تازيون خبرون

Daily Archives: July 4, 2015

دهشتگردي خطي لاءِ ناسول بڻيل آهي، شدت پسندن جي پليت ارادن کي شڪست ڏني ويندي: وزيراعظم

اسلام آباد (بيورو) وزير اعظم نواز شريف چيو آهي ته دهشتگردي خطي لاءِ ناسور بڻيل آهي، شدت پسندن جي پليت ارادن کي شڪست ڏني ويندي، ملڪ ۾ امن جي بحالي لاءِ سمورا وسيلا ڪتب آندا ويندا. وزير اعظم نواز شريف جي صدارت هيٺ مري ۾ ترقياتي منصوبن بابت اجلاس ٿيو، جنهن ۾ وفاقي وزير پرويز رشيد ڊولپمنٽ اٿارٽي جي عملدارن ۽ ٻين پڻ شرڪت ڪئي. اجلاس ۾ ڳالهائيندي وزير اعظم نواز شريف چيو ته پوري ملڪ ۾ ترقياتي منصوبا تيزي سان شروع ڪيا ويا آهن. هن چيو ته دهشتگردي خطي لاءِ ناسول بڻيل آهي شدت پسندن جي پليت ارادن کي شڪست ڏني ويندي. نواز شريف جو چوڻ هو ته  ملڪ ۾ امن جي بحالي لاءِ سمورا وسيلا ڪتب آندا ويندا. وزير اعظم چيو ته دهشتگردي سبب ملڪ جي ناقابل تلافي نقصان پهتو آهي، اسان جي هٿياربند پاڪ فوج ملڪ دشمنن جي چيلهه چٻي ڪري ڇڏي آهي، هاڻي اهي اڳتي اٿي بيهڻ جي صلاحيت وڃائي چڪا اهن، تمام جلد سندس خاتمو ڪيو ويوندو.

 

آپريشن ضرب عضب دهشتگردن ۽ سندن مددگارن جي خاتمي تائين جاري رهندو: آرمي چيف

راولپنڊي(اي پي پي) چيف آف آرمي اسٽاف جنرل راحيل شريف چيو آهي ته دهشتگردن ۽ شدت پسندن خلاف جاري آپريشن ضرب عضب پاڪستان کي دهشتگردي کان پاڪ ڪرڻ وارو مقصد ماڻڻ کانسواءِ ختم نه ڪئي ويندي. هن اهڙو اظهار جمعي ڏينهن اتر وزيرستان ايجنسي ۾ پاڪ افغان سرحد وٽ اڳين مورچن جي دوري دوران ڪيو. آرمي چيف کي ان موقعي تي آپريشن ضرب عضب جي ڪمانڊرن آپريشن بابت تفصيلي بريفنگ ڏني. آءِ ايس پي آر طرفان جاري ڪيل بيان مطابق فارميشن ڪمانڊرن آرمي چيف کي شال جي علائقي ۾ رهجي ويل ڪجهه دهشتگردن جي ٺڪاڻن جي خاتمي لاءِ اختيار ڪيل حڪمت عملي جي باري ۾ آگاهي ڏني. آرمي چيف ان موقعي تي شال جي علائقي ۾ آپريشن ڪاميابي سان مڪمل ڪري اٽڪل سمورين پهاڙي چوٽين کي دهشتگردن کان ڪليئر ڪندڙ فوجي جوانن سان ڳالهائيندي سندن ڪارڪردگي ۽ قربانين جي واکاڻ ڪئي. آرمي چيف چيو ته اها سندس لاءِ فخر جي ڳالهه آهي ته هو هڪ اهڙي فوج جي ڪمان ڪري رهيو آهي جيڪا هر قسم جي ڏکين حالتن کي ڪاميابي سان منهن ڏئي رهي آهي. آرمي چيف ملڪ جي شهري علائقن ۾ انٽيليجنس جي بنياد تي آپريشن ڪندڙ فورسز جي واکاڻ ڪندي کين هدايت ڪئي ته دهشتگردن، سندن ساٿين، حامين، مالي مدد فراهم ڪندڙن ۽ سليپر سيلز کي ختم ڪرڻ لاءِ بنا ڪنهن فرق ۽ متڀيد جي ڪارروائيون تيز ڪيون وڃن. هن چيو ته اسان پاڪستان کي دهشتگردن کان پاڪ ڪرڻ وارو حتمي مقصد ماڻڻ کانسواءِ ان آپريشن کي ختم نه ڪنداسين. آرمي چيف ڏکڻ وزيرستان ايجنسي وانا جو پڻ دورو ڪيو. ان موقعي تي آرمي چيف کي آپريشن متاثرن جي بحالي واري جاري ڪمن جي باري ۾ آگاهي ڏني وئي. ان کان اڳ آرمي چيف جو علائقي ۾ پهچڻ تي ڪمانڊر پشاور ڪور ليفٽيننٽ جنرل هدايت الرحمان شاندار استقبال ڪيو.

 

نيشنل ايڪشن پلان قوم سان مذاق آهي، هڪ ٽڪي جو به ڪم نه ٿي رهيو آهي:سپريم ڪورٽ

اسلام آباد (بيورو) سپريم ڪورٽ ڪورٽ  اين جي اوز جي فنڊنگ ۽ استعمال بابت تفصيل طلب ڪندي چيو آهي ته ايڪشن پلان ۽ نيب عوام جي اکين ۾ ڌوڙ وجهڻ لاءِ ٺاهيا ويا، ٻڌايو وڃي ته هن وقت تائين ايڪشن پلان تحت اين جي اوز خلاف ڪهڙي ڪارروائي ٿي آهي؟ سپريم ڪورٽ ۾ اين جي اوز جي رجسٽريشن بابت داخل درخواست هيٺ ٻڌڻي دوران  تي ٻڌڻي دوران جسٽس عظمت سعيد ريمارڪس ڏيندي  چيو ته نيب ۽ ايڪشن پلان عوام جي اکين ۾ ڌوڙ وجهڻ لاءِ جوڙيا ويا. هن چيو ته نيشنل ايڪشن پلان کي مذاق بڻايو ويو ۽ ان تي ڪو به عمل نه ٿي سگهيو آهي. جسٽس عظمت سعيد جو چوڻ هو ته ايڪشن پلان تحت دهشتگردن کي فنڊنگ روڪي سگهي ٿي. سپريم ڪورٽ پنهنجي رمارڪس ۾ چيو ته غير رجسٽرڊ اين جي اوز خلاف ڪارروائي ڇو ناهي ٿي؟ عدالت جو چوڻ هو ته حڪومت نيشنل ايڪشن پلان تي عمل نه ٿي ڪرائي سگهي. جسٽس جواد ايس خواجه رمارڪس ۾ چيو ته غير رجسٽرڊ اين جي اوز خلاف ڪارروائي ڇو ناهي ٿي؟ جسٽس مقبول باقر پنهنجي ريماڪس ۾ چيو ته ٻڌايو وڃي ته وزير اعظم هائوس جو خرچ ڪيترو آهي.

 

سازگار پاليسين سبب صوبي ۾ ڏيهي ۽ پرڏيهي سيڙپڪاري وڌي آهي: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته سنڌ روينيو بورڊ پنهنجي ڪارڪردگي کي وڌيڪ بهتر بڻائيندي جامع حڪمت جوڙي، بورڊ جي جون 2015 تائين 49.37 بيلن رپيا ٽيڪس جمع ڪرائڻ تي ان جي ڪارڪردگي ۽ پيشواراڻي صلاحيت کي ساراهيو آهي ۽ انتظاميه کي چيو آهي ته هو پنهنجي ڪارڪردگي کي وڌيڪ بهتر ڪندي جامع حڪمت عملي جوڙي ته جئين مالي سال 2017 تائين هڪ سئو ارب رپين جي سالياني رڪوري جو حدف پورو ڪري سگهي، ايس آر بي جي سالياني ڪارڪردگي رپورٽ تي تبصرور ڪندي وڏي وزير چيو ته ورلڊ بينڪ جي مشاورت سان ايس آر بي کي جديد نموني قائم ڪيو آهي، هن چيو ته کيس اميد آهي ته ايس آر بي نه صرف هي سال 2017 لاءِ پنهنجا مقرر حدف حاصل ڪري وٺندي پر مقرر حدف کان وڌيڪ رڪوري ڪري ڏيکاريندي، هن چيو ته هي سندس حڪومت جي گوڊ گورننس سبب آهي، سنڌ حڪومت جا سمورا ادارا بهتر نموني خدمتون ادا ڪري رهيا آهن، اسان هڪ سئو 26 بلين جا فنڊ جاري ڪيا ۽ گذريل مالي سال جي ترقياتي مد جا خرچ 118 بلين کان وڌيڪ هئا،هن چيو ته سنڌ صوبي ۾ ڪيتريون ترقياتي اسڪميون شروع ڪيون ويون آهن، سيڙپڪاري جي حوالي سان سازگار پاليسين سبب صوبي ۾ ملڪي ۽ بين الاقوامي سيڙپڪاري وڌي آهي، هن چيو ته صوبو قدرتي وسيلن سان مالا مال آهي ۽ سيڙپڪاري جا وسيع موقعا آهن جن مان دنيا جون سيڙپڪار ڪمپنيون ڀرپور نموني سان فائدو وٺي رهيون آهن.

 

مڪاني چونڊن دوران فوج مقرر ڪرڻ بابت غور ڪيو ويو پر هن وقت تائين فيصلو نه ٿي سگهيو آهي: اليڪشن ڪميشن

اسلام آباد (بيورو) اسلام آباد ۾ مڪاني چونڊن دوران فوج مقرر ڪرڻ تي غور ڪيو پيو وڃي الڪيشن ڪميشن جو چوڻ آهي ته ٽن ڏينهن اندر قانون سازي نه ڪئي وئي ته آرڊيننس جاري ڪيو ويندو. مڪاني چونڊن بابت الڪيشن ڪميشن جي اجلاس ۾ سيڪورٽي صورتحال جو جائزو ورتو ويو. اجلاس ۾ آءِ جي اسلام آباد بريفنگ ڏيندي چيو ته مڪاني چونڊن ۾ سڪيورٽي لاءِ پوليس جي نفري تمام گهٽ آهي. آءِ جي اسلام آباد طاهر اسلم چيو ته مڪاني چونڊن دوران ايف سي ۽ پوليس جي وڌيڪ نفري گهربل آهي. هن چيو ته سڪيورٽي لاءِ 10 هزار وڌيڪ پوليس اهلڪار گهربل هوندا. اليڪشن ڪميشن جي ترجمان جو چوڻ هو ته مڪاني چونڊن دوران فوج مقرر ڪرڻ بابت غور ڪيو ويو پر هن وقت تائين فيصلو نه ٿي سگهيو آهي. هن چيو ته اسلام آباد جي مڪاني چونڊن لاءِ 8 سئو پولنگ اسٽيشنون قائم ڪيون وينديون. اليڪشن ڪميشن جي ترجمان چيو ته مڪاني چونڊن ۾ 6 لک 80 هزار 455 ووٽر پنهنجي ووٽ جو حق ادا ڪندا. هن چيو ته جنرل ڪائونسل لاءِ هڪ هزار 995 اميدوار ميدان تي آهن، جڏهن ته چيئرمين ۽وائس چيئرمين لاءِ574 اميدوار  مقابلو ڪندا. اليڪشن ڪميشن جي ترجمان جو چوڻ هو ته مڪاني چونڊن لاءِ عملو تعليم کاتي کان طلب ڪيو ويو آهي.

 

عام چونڊن ۾ مبينا ڌانڌلين جي جاچ لاءِ قائم انڪوائري ڪميشن فيصلو محفوظ ڪري ورتو

اسلام آباد (بيورو) عام چونڊن ۾ مبينه ڌانڌلين جي جاچ لاءِ قائم انڪوائري ڪميشن پنهنجي جاچ مڪمل ڪرڻ کانپوءِ راءِ محفوظ ڪري ورتي آهي، اليڪشن ڪميشن  جي وڪيل سلمان اڪرم راجا چيو آهي ته تحريڪ انصاف منظم ڌانڌلي جا 8 الزام هنيا پر هڪ به ثابت نه ڪري سگهي، منظم ڌانڌلي نه ٿي آهي. انڪوائري ڪميشن جو اجلاس چيف جسٽس جسٽس ناصر المُلڪ جي سربراهي ۾ ٿيو، جنهن ۾ اليڪشن ڪميشن جي وڪيل سلمان اڪرم راجا پنهنجا دليل مڪمل ڪيا، جنهن کانپوءِ انڪوائري ڪميشن جي اجلاس جي ڪارروائي به مڪمل ڪئي وئي. انڪوائري ڪميشن جا مبينه ڌانڌلين جي جاچ لاءِ ڪل 39 اجلاس ٿيا، جن ۾ ٻه ان ڪيمرا اجلاس، هڪ چيمبر اجلاس ۽ 36 اوپن ڪورٽ اجلاس شامل آهن. انڪوائري ڪميشن جي اجلاسن ۾ مختلف پارٽين جا 69 شاهد پيش ٿيا. انڪوائري ڪميشن جو پهريون اجلاس 9 اپريل تي ٿيو، جڏهن ته پهريون اوپن ڪورٽ اجلاس 16 اپريل تي ٿيو. اليڪشن ڪميشن جي وڪيل جا دليل مڪمل ٿيڻ تي انڪوائري ڪميشن پنهنجي ڪارروائي مڪمل ڪري راءِ محفوظ ڪري ورتي آهي. چيف جسٽس جسٽس ناصر الملڪ جي سربراهي ۾ انڪوائري ڪميشن جو اڄ آخري اجلاس ٿيو، جنهن ۾ اليڪشن ڪميشن جي وڪيل سلمان اڪرم راجا پنهنجا دليل مڪمل ڪيا. اڄوڪي ڪارروائي دوران چيف جسٽس ٻه فهرستون ڇاپڻ بابت سلمان اڪرم راجا کان پڇا ڪئي، جنهن تي هن چيو ته 21 اپريل واري فهرست ۾ واڌو بيلٽ پيپر هئا، تنهنڪري 26 اپريل تي ٻيهر فهرست ڇاپي وئي. سلمان اڪرم راجا چيو ته عام چونڊون غلطين کان پاڪ نه هونديون آهن، هن چيو ته پولنگ اسٽيشنز تي رجسٽرڊ ووٽرز لاءِ بيلٽ پيپر ڇپرائڻ اليڪشن ڪميشن جي ذميواري آهي، رجسٽرڊ ووٽرز کان گهٽ بيلٽ پيپر ڇپرائڻ آئين جي ڀڃڪڙي آهي. هن چيو ته 1970 کان واڌو بيلٽ پيپر ڇاپڻ اليڪشن ڪميشن جو رائج طريقه ڪار آهي. هن چيو ته بيلٽ پيپرز 26 اپريل جي فيصلي تحت ڇاپيا ويا، 21 ۽ 26 اپريل تي 2 فهرستون تيار ڪيون ويون. هن چيو ته عام چونڊن ۾ ڪا به منظم ڌانڌلي نه ٿي آهي، پرزائيڊنگ آفيسرن جون انفرادي غلطيون ٿي سگهن ٿيون. هن چيو ته اضافي بيلٽ پيپر ڇاپڻ اليڪشن ڪميشن جي روايت آهي، 1970 کان واڌو بيلٽ پيپر ڇاپيا ويندا آهن. هن چيو ته آئين پابند ٿو ڪري ته اليڪشن ڪميشن رجسٽرڊ ووٽرز جيترا بيلٽ پيپر ڇاپي. هن چيو ته ڪنهن به خانگي پرنٽنگ پريس کان بيلٽ پيپر نه ڇاپرايا ويا ۽ منظم ڌانڌلي جو ڪو به ثبوت سامهون نه آيو آهي. پي ٽي آءِ جي وڪيل حفيظ پيرزاده چيو ته پنجاب جي 45 تڪن تي وڌيڪ بيلٽ پيپرز ڇاپيا ويا. هن چيو ته 11تڪن جي ريٽرننگ آفيسرن بي ضابطگين جو اعتراف ڪيو. هن چيو ته اين اي 21جي پولنگ اسٽيشن تي لسٽون نه لڳايون ويون. انڪوائري ڪميشن وڪيلن جا دليل مڪمل ٿيڻ تي ڪارروائي کي به مڪمل قرار ڏيندي راءِ کي محفوظ قرار ڏئي ڇڏيو آهي. انڪوائري ڪميشن واضح ڪيو آهي ته صدارتي آرڊيننس وسيلي انڪوائري ڪميشن جو قيام عمل ۾ آيو ۽ صدارتي آرڊيننس جو مدو جيئن ته 120 ڏينهن هوندو آهي، تنهنڪري ڪارروائي کي ان مدي کان اول مڪمل ڪيو ويو. وضاحت ۾ اهو به ڄاڻايو ويو آهي ته انڪوائري ڪميشن کي 45 ڏينهن ڏنا ويا هئا، جنهن جو مطلب 45 اجلاس هئا پر ڪميشن اها ڪارروائي 39 اجلاسن ۾ ئي اڪلائي ڇڏي.

 

فردوس عاشق اعواڻ جي بلاول ڀٽو سان ملاقات، پنجاب جي صورتحال تي ڳالهيون

ڪراچي(اسٽاف رپورٽر) اڳوڻي وفاقي وزير ۽ پ پ اڳواڻ فردوس عاشق اعواڻ اڄ هتي بلاول هائوس ۾ پاڪستان پپلزپارٽي جي چيئرمين بلاول ڀٽو زرداري سان ملاقات ڪئي ۽ کيس پنجاب جي سياسي صورتحال ۽ خاص طور تي سيالڪوٽ ضلعي جي صورتحال بابت آگاهي ڏني.فردوس عاشق اعواڻ پارٽي چيئرمين آڏو شڪايت ڪندي ٻڌايو ته پنجاب ۾ حڪومت طرفان گذريل پ پ دور جا ڪيترائي منصوبا گھٽائي يا وري مورڳو بند ڪري ڇڏيا آهن نواز حڪومت جي اهڙن فيصلن سان عوام جو وڏي پئماني تي نقصان ٿي رهيو آهي، هن چيو ته پيپلز حڪومت طرفان  منهنجي وزارت دوران سيالڪوٽ ۾ ٻهراڙين جي ماڻهن جي سهوليت لاءِ بس سروس منصوبو شروع ڪيو ويو هو جيڪو نواز حڪومت بند ڪري بسون ڪٻاڙخاني حوالي ڪري ڇڏيون آهن، فردوس عاشق پ پ چيئرمين کي پنجاب ۾ صوبائي توڙي وفاقي حڪومت طرفان پ پ خلاف ٿيندڙ انتقامي ڪاررواين بابت پڻ آگاهي ڏني.

 

ن ليگ جي ظلمن خلاف محمد بن قاسم ڳولڻ سنڌ آئي آهيان: فردوش عاشق اعواڻ

ڪراچي (اسٽاف رپورٽر) پاڪستان پيپلز پارٽي جي اڳواڻ فردوش عاشق اعواڻ چيو آهي ته مون پ پ نائب صدر پنجاب جي عهدي تان استعيفيٰ ڏئي ڇڏي آهي، جڏهن ته پارٽي چيئرمين بلاول ڀٽو زرداري منهنجي استعيفيٰ منظور نه ڪئي آهي، پارٽي ڇڏي نه پئي وڃان، پيپلز پارٽي ن ليگ جي ماتحت تنظيم نه آهي، پ پ ۾ صرف سنڌ حڪومت کي بچائڻ جي سياست ڪئي پئي وڃي، ن ليگ جي ظلمن خلاف محمد بن قاسم ڳولڻ سنڌ آئي آهيان، پيپلز پارٽي کي بچائڻو آهي ته هڪ هفتي تائين پارٽي ۾ هفتا صفائي مهم هلائڻي پوندي، اهڙن خيالن جو اظهار هن جمعي تي ڪراچي پريس ڪلب ۾ پريس ڪانفرنس کي خطاب ڪندي ڪيو، هن چيو ته پيپلز پارٽي عوامي جماعت آهي جيڪا شهيد ذوالفقار ڀٽو ٺاهي، شهيد بي بي بينطير ڀٽو پارٽي کي عوام ۾ مقبول ڪيو، ڀٽي جو مشن جو جاري رکيو پر هاڻ پ پ جي پاليسين کي ڇا ٿي ويو آهي سمجهه ۾ نه پيو اچي، پيپلز پارٽي حڪومت به ڪري رهي آهي ۽ اپوزيشن جو ڪردار ادا ڪري رهي آهي، جيڪڏهن اپوزيشن بڻجڻ بدران حڪومت کي ڪولهو ڏينداسين ته سياسي طورتي پنهنجي قبر پاڻ کوٽڻ برابر هوندو، هن چيو ته پنجاب ۾ ن ليگ جا ظلم عروج تي آهن، پيپلز پارٽي جي مخلص قيادت کي نشانو بڻايو پيو وڃي، پارٽي قيادت کي بار بار آگاهه ڪيو ته پنجاب جي حالتن تي ڌيان ڏنو وڃي پر ڪا خاص پاليسي نه جوڙي وئي جنهن لاءِ پ پ کي منظم ڪرڻ لاءِ محنت ڪندڙ ڪارڪنن پنجاب جي حالتن تي خوش نه آهي، ائين لڳي رهيو آهي ته سنڌ حڪومت کي بچائڻ لاءِ سياست ڪئي پئي وڃي، سنڌ حڪومت جي ڪوتاهين جي سزا سڄي پارٽي کي ڇو ڏني پئي وڃي، سنڌ سان تعلق رکندڙ پارٽي اڳواڻ صرف سنڌ حڪومت جي حالتن نه پر پارٽي جي حالتن به توجهه ڏئي، پنجاب ۾ پ پ لاوارث ٿي وئي آهي، منظور وٽو به اڪيلي سر ڪجهه نٿو ڪري سگهي،ڪارڪن مايوس آهن، ن ليگ سان فرينڊلي اپوزيشن بدران کيس ٽف ٽائيم ڏيڻو پوندو، پ پ ن ليگ جي ماتحت تنظيم نه آهي، هن چيو ته مان ڊاڪٽر آهيان، خبر آهي ته بيماري لاءِ ڪهڙي دوا ۽ سرجري جي ضرورت آهي، پ پ کي هيميو پيٿڪ علاج جي نه پر سرجري جي ضرورت آهي، پارٽي ۾ هفتا صفائي مهم هلائي گند کي صاف ڪيو وڃي، هن چيو ته پ پ اڄ به عوام جي پارٽي آهي، بلاول ڀٽو سان ملاقات ڪري کيس تحفظات کان آگاهه ڪيو آهي، هن شڪايتن جي ازالي جي خاطري ڪرائي آهي ۽ چيو آهي ته هو جلد پنجاب جو دورو ڪندو.

 

الله تعاليٰ پاڪستان کي دهشتگردن جي ناپاڪ وجود کان پاڪ ڪري: طاهر قادري

لاهور (بيورو) تحريڪ منهاج قرآن جي باني محمد طاهر قادري جمعي جي نماز جامع المنهاج ۾ ادا ڪئي، جمعي جي نماز کانپوءِ هن تحريڪ منهاج القرآن جي رفيقن، ۽ سوين نمازن سان ملاقات ڪئي، هن ٻڌايو ته آمريڪي رياست ٽيڪسا جي شهر ڊيلاس مان به نوجوان تفهيم دين لاءِ اعتڪاف جو حصو بڻجڻ آيا آهن، هن نوجوانن جو تعارف ڪرايو ۽ چيو ته رمضان شريف جي آخري عشري ۾ ايمان ۽ يقين جي عنوان تي ڳالهه ٻولهه ٿيندي، اسلاميه پاڪستان هن مبارڪ ڏينهن لاءِ وقت ڪڍي ۽ اعتڪاف جو حصو بڻجي، هن ان موقعي تي مختصر خطاب ڪندي چيو ته هن وقت اسلامي دنيا خاص ڪري پاڪستان دهشتگردي جو شڪار آهي، الله تعاليٰ پاڪستان کي دهشتگردن جي ناپاڪا وجود کان پاڪ ڪري ۽ پڙهيل لکيل نوجوانن کان پنهنجي دين جي سربلندي جو ڪم وٺي، هن چيو ته نبي اڪرم صلم سان محبت سڀني عبادتن جو روح آهي، نماز جمعي جو خطبو علامه ارشاد احمد سعدي ڏنو، دعا فيض رحمان دراني ڪرائي.

 

حڪومت هاڻي انتقامي ڪارروايون پئي ڪري جيڪو عمل مذمت جوڳو آهي: عمران خان

اسلام آباد (بيورو) پاڪستان تحريڪ انصاف جي سربراهه عمران خان چيو آهي ته شهباز شريف سندس ڀيڻ کي فون ڪري ڌمڪيون ڏنيون آهن، ڪيس پنجاب حڪومت خلاف داخل ڪرايو ويندو. اسلام آباد ۾ ميڊيا سان ڳالهائيندي عمران خان چيو ته شهباز شريف طرفان سندس ڀيڻ کي فون ڪرڻ افسوسناڪ عمل آهي. هن چيو ته پنجاب پوليس گلو پوليس بڻجي وئي آهي جيڪا انتقام تي لهي آئي آهي. عمران خان جو چوڻ هو ته حڪومت هاڻ انتقامي ڪارروايون پئي ڪري جيڪو عمل مذمت جوڳو آهي.