تازيون خبرون

Daily Archives: July 7, 2015

سنڌ ۾ ايف آءِ اي کي اختيار ڏيڻ صوبي تي حملو آهي، عدالت وينداسين: قائم علي شاهه

ڪراچي (اسٽاف رپورٽر) وڏي وزير سيد قائم علي شاهه،سنڌ ۾ ايف آءِ اي کي اختيار ڏيڻ واري عمل کي صوبي تي حملو ۽ زيادتي قرار ڏيندي عدالت جو در کڙڪائڻ جو اعلان ڪري ڇڏيو، سندس چوڻ آهي ته صوبي ۾ امن امان جي صورتحال ماضيءَ جي ڀيٽ ۾ بهتر آهي،هن اهم گڏجاڻي اڌ ۾ ڇڏي الطاف حسين جي فون اٽينڊ ڪئي،پر متحده سربراهه ڪاوڙ مان ڪال بند ڪري ڇڏي. ڪراچي ۾ فيڊريشن آف پاڪستان چيمبر آف ڪامرس ۽ انڊسٽري جَي وفد وڏي وزير سان ملاقات ڪري مسئلن بابت آگاهي ڏني واپارين سان ملاقات کانپوءِ ميڊيا سان ڳالهائيندي وڏي وزير سيد قائم علي شاهه وفاق پاران سنڌ ۾ ايف آءِ اي کي اختيار ڏيڻ واري عمل کي صوبي تي حملو ۽ زيادتي  قرار ڏيندي اعلان ڪيو ته هو ان خلاف عدالت وڃڻ جي تياري ڪري رهيا آهن. سيد قائم علي شاهه چيو ته سنڌ ۾ امن امان جي صورتحال کي ماضيءَ جي ڀيٽ ۾ گهڻو بهتر آهي،ڪراچي ۾ بدامني جو مسئلو صديون پراڻو آهي،امن جي بحالي سندن پهرين ترجيح آهي،قانون موجب پوليس جي مدد لاءِ رينجرز کي گهرايو ويو. هڪ سوال جي جواب ۾ وڏي وزير ٻڌايو ته هن اهم گڏجاڻي اڌ ۾ ڇڏي الطاف حسين جي فون ڪال اٽينڊ ڪئي ته متحده سربراهه کانئس اٿندي ئي ڪاوڙ پڇيو ته توهان ڪٿان جا آهيو، سنڌ ۾ جيڪو ڪجهه ٿئي پيو توهان کي خبر آهي، جنهن جو هن کيس جواب پڻ ڏنو. قائم علي شاهه چيو ته واپارين ۽ صنعتڪارن جا مسئلا حل ڪرڻ جي هر ممڪن ڪوشش ڪئي پئي وڃي. قائم علي شاهه چيو ته ڪراچي ۾ امن امان، لياري ايڪسپريس وي، ڪــَي فور ۽ سيوريج نظام جَي منصوبن لاءِ وفاق پاران مالي سهڪار ڪرڻ جا واعدا ڪيا ويا پر اڃا تائين هڪ به واعدو وفا ناهي ڪيو ويو. هـُن چيو ته لياري ايڪسپريس وي منصوبي تي 16 ارب، ڪي فور تي 25 بلين ۽ سيوريج منصوبي تي 39 بلين رپيا خرچ ٿيندا پر وفاق پاران ڪو به سهڪار نه پيو ڪيو وڃي. وڏي وزير چيو ته بجلي بحران جو تعلق سڌو سنئون وفاق سان آهي پر وفاقي سرڪار اهو معاملو به حل ڪرڻ لاءِ تيار ناهي. مڪاني چونڊن بابت سوال جي جواب ۾ وڏي وزير سيد قائم علي شاهه چيو ته هـُو سنڌ ۾ خيبر پختونخواهه ۽ بلوچستان جهڙيون چونڊون نه ٿا ڪرائڻ چاهين،انڪري صوبي اندر ٽن مرحلن ۾ اليڪشن ڪرائي وڃي. سيد قائم علي شاهه چيو ته سپريم ڪورٽ جي حڪم تحت صوبي ۾ 20 سيپٽمبر تي ئي مڪاني چونڊون ڪرايون وينديون

 

ڀارت پاڪستان ۾ پراڪسي وار ڪري رهيو آهي: خواجه آصف

اسلام آباد(بيورو) دفاع جي وفاقي وزير خواجه محمد آصف چيو آهي ته ڀارت پاڪستان تي پراڪسي وار ڪري رهيو آهي، تحريڪ طالبان پاڪستان ۽ بلوچ عليحدگي پسند تحريڪن کي ڀارتي مدد جا ثبوت عالمي فورم تي پيش ڪنداسين، وفاقي وزير نجي ٽي وي جي پروگرام ۾ ڳالهائيندي چيو ته تحريڪ طالبان پاڪستان کي ڀارتي مدد جون شاهديون عالمي فورم تي ڏيکارينداسين، بلوچ عليحدگي پسند تحريڪن کي به ڀارت جي حمايت حاصل آهي، انهن جا ثبوت به عالمي فورم تي پيش ڪيا ويندا، ايم ڪيو ايم جا ڀارتي سان گٺ جوڙ جا ثبوت مليا ته اهي به عالمي فورم تي پيش ڪيا ويندا، هن چيو ته اسان جي دفاعي صلاحيت ۾ موجود نيو ڪليئر آپشن رڳو ڏيکارڻ جي لاءِ نه آهي.

 

ملڪ ۾ نئين ۽ جديد اسپتالن جي تعمير وقت جي اهم ضرورت آهي: صدر ممنون حسين

اسلام آباد (اين اين آءِ) پاڪستان جي صدر ممنون حسين چيو ته ملڪ ۾ نئين ۽ جديد اسپتالن جي تعمير وقت جي اهم ضرورت آهي اها ڳالهه صدر ممنون حسين شهيد ذوالفقارعلي ڀٽو ميڊيڪل يونيورسٽي جي وائيس چانسلر پروفيسر ڊاڪٽر جاويد اڪرم جي سربراهي ۾ وفد سان ڳالهائيندي ڪئي جنهن پاڪستان جي صدر سان ايوان صدر اسلام آباد ۾ ملاقات ڪئي ان موقعي تي پروفيسر ڊاڪٽر جاويد اڪرم صدر کي پمز جي اهتمام هيٺ ميڊيڪل ٽاور ڪمپليڪس منصوبي تي تفصيلي بريفنگ ڏني صدر چيو ته اهڙي قسم جي فلاحي منصوبن جي ذريعي عوام کي جديد طبي سهولتون فراهم ڪري سگهجن ٿيون هن چيو ته اهڙن فلاحي منصوبن کي عبادت سمجهي ڪرڻ گهرجي صدر ممنون حسين ميڊيڪل ٽاور ڪمپليڪس رٿا جي واکاڻ ڪئي ۽ چيو ته سمورن لاڳاپيل کاتن سان مشاورت کان پوءِ هڪ فعال ۽ ڪابل عمل ماڊل تشڪيل ڏنو وڃي ته جيئن هن منصوبي کي عملي جامو پارائي سگهجي صدر پمز اسپتال کي موجوده دور جون جديد طبي سهولتن سان سرشار ڪرڻ جي ضرورت تي زور ڀريو ان موقعي تي مملڪتي وزير ڪيڊپيرسٽر عثمان ابراهيم ۽ سيڪريٽري ڪيڊ خالد حنيف به موجود هئا.

 

رياستي ظلمن باوجود جمهوريت کي سرسبز ۽ شاداب رکيو: خورشيد شاهه

پئرس (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو ته پيپلزپارٽي ملڪ کي هڪ ٻئي ڪاري ڏهاڙي کان بچائڻ لاءِ ڌرڻن دوران جمهوريت جو ساٿ ڏنو ۽ نواز حڪومت کي نه پر پارليمينٽ کي بچايو ڇو جو ان جي آڙ ۾ ادارن وچ ۾ ٽڪراءُ ۽ غير سياسي قوتن کي جموريت تي راتاهو هڻڻ جو موقعو ملي رهيو هو هو پئرس ۾ پيپلزپارٽي فرانس جي اهتمام هيٺ 5 جولاءِ تي ڪاري ڏهاڙو ملهائڻ طور تقريب ۾ خاص مهمان جي حيثيت سان خطاب ڪري رهيو هو تقريب جي صدارت پ پ پ يورپ جي ڪوآرڊينيٽر ڪامران يوسف گهمڻ ڪئي خورشيد شاهه چيو ته پ پ پ اها وحد جماعت آهي جنهن سڀ کان وڌيڪ ڊڪٽيٽرن جا ظلم برداشت ڪيا انهيءَ ڪري جمهوريت جو قدر اان جي جماعت کان علاوه ٻي ڪنهن جماعت کي نه آهي خورشيد شاهه چيو ته 5 جولاءِ تي ڪارو ڏينهن ملهائڻ جو مقصد نئين نسل کي اهو ٻڌائڻو آهي ته پاڪستان ۾ جمهوريت جي بقا پاڪستان پيپلزپارٽي جي ڪري آهي پ پ پ هر دور ۾ رياستي ظلم برداشت ڪيا پر جمهوريت جي ٻوٽي سرسبز ۽ شاداب رکيو خورشيد شاهه چيو ته 1977 ۾ به اهڙيون حالتون پيدا ڪري سياسي پارٽين سان واعدو ڪيو ويو ته 90 ڏينهن اندر چونڊون ڪرايون وينديون ۽ پوءِ سڀني ڏٺو ڪهڙي طرح 10 سالن تائين ملڪ ۾ انڌو قانون مڙهيل رهيو ۽ انهيءَ دور ۾ مذهب جي نالي تي دهشتگرد پيد اڪيا ويا ۽ اڄ اهي ئي دهشتگرد پاڪستان جي رت جا پياسا آهن 1997 ۾ صرف 17 سيٽون هئڻ جي باوجود پيپلزپارٽي ڪنهن جمهوري پاليسي جو حصو بڻجڻ کان انڪار ڪيو ۽ فاروق لغاري ۽ ميان نوازشريف جي غير فطري جوڙ جي ڪري عوام کي هڪ دفعو ٻيهر مارشل لا ڏسڻو پيو جنهن سان بي بي شهيد جي ڪوششن جي ڪري ئي عوام کي نجات ملي شهيد زوالفقارعلي ڀٽو ۽ بينظير ڀٽو جي قرباني ڏيڻ کان پوءِ به پيپلزپارٽي ملڪ کي هڪ دفعو بيهر اهڙي طرح امريت جي دور ۾ دڪي سگهي ٿي خورشيد شاهه چيو ته اڄ پنجاب جو ڪارڪن صرف ان لاءِ ناراض آهي جو اسان حڪومت جو ساٿ ان وقت ڏنو جڏهن نوازشريف جا هٿ پير ٿڌا ٿي چڪا هئا پر اسان نوازشريف جو نه پر جمهوريت جو ساٿ ڏنو آهي آخر ۾ هن چيو ته بيروني ملڪ رهندڙ پاڪستان جو وڏو سرمايو آهن اسان کي انهن جو قدر ڪڻ گهرجي ڪامران يوسف گهمڻ خورشيد شاهه کي نجي دوري تي پئرس اچڻ تي ڀليڪار چيو ۽ چيو ته هو خورشيد شاهه جو ٿورائتو آهي جو هن پنهنجي موڪلن جي وقت ۾ مختصر وقت پيپلزپارٽي فرانس لاءِ ڪڍيو ۽ ان تقريب ۾ شرڪت ڪئي.

 

آصف زرداري بلاول ڀٽو زرداري کي پارٽي، سنڌ حڪومت جا معاملا جزوي طور تي هلائڻ جي اجازت ڏيئي ڇڏي

ڪراچي (اين اين آءِ) پاڪستان پيپلزپارٽي جي چيئرمين بلاول ڀٽو کي آصف زرداري پارٽي ۽ سنڌ حڪومت جا معاملا جزوي طور هلائڻ جي اجازت ڏني آهي ان ڏس ۾ بلاول هائوس ذريعن ٻڌايو ته آصف علي زرداري بلاول ڀٽو زرداري کي پارٽي معاملا جزوي طور تي هلائڻ تي راضي ٿي ويو آهي بلاول ڀٽو زرداري مڪمل نه پر ڪجهه فيصلا ڪري سگهي جڏهن ته بلاول کي پنهنجي طور تي ڪنهن کي پارٽي مان ڪڍڻ يا شامل ڪرڻ جا اختيار ناهن ڏنا ويا ان کان اڳ آصف زرداري چيو هو ته سندس پٽ کي سياسي بالغ نظري لاءِ ڪجهه وقت گهرجي هن بلاول کي پارٽي جي واڳ سنڀالڻ لاءِ مناسب وقت جو انتظار ڪرڻ لاءِ چيو هو آصف زرداري جي هڪ ويجهي ساٿي نالو ظاهر نه ڪرڻ جي شرط تي ٻڌايو ته آصف زرداري بلاول کي پارٽي ۽ سنڌ حڪومت جا معاملا هلائڻ جو مينڊيٽ ڏيئي چڪو آهي گذريل هڪ هفتي ۾ پارٽي چيئرمين سنڌ اسيمبلي ۾ پيپلزپارٽي ميمبرن ۽ پنجاب جي اڳواڻن سان ڪيتريون ئي ملاقاتون ڪيون آهن.

 

رمضان المبارڪ ۾ مسجدن ۽ ٻين مذهبي عبادتگاهن ۽ علائقن ۾ صفائي سٿرائي جي انتظامن کي يقيني بڻايو وڃي: شرجيل ميمڻ

ڪراچي(اسٽاف رپورٽر)  سنڌ جي اطلاعات ۽ بلديات واري صوبائي وزير شرجيل انعام ميمڻ ڪراچي جي سمورن ضلعن جي ايڊمنسٽريٽرن ۽ واٽر بورڊ جي چيف انجنيئرن کي سختي سان هدايت ڏني آهي ته رمضان المبارڪ جي ايندڙ طاق راتين ۾ مسجدن ۽ ٻين مذهبي عبادتگاهن ۽ علائقن ۾ صفائي سٿرائي جي انتظامن کي يقيني بڻايو وڃي. مسجدن ، امام بارگاهن ۽ عوام کي مفت ٽينڪرز جي ذريعي پاڻي جي فراهمي کي پڻ يقيني بڻايو وڃي۽ شهر ۾ سمورين حددخلين جي خاتمي واري مهم  کي وڌيڪ تيز ڪيو وڃي. اهي هدايتون صوبائي وزير سومر ڏينهن پنهنجي آفيس ۾ ڪراچي جي سمورن ضلعن جي ايڊمنسٽريٽرن ۽ واٽر بورڊ جي چيف انجنيئرن سان اجلاس ۾ ڏنيون. ان موقعي تي سيڪريٽري بلديات عمران عطا سومرو، ايم ڊي واٽر بورڊ سيد هاشم رضا زيڊي، ميونسپل ڪمشنر ڪراچي سميع صديقي ۽ ٻيا پڻ موجود هئا. ان موقعي تي صوبائي وزير سمورن ضلعن جي ايڊمنسٽريٽرن کان الڳ الڳ انهن جي علائقن ۾ صفائي سٿرائي ۽ ٻين معاملن تي تفصيلي بريفنگ ورتي.  ان موقعي تي صوبائي وزير چيو ته 23 فيبروري کان پوري صوبي ۾ جاري صاف، سر سبز ، پرامن سنڌ مهم جي شروعات وقت ئي هن اعلان ڪيو هو ته هي مهم هڪ هفتو، هڪ مهينو نه پر هي مهم پورو سال جاري رهندي. هن مهم ۾ جتي صفائي سٿرائي جي ڪمن تي ڌيان رکڻ سان گڏو گڏ ادارن ۾ به صفائي ۽ حددخلين جي خاتمي لاءِ پڻ اپاءُ ورتا وڃن. هن چيو ته شهر ۾ جاري حددخلين جي خاتمي واري مهم کي وڌيڪ تيز ڪيو وڃي. صوبائي وزير چيو ته رمضان المبارڪ جي مهيني جي ايندڙ طاق راتين ۾ خاص طور مسجدن ۽ امام بارگاهن جي آسپاس صفائي سٿرائي جي انتظامن کي يقيني بڻايو وڃي ۽ نمازين ۽ روزي دارن کي پاڻي جي فراهمي لاءِ واٽر بورڊ انتظاميا مڪمل اپاءَ وٺي.ان موقعي تي هن ڊسٽرڪٽ سائوٿ ۽ ڊسٽرڪٽ ايسٽ جي انتظاميا کي ايڪويهه رمضان المبارڪ يوم  حضرت علي رضه تي نڪرندڙ جلوسن جي رستن تي صفائي سٿرائي جا انتظام مڪمل ڪرڻ ۽  جلوس ۾ شريڪ ماڻهن جي لاءِ پاڻي سميت ٻين ضروري شين جي فراهمي کي يقيني بڻائڻ تي زور ڏنو. ان موقعي تي صوبائي وزير مختلف اخبارن ۽ اليڪٽرانڪ ميڊيا ۾  ڪراچي ۾ صفائي سٿرائي جي ناقص انتظامن بابت ايندڙ خبرن  تي سمورن ضلعن جي ايڊ منسٽريٽرن تي زور ڏنو ته هو اهڙي قسم جي شڪايتن جو فوري ازالو ڪن ۽ پنهنجي صفائي مهم، حد دخلين جي خاتمي واري مهم سميت ٻين ڪمن ۾ ميڊيا جي  نمائندن کي ان جي ڪوريج جي خصوصي دعوت ڏين ته جيئن حڪومت پاران ورتل ڪوششن متعلق عوام کي آگاهي فراهم ڪري سگهجي

 

ايم ڪيو ايم خلاف رياستي آپريشن ڪيو پيو وڃي، بزرگ، مائون ۽ ڀينرون ميدان ۾ اچي تحريڪ سنڀالين: الطاف حسين

ڪراچي (اسٽاف رپورٽر) ايم ڪيو ايم جي سربراهه الطاف حسين چيو آهي ته متحده ڪنهن به ملڪ کان پئسا يا مدد نٿي وٺي ڪراچي آپريشن جي آڙ ۾ رياستي ظلم جو نشانو بڻايو پيو وڃي. لال قعله گرائونڊ عزيز آباد ۾ عورتن ۽ بزرگ ڪارڪنن جي اجلاس کي فون تي خطاب ڪندي الطاف حسين چيو آهي ته پاڪستان ۾ جنهن به عوام جي حقن لاءِ آُواز اُٿاري اُن تي غداري جو الزام هنيو ويو. باچا خان کي غدار چيو ويو. بلوچ اڳواڻن تي غداري جا الزام هنيا ويا. بينظير ڀٽو کي سيڪيورٽي رسڪ قرار ڏنو ويو. سنڌ جي ٻين اڳواڻن کي غدار قرار ڏنو ويو ۽ هاڻي ايم ڪيو ايم کي غدار قرار ڏنو پيو وڃي. هن چيو ته اسانجي بزرگن پاڪستان بڻايو پر چار پنج نسلن جي گذرڻ کانپوءِ به اسان سان غيرن جهڙو سلوڪ ڪيو پيو وڃي. اسان تي ڀارت سان لاڳاپن ۽ اُن کان پئسا وٺڻ جو بهتان هنيو پيو وڃي. اسان پاڪستان ٺاهڻ وارن مان آهيون ۽ اسين پاڪستان کي سلامت ڏسڻ چاهيون ٿا. اسان تي هر طرح الزام مڙهيا پيا وڃن ۽ ڪراچي آپريشن جي آڙ ۾ اسان تي رياستي ظلم ڪيو پيو وڃي. ذميوارن ۽ ڪارڪنن تي تي گهڻي عرصي کان جيئڻ جنجال ڪيو ويو آهي، بزرگ، مائون ۽ ڀينرون ميدان ۾ اچن ۽ تحريڪ کي سنڀالين. هن چيو ته رينجرز پاران لڳايل الزام سرار غلط ۽ بي بنياد آهي ته ايم ڪيو ايم جي تنظيمي ڪميٽي يونٽ ۽ سيڪٽر کي عسڪري تربيت ڏي ٿي.

 

مخدوم شهاب الدين جي بلاول ڀٽو زرداري سان ملاقات، سياسي صورتحال تي ڳالهيون

ڪراچي (اي پي پي) پاڪستان پپلزپارٽي ڏکڻ پنجاب جي اڳوڻي صدر مخدوم شهاب الدين، ايڊيشنل سيڪريٽري جنرل خواجا رضوان عالم، مخدوم ارتضيٰ ۽ حيدر زمان سومر ڏينهن هتي بلاول هائوس ۾ پاڪستان پپلزپارٽي جي چيئرمين بلاول ڀٽو زرداري سان ملاقات ڪئي. سينيٽر شيري رحمان ۽ جميل سومرو به ملاقات ۾ موجود هئا. ملاقات ۾ ڏکڻ پنجاب جي سياسي صورتحال تي غور ڪيو ويو. ملاقات ۾ پنجاب ۾ ايندڙ مڪاني چونڊن بابت غور ويچار ڪيو ويو

 

ڪرنسي سمگلنگ ڪيس: ماڊل ايان علي تي فرد جرم لاڳو نه ٿي سگهيو، رمانڊ ۾ واڌ

راولپنڊي (بيورو) ڪرنسي سمگلنگ ڪيس ۾ گرفتار ماڊل ايان علي تي اڄ به فرد جرم لاڳو نه ٿي سگهيو، جنهن بعد سندس عدالتي رمانڊ ۾ 13 جولاءِ تائين واڌ ڪئي وئي آهي، جڏهن ته سپر ماڊل ڪيس تي خدشا ظاهر ڪندَي حڪومت ۽ چيف جسٽس کان اليڪٽرانڪ ۽ سوشل ميڊيا تي ٿيندڙ سندس ڪردارڪشي جو نوٽيس وٺڻ جو مطالبو ڪري ڇڏيو آهي. راولپنڊي جي ڪسٽم عدالت جي جج رانا آفتاب احمد خان، ماڊل ايان علي خلاف ڪرنسي سمگلنگ ڪيس جي ٻـُڌڻي ڪئي. ٻڌڻيءَ دوران ڊسٽرڪٽ هيڊڪوارٽر اسپتال جِي سينيئر گائنالاجسٽ جِي ميڊيڪل رپورٽ پيش ڪئي وئي، جنهن ۾ ڄاڻايو ويو هو ته ايان علي ڳورهاري ناهي، هوءَ مڪمل صحتياب آهي. ڪسٽم اختيارين پاران ڪيس جو مڪمل چالان پيش نه ڪرڻ تي اڄ به ماڊل تي فرد جرم لاڳو نه ٿي سگهيو، جنهن بعد عدالت ايان علي جي ريمانڊ ۾ 7 ڏينهن جي واڌ ڪندي ٻڌڻي 11 جولاءِ تائين ملتوي ڪري ڇڏي. ان موقعي تي ماڊل جَي وڪيل لطيف کوسا ايان علي تي فرد جرم لاڳو ڪرڻ تي اعتراض واريندي چيو ته ڪسٽم اختيارين پاران پيش ڪيل چالان مڪمل ناهي. ٻڌڻيءَ دوران ڳالهائيندي ماڊل ايان علي چيو ته کيس اندازو نه هو ته ايترا پئسا پرڏيهه کڻي وڃڻ غيرقانوني آهي. ٻڌڻي وقت ايان علي جي والد جي عدالت ۾ موجودگي تي به ماڊل جي وڪيل اعتراض واريا. سردار لطيف کوسا چيو ته ماڊل ايان علي پيءُ سان نه ٿي ملڻ چاهي، تنهنڪري کيس عدالت کان ٻاهر ڪڍيو وڃي، جنهن تي عدالت ايان جي والد کي ٻاهر وڃڻ جو حڪم ڏنو

 

جيڪڏهن اقتدار ۾ اچي وياسين ته ملڪ جون معاشي حالتون تبديل ڪري ڇڏينداسين: عمران خان

ڪراچي (اين اين آءِ) پاڪستان تحريڪ انصاف جي چيئرمين عمران خان چيو ته 2015 اليڪشن جو سال آهي پي ٽي آءِ جي وڪيل جڊيشل ڪميشن ۾ ثابت ڪري ڇڏيو آهي ته اليڪشن 2013 ۾ منظم ڌانڌلي ٿي آهي اسان کي ڪميشن جي فيصلي جو انتظار آهي ريحام خان عملي سياست ۾ اچي چڪي آهي پي ٽي آءِ ملڪ کي خوشحال بڻائيندي هڪ ڏينهن جيڪڏهن اقتدار ۾ اچي وياسين ته ملڪ جون معاشي حالتون تبديل ڪري ڇڏينداسين ته ملڪ کي نه قرض وٺڻ جي ضرورت پوندي ۽ نه ئي ڪنهن کان خيرات وٺڻ عوام کي يقين ڏياريان ٿو ته ان جو اعتماد ڪڏهن به نه ٽوڙيندس ملڪ جا 90 سيڪڙو ماڻهو ڪينسر جو علاج نٿا ڪرائي سگهن جيڪڏهن حڪمران عياشين نه ڪن ته عوام وڌيڪ ٽيڪس به ڏيندو هڪ خاص انٽرويو ۾ عمران خان چيو ته ايم ڪيو ايم تي جيڪي الزام مڙهيا ويا آهن کيس ان الزامن جو لڳل داغ ڌوئڻ گهرجي جڏهن مان سياست ۾ نه هئس ته مون ۾ صبر هو هاڻي سياست ۾ آيو آهيان ته صبر به اچي ويو آهي هن چيو ته ڪراچي 70 سيڪڙو روينيو ڏيئي ٿو پر هتي نه پاڻي آهي ۽ نه بجلي آهي مسئلن جي باوجود ڪراڇي جا ماڻهو سڀ کان وڌيڪ عطيو ڏين ٿا شوڪت خانم اسپتال لاءِ به پاڪستانين کان چندو وٺون ٿا هن چيو ته ڪراچي ۾ به جلد شوڪت خانم اسپتال قائم ڪئي ويندي. شوڪت خانم اسپتال ڪراچي جي حوالي سان ان جو چوڻ هو ته زمين جيئن ئي ملندي شوڪت خانم اسپتال جي اڏاوت شروع ڪئي ويندي.