تازيون خبرون

Daily Archives: July 3, 2015

گوجرانوالا ويجهو هيانءُ ڏاريندڙ ٽرين حادثو، ليفٽيننٽ ڪرنل سميت 12 جوان شهيد

گجرانوالا (مانيٽرنگ ڊيسڪ) گوجرانوالا ويجهو هانءُ ڏاريندڙ حادثو پيش آهي، پــُل ٽــُٽڻ سبب ٽرين جي انجڻ ۽ 3 گاڏا واهه ۾ ڪِري پيا، جنهن جي نتيجي ۾ ليفٽيننٽ ڪرنل عامر سميت 12 اهلڪار شهيد ٿي ويا، جڏهن ته پاڪ فوج ريسڪيو آپريشن ڪري پنجن زخمين ۽ 80 ڄڻن کي ٻاهر ڪڍي ورتو. مال بردار ٽرين وزيرآباد کان فيصل آباد وڃي رهي هئي جنهن ۾ 6 مسافر بوگيون به لڳايون ويون هيون. ٽرين هيڊ چناوان ويجهو پـُل ٽٽڻ سبب چيما واهه ۾ ڪِري پئي، جنهن جي نتيجي ۾ ڪيترائي ماڻهو ٻــُڏي ويا. حادثي کانپوءِ پاڪ فوج سميت ريسڪيو ٽيمن ۽ مقامي ماڻهن واقعي واري هنڌ پهچي ريسڪيو آپريشن شروع ڪيو جڏهن ته ڇهن ئي بوگين ۾ 300 جي لڳ ڀڳ مسافر سوار هئا. امدادي ڪارروائين ۾ 2 فوجي هيليڪاپٽر به حصو وٺي رهيا آهن جڏهن ته واهه ۾ ڪِريل انجڻ ۽ بوگيون ڪڍڻ لاءِ ڪِرين گهرائي وئي آهي. آءِ ايس پي آر موجب حادثي ۾ ليفٽيننٽ ڪنرل عامر سميت 12 اهلڪار شهيد ٿي ويا، ليفٽيننٽ ڪنرل عامر يونٽ ڪمانڊر هو. آءِ ايس پي آر موجب 8 اهلڪارن جا لاش واهه مان ڪڍيا ويا آهن، جڏهن ته پنج زخمين ۽ 80 ڄڻن کي ريسڪيو آپريشن ڪري ڪڍيو ويو. آءِ ايس پي آر جو چوڻ آهي ته شروعاتي جاچ رپورٽ موجب حادثو پـُل ٽٽڻ سبب پيش آيو آهي. ريلوي وزير خواجا سعد رفيق حادثي واري هنڌ پهچي ريسڪيو آپريشن جو جائزو ورتو. ان موقعي تي ميڊيا سان ڳالهائيندي خواجا سعد رفيق جو چوڻ آهي ته حادثي ۾ دهشتگردي جي امڪان کي رد نه ٿو ڪري سگهجي. هن چيو ته ٽرين ۾ ڦاٿل سڀني مسافرن کي ٻاهر ڪڍيو ويو آهي جڏهن ته گم ٿيل ڇهن ڄڻن جي ڳولا جاري آهي. ٻئي طرف وزيراعظم نواز شريف گوجرانوالا ۾ ٽرين حادثي تي افسوس جو اظهار ڪندي چيو آهي ته زخمين کي بهتر طبي سهولتون فراهم ڪيون وڃن. وزيراعظم اها به هدايت ڪئي ته امدادي ڪارروائيون تيز ڪري جلد ٽريڪ بحال ڪيو وڃي، جڏهن ته مسافرن کي منزل تي پهچائڻ لاءِ تڪڙا قدم کنيا وڃن.

 

چور دروازن مان اقتدار ۾ اچڻ وارا ٻڌي ڇڏين هاڻي کين وارو نه ملندو: قائم علي شاهه

خيرپور (ڊ.ر) سنڌ جي وڏي وزير سيد قائم علي شاهه خيرپور ضلعي جي شهر درازا شريف پهچي عظيم صوفي بزرگ ۽ شاعر حضرت حافظ عبدالوهاب حضرت سچل سرمست جي 194هين سالياني عرس جي موقعي تي سندس مزار تي حاضري ڀري گلن جي چادر چاڙهي سرڪاري تقريبن جو باضابطه افتتاح ڪري ڇڏيو آهي، اوقاف بابت وزيراعلي جو صلاحڪار ڊاڪٽر عبدالقيوم سومرو، درگاه جو سجاده نشين خواجه عبدالحق (ٽيون) ۽ ٻيا وڏي وزير سان گڏ هئا. سنڌ جي وڏي وزير سماع هال درازا شريف ۾ سچل ايوارڊ تقريب ۾ شرڪت ڪري صوفي راڳين کان سچل جو ڪلام ٻڌو ۽ مختلف شعبن ۾ نمايان ڪارڪردگي ڏيکايندڙن ۾ ايوارڊ ورهايا. وڏي وزير تقريب کي خطاب ڪندي چيو ته سچل سرمست ڀٽائي کانپوءِ ٻيو وڏو شاعر آهي، جنهن لاءِ ڀٽائي پاڻ چيو هو ته جيڪا ديڳڙي هُن چاڙهي آهي اُن جو ڍڪ سچل لاهيندو، سچل سرمست حق ۽ سچ جي ڳالهه ڪئي اهو ئي سبب آهي جو 194 سال گذري وڃڻ بعد به کيس ياد ڪيو وڃي ٿو، سچل پنهنجي ڪلام ۾ سچائي، اتحاد ۽ اتفاق جو پيغام ڏنو آهي. وڏي وزير وڌيڪ چيو ته هو اڳ به آمريت خلاف هئا ۽ هميشه رهندا، پ پ وارن هميشه جمهوريت لاءِ جاکوڙيو ۽ عوام جي راءِ ۽ فيصلن جو احترام ڪيو ۽ اڳتي به عوام جي راءِ جو احترام ڪيو ويندو، پ پ جو اهو ئي منشور رهيو آهي. هن چيو ته ضياءَ کان وٺي جيڪي به آمر آيا اُنهن پ پ کي ٽوڙڻ جي ڪوشش ڪئي ۽ پهرئين چونڊيل وزيراعظم ذوالفقار علي ڀٽو کي ڦاهيءَ به چاڙهيو ويو پر سندن ڪوششون ناڪام ويون ۽ “جيتري ٿڌ اوتري وڌ” جي مثال طور پ پ ويتر سڄي ملڪ ۾ مقبوليت ماڻي، سنڌ جي عوام کي اهڙو سون نه گهرجي جيڪو ڪن ڇِني. وڏي وزير قائم علي شاهه چيو ته هاڻ چور دروازن مان اقتدار مان اچڻ وارا ٻڌي ڇڏين ته کين هاڻ وارو نه ملندو ۽  پ  پ توڙي عوام چور دروازن مان ايندڙن کي نه قبوليندو. هن چيو ته پ پ وارن کي درگاهن جون دعائون آهن، شهيد ذوالفقار علي ڀٽو قلندر شهباز جي مزار تي سونو دروازو ٺهرايو ۽ موجوده سرڪار درگاهن جي ترقي ۽ زائرين کي سهولتون ڏيڻ لاءِ ڀرپور نموني جاکوڙي رهي آهي. هن چيو ته درگاهن تان ٿيندڙ آمدني درگاهن تي ئي خرچ ٿيڻ گهرجي، ائين نه ٿئي جو جيڪي آمدني گڏ ڪن ٿا اهي پاڻ کڻي وڃن، رشوت وارو عمل هاڻ ختم ڪيو ويندو. وڏي وزير وڌيڪ چيو ته سڄي سنڌ ۾ ڪرپشن خلاف جاکوڙي رهيا آهيون ۽ اها لعنت ختم ٿيڻ گهرجي، تڏهن ئي سنڌ چڱي ريت آباد ڪري سگهون ٿا ۽ نوجوانن جي اميدن تي پورو لهي سگهجي ٿو. وڏي وزير چيو ته هو اها حام نه هڻندا ته بيروزگاري ختم ڪري ڇڏي آهي بيروزگاري مڪمل طور ختم ڪرڻ ۾ وقت لڳندو، 20 سالن جي تاريخ ۾ ايتريون نوڪريون نه مليون آهن، جيڪي پ پ جي موجوده ۽ گذريل دور ۾ ڏنيو ويون، وڏي وزير قائم علي شاهه چيو ته بلدياتي چونڊون آزاد ۽ شفاف نموني ڪرايون وينديون ۽ بلدياتي سطح تائين بنيادي سهولتون ڏيڻ لاءِ عوامي نمائندن کي ئي بجيٽ ڏني ويندي. وڏي وزير ان موقعي تي درازاشريف ۾ ضلعي ڪائونسل جي عمارت هاءِ اسڪول لاءِ ڏيڻ جو اعلان ڪندي چيو ته اتي پڙهائي شروع ڪئي وڃي اتي نئين عمارت به تيار ڪئي ويندي. وڏي وزير اديبن ۽ شاعرن پاران سچل سرمست جي عرس جي تقريبن جي بائيڪاٽ جو نوٽيس وٺندي سچل يادگار ڪميٽي کي هدايت ڪئي ته ناراض اديبن کي گهرايو وڃي ۽ سندن خدمت به ڪئي وڃي، اديبن جو سنڌ جي ثقافت ۽ تهذيب ۾ اهم ڪردار آهي. ان کان اڳ خطاب ڪندي اوقاف بابت سنڌ جي وڏي وزير جي صلاحڪار ڊاڪٽر عبدالقيوم سومرو چيو ته کيس درگاهن تان ڪرپشن ختم ڪرڻ ۽ زائرين کي بنيادي سهولتون ڏيڻ جو ٽاسڪ مليو آهي ۽ هو اعلان ڪري ٿو ته هر ڳالهه برداشت ڪري سگهجي ٿي باقي ڪرپشن هرگز برداشت نه ڪبي، درگاهن جي معاملن ۾ ڪرپشن زيرو ليول تي آڻي پوءِ ساهه پٽيندس. ان موقعي تي ڪمشنر سکر ڊويزن محمد عباس بلوچ ۽ سچل يادگار ڪميٽي جي چيئرمين منور علي مٺاڻي آجياڻي تقرير ۾ درگاهه جي معاملن بابت بريفنگ ڏني. درگاهه سچل سرمست جي سجاده نشين خواجه عبدالحق (سوئم) خطاب ڪندي چيو ته هُن پنهنجي والد سخي قبول محمد فاروقي کان آخري لفظ اهي سکيا ته “پٽ هاڻ روئجان نه، وري ملندا سين، خدا جي هستي قائم رهندي. اِن کان اڳ ميڊيا سان ڳالهائيندي سنڌ جي وڏي وزير سيد قائم علي شاهه چيو ته سنڌ ۾ مختلف تحقيقاتي ادارن جي مداخلت بابت وزيراعظم کي تحفظات کان آگاهه ڪيو آهي. هن چيو ته اين ايف سي ايوارڊ تحت وفاق کي 50 کان 60 ارب رُپيا ڏيڻا آهن، جيڪي نٿا ملن، جنهن سبب سنڌ جا ترقياتي منصوبا مڪمل نه ٿي سگهيا آهن. تقريب جي موقعي تي سنڌ جي وڏي وزير قائم علي شاهه سچل ايوارڊ ورهايا، جن ۾ لائيف ٽائيم اچيومينٽ ايوارڊ مشهور ڳائڻي حميرا چنه، صوفي راڳي جو ايوارڊ سيد مهدي شاهه، بهترين راڳي جو ايوارڊ ممتاز لاشاري، بهترين سگهڙ صوفي حيدربخش، بهترين ملهه جو ايوارڊ محمد صديق بگٽي، لائيف ٽائيم اچيومينٽ ايوارڊ رڪي ٻائي ۽ هاسي ٻائي (نماڻو فقير) ۽ مرحوم گلشير ڀٽي کي ڏنا ويا، جڏهن ته وڏي وزير سيد قائم علي شاهه، اوقاف واري صلاحڪار عبدالقيوم سومرو، سجاده نشين خواجه عبدالحق سوئم، ڪمشنر سکر ڊويزن محمد عباس بلوچ، لعل بخش منگي ۽ ٻين خاص شيلڊون ڏنيون ويون. اهڙي سنڌ جي وڏي وزير قائم علي شاهه ريت سچل سرمست جي عرس جي موقعي تي سچل يادگار ڪميٽي پاران شايع ڪيل سرمست نمبر 36 ۽ سچل سووينيئر، سنڌ اطلاعات ۽ آرڪائيوز کاتي پاران شايع ڪيل خاص اشاعت “اچي ڏس عشق سچل جو” ڪتابن جو مهورت پڻ ڪيو، جڏهن ته مختلف اخبارن پاران خاص اشاعتون پڻ ڪيون ويون هيون.

 

صدر سان آرڊيٽر جنرل جي ملاقات، حڪومت جي شهرت ڪنهن اسڪينڊل سان مجروح ناهي ٿي: ممنون حسين

اسلام آباد (اين اين آءِ) پاڪستان جي صدر ممنون حسين آڊيٽر جنرل کي هدايت ڪئي ته هو عوامي اهميت جا معاملا بدعنواني جو خاتمو سرڪاري شعبي جي ڪارڪردگي بهتر بنائڻ ۽ عوام کي معياري خدمتون فراهم ڪرڻ جي سلسلي ۾ پنهنجو ڪردار ادا ڪري صدر کيس نئين مقرري تي واڌايون ڏيندي چيو ته آڊيتر جنرل آف پاڪستان جو ادارو سچائي ديانتداريمعيار ۽ شفافيت جي اعليٰ قدرن کي هٿي ڏيڻ ۾ اهم ڪردار جو مالڪ آهي صدر ان ڳالهه تي اطمينان جو اظهار ڪيو ته موجوده حڪومت جي شهرت ڪنهن اسڪينڊل سان مجروح ناهي ٿي هن چيو ته هاڻي ملڪ صحيح رستي تي هلي پيو آهي ۽ جملي اقتصادي صورتحال مستقبل قريب ۾ وڌيڪ بهتر ٿي ويندي اها ڳالهه آڊيتر جنرل آف پاڪستان رانا اسد اميد سان ڳالهائيندي ڪئي جنهن خميس تي ايوان صدر ۾ ان سان ملاقات ڪئي صدر آڊٽ جي شعبي ۾ فرانزڪ ماحوليات ۽ آءِ ٽي آڊيٽنگ جهڙن جديد رجحان کي ڪتب آڻيندي اڊٽ ڊپارٽمينٽ ۽ سرڪاري شعبي مان بدعنواني ۽ نااهلي کي پاڙان پٽڻ لاءِ بهتر ڪوششون ڪتب آڻڻ جي ضرورت تي زور ڀريو هن چيو ته پبلڪ اڪائونٽس ڪميٽي ناڻي وزارت ۽ ڪنٽرولر جنرل آف اڪائونٽس سان آڊيتر جنرل جي ڊپارٽمينٽ جو ويجهو رابطو سرڪاري مالياتي مئنجمينٽ حڪوڪمتي اهلڪارن جو موثر احتساب ۽ پارليماني نگران يکي هٿي ڏيڻ لاءِ هڪ اڻٽر عنصر آهي آڊيتر جنرل صدر کي ميرٽ شفافيت ۽ احتساب کي يقيني بنائڻ لاءِ پنهنجي کاتي جي ڪارڪردگي بهتر ڪرڻ لاءِ ورتل ڪيترن ئي اپائن بابت آگاهه ڪيو.

 

ملڪي سالميت ۽ خودمختياري تي رهڙ به نه اچڻ ڏني ويندي: وزيراعظم

اسلام آباد (بيورو) وزيراعظم نواز شريف ۽ گڏيل قومن ۾ پاڪستان جي مستقل سفير مليحه لوڌي وچ ۾ ملاقات دوران ڀارتي مداخلت وارو معاملو ڀرپور طريقي سان عالمي سطح تي اٿارڻ جو فيصلو ڪيو ويو آهي، وزيراعظم نواز شريف چيو آهي ته ملڪي سالميت  ۽ خودمختياري  تي رهڙبه  اچڻ نه ڏني ويندي، خطي ۾ امن خواري خواهش کي ڪمزوري نه سمجهيو وڃي.  اسلام آباد ۾ وزيراعظم نواز شريف سان گڏيل قومن ۾ پاڪستان جي مستقل سفير مليحه لوڌي ملاقات ڪئي. ملاقات دوران ڀارتي مداخلت وارو معاملو گڏيل قومن آڏو اٿارڻ، وزيراعظم جي آمريڪي دوري ۽ جنرل اسيمبلي کي خطاب سميت مختلف معاملن تي ڳالهيون ڪيون ويون. ذريعن موجب، مليحه لوڌي، ڀارتي مداخلت بابت گڏيل قومن کي خط لکڻ واري معاملي تي وزيراعظم کي آگاهه ڪيو. ان موقعي تي فيصلو ڪيو ويو ته ڀارتي مداخلت وارو معاملو ڀرپور نموني سان عالمي سطح تي اٿاريو ويندو. وزيراعظم نواز شريف ملاقات دوران ڳالهائيندي چيو ته پاڪستان خطي ۾ امن جو خواهشمند آهي پر امن واري ڪوششن کي ڪمزوري نه سمجهيو وڃي. وزيراعظم چيو ته ملڪي سالميت ۽ خومختياري جي تحفظ لاءِ هر ممڪن قدم کنيا ويندا، ملڪي سالميت تي هڪ رهڙ به برداشت نه ڪئي ويندي.

 

ڪراچي ۾ پ پ پنجاب جو اجلاس، بلاول پاران عيد بعد پنجاب جي دوري جو فيصلو، اڳواڻن کي پارٽي کي فغال ڪرڻ جي هدايت

ڪراچي (اسٽاف رپورٽر) بلاول هائوس ڪراچي ۾ پيپلز پارٽي جي چيئرمين بلاول ڀٽو زرداري جي صدارت هيٺ پ پ پنجاب جو اجلاس ٿيو،جنهن ۾ صوبي ۾ پارٽي جي ٻيهر تنظيم ڪاري جو فيصلو ڪيو ويو. اجلاس ۾ پيپلز پارٽي پنجاب جي صدر منظور وٽو، شيري رحمان،راجا پرويز اشرف، قمر زمان ڪائره ۽ ٻين جي شرڪت ڪئي. ان موقعي تي بلاول ڀٽو زرداري کي ڏکڻ پنجاب ۾ نئين تنظيم سازي بابت بريفنگ ڏني وئي. اجلاس ۾ ڳالهائيندي بلاول ڀٽو زرداري چيو ته هو عيد کانپوءِ پنجاب جو دوروڪندو ۽ ڪارڪنن سان ملاقات ڪندو. هن پارٽي اڳواڻن تي زور ڀريو ته پيپلزپارٽي پنجاب کي وڌيڪ فعال ڪيو وڃي. ٻئي طرف پيپلز پارٽي جي چيئرمين بلاول ڀٽي زرداري ڪراچي قديم وستي لياري جو دورو ڪيو. بلاول ڀٽو پارٽي ڪارڪنن سان ڳالهائيندي چيو ته لياري پيپلز پارٽيءَ جو ڳڙهه آهي، ڪارڪن مڪاني چونڊن جي تياري ڪن. پيپلز پارٽي جي چيئرمين بلاول ڀٽو زرداري لياري ۾صوبائي وزير جاويد ناگوري سان سندس ڀاءُ جي لاڏاڻي تي عذرخواهي ڪئي. ان کانپوءِ لياري جي مختلف علائقن جو دورو ڪري عوام کان مسئلا معلوم ڪيا. پ پ چيئرمين بلاول ڀٽو زرداري پارٽي ڪارڪنن کي هدايت ڪئي ته لياري مڪاني چونڊن لاءِ ڀرپور تياريون ڪيون وڃن.

 

گوجرانوالا ٽرين حادثي ۾ دهشتگردي جي امڪان کي رد نه ٿو ڪري سگهجي:خواجا سعد رفيق

لاهور (بيورو) ريلوي واري وزير خواجا سعد رفيق جو چوڻ آهي ته واقعي ۾ دهشتگردي جي امڪان کي رد نه ٿو ڪري سگهجي. ريلوي وزير خواجا سعد رفيق حادثي واري هنڌ پهچي ريسڪيو آپريشن جو جائزو ورتو. ان موقعي تي ميڊيا سان ڳالهائيندي خواجا سعد رفيق جو چوڻ آهي ته حادثي ۾ دهشتگردي جي امڪان کي رد نه ٿو ڪري سگهجي. هن چيو ته ٽرين ۾ ڦاٿل سڀني مسافرن کي ٻاهر ڪڍيو ويو آهي جڏهن ته گم ٿيل ڇهن ڄڻن جي ڳولا جاري آهي.

 

ڪراچي ۾ گرمي جي لهر( هيٽ ويو) سبب اٽڪل 65 هزار ماڻهو متاٿر ٿيا: شرجيل انعام ميمڻ

ڪراچي (اسٽاف رپورٽر) اطلاعات واري وزير شرجيل انعام ميمڻ چيو آهي ته ڪراچي ۾ گرمي جي لهر( هيٽ ويو) سبب اٽڪل 65 هزار ماڻهو متاٿر ٿيا آهن.ريڊيو پاڪستان سان ڳالهائيندي هن چيو ته صوبائي حڪومت متاثر ماڻهن کي بهترين طبي سهولتون فراهم ڪري رهي آهي، جيڪا سندن ذميواري آهي. هن چيو ته وفاقي حڪومت ڪراچي ۾ گرين بس اسڪيم شروع ڪندي ۽ صوبائي حڪومت پڻ بليو لائين ۽ ييلو لائين رٿا شروع ڪري چڪي آهي. هن چيو ته ان حوالي سان فنڊن جو ڪو به مسئلو ناهي اميد آهي ته ڄاڻايل سموريون رٿائون پنهنجي مقرر مدي ۾ پوريون ٿينديون. ان موقعي تي مسلم ليگ(ن) سنڌ جي اڳواڻ سينيٽر نهال هاشمي چيو ته وزير اعظم محمد نواز شريف پنهنجي ڪراچي واري ڪالهوڪي دوري ۾ چيو ته تازو گرمي وگهي ڪراچي ۾ فوتگين وارو سانحو ملڪي تاريخ جو تمام وڏو واقعو آهي. ۽ ان حوالي سان وزير اعظم چيو آهي ته ڄاڻيل سانحي ۾ سمورن لاڳاپيل کاتن جن ڪوتاهي ڏيکاري آهي انهن جو شفاف طريقي سان احتساب ٿيڻ گهرجي.هن چيو ته اها حقيقت آهي ته قدرتي آفتن کي ڪير به روڪي نٿو سگهي پر انهن کي گهڻي حد تائين گهٽائي ضرور سگهجي ٿو.هن چيو ته اها وقت جي ضرورت آهي ته صوبائي حڪومت پنهنجي ذميري محسوس ڪندي فنڊن جو شفاف طريقي سان استعمال ڪري.ڊي جي پي ڊي ايم اي چيو ته ڪراچي ۾ 303 رليف سينٽر قائم ڪيا ويا آهن. انهن مان 173 مرڪز رورل سنڌ ۽ باقي ڪراچي ۾ ڪم ڪري رهيا آهن.

 

نيب پاران سنڌ حڪومت جي اعليٰ آفيسرن خلاف جاچ وڌيڪ تيز ، گرفتارين جو امڪان

ڪراچي (اين اين آءِ) نيب پاران سنڌ حڪومت جي اعليٰ آفيسرن خلاف جاچ وڌيڪ تيز ڪئي وئي آهي، نيب ذريعن مطابق هن وقت سنڌ حڪومت جي 30 مان 17 سيڪريٽري ۽ اعليٰ آفيسر ڪرپشن ۽ اختيارن جي ناجائز استعمال جي الزامن جي ڪري نيب جي ان لسٽ ۾ شامل آهن جن خلاف ٺوس ثبوت جمع ڪيا پيا وڃن ۽ انهن جي گرفتاري جو امڪان آهي. ٻئي پاسي سرڪاري ڪمن ۾ منفي اثر پوڻ تي سنڌ جي وڏي وزير کي نيب خلاف شڪايت ڪئي وئي آهي ۽ نيب خلاف قانوني ڪارروائي تي راضي ڪرڻ جي ڪوشش ڪئي پئي وڃي، تفصيلن موجب ڪجهه آفيسرن عدالتن مان حفاظتي ضمانتون ڪرائي ورتيون آهن، جڏهن ته ڪجهه آفيسرن ٻاهرين ملڪن وڃڻ جي ناڪام ڪوشش ڪري رهيا آهن، جڏهن ته ٻاهرين ملڪ ويل آفيسرن کي وطن واپس آڻڻ لاءِ قانوني ڪارروائي ڪئي پئي وڃي، نيب ذريعن مطابق سنڌ جي اهم کاتن جا انتظامي سربراهن سميت گريڊ 20 ۽ 21 آفيسر به شامل آهن.

 

حيسڪو ۽ سيپڪو اسان جي حوالي ڪريو: سنڌ حڪومت جو وفاق کان مطالبو

ڪراچي (اسٽاف رپورٽر) سـِنڌ جي ناڻي واري وزير مراد علي شاهه، سيپڪو ۽ حيسڪو سنڌ حوالي ڪرڻ جو مطالبو ڪندي چيو آهي ته صوبي ڏانهن بلز ميٽر ريڊنگ تحت نه پر وفاقي وزير جي مرضي سان ايندا آهن، وفاق موڪليل بلز تي نظرثاني ڪري وڌيڪ هڪ ٽـَڪو به نه ڏنو ويندو، جيڪڏهن بلز وارو مسئلو حل نه ٿيو ته وفاق خلاف ڌرڻو هنيو ويندو. اسلام آباد ۾ پ پ سينيٽر اعتزاز احسن سان گڏيل پريس ڪانفرنس ڪندي سنڌ جي ناڻي واري وزير مراد علي شاهه چيو ته وفاقي حڪومت سنڌ جي مسئلن تي ڌيان نه پئي ڏئي، پنجاب کي ترقياتي منصوبا مڪمل ڪرڻ لاءِ وقت سر رقم فراهم ڪئي وئي وڃي. هن چيو ته پنجاب کي 22 هزار ميگا واٽ کان وڌيڪ بجلي فراهم ڪئي پئي وڃي، پر بل سنڌ ۾ وڌيڪ موڪليا پيا وڃن. مراد علي شاهه چيو ته سنڌ حڪومت 5 سالن جي عرصي دوران وفاق کي 41 ارب ملز جي مد ۾ ڏئي چڪي آهي پر وفاقي حڪومت وڌيڪ 65 ارب رپيا بجلي بلز جي مد ۾ گهري رهي آهي. ناڻي واري وزير چيو ته سنڌ حڪومت بجلي بلز جي مد ۾ جيتري رقم ادا ڪئي آهي، ان جو اڌ حصو به ڪنهن ٻي صوبي نه ڏنو هوندو. مراد علي شاهه چيو ته سنڌ ڏانهن بجلي جا بلز ميٽر ريڊنگ تحت ناهن ايندا پر اهي وفاقي وزير جي مرضي سان موڪليا ويندا آهن، وفاق اوور بلنگ واري معاملي جو ٻيهر جائزو وٺي. هن وڌيڪ چيو ته سنڌ جو پئسو عوام جي امانت آهي، هو جائز رقم کانسواءِ وفاق کي وڌيڪ هڪ ٽڪو به فراهم نه ڪندا. هن چيو ته خواجه آصف کي سنڌ جي مسئلن جي ڄاڻ ئي ناهي، پئسو سنڌ حڪومت فراهم ڪري ۽ هي وري سرڪيولر ڊيٽ ختم ڪري ڇڏين، ڇا اها زيادتي ناهي. مراد علي شاهه مطالبو ڪيو ته حيسڪو ۽ سيپڪو سنڌ حڪومت حوالي ڪيا وڃن، جيڪڏهن بجلي بلز وارو معاملو حل نه ٿيو ته وفاق خلاف ڌرڻو هنيو ويندو. ان موقعي تي ڳالهائيندي سينيٽر اعتزاز احسن چيو ته سنڌ کي هوا مان بجلي پيدا ڪرڻ لاءِ وفاق ڪي به سهولتون فراهم ناهن ڪيون. اعتزاز احسن چيو ته وفاقي حڪومت سنڌ جي مسئلن کي سنجيدگي سان نه وٺي رهي آهي، پنجاب جيان ٻين صوبن کي به ترقياتي منصوبا مڪمل ڪرڻ لاءِ وقت سر رقم فراهم ڪئي وڃي.

 

تحريڪ انصاف 35 پنڪچر لڳائڻ جي الزام تي معافي وٺي ڇڏي

ڪراچي(م.ڊ) تحريڪ انصاف اڳواڻ عارف علوي 35 پنڪچر لڳائڻ جي الزام تي معافي وٺي ڇڏي، عارف علوي جو چوڻ آهي ته تحريڪ انصاف افواهن ۽ غلط اطلاع تي 35 پنڪچرن جو الزام لڳايو، جنهن تي هو معافي وٺن ٿا سوشل ميڊيا تي جاري ڪيل بيان ۾ تحريڪ انصاف جي اڳواڻ عارف علوي چيو ته هنن اطلاعن ۽ افواهن جي بنياد تي 35 پنڪچرن وارو الزام لڳايو، اهڙي الزام کان اڳ تصديق ڪرڻ گهرجي ها، هنن کان اها غلطي ٿي آهي، جنهن تي هو معافي وٺن ٿا هن چيو ته بنا تصديق جي الزام هڻڻ غلط هو، کين اطلاعن ۽ افواهن تي يقين نه ڪرڻ گهرجي ها، ان کان اڳ تصديق ڪرڻ ضروري هئي.