تازيون خبرون

Daily Archives: July 3, 2015

پاڪستان دهشتگردي جي سمورن بزدلاڻين ڪاررواين جي مذمت ڪري ٿو: پرڏيهي ترجمان

اسلام آباد(بيورو) پاڪستان هڪ ڀيرو ٻيهر ان عزم جو ورجاءُ ڪيو آهي ته اهو افغانستان ۾ امن، استحڪام ۽ سلامتي چاهي ٿو ۽ ان هميشه افغانستان ۾ مضبوط ۽ جمهوري نظام جي حمايت ڪئي آهي ۽ دهشتگردي جي سمورن بزدلاڻين ڪاررواين جي مذمت ڪري ٿو. پرڏيهي آفيس جي ترجمان قاضي خليل الله خميس ڏينهن هتي پنهنجي هفتوار پريس بريفنگ ڏيندي چيو ته پاڪستان هر قسم جي دهشتگردي جي مذمت جو ورجاءُ ڪري ٿو. هن چيو ته اسان افغانستان جي حڪومتجي ويجهي سهڪار سان دهشتگردي خلاف جنگ جا خواهشند آهيون. افغان صدر اشرف غني جي پاڪستان خلاف ريمارڪس بابت هڪ سوال جو جواب ڏيندي هن چيو ته اهي ريمارڪس حقيقي معنيٰ ۾ غلط آهن. هن چيو ته اسان افغانستان سان بهتر ناتن جي عزم تي قائم آهيون ۽ دهشتگردي خلاف جنگ ۾ افغان حڪومت سان سهڪار ڪري رهيا آهيون. هڪ سوال جو جواب ڏيندي هن چيو ته پاڪستان چين ۾ تازو طالبان ۽ افغان حڪومت جي نمائندن وچ ۾ ٿيل ڳالهين ۾ سهولت فراهم ڪئي هئي. انگور اڊا گيٽ جي ٿيل تازي واقعي بابت هڪ سوال جو جواب ڏيندي پرڏيهي ترجمان چيو ته آءِ ايس پي آر پاران ان حوالي سان نوٽيفيڪيشن جاري ڪيو ويو هو جنهن ۾ چيو ويو آهي ته انگور اڊا گيٽ وٽ افغانستان طرفان ننڍن هٿيارن جون گوليون هلايون ويون هيون جنهن سبب 2 پاڪستاني سيڪيورٽي اهلڪار زخمي ٿي پيا هئا. پرڏيهي ترجمان چيو ته آءِ ايس پي آر مطابق پاڪستاني فورسز جوابي ڪاروائي ڪئي ۽ انهن پوزيشن کي نشانو بڻايو جتان فائرنگ ڪئي وئي. ترجمان چيو ته انگور اڊا گيٽ پاڪستان جي سرحد اندر ئي تعمير ڪيل آهي ۽ ان حوالي سان پاڪستان ۽ افغانستان وچ ۾ ڪا به سرحدي خلاف ورزي نه ٿي آهي. هن چيو ته علائقائي استحڪام خاص طور تي افغانستان ۾ امن ۽ سلامتي ۽ تحفظ ٻنهي ملڪن پاڪستان ۽ افغانستان ۽ خطي جي مفاد ۾ آهي. هڪ سوال جو جواب ڏيندي پرڏيهي ترجمان چيو ته افغان گهرو وزير جو پاڪستان جو رٿيل دورو ٻنهي ملڪن وچ ۾ ڪنهن ڇڪتاڻ سبب نه پر افغانستان جي اندروني صورتحال سبب ملتوي ٿي ويو آهي. هڪ ٻي سوال جو جواب ڏيندي ترجمان تصديق ڪئي ته پاڪستان جي حڪومت ايم ڪيو ايم ذريعي پاڪستان جي ملڪي معاملن ۾ ڀارتي ڳجهي اداري ”را” جي ملوث هئڻ جي حوالي سان بي بي سي جي رپورٽ جو جائزو وٺڻ لاءِ برطانوي اختيارين سان رابطي ۾ آهي. هن چيو ته ان حوالي سان پرڏيهي آفيس طرفان موڪليل درخواست تي برطانوي حڪومت طرفان ان حوالي سان اڃا تائين ڪو جواب نه آيو آهي. قاضي خليل الله هڪ سوال تي چيو ته گڏيل قومن جي اداري ۾ پاڪستان جي مستقل سفير ڊاڪٽر مليحه لوڌي پرڏيهي آفيس سان معمول جي صلاح مشوري ۽ وزيراعظم محمد نواز شريف طرفان گڏيل قومن جي سيپٽمبر ۾ رٿيل دوري جي معاملن کي حتمي شڪل ڏيڻ لاءِ پاڪستان آيل آهي. پرڏيهي ترجمان چيو ته وزيراعظم محمد نواز شريف هلندڙ سال سيپٽمبر ۾ گڏيل قومن واري اداري جي سالياني اجلاس ۾ شرڪت ڪندو. هن چيو ته گڏيل قومن جي اداري جي قيام جي 70 هين سالگره سبب سيپٽمبر جو مهينو نهايت اهم آهي. پاڪستان جي دفاعي تجزئي نگار زاهد حامد جي گرفتاري ۽ سزا بابت هڪ سوال جو جواب ڏيندي پرڏيهي ترجمان چيو ته سعودي عرب ۾ پاڪستاني سفارتخاني طرفان اڃا تائين ان سزا بابت تصديق نه ڪئي وئي آهي تنهن هوندي به سعوديس سفارتخاني آگاهي ڏني آهي ته زاهد حامد کي جون جي شروع ۾ گرفتار ڪيو ويو هو ۽ ان کان پوءِ سفارتخانو قونصلر رسائي حاصل ڪرڻ لاءِ سعودي عرب جي مقامي انتظاميه سان ڪم ڪري رهيو آهي ۽ اسان زاهد حامد جي سزا بابت تصديق جي انتظار ۾ آهيون. هڪ سوال جو جواب ڏيندي پرڏيهي ترجمان چيو ته اڃا تائين پاڪستان توڙي ڀارت ٻنهي پنهنجن وزيراعظمن وچ ۾ ٻه طرفي ملاقات بابت ڪا دلچسپي نه ڏيکاري آهي جيڪي جولاءِ جي ٻئين هفتي ۾ اوفه ( جمهوريه بشڪورتستان) ۾ ٿيندڙ شنگهائي سهڪار تنظيم ۽ برڪس جي سالياني اجلاس ۾ شرڪت لاءِ روس ويندا.

 

بالي ووڊ فلم ”اي بي سي ڊي-2“ جي ڪاميابيءَ سان اداڪارا شرڌا ڪپور جو دماغ ستين آسمان تي پهچي ويو

ممبئي (شوبز نيوز) بالي ووڊ فلم ”اي بي سي ڊي-2“ جي ڪاميابيءَ سان اداڪارا شرڌا ڪپور جو دماغ ستين آسمان تي پهچي ويو آهي. نئين فلمن ”رنگون“ ۾ اداڪارا ڪنگنا رناوت کي ڪاسٽ ڪرڻ تي گوڙ ڪرڻ شروع ڪري ڇڏيائين. بالي ووڊ فلم ”اي بي سي ڊي-2“ جي ڪاميابيءَ سهڻي اداڪارا شرڌا ڪپور جو دماغ سَتين آسمان تي پڄائي ڇڏيو آهي جو هوءَ هاڻي ماڻهن سان جھيڙا ڪرڻ تي لَهي آئي آهي. فلم 100 ڪروڙ ڪلب ۾ شامل ٿي وئي آهي ۽ اڃا اهو سلسلو جاري آهي. ان دوران شرڌا جا نخرا به ٺَهن ٿا. اهو ئي سبب آهي جو هدايتڪار وشال ڀردواج جي نئين ايندڙ فلم ”رنگون“ ۾ ڪنگنا رناوت کي ڪاسٽ ڪرڻ تي هو ءَ سخت ناراض نظر اچي رهي هئي. سندس چوڻ هو ته منهنجي جاءِ تي ڪنگنا کي ڪاسٽ ٿيندو ڏسي کيس تمام خراب لڳو آهي. شرڌا ڪپور ان کان پهريان به وشال ڀردواج جي فلم ”حيدر“ ۾ به ڪم ڪري چڪي آهي. ڪشميري واديءَ ۾ فلمايل ”حيدر“ ۾ شرڌا ڪپور سان شاهد ڪپور هيرو جو ڪردار ادا ڪيو هو.

 

بگ بي اميتاڀ بچن نئين فلم ۾ پنهنجي گھر واري جيا بچن سان جوڙي سِڌي ڪندو

ممبئي (شوبز نيوز) بالي ووڊ جو بگ بي اميتاڀ بچن نئين فلم ۾ پنهنجي گھر واري جيا بچن سان جوڙي سِڌي ڪندو، ٻنهي اداڪارن کي بنگالي فلم ”بيلا سيشي“ جي ريميڪ ۾ گڏ ڪاسٽ ڪيو ويو آهي، اميتاڀ بچن ۽ جيا هڪ ڀيرو ٻيهر وڏي اسڪرين تي گڏ اداڪاري ڪندي نظر اچڻ وارا آهن. اميتاڀ بچن گھڻي وقت کان پوءِ پنهنجي گھر واريءَ سان جوڙي جي حيثيت ۾ بنگالي فلم ”بيلا سيشي“ ۾ اداڪاريءَ جا جوهر ڏيکاريندو، ”بيلا سيشي“ باغبان جھڙي فلم هوندي، ”باغبان“ ۾ اميتاڀ بچن ۽ هيما مالني مرڪزي ڪردار ادا ڪيو هو

 

شاهه رخ خان بالي ووڊ ۾ پنهنجي 23 سال مڪمل ٿيڻ جو جشن ملهايو

ممبئي (شوبز نيوز) گذريل هفتي اداڪار شاهه رخ خان بالي ووڊ ۾ پنهنجي 23 سال مڪمل ٿيڻ جو جشن ملهايو هو ۽ آخر هن واعدي موجب پنهنجي چاهيندڙن جا ٿورا مڃڻ لاءِ ٽوئٽر تي هڪ وڊيو به پوسٽ ڪيو. 2 منٽن واري ان وڊيو ۾ شاهه رخ خان اڇي شرٽ ۾ نظر اچي رهيو آهي، جنهن ۾ هن پنهنجي فلمي ڪيريئر دوران ڀرپور ساٿ ڏيڻ تي پنهنجن چاهيندڙن جا ٿورا مڃا. جيتوڻيڪ ان وڊيو ۾ چاهيندڙن جا ٿورا مڃا ويا آهن پر ڪنگ خان ٽوئيٽر تي به چيو آهي ته اها سندس بهترين ڪوشش نه هئي. جيئن ته شاهه رخ خان هيءَ وڊيو ڪجھه دير سان پوسٽ ڪئي، هن دير تي معافي به گھري. پنهنجي آڱرين تي 23 جو انگ ڳڻيندي شاهه رخ سڄي دنيا ۾ موجود پنهنجي چاهيندڙن جا ٿورا مڃا، جِن سندس تصوير پوسٽ ڪئي. بالي ووڊ ۾ ٻِن ڏهاڪن واري ڪامياب سفر کان پوءِ ڪنگ خان پنهنجي چاهيندڙن سان گڏوگڏ انهن ماڻهن جا ٿورا به مڃا جيڪي کيس پسند ڪندا آهن، جڏهن ته گڏوگڏ سندس چوڻ هو ته هو لنڊن ۾ سائيڪلنگ جي هڪ وڊيو به ٺاهڻ چاهي پيو پر ايئن ڪري نه سگھيو. بالي ووڊ جي 100 ڪروڙ ڪلب ۾ شامل شاهه رخ خان کي ايندڙ سال فلم ”رئيس“ ۾ ماهره خان سان ڏٺو ويندو، جيڪا عيد تي رليز ٿيندي. جڏهن ته سندس چاهيندڙ 14 سالن کان پوءِ کيس فلم ”دلوالي“ ۾ ڪاجول سان به گڏ ڏسي سگھندا.

 

ڀارتي اداڪارا پريتي گپتا انٽرنيٽ تي پنهنجون فحش تصويرون ليڪ ٿيڻ واري مامري تي پريشان

لنڊن (شوبز نيوز) ڀارتي اداڪارا پريتي گپتا انٽرنيٽ تي پنهنجون فحش تصويرون ليڪ ٿيڻ واري مامري تي پريشان آهي ۽ سندس چوڻ هو ته اهو عمل سندس نِجي زندگيءَ ۾ دخل برابر آهي ۽ حڪومت کي اهڙن مامرن جو نوٽيس وٺڻ گھرجي. مشهور سوپ سيريزل ”ڪهاني گھر گھر ڪي“ کان مشهوري ماڻيندڙ پريتي گپتا تازو ئي بالي ووڊ ۾ قدم رکيو هو. سندس پهرين فلم ”اَن فرينڊ“ به فحش مواد جي ڪري ڀارت ۾ پابنديءَ جو شڪار ٿي چڪي آهي. ڄاڻايل تصويرو به ان ئي فلم جون ٻڌايون پيون وڃن. پريتي گپتا جو چوڻ هو ته حڪومت فلمون سينسر ڪرڻ ۽ انهن تي پابندي لڳائڻ بدران اهڙن مامرن تي ايڪشن وٺي. عوام ۾ عقل آهي، هو ڄاڻي ٿو ته کين ڇا ڏسڻ ۽ ڇا نه ڏسڻ گھرجي. ان جي لاءِ حڪومت کي گھرجي ته هو سينسر جو اختيار پنهنجي عوام جي هٿ ۾ ڏئي.

 

بيلجيم ۾ ٿيندڙ هاڪي ورلڊ ليگ جي ڪوارٽر فائنل ۾ انگلينڊ به پاڪستان کي هارائي ڇڏيو

اينٽورپ (اسپورٽس نيوز) بيلجيم ۾ ٿيندڙ هاڪي ورلڊ ليگ جي ڪوارٽر فائنل ۾ انگلينڊ به پاڪستان کي هارائي ڇڏيون، انگلينڊ پاڪستان پاران هڪ جي مقابلي ٻِن گولن سان فتح ماڻي پاڪستان جي ريو ڊي جنيرو اولمپڪس ۾ شرڪت تي سواليه نشان هڻي ڇڏيو. اينٽورپ ۾ کيڏيل ميچ جي شروعات ۾ ئي برطانيا راند تي قبضو ڄمائي رکيو ۽ شروعاتي 9 منٽن ۾ هڪ نه پر ٻه گول ڪري پاڪستاني رانديگرن جون وايون بتال ڪري ڇڏيون. برطانيا طرفان پهريون گول گرفٿ ۽ ٻيو گول ايلسٽر براگڊن ڪيو ۽ پهرين هاف ۾ برطانيا جي سرسي 2-0 ٿي وئي هئي. ٻئي ۽ ٽئين ڪوارٽر ۾ ٻئي ٽيمون ڪو گول ڪري نه سگھيون، پر چوٿين ڪوارٽر ۾ ميچ جي 48 هين منٽ ۾ عمر ڀٽا گول ڪري نقصان 2-1 ڪيو. ٻِن منٽن کان پوءِ برطانوي رانديگر هنري ويئر کي ييلو ڪارڊ ڏيکاري ميدان مان 5 منٽن جي لاءِ ٻاهر موڪليو ويو، پر پاڪستاني فاورڊ ان موقعي جو به فائدو نه وٺي سگھيا ۽ برطانيا هڪ جي مقابلي ٻِن گولن سان کٽي ايوينٽ جي سيمي فائنل جي لاءِ ڪوليفاءِ ڪري ورتو. ان ميچ جي ناڪاميءَ کان پوءِ پاڪستاني ٽيم ايندڙ سال ريو ڊي جينرو اولمپڪس ۾ سڌو سنئون ڪوليفاءِ ڪرڻ جو موقعو هٿن ۾ وڃائي ڇڏيو آهي. هاڻي پاڪستان کي پهريان ڀارت جي ڪوارٽر فائنل ۾ کٽي پوءِ ايوينٽ ۾ پنجين پوزيشن ماڻڻي پوندي ۽ پوءِ ان سان گڏ آڪٽوبر ۾ ٿيندڙ اوشيانا ڪپ ۾ آسٽريليا جي کٽڻ جو انتظار ڪرڻو پوندو.

 

پاڪستاني اسپنر محمد حفيظ کي بالنگ ايڪشن جي ٽيسٽ جي لاءِ ڀارتي ويزا ملي وئي

لاهور  (اسپورٽس نيوز) پاڪستاني اسپنر محمد حفيظ کي بالنگ ايڪشن جي ٽيسٽ جي لاءِ ڀارتي ويزا ملي وئي آهي، جڏهن ته پاڪستان ڪرڪيٽ بورڊ سندس ٽيسٽ ۾ چار جولاءِ کان اڳتي واڌ جي لاءِ انٽرنيشنل ڪرڪيٽ ڪائونسل (آءِ سي سي) کي درخواست به ڪري ڇڏي آهي. محمد حفيظ جو بالينگ ايڪشن سريلنڪا خلاف گال ۾ کيڏيل ٽيسٽ ميچ ۾ ٻيون ڀيرو شڪي رپورٽ ٿيو هو ۽ جيڪڏهن هِن ڀيري هو پنهنجو ايڪشن صحيح ثابت ڪرڻ ۾ ڪامياب نه ٿيو ۽ هُن جو ايڪشن 15 ڊگريءَ کان وڌيڪ نظر آيو ته سندس بالنگ تي هڪ سال جي پابندي لڳي ويندي. حفيظ جي بالنگ ٽيسٽ جي لاءِ 30 جون جي تاريخ ڏني وئي هئي، جيڪا چنئي ليبارٽري ۾ ٿيڻي هئي، پر ڀارتي ويزا نه ملڻ جي ڪري حفيظ ٽيسٽ جي لاءِ نه وڃي سگھيو. حفيظ پاڪستاني جٿي سان پاليڪيلي پهچي چڪو آهي، جتي 3 جولاءِ کان پاڪستان ۽ سريلنڪا ٽين ٽيسٽ ۾پنهنجو پاڻي ڪڇيندا. پاڪستاني ٽيم جي مينيجر نويد اڪرم چيمه چيو ته غير معمولي حالتن جي ڪري اسان آءِ سي سيءَ کي نئين تاريخ جي درخواست ڪئي آهي. اسان حفيظ جي ٽيسٽ 14 ڏينهن اندر ڪرائڻ جي هر ممڪن ڪوشش ڪئي پر انڊين سفارتخاني طرفان ويزا جاري نه ڪيو ويو. اسان ٽين ٽيست ۽ ون ڊي ميچن جي سيريز دوران نئين تاريخ جي درخواست ڪئي آهي. حفيظ جو ايڪشن 21 جون تي رپورٽ ٿيو هو ۽ آءِ سي سيءَ جي قانون موجب ايڪشن رپورٽ ٿيڻ جي 14 ڏينهن اندر ايڪشن جو ٽيسٽ ڪرائڻ لازمي آهي.

 

عالمي نمبر 3 اينڊي مري ومبلدن ٽينس جي ٻئي مرحلي ۾ جڳهه ٺاهي ورتي

انگلينڊ (اسپورٽس نيوز) عالمي نمبر 3 اينڊي مري ومبلدن ٽينس جي ٻئي مرحلي ۾ جڳهه ٺاهي ورتي، جڏهن ته ويمنز ايوينٽ ۾ دنيا جي نمبر 3 سيمونا هيلپ ۽ يوگيني بوچارڊ کي ايوينٽ کان ٻاهر ٿيڻو پيو. ٽينس سيزن جي ٽئين گرينڊ سلم ومبلدن ٽينس ٽورنامينٽ جي پهرين مرحلي ۾ دنيا جي نمبر 3 اينڊي مَري ۽ روسي رانديگر ميخائيل ڪوڪشڪن آمهون سامهون ٿيا. اسڪاٽس رانديگر مري ميخائيل ڪوڪشن کي 6-4، 7-6 ۽ 6-4 سان مات ڏئي اڳئين رائونڊ ۾ پهچي ويو. ويمنز ايوينٽ ۾ يوگيني بوچارڊ جو مقابلو چين جي ڊوان ڳنگئينگ سان ٿيو. چيني رانديگرياڻيءَ دنيا جي 12 نمبر يوگيني بوچارد کي 7-6، 6-4 سيٽن سان آئوٽ ڪلاس ڪيو. ايوينٽ جي هڪ ٻي ميچ ۾ رومانيا جي سيمونا هيلپ کي سلواڪيا جي جانا ڪيپي لوا هٿان شڪست سان منهن ڏيڻو پيو. جانا ڪيپلوا 5-7، 6-4 ۽ 6-3 سيٽن سان ڪاميابي ماڻي دنيا جي نمبر 3 سيمونا هيلپ کي ايوينٽ کان ٻاهر ڪري ڇڏيو.

 

ٽِه ملڪي سيريز جي تصديق کان پوءِ بنگلاديش بين الاقوامي ڪرڪيٽ جي شيڊولنگ سسٽم تي ڇِتي تنقيد

ڍاڪا (اسپورٽس نيوز) زمبابوي، پاڪستان ۽ ويسٽ انڊيز وچ ۾ ٿيندڙ ٽِه ملڪي سيريز جي تصديق کان پوءِ بنگلاديش بين الاقوامي ڪرڪيٽ جي شيڊولنگ سسٽم تي ڇِتي تنقيد ڪئي آهي. بنگلاديش ڀارت کي تازو ئي ٽِن ون ڊي ميچن تي ٻڌل سيريز ۾ هارايو هو، جنهن کان پوءِ ماضيءَ ۾ ڪمزور سمجھي ويندڙ ايشين ٽيم چيمپئنز ٽرافيءَ جي لاءِ ڪوليفاءِ ڪرڻ جو جشن ملهايو هو. ان کان اڳ بنگلاديش پاڪستان کي به 3-0 تان مات ڏني هئي، جنهن کان پوءِ آءِ سي سيءَ رينڪنگ ۾ ديشين جي پوزيشن ستين ٿي وئي هئي ۽ پاڪستان ۽ ويسٽ انڊيز کان اڳتي نڪري ويا هئا. ميزبان انگلينڊ کان سواءِ ڪرڪيٽ دنيا جون ٻيون سَت ٽيمون 2017ع ۾ چيمپئنز ٽرافي ۾ حصو وٺنديون، جنهن جي لاءِ ڪوليفاءِ ڪرڻ جي آخري تاريخ 30سيپٽمبر آهي. پر تازو ئي ويسٽ انڊيز تصديق ڪئي آهي ته سندن ٽيم زمبابوي ۾ پاڪستان ۽ ميزبان ٽيم سان ٽِه ملڪي سيريز کيڏندي، جنهن کان پوءِ بنگلاديش جي ٽورنامينٽ کان ٻاهر ٿيڻ جا کٽڪا وڌي ويا آهن. پاڪستان کي سريلنڪا خلاف پنجن ميچن تي ٻڌل ون ڊي سيريز ۾ به پنهنجي رينڪنگ بهتر بڻائڻ جو موقعو ملندو، جيڪا 11 جولاءِ کان شروع ٿيندي. بنگلاديش ڪرڪيٽ بورڊ جي ڊائريڪٽر جلال يونس چيو آهي ته جڏهن کان آءِ سي سيءَ ايف ٽي پي جي پيروي ڪرڻ ڇڏي ڏني آهي ۽ ٽيمن کي گڏيل طور ڊيل ڪرڻ جي اجازت ڏني آهي، تڏهن کان سڄو نظام خراب ٿي ويو آهي. هن چيو ته ان سان سسٽم ۾ ڪجھه خرابيون پيدا ٿيون آهن. مان ان جي حمايت نه ٿو ڪيان، اهو ڪو صحتمنداڻو مقابلو ناهي. بنگلاديش کي هاڻي چيمپئز ٽرافيءَ ۾ سِيٽ پڪي ڪرڻ لاءِ ايندڙ مهيني ڏکڻ آفريڪا خلاف ٽِن ون ڊي ميچن مان گھٽ ۾ گھٽ هڪ ميچ کٽڻي پوندي، پر جلال پراعتماد هو ته سندس ٽيم ايئن ڪري وٺندي. سندس وڌيڪ چوڻ هو ته اسان اڃا به چيمپئنز ٽرافي کيڏي سگھون ٿا، اسان کي صرف ڏکڻ آفريڪا خلاف ون ڊي سيريز ۾ سٺو پرفارم ڪرڻو پوندو ۽ مان ٻڌائي ڇڏيان ته اسان جي رانديگرن ۾ اها اهليت موجود آهي

 

پوليس آفيسرن خلاف ڪرپشن جي جانچ شروع

 

نيب آءِ جي سنڌ غلام حيدر جمالي سميت مکيه پوليس آفيسرن کي ڪرپشن ۽ ٻين ڏوهن ۾ ملوث قرار ڏيندي هٽائڻ جي سفارش ڪئي آهي. جڏهن ته جاچ شروع ڪندي ڪميٽي جوڙي وئي آهي. ميڊيا مطابق گذريل ڏينهن نيب چيئرمين قمرالزمان بخاري جي صدارت هيٺ ٿيندڙ اجلاس ۾ آءِ جي سنڌ غلام حيدرجمالي، ڊي آءِ جي هيڊڪواٽر عليم جعفري، اي آءِ جي فناس فداه حسين،  اي آءِ جي لاجسٽڪ تنوير زمان، ايس پي آصف رزاق، ايسي ايس پي مقصود ميمڻ، مدت ڪاظمي  خلاف جاچ  جي منظوري ڏني وئي. اجلاس ۾ آءِ جي سميت بين پوليس آفيسرن خلاف ڪيل ڪرپشن جي جاچ لاءِ ڪميٽي پڻ جوڙي وئي آهي. اجلاس ۾ نيب جي عملدارن پاران نيب جي چيئرمين کي بريفنگ ڏني وئي ته آءِ جي سنڌ سميت ٻيا پوليس آفيسر آرگنائيزنگ ڪرائيم ۾ ملوث آهن ۽ پوليس لائين ۾ ايندڙ سامان جي خريداري ۾ ڪروڙين رپين جي ڪرپشن ڪئي وئي آهي. بريفنگ ۾ وڌيڪ چيو ويو آهي ته  آءِ  جي سنڌ غلام حيدر جمالي اي اءِ جي فناس فدا حسين جي مدد سان سرڪاري فنڊن ۾ گهوٻيون هنيون ۽  هن ڪرپشن سميت ٻين ڏوهن جا ثبوت لڪائڻ لاءِ اي آءِ جي فناس کي هٽائي ڇڏيو. بيان ۾ وڌيڪ چيو ويو آهي ته آءِ جي سميت ٻين پوليس آفيسرن اربين رپين جي ڪرپشن ڪئي آهي.ذريعن جو چوڻ آهي ته آءِ جي سنڌ سرڪاري زمين تي گهر تعمير ڪرايا ۽ ڪلفٽن ۾ گهوڙن جي طنبيلن واري زمين تي بنگلا تعميرا ڪرايا جيڪي بعد ۾ ڪروڙين روپين ۾ وڪرو ڪيا ويا آهن. ذريعن جو چوڻ آهي ته آءِ جي حڪم تي 19ناڪاره موبائيلون خريد ڪيون ويون جن تي حملا ٿيا ته انهن گاڏين ۾ ويٺل پوليس اهلڪار شهيد ٿي ويا. نيب بلوچستان جي صوبائي وزير عبدالغفور لهڙي خلاف جاچ جي به منظوري ڏني وئي آهي. عبدالغفور لهڙي تي آمدني کان وڌيڪ 8 ارب جا اثاثا بڻائڻ جو الزام آهي. هوڏانهن ڪراچي جي گڏاپ ٽائون ۾ ورڪرز ويلفيئر بورڊ ۽ روينيو کاتي جي عملدارن خلاف به جاچ جي منظوري ڏني وئي. ان ۾ 66 ايڪڙ زمين جي خريداري ۽ رڪارڊ ۾ ڦيرڦار ڪرڻ ۽ 24 ڪروڙ رپين جو نقصان پهچائڻ جو الزام آهي.

ڪراچي:هيٽ اسٽروڪ سبب وڌيڪ 8 ڄڻا فوت

ڪراچي ۾ گرميءَ جي لهر گهٽجڻ باوجود انساني جانيون ضايع ٿيڻ جو سلسلو بند نه ٿي سگهيو آهي، هيٽ اسٽروڪ سبب وڌيڪ 8 ڄڻا فوت ٿي ويا آهن، جنهن کانپوءِ 12 ڏينهن دوران سڄي سنڌ ۾ فوت ٿيلن جو انگ 1369 سئو 61 ٿي ويو آهي. ڪراچي جي جناح اسپتال، ڪي ايم سي، سول، لياقت نيشنل اسپتال، قطر، ضياءُ الدين اسپتال، دل جي بيمارين واري اسپتال، اين آءِ سي ايڇ ۽ ٻين اسپتالن ۾ هيٽ اسٽروڪ جي مريضن جو علاج هلندڙ آهي. جناح اسپتال ۾ هيٽ اسٽروڪ سبب پنج ۽ عباسي شهيد اسپتال ۾ وڌيڪ ٽن مريضن دم ڏنو. جنهن کانپوءِ 12 ڏينهن اندر صرف ڪراچي ۾ حياتيون وڃائيندڙن جو انگ وڌي 12 سئو 61 ٿي ويو آهي. ٻئي طرف صوبي جي ٻين ننڍن وڏن شهرن ۾ به هيٽ اسٽروڪ سبب حياتيون ضايع ٿيڻ جو سلسلو جاري آهي. ڪرم پور ۾ استاد ۽ سماجي اڳواڻ حافظ محمود خان بنگلاڻي گرمي جي سٽ نه سهندي فوت ٿي ويو. وڌيڪ هڪ ڄڻي جي فوت ٿيڻ بعد حياتيون وڃائيندڙن جو انگ وڌي هڪ سئو 8 ٿي ويو آهي