تازيون خبرون

Daily Archives: July 3, 2015

ملڪ ۾ وڌيڪ ڇا ٿيڻ وارو آهي؟؛قيوم سنديلو

ملڪ ۾ هن وقت سياسي صورتحال انتهائي خطرناڪ حد تائين ڏڦيڙ جو شڪار ٿي وئي آهي، پهريون دهشتگردن خلاف ڪارروايون هليون هيون ته ڪجهه امن ٿيو ته ڪجهه وري بيان بازي پڻ هلندي هئي پر جڏهن کان ڪرپشن خلاف ڪات اڀا ڪيا ويا آهن ان کان پوءِ صورتحال ڏڦيڙ جو شڪار ٿي وئي آهي پر ان وڌيڪ صورتحال ان وقت خراب ٿي وئي جڏهن اڳوڻي صدر آصف علي زرداري پنهنجي تقرير ڪئي، ان کان پوءِ ته هن وقت تائين صورتحال ويتر پوري طرح سان ڏڦيڙ جو شڪار بڻجي وئي آهي، هڪ ته پ پ جي گهڻي قدر قيادت ٻاهرين ملڪ رواني ٿي وئي آهي، ان کان پوءِ قيادت جي اهم ماڻهن کي پڻ رينجرز يا نيب پاران گرفتار ڪيو ويو آهي ۽ انهن پڻ وڏا انڪشاف پڻ ڪيا آهن جنهن کان پوءِ هن وقت نه سمجهه ايندڙ صورتحال ملڪ مٿان ڇانيل آهي.

هن صورتحال ۾ ڪجهه امن تڏهن ٿيو آهي جڏهن گرمي جي لهر ڏيڊ هزار کان وڌيڪ ماڻهن کي ماري وڌو آهي جنهن کان پوءِ صوبائي وزير وفاقي سرڪار ۽ ڪي اليڪٽرڪ کي ذميوار بڻايو آهي ته وري وفاقي سرڪار صوبائي حڪومت کي ذميوار بڻايو آهي ان بيان بازي ۾ ڪجهه توجهه مٿي اهم اشو تان هٽي وئي آهي. پر ان جي باوجود نيب ۽ رينجرز پاران پنهنجون ڪارروايون روايت موجب جاري ۽ ساري آهي جنهن مان اها ڳالهه پوري طرح سان واضح ٿي رهي آهي ته اسٽيبلشمينٽ طرفان ڪيل فيصلا جاري آهن، پر ڪجهه صحافين پاران اهڙيون ڳالهيون به ڪيون پيون وڃن ته اڳوڻي صدر آصف علي زرداري جي تقريب کان پوءِ اسٽيبلشمينٽ پٺتي هٽي وئي آهي پر جيڪڏهن ائين هجي ها ته پوءِ لازمي طور تي ٻاهر ويل قيادت واپس موٽي ها ۽ جاري رهندڙ ڪارروايون بند ٿي وڃن ها يا وري پڪڙيل ننڍين مڇين کي آزاد ڪرڻ سميت ڪجهه رليف وارا ڪم ٿيڻ گهرجن ها پر هن وقت اهڙا ڪي به ڪم نظر ناهن آيا.

هي پهريون ڀيرو ٿيو آهي جو سوشل ميڊيا پاران ڪرپشن خلاف رينجرز جي ڪاررواين جي پوري طرح سان حمايت ڪئي وئي آهي ۽ زور شور سان اهي پڻ مطالبا ڪيا پيا وڃن ته فوري طور تي ننڍين مڇين کي ڇڏي ڪري وڏين ڪرپٽ مڇين کي هٿيڪو ڪيو وڃي، جنهن کان پوءِ ئي صوبائي سرڪار ويتر پريشاني جو شڪار بڻجي وئي آهي. نه ته اڳ ۾ ائين ٿيندو هو ته جيڪڏهن وردي وارا ڪو اهڙو ڪم ڪندا هئا جيڪو سرڪار جي دائري ۾ ايندو هو ته ان جي سخت مزاحمت ڪئي ويندي هئي پر هاڻي لڳي ٿو ته عوام پڻ فيصلو ڪري ورتو آهي ته هاڻي ڪنهن به طرح سان ڪرپشن کي برداشت نه ڪيو ويندو، اهڙي صورتحال کان پوءِ ائين پيو لڳي ڄڻ ته رينجرز پاران پڻ ڪاررواين ۾ تيزي آندي وئي آهي.

هڪ پاسي اهڙي صورتحال آهي ته ٻئي پاسي اسلام آباد جون هوائون سنڌ جي سياسي صورتحال ۾ نئين گرم هوا اچڻ جا ڏيک ٻڌائي رهيون آهن، اسلام آباد ۾ اهي ڳالهيون پيون هلن ته وفاقي سرڪار رينجرز کي هاڻي دهشتگردن خلاف ڪاررواين کان پوءِ ڪرپشن خلاف ڪارروائي لاءِ پڻ فري هينڊ ڏئي ڇڏيو آهي جنهن کان پوءِ صوبائي سرڪار سخت ڪاوڙ جو اظهار ڪيو آهي جيڪا ڪاوڙ آصف علي زرداري جي تقرير مان واضح ٿي وئي آهي، ان کان پوءِ اهو پيو ٻڌايو وڃي ته جيڪڏهن سياسي صورتحال مزاحمت واري ڳالهه تان نه هٽي پوءِ ته سنڌ ۾ گورنر راج لڳايو ويندو جنهن جي لاءِ ٻڌڻ ۾ پڻ اهو آيو آهي ته نئين گورنر جو نالو پڻ فائينل ڪيو ويو آهي.

اچرج جهڙي ڳالهه اها به آهي فوج ضرب عضب آپريشن تقريبن پورو ڪرڻ واري آهي مطلب ته ان کان پوءِ فوج لازمي طور تي شهرن ۾ آپريشن ڪندي جنهن بابت آرمي چيف جنرل راحيل شريف پڻ فوجي جوانن کي خطاب ۾ چوندو آيو آهي ته شهرن ۾ به دهشتگردن ۽ انهن جي سهولتڪارن کي قانون جي ڪٽهڙي ۾ آندو ويندو. جنهن کان پوءِ اها صورتحال به واضح آهي ته هاڻي سنڌ جو وارو اچڻ وارو آهي، دهشتگردن کي ختم ڪرڻ وارو فيصلو ته واضح آهي پر هن ڀيري ڪرپشن ڪندڙن کي پڻ وائکو ڪرڻ جو مڪمل طور تي فيصلو ڪيو ويو آهي. هاڻي ڏسجي ته مٿيون هوائون ڇا واقعي به ڪراچي ۾ گرم ٿي سگهن ٿيون يا وري ائين ٿيندو جيئين اسڪاٽ لينڊ يارڊ طارق مير جي بيان کي پنهنجي رڪارڊ جو حصو مڃڻ کان انڪار ڪري ايم ڪيو ايم کي عارضي خوشي فراهم ڪري ڇڏي آهي جنهن کان پوءِ ايم ڪيو ايم پاران صحافين کي ڌمڪين وارا ايس ايم موڪلڻ شروع ڪري ڇڏيا آهن. هڪ پاسي ملڪي صورتحال اهڙي آهي ته ٻئي پاسي لنڊن صورتحال تي پڻ عوام جون اکيون کتل آهن، هڪ پاسي لنڊن عمران فاروق قتل ڪيس ۾ اڳتي وڌي رهيو آهي ته ٻئي پاسي اهي ڳالهيون به ظاهر ٿيڻ شروع ٿي ويون آهن اسڪاٽ لينڊ يارڊ جي جاچ دوران ايم ڪيو ايم ڀارت کان فنڊ وٺڻ واريون ڳالهيون مڃي ورتيون آهن ان کان پوءِ ڄڻ ته باقاعده طور تي ملڪي سياسي صورتحال دٻڻ ۾ ڦاسي چڪي آهي، ايم ڪيو ايم ۽ پ پ جي دوستي ته پنهنجي جڳهه تي برقرار آهي پر اها دوستي هاڻي پ پ کي ڳچي ۾ پوڻ لڳي آهي جنهن صورتحال پڻ پيپلن کي پريشان ڪري ڇڏيو آهي. هاڻي ڏسجي ته ايندڙن ڏينهن ۾ ڇا ٿيندو ۽ ڇا ٿيڻ وارو آهي، پر هڪ ڳالهه ضرور آهي ته جيڪڏهن اسٽيبلشمينٽ هن ساڳئي صورتحال تي نئين آرمي چيف جي اچڻ کان پوءِ به ائين ئي هلايو ته پوءِ ايندڙ ڪجهه سالن کان پوءِ پاڪستان هڪ نئون پاڪستان بڻجي سگهي ٿو پر جيڪڏهن ماضي وانگر جيئين پرويز مشرف، اسلم بيگ پنهنجي فائدي لاءِ سياست کي پنهنجي طرز تي هلايو ته پوءِ شايد وري صورتحال ائين ئي نه بڻجي وڃي جيئين اڳ ۾ هئي مطلب ته تون پنهنجو ڪم ڪر اسان پنهنجو ڪم ڪيون ٿا باقي عوام اليڪشن ڏهاڙي ياد ڪيو ويندو.

 

سنڌ ۾ 37 ٽي ايم اوز جي سسپينڊ ٿيڻ وارو معاملو؛ايم بي عرساڻي

2001 کان اڳ ۾ تعلقه / ٽائون ميونسپل ايڊمنسٽريشن ( ٽي ايم اي) ۽ تعلقه ميونسپل آفيسر (ٽي ايم او) جو نالو نشان ڪو نه هو. ان کان اڳ ۾ ميٽرو پوليٽن ڪارپوريشن، ميونسپل ڪارپوريشن، ڊسٽرڪٽ ڪائونسلون، ميونسپل ڪاميٽيون ۽ ٽائون ڪاميٽيون هونديون هيون، جن جي آفيسرن کي ڊسٽرڪٽ ميونسپل ڪمشنر، ميونسپل ڪمشنر، چيف آفيسر، ڊسٽرڪٽ ڪائونسل، چيف ميونسپل آفيسر ۽ ٽائون آفيسر سڏيو ويندو هو. 2001 ۾ تعلقي جي سڀني ميونسپل ۽ ٽائون ڪميٽين کي ملائي تعلقه / ٽائون ميونسپل ايڊمنسٽريشن ٺاهي وئي، جن کي هن نظام تحت ٺهندڙ سٽي ڊسٽرڪٽ گورنمينٽ ۽ ڊسٽرڪٽ گورنمينٽ وانگر مالي طور آسودو بڻايو ويو، پر ان تي چيڪ بيلنس لاءِ ڪو به بندوبست نه ڪيو ويو، اٽلندو 1979 جي آرڊيننس تحت قائم ڪيل سپروائيزري ڪيڊر کي به ختم ڪيو ويو، جنهن ڪري هر آفيسر ٽي ايم او ٿيڻ جي چڪر ۾ لڳي ويو. پ پ پ حڪومت اچڻ کانپوءِ هن کاتي ته ڇا، پر سئي گئس، بئنڪن، يونيورسٽين ۽ ٻين تعليمي ادارن جا آفيسر به سياسي اڳواڻن ۽ سروس، جنرل ايڊمنسٽريشن ۽ ڪوآرڊينيشن کاتي ۽ لوڪل گورنمينٽ ۾ سيڪريٽريٽ سطح تي ويٺل اعليٰ شان وارن ڊي ايم جي، ايڪس پي سي ايس ۽ پي ايس ايس آفيسرن جي مدد سان ٽي ايم او بڻجي ويا، جيڪو انهن حشر ڪيو اهو ڪنهن کان به ڳجهو نه آهي ڇو ته انهن جي وقت ۾ پگهارن تي 20 کان 40 لک مس خرچ ٿيندا هئا ۽ ڪروڙ ٻه کاڄي ويندو هو.

2013 ۾ آيل سپريم ڪورٽ جي فيصلي تحت اهي همراهه هٽي ويا، جنهن ڪري حڪمران ڌر سان واسطو يا انهن تايئن پهچ رکندڙ ماڻهو انيشل اپائنٽمينٽ وسيلي يارهين، سورهين ۽ سترهين گريڊ ۾ ڀرتي ٿيندا رهيا ۽ اها ڀرتي ڏيڍ ٻه سال هلي، جن جي ڪا به سينيارٽي لسٽ جاري نه ٿي آهي جنهن ڪري سنڌ لوڪل گورنمينٽ بورڊ طرفان ڪنهن کي يارهين گريڊ جو لکي بدلي ڪيو ٿو وڃي ته وري جڏهن مهيني ڏيڍ بعد اهو ڪٿي مقرر ڪيو وڃي ٿو ته انجو گريڊ سورهون ڄاڻايو ٿو وڃي. ائين ڪي ئي همراهه 17هين گريڊ تي وڃي پهتا آهن.

تعلقه ميونسپل ايڊمنسٽريشنس جن کي هاڻي ميونسپل ڪاميٽي ۽ ٽائون ڪاميٽيءَ جو نالو ڏنو ويو آهي انهن جي خرابي جو سبب ڊيپوٽيشن تي مقرري ۽ سفارش تي ڀرتي ته آهي ئي آهي، پر ان تعلقي جي بااثرسياستدان کي به آجو نه ٿو ڪرار ڏئي سگهجي، ڇو ته انهن ادارن ۾ ٽرانسفر پوسٽنگ انهن جي چوڻ تي ٿيندي رهي آهي جنهن ڪري اهي اهو ئي ڪرڻ لاءِ مجبور آهن، جيڪو کين پوسٽنگ ڪرائيندڙ چون، پوءِ به جيستائين آغا سراج دُراني هو تيستائين ٻين کاتن جي مداخلت نه هئي، پر شرجيل صاحب کاتي کي نه هلائي سگهڻ جو اڻ سڌي طرح اعتراف ڪندي ڊپٽي ڪمشنرن کي ڊسٽرڪٽ ڪائونسلن ۽ ميونسپل ڪاميٽين جو ايڊمنسٽريٽر ۽ ڪمشنرن کي ڪنٽرولنگ اٿارٽي، جڏهن ته اسسٽنٽ ڪمشنرن کي ٽائون ڪاميٽين ۽ يونين ڪائونسلن جو ايڊمنسٽريٽر ۽ ڊپٽي ڪمشنرن کي ڪنٽرولنگ اٿارٽي مقرر ڪرايو آهي. هاڻي ٻڌڻ ۾ آيو آهي ته ڊپٽي ڪمشنرن کي ٽائون ڪاميٽين جا بل / چيڪ ڪائونٽرسائين ڪرڻ جا اختيار ڏنا پيا وڃن، ڄڻ ته انهن ڊسٽرڪٽ ڪائونسلن ۽ ميونسپل ڪاميٽين کي سڌاري ڇڏيو آهي.

هوئن به غور ڪبو ته جڏهن ملڪ ۾ ڪرپشن نه هئي ته به ٿاڻي ۽ تپيدار وٽ رائج هئي، هن کاتي جا سب رجسٽرار ۽ ڊپٽي ڪمشنرن جا پي اي به ڪروڙ پتي آهن جڏهن ته ڊپٽي ڪمشنرن جي اٿڻي وهڻي به مغل شهزادن کان گهٽ نه آهي عجب جي ڳالهه آهي ته اهي واحد آفيسر آهن جن جي هائوسن تي کاڌو به رشوت جو پچندو آهي، جيڪو تپيدار ۽ مختيارڪار پهچائيندا آهن، پوءِ به ڊي ايم جي ۽ ايڪس پي سي ايس وارا ته ٺهيو، پر بنا ڪمشن جي اسسٽنٽ ڪمشنر جي پروموشن وٺي ڊپٽي ڪمشنر بڻيلن کي به هر مرض جو علاج سمجهيو وڃي ٿو، جنهن ڪري هڪ نامينيشن ذريعي ڀرتي ٿيل ۽ آئوٽ آف ٽرن ذريعي پروموشن حاصل ڪندڙ ڪمشنر چئي رهيو هو ته جڏهن به ڪو بحران پيدا ٿيو آهي ته ان کي روينيو وارن ختم ڪيو آهي، ان کان سوال آهي ته جيڪڏهن کائن اهي گاڏيون، سهوليتون، فنڊ ۽ نيٽ ورڪ کسيو وڃي ته ڇا پوءِ به هو اهڙيون ٻٽاڪون هڻي سگهندو؟ هنن لاءِ ته هڪ سال به ٽرانسپيرينسي انٽرنيشنل به لکيو هو ته سنڌ جي روينيو کاتي ۾ سڀ کان وڌيڪ ڪرپشن ٿي رهي آهي، اها ڪرپشن / پيسي جي مڳي ناهي ته ٻيو ڇا آهي جو ستين گريڊ جو تپيدار رئيس، ڏهين يارهين گريڊ جو سپروائيزر ميان صاحب ۽ چوڏهين گريڊ جو اسسٽنٽ مختيارڪار / وڏو منشي خان صاحب سڏائي رهيا آهن، جنهن ڪري ڊپٽي ڪمشنر لوڪل گورنمينٽ جي وزير ۽ سيڪريٽري جي سڏ تي به نه ايندا آهن، اها ڪيڏي نه ناداني آهي جو پوءِ به مڪاني ادارن جي وزير انهن جي وسيلي مڪاني ادارن ۾ نظم ۽ ضبط قائم ڪرڻ ٿو گهري، اها حڪمت عملي نه پر ناڪاميءَ جو اعتراف آهي.

جڏهن ايڊمنسٽريٽر يعني ڪائونسلن جا هيڊ روينيو وارا آهن ته پوءِ انهن ۾ ٿيندڙ بي قاعدگين جي سزا صرف ٽي ايم اوز کي ڇو؟ وڏا اختيار ته ايڊمنسٽريٽر ۽ ڪنٽرولنگ اٿارٽي وٽ آهن، ڀلا جيڪڏهن پوءِ به ٽي ايم او ذميوار آهي ته پوءِ صرف 37 ڇو؟ ڇا باقي پاڪ صاف آهن؟ ان مان ته اهو به ظاهر آهي ته روينيو وارن جي ايدمنسٽريٽر ٿيڻ سان فرق نه پيو آهي ته پوءِ انهن کي قائم رکڻ جي ڪهڙي ضرورت؟ اتي ان ڳالهه تي سوچڻ جي ضرورت آهي ته لوڪل گورنمينٽ جي سپروائيزري ڪيڊر يعني ڊولپمينٽ آفيسرن، اسسسٽنٽ ڊائريڪٽرن ۽ ڊائريڪٽرن جي فعال هجڻ وقت ايڏي بي قاعدگي ڇو نه هئي،

ان مان ته اهو لڳي رهيو آهي ته سندن ڪارڪردگي ڊپٽي ڪمشنرن ۽ ڪمشنرن جي مصروف هجڻ ۽ مٿي ڄاڻايل سببن ڪري کائن بهتر هئي.

انڪري جڏهن روينيو وارا به فيل ٿي ويا آهن ته پوءِ يا ته لوڪل ڪائونسل رينجرس حوالي ڪيون وڃن يا مڪاني ادارن جي سپروائيزري ڪيڊر کي با اختيار بڻائي گهربل سهوليتون مهيا ڪيون وڃن ۽ تعلقي سطح تي ٿيندڙ سياسي مداخلت کي بلڪل بند ڪيو وڃي، ڇو ته اهي مڪاني ادارن ۾ ٿيندڙ بي قاعدگين جا مک جوابدار آهن، ڀلا جيڪڏهن وزير موصوف مجبور آهي ته پوءِ کاتي کي اڌ تتر ۽ اڌ بٽير بڻائڻ بجاءِ ان کي روينيو يا سروس جنرل ايڊمنسٽريشن ۽ ڪوآرڊينيشن کاتي ۾ ضم ڪرائي پنهنجي کاتي مان ۽ کاتي جي پاڻ مان جان ڇڏائي.

(ايم بي عرساڻي)