناهي ڪيو ويو. جسٽس جواد ايس خواجه ريمارڪس ڏنا ته ڇا اسلام آباد جي 24 لک ماڻهن کي پنهنجي راءِ استعمال ڪرڻ جو حق ناهي، چونڊون 1979 واري قانون تحت به ڪرائي سگهجن ٿيون، حڪومت کي رڳو هڪ نوٽيفڪيشن جاري ڪرڻو هوندو آهي.ايڊيشنل اٽارني جنرل چيو ته جيڪڏهن 1979 واري قانون تحت چونڊ ڪرائي وڃي ته رڳو ٻهراڙي وارن علائقن ۾ ٿي سگهندي، 2002 واري قانون تحت  شهر ۽ ٻهراڙي ۾ چونڊ ڪرائي سگهجي ٿي. جسٽس جواد ايس خواجه ريمارڪس ڏنا ته اٽارني جنرل جي خاطرين تي مڪاني چونڊن بابت مهلت ڏيڻ واري غلطي هـُو کليل عدالت ۾ تسليم ڪري ٿو.عدالت، اٽارني جنرل کي حڪم ڏنو ته اسلام آباد ۾ مڪاني چونڊون ڪهڙي قانون تحت ٿينديون، ان حوالي سان سڀاڻي تائين لکت ۾ ٻڌايو وڃي، جيڪڏهن حڪومت جو مناسب جواب نه آيو ته عدالت پاڻ حڪم جاري ڪندي.

 

عمران خان پنجاب جي اڳوڻي نگران وڏي وزير نجم سيٺي تي عام چونڊون 2013 ۾ڌانڌلي جو الزام معافي وٺڻ جو مطالبو

اسلام آباد (اين اين آءِ) پاڪستان تحريڪ انصاف جي چيئرمين عمران خان پنجاب جي اڳوڻي نگران وزرياعليٰ نجم سيٺي کي عام چونڊون 2013 ۾ ڌانڌلي جو الزام هڻندي ان کان  مطالبو ڪيو ته هو قوم کان معافي وٺي هڪ انٽرويو ۾ پنجاب ۾ نگران حڪومت قائم ٿيڻ کان پوءِ ٿيندڙ بدلين بابت پڇيل سوال تي چيئرمين تحريڪ انصاف چيو ته نجم سيٺي وڏو چالاڪ ماڻهو آهي ۽ چونڊن ۾ هن نه گهرو سيڪريٽري کي تبديل ڪيو ۽ پولنگ اسٽيشن جو 50 سيڪڙو اسٽاف به ايجوڪيشن جي کاتي مان مقرر ڪيو ويو هن اهو به الزام مڙهيو ته حڪومت نجم سيٺي کي ڪيتريون مراعتون ڏنيون ۽ کيس پي سي بي جو چيئرمين بڻائي فائدا پهچايا ويندا عمران خان چيو ته سڀ کان منظم ڌانڌلي پنجاب صوبي ۾ ڪيون ويون جتي اضافي بيلٽ پيپرز جي پرنٽنگ ڪرائي ويئي ۽ ان جو هو اڳ به ذڪر ڪري چڪو اهي عمران خان چيو ته 35 پنچر جي ڳالهه سڀ کان پهريان مرتضي پويا ڪئي هئي جيڪا نوازشريف جي وچ ۾ ٿيندڙ هڪ ٽيليفون ڪال جي بنياد تي هئي ۽ خود مرتضيٰ پويا تازو ئي پنهنجي هڪ وڊيو بيان ۾ ان جي تصديق ڪئي هئي. عمران خان يو ته 35 پنچر واري ڳالهه تي ان جي ٻي سورس ڊاڪٽر اعجاز آهي جيڪو لنڊن ۾ آهي ۽ هن هي فون ڪال جي ٽيپ خود ٻڌي هئي.

 

ڪراچي جي مختلف علائقن ۾ فائرنگ جي واقعن ۾ سب انسپيڪٽر ۽ بينڪ مينيجر سميت 7 ڄڻا مارجي ويا

ڪراچي (اسٽاف رپورٽر) ڪراچي جي مختلف علائقن ۾ فائرنگ جــَي واقعن ۾ پوليس سب انسپيڪٽر، بينڪ مينيجر ۽ عورت سميت 7 ڄڻا مارجي ويا، جڏهن ته پوليس ۽ رينجرز مختلف ڪارروائين دوران 10 کان وڌيڪ جوابدارن کي گرفتار ڪري ورتو. نارٿ ناظم آباد ۾ عبدالله ڪاليج ڀرسان گاڏي تي اڻڄاتل هٿياربندن فائرنگ ڪري ڏني جنهن جي نتيجي ۾سب انسپيڪٽر عمران مارجي ويو. ايس ايس پي سينٽرل جو چوڻ آهي ته ايئن لڳي رهيو آهي ته قتل جو واقعو گاڏي کسڻ جي ڪوشش دوران پيش آيو پر وڌيڪ جاچ جاري آهي. نارٿ ڪراچي ۾ يو پي موڙ ويجهو موٽر سائيڪل سوار جوابدارن ڪار تي فائرنگ ڪري ڏني، جنهن جي نتيجي ۾ شيخ نذير الدين نالي شخص سخت زخمي ٿي پيو، جيڪو اسپتال ۾ علاج دوان فوت ٿي ويو. شيخ نذير الدين گلبرگ جي علائقي فيڊل بي ايريا جو رهواسي ۽ نيشنل بينڪ جو مينيجر هو. گلبرگ ٿاڻي جي علائقي عائشه منزل چورنگي ويجهو اڻڄاتل هٿياربندن جي فائرنگ ۾ زخمي ٿيل شخص عباسي شهيد اسپتال ۾ زخمن جا سور نه سهندي فوت ٿي ويو. پوليس موجب مقتول جي سڃاڻپ 40 ورهين جي بخت زمان ولد شمشير خان جي نالي سان ڪئي وئي. ڪلري ٿاڻي جي علائقي نيازي چوڪ وٽ موٽر سائيڪل تي سوار ٽن هٿياربندن فائرنگ ڪري هڪ شخص کي قتل ڪري ڇڏيو. مقتول جي سڃاڻپ 60 ورهين جي بادل ولد سومار جي نالي سان ٿي جيڪو خالي گودام جو چوڪيدار هو. سوڪ سينٽر ويجهو واقع واٽر بورڊ ڪالوني ۾ خالي پلاٽ مان ڪپڙن ۾ ويڙهيل 40 ورهين جي اڻڄاتل عورت جو لاش مليو. سپر هاءِ وي جنجال ڳوٺ موڙ ويجهو فائرنگ سبب 21 ورهين جو عبدالرزاق ولد نديم خان مارجي ويو، مقتول نادرن باءِ پاس افغان ڪئمپ ڀرسان بهادر ڳوٺ جو رهواسي هو ۽ گلشن اقبلا بلاڪ تيرنهن ڊي ۾ موٽر سائيڪل مڪينڪ جو ڪم ڪندو هو. ٻئي طرف پوليس مسلم ڪالوني ۽ ڪوثر ڪالوني ڪارروائين دوران 10 جوابدارن کي گرفتار ڪري ورتو جڏهن ته نيو ڪراچي جي علائقي گوڌرا ۾ رينجرز ڪارروائي ڪئي جنهن دوران ڪيترن ئي شڪي جوابدارن کي حراست ۾ ورتو ويو.

 

اليڪشن ڪميشن سياسي جماعتن جي اثاثن جا تفصيل جاري ڪري ڇڏيا

اسلام آباد (بيورو) اليڪشن ڪميشن سياسي جماعتن جي اثاثن جا تفصيل جاري ڪري ڇڏيا آهن، ايم ڪيو ايم 21 ڪروڙ 88 لک سالياني آمدني ظاهر ڪري سڀ کان امير پارٽي طور سامهون آئي آهي. اليڪشن ڪميشن موجب ملڪ ۾ ڪُل 307 سياسي جماعتون رجسٽرڊ آهن، جن مان 73 جماعتن مالي سال 2013، 14 جي اثاثن جا تفصيل جمع ڪرايا آهن. اليڪشن ڪميشن موجب ايم ڪيو ايم پنهنجي سالياني آمدني 21 ڪروڙ 88 لک ۽ خرچ 21 ڪروڙ 21 لک ظاهر ڪيو آهي. حڪمران ڌر ن ليگ صرف هڪ ڪروڙ 67 لک آمدني ظاهر ڪري پاڻ کي غريب ڏيکاري ڇڏيو، ن ليگ پنهنجو ساليانو خرچ 3 ڪروڙ 7 لک رپيا ڏيکاريو آهي. تحريڪ انصاف پنهنجا ڪل اثاثا 9 ڪروڙ 15 لک رپيا ظاهر ڪيا آهن، جڏهن ته سالياني آمدني 10 ڪروڙ 27 لک ۽ خرچ 16 ڪروڙ 17 لک رپيا ظاهر ڪيو آهي. پ پ پنهنجي سالياني آمدني هڪ ڪروڙ 45 لک ۽ خرچ 2 ڪروڙ 54 لک ڏيکاريو آهي، قومي عوامي تحريڪ 8 لک 29 هزار ۽ خرچ به 8 لک 29 هزار ظاهر ڪيو آهي، جڏهن ته جماعت اسلامي 76 لک سالياني آمدني ظاهر ڪئي آهي.

 

ڪراچي جي وڏي حصي ۾ بجلي جو بريڪ ڊائون، شهر اونداهي جي ور چڙهي ويو

ڪراچي(م.د) ڪراچي شهر جي وڏي حصي ۾ بجلي جو بريڪ ڊائون، بريڪ ڊائون سبب شهر جا ڪيترائي علائقا اونداهي جي ور چڙهي ويا، ڪي اليڪٽرڪ جي ترجمان موجب بن قاسم پاور پلانٽ ۾ خرابي سبب هي بريڪ ڊائون ٿيو آهي، بريڪ ڊائون جي ڪري ڪرچي جا مختلف علائقا گلستان جوهر، گلشن اقبال، گلشن جمال، ڊالميا، ڪارساز، اولڊ سٽي ايريا، صدر، ڪيماڙي، لياري سميت ٻين ڪيترن ئي علائقن ۾ بجلي جي فراهم معطل ٿي وئي.

 

ڪراچي، حيدرآباد ۽ سکر ۾ ٻيلهه سواري تي 2 ڏينهن لاءِ پابندي لاڳو، نوٽيفڪيشن جاري

ڪراچي(اسٽاف رپورٽر) ڪراچي، حيدرآباد ۽ سکر ۾ موٽر سائيڪل جي ٻيلهه سواري تي 2 ڏينهن لاءِ پابندي لاڳو ڪئي وئي، گهرو وزير جي ترجمان موجب ٻيلهه سواري تي پابندي جو نوٽيفڪيشن جاري ڪيو ويو اهي، جنهن جو اطلاق 8 ۽ 9 جولائي تي ٿيندو، موٽر سائيڪل جي ٻيلهه سواري تي پابندي قلم 144 جي تحت  هوندي، جڏهن به ٻار، عورتون، بزرگ، صحافي ۽ قانون لاڳو ڪندڙ ادارا ان پابندي کان آجا هوندا.

 

ايف آئي اي، نيب ۽ رينجرز کي صوبائي معاملن ۾ مداخلت بند ڪرڻ گهرجي: منظور وساڻ

ڪراچي (اسٽاف رپورٽر) خوراڪ کاتي جي صوبائي وزير منظور حسين وساڻ چيو آهي ته صوبي ۾ ڪرپشن ڪندڙن خلاف سنڌ حڪومت ڪارروائيون ڪري رهي آهي ايف آئي اي، نيب ۽ رينجرز کي صوبائي معاملن ۾ مداخلت بند ڪرڻ گهرجي ٻي صورت ۾ صوبن اندر احساس محرومي وڌي ويندي. ڪراچي ۾ پريس ڪانفرنس ڪندي منظور وساڻ چيو ته اينٽي ڪرپشن اسٽيبلشمنٽ ۾ وزير جا ڪي به اختيار ناهن، اهو ڊي سي ۽ ڪمشنر ڪرپشن ڪندڙ تپيدارن خلاف ڪهڙي ڪارروائي ڪندا تنهنڪري اينٽي ڪرپشن کي بااختيار ادارو بڻايو وڃي. هن چيو ته ڪڻڪ جي خريداري دوران 15 لک بارداڻو غريب آبادگارن کي ڏنو ويو، پر جيڪڏهن آبادگارن سان ناانصافي ڪئي وئي آهي ته معاملي جي جاچ ڪرائي ويندي. صوبائي وزير چيو ته ڪڻڪ جي خريداري جو ٽارگيٽ 5 لک هو جيڪو پورو ڪيو جڏهن ته ست لک ميٽرڪ ٽن ڪڻڪ سنڌ حڪومت وٽ اڳ ۾ ئي موجود هئي. منظور وساڻ جو چوڻ هو ته وفاقي حڪومت پاران يوڪرين مان ست لک ميٽرڪ ٽن ڪڻڪ گهرائڻ سبب آبڪلاڻي جي مند ۾ گدامن کان ٻاهر پيل ڪڻڪ خراب ٿيڻ جو خطرو آهي. هڪ سوال جي جواب ۾ خوراڪ واري وزير چيو ته گهوٽڪي ضلعي ۾ ڪڻڪ جون 4 لک 16 هزار ٻوريون خرد برد ڪرڻ واري معاملي جي جاچ جو حڪم ڏئي ڇڏيو آهي..منظور وساڻ وڌيڪ چيو ته خوراڪ کاتي ۾ بهتري آڻڻ لاءِ ڪارين رڍن خلاف ڪارروائي ڪئي ويندي، ڪرپشن ۾ ملوث ڪنهن به عملدارن کي بخش نه ڪيو ويندو..