تازيون خبرون

Daily Archives: July 7, 2015

تعليم لاءِ پتوڙيندڙ آسو ٻائي سان وڏيرن جو انتقام شروع

 

تعليم لاءِ پتوڙيندڙ آسو ٻائي سان  وڏيرن جا وڏيرا پاڙڻ وارا انوکا طريقا ۽ انتقام وٺڻ شروع ٿي ويا، بودر فارم پوليس ڪمدار ڪندي آسو ٻائي جي سئوٽ 45 ورهين جي پونجو عرف ارجڻ کي ڊگڊگي مشين جي چوري الزام ۾ گرفتار ڪري رمانڊ وٺي ڇڏيو آهي، فريادي نياز محمد دلواڻي پونجو ڪولهي ۽ ڀٽو ڪولهي تي مشين ۽ پائيپ چوري ڪرڻ جو ڪيس داخل ڪرايو آهي، بودر فارم پوليس موجب پونجو مل ڀيل جو رڪشو واردات ۾ استعمال ڪيو ويو آهي، جڏهن ته پوليس علي محمد ۽ مبارڪ دلواڻي کي به گرفتار ڪيو آهي، هوڏانهن آسو ٻائي ميڊيا کي ٻڌايو ته پونجو مل  ڪولهي سندس سئوٽ آهي گذريل 7 ڏينهن کان پونجو ڪولهي جو خاندان فاقاڪشي جو شڪار آهي ۽ ڪوبه انهن جي سار سنڀال ڪرڻ وارو ڪونهي، هن ٻڌايو ته ڪوڙو چوري جو الزام مڙهي منهنجي سئوٽ کي ڦاسايو ويو آهي، وڏيرا هرو ڀرو اسان کي تنگ پيا ڪن ۽ پريشان ڪري رهيا آهن، هن چيو ته اصل جوابدارن کي گرفتار ڪرڻ بجاءِ پوليس بي گناهه پونجو ڪولهي کي گرفتار ڪيو آهي، اعليٰ اختياريون نوٽيس وٺن.

ضرورت ان ڳالهه جي آهي ته اعليٰ اختياريون هن معاملي جي جانچ صحيح نموني ڪرائي اصل حقيقتن کي وائکو ڪن ۽ تعليم لاءِ پتوڙيندڙ آسو ٻائي کي تحفظ فراهم ڪن ته جيئن آسو ٻائي پاران شروع ڪيل تعليم سان غريب طبقي جا ٻار پڙهي سگهن ۽ آسو ٻائي کي مختلف طريقن سان پريشان ڪندڙن خلاف ڪارروائي ڪئي وڃي ته جيئن ڪو به نيڪ ڪم ڪندڙن آڏو رڪاوٽ نه بڻجي سگهي.

 

بلدياتي چونڊن لاءِ جُڙندڙ نيون سياسي صف بنديون؛واحد پارس هيسباڻي

اسان وٽ جڏهن به اليڪشن جو موقعو ويجهو ايندو آهي ته نيون سياسي صف بنديون جُڙڻ شروع ٿي وينديون آهن. جتي ڪيترائي پراڻا اتحادي گڏجي ويندا آهن اتي ڪيترائي نوان اتحاد پڻ جڙندا آهن. هر ڌر جي پوري پوري ڪوشش هوندي آهي ته اليڪشن ۾ اُها ئي اڪثريت سان ڪاميابي ماڻي. ڊگهي انتظار کانپوءِ هاڻي جڏهن سنڌ ۾ بلدياتي چونڊن جو ماحول جڙڻ شروع ٿيو آهي ته ان حوالي سان سرگرمين ۾ به جيئن پوءِ تيئن تيزي اچي رهي آهي. هڪڙيون ڌريون ته اهڙيون آهن جيڪي سنڌ ۾ ووٽ بئنڪ  رکن ٿيون ۽ ٻيون ڌريون اهڙيون آهن جن جا سنڌ ۾ ته تمام گهٽ ووٽ آهن پر اُهي ٻين صوبن ۾ ووٽ رکن ٿيون. هن موقعي تي ووٽ بئنڪ رکندڙ ۽ نه رکندڙ ڌريون حڪومت مخالف ايجنڊا تي وسيع پئماني جو اتحاد جوڙي اقتداري معاملن ۾ اڳڀرائي ڪنديون آهن ۽ ان ذريعي حڪومت مٿان پريشر وڌائينديون آهن.  بلدياتي چونڊن جو موقعو جيئن جيئن ويجهو اچي رهيو آهي پاڻ وٽ تيئن تيئن ماحول گرم ٿي رهيو آهي ۽ رابطن ۽ ڳالهين جا نوان دور هلي رهيا آهن. اليڪشن جي موقعي تي خاص ڪري مسلم ليگ جي مختلف ڌڙن جون سرگرميون ڏسڻ وٽان هونديون آهن ۽ انهن کي هڪ پليٽ فارم تي گڏ ڪرڻ جون ڪوششون شروع ٿي وينديون آهن جيڪو هينئر به نظر اچي رهيو آهي. ان سلسلي ۾ هن ڀيري فنڪشنل ليگ اڳيان اڳيان آهي ۽ اُها بلدياتي چونڊن جي حوالي سان نه رڳو مسلم ليگ جي انهن ڌڙن کي هڪ پليٽ فارم تي گڏ ڪرڻ جي ڪوشش ۾ مصروف آهي جيڪي سندس هم خيال آهن. پر قومپرستن سميت حڪومت مخالف ٻين پارٽين کي به گڏ ڪرڻ جي ڪوشش ڪري رهي آهي. ان حوالي سان تازو فنڪشنل ليگ سنڌ جي صدر سيد صدر الدين شاهه جي حيدرآباد ۾ ميڊيا سان ڪيل ڳالهه ٻولهه کي وڏي اهميت جي نگاهه سان ڏٺو پيو وڃي. هن ميڊيا سان ڳالهائيندي ايندڙ بلدياتي چونڊن ۾ مخالف ڌرين جو گڏيل اتحاد قائم ڪرڻ جو اعلان ڪيو آهي. سندس چوڻ آهي ته ان اتحاد ۾ نه رڳو مسلم ليگ جي مختلف گروپن کي شامل ڪيو ويندو پر قومپرست جماعتن کي به شامل ڪيو ويندو. فنڪشنل ليگ جي صوبائي صدر سنڌ ۾ ٿيل نئين تڪبندين تي به پنهنجا تحفظات ڏيکاريا آهن. اڳوڻي صدر پرويز مشرف بابت سندس چوڻ آهي ته هن جي چونڊ وڙهڻ تي پابندي لڳل آهي، جيستائين هو انهيءَ معاملي کان آجو نه ٿو ٿئي، تيستائين ڪا به ڳالهه چوڻ وقت کان اڳ آهي.هڪ طرف فنڪشنل ليگ اهڙي قسم جو گڏيل اتحاد قائم ڪرڻ جي ڪوشش ۾ مصروف آهي ته ٻئي طرف ٻيون ڌريون به اهڙي ڪوشش ۾ مصروف آهن، جن ۾ ڪافي ڏينهن کان مشرف جو نالو به ٻڌجي رهيو آهي ته سندس سرواڻيءَ ۾ مسلم ليگ جي مختلف ڌڙن کي گڏ ڪرڻ جي ڪوشش ٿي رهي آهي. مسلم ليگ ن، تحريڪ انصاف ۽ قومپرست جماعتن بابت به اهي خبرون سياسي مارڪيٽ ۾ گردش ڪري رهيون آهن ته اهي   پڻ بلدياتي چونڊن ۾ سنڌ جي حڪمران پارٽي کي ٽف ٽائيم ڏيڻ لاءِ پنهنجي پنهنجي حساب سان اتحاد جوڙڻ جي تيارين ۾ مصروف آهن. ٻئي پاسي پيپلزپارٽي به ان صورتحال کي سامهون رکندي پنهنجي حڪمت عملي جوڙڻ جي شروعات ڪري ڇڏي آهي. بلاول ڀٽي جي سياسي سرگرمين ۾ آيل هن اضافي کي بلدياتي چونڊن واري ان پس منظر سان به ڳنڍيو پيو وڃي. چيو پيو وڃي ته پيپلزپارٽي نه رڳو سنڌ ۾ ساڳي اڪثريت سان ڪامياب ٿيڻ چاهي ٿي پر پنجاب ۾ به اها ڪسر ڪڍڻ چاهي ٿي، جيڪا گذريل عام چونڊن دوران رهجي وئي. جنهن جي نتيجن کانپوءِ ائين محسوس ٿيڻ لڳو ته شايد پنجاب مان پ پ جي تڏا ويڙهه ٿي وئي آهي نه صرف پارٽيءَ جو چيئرمين پر شريڪ چيئرمين به پنجاب تي گهڻو فوڪس ڪري رهيو آهي، سندن ڪوشش ڪئي آهي ته پنجاب مان گهٽ ۾ گهٽ ايتريون سيٽون ضرور حاصل ڪجن جو اُهو ثابت ڪري سگهجي ته اُتي پيپلزپارٽي جو اثر اڃان تائين موجود آهي. جيتوڻيڪ پيپلزپارٽي کي هڪڙو وڏو چئلينج پنجاب سان واسطو رکندڙ سينئر پارٽي جي اڳواڻن ۽ ڪارڪنن طرفان پارٽي ڇڏڻ وارو به آهي پر جهڙي نموني بلاول ڀٽو سرگرم نظر اچي رهيو آهي ۽ ناراض اڳواڻن ۽ ڪارڪنن جون ناراضگيون ختم ڪري کين پاڻ سان گڏ کڻي هلڻ جون ڪوششون ڪري رهيو آهي ان کي ڏسي ان ڳالهه جا امڪان گهڻا آهن ته هن صورتحال تي ڪنٽرول ٿي ويندو. اهو به ممڪن آهي ته پارٽي ڇڏي ويلن کي راضي ڪري وري پارٽي ۾ واپس آندو وڃي يا وري انهن جي جڳهه تي انهن سينئر اڳواڻن ۽ ڪارڪنن کي موقعو ڏنو وڃي جن کي هينئر تائين نظرانداز ڪيو پئي ويو آهي ۽ انهن جي ذريعي پارٽي کي مضبوط ڪيو وڃي.  جهڙي نموني فنڪشنل ليگ، نواز ليگ، تحريڪ انصاف ۽ قومپرست جماعتون سنڌ ۾ پ پ مخالف اتحاد جوڙڻ لاءِ سرگرم آهن اهڙي نموني پيپلزپارٽي وري پنجاب ۾ نواز ليگ کي ٽف ٽائيم ڏيڻ لاءِ سرگرم آهي. ان حوالي سان سندس اتحادي ڌر ق ليگ پيش پيش آهي ۽ ڪجهه ٻين ڌرين سان به سندن رابطي جا سلسلا ٻڌجي رهيا آهن. هن سموري محنت جو رنگ ڪهڙو سامهون اچي ٿو، اهو ته اڳتي هلي ڏسڻو آهي، بهرحال محسوس ائين ٿي رهيو آهي ته هن ڀيري واريون مڪاني چونڊون ڏاڍيون دلچسپ هونديون جن ۾ هڪڙا ته اُهي ئي نتيجا اچڻ جي توقع آهي جيڪي سالن کان ايندا رهيا آهن. جڏهن ته ڪجهه جاين تي سخت مقابلو ٿيڻ جا امڪان پڻ آهن. اسان وٽ قومپرستن جي حوالي سان جيڪو اهو تاثر عام ڪيو ويو آهي ته اُهي يونين ڪائونسل جي سيٽ به نه ٿا کٽي سگهن پر هن ڀيري  جيڪو ماحول آهي ۽ قومپرست جهڙي نموني مسلسل محنت ڪري رهيا آهن اُن کي ڏسي اهي امڪان به آهن ته شايد هن ڀيري ڪجهه  سيٽون هي کڻڻ ۾ ڪامياب ٿين. اصل ۾ ان پٺيان هڪڙو وڏو سبب اقتداري پارٽي طرفان سنڌ جي عوام سان پنهنجو تعلق گهڻو ڪري ڪٽي ڇڏڻ به آهي. سنڌ ۾ عوام جن حالتن کي منهن ڏئي رهيو آهي ۽ جنهن صورتحال مان گذري رهيو آهي اُهو اسان سڀني جي سامهون آهي جڏهن ڊگهي انتظار جي باوجود ماڻهن جي دردن جي دوا نه ٿيندي آهي ته اُهي ٻيو معالج ڳولڻ جي ڪوشش ڪندا آهن ۽ اهڙي صورتحال مخالفن کي فائدو ڏيندي آهي. پهرين ڳالهه ته پيپلزپارٽي کي ان سوچ مان ٻاهر نڪرڻو پوندو ته سنڌ جا ماڻهو صرف ۽ صرف هن سان گڏ آهن پوءِ ڀلي انهن کي رليف ڏجي يا نه. هن وقت صورتحال گهڻي تبديل آهي. سوشل ميڊيا جي هن وٺ پڪڙ واري دور ۾ خاص ڪري نوجوان نسل جا ذهن به گهڻي حد تائين تبديل ٿي ويا آهن، ان ڪري انهن سمورين زميني حقيقتن کي سامهون رکڻو پوندو. جيڪڏهن پيپلزپارٽي اهو سمجهي ٿي ته ماڻهن کي ڪجهه به نه ملندو پوءِ به اُهي پولنگ واري ڏينهن پولنگ اسٽيشنن تي کيس ووٽ ڏيڻ لاءِ ڊوڙندا ايندا ته اهو مشڪل لڳي رهيو آهي. جيڪڏهن پيپلزپارٽي کي سنڌ ۾ ساڳي اڪثريت گهرجي ٿي ته کيس عوام ڏانهن رجوع ڪرڻو پوندو ۽ ان جا مسئلا حل ڪرڻا پوندا. ايندڙ مڪاني چونڊون سنڌ جي حڪمران پارٽي لاءِ هڪ وڏي آزمائش آهن جنهن مان پار پوڻ لاءِ کيس عوام ڏانهن ڌيان  ڏيڻو پوندو. بلاول ڀٽو جيڪو پارٽي کي ماضي وارو پراڻو عروج واپس ڏيارڻ لاءِ ميدان تي لٿو آهي ان کي پنجاب سان گڏ سنڌ طرف به ڌيان ڏيڻو پوندو.ايندڙ بلدياتي چونڊن ۾ اقتداري پارٽي کي ٽف ٽائيم ڏيڻ لاءِ سنڌ ۾ هي جيڪي نوان اتحاد جڙڻ جون سرگرميون شروع ٿي ويون آهن، انهن کي غير اهم نه سمجهڻ گهرجي. جيڪڏهن فنڪشنل ليگ قومپرستن سان گڏ سنڌ ۾ ووٽ بئنڪ رکندڙ پ پ مخالف سياسي پارٽين کي هڪ پليٽ فارم تي گڏ ڪرڻ ۾ ڪامياب ٿئي ٿي ۽ هي اتحاد جڙي پوي ٿو ته اُن جا اثر ضرور سامهون ايندا. هن وقت متحده ۽ پ پ ۾ به تعلقات ڪي گهڻا بهتر ناهن. ٽيليفون اٽينڊ ڪرڻ، نه ڪرڻ واري معاملي هڪ نئون رخ اختيار ڪيو آهي جيڪڏهن ايندڙ مڪاني چونڊن ۾ نئين جڙندڙ حڪومت مخالف اتحاد ۾ متحده به شامل ٿي وڃي ٿي ته پ پ لاءِ سياسي ميدان تي ڪيتريون ئي مشڪلاتون سامهون اچي وينديون. هاڻي ڏسڻو اهو آهي ته نئين جڙندڙ حڪومت مخالف اتحاد ۾ ڪير ڪير شامل ٿئي ٿو ۽ حڪمران پارٽي ان کي منهن ڏيڻ لاءِ ڪهڙي حڪمت عملي جوڙي ٿي.

************

 

عجب جهڙيون ڳالهيون؛پروفيسر مدد علي جهتيال

ڇو اسان جو سماج اهڙو ٿيندو پيو وڃي، جنهن کي ڏسو، اهو پنهنجي سوچ مطابق پيو هلي، نه ڪنهن وڏي جي ٻڌي پيو نه ڪنهن ننڍي جي، بس پنهنجي مرضي پيو هلائي، هڪ ڏينهن آءٌ دنيا جي وڏي سوشل ميڊيا چينل فيس بڪ تي ويٺو هجان. فيس بڪ تي آيل ڊاڪ ڏسندي ڏسندي هڪ اهڙي ڊاڪ تي نظر پئي جو آئون حيران ۽ پريشان ٿي ويس ۽ سوچڻ لڳس ته اسان جو پڙهيو لکيو نوجوان ڪاڏي پيو وڃي. اها ڊاڪ ڇا هئي ”اڄ آئون قرآن پاڪ جو ختم شريف سنڌي ۾ پڙهي پورو ڪيو، جنهن جو ثواب آئون ڪامريڊ چي گويريا جي حوالي ڪريان ٿو، الله ان کي جنت الفردوس ۾ اعليٰ جاءِ ڏئي.“ نه عزيزن قريبن کي نه ئي پنهنجي حق ۾ بخشش ۽ ٻاجهه گهريائين.

پڙهيا لکيا نوجوان جيڪي هن قوم ۽ ملڪ جا مستقبل ۽ معمار آهن، CSS، PCS ۽ مختلف (Competitive) چٽاڀيٽي جا امتحان ڏئي رهيا آهن، انهن سان جڏهن ڪچهري ٿيندي آهي ته آئون ڪوشش ڪندو آهيان ته نوجوانن جي سوچ ڏسجي ته هو ڪهڙي سوچ رکندڙ آهن، جڏهن انهن جي اڳيان مختلف موضوع رکندو آهيان ۽ انهن کان پڇندو آهيان ته اڪثريت ائين محسوس ڪرائيندي آهي ته اسان کي پنهنجي فڪر آهي. اسان چاهيون ٿا ته اسان جلدي وڏا ماڻهو ٿيون، ماڻهو اسان جا سلامي ٿين اسان انهن جا نه ٿيون، ايترو پيسو گڏ ڪريون جو اسان جون ست پيڙهيون به ويهي کائين. ان کان علاوه اهو تاثر ڏيندا آهن ته اسان کي هن ملڪ ڏنو ڇا آهي؟ جو اسان هن ملڪ لاءِ سوچون اسان کي بک، بدانتظامي، ڪرپشن، ناانصافين کان علاوه مليو ڇا آهي جو اسان هن ملڪ لاءِ ڪجهه ڪريون. وري جڏهن مذهبي حوالي سان انهن سان بحث مباحثو ٿيندو آهي ته اهڙو تاثر ڏيندا آهن جو ائين لڳندو آهي اسلامي معلومات آهي ته صرف انهن وٽ آهي، نه عالمن نه ئي مذهبي اسڪالرن وٽ آهي. ٻڌڻ وارو اهو محسوس ڪندو ته هي ته وڏا عقلمند آهن مذهب آهي ته صرف هنن وٽ آهي، جڏهن عملي طرح انهن کي مذهبي حوالي سان ڏسندا آهيون ته زيرو هوندا آهن، چوندا آهن جيڪو ڪجهه آهي هتي آهي يعني هن جهان ۾ آهي، آخرت تي انهن جو پختو يقين نه هجڻ جي برابر هوندو آهي، ويٺا يورپ جو مثال ڏيندا آهن ته انسانيت آهي ته صرف يورپ ۾ آهي.

اسان جي سماج ۾ اگر اهڙي قسم جو تاثر اڀري پيو ته ان جا ڪهڙا سبب آهن، ڪڏهن ڪنهن ان تي سوچيو آهي، اڳين زماني جا به ته ماڻهو هئا جيڪي پنهنجي ملڪ، قوم ۽ دين تي سر قربان ڪري ڇڏيندا هئا. هو جيڪو ڪجهه سوچيندا ۽ ڪندا هئا اهو سڀ جو سڀ ايندڙ نسلن جي لاءِ هوندو هو. اليس هوي (Elias Howe) آمريڪا جي مشهور شهر مساچوسٽ جو هڪ معمولي ڪاريگر هو، جيڪو 1819ع ۾ ڄائو ۽ صرف 48 سالن جي عمر ۾ 1867ع ۾ مري ويو. ان دنيا کي هڪڙي اهڙي شيءِ ڏني جنهن پوري دنيا ۾ انقلاب آڻي ڇڏيو. اها هئي سلائي مشِن جيڪا هن 1845ع ۾ ايجاد ڪئي، مشين ايجاد ڪرڻ جي ڪري پوري دنيا ان جي ٿورائتي آهي.

اڄ جو نوجوان خاص ڪري پڙهيو لکيو طبقو ته گهٽ ۾ گهٽ اهڙي سوچ ته رکي جنهن ۾ ملڪ ۽ قوم جي بهتري هجي، اهڙي سوچ نه رکي جنهن سان اسان جي وڏن جا ارمان ۽ خواب ساڀيان نه ٿي سگهن.

آئون هڪ نوجوان جو قصو اوهان کي ٻڌائيندو هلان، جيڪو (B.E) پاس آهي، ان سان جڏهن مون ڪچهري ڪئي، حال احوال ورتا ته هاڻي اوهان جو ڇا پلان آهي، ڇا سوچيو آهي اوهان ڇا ڪندا، چيائين آئون چاهيان ٿو ته مون کي وڏي گهراڻي جي ڇوڪري ملي، جنهن سان آئون شادي ڪريان. ان سان گڏ بنگلو، ڪار، بينڪ بئنلس ملي ته جيئن آئون آرام سان پنهنجي زندگي گذاري سگهان، ٻيو مون کان ڪجهه به نه ٿيندو. مون کيس چيو ته يار ان لاءِ ته اوهان کي طويل جدوجهد ڪرڻي پوندي، ائين جهٽ پٽ ۾ سڀ شيون ملڻ ناممڪن آهي. مون کي جهٽ پٽ ۾ جواب ڏنائين ته سائين اوهان کي خبر ناهي ته الله وڏو ڪريم رحيم آهي، ان جي اڳيان دير ئي ناهي، اوهان ويٺا ڏسو اهو ڪيئن ٿو ٿئي. مون کيس چيو ته آئون ڄاڻان ٿو ته الله بيشڪ رحيم، ڪريم آهي ليڪن اهو به لوچڻ کانسواءِ ٿوري ڏيندو اوهان کي. ڇا تون ڌاڙا هڻندين، ڦرون ڪندين جو ايترو جلدي اهو سڀ ڪجهه ٿي ويندو. انگريزي ۾ هڪ ڪهاوت آهي (In giving that we receive) اسان ڏيون ٿا تڏهن حاصل ڪريون ٿا.

دنيا ٺاهڻ واري الله باري تعاليٰ جو قانون آهي ته جيڪو ڏيندو اهو ئي حاصل ڪندو، هڪ ٻي چوڻي آهي ته (As you saw so shall you reap) جهڙي پوکيندي اهڙي لڻندو.

عامر خان جي هڪ فلم آيل آهي جنهن جو نالو (P.K) (پي ڪي) آهي، اها فلم شايد ڪافي ماڻهن ڏٺي هوندي جيڪا (Wrong Number) غلط نمبر تي ٺهيل آهي، اهو (Wrong Number) مذهب ۾ هجي يا سماج ۾ ان کي وائکو ڪيو ويو آهي. اڄڪلهه اسان جي ميڊيا خاص ڪري اليڪٽرونڪس ميڊيا ته حد ڪري ڇڏي آهي. رمضان شريف جي ڀلاري مهيني ۾ پيش ٿيندڙ يعني هلندڙ اڪثر پروگرام مذهبي آهن جن ۾ دين ۽ آخرت جي ڄاڻ ڏني ويندي آهي انهن سڀني پروگرامن جا تقريبن ميزبان يا ته مسخرا آهن يا فنڪار آهن بجاءِ عالمن ۽ مذهبي اسڪالرن جي انهن مسخرن کي اسلام جو ذمو ڏنو ويو آهي ته اوهان دنيا ۾ مذهب جو اميج بهتر ڪريو، جن جو مذهبي حوالي سان ڪو تعلق ئي نه آهي. مقصد چوڻ جو اهو آهي ته جيڪي ڪجهه اسان جي سماج ۾ غلط ٿئي پيو، ان تي اسان جا دانشور، عالم، اديب، پڙهيا لکيا ماڻهو ڇو خاموش آهن، ڇا انهن جي اکين تي ڪاريون پٽيون چڙهيل آهن ڇا انهن جي مٿان اهو فرض عائد نه آهي ته اهڙي قسم جي براين کي سماج مان ڪڍي ٻاهر ڦٽو ڪن ۽ اهڙو سماجي علم ڦهلائن جنهن ۾ عدل، انصاف ۽ بهتري هجي.

موجوده دنيا ۾ ڪاميابي جو راز ان ۾ آهي ته ماڻهو وقت کي سڃاڻي ۽ زماني جي تقاضا مطابق هلي، جيڪو ماڻهو وقت ۽ زماني جي تقاضائن کي نه ٿو سمجهي ان جو حال تمام برو ٿيندو آهي. هن نازڪ دور ۾ اهڙن ذهين ماڻهن جي ضرورت آهي جيڪي وقت ۽ زماني جي تقاضائن کي سمجهن، ان لاءِ اسان کي ايندڙ نسل اهڙو تيار ڪرڻو پوندو، جيڪو ملڪ، قوم ۽ دين کي روشن ڪري.