تازيون خبرون

Daily Archives: July 2, 2015

وزير خوراڪ جو کاتي جي آفيسن جو اوچتو دورو، بدعنواني برداشت نه ڪئي ويندي: منظور وساڻ

ڪراچي (اين اين آءِ) سنڌ جي خوراڪ جي وزير اربع جي صبح سوير سنڌ سيڪريٽريٽ ۾ خوراڪ کات يجي آفيسن جو اوچتو دورو ڪيو هو سيڪريٽري خوراڪ ايڊيشنل سيڪريٽري خوراڪ ڊائريڪٽر خوراڪ سيڪشن آفيسر ۽ ٻين آفيسرنجي آفيسن ۾ ويو ۽ موجود آفيسن کان ان جي ڪم ۽ ڪارڪردگي بابت پڇاڻو ڪيو هن غير حاضر آفيسرن ۽ عملي کي وقت جي پابندي ڪرڻ جي هدايتون ڏنيون دوري کان پوءِ صوبائي سيڪريٽري خوراڪ لئڪ احمد صوبائي وزير منظور وساڻ کي خوراڪ کاتي ۽ ان جي ڪارڪردگي بابت بريفنگ ڏني ان موقعي تي منظور وساڻ واضح ڪيو ته کاتي ۾ گڊ گورننس جي ذريعي عوام کي بهتر خدمتون فراهم ڪرڻ انهن جي اولين ترجيحي آهي هن چيو ته هو ڪنهن قسم جي بدعنواني معاف نه ڪندو هن کاتي جي اهڙن آفيسرن جيڪي ڪنهن قسم جي بدعنواني جي ڪيسن ۾ ملوث آهن انهن جي ڪيسن جي لسٽ طلب ڪئي هن واضح ڪيو ته کاتي ۾ آن پي اسڪيل تي مقرريون برداشت نه ڪيون وينديون هن خوراڪ کاتي جي گودامن ۽ ان ۾ پيل ڪڻڪ جي ذخيرن جو مقدار ماليت کين محفوظ رکڻ ۽ بروقت مناسب طريقي سان مارڪيٽ تائين پهچائڻ جو تفصيل طلب ڪيو ۽ هدايتون ڏنيون ته صوبي جي عوام کي سڀ کان مناسب قيمتن تي ڪڻڪ فراهم ڪئي وڃي هن صوبائي سيڪريٽري خوراڪ کي هدايت ڪئي ته ديانتدار آفيسرن جي چونڊ ذريعي ڪارڪردگي کي بهتر بڻائڻ هن ايندڙ هفتي کاتي جي اعليٰ سطحي اجلاس طلب ڪرڻ ۽ مڪمل ڪارڪردگي رپورٽ پيش ڪرڻ جون هدايتون به ڏنيون.

 

”فور بز“ ميگزين دنيا جي سڀ کان وڌيڪ پيسو ڪمائيندڙ 100 شخصيتن جي فهرست جاري ڪري ڇڏي

نيويارڪ (شوبز نيوز) ”فور بز“ ميگزين دنيا جي سڀ کان وڌيڪ پيسو ڪمائيندڙ 100 شخصيتن جي فهرست جاري ڪئي وئي آهي. بالي ووڊ اداڪار اڪشي ڪمار، سلمان خان ۽ اميتاڀ بچن جڏهن ته ايم ايس ڌوني به دنيا جي سڀ کان وڌيڪ پيسا ڪمائيندڙن 100 شخصيتن جي فهرست ۾ شامل آهي. آمريڪي باڪسر فلائيڊ مي ويڌر ٽِي سو ملين ڊالرن جي ڪمائيءَ سان ٽاپ پوزيشن تي آهي، ان فهرست ۾ بالي ووڊ اداڪار اميتاڀ بچن ۽ سلمان خان ۾ 71 هين پوزيشن لاءِ مقابلو آهي، ٻئي ساڍا 33 ملين ڊالر ڪمائيندا آهن. اڪشي ڪمار ساڍا 32 ملين ڊالرن سان فهرست ۾ 76 هين پوزيشن تي آهي، جڏهن ته ڀارتي رانديگر مهيندرا سنگھه ڌوني 31 ملين ڊالر ڪمائي سان 82 هين نمبر تي آهي. بالي ووڊ اداڪارن هالي ووڊ جي ٽاپ اداڪارن ليونارڊيو ڊي ڪيپريو ۽ چيننگ ٽيٽم کي پوئتي ڇڏي ڏنو آهي، جن جي ڪمائي 29 ملين ڊالر آهي، بالي ووڊ جو ڪنگ شاهه رخ خان جو نالو ان فهرست ۾ نه هجڻ حيرت انگيز ڳالهه آهي. بالي ووڊ اداڪار اميتاڀ بچن جنهن 150 کان وڌيڪ فلمن ۾ ڪم ڪيو آهي تازو ئي فلم ”پيڪو“ ۾ اداڪاري جا اهڙا جوهر ڏيکاري ڪاميابيءَ جا نوان رڪارڊ جوڙيا اٿائين جو ماڻهون دنگ آهن. سلمان خان به بالي ووڊ جي ميگا اسٽارن ۾ ڳڻيو ويندو آهي، جيڪو هيل تائين 80 کان وڌيڪ فملمن ۾ اداڪاري ڪري چڪو آهي. پر ان فهرست ۾ اڪشي ڪمار جو نالو شامل هجڻ حيرانيءَ جي ڳالهه آهي، جيڪو سڄي سال ۾ رڳو 4 فلمون ڪندو آهي، ”فور بز“ موجب هي نتيجا موجوده انٽرٽينمينٽ جي ميدان ۾ بلڪل ٺيڪ آهن، جتي بالي ووڊ جا وڏا اداڪار (سلمان خان ۽ اميتاڀ بچن ساڍا 33 ملين ڊالر ڪمائيءَ سان) هالي ووڊ جي اي لسٽ اداڪارن ليونارڊو ڊي ڪيپريو ۽ چيننگ ٽيٽم کي به پوئتي ڇڏي ڏنو آهي، جن جي ڪمائي 29 ملين ڊالر آهي. ٽاپ ٽين فهرست ۾ 2 عورت ڳائڻيون به شامل آهن، جن ۾ ڪيٽي پيري ۽ ٻي ٽيلر سوئفٽ 9 نمبر تي موجود آهن.

 

مشهور پاڪستاني ٽي وي ميزبان شائسته لوڌيءَ ٻين شادي ڪري ورتي

ڪراچي (شوبز نيوز) مشهور پاڪستاني ٽي وي ميزبان شائسته لوڌيءَ ٻين شادي ڪري ورتي آهي. گذريل سال پنهنجي مارننگ شو دوران مذهب جي توهين ڪرڻ جي الزامن کان پوءِ ٽي وي اسڪرين تان برابر غائب رهندڙ شائسته لوڌيءَ پنهنجي شاديءَ جو اعلان لِڪل انداز ۾ ٽوئٽر تي ڪيو. شائسته لوڌيءَ ٽوئٽر پيغام ۾ شاديءَ بابت هڪ قرآني آيت شيئر ڪئي آهي، جنهن جي آخر ۾ هن پرڻيل هجڻ تي خدا جو شڪر به ادا ڪيو آهي. پر هُن پنهنجي چاهيندڙن کان پنهنجي مڙس جي سڃاڻپ مڪمل طور لِڪائي آهي. شائسته لوڌي 2002ع ۾ پنهنجي اڳوڻي مڙس کان طلاق وٺي ڇڏي هئي. گذريل سال مذهب جي توهين جي الزام کان پوءِ شائسته لوڌيءَ پنهنجي 3 ٻارن سان دبئيءَ منتقل ٿي وئي هئي ۽ رمضان جي مهيني ۾ ڪراچي آيل آهي

 

مصري ٽي وي جي ميزبان رميز غلال جي ڀوڳ تي آمريڪي اداڪارا پيرس هلٽن روئي ويٺي

قاهره (شوبز نيوز) مصري ٽي وي جي ميزبان رميز غلال جي ڀوڳ تي آمريڪي اداڪارا پيرس هلٽن روئي ويٺي. خابرو اداري موجب مصري ٽي وي شو جي ميزبان رميز غلال جي دعوت تي پيرس هلٽن شو ۾ شرڪت جي لاءِ دبئي پهتي ته کيس ان ڳالهه تي راضي ڪيو ويو ته هو شو جي رڪارڊنگ کان پهريان جهاز ۾ ويهي دبئيءَ جو هوائي نظارو ڪندي. پائليٽ رميز جي هدايت موجب اهڙي مهارت ڏيکاري جو جهاز ۾ ويٺل مسافرن کي لڳو ته جهاز هيٺ ڪرڻ لڳو آهي، جنهن تي پيرس هلٽن سميت جهاز ۾ سوار سڀ ماڻهو روئڻ لڳا. ڪيترن ئي ته پيرا شوٽ پائي جهاز مان ٽُپ ڏيڻ جي تياري ڪري ورتي، پر پيرس هلٽن ٽُپ ڏيڻ کان انڪار ڪيو. جڏهن آمريڪي اداڪارا کيس ٻڌايو ته هي مزاحيه پروگرام جي رڪارڊنگ هئي، ته هوءَ ڪاوڙ ۾ ڳاڙهي ٿي وئي. عمران خان جي اڳوڻي گھر واري جمائمه ان واقعي تي سخت تنقيد ڪندي لکيو ته اهڙي قسم جو ڀوڳ ڪنهن سان به نه ڪرڻ گھرجي.

 

رنبير ڪپور هڪ مڃيل اداڪار آهي هن کي فلاپ فلمن تي فڪرمند ٿيڻ بدران پنهنجي صلاحيتن تي ڀروسو ڪرڻ گھرجي: شاهه رخ خان

ممبئي (شوبز نيوز) بالي ووڊ جي ڪنگ خان جو چوڻ آهي ته رنبير ڪپور هڪ مڃيل اداڪار آهي ان جي لاءِ کيس پنهنجي فلاپ فلمن تي فڪرمند ٿيڻ بدران پنهنجي صلاحيتن تي ڀروسو ڪرڻ گھرجي. ڀارتي ميڊيا کي ڏنل انٽرويوءَ ۾ شاهه رخ خان جو چوڻ هو ته هڪ اداڪار جي حيثيت سان اسان جو لاڳاپو اهڙي انڊسٽريءَ سان آهي، جتي هر هڪ جي ڪيريئر ۾ لاها چاڙها ايندا رهندا آهن. رنبير ڪپور جو تعلق ان خاندان سان آهي جنهن هِن ملڪ ۾ فلمون شروع ڪيون، ان جي لاءِ هو کيس ان کان وڌيڪ بهتر صلاح نه ٿو ڏئي سگھي ته ڪنهن به اداڪار کي پاڻ تي ڀروسو هجڻ گھرجي پوءِ اوهان کي ڪامياب ٿيڻ کان ڪير به روڪي نه ٿو سگھي. چاهي 4 فلمون ناڪام ٿين يا 40، رنبير ڪپور پنهنجي فلاپ فلمن سبب پريشان ٿيڻ بدران پنهنجي اداڪاريءَ تي ڌيان ڏئي، ڇو ته ان جي ئي ذريعي هو هڪ ڀيرو ٻيهر ڪاميابين جي مٿانيهن کي ڇُهي سگھي ٿو. واضح رهي ته شاهه رخ تازو ئي بالي ووڊ ۾ اداڪار جي حيثيت سان 23 سال مڪمل ڪيا آهن ۽ هِن وقت سندس 2 فلمون ”دلوالي ۽ رئيس“ مڪمل ٿي رهيون آهن

 

پاڪستان ٽيسٽ ڪرڪيٽ ٽيم جي ڪپتان مصباح الحق ڪيريبيئن پريميئر ليگ سان معاهدو ڪري ورتو

لاهور (اسپورٽس نيوز) پاڪستان ٽيسٽ ڪرڪيٽ ٽيم جي ڪپتان مصباح الحق ڪيريبيئن پريميئر ليگ سان معاهدو ڪري ورتو آهي. مصباح الحق کي آل رائونڊر شعيب ملڪ جي جاءِ تي ڪيريبيئن پريميئر ليگ جي ٽيم بارباڊوس ۾ شامل ڪيو ويو آهي. مصباح کي آل رائونڊي جي جڳهه تي ٽيم ۾ کنيو ويو. شعيب ملڪ سريلنڪا خلاف ون ڊي اسڪواڊ ۾ پاڪستان ٽيم جي نمائندگي ڪندو، جنهن جي ڪري هو بارباڊوس سان نه کيڏي سگھندو، مصباح الحق 11 جولاءِ تي سي پي ايل جي لاءِ پهرين ميچ کيڏندو. سريلنڪا خلاف ٽين ٽيسٽ ميچ کيڏي مصباح الحق ڏيهه ورڻ بجاءِ ويسٽ انڊيز روانو ٿي ويندو، جتي هو ٽي ٽوئنٽي ليگ ۾ حصو وٺندو.ٻئي طرف پاڪستان جو مڊل آرڊر بيٽسمين عمر اڪمل به ڪيريبيئن ٽي ٽوئنٽي ليگ ۾ حصو وٺڻ جي لاءِ ويسٽ انڊيز روانو ٿي ويو آهي.

 

پاڪستاني آل رائونڊر محمد حفيظ ويزا نه ملڻ جي ڪري ڀارت نه وڃي سگھيو

لاهور (اسپورٽس نيوز) پاڪستاني آل رائونڊر محمد حفيظ جنهن کي پنهنجي بالنگ ايڪشن جي بائيو مڪينڪل ٽيسٽ جي لاءِ اڱاري ڏينهن چنئي وڃڻو هو، ويزا نه ملڻ جي ڪري هو ڀارت نه وڃي سگھيو. پاڪستان ڪرڪيٽ بورڊ جي ترجمان موجب محمد حفيظ کي ويزا جو انتظار آهي. اميد هئي ته اڱاري جي شام تائين کيس ويزا ملي ويندي ۽ هو اربع جي صبح چنئي روانو ٿي ويندو ۽ ان ئي ڏينهن چنئي جي ليبارٽري ۾ سندس بالنگ ايڪشن جي بائيو مڪينڪل ٽيسٽ ٿئي ها، جنهن کان پوءِ هو واپس سريلنڪا هليو وڃي ها. پاڪستان ۽ سريلنڪا وچ ۾ ٽيون ۽ آخري ٽيسٽ ميچ 3 جولاءِ کان پاليڪيلي ۾ شروع ٿيندي، پر ظاهري طور اڃا ويزا نه ملڻ ڪري ٽين ٽيسٽ ۾ حفيظ جي شرڪت جو امڪان گھٽ نظر اچي رهيو آهي. محمد حفيط جي بالنگ ايڪشن قائدن ۽ ضابطن خلاف هجڻ ڪري گال ٽيسٽ جي امپائرن رپورٽ ڏني هئي، پر هو ڪولمبو ۾ ٻي ٽيسٽ کيڏيو هو. آءِ سي سيءَ جي قائدن موجب جيڪڏهن ڪو بالر سال ۾ ٻه ڀيرا شڪي بالنگ ايڪشن جي وَر چڙهي ٿو ته هو هڪ سال تائين بين الاقوامي ڪرڪيٽ ۾ بالنگ نه ڪرائي سگھندو. محمد حفيظ جي بالنگ ايڪشن جي شڪي هجڻ بابت پهرين رپورٽ گذريل سال نومبر ۾ پاڪستان ۽ نيوزيلينڊ وچ ۾ ابوظهبي ۾ کيڏيل ٽيسٽ جي امپائرن ڏني هئي. محمد حفيظ جي بائيو مڪينڪ تجربي جي رپورٽ 14 ڏينهن ۾ اچي ويندي ان دوران هو بين الاقوامي ڪرڪيٽ ۾ بالنگ ڪرائي سگھي ٿو.

 

ياسر شاهه بهترين بالنگ عيوض 54 رانديگرن کي آئوٽ ڪيو

ڪراچي (اسپورٽس نيوز) ڪالهه ياسر شاهه جي زندگيءَ جو واقعي به وڏو اهم ڏينهن هو، جڏهن سريلنڪا خلاف هلندڙ ٽيشٽ سيريز ۾ هيل تائين ٻِن ٽيسٽ ميچن ۾ 15 وڪيٽون وٺڻ تي آءِ سي سيءَ رينڪنگ ۾ کيس ٽاپ ٽين بالرن ۾ شامل ڪيو ويو. 2014ع ۾ پنهنجي ٽيسٽ ڪيريئر جي شروعات ڪندڙ 29 سالا ياسر شاهه هيل تائين صرف 9 ٽيسٽ ميچون کيڏيون آهن جن ۾ هن بهترين بالنگ عيوض 54 رانديگرن کي آئوٽ ڪيو آهي. ياسر شاهه سڀ کان گھٽ ٽيسٽ ميچن ۾ 50 وڪيٽون مڪمل ڪندڙ پاڪستاني بالر آهي. خيبرپختون خواهه صوبي سان تعلق رکندڙ ياسر شاهه هِن وقت آءِ سي سيءَ جي بهترين ٽيسٽ بالرن جي فهرست ۾ 750 پوائنٽن سان نائين نمبر تي آهي. اها ياسر جي ڪيريئر جي بهترين ريٽنگ آهي، ان فهرست ۾ نالو اچڻ واري ڪاميابي کيس گال ۾ سريلنڪا خلاف پهرين ٽيسٽ ميچ ۾ شاندار ڪارڪردگيءَ کان پوءِ ملي، گال ٽيسٽ ۾ شاهه پنهنجي ڪيريئر جي بهترين بالنگ ڪندي 90 رنسن عيوض سَتن رانديگرن کي آئوٽ ڪيو ۽ پاڪستان جي فتح ۾ پڻ اهم ڪردار ادا ڪيائين. ياسر شاهه ڪولمبو ۾ ٻين ٽيسٽ ۾ به 8 وڪيٽون ورتيون، پر ٽيم ڪامياب نه ٿي سگھي. ياسر شاهه پهرين ٽيسٽ ميچ آڪٽوبر 2014ع ۾ آسٽريليا  خلاف دبئيءَ ۾ کيڏي هئي. ان ٽيسٽ ميچ ۾ سندس بالنگ ڏسي مشهور آسٽريلوي ليگ اسپنر شين وارن پنهنجي ٽوئٽر پيغام ۾ سندس صلاحيتن جي تعريف ڪئي هئي. ياسر شروعاتي 10 ٽيسٽ بالرن ۾ شامل واحد پاڪستاني بالر آهي ۽ ياسر شاهه کان پوءِ ان فهرست ۾ پاڪستاني آف اسپنر شعيد اجمل جو نالو آهي، جيڪو هن وقت 12 هين نمبر تي آهي. ياد رهي ته سعيد اجمل شڪي بالنگ ايڪشن جي ڪري 6 مهينن کان وڌيڪ وقت تائين انٽرنيشنل ڪرڪيٽ کان پري آهي ۽ ايڪشن جي بهتريءَ کان پوءِ هو پاڪستان جي لاءِ ڪا ٽيسٽ ميچ ناهي کيڏيو.

 

آسٽريليا ۽ نيوزيلينڊ جون ٽيمون هلندڙ سال نومبر ۾ ڪرڪيٽ جي تاريخ ۾ پهريون ڀيرو هٿرادو روشينن ۾ ٽيسٽ ميچ کيڏنديون

سڊني (اسپورٽس نيوز) آسٽريليا ۽ نيوزيلينڊ جون ٽيمون هلندڙ سال نومبر ۾ ڪرڪيٽ جي تاريخ ۾ پهريون ڀيرو هٿرادو روشينن ۾ ٽيسٽ ميچ کيڏنديون. ٽِن ٽيسٽ ميچن جي سيريز جو آخري ميچ 27 نومبر تي هٿرادو روشنين ۾ ايڊيليڊ جي ميدان تي کيڏي ويندي ۽ ان ٽيسٽ ميچ ۾ گلابي بال استعمال ڪيو ويندو، جڏهن ته رانديگر روايتي اڇي رنگ جون ڪِٽون ئي استعمال ڪندا. ڊي اينڊ نائيٽ ٽيسٽ ميچ دوران روايتي طور چانهن ۽ مانجھاندي بدران هاڻي رات جي مانيءَ جو وقفو ٿيندو. ڪرڪيٽ آسٽريليا جي چيف ايگزيڪيوٽو جيمز سوڌرلينڊ موجب کيس اميد آهي ته ڊي اينڊ نائيٽ ڪرڪيٽ جي ڪري ان راند ۾ وڌيڪ دلچسپي ورتي ويندي. جيمز سوڌرلينڊ موجب عالمي سطح تي ٽيسٽ ڪرڪيٽ سان اهو مسئلو آهي ته هو گھڻيون ميچون هفتي جي انهن ڏينهن ۾ کيڏيون وينديون آهن جڏهن ڏينهن جو ماڻهو ڪم ڪار ۾ مصروف هوندا آهن ۽ ٻار اسڪولن ۾ هوندا آهن، پر راند جي وقت ۾ بدلاءَ جي نتيجي ۾ شوقين آفيس وقت ۽ ٻار اسڪول جي موڪل کان پوءِ چند ڪلاڪ ميچ ڏسڻ جي لاءِ اسٽيڊيم ۾ اچي سگھندا. ان کان سواءِ ملڪ جي ٻين علائقن ۽ ٻين ملڪن ۾ ٽي ويءَ تي ميچ ڏسندڙن شوقينن جي انگ ۾ به واڌ ٿيندي. نيوزيلينڊ ڪرڪيٽ پليئرز ايسوسئيشن موجب رانديگر ان تجربي جي ڪري پريشان آهن. ايسوسئيشن جي چيف ايگزيڪيوٽو هيٿ ملز ٽيسٽ ڪرڪيٽ هٿرادو روشنيءَ ۾ کيڏڻ ۽ گلابي بال جي استعمال جي ڪري پيش ايندڙ ڏکيائين تي کٽڪن جو اظهار ڪيو. هن چيو ته اعتراضن باوجود رانديگر ان راند ۾ هر سطح تي ايندڙ سٺين شين کي ڏسندا. ان کان اڳ نيوزيلينڊ پليئرز ايسوسيئيشن هٿرادو روشنين ۾ ٽيسٽ ڪرڪيٽ کيڏڻ واري خيال تي اعتراض ڪندي چيو هو ته رانديگرن کي کٽڪا آهن، ان سان راند جي اهميت گھٽ ٿي ويندي. پر هاڻي نيوزيلينڊ پليئرز ايسوسئيشن مالي ڏکيائين کان نڪرڻ جي لاءِ  سال 2011ع کان پوءِ آسٽريليا سان پهرين ٽيسٽ سيريز مان هڪ ميچ هٿرادو روشنين ۾ کيڏڻ تي راضي ٿي ويو آهي ڇو ته کين ٽيسٽ ميچ کيڏڻ جو سٺو معاوضو ملندو. ڪرڪيٽ آسٽريليا نومبر ۾ ٿيندڙ نيوزيلينڊ خلاف سيريز ۾ پهرين ڊي اينڊ نائيٽ ٽيسٽ ميچ کي نظر ۾ رکندي آزمائشي طور شيفليڊ شيلڊ 15-2014ع سيزن ۾ هڪ فرسٽ ڪلاس ڊي اينڊ نائيٽ ٽيسٽ ميچ ڪرايو هو.

 

تيل اگهن ۾ واڌ جي سمري رد

 

وزيراعظم محمد نواز شريف جولاءِ جي مهيني جي لاءِ پيٽروليم مصنوعات جي قيمتن ۾ اضافي جي لاءِ پيٽروليم ۽ قدرتي وسيلن واري وزارت جي سمري کي رد ڪري ڇڏيو آهي. اڱاري ڏينهن هتي اسلام آباد ايڪسپريس وي جي توسيع واري منصوبي جي پيڙهه جو پٿر رکڻ جي موقعي تي وزيراعظم پيٽروليم مصنوعات جي قيمتن جي فرق کي پورو ڪرڻ جي لاءِ اڍائي ارب رپين جي سبسڊي جو اعلان ڪيو ۽ چيو ته رمضان المبارڪ جي دوران عوام جي مفاد جي لاءِ حڪومت پيٽروليم مصنوعات جي قيمتن ۾ اضافو نه ڪندي. هن چيو ته اوگرا وزارت پاران پيٽرول جي قيمت ۾ 4.26 رپيا في ليٽر جي تجويز ڏني هئي جڏهن ته مون ذاتي طور تي ان کي رد ڪيو ته جيئن ان ڳالهه کي يقيني بڻايو وڃي ته رمضان المبارڪ دوران قيمتن ۾ اضافو نه ٿئي. سمري موجب گاسليٽ ۾ 0.67 رپيا في ليٽر، هائي اوڪٽيل (ايڇ او بي سي) جي قيمت ۾ 7.3 رپيا في ليٽر اضافو ٿيڻو هو جنهن کي منظور نه ڪيو ويو هوڏانهن  وزيراعظم محمد نواز شريف چيو آهي ته  ووٽ وٺڻ لاءِ ڪڏهن به غلط ڳالهه ناهي ڪئي، ٿورو به مسئلو ٿئي ته عوام روڊن تي ڏنڊا کڻي اچي ٿو، بجلي جو سسٽم ٿورو هيٺ مٿي ٿئي ٿو ته عوام پريشان نه ٿئي، صبر ڪري،اليڪشن جي ڏينهن ۾ ئي چيو هو ته لوڊشيڊنگ جو مسئلو جلد ختم نٿا ڪري سگهون اسان جي دور ۾ بجلي 5 رپيا 25 پئسا في يونٽ  گهت ٿي اها ڪا معمولي ڳالهه ناهي، جڏهن ته لوڊشيڊنگ به گذريل سال جي ڀيٽ ۾ گهٽ آهي، هن چيو ته پاڪستان ترقي ۽ خوشحالي جي منزل طرف گامزن آهي، بنيادي ڍانچي جي ترقي، بجلي جي پيداوار، عالمي معيار جي رستن ۽ موٽرويز جي تعمير، عوامي ڀلائي سميت مختلف ترقياتي منصوبن تي ڪم جاري آهي، پاڪ چين اقتصادي لنگهه منصوبي سان خطي جي تقدير بدلجي ويندي، پنهنجي حڪومت جي دور ۾ بجلي جي مسئلي کي حل ۽ لوڊشيڊنگ جو خاتمو آڻيندي، وفاقي گادي واري شهر ۾ عالمي معيار جا رستا تعمير ڪيا ويندا، ايندڙ ٽن سالن ۾ اسلام آباد جي تصوير بدلائي ڇڏينداسين، زيرو پوائنٽ کان روات تائين ايڪسپريس وي جي واڌ سان شهرين جي اچ وڃ جي بهتر سهولت ملندي. اڱاري ڏينهن هتي اسلام آباد هاءِ وي سگنل فري منصوبي جي پهرين مرحلي جي پيڙهه جو پٿر رکڻ واري تقريب کي خطاب ڪندي هن چيو ته ايڪسپريس هاءِ وي جي توسيع وارو منصوبو تمام وڏو منصوبو آهي، پهريون مرحلو زيرو پوائنٽ کان فيض آباد تائين هوندو جنهن تي اڄ کان ڪم شروع ٿي ويو آهي. ٻيون مرحلو فيض آباد کان ڪورال تائين ايڪسپريس وي جي توسيع جو هوندو جنهن تي آگسٽ ۾ ڪم شروع ٿيندو ۽ ٽئين مرحلي ۾ ڪورال کان روات تائين رستي جي واڌ جي منصوبي تي ڪم شروع ٿيندو. منصوبي جو مجموعي مفاصلو 24 ڪلوميٽر آهي جيڪو معياري لحاظ کان موٽروي کان وڌيڪ بهتر هوندو ۽ ان ۾ موٽرويز کان وڌيڪ ڦاڪون شامل هونديون. هن چيو ته روات کي موٽروي سان ڳنڍيو ويندو. هن چيو ته اسان جي حڪومت اسلام آباد راولپنڊي جي شهرين جي لاءِ ميٽرو بس جو منصوبو ڏنو جيڪو مڪمل ٿي چڪو آهي، ان تي تنقيد ڪندڙ هاڻي ان جي حمايت ڪري رهيا آهن. شاهراهه ڪشمير منصوبي ۾ دير جو ذڪر ڪندي هن چيو ته مون عهدو سنڀالڻ کانپوءِ شاهراهه ڪشمير کي جلد کان جلد مڪمل ڪرڻ جي هدايت ڪئي هئي. هن لاڳاپيل عملدارن کي هدايت ڪئي ته ڪشمير هاءِ وي منصوبي تي ٿيندڙ بيقاعدگين جي جاچ ٿيڻ گهرجي. وزيراعظم چيو ته هي منصوبو ڪيترن ئي سالن تائين دير جو شڪار رهيو، قومي ناڻي کي ڦريندڙن جو حساب ٿيڻ گهرجي. هن چيو ته مري ايڪسپريس وي کي معياري بڻايو ويندو ۽ بهاره ڪهو ۾ هڪ اوورهيڊ برج ٺاهيوويندو ته جيئن مسافرن کي اچڻ ۾ سهولت ٿئي. هن چيو ته رستن جي تعمير سان گڏوگڏ بجلي جي منصوبن تي پڻ ڌيان ڏنو پيو وڃي. وزيراعظم چيو ته لاهور ايئرپورٽ کي اسان جي تجويز ڪيل منصوبي موجب نه بڻايو ويو، وڏن وڏن منصوبن کي ڪنجوسي سبب ننڍو ڪيو وڃي ٿو ۽ ڪا بچت به نه ٿي ٿئي. هن چيو ته لاهور ايئرپورٽ جي اندرئين ۽ ٻاهرئين ملڪ ٽرمينل کي جدا ڪيو ويندو. وزيراعظم چيو ته لاهور کان اسلام آباد موٽروي جي مدو 10 سال هو جيڪو پورو ٿي چڪو آهي، هاڻي ان جي نئين سر تعمير ۽ رنگ روغن جي ضرورت آهي جنهن تي ڪم جاري آهي. هن چيو ته رستن جا منصوبا بلوچستان، خيبرپختونخواهه، پنجاب، سنڌ، گلگت بلتستان ۽ آزاد ڪشمير تائين تعمير ڪيا ويندا. انهن منصوبن سان گڏوگڏ بجلي جي منصوبن جي لاءِ پڻ فنڊ مهيا ڪيا پيا وڃن ته جيئن بجلي جي کوٽ ۽ لوڊشيڊنگ تي ضابطو آڻي سگهجي. وزيراعظم چيو ته جتي جتي وسيلا دستياب هوندا انهن منصوبن جي لاءِ خرچ ڪيو ويندو. هن چيو ته پاڪستان ٽيڪ آف جي پوزيشن ۾ اچي ويو آهي، پاڪ چين اقتصادي لنگهه ۾ وڏا وڏا منصوبا شامل آهن جن تي 46 ارب ڊالر جي سيڙپڪاري ٿيندي.